الحلقة الخامسة: الحاج راجع ومعاه العروسة الأصلية
الساعة 7 الصبح والسرايا مقلوبة فوق تحت.
الخدم بيجروا، البخور مالي البيت، وست فاطمة لابسة الدهب كله وواقفة على السلم مستنية الكبير.
أما ياسين.. فمنامش طول الليل. قاعد في البلكونة، سجايره خلصت، وعينه مش بتنزل من على باب الأوضة اللي جنبه.. أوضة زينب.
زينب صاحية من الفجر، لابسة عبايتها السودة القديمة، وقاعدة على طرف السرير بتعيط في صمت.
خبطتين على الباب ودخل من غير ما يستأذن.
رمى كيس على السرير.
"قومي البسي ده."
فتحت الكيس.. فستان أحمر سواريه مفتوح وبيبرق.
زينب رمت الفستان على الأرض: "انت عايز تفضحني؟ انا مستحيل ألبس قلة الأدب دي!"
قرب منها ومسك دراعها جامد: "هتلبسيه يعني هتلبسيه.. أبوي كمان ساعة هيكون هنا، ولو شافك بالعباية دي هيقول جايب خدامة وهيطردك وهيجوزني بنت عمي."
"ما يجوزها! هو أنا فارقة معاك؟ طلقني واخلص!"
بصلها بصة طويلة و صوته وطي:
"اسمعيني يا بتاعة الطماطم.. النهاردة لو بان عليكي ضعيفة هياكلك.. لو بان عليكي قوية هيحترمك.. عايزك النهاردة تبقي ياسين الهواري بس في فستان.. فاهمة؟"
قبل ما ترد.. صوت كلاكسات عالية هزت السرايا كلها.
الحاج سليم الهواري وصل.
تحت.. راجل في الستينات بس هيبة أسد، جلابية بيضا، وراه عربية نزلت منها بنت زي القمر بجد.
بيضا، شعرها أصفر، عينيها ملونة، فستان أبيض هانم وبرفانها سابقها.
قمر بنت عمه.
جريت حضنت ياسين: "ياسينووو وحشتني أوي!"
ياسين بعدها بهدوء: "حمدالله على السلامة يا قمر."
الحاج سليم دخل بنظرة كلها غضب: "فين هي؟ فين اللي اتجوزتها من غير شوري وفضحتنا؟"
وفي اللحظة دي السلم الخشب عمل صوت.
الكل رفع عينه لفوق.
زينب نازلة.
لابسة الفستان الأحمر.. بس بطريقتها هي. قافلة الصدر المفتوح بشال حرير أحمر بتاعها، ورفعة شعرها كله لفوق، وماشية رافعة راسها وعينيها نار.
مكنتش رقاصة.. كانت ملكة.
قمر شهقت أول ما شافتها.
زينب وقفت قدام الحاج سليم ومدت إيديها بثبات: "أنا زينب.. مرات ياسين الهواري."
الحاج بص لها بقرف من فوق لتحت: "انتي بقى بتاعة الطماطم؟"
"أيوه أنا بتاعة الطماطم اللي بقت هانم غصب عن أي حد."
قمر عنيها وقعت على جاكت ياسين الرجالي المرمي على الكرسي.. نفس الجاكت اللي كان على زينب وهي مبلولة امبارح.
مسكته ورفعته قدام الكل بخبث: "الله؟ مش ده جاكتك يا ياسين؟ أمال كان فين امبارح؟ أصلي شميت فيه ريحة ماية وسخة!"
زينب وشها ولع من الإحراج.
بس اللي عملته محدش توقعه.
مشيت لحد قمر، خطفت الجاكت من إيدها، ولبسته فوق الفستان الأحمر قدامهم كلهم!
وقالت وهي بتبص في عين قمر:
"آه كان عليا.. عشان جوزي راجل بجد.. شافني بردانة قلع جاكتته وغطاني.. مش زي ناس لابسة أبيض ومستنية راجل متجوز يبصلها."
قمر اتجننت ورفعت إيديها عشان تضربها بالقلم..
بس إيد ياسين مسكت إيد قمر في الهوا قبل ما تلمسها.
صوته كان يرعب: "إياكي."
"اللي يمد إيده على مرتي أقطعهاله.. حتى لو كنتي انتي يا قمر."
السرايا كلها سكتت.
الحاج سليم انفجر: "بتقطع إيد بنت عمك عشان دي؟! انت ناسي انك وعدت عمك قبل ما يموت انك هتتجوز قمر؟!"
"انت اللي وعدت يا حاج.. مش أنا."
"يبقى هتطلقها دلوقتي حالاً قدامي وتكتب على قمر.. يا إما هطردك انت وهي ومش هتشوف مليم من ورثي!"
لحظة موت.
ياسين بص لزينب.. لقاها واقفة بتعيط بس رافعة راسها ومستنية قراره.. هيبيبعها ولا هيشتريها؟
قمر بتبتسم بشماتة.. وست فاطمة بتدعي.
ياسين خد نفس طويل.. قلع الجاكت من على كتف زينب.. الكل افتكر هيقلعه منها..
بس هو لبسه هو.. ومسك إيد زينب ورفعها قدام أبوه وقال كلمته اللي هزت السرايا:
"أنا مش هطلق زينب يا حاج.. ولو هتطردني اطردني.. بس مرتي هتخرج معايا ورجلي على رجلها.. والسرايا دي من غيري هتقع وانت عارف كده كويس."
وسحب زينب وطلع على أوضته وسابهم مصدومين.
أول ما قفل الباب.. زينب زقت إيده: "ليه؟ ليه مطلقتنيش واتجوزت الهانم بتاعتك؟"
زنقها في الحيطة ونفسه سخن من الغضب: "عشان انتي مرتي.. وعشان لما رفعت إيديها عليكي قلبي وقع وخفت بجد.. وخفت حد يلمسك غيري.."
زينب اتجمدت مكانها.. أول مرة تشوف ياسين بيقول كلام حلو.. أول مرة تشوف عينه فيها خوف عليها بجد..
وفجأة.. الباب اتفتح بعنف!
قمر داخلة بتجري وبتعيط: "يا ياسييين إلحق.. طنط فاطمة وقعت من طولها وبتنزف دم!"