سلمى ويوسف
لما وصل الاثنان لبيت العيلة، لقوا عربية أنيقة واقفة قدام الباب. أول ما دخلوا الصالة… وقعت عينيهم على شاب لابس قميص أبيض ناصع… وساعة بتلمع في إيده. كان قاعد بهدوء بيشرب القهوة مع الحاجة وداد والخالة سوسو… والتوتر باين على وش الأخيرة.
سيف نهض واقف بابتسامة واثقة:
ـ أهلًا يا سلمى… نورتي. كنت جاي أبارك… بس اتفاجئت بالصور اللي مالية الجروبات… مع إننا متفقين إننا لسه بنفكر.
يوسف تدخل بجسده الرياضي… وحط إيده في جيبه بثقة:
ـ والتفكير خلص يا دكتور. سلمى دلوقتي محجوزة لذوقي الصعب… والشبكة اللي في إيديها دي علامة «ممنوع الاقتراب أو التصوير».
سيف بص له بتحدي:
ـ باشمهندس يوسف… أنا بسمع عنك كل خير… بس الجواز مش بالعافية. وسلمى إنسانة رقيقة… ومحتاجة حد يفهم لغتها. وإحنا دكاترة زي بعض… وبنفهم بعض من نظرة.
سلمى حدثت نفسها بذهول:
ـ يا نهار أسود… ده أنا مدرسة لغة عربية… إيه اللي جابنا لبعض؟!
يوسف بص ليها وغمز مداعبًا… بعدين وجه كلامه لسيف:
ـ فعلًا يا دكتور… هي رقيقة جدًا… لدرجة إنها لسه قايلة لي في المحل إنها بتموت فيا… وما تقدرش تعيش من غير مناقرتي. مش كده يا لولي؟
سلمى حست برغبة إن الأرض تنشق وتبلعها بسبب لقب «لولي»… بس اضطرت تجاري اللعبة:
ـ طبعًا يا يويو. يا دكتور سيف… يوسف أصله باشمهندس حياتي… فمعلش بقى… النصيب غلاب.
سيف ما قدرش يتمالك أعصابه. قرر يرحل… بس رمى كلماته الأخيرة قبل ما يمشي:
ـ ماشي يا يوسف… مبروك. بس خلي بالك… جروب العيلة مش بس عليه صوركم… ده عليه تسجيل بصوت خالتو سوسو وهي بتقول إن الخطوبة دي تمثيلية… عشان تداروا على اللي حصل في المنور.
الصمت المطبق خيم على المكان. الحاجة وداد بصت ليوسف وسلمى بعيون بتشتعل غضبًا:
ـ تمثيلية يا يوسف؟ يعني إنتَ بتضحك على أمك؟
يوسف بص لسلمى بهدوء مشوب بالحذر:
ـ البسي يا لولي… الحرب العالمية التالتة قامت فعلًا.
***
يوسف سحب إيد سلمى بسرعة… ودخل بيها الأوضة… وقفل الباب وراهم بإحكام. برة… البيت كان بيغلي بالأصوات… وصوت لطم الحاجة وداد بيعلو وهي بتصرخ بانفعال:
ـ يا مري العيال بيمثلوا عليا يا سوسو!
يوسف قرب منها وهمس بنبرة حادة:
ـ شفتي… التسجيل ده لو اتثبت علينا… أمي مش هتدخلنا البيت تاني. وأنا كرامتي كباشمهندس هتبقى في الأرض قدام الدكتور بتاع السنان ده.
سلمى بصت له بذعر:
ـ طب والعمل؟ دي خالتو سوسو صوتها واضح في التسجيل… والناس بدأت تشك.
يوسف اعتدل فجأة… كإن فكرة خطرت له… وقال بثقة:
ـ الحل إننا نخرج دلوقتي ديت رومانسي… ونصور صور تغيظ الحجر… وننزلها على نفس الجروب. ونكتب: «الناس اللي بتموت من الغيرة وبيطلعوا إشاعات… لازم نخليهم يشكوا في ودانهم ويصدقوا عيونهم».
