الحلقة التاسعة: نار الغيرة
بعد ما زينب قفلت باب أوضة الخدامين في وش ياسين، السرايا بقت مولعة من جوه ومن بره.
آدم قاعد في الجنينة تحت شباكها بالظبط، حاطط رجل على رجل ومولع سيجارة وبيبص لفوق.
ياسين طالع بره الجنينة زي المجنون: "انت قاعد هنا بتعمل ايه؟"
آدم ببرود: "قاعد بشم هوا.. هو الهوا كمان بقى بغيرتك يا ابن عمي؟"
ياسين: "بقولك قوم من هنا.. زينب مش هتطلعلك"
آدم قام وقف قدامه: "طب ما تطلع انت تصالحها بدل ما انت واقفلي انا؟ ولا انت شاطر تغير بس؟"
في نفس اللحظة.. عربية الدكتورة وصلت. الست فاطمة هي اللي طلبتها بنفسها.
الدكتورة سميحة دخلت بشنطتها: "خير يا حاجة فاطمة.. ايه القلق ده كله؟"
فاطمة شدت قمر من دراعها: "اكشفي عليها.. حالا.. قدمنا كلنا"
قمر وشها جاب مية لون: "لا انا مش هكشف قدامهم! عيب!"
أمها: "ايوة عيب! بنتي متربية!"
فاطمة صرخت: "عيب ايه يا ام عيب! مش انتي اللي جاية تقولي حامل من ابني في نص الصالة! يبقى هنكشف هنا.. والدكتورة هتقول كلمتها وهنخلص"
الدكتورة خدت قمر أوضة فاطمة وقفلت الباب.
بره.. الكل سامع صوت قمر بتعيط جوه.
ياسين واقف مش طايق نفسه.. عينه كل ثانية تروح على باب أوضة الخدامين اللي زينب قافلة على نفسها جواه.
آدم لمحها.. راح جاب كوباية مية وخبّط على الباب براحة.
"زينب.. افتحي اشربي.. صوت عياطك واجع قلبي"
زينب من جوه بصوت مخنوق: "امشي يا آدم.. مش عايزة حاجة من حد"
ياسين شافه واقف على باب مراته بيكلمها كده.. اتعمى.
جري عليه وشده من قميصه: "أنا مش قولتلك زينب خط أحمر! بتخبط على أوضة مراتي ليه يا آدم!"
آدم زقه: "ما تهدى! البنت بتموت جوه وانت واقف تتفرج! انت ايه.. مفيش في قلبك رحمة؟"
ياسين: "مراتي وانا حر فيها.. انت ملكش دعوة بيها فاهم؟"
"مراتك؟ مراتك اللي من ساعة ما جيت وانت سايبها تعيط وبتجري ورا كدبة قمر؟"
ياسين رفع ايده كان هيضربه.. لولا باب أوضة فاطمة اتفتح.
الدكتورة طالعة ووشها مقلوب.
الحاج سليم: "ها يا دكتورة.. طمنينا"
الدكتورة بصت لقمر اللي طالعة وراها بتمسح دموع التماسيح: "البنت مش حامل.. ولا عمرها كانت حامل.. الورقة اللي معاها دي مضروبة من أي مكتبة.. وتحاليلها زي الفل"
السرايا سكتت.
ست فاطمة بصت لقمر بنظرة تموت: "يا كدابة.. يا بنت الـ.. جاية تولعي بيت ابني بكذبة؟"
قمر وقعت على الأرض: "يا طنط والله هو.. هو كان شارب و.."
ياسين مسكها من دراعها قومها: "شارب ايه يا كدابة! انتي فاكرة ايه؟ هتلبسيني عيل مش ابني! انتي فاكرة ياسين ده ايه!"
الحاجة دولت خدت بنتها: "يلا يا قمر.. احنا اتهانّا بما فيه الكفاية.."
فاطمة: "إهانة؟ ده أنا لسه هوريكي الإهانة اللي بجد.. بره بيتي.. انتي وبنتك متخطوش عتبة السرايا دي تاني.. ولو شوفتك في فرح ولا في عزا لاحلقلك شعرك زي ما قولت"
طلعوا يجروا من السرايا.
