الحلقة السابعة: والورد اللي اتغسل
كتب الكتاب خلص، والزغاريط ملت الشارع، والأنوار اللي أبو زين كان معلقها من أول الأسبوع نورها بقى ليه معنى..
المأذون لم دفتره ومشي، والرجالة قامت تسلم، والستات دخلت جوه تزغرط لورد اللي قاعدة في نص الأوضة، عبايتها البيضا البسيطة لسه عليها تراب الرصيف، وفي حجرها البوكيه المترب اللي أبو زين ادهولها، حضناه كأنه عيل صغير.
زين كان واقف على باب المندرة، عينه مش بتنزل من عليها، ودمعته اللي نزلت غصب عنه لسه معلمة على خده، أول مرة في حياته يعيط قدام أبوه وقدام البلد كلها ومش مكسوف.
أبو ورد قرب منه وطبطب على كتفه وقال له: خد مراتك يا زين واطلعوا شقتكم، اللي عملتوه النهاردة ستر بنات كتير كانت ممكن تتظلم بصورة مفبركة.. ربنا يباركلكم.
زين مد إيده لورد، ورد قامت وهي لسه ماسكة الورد، والنقاب نص مرفوع وعينيها حمرا وورمة من العياط.. أول مرة تمسك إيده قدام الكل وهي مراته حلاله.
طلعوا من المندرة، الشارع كله بيبص عليهم، العيال الصغيرة بتجري وراهم وبتحدف عليهم ورد بلدي متقطف من جنينة الجامع.
شقتهم كانت فوق بيت أبو زين، أوضتين وصالة، على المحارة ولسه ريحتها أسمنت، مفيهاش غير مرتبة على الأرض وكرسيين وستارة بيضا ورد كانت جايباها من جهازها وشايلاها من 3 سنين.
أول ما قفل الباب وراهم، السكوت نزل تقيل..
ورد حطت البوكيه على الأرض ولسه هتوطي تجيب جردل مية تغسله، زين مسك إيدها وقال لها: سيبيه مترب.
قالت له وهي صوتها لسه مخنوق: مترب؟
قال لها: آه.. عشان كل ما تبصي عليه تفتكري إن الحب الحقيقي بيتوسخ ويتبهدل ويترمي في الزبالة ويفضل برضه حب.. لو كان نضيف ومتلمع من أول يوم مكنتيش هتعرفي قيمته.
ورد مقدرتش ترد، دموعها نزلت تاني بس المرة دي دموع فرح، قعدت على المرتبة وحضنت ركبها وقالت: أنا آسفة يا زين.. آسفة إني صدقت صورة.. آسفة إني رميت وردك..
زين قعد قدامها على الأرض، خد راسها وحطها على صدره وقال: متتأسفيش.. انتي معذورة.. انتي شفتي بعينك واحد بيقولك بحبك وبنفس الوقت بيقول لواحدة تانية نفس الكلام.. أي واحدة مكانك كانت هتعمل أكتر من كده.. بس عايز أسألك سؤال واحد بس.. من إمتى وورد بتاعتنا بتصدق شات وبتكذب عين زين؟
ورد رفعت وشها ليه وضحكت وسط دموعها: من ساعة ما بقيت بتحبها أوي وبتخاف تخسرها.
زين ضحك وقال: طب قومي بقى نغسل الورد سوا زي ما قولتيلي على الرصيف.. قومي يا ورد نضفي وردك.
جابت طبق بلاستيك صغير فيه مية، وقعدوا هما الاتنين على الأرض، يغسلوا وردة وردة، التراب بينزل والمية بتحمر من الجورنال، وورد كل ما تغسل وردة تشمها وتحطها على خدها وتقول: الله.. ريحتها لسه فيها..
وفجأة تليفون زين رن تاني.. نفس نغمة أبوه.. بس المرة دي كان رقم غريب.
زين فتح.. سمع صوت ست كبيرة بتضحك وبتقول: ألو.. يا واد يا زين.. أنا أم سيدة بتاعة الورد اللي على كوبري الجامعة.. البت اللي كانت معاك دي مراتك؟
زين اتصدم وفتح السبيكر.. قال: أيوه يا حاجة.. بقت مراتي خلاص.. كتبنا الكتاب.
الست قالت: مبروك يا حبيبي.. بس والنبي ما تنساش تعدي عليا بكرة.. أصلي من ساعة ما مشيت والبت اللي اسمها فريدة جت وقفت قدام الفرش بتاعي وعمالة تعيط وتقولي والنبي يا خالة قولي لزين إني مظلومة وإن الشات حقيقي.. وأنا قولتلها يا بنتي 30 فبراير ده يبقى عيد ميلاد خالتك انشراح!
ورد انفجرت من الضحك لأول مرة من قلبها، ضحكة عالية خلت زين نفسه يضحك، والست كملت: المهم يا واد.. الورد اللي اديتهولك ده كان آخر رزقي النهاردة وكنت بدعي يتباع.. شكله دعايا استجاب وفتح بيتين مش بيت واحد.
زين قال لها: بكرة هجيلك أنا وورد وهناخد الورد كله يا حاجة.
قفل معاها وبص لورد اللي كانت نايمة على دراعه من التعب والعياط طول اليوم، شعرها طالع من تحت الطرحة وعينيها مقفلة نص قفلة.
شالها براحة وحطها على المرتبة، وغطاها بالعباية البيضا بتاعتها، وحط جنبها طبق الورد اللي اتغسل، وردة حمرا واحدة بس اللي فضلت صاحية وريحتها طالعة.
وطى باس راسها وقال: نامي يا ورد.. انتي النهاردة عيطتي كتير.. بكرا نبدأ نضحك كتير.
ورد وهي نص نايمة مسكت إيده وقالت: زين..
قال لها: قلب زين.
قالت: هو احنا بجد اتجوزنا؟ ولا ده حلم وهصحى ألاقي البوكيه لسه في الزبالة؟
قال لها: لا يا حبيبتي.. احنا اتجوزنا.. والمصحف شاهد.. والورد شاهد.. والشارع كله شاهد.
برا، في بيت أبو ورد، فريدة كانت بتلم هدومها في شنطة بلاستيك سودا وأمها بتشد فيها وبتقول لها: فضحتينا الله يفضحك.. بقى تعملي فوتوشوب ب 30 فبراير؟ ده العيل في حضانة يعرفها!
فريدة كانت بتعيط وبتقول: والله كنت بحبه يا ماما.. كنت بحبه!
أم ورد دخلت عليها وقالت كلمة واحدة بس قصمت ضهرها: اللي بتحب راجل بتحترم اختياره.. مش بتبوظ جوازته.. اطلعي برا بيتي ومتجيبيش سيرة ورد على لسانك تاني.. ورد بقت ست متجوزة وجوزها راجل يعرف يجيب حقها من الزبالة.
الباب اتقفل ورا فريدة، وفي نفس اللحظة، باب شقة زين وورد اتقفل عليهم هما الاتنين، والورد المغسول كان منور في الضلمة كأنه لمبة صغيرة.. أول لمبة في بيتهم.