الحلقة الحادية عشر (قبل الأخيرة)
اللي بيدور على العتمة بيقع فيها
الصبح بدري، نور الشباك اللي زين سابه منور طول الليل لسه منور، بس المرة دي الحارة كلها صاحية عليه.
ورد صحيت لقت زين نايم على الأرض وجنبه التليفون مقفول، والشباك مفتوح على الآخر. صحته بخضة: زين! انت نمت كده ليه؟
زين فتح عين واحدة وقال: كنت بجرب النظرية.. لو سيبنا نورنا منور، اللي في الضلمة عنيه هتوجعه وهيغمض لوحده.
ورد ضحكت، بس وهي بتقوم لمحت على دراعها لسعة الحرق بتاعة الحلة، لسه حمرا. زين مسك ايدها وباسها وقال: دي وسام الشرف بتاع أول طبيخ.
تحت، فريدة ما نمتش طول الليل. الصورة اللي صورتها ما عملتش اللي هي عايزاه. الناس ما شمتتش، الناس ضحكت معاهم. دخلت على جروب "حبايب زين" تاني، لقت الست اللي ردت عليها امبارح كاتبة: على فكرة الرز المعجن بتاع ورد كان أطعم من عمايلك يا فريدة.
فريدة اتجننت. قامت لابسة عباية وراحت على بيت أم ورد.
خبطت الباب.. أم ورد فتحت: انتي مين يا بنتي؟
فريدة بابتسامة صفرا: أنا فريدة.. كنت صاحبة زين المقربة، وجاية أنصحكم لله، بنتكم لسه صغيرة ومش قد بيت أبو زين، دول ناس شداد وبيتكلموا عليها في الحارة.
أم ورد سكتت ثانية، وبصت لها من فوق لتحت وقالت: بصي يا حبيبتي.. بنتي حرقت حلة، آه، بس ما حرقتش قلب حد، وانتي داخلة علينا بعباية سودة ونفس أسود.. قوليلي، انتي اللي بتصوري الشبابيك بالليل؟
وش فريدة اتخطف. أم ورد قربت وقالت بهدوء يخوف: اللي يبص على شباك غيره من الضلمة، بكرة حارته كلها هتبص على شباكه وهو مطفي. اتفضلي يا بنتي، ربنا ينور بصيرتك.
وقفلت الباب في وشها.
فريدة نزلت تجري والحارة كلها بتبص عليها.
فوق، أم زين كانت عاملة اجتماع طارئ. جابت زين وورد وقالت: بصوا بقى، اللعب في الضلمة خلص. احنا مش هنستخبى. ورد يا بنتي قومي البسي أحلى حاجة عندك.
ورد: ليه؟
أم زين: هننزل نتمشى في الحارة، إيدك في إيد جوزك، والنور اللي فوق ده هنسيبه منور، واللي عايز يصور يصور، واللي عايز يتكلم يتكلم. أبو زين كان بيقول كلمة زمان.. الكلب اللي بيهوهو ما بيعضش، واللي بيصور من بعيد عمره ما يقدر يدخل البيت.
نزلوا الأربعة.. أبو زين وأم زين وزين وورد.. ماشيين في الحارة، وورد لابسة فستان بسيط وفرحانة، وزين ماسك ايدها اللي فيها الحرق كأنه ماسك تاج. كل ست في الحارة طلعت من البلكونة تزغرد: ما شاء الله عرسان العسل الأسود!
ورد وشها احمر وبقت تهمس لزين: شايف؟ محدش طلب إسعاف النهاردة.
زين: عشان النهاردة انتي اللي منورة الحارة كلها.
رجعوا البيت على خبط جامد على الباب.
أبو زين فتح.. لقاها فريدة واقفة وبتعيط، وفي ايدها صينية بسبوسة.
فريدة بصوت بيعيط: أنا.. أنا جاية أعتذر.. أنا غلطت..
الكل سكت. ورد بصت لزين، وزين بص لأبوه. أبو زين بص لفريدة وقال كلمة واحدة: البسبوسة دي انتي اللي عملاها ولا شارياها؟
فريدة اتلخبطت: شارياها..
أبو زين قال: يبقى لسه ما اتعلمتيش الدرس.. اللي عايز يدخل بيت، بيدخل بإيده مش بصورة من شباك.
وقبل ما حد يرد، فريدة رمت الصينية على الأرض من الغيظ والصوت رن في البيت كله، وقالت وهي بتصرخ: مش هسيبكم تتهنوا! لو مش ليا مش هتبقى لغيري!
ورد ساعتها لأول مرة ما خافتش. قامت وقفت قدامها، ايدها لسه بتوجعها من الحرق، وقالت: لا يا فريدة.. زين مش حاجة بتتقسم، زين بني آدم اختار، واختار يسيب شباكه منور.. وانتي لو فضلتي واقفة في الضلمة كتير، هتنسي شكل النور.
فريدة بصت لهم كلهم.. لقت أربعة واقفين في ضهر بعض، وهي لوحدها. لفت وخرجت تجري.
بالليل، البيت هادي. زين وورد قاعدين في نفس مكانهم على الأرض، بس المرة دي قدامهم صينية البطاطس اللي فضلت من امبارح وبيسخنوها. ورد قالت: تفتكر خلصت؟
زين قال: لا.. اللي زي فريدة لما بتتكسف بترجع أوحش.. بس احنا خلاص اتعلمنا.
وفجأة.. نور الحارة كله قطع. ضلمة كحل.
ورد مسكت في زين بخضة: ايه ده؟
زين قام بهدوء، ولع كشاف تليفونه، وحطه في نص الأوضة، والنور الصغير نَوَّر وشوشهم هما الاتنين.
وقال: شايفة؟ حتى لو قطعوا نور الحارة كلها.. طول ما احنا سايبين نور صغير بيننا، عمر الضلمة ما هتعرف تدخل بيتنا.
ورد ضحكت ودمعت في نفس الوقت.
وتحت.. في آخر الحارة.. فريدة واقفة في الضلمة التامة، وبتبص على النور الوحيد اللي طالع من شباكهم.. كشاف صغير.. بس مش راضي يطفي.. وبتطلع تليفونها وبتكتب رسالة أخيرة.. بس المرة دي مش لزين