رواية ديون النبض الفصل الثلاثون30 بقلم مروة صياح

رواية ديون النبض 
الفصل الثلاثون30
بقلم مروة صياح
خرجت أنا ومجد مع بعض...

كان يوم مختلف عن الأيام اللي قربنا فيها من بعض. وجودنا مع بعض كان بيدينا أمل إننا لو كملنا حياتنا سوا، هنكون أسعد زوجين. أد إيه متفاهمين، وأد إيه هو فعلًا مجد بيحبني، وأنا كمان بحبه. ومش بس كده، كل واحد فينا كان سند للتاني.

كنت بجاري مجد في كل كلامه بعد ما خلصت امتحاناتي، عن شكل حياتنا مع بعض، ووقوفه جنبي في التخصص اللي أنا عايزاه.

كنت بحس إني بخدعه في اللحظات دي، لكن ما كنتش عارفة اللي أنا بعمله ده صح ولا غلط.

هل فعلًا من حقي إني أحافظ عليه وعلى مستقبله؟ ولا أحافظ على حبي ليه وعلاقتي معاه؟

إيه الجانب الأقوى عندي؟ حبي ليه ولا تضحيتي عشانه؟

لو فكرت إني أكون معاه، هل هكون أنانية وأدفن مستقبله بإيدي؟ ولا أسيبه، ومع الوقت هينساني وهيبني نفسه؟

روحنا مطعم وقعدنا مع بعض، واتغدينا سوا.

وفجأة، تليفونه رن.

أول ما بص للتليفون، كتم الصوت.

وعد: رد يا مجد.

مجد: تليفون مش مهم.

لكنه رن تاني وتالت.

وعد: مجد، رد أحسن يكون تليفون شغل مهم.

بص لي وسكت، وبعدها قال:

مجد: مش عايز أشغل بالي بأي حاجة وأنا موجود معاكي.

لسه همسك التليفون علشان أشوف مين، لكنه رن للمرة الرابعة، فأخده.

مجد: خلاص، هرد وأرجع لك على طول.

فهمت مين اللي كانت بترن، دكتورة جيهان.

وقف بعيد، وكان باين على ملامحه الضيق والزعل وهو بيتكلم. لكن ما استناش لما يسمع كلامها للآخر، وقفل التليفون خالص، ورجع لي مرة تانية.

بصيت له وقلت:

وعد: مين كان معاك على التليفون؟

مجد: شغلي فيه مشكلة، وأنا بصراحة مش قادر أشغل بالي بأي حاجة دلوقتي.

وعد: صحيح يا مجد، أنا لحد دلوقتي ما شفتش مامتك ولا اتعرفت عليها.

بص لي بذهول وقال:

مجد: هتعرفيها إن شاء الله قريب.

وعد: يا ترى هي عاملة إيه مع زوجها دلوقتي؟ هي مبسوطة؟

بص لي وسكت، وبعدها قال:

مجد: ممكن يا وعد، بعد إذنك، ما نتكلمش في الموضوع ده؟ مش عايز أي حاجة تشغل تفكيري وتضايقني.

بصيت له وسكت، وبعدها قلت:

وعد: تعرف يا مجد، أنا نفسي تحكي لي كل حاجة. نفسي تحكي لي اللي أنت مخبيه عني.

مجد: وعد، أنا مش مخبي عنك حاجة، بس في حاجات أنا شايف إنها مش وقتها. لما ييجي وقتها هتعرفي.

وعد: ومين اللي يقرر حاجة زي دي؟ أنت ولا أنا؟ مش أنا المفروض أعرف عنك كل حاجة؟ وطبيعي إني أرتبط بيك، وأنا لحد دلوقتي ما أعرفش منطقك في حاجات كتير.

بص لي وقال:

مجد: حتى بعد ما تعرفيها، أنت فاكرة إن حاجة زي كده هتغير علاقتنا ببعض؟

بصيت له وقلت:

وعد: مش فاهمة.

مجد: يعني وجود ماما في حياتك، أنا شايف إنه مش هيأثر. هي في النهاية هتكون في بيتها، وإحنا هنكون في بيتنا. وأنا مش هسمح لها إنها تتدخل في حياتنا ولا تقرب مننا. كل اللي بينها وبينك هيكون مجرد الاحترام والسلام. أكتر من كده أنا مش عايز.

بصيت له وسكت، وكان نفسي أقوله على كل حاجة، لكن بدل ما أتكلم، قلت له:

وعد: مجد، وبالنسبة لشغلك، أنت ليه مش مبلغني؟ ليه مش قايل لي إن شغلك دلوقتي مش زي الأول؟ أنا حاسة بكده.

