الحلقة الأخيرة من رواية جوازة غصب - حصاد العشق
بقلم: فاطمه شعبان
زينب إيدها اترعشت والموبايل وقع منها في الطين.
ياسين نزل عينه ببطء.. شاف الاسم.. آدم.. والرسالة منورة في نص الفجر.
الدنيا سكتت ثانية.. حتى العصافير سكتت.
ياسين وطى براحة.. شال الموبايل من الطين.. مسحه بجلابيته.. وقرا الرسالة بصوت عالي.. كلمة كلمة.. وصوته كل كلمة بتعلى.
"وانا هكون هناك كل يوم الفجر.. - آدم"
رفع عينه لزينب.. عينه مكنتش غضب.. كانت وجع.
ياسين: "كل يوم الفجر؟ كنتي هتستنيه كل يوم الفجر يا زينب؟"
زينب دموعها نزلت غصب عنها:
"والله ما اعرف انه هيبعت.. والله ما اديته رقمي.. ده.. ده شافه على الشباك لما كنت بطلب بذور!"
ياسين مسك دراعها.. مش بعنف.. بيأس:
"أنا بغير عليكي من الهوا يا زينب.. تقومي تدي رقمي.. قصدي رقمك لابن عمي؟"
زينب صرخت فيه لأول مرة:
"ما اديتهوش حاجة! انت مش بتصدقني ليه! كل حاجة عندك ضرب وزعيق وغيرة تعمي! آدم عمره ما شدني زي ما انت بتشدني! آدم بيخليني اضحك!"
الكلمة نزلت على ياسين زي السكينة.
ساب دراعها مرة واحدة كأنه اتكهرب.
ياسين: "بتضحكي معاه؟"
ولف وشه ومشي ناحية السرايا.. كل خطوة منه كانت بتدوس على قلبها.. مش على الطين.
زينب جريت وراه حافية.. عبايتها كلها طين.. والجاكت بتاعه لسه على كتفها.
زينب: "ياسين! يا ياسين استنى!"
بس هو دخل أوضته ورزع الباب.
فوق.. الحاج سليم نزل جري.
الحاج سليم: "في ايه يا زينب بتعيطي ليه الفجر؟"
زينب وقعت على الأرض جنب الزرعة اللي لسه زرعينها:
"هيشيل الزرعة يا جدي.. ياسين هيشيل الزرعة اللي زرعناها"
ست فاطمة نزلت وخدتها في حضنها:
"لا يا بت.. اللي بيتزرع بحب مابيتشالش بغيرة"
في نفس اللحظة.. صوت الموتوسيكل رجع تاني.
آدم راجع.. بس المرة دي مش لوحده.. جايب معاه شنطة سفره بجد.
آدم نزل وشاف زينب بتعيط والطين مبهدلها.
آدم: "أنا آسف.. الرسالة كانت هزار.. مقصدتش أولعها"
زينب قامت مسحت دموعها:
"لا مهزرتش.. انت قصدت.. وانت عارف انه بيغير"
آدم سكت شوية وبص للشباك اللي فيه أوضة ياسين:
"أيوه قصدت.. عشان أشوفه هيعمل ايه.. هيختار يخنقك ولا يحبك.."
وفجأة.. باب السرايا اتفتح بعنف.
ياسين خارج.. لابس نفس الجلابية.. بس مش شايل حاجة في إيده.. غير.. قفص آدم الصغير اللي كان جايبه الصبح.
ياسين رمى القفص قدام آدم.
ياسين بصوت واطي ومبحوح:
"خد بذورك.. وخد هزارك.. وخد موتوسيكلك وسافر.. أنا مش هضربك تاني.. عشان لو ضربتك هبقى بثبت اني فعلا بخوفها.. مش بحبها"
آدم اتصدم.
ياسين لف لزينب.. وقعد على ركبته في الطين قدامها.. قدام جدها وستها وقدام آدم.
مسك إيدها اللي كلها طين وحطها على قلبه.
ياسين: "أنا راجل فلاح يا زينب.. اتعلمت أزرع وأقلع وأحرق.. متعلمتش أحب.. أبويا مات وانا صغير والحاج رباني على القسوة.. فلما حبيتك.. حبيتك بقسوة.. بغيرتي.. بغبائي"
"بس من النهاردة.. لو عايزة تضحكي.. اضحكي.. ولو عايزة تزرعي مع آدم.. ازرعي.. بس اضحكيلي أنا في الآخر.. ارجعيلي أنا في الآخر.. تستحملي تعلميني؟"
زينب شهقت.. كل الناس ساكتة.
زينب لأول مرة هي اللي مسكت وشه بإيديها الاتنين.. وطينها لطخ وشه.
زينب: "أنا مش عايزة أزرع مع آدم.. أنا عايزة أزرع مع جوزي.. حتى لو هيغير عليا من العصافير"
و حضنته.. حضنته جامد وسط الطين.. والجاكت وقع من عليها ومحدش اهتم.
آدم ابتسم بوجع.. شال شنطته:
آدم: "خلاص يا عم ياسين.. الزرعة طلعت بتحب صاحب الأرض.. مش اللي جاب البذرة.. مبروك يا ولاد العم"
ركب الموتوسيكل ومشي بجد.. المرة دي الطين مطارش.. كأنه ماشي براحة عشان ميوسخش حضنهم.
الحاج سليم ضحك بصوت عالي:
"هي دي جوازة الغصب اللي بقت جوازة حب غصب بردو!"
بعد شهرين..
نفس الفجر.. نفس الأرض.
بس المرة دي.. الطماطم الإيطالي طالعة حمرا وحلوة وبتلمع مع الندى.
ياسين وزينب قاعدين وسطها.. هي لابسة نفس العباية.. وهو لابس جلابيته.. وبطنها بدأت تبان حتة صغيرة.
ياسين حاطط إيده على بطنها وإيده التانية بتأكلها طماطماية من زرعهم.
ياسين: "حمرا زي خدودك.. قولتلك"
زينب ضحكت ودمعت:
"طب هتغير على بنتنا بردو؟"
ياسين باس راسها وشدها لحضنه:
"هغير عليكم انتو الاتنين.. لحد ما أموت.. وده وعد فلاح.. مابيرجعش في كلمته"
تمت بحمد الله