صوت الكشافات بتاعت العربيات التلاتة كان قالب الفيلا نهار.
عزت بيهمس في التليفون من فوق السطح: "يا عقرب.. دول مش 3 عربيات.. دول 9 رجالة مسلحة نازلة.. ومعاهم ست كبيرة بيجروها.. شكلها أمها."
قلبي وقع.
احنا اتفقنا يجي لوحده.
الغراب مبيلعبش بالقواعد.
قفلت التليفون وبصيت لليلى اللي واقفة ورا الباب بترتعش ولابسة عبايتي السودا اللي اديتهالها عشان البرد.. شكلها فيها بريء لدرجة توجع.
"مش قولتلك متطلعيش؟"
قالتلي وهي بتعيط بصوت واطي: "سمعت عزت بيقول انهم جايبين أمي.. مش هسيبها."
مسكتها من كتفها جامد: "لو طلعتي دلوقتي أمك وانتي هتموتوا. اسمعي الكلام مرة واحدة في حياتك."
فتحت باب الفيلا وطلعت لوحدي في الضلمة.. ايدي فاضية ومفيش سلاح.
الغراب نزل من العربية الوسطانية.. راجل خمسيني شعره أبيض ولابس جلابية بيضا.. بس عينيه.. عينيه سودا مفيهاش رحمة. هو ده اللي مخوف السوق كله.
ضحك أول ما شافني: "العقرب؟ ابن الكلب اللي مربيه عزت؟ فاكر نفسك هتضحك عليا بفيلم الفيوم ده؟"
أنا اتسمرت.. عرف ازاي؟
شاور للرجالة.. رمو الست الكبيرة على الأرض.. كانت ست غلبانة وشها شبه ليلى بالظبط.
قال ببرود: "سعيد الأنصاري قبل ما يموت ب 10 سنين.. كلمني وقاللي لو حصلي حاجة الفلاشة هتكون مع بنتي. البنت دي عندها وحمة على شكل عقرب في كتفها الشمال.. أبوها وشمها وهي صغيرة علامة للأمانة. لو البت اللي جوه معندهاش الوحمة دي.. يبقى مش بنت سعيد.. ويبقى انت جايب واحدة شبهها تنصب عليا."
الدنيا لفت بيا.
بصيت ورايا.. ليلى كانت واقفة عند الباب وسمعت كل حاجة.. وشها أبيض.
الغراب صرخ: "هاتوا البت!"
هنا ليلى عملت حاجة عمري ما توقعتها.
رفعت كم العباية.. ونزلت الكم بتاعها..
وكانت الوحمة موجودة.. وحمة سودا صغيرة على شكل عقرب بالظبط على كتفها.
أنا وعزت والغراب.. التلاتة اتصدمنا في نفس اللحظة.
الغراب برك على الأرض من الصدمة ووشه اتقلب خوف بجد لأول مرة: "مستحيل.. انتي.. انتي بنته بجد."
ليلى بصتلي وعينيها كلها دموع وقالت جملة خلت الدم ينشف في عروقي:
"أنا طول عمري مفكرة دي حسنة عادية.. أول مرة أعرف انها معناها حاجة.. بس يا عقرب.. أنا افتكرت حاجة دلوقتي.. بابا قبل ما يموت بيوم.. وداني المقابر وقاللي.. لو حد سألك على الأمانة قولي له انها في بطن العقرب."
بطن العقرب؟!
أنا بصيت على دراعي.. أنا عندي وشم عقرب كبير عامله من وانا عيل صغير في الحارة.. وعمري ما عرفت ليه أبويا زمان قالي متشيلهوش.
هل معقول..؟
هل أبوها كان يقصدني أنا؟
هل الفلاشة.. جوة الوشم بتاعي؟
الغراب طلع مسدسه وحطه في دماغ أم ليلى وقال وهو بيبصلي بجنون:
"افتح دراعك يا عقرب.. حالاً!"