بص لي وقال:

مجد: وعد، أنا عايز أقولك على حاجة. أنا دلوقتي هقتصر شغلي على المستشفى بس، وفكرت أوقف الشغل التاني كفاية. عندي دراستي وجامعتي، وشغلي في المستشفى الجامعي.

بصيت له وقلت:

وعد: بس ده مش كافي يا مجد.

بص لي باستغراب وقال:

مجد: يعني إيه مش كافي؟

اترددت قبل ما أقول:

وعد: ده مش كافي علشان مع الوقت تقدر تعيش وتكمل دراستك.

بص لي وقال:

مجد: مش فاهم يا وعد، إيه اللي فارق معاكي قوي؟

حسيت إن دي بداية علشان يبدأ يغير رأيه فيا، فقلت له:

وعد: الحياة صعبة، وأنا أعتقد إن مستواك المادي حاليًا هيكون صعب. لكن من فترة كان أفضل، وأفضل بكتير كمان. إيه اللي خلاك تفكر إنك تسيب شغلك؟

بص لي بذهول وقال:

مجد: يعني إيه؟

سكت شوية، وبعدها قلت:

وعد: يعني أنت مع الوقت هتكون مسؤول عن بيت وعن زوجة. تفتكر ده هيكون طبيعي؟

مجد: لا يا وعد، الحمد لله، أنا بالنسبة لمادياتي كويسة، وهقدر أصرف كويس جدًا على بيتي وعلى زوجتي، وأي حاجة هي عايزاها كمان مش هقصر فيها.

بصيت له وسكت، وبعدها قلت:

وعد: بس أنا حاسة إن ده مش كافي برضه. حتى لو كان معاك فلوس في البنك، مسيرها تخلص يا مجد. أنت لازم يكون ليك عيادة خاصة. وبعدين أنا عرفتك وأنت دكتور مجد، أنت دلوقتي هتكون إيه؟

مجد: أنا زي ما أنا يا وعد.

سكت شوية، وبعدها قلت:

وعد: أنت شايف كده؟ أنا من فترة ملاحظة إنك مش بطبيعتك. ممكن أفهم؟ أنت شغال إيه بالضبط، بجانب جامعتك وشغلك في المستشفى؟

بص لي وقال:

مجد: وعد، أنا مش فاهم أنت عايزة توصلي لإيه بالضبط؟ إيه اللي فارق معاكي تحديدًا؟

سكت وقلت:

وعد: أنا بطمن عليك بس.

سكت، وفضل باصص لي نظرة طويلة.

وبعد كده قلت:

وعد: ممكن نرجع البيت؟

مجد: وعد، إحنا لسه ما لحقناش.

وعد: حاسة إني تعبانة، عايزة أرجع البيت وأرتاح.

واضطر يوافق على طلبي، لكن بمجرد ما شفت حزنه للحظة، ما قدرتش أستحمل. مسكت إيده وقلت له بصوت أهدى:

وعد: مجد، ممكن نتمشى شوية؟

كأني تهت وسط الأسئلة، وحاسة إني باخد نفسي بالعافية. كنت عايزة أروح مكان فاضي، مفيهوش حد، وأفضل أصرخ علشان أطلع الضغط اللي جوايا.

أنا ليه بشوه صورتي قدامه؟ ليه بشككه فيا بالطريقة دي؟

اتغدينا سوا فعلًا، اتحركنا من مكاننا، لكن فضلنا نتمشى ونتكلم.

أغلب الوقت إحنا ساكتين. هو سرحان في همومه، وأنا سرحانة في تفكيري وضغطي.

ديون النبض 🫀

بقلم الكاتبه مروة صياح 🎯 ✍️

فضلنا طول الوقت وإحنا مع بعض، أوقات كنا بنتكلم، وأوقات نسكت، وكل واحد فينا سرحان في تفكيره وهمه.

كنت حاسة إني عايزة أنهي اليوم ده معاه من غير وجع، ولا إني أتقل عليه. كنت عايزة أخفف عنه، لكن ما كنتش عارفة أخرجه من اللي هو فيه إزاي.

وإحنا ماشيين، وقفت وقلت له:

وعد: مجد، كنت عايزة أسألك على حاجة، إنت ليه مصر إنك تسيب شغلك؟

بص لي وقال:

مجد: حاسس إني تعبان وعايز أرتاح، أنا مش مرتاح.

وعد: إيه اللي مش مخليك مرتاح بالضبط؟ عايز تقولي بعد السنين دي كلها إنك اكتشفت إنك مش مرتاح في شغلك ده؟

مجد: وعد، أنا جيت على نفسي كتير، لكن خلاص، مش هجي على نفسي تاني. أي حاجة بعد كده أنا مش مرتاح لها، مش هعملها.