***
في الكافيه
يوسف اختار كافيه هادي جدًا على النيل. قعدوا متقابلين. سلمى كانت متوترة… بتاكل أظافرها بقلق… ويوسف منشغل بيظبط زوايا الموبايل… بيحاول يلتقط صورة مثالية.
قال بضيق خفيف:
ـ ممكن تبطلي تاكلي ضوافرك؟ إحنا عايزين صورة حب… مش صورة جوع كافر. اضحكي… وبصي لي بحنان يا سلمى.
ردت بحدة خفيفة:
ـ حنان مين يا يوسف؟ ده أنا لو بصيت لك هطلع نار من مناخيري. وبعدين… إنتَ لابس القميص اللي بحبه… قصدي القميص المستفز ده… ليه؟
ابتسم بخبث… وقرب منها أكتر:
ـ أوه… يعني مركزة في هدومي كمان؟ طب قربي بقى… عشان السيلفي ده هو اللي هينقذ رقبتنا.
قرب جدًا… وحط إيده خلف ضهرها. في اللحظة دي… سلمى حست إن قلبها بيخفق بسرعة غير معتادة… وما كانش تمثيل المرة دي. رفعت عينيها ليه… وللحظة قصيرة نسيت كل حاجة… نسيت سيف ووداد… وحتى المحشي.
قال بصوت واطي وهو بيبص في عينيها:
ـ على فكرة… عينيكي بتلمع في الضلمة. باين عليكي مدرسة لغة عربية شاطرة… وبتحبي الغزل العفيف.
حاولت تستعيد توازنها:
ـ ده فلاش الموبايل يا باشمهندس… ما تسرحش بخيالك.
وفجأة… وفي ذروة اللحظة المصطنعة دي… ظهر سيف ومعاه نوجا… كإن تحالف خفي اكتمل.
نوجا قالت بسخرية:
ـ يا عيني… التمثيل واصل لمراحل متطورة. بس يا ترى يوسف عارف إن سلمى لسه محتفظة بدبدوب سيف اللي جابهولها في عيد ميلادها؟
ملامح يوسف تصلبت. التفت لسلمى بنظرة حادة:
ـ دبدوب؟ إنتي لسه شايلة دباديب يا سلمى؟
كادت ترد… بس يوسف وقف فجأة… وأمسك إيدها بقوة قدامهم… وقال بثبات:
ـ وماله… خليه ذكرى. عشان كل ما تشوفه… تعرف الفرق بين الدبدوب… وبين السبع اللي اختارته يكمل معاها حياتها. يلا بينا يا خطيبتي… مش عايزين نقعد مع ناس نفسيتها محتاجة حشو عصب.
سحبها وخرج بيها… سايب وراه نظرات مشتعلة.
أول ما ركبوا العربية… صمت غريب خيم بينهم.
سلمى قالت بصوت واطي:
ـ يوسف… إنتَ كنت بتمثل… صح؟
فضل بيبص للطريق قدامه بحدة… بعدين قال:
ـ مش عارف يا سلمى. بس اللي أعرفه… إن سيف ده لو شوفت وشه تاني… مش هضمن لك سلامة العفش اللي في البيت.
***
رجعوا البيت… والصمت الثقيل مخيم عليهم… كأنه هدوء ما قبل العاصفة. أول ما دلّفوا من الباب… لقوا الحاجة وداد قاعدة في ردهة البيت… قابضة بيمينها على مسبحتها… وباليد التانية ماسكة دفتر هواتف كبير… وعلى ثغرها ابتسامة غامضة تذكرك بالموناليزا.
يوسف سأل بنبرة مليانة قلق:
ـ خير يا أمي؟ الابتسامة دي وراها فاتورة كهرباء غالية… ولا إيه؟
ردت بهدوء واثق:
ـ ولا غالية ولا رخيصة يا حبيبي. أنا فكرت في كلام سيف… والتسجيل اللي سمعه لينا… ولقيت إن الحل الوحيد عشان نقطع لسان الكل… ونثبت إن حبكم حقيقي… إننا نكتب الكتاب… ونعمل فرح عائلي بكره بالليل في جنينة البيت.
