الحلقة الحادية عشر (قبل الأخيرة): زرعة غيرة
بقلم: فاطمه شعبان
الفجر لسه بيأذن.. والندى لسه على ورق الشجر ورا السرايا.
ياسين صحى زينب من النوم وهو لابس جلابية زرع ومشمرها.. أول مرة تشوفه من غير بدلة ولا برفان يخنق.
ياسين: "قومي يا بتاعة الطماطم الإيطالي.. هنزرع حلمك."
زينب نزلت وهي لابسة عباية بسيطة وطرحتها مش مربوطة قوي.. وشعرها طاير مع هوا الفجر.. شكلها يخطف.
أول ما رجليها لمست الطين.. صرخت وضحكت.
زينب: "يااا سقعان!"
ياسين مقدرش يمسك نفسه.. شالها مرة واحدة من وسطها.
زينب: "يا مجنون نزلني هنتوسخ!"
ياسين وشه في وشها ونفسه في نفسها:
"ما انتي وسختي قلبي من أول يوم دخلتي فيه السرايا.. جت على الجلابية؟"
ونزلها براحة.. بس إيده فضلت على وسطها.
بدأ يعلمها.. مسك إيدها اللي فيها البذور المداسة.. فتح كفها بالعافية وحط إيده فوق إيدها.
ياسين: "اللي يدوس على زرعة عشان غيران.. يبقى بيحبها أكتر من روحه.. افهمي بقى."
زينب قلبها دق.. أول مرة تحس إيده حنينة مش بتوجع.
قعدوا يزرعوا سوا.. هو يحفر وهي ترمي البذرة.. وكل ما توطي قدامه يلف وشه الناحية التانية ويستغفر.
لحد ما مرة.. الفستان بتاعها اتبل من الطين ولزق عليها.
ياسين اتعمى.. قلع الجاكت بتاعه ورماه عليها مرة واحدة ولفها بيه.
ياسين بيزعق بس صوته بيترعش من الغيرة:
"ما قولنا نلبس واسع! كل العمال بتبص! داري نفسك يا زينب!"
زينب اتصدمت: "عمال ايه؟ مفيش حد هنا غيرنا!"
ياسين شدها من دراعها وقربها لصدره:
"حتى لو مفيش.. الهوا نفسه بيبصلك! وأنا راجل بغير.. بغير نار يا زينب.. هتستحملي؟"
لسه هترد.. سمعوا صوت موتوسيكل.
آدم.. المفروض كان مسافر.. راجع تاني وشايل في إيده قفص صغير.
آدم نزل وبيضحك:
"ما شاء الله.. جواز زراعي على الصبح.. جيت أودع حلم الطماطم قبل ما أسافر"
ياسين وقف قدام زينب مرة واحدة.. داراها ورا ضهره كأنه بيحميها من رصاصة.
ياسين: "قولنا مسافر! ايه اللي رجعك!"
آدم بص لزينب من فوق كتف ياسين:
"نسيت أقول لزينب إن البذور دي بتتزرع في الضلمة.. مش في الشمس.. عشان متتكسفش"
ورمى كشاف صغير للأرض جنب رجل زينب.
زينب وطت غصب عنها تجيبه.. ياسين شافها بتوطي قدام آدم.. الدم طلع في وشه.
شدها وقفها وراه تاني بعنف.. المرة دي عنف غيرة مش قسوة.
ياسين صرخ في آدم:
"مراتي متوطيش تجيب حاجة راميها راجل غيري! سامع!"
ومسك الكشاف وداس عليه برجله كسره 100 حتة.
آدم قرب خطوة.. بقي وشه في وش ياسين:
"يا ابن عمي.. انت بتزرع طماطم ولا بتزرع خوف جواها؟ اللي بيحب بجد بيخليها تلمع.. مش يطفيها"
ياسين مقدرش.. لكمة واحدة.. بوكس واحد خلّى آدم يقع في الطين.
زينب صرخت ومسكت دراع ياسين:
"يا ياسين لا! هتموته!"
الجملة دي.. "هتموته" .. خلت ياسين يسيب آدم ويبص لزينب بصدمة.
ياسين: "خايفة عليه؟"
زينب: "خايفة عليك انت.. لو ضربته جدك هيطردك من الأرض دي!"
آدم قام ومسح الطين من على بوقه وبيضحك بوجع:
"شوفتي؟ لسه بتدافعي عنه.. حتى وهو غرقان غيرة"
وبص لياسين:
"على فكرة.. أنا أجلت سفري.. مش مسافر بعد يومين.. أنا قاعد.. وهفضل كل يوم أشوف زرعتكم دي بتكبر ولا بتموت من كتر الغيرة"
وسابهم ومشي بالموتوسيكل.. والطين طار على عباية زينب.
ياسين كان مولع.. لف زينب ليه مرة واحدة.. وشه أحمر وعروقه طالعة.
ياسين همس وهو بيحضن وشها بإيديه الاتنين المليانين طين:
"أنا مش هسيبك تاني لحظة واحدة يا زينب.. من النهاردة مفيش شغل.. مفيش نزول.. مفيش بذور من حد.. انتي زرعتي هنا.. في أرضي أنا.. وقلبي أنا.."
زينب لأول مرة مازقتش.. لأول مرة عينيها لمعت لياسين هو.. مش لآدم.
زينب: "طب والطماطم؟"
ياسين شالها تاني وسط الطين.. ولف بيها:
"الطماطم هتطلع حمرا زي خدودك لما بتتكسفي مني.. وأنا هفضل أغير عليكي لحد ما الحمرة دي تبقى عشاني أنا بس!"
ومن فوق.. من شباك السرايا.. الحاج سليم وست فاطمة واقفين بيتفرجوا.
ست فاطمة: "الواد هياكل البت بغِيرته يا حاج"
الحاج سليم: "سيبيه.. الغيرة اللي بتحرق دي هي اللي هتخليه راجل بجد.. بس آدم مش هيسكت"
وفجأة.. موبايل زينب اللي سايباه على الشباك رن.. رسالة من رقم غريب:
"مبروك الزرعة الجديدة.. بس خلي بالك.. الطماطم الإيطالي بتحب اللي يهتم بيها كل يوم الفجر.. وانا هكون هناك كل يوم الفجر.. - آدم"
زينب شهقت وخبّت الموبايل بسرعة.. بس ياسين لمح اسم آدم على الشاشة.