خرجت ليل من الحمام وهي بتجفف شعرها بالمنشفة، لكن بمجرد ما رفعت عينيها ناحية السرير، اتسمرت مكانها من الصدمة!
ليل (بشهقة): آآآه! 😳
سيف قام من مكانه بسرعة، وأول ما استوعب الموقف لف وشه الناحية التانية فورًا.
سيف: إيه ده! إنتِ بتصرخي ليه؟!
ليل كانت واقفة مش عارفة تتصرف، شدت الروب عليها أكتر وقالت بتوتر:
ليل: إنت بتعمل إيه هنا؟! وإزاي تدخل أوضتي من غير استئذان؟!
سيف (وهو لسه مدّيها ضهره): أنا خبطت على الباب وناديت عليكي، بس مردتيش، فافتكرتك نمتي.
ليل: وحتى لو نمت، مينفعش تدخل كده!
سيف: خلاص يا ستي، أنا آسف. ممكن بس تهدي؟!
ليل: اطلع بره!
سيف: حاضر، حاضر... أنا خارج أهو.
اتجه ناحية الباب وهو لسه مديها ضهره، وخرج بسرعة.
سيف: لما تلبسي ابقي افتحي الباب، عايز أتكلم معاكي في موضوع مهم.
قفل الباب ووقف بره، وحط إيده على وشه وهو بيتمتم:
سيف: يا نهار أبيض... هو أنا كل ما أحاول أصلح حاجة أعمل مصيبة أكبر؟!
أما ليل، فكانت واقفة مكانها وقلبها بيدق بسرعة.
ليل (لنفسها): هو إيه اللي جابه هنا دلوقتي؟! يا رب استر!
بعد دقائق، كانت ليل لبست هدومها ونشفت شعرها، وراحت ناحية الباب وفتحته بحذر.
ليل: اتفضل... بس إنت عايز إيه؟
سيف دخل بخطوات هادية، لكنه فضل واقف بعيد عنها.
سيف: أولًا، أنا آسف إني دخلت الأوضة من غير إذنك. مكنتش أعرف إنك في الحمام.
ليل: خلاص، حصل خير.
سيف: وثانيًا، أنا جيت علشان موضوع تاني.
ليل بصتله باستفهام.
سيف: إنتِ لسه زعلانة مني؟
ليل سكتت شوية، وبعدها ردت بهدوء:
ليل: أيوه.
سيف رفع حاجبه.
سيف: بالسرعة دي كده؟! يعني كل الاعتذارات اللي قدمتها مش نافعة؟
ليل: حضرتك فاكر إن كلمة آسف بتمسح أي كلام اتقال؟
سيف ابتسم ابتسامة صغيرة.
سيف: لا، بس كنت أتمنى إنها تساعد شوية.
ليل قعدت على طرف السرير وقالت:
ليل: أنا مش زعلانة علشان اتعصبت عليا، أنا زعلانة علشان إنت استخدمت أكتر حاجة أنا موجوعة منها ضدي.
سيف اختفت ابتسامته.
ليل: أنا طول عمري بحاول أثبت لنفسي قبل أي حد إني مش أقل من أي حد، وإن ظروفي اللي اتولدت فيها مش عيب. ولما سمعت الكلام ده منك، حسيت إني رجعت لنفس المكان اللي كنت بحاول أهرب منه.
سيف سحب نفسًا عميقًا وقعد على الكرسي المقابل ليها.
سيف: أنا مش هقولك إنك تنسي، ومش هطلب منك تسامحيني بالعافية. بس عايزك تعرفي إن الكلام ده عمره ما كان رأيي الحقيقي فيكي.
ليل رفعت عينيها ناحيته.
سيف: وإنتِ مش محتاجة تثبتي لأي حد إنك تستاهلي تكوني هنا. إنتِ أثبتي ده بموهبتك وتعبك.
ليل ابتسمت ابتسامة بسيطة.
ليل: شكرًا.
سيف: بس عندي سؤال.
