الحلقة السادسة: دم في السرايا
ياسين فتح الباب جري زي المجنون.
زينب وراه بالفستان الأحمر والجاكت، حافية، مش حاسة برجليها.
تحت.. ست فاطمة واقعة على الأرض، وشها أبيض زي الورقة، وجلابيتها كلها دم.
الحاج سليم شايلها وبيصرخ: "فاطمة! ردي عليا يا فاطمة!"
قمر واقفة بتعيط وتصوت: "طنط شافت ياسين وهو طالع معاها ووقعت مرة واحدة!"
زينب جريت وقعدت جنبها على الأرض ونست كل الخناق:
"يا حاجة فاطمة! فوقي والنبي.. يا حاجة!"
مسكت إيدها.. إيدها ساقعة تلج. بس زينب بنت سوق.. وفاهمة.
وطت شمّت بُق ست فاطمة.. مفيش ريحة دوا ولا تعب.. في ريحة كركديه تقيل.
بصت لست فاطمة كويس.. لقت عينها مقفولة جامد زيادة عن اللزوم، وبتترعش.
زينب فهمت في ثانية.. الست بتمثل.. وده كركديه مدلوق مش دم!
بس قبل ما تتكلم.. ياسين كان خلاص شايل أمه طاير بيها على أوضتها: "هاتوا الدكتور حالاً!"
السرايا كلها طلعت فوق، والحاج سليم وقمر وراهم.
أوضة ست فاطمة اتملت ناس.
زينب واقفة على الباب، لابسة الجاكت الرجالي فوق الأحمر، والكل بيبصلها كأنها السبب.
قمر قربت منها ووشوشتها بسم: "شوفتي؟ أول القصيدة دم.. لسه هتشوفي اللي هيجرالك يا بتاعة الطماطم."
زينب مردتش.. دخلت الأوضة بهدوء، جابت كوباية ماية، ورشتها مرة واحدة على وش ست فاطمة!
الكل شهق!
ست فاطمة نطت من على السرير تصرخ: "يا لهووي! عيني!"
ياسين اتصدم: "زينب!"
زينب مسكت الجلابية اللي عليها "الدم" ورفعتها قدام الحاج:
"ده مش دم يا حاج.. ده كركديه.. الحاجة كانت عايزة توقف الخناقة بطريقتها."
الحاج سليم وشه احمر من الغضب وبص لمراته: "فاطمة!!!"
ست فاطمة قعدت تعيط بجد المرة دي: "كنت هتموتوا بعض يا سليم.. كنت عايزة ألمكم مش أفرقكم!"
ياسين بص لأمه وبص لزينب.. أول مرة يحس إن البت دي مش بس قوية.. دي ناصحة وفضحت لعبة أمه اللي محدش كان يقدر يفضحها.
الدكتور جه وقال مفيهاش حاجة.. إرهاق بس.
الليل جه.. والسرايا سكتت بس كانت بتغلي.
ياسين قاعد في أوضته لوحده، قلع الجاكت، فاتح أول زرارين في قميصه، وبيفكر.
الباب اتفتح بشويش.
قمر.
لابسة قميص نوم أبيض قصير، وشعرها مفكوك، وداخلة من غير ما تخبط.
"ياسين.. ممكن نتكلم؟"
ياسين قام وقف مرة واحدة: "اطلعي برا يا قمر."
قربت منه وحطت إيدها على صدره: "انت ليه بتعمل فيا كده؟ ده أنا اللي بحبك من واحنا عيال.. دي جاية من الشارع تاخدك مني؟"
"قمر انا قولت اطلعي برا.. متخلنيش.."
"متخلنيش ايه؟" قالتها وهي بتلزق فيه.. "ما انت راجل ومراتك مش طايقاك.. وانا قدامك أهو.."
وفي اللحظة دي.. باب الأوضة اتفتح.
زينب داخلة وفي إيدها صينية شاي.
شافت المنظر.
قمر لازقة في ياسين، وإيده على دراعها بيبعدها.
الصينية وقعت من إيد زينب.. الشاي اتدلق على الفستان الأحمر.
سكتت ثانيتين.. وعينيها احمرت.
قمر ابتسمت بانتصار: "أصل ياسين كان.."
زينب مقاطعتهاش.. مشيت بهدوء لحد التسريحة، مسكت مقص كبير، وقصت حتة من شعر قمر الأصفر اللي كانت فخورة بيه!
قمر صرخت صرخة هزت السرايا: "شعريييييي!!!"
ياسين اتجمد.
زينب رمت المقص ورمت الخصلة على الأرض وقالت بصوت يرعب:
"المرة دي قصيت شعرك.. المرة الجاية هقص لسانك لو فكرتي تقربي من جوزي تاني.. فاهمة يا هانم؟"
وبصت لياسين وعينيها كلها دموع ونار: "وانت.. لو كنت عايزها كنت قولتلي وانا كنت مشيت لوحدي.. مش تعمل عليا فيلم انك بتدافع عني الصبح وبالليل واخدها في حضنك!"
وسابتهم وخرجت تجري على أوضة الخدامين وقفلت على نفسها.
ياسين زق قمر برا أوضته وقفل الباب بالمفتاح وجري ورا زينب.
بيخبط على بابها: "زينب افتحي! والله ما لمستها! زينب!"
من جوه صوت عياط مكتوم.
وفوق.. الحاج سليم واقف في البلكونة شايف كل اللي بيحصل.. وبيتصل بحد في التليفون وبيقول:
"جهز المأذون.. بكرة الصبح ياسين هيكتب على قمر.. حتى لو بالعافية."