الحقيبة سقطت من إيد سلمى من فرط الصدمة:
ـ بكره؟! يا خالتو… ده أنا لسه ما لحقتش أغسل وشي من خروجة النهارده. فرح إيه اللي بكره؟ ده الإعراب في اللغة العربية بياخد وقت أكتر من كده!
الحاجة وداد ردت بذكاء ودهاء:
ـ والله يا بنتي… الجاهز موجود. والفستان أنا حجزته لكي من الأتيليه اللي جنبنا… والمعازيم كلهم عرفوا. لو ممانعين… يبقى سيف كان عنده حق… وهي فعلًا تمثيلية… وأمك هتبعت تلم عزالك بقى… وتسافري تشوفي حالك عندها مع جوزها.
يوسف وسلمى تبادلوا النظرات… نظرة الغريق اللي بيستنجد بمن ينجيه.
يوسف قال بصوت مخنوق من شدة الموقف:
ـ طبعًا يا أمي. موافقين. إحنا أصلًا كنا مستعجلين… بس كنا مكسوفين منك.
سلمى انزوت في أوضتها… بتندب حظها وبتمد شعرها:
ـ إنتَ مجنون؟ بكره؟ ده أنا هلبس فستان فرح بجد… وإنتَ هتلبس بدلة… والناس هتيجي تبارك. إنتَ عارف ده معناه إيه؟ معناه إننا هنتجوز بجد يا باشمهندس الغبرة!
يوسف قعد على الأريكة بيحاول يهدئ أعصابه… وهو بيربط جرح في إيده أحدثه من كثرة التوتر:
ـ عارف. بس أمي لو شكت لحظة إننا بنكذب… هتطردك وتبعتك عند مامتك. وأنا مش هسمح لسيف إنه يشمت فيا. إحنا هنكمل اللعبة للآخر… ونتجوز على الورق بس… وبعد شهرين نقول محصلش نصيب… وكل واحد يروح لحاله.
سلمى سكتت فجأة… وبصت له بتعجب:
ـ على الورق؟ يعني مش هنبقى متجوزين بجد؟
رد بنظرة غريبة وعميقة:
ـ والله لو حابة يبقى بجد… أنا ما عنديش مانع. بس أعتقد مدرسة اللغة العربية ذوقها أدبي… وأنا راجل علمي بحت.
***
جاء الموعد الموعود. الحديقة اتزينت بالأنوار الزاهية… وانتشرت في الأرجاء ريحة البخور ممزوجة بريحة المحشي الشهي. سلمى أطلت بفستانها الأبيض الناصع… كانت زي القمر في ليلة تمامه. يوسف لما شافها بتهبط السلم… ذاب الاتفاق… وتبخرت فكرة الجواز على الورق… وفضل شاخص ليها… ما تسعفهوش الكلمات.
همس وهو ماسك إيدها برفق:
ـ على فكرة… الفستان ده غلط جدًا… لأنه هيخليني أنسى إننا بنمثل.
وجنتي سلمى توردت خجلًا. ولأول مرة في حياتها… عجز لسانها الطويل عن الرد… وصمتت تمامًا.
وبينما كانت مسيرة الزفاف في ذروتها… اقتحم المكان سيف ومعاه مأذون تاني غير اللي أحضره يوسف… وصاح عالي:
ـ وقفوا الفرح ده! المأذون اللي جابه يوسف ده مأذون مزيف… وأنا جايب المأذون الحقيقي عشان نكشف الحقيقة قدام الكل!
***
سيف كان واقف في نص الحديقة… ماسك بإيد المأذون كأنه ماسك بحرز وقضية. الصمت ساد بين المعازيم كلهم. ملامح الحاجة وداد بدأت تتحول لبركان بيوشك ينفجر في وش يوسف.
سيف قال بشماتة واضحة:
ـ المأذون اللي يوسف جابه ده… لا معاه دفتر… ولا مقيد في المحكمة. يوسف كان عايز يعمل فرح صوري عشان يضحك عليكم ويخلص من الزن. بس أنا جيت أنقذ سلمى من الخدعة دي.