ليل: اتفضل.
سيف: إنتِ فعلًا كنتِ ناوية تسيبي الفريق؟
ليل نزلت عينيها وسكتت.
سيف: ليل؟
ليل: كنت حاسة إني مش مرغوب فيا، فقولت أمشي أحسن.
سيف مال بجسمه لقدام وقال بجدية:
سيف: بصيلي كويس يا ليل...
رفعت ليل عينيها ناحيته بهدوء، فاستقبل نظرتها بابتسامة صغيرة، وبعدها قال بصوت هادي:
سيف: أنا مش عايزك تمشي.
ليل فضلت باصة له للحظات، وكأنها بتحاول تفهم قصده من نبرة صوته ونظراته المختلفة.
ابتسمت برقة، وميلت رأسها قليلًا وهي بتسأله:
ليل: ليه بقى؟
سيف كان مستعد يرد بسرعة، لكنه اتفاجئ بنفسه وهو بيفضل باصصلها.
عينيه استقرت على عينيها، وسرح للحظات في ملامحها الهادية، وبعدها وقعت عينيه على خصلة شعر نازلة على وشها.
فضل ساكت ثواني، وكأنه نسي أصلًا كان عايز يقول إيه.
ليل لاحظت سكوته، فابتسمت بخجل.
ليل: إيه؟ سرحت في إيه؟
سيف رجع لوعيه بسرعة، وابتسم ابتسامة جانبية وهو بيحاول يخفي ارتباكه.
سيف: لا... مفيش.
سكت لحظة، وبعدها قال وهو بيبصلها:
سيف: عشان الفريق محتاجك، وعشان إنتِ لاعبة شاطرة، وعشان وجودك هنا مش منّة من حد. إنتِ تستاهلي تكوني هنا، وتستاهلي كل فرصة تاخديها.
ليل ابتسمت، وحست بدفء غريب جواها من كلامه، خصوصًا من الطريقة اللي كان بيبصلها بيها.
كانت معجبة بسيف من فترة، لكن لأول مرة تحس إن نظراته ليها ممكن يكون وراها إحساس مختلف.
ليل (برقة): يعني حضرتك مش عايزني أمشي؟
سيف ابتسم وهو بيرد:
سيف: هو أنا لسه هقول تاني؟
ليل ضحكت ضحكة رقيقة، وبصت بعيد للحظة من شدة خجلها.
ليل: خلاص... مش همشي.
سيف: وعد؟
ليل رجعت بصتله وابتسمت:
ليل: وعد.
سيف ابتسم، وحس براحة غريبة لمجرد إنه سمع منها الكلمة دي.
سيف: كده أنا اطمنت.
ليل: طب وأنا كمان عندي طلب.
سيف: اتفضلي.
ليل: متكلمنيش بالطريقة دي تاني، حتى لو كنت متعصب مني.
ملامحه هديت، ورد من غير تردد:
سيف: أوعدك.
ليل: خلاص، يبقى اتفقنا.
سيف فضل باصصلها بابتسامة هادية، وبعدها قام من مكانه واتجه ناحية الباب.
لكن قبل ما يخرج، لف ناحيتها مرة تانية وبصلها وابتسم وخرجخ
أما ليل، ففضلت باصة ناحية الباب وابتسامتها لسه على وشها، وحطت إيدها على قلبها بسعادة .
بعد مرور عدة أيام...
كان الفريق كله مجتمع في قاعة التدريب، وكل واحد قاعد في مكانه، والبعض بيتكلم مع التاني، بينما انس كان مشغول بأكل سندويتش كبير
ياسر بصله باستغراب.
ياسر: إنت مش بتشبع يا ابني؟!
انس وهو بياكل: الأكل ده مصدر الطاقة يا كابتن، ولا إنت عايزني ألعب وأنا جعان؟!
مؤمن: يا ريت مصدر الطاقة ده يخليك تجري زي الناس الأول.
انس بصله باعتراض.
