الحلقة التالتة: أوضة مقفولة وكلمة حرة
مد إيده عليها..
زينب غمضت عنيها واستعدت للضربة، للوجع، للفضيحة.. شهقت وصرخت:
"لو لمستني هقتلك! وحياة اللي خلقني هقتلك!"
إيده وقفت في الهوا.
مش عشان خاف منها.. لا.
عشان لأول مرة من يوم ما اتولد ياسين الهواري، يشوف واحدة بتبصله من غير خوف، بتبصله بقرف.
دموعها نازلة بس عنيها مولعة نار.
فضل ثانية.. اتنين.. نفسه طالع نازل.. وبعدين ببطء نزل إيده، ومسك الطرحة السودا اللي واقعة جنبها على الأرض ورماها في وشها.
"استري نفسك يا بتاعة الطماطم.. انتي مفكرة إني هلمس واحدة رخيصة زيك؟"
قالها وهو بيرجع لورا كأنه بيقرف منها، بس صوته كان بيترعش.. من الغضب ولا من حاجة تانية هو نفسه مش فاهمها.
زينب مسكت الطرحة واتلفت بيها بسرعة وجسمها كله بيترعش.
قال وهو بيفتح الباب عشان يخرج: "أنا بس كنت عايز أشوف أخرك إيه.. وطلعتي فاضية زي ما توقعت. خوافة."
قبل ما يخرج، وقفت على رجلها، صوتها طالع بالعافية بس مليان كرامة:
"أنا مش خوافة يا هواري.. أنا بنت راضي اللي عمره ما باع كيلو طماطم بايظ.. وانت اللي خواف.. خواف من كلمة الحق.. خواف تصدق انك ظلمتني!"
ياسين وقف عند الباب، ضهره ليها.. إيده اتقبضت جامد على أوكرة الباب.
مردش.
خرج ورزع الباب وراه بالمفتاح.
من بره.. سمع صوتها بتعيط تاني.. بس المرة دي عياط كتمة.
نزل تحت، لقى أمه مستنياه في نص السرايا ووراها الدكتورة والمأذون والرجالة بيبصوله.
ست فاطمة قالت بلهفة مصطنعة: "ها يا ياسين؟ طلعت إيه؟ شريفة ولا.."
ياسين بص لأمه بصة خلتها تسكت.
قال بصوت عالي: "شريفة غصب عن أي حد.. واي حد هيفتح بقه بكلمة على مرتي، هقطع لسانه. مفهوم؟"
الكل اتصدم.
ست فاطمة شهقت: "مرتك؟! مش كنت بتقول ضيفة وماشية؟"
"كنت بقول.. ودلوقتي بقول مرتي.. مرت ياسين الهواري ليها احترامها.. والأوضة اللي فوق دي متنفعش.."
سكت لحظة وبص للخدم: "من بكرة الصبح، أوضة زينب هتبقى جنب أوضتي.. واي واحدة فيكم هتقصر معاها، حسابها معايا أنا."
وطلع على أوضته وسابهم كلهم فاتحين بقهم.
فوق السطوح..
زينب سامعة كل حاجة من الشباك المكسور الصغير.
مش مصدقة اللي سمعته.
هو دافع عنها؟ ولا دي لعبة جديدة؟
وفجأة سمعت صوت خطوات طالعة على السلم.. مش خطوات ياسين التقيلة..
خطوات ست.. ومعاها صوت حاجة بتتجر على الأرض.
الباب اتفتح.. ست فاطمة داخلة وشايلة في إيدها مقشة قديمة وجردل ماية وسخة!
وبابتسامة شيطان قالت:
"جوزك أمر أوضتك تبقى جنب أوضته يا حلوة.. بس قبل ما تنزلي.. لازم تمسحي الأوضة دي بلسانك.. عشان تعرفي مقام ستك فاطمة."
ورمت جردل الماية الوسخة على هدوم زينب وعلى الأرض كلها!
زينب صرخت: "انتي اتجننتي!"
ست فاطمة قربت وهمست في ودنها: "لو فاكرة ان ياسين هينصفك تبقي هبلة.. ده أنا أمه.. والليلة هتنامي في الماية الوسخة دي.. وبكرة هطفشك من السرايا خالص.."
ولسه بترفع إيدها عشان تشدها من شعرها..
الباب اتفتح للمرة التالتة الليلة..
وياسين واقف على الباب.. وشايف أمه وهي ماسكة شعر زينب وجردل الماية مدلوق!
عينه احمرت.. وصوته طلع يزل السرايا كلها:
"أمــــاااه!!!!"