سلمى بصت ليوسف برعب… وهمست:
ـ يوسف… إنتَ عملت كده بجد؟
يوسف فضل هادي تمامًا. حط إيده في جيب البدلة… وطلع كارنيه وصورة رسمية. بعدين بص لسيف بابتسامة باردة جدًا:
ـ خلصت فقرة الساحر بتاعتك يا دكتور؟ طب أحب أعرفك بقى… إن المأذون اللي أنا جبته ده يبقى ابن عم أبويا شخصيًا… ومأذون شرعي ومعتمد بقاله تلاتين سنة. أما الدفاتر… فإحنا موثقين الورق رسمي في المحكمة من الصبح… وده التوثيق أهو.
قرب من سيف وهمس له بحيث يسمعه الكل:
ـ أنا مبهزرش في حاجتي يا دكتور. وسلمى بقت حرم المهندس يوسف رسميًا… قدام ربنا والقانون… قبل ما الزفة تبدأ. مش فاضل غير إمضاتها. تحب تشرب شربات… ولا نخليه حشو عصب على حسابي؟
نوجا صرخت من الغيظ وخرجت تجري. سيف وقف مكانه زي اللوحة… مش قادر ينطق. والناس بدأت تعلو بزغاريدها وتصفق ليوسف… البطل اللي حافظ على كرامة مراته.
***
يوسف قفل الباب بالمفتاح. سلمى كانت لسه واقفة بفستان الزفاف… مذهولة ومصدومة:
ـ إنتَ… إنتَ وثقت الورق بجد؟ من غير ما تقولي؟ ومن الصبح؟
خلع جاكيت البدلة ورماه على الكنبة:
ـ كان لازم أعمل كده. سيف ونوجا ما كانوش هيسكتوا… وأمي كانت هتنكسر قدام الناس. أنا أنقذت الموقف يا مدرسة العربي.
دموع سلمى بدأت تلمع في عينيها:
ـ أنقذت الموقف… ولا دبستني بجد؟ إحنا اتفقنا إنها لعبة.
قرب منها. ولأول مرة كانت ملامحه حنونة بجد… مش تمثيل. رفع إيده ومسح دمعة نزلت على وشها… وقال بصوت واطي:
ـ اللعبة خلصت يا سلمى… من أول ما شوفتك نازلة بالفستان. أنا اكتشفت إني مش عايز حد تاني يقرا لغتك العربية غيري. وإني مستعد أعيش عمري كله في اشتباك معاكي… ولا أعيش يوم واحد هادي مع غيرك.
سكتت. قلبها كان بيدق بقوة… خافت يسمعه. حاولت ترجع لسانها الطويل:
ـ يعني… يعني ده اعتراف بالحب؟ ولا ده عشان تطلع صح في الآخر قدام سيف؟
ضحك:
ـ الاتنين. بس الاعتراف بالحب أهم. ها؟ لسه عايزة تطلبي الطلاق بعد شهرين… ولا نفتح صفحة جديدة من غير كراتين وعفش؟
فجأة… سمعوا دقات عنيفة على الباب. صوت الحاجة وداد من برة:
ـ يا يوسف… افتح يا ضنايا. خالتك سوسو شافت الدبدوب بتاع سيف تحت السرير… وقالت إن فيه عمل محطوط في الأوضة. افتحوا علشان نبخر بسرعة!
يوسف ضرب إيده على راسه:
ـ إحنا مش هنتجوز يا سلمى… إحنا هنعتزل العالم ده كله… ونهاجر.
***
يوسف كان بيقفل الحقائب بسرعة مجنونة، إيديه بترجف وهو بيبص للساعة كل كام ثانية. العرق نازل على جبينه رغم إن التكييف شغال.
ـ يلا يا سلمى… لو طلعنا دلوقتي حالا… نلحق نهرب قبل ما أمي تصحى وتفتكر إننا محتاجين مون للسفر.
سلمى كانت بتحاول تقفل حقيبة المكياج بإيدين مرتعشتين، صوت السوستة عالي في الصمت المخيف بتاع الفجر.
ـ أنا جاهزة… بس إنتَ متأكد إننا رايحين دهب؟ أنا نفسي أشوف البحر… وأنسى خناقة المأذون… والدبدوب… وكل اللي حصل.