انس: إنتوا ليه بتحاربوا المواهب في الفريق؟!
ضحك ياسر، بينما كان ياسين واقف قدام السبورة بيراجع بعض الملاحظات.
ياسين: يا جماعة! ممكن نركز شوية؟!
الكل سكت وبص ناحيته.
ياسين: عندنا ماتش مهم جدًا بعد كام يوم، والماتش ده من أهم الماتشات اللي هتحدد موقفنا في التأهل للبطولة.
ياسر: ضد مين يا كابتن؟
ياسين كتب اسم الفريق على السبورة.
ياسين: فريق الصقور.
رامي ساب التليفون من أيده وبدأ يركز
رامي: الصقور؟! هو إحنا داخلين نلعب باسكت ولا داخلين نصطاد؟!
مؤمن ضحك وقال:
مؤمن: ركز في اللعب أحسن ما الصقور تصطادك إنت.
ياسين تجاهل هزارهم وكمل:
ياسين: الفريق ده من أقوى الفرق اللي هنواجهها. عندهم سرعة عالية جدًا، ودفاعهم منظم، وكمان عندهم لاعب طويل وقوي جدًا اسمه مازن، وده أخطر لاعب عندهم تحت السلة.
سيف كان واقف جنبه، وبدأ يتكلم بجدية:
سيف: لازم نكون مركزين في التمريرات، ومحدش يحاول يلعب لوحده. أي غلطة صغيرة ممكن تكلفنا الماتش كله.
ياسين: بالظبط. إحنا مش داخلين نجرب حظنا، إحنا داخلين نكسب. وكل واحد فيكم لازم يكون قد المسؤولية.
رامي رفع إيده.
ياسين: نعم يا رامي؟
رامي: هو ينفع نطلب تأجيل الماتش؟ أصل أنا حاسس إن الصقور دول مش داخلين يلعبوا معانا بنية كويسة!
ضحك الفريق كله.
سيف بصله بحدة مصطنعة.
سيف: رامي، لو سمحت وفر طاقتك للماتش.
رامي: حاضر يا كابتن، هحتفظ بيها لوقت الخطر.
ليل كانت قاعدة بتسمعهم باهتمام، وعينيها بتلمع من الحماس.
ليل: طب وإحنا هنتدرب على خطة دفاع معينة ولا هنفضل بنفس التشكيل؟
ياسين ابتسم بإعجاب.
ياسين: سؤال كويس يا ليث. هنشتغل على خطة دفاع جديدة، وعايز كل واحد فيكم يكون عارف دوره كويس.
سيف بص ناحية ليل للحظات، ولاحظ حماسها، فابتسم من غير ما يحس.
ياسين: تمام، يلا كل واحد يجهز نفسه. التدريب هيبدأ دلوقتي!
رامي قام وهو بيتمطى.
رامي: يا رب تعدي على خير... أنا لسه عندي أحلام ومشاريع مستقبلية.
يوم المباراة...
كانت الصالة الرياضية مليانة بالجمهور، وأجواء المنافسة والحماس واضحة في كل مكان.
الفريق بدأ يجهز نفسه في غرفة الملابس، وكل واحد بيربط حذاءه وبيستعد للنزول.
ليل كانت واقفة قدام المراية بتظبط لبسها الرياضي، وبتحاول تركز في المباراة اللي مستنياها.
سيف دخل غرفة الملابس وهو ماسك لوحة صغيرة عليها التشكيل.
سيف: يلا يا رجالة، كل واحد يراجع دوره. عايزكم النهارده تلعبوا بقلبكم قبل مهارتكم.
رامي: وأنا قلبي بيقولي إننا هنكسب، بس معدتي بتقولي إني محتاج آكل الأول.
ياسر: انت اتعديت من انس ولا ايه
رامي: شكلى كدا
ليل ضحكت وهي بتسمعهم.
سيف بص ناحيتها وقال:
سيف: إنت يا ليث، جاهز؟
ليل وقفت باعتدال وابتسمت بثقة.