بصيت له وقلت:

وعد: بس الحياة صعبة، وطبيعي إن إحنا نتعب، طبيعي إن إحنا ما نرتاحش، وطبيعي إن إحنا نضحي في سبيل إننا نوصل لهدف معين.

مجد: بس كل ده قصاد راحتك. المهم تكوني مرتاحة، مرتاحة البال في اللي إنت بتعمليه. لكن إيه لازمتها إنك تحققي أهداف وطموحات وإنت مش مرتاحة؟ إيه لازمتها إنك تحاولي تحققي كل اللي إنت عايزاه، لكن قصاد راحتك النفسية، وقصاد إنك تلاقي نفسك؟

بصيت له وسكت، ولقيت نفسي مش قادرة أرد عليه، لكن حسيت إن الكلام بينا بقى ألغاز.

وعد: مجد، إنت ليه مش صريح معايا؟ أنا حاسة إنك بتكلمني بالألغاز. ممكن تفهمني بالضبط؟

بص لي وقال:

مجد: بقولك مش مرتاح يا وعد. في أهم من اللي أنا بقولك عليه؟

ما قدرتش أرد، لأن فعلًا مفيش أهم من راحته.

وبعدها رد عليا وقال:

مجد: إنت اللي علمتيني كده.

كنت هرد عليه وأقول له: بس إنت كده هتريح نفسك على حساب راحة اللي حواليك، لكن ما قدرتش أقولها؛ لأنه تعب كتير، وضغط على نفسه كتير، ويمكن آن الأوان إنه يرتاح.

وأنا معاه، كنت حاسة إني بقيت في لغز كبير، أنا نفسي مش عارفة أحله.

أوقات أقرب منه، وأوقات أحس إني ببعد عنه، بسبب كلامي معاه وضغطي عليه، وكأني بشد الكلام منه علشان يحكي لي.

يا ريتك يا مجد تتكلم!

أنا مش هينفع أهز صورة الدكتورة جيهان قدامك، وأنا ساكتة علشان كده. يا ريتك إنت اللي تحكي لي وتقول لي، يمكن لما تتكلم، حاجات كتير تتغير.

لحد إمتى هتفضل ساكت؟

وفجأة، بص لي وقال:

مجد: وعد، هنتجوز إمتى؟

بصيت له وسكت، وبعدها أخدت نفس طويل، واتنهدت وقلت:

وعد: مجد، ما أقدرش أوعدك بحاجة دلوقتي. أنا مش حاطة الجواز في حساباتي دلوقتي خالص.

سكت لحظة، وبعدها قلت له:

وعد: مش قبل سنتين تلاتة.

بص لي، وظهر الذهول على ملامحه، وقال:

مجد: إنت بتقولي إيه؟

وعد: مجد، أنا مش عايزة أعشمك. كلكم بتضغطوا عليا، وأنا شايفة إني مش قادرة على المسؤولية دي دلوقتي.

فضل يبص لي فترة طويلة، وبعدها قال:

مجد: ده آخر قرار عندك؟

سكت، وقلت له:

وعد: مجد، أنا عايزاك تفهمني.

مجد: في الأول كنتِ بتقولي علشان حازم، وحازم استقر دلوقتي. حازم نفسه ما عندوش مشكلة، بالعكس، عايز يجمعنا في أقرب وقت.

وقف قصادي وقال:

مجد: وعد، إنت ليه مش حاسة بيا؟

بصيت له وسكت، وبعدها قلت:

وعد: إنت اللي تعبت نفسك.

بص لي وقال:

مجد: عندك حق.

وبعدها قال لي إننا نرجع البيت.

حسيت في اللحظة دي إننا بدل ما بنقرب من بعض، بنبعد أكتر، وأنا مش عارفة هل أستمر في اللي أنا فيه ده ولا لأ.

لكننا فعلًا كملنا مشينا في شارع طويل، كانت الإضاءة فيه خافتة، والليل بدأ يظلم، والجو كان بارد.

وفجأة، حسيت ببرودة الجو، ولقيت إيدين بيمتدوا على كتفي، ومجد بيضمني لحضنه من الجنب.

في اللحظة دي حسيت باحتوائه ليا. بدل ما أبعد، لقيت نفسي بحوطه بدراعي.

وقفت وبصيت له، وبالرغم من التناقض اللي كنا بنتكلم فيه، وبالرغم من كل الأسئلة اللي لسه من غير إجابات، لكن مشاعرنا وحبنا لبعض كانوا أقوى من أي حاجة.

وقفنا، وضمني لحضنه بشدة.