مسك إيدها بقوة… إيدها كانت باردة وهو إيده سخنة. نزلوا السلم على أطراف صوابعهم زي حرامية بيهربوا من سرقة. كل خطوة كانت بتخلي قلبهم يطلع من مكانه. باب البيت اتفتح بهدوء… والهوا البارد ضرب وشهم.
اتفاجئوا.
ميكروباص سياحي كبير واقف قدام الباب زي وحش مستني يبلعهم. النور جواه مولع… والأصوات جواه عالية.
الحاجة وداد نطت من الباب وهي بتزغرت زغرودة قطعت سكوت الشارع كله:
ـ رايحين فين من غيرنا يا عرسان؟!
ـ ده السفر فرحة… وإحنا قلنا نونسكم في شهر العسل!
ـ الركاب جاهزين يا يوسف يا بني!
الخالة سوسو كانت بتلوح بإيدها من الشباك وهي ماسكة كيس فطير مشلتت، ونوجا قاعدة في الكرسي الخلفي بعدلت نظارتها وبصيت ليوسف ابتسامة صغيرة خبيثة.
يوسف تجمد مكانه. الحقيبة وقعت من إيده على الرصيف. حط إيديه على راسه كأنه عايز يهرب من جسمه نفسه.
ـ يا أمي… ده اسمه شهر عسل.
ـ عسل… يعني اتنين بس.
ـ مش فوج سياحي!
ـ وبعدين… إيه اللي جاب نوجا معانا؟
نوجا ردت بهدوء مستفز وهي بتعدل نظارتها تاني:
ـ أصل مامي جاتلي في المنام… وقالت لي إني محتاجة أغير جو بعد الصدمة اللي شوفتها في الفرح.
ـ وبعدين أنا هقعد في أوضة لوحدي… ما تخافش يا يويو.
سلمى قربت من يوسف لحد ما كتفها لمس كتفه. همست بصوت مختنق من الغيظ والخوف مع بعض:
ـ يويو في عينها.
ـ بقولك إيه يا باشمهندس… لو نوجا ركبت جنبك… أنا هنزل أركب مع سواق الميكروباص… واللغة العربية هتتحول للغة شوارع دلوقتي.
يوسف بص ليها. لأول مرة من ساعة ما عرفها… ما لقاش في عينيه لا سخرية ولا تحدي. لقى فيها حاجة تانية… حاجة أقرب للغرق.
همس لها وهو بيسحبها ناحية الميكروباص غصب عنه:
ـ اركبي… ومتقوليش ولا كلمة.
ـ النهارده مش يوم نكسب فيه.
ـ النهارده يوم نعيش… وبس.
طلعوا السلم الخلفي للميكروباص. الحاجة وداد بدأت تغني «دقوا الشماسي» بصوت عالي، والخالة سوسو وزعت سندوتشات الجبنة الرومي، ونوجا فتحت الشباك ونفخت في شعر سلمى كأنها بتهويها.
يوسف قعد جنب سلمى في الكرسي النصاني. إيده لسه ماسكة إيدها تحت الكيس اللي فوق رجليهم. ضغط عليها مرة واحدة بقوة… كأنه بيأكد لنفسه إنها لسه موجودة.
سلمى بصت له من الجنب. لقيته بيبص قدامه بعيون مغمضة… وبيهمس لنفسه بصوت ما حدش سمعه غير هي:
ـ يا رب… شهر عسل…
ـ بس من غير محشي…
ـ ومن غير دبدوب…
ـ ومن غير نوجا.
الميكروباص اتحرك. الشارع بدأ يبعد وراهم. والبيت اللي كان مليان زغاريت من يومين… بقى بعيد وصغير في المراية.
سلمى سندت راسها على كتفه من غير ما تقصد. وهو ما حركش. سابها.
ولأول مرة من ساعة ما اتعرفوا… الاتنين سكتوا.
سكتوا فعلًا.
من غير مناوشة… ومن غير تهديد… ومن غير ضحك.
بس الصمت ده… كان أثقل من كل كلامهم اللي فات.