ليل: جاهز يا كابتن.
سيف: عايزك تفضلي مركزة، وأي فرصة تيجي قدامك استغليها.
ليل: متقلقش.
سيف ابتسم.
سيف: يلا بينا.
خرج الفريق كله ناحية الملعب وسط تصفيق الجمهور.
بداية المباراة...
الحكم أطلق صافرة البداية، والكرة ارتفعت في الهواء، وبدأت المنافسة بين الفريقين.
الفريق المنافس كان سريع جدًا، وكل ما لاعب من فريق ياسين يحاول يتقدم، يلاقي قدامه دفاع قوي يمنعه من الوصول للسلة.
مازن قدر يخطف الكرة من أنس، ومررها لزميله اللي سجل أول نقطتين.
رامي بص لياسر بصدمة.
رامي: هو إحنا لسه بدأنا يا جماعة؟!
ياسر: العب يا رامي بدل الرغي!
حاول سيف ينظم اللعب، وبدأ يوزع التمريرات، لكن الفريق المنافس كان متماسك جدًا.
أنس حاول يجري بالكرة، لكن سرعان ما فقد توازنه، واتخطف منه الكرة مرة تانية.
ليل كانت قاعدة على دكة الاحتياطي، بتتابع كل حركة بعصبية.
ليل: يا أنس! ركز في الكرة!
أنس سمع صوتها وبص ناحيتها للحظة، لكن زميله المنافس استغل انشغاله وخطف الكرة.
ليل حطت إيديها على راسها.
ليل: يا نهار أبيض! هو أنا هفضل أقولك ركز لحد إمتى؟!
مرت الدقائق، والفريق المنافس كان مسيطر على مجريات اللعب، بينما فريق ياسين مش قادر يحقق أي تقدم حقيقي.
سيف كان بيحاول بكل قوته ينظم الفريق، لكن التمريرات كانت بتضيع، والتسديدات مش بتوصل للسلة.
ياسين وقف عند خط الملعب، وملامحه بدأت تتغير من شدة الغضب.
ياسين: إيه اللي بيحصل ده؟! فين التركيز؟!
مؤمن حاول يسدد، لكن مازن اعترض طريقه وخطف الكرة.
وبعدها سجل الفريق المنافس نقطتين جديدتين.
صافرة الحكم أعلنت نهاية النصف الأول من المباراة.
النتيجة كانت صعبة جدًا على فريق ياسين.
الفريق المنافس متقدم بفارق كبير، وفريقهم لسه مش قادر يسجل بالشكل المطلوب.
رجع اللاعبون ناحية أماكنهم، وكل واحد فيهم كان مرهق ومتضايق.
أنس قعد على الدكة وهو بياخد نفسه بصعوبة.
ليل بصتله بعصبية.
ليل: إنت كنت بتلعب إيه جوه؟! إنت مش قادر تجري نص الملعب!
أنس: يا عم أنا بحاول والله!
ليل: بتحاول إيه؟! الكرة كانت قدامك أكتر من مرة وسيبتهم ياخدوها منك!
أنس: طب ما تدخل إنت تلعب بدل ما تقعد تنتقد!
ليل بصتله بثقة.
ليل: والله لو دخلت هوريك اللعب الصح!
رامي ضحك وقال:
رامي: يا جماعة أنا شايف إننا ننزل ليث، واضح إنه متعصب أكتر من الكابتن نفسه!
ياسين بص ناحية ليل، وبعدها بص لسيف.
ياسين: سيف، لازم نغير التشكيل. كده مش هينفع نكمل.
سيف كان واقف وعينيه على الملعب، وملامحه متوترة.
سيف: معاك حق.
لف ناحية أنس وقال بجدية:
سيف: أنس، اطلع ارتاح.
أنس بصله باستغراب.
أنس: إيه؟! ليه يا كابتن؟
سيف: لأنك مش في أفضل حالاتك النهارده، ومحتاجين حد يقدر يتحرك بسرعة ويضغط على دفاعهم.
