صوت الست وهي بتقول "هفجر الكل" لسه بيرن.. و صوت الموتور بتاع العربية الرابعة بيقرب وبياكل الأسفلت أكل.
الغراب اتوتر لأول مرة.. لف وشه للرجالة: "سلاح!"
عزت لسه على ركبته بيعيط وبيبصلي.. أول مرة أشوف القسوة اللي في عينيه طول عمري بتتحول لذل.
وليلى ماسكة دراعي بضوافرها.. بتغرزهم في الوشم.. في العقرب.
العربية الرابعة دخلت الحوش بفرملة خلت التراب يعمي الكل.. بابها اتفتح قبل ما تقف.
ونزل منها اللي عمري ما كنت أتخيله.
سعيد الأنصاري.
أيوه.. أبو ليلى اللي المفروض ميت بقاله شهر.
بس حي.. ووشه متشوه.. ودقنه طويلة.. وماسك في ايده نفس المسدس اللي الغراب حاطه على دماغ مراته.
الغراب اتسمر: "سعيـــد؟! انت ازاي.. انت.. انا دافنك بايدي!"
سعيد ضحك بس ضحكة ميتة: "دفنتني؟ انت دفنت واحد شبهي يا غراب.. وانا بقالي شهر مستخبي في بطن العقرب بتفرج عليك وانت بتدور زي الكلب."
أم ليلى أول ما شافته.. الحزام اللي عليها وقع من ايديها.. ووقعت هي كمان على الأرض.. الحزام طلع فاضي.. مفهوش حاجة غير سلوك وقماش.
كانت بتخوفنا بس.
سعيد بص لمراته وبنته وقال: "برافو يا صباح.. حفظتي الوصية."
وبعدين بصلي انا.. بص للوشم.
قالي: "انت فاكر أبوك اللي وشمك يا عقرب؟ مش عزت.. أنا."
الدنيا لفت بيا.
عزت صرخ: "كداب! كداب يا سعيد! الواد ابني انا!"
سعيد قرب مني ومسك دراعي.. لف الوشم ناحية النور.
"الوشم ده مش عقرب عادي.. بص في بطنه."
قربت انا وليلى نبص.. جوه بطن العقرب الموشوم.. كان في نقط صغيرة.. كأنها خريطة نجوم.. بس هي مش نجوم.
ليلى شهقت: "دي.. دي نفس الوحمة اللي عندي!"
سعيد هز راسه: "الوحمة اللي في كتف بنتي.. والوشم اللي على دراعك.. هما مفتاح واحد. لما تحطهم جنب بعض.. يرسموا خريطة المقابر اللي ورا الفيوم.. مقابر الصدقة.. القبر الوحيد اللي مرسوم عليه عقرب.. انا دفنت جواه الهارد اللي عليه كل تسجيلات الغراب وهو بيبيع سلاح وبيتاجر في الأعضاء مع ناس تقيلة في البلد."
الغراب وشه جاب ألوان.. رفع مسدسه مرة واحدة وصوبه على سعيد: "هتموت تاني يا سعيد.. وهتموت بجد المرة دي!"
بس قبل ما يدوس..
ليلى عملت حركة مجنونة محدش توقعها.. حتى أنا.
سحبت فرد الخرطوش من ايد عزت اللي مرمي جنبها.. وصوبته على.. مش على الغراب.
صوبته عليا انا.
وقالت وعينيها مليانة دموع بس ثابتة:
"سامحني يا عقرب.. لو ادينا الخريطة للغراب هيقتلنا.. ولو اديناها لأبويا.. أبويا هيسلمها للحكومة والحكومة فيها ناس من رجالة الغراب وهيرجع يقتلنا برضه.. مفيش غير حل واحد.."
"الخريطة لازم تتمسح."
ورفعت كمها هي كمان.. كتفها باين عليه وحمة بني على شكل ديل عقرب صغير.
ومسكت مطوة كانت في الأرض.. وحطتها على جلدها.
وعلى جلدي انا.
وقالت للغراب ولسعيد في نفس واحد:
"اللي هيقرب خطوة.. هبوظ الوشم والوحمة.. وساعتها لا انت هتاخد الأمانة يا غراب.. ولا انت هتاخد براءتك يا بابا.. والسر هيموت معانا."
كل المسدسات اترفعت عليها هي.
وانا واقف في النص.. بين أبويا اللي رباني وطلع أبويا بجد.. وأبوها اللي طلع حي ووشمني وانا عيل.. وبين البت البريئة اللي بقت بتهدد الكل بجلدها.
الغراب بصلي وقال جملة عمري ما هنساها:
"اختار يا عقرب.. تقطع حتة من لحم البت اللي بتحبها عشان تعيش؟ ولا تسيب أبوك الحقيقي يموت قدامك للمرة التانية؟"
وفجأة.. موبايل الغراب رن.
رنة غريبة في وسط كل ده.
بص فيه.. ووشه اتقلب رعب حقيقي لأول مرة.
ورماه في الأرض وقال وهو بيترعش:
"الحقونا.. المقابر ولعت.. حد سبقنا وفتح القبر!"