دفنت راسي في حضنه، وابتسمت.....

وفجأة، وإحنا واقفين، سمعنا صوت الرعد.

رفعت أنا ومجد عينينا للسماء في نفس اللحظة، لكنه ضمني لحضنه أكتر، وكأنه بيقولي إن حتى صوت الرعد مش هيخوفني طول ما أنا في حضنه.

مرة واحدة، حط إيده على وسطي ورفعني عن الأرض، وبدأ يلف بيا. حوطت رقبته بدراعي، وقرب وشي من وشه، ولمس خدي بخده، وفضل يلف بيا.

بصيت له وابتسمت.

وفجأة، السماء مطرت!

وقفت في الشارع، وكان نفسي أجرب الإحساس ده، إني ألف وأدور تحت المطر وأنا فاتحة دراعاتي.

غمضت عيني، ورفعت راسي، وبدأت ألف وأدور، والمطر بينزل على خدي وجبيني وشعري.

كان مجد واقف بيتفرج عليا ومبتسم، وكأن لحظة السعادة البسيطة اللي أنا حساها هي لحظة سعادته هو كمان.

قرب مني، ومسك وسطي، وفضل يلف بيا ويدور في قلب المكان.

الشارع كان طويل، لكن ما كناش واخدين بالنا من أخبار الأرصاد في اليوم ده. كنت حاسة إن أنا ومجد في عالم لوحدنا، مفيش حد معانا. الناس كانت بعيدة عننا، ومفيش حد كتير في الشارع.

كان الجو بالنسبة لنا رومانسي، لكن فجأة المطر بدأ يشد.

مجد بص لي، وبسرعة قلّع الجاكيت بتاعه وحطه على كتفي.

بصيت له وقلت:

وعد: هتتعب، أنا مش بردانة.

مسك وشي بين كفوفه، وبدأ يمسح المطر اللي على جبيني ووشي بصوابعه.

قرب مني أكتر، وسند جبينه على جبيني.

قربت منه أكتر، وأخدته في حضني.

وبعدها اتحركنا، وفضلنا نجري وإحنا بنضحك، والمطر لسه نازل، لحد ما وصلنا للعربية.

دخلنا وإحنا بنضحك.

بصيت لمجد وقلت:

وعد: هتاخد برد.

قلعت الجاكيت وقلت له:

وعد: البسه، قميصك خفيف عليك.

هز راسه وقال:

مجد: حبك مدفيني، وحضنك كفاية عليا.

اتحركنا ورجعنا، وأول ما وصلنا العمارة، وقفنا ما بين الشقتين.

بصيت له وقلت:

وعد: مجد، تصبح على خير.

قبل ما يدخل، رجع لي، وأنا كمان جريت عليه. قرب مني أكتر وأخدني في حضنه.

في اللحظة دي، قلت لنفسي: أنا بعذبه وبعذب نفسي. إزاي هبعد عنه بعد كده، وأنا بحفر جوايا ذكريات مستحيل تتنسي؟

سندت راسي على كتفه، ومجد قال:

مجد: وعد، أنا بحبك قوي، بحبك قوي يا وعد.

فضلت ساكتة ومغمضة عيني، وبعدها بصيت له وقلت:

وعد: ادخل غير هدومك علشان ما تتعبش.

لكنه سكت شوية، وبعدها قال:

مجد: عايز أفضل كده في حضنك، مش عايز أبعد عنك.

في اللحظة دي، قلبي كان عايز يفضل معاه، لكن عقلي كان بيحاول يفكر في كل حاجة.

قلت له:

وعد: يلا يا مجد، علشان خاطري، ادخل غير هدومك.

وفعلًا، بعد إصرار مني، كل واحد فينا دخل شقته.

قعدت على سريري بعد ما غيرت هدومي، ومجد كان في نفس الحال، لكن ما قدرتش أنام، وهو كمان ما قدرش.

رن عليا، وفضلنا نتكلم.

كلامنا عننا إحنا الاتنين ما كانش بيخلص؛ عن حبنا، وعن مشاعرنا، وعن إحساسنا وإحنا مع بعض.

فضلنا نتكلم لدرجة إننا نمنا وإحنا مش حاسين، وتليفوناتنا كانت لسه مفتوحة.

تاني يوم، صحينا وكأن كل واحد فينا كان عايش في حلم جميل.

كأننا ما فارقناش بعض ولا لحظة، حتى وإحنا نايمين.

لكن القدر كان له رأي تاني.

كان لازم يفوقنا من الحلم اللي إحنا كنا عايشين فيه...
  الفصل الحادي والثلاثون من هنا
تعليقات



<>