وبعدها لف ناحية ليل.
سيف: ليث!
ليل رفعت راسها بسرعة.
ليل: أيوه يا كابتن؟
سيف: جهز نفسك. إنت هتنزل مكان أنس في النصف التاني.
ليل عينيها وسعت من الفرحة، ووقفت بسرعة.
ليل: أنا؟!
سيف ابتسم بثقة.
سيف: أيوه إنت. وريني بقى الكلام اللي كنتِ بتقوليه من شوية.
رامي صفق بإيده بحماس.
رامي: أخيرًا! يلا يا ليث، ورينا الصقور هتعمل إيه معانا!
أنس بصله بضيق.
أنس: طب ما تشجعني وأنا قاعد برضه!
رامي: إنت ارتاح يا نجم، إحنا هنشوف الشغل دلوقتي.
ليل بدأت تجهز نفسها، وربطت حذاءها كويس، وبعدها وقفت قدام سيف.
ليل: مش هخذلك يا كابتن.
سيف بص لها بابتسامة واثقة.
سيف: أنا واثق فيك .
الكلمتين دول كانوا كفاية يخلوا الحماس يزيد جواها.
دخلت ليل الملعب وسط تشجيع زملائها، ووقفت في مكانها مستعدة لاستلام الكرة.
صافرة الحكم أعلنت بداية النصف التاني.
الكرة وصلت لسيف، فبص ناحية ليل ومررها لها بسرعة.
استلمتها ليل بمهارة، وبدأت تتحرك بين لاعبي الفريق المنافس.
أول لاعب حاول يعترض طريقها، لكنها غيرت اتجاهها بسرعة وعدت من جنبه.
رامي صرخ من بعيد:
رامي: الله عليك يا ليث!
ليل كملت جري، ومررت الكرة لياسر، اللي رجعهالها بسرعة.
في اللحظة دي لقت مساحة فاضية قدامها.
رفعت إيديها وسددت الكرة بكل قوتها...
الكرة ارتفعت في الهواء، ولفت داخل السلة!
الملعب كله انفجر بالتصفيق.
رامي جري ناحيتها وهو بيصرخ:
رامي: أيووووه! هو ده الكلام! 😂
ياسر ضرب كف بكف مع ليل، ومؤمن ابتسم بفخر.
سيف كان واقف على الخط، وابتسامته ظهرت من غير ما يحس.
سيف (لنفسه): برافو يا ليل ..
ليل بصت ناحيته من بعيد، ولما شافت ابتسامته، ابتسمت هي كمان ورجعت بسرعة لمكانها.
المباراة بدأت تتغير.
ليل كانت بتتحرك بسرعة، وبتستغل أي فرصة، وبدأت تمرر الكرات لزملائها بطريقة ذكية.
الفريق المنافس اتفاجئ من مستواها، وبقى يحاول يضغط عليها أكتر.
مازن قرب منها وحاول يمنعها من التقدم، لكنها قدرت تمرر الكرة لسيف في اللحظة المناسبة.
سيف سدد وسجل نقطتين جديدتين.
ياسين وقف متحمس وهو بيصفق.
ياسين: أيوه كده! عايزين نكمل بنفس القوة دي!
لكن فجأة، الكرة وصلت لليل مرة تانية.
استلمتها وبدأت تجري ناحية السلة، ومازن كان بيحاول يلحقها من الجنب.
ليل غيرت اتجاهها بسرعة، وعدت من لاعب تاني، ورفعت الكرة استعدادًا للتسديد.
سيف كان متابعها بعينيه، ووقف من مكانه بحماس.
سيف: يلا يا ليث!
ليل سددت الكرة...
لكن في نفس اللحظة، وهي بتحاول تغير اتجاهها وتهبط على الأرض، قدمها اتلوت بشكل مفاجئ!
اختل توازنها، ووقعت بقوة على أرض الملعب و...