الدكتورة مشيت والحاج سليم دخل أوضته من القهرة.
فضل في الصالة ياسين وآدم وفاطمة.
فاطمة: "ادخل صالح مراتك يا ياسين.. البت من الصبح مكلتش لقمة.. وصينية الشاي اتكسرت فوق دماغها بسبب عمايلك"
ياسين جري على أوضة الخدامين.. خبط.
"زينب.. افتحي.. خلاص طلعت كدابة.. والله طلعت كدابة ومش حامل.. افتحي بقى"
زينب فتحت الباب وعينيها وارمة.. بس المرادي مش بتعيط.. بتبصله بقرف.
"عرفت انها كدابة؟ مبروك.. طب وكرامتي اللي وقعت مع صينية الشاي قدامهم؟ مين هيرجعها؟"
ياسين دخل وقفل الباب وراه.. آدم واقف بره سامع كل حاجة.
"يا زينب انا ماليش ذنب.."
"مالكش ذنب؟ طب ولما ابن عمك جه يغطيني بجاكيته وانت سايبني واقفة بهدومي كلها شاي.. ده كان ايه؟ غيرة ولا قلة حيلة؟"
ياسين اتكهرب لما جابت سيرة آدم: "آآه.. عجبك بقى آدم.. صح؟ عجبك الجاكيت والبرفان والكلام الحلو؟"
زينب: "اه عجبني! على الأقل شافني وانا بعيط.. انت مشوفتنيش غير وانا بقع"
ياسين قرب منها ومسك وشها بين ايديه بالعافية.. عينه حمرا من الغيرة.
"بصيلي هنا.. انتي مراتي انا.. فاهمة؟ مرات ياسين.. لا جاكيت آدم ولا فلوس آدم ولا إيطاليا كلها ليها دعوة بيكي.. انتي بتاعتي انا"
زينب زقته: "بتاعتك؟ انا مش جاموسة شاريها من السوق! انا بني آدمة!"
ياسين: "طب اسمعي بقى.. من النهارده مفيش نزول جنينة.. ومفيش كلام مع آدم.. ومفيش جلابية من دولاب حد غيري.. هلبسك انا على مزاجي"
في نفس اللحظة.. آدم خبط على الباب جامد.
"ياسين.. سيبها تتنفس.. انت بتخنقها"
ياسين فتح الباب وشد آدم من قميصه: "انت مال أهلك انت! دي مراتي!"
آدم بص لزينب من ورا كتفه: "على فكرة يا زينب.. طنط فاطمة قالتلي انك بتحبي الزرع ونفسك تعملي مشروع صلصة طماطم صغير تبيعيه.. انا عندي حتة أرض ورا السرايا فاضية.. وعندي فلوس.. لو عايزة نبدأه سوا انا جاهز.. من غير ياسين"
زينب عينيها لمعت.. أول مرة حد يهتم بحلمها.
ياسين شاف اللمعة دي.. اتجنن رسمي.
مسك إيد زينب وشدها لحضنه قدام آدم.. وحضنها حضن يوجع.. حضن تملك وغيرة ونار.
"مشروع ايه اللي تعمليه معاه؟ انتي هتعملي مشروع مع جوزك.. انا.. هنزرع طماطم الدنيا كلها سوا.. بس ايدك متلمسش ايد راجل غيري.. فاهمة؟"
ووطى باس راسها قدام آدم.. بوسة بتقول "دي بتاعتي".
آدم ضحك بس ضحكة كلها غيظ: "ماشي يا ياسين.. هنشوف.. هنشوف مين اللي هيعرف يكسب قلبها بجد.. بالحبس ولا بالحنية"
ست فاطمة كانت واقفة فوق بتتفرج من الشباك على الخناقة.. وضربت على صدرها.
"يا لهوي.. الوادين هيقطعوا بعض على البت.. ودي لسه جاية السرايا من يومين! ياساتر يارب.. دي هتولع!"