رواية جدو حبيبي مغلبني بقلم حياة محمد الجدوي
رواية جدو حبيبي مغلبني الفصل الرابع4 بقلم حياة محمد الجدوي
قعد إمام على السفرة من غير ما يمد إيده على الأكل هو كمان لأنه اكتشف إنه اتعود على وجود الأولاد وهما بياكلوا معاه
&&&&&&&&&&&
فى اليوم التالى التالي كانت مرام بتلعب فى الموبايل وهى مركزه قرب منها جدو إمام
إمام : بتعملى إيه ؟
مرام : بلعب
إمام: ماأنا عارف بس بتلعبى لعبة إيه؟
مرام : بلبس العروسه
بص امام للعبه وبعدها قال
إمام: بقولك ايه ماتسيبك من اللعبه دى وتعالى نعمل حاجه حلوه
إلتفتت له مرام وقالت: حاجه حلوه زى إيه
إمام: إيه رأيك نعمل كيكة شوكولاته
مرام بفرحه :بجد إنت بتعرف تعملها ده أنا بحبها اوي
مسك امام إيدها ودخلوا المطبخ
إمام: يبقى تعالى نعملها سوا
وبعد شويه دخلت ساره والأولاد لقت مرام بتضحك وهى بتزين الكيك بالشكولاته
إمام : يالا اقعدوا عشان تأكلوا من الكيكه إللى عملتها مرام
مرام بفرحه: جدو كان بيقولى اعمل ايه ةأنا إللى عملتها كلها
ساره بدهشة: بجد
مرام: خدى ودوقى كده يا ماما
اكلت ساره قطعه : مش معقول دى تجنن
مازن : طيب ينفع اخد أنا كمان
إمام : طيب إيه رايك تعمل لنا كلنا شاى بلبن ونقعد نأكل منها كلنا
مازن: ماشي بس أوعوا تخلصوها
قعدت العائله كلها في الأنتريه تأكل وتشرب الشاى بلبن
إمام: بقول لكم ماتسيبوا الموبايلات دى شويه وتعالوا احكى لكم حدوته حلوه
مروان: حدوته إيه بس يا جدو هو إحنا لسه صغيرين عشان نسمع حواديت
إمام: طيب أنا هحكيها ولو ما مش حلوه هسيبك تلعب بالليل أما لو حلوه هتيجى تصلى معايا في الجامع قلت إيه موافق ولا إنت مش قد التحدى
مروان : لأ قده إحكى ياجدو
بدأ الجد امام يحكى والأولاد ساكتين وبعد شويه سكت الجد
مروان: وبعدين هيحصل ايه؟
ضحك إمام: مادمت بتسأل وبعدين يبقى عجبتك الحكايه وأنا كسبت
ضحك الأولاد بحماس: صح جدو إللى فاز يبقى هتروح تصلى معاه في الجامع
إمام : الصلاه فى الجامع مش عقاب ده معناه إنه راجل كبير وبيصلى مع الرجاله
مازن: ياسلام وهو كبير وأنا إللى صغير ده حتى توأمى يعنى إحنا أد بعض
إمام: خلاص تبقى تيجى إنت كمان معانا
فى اليوم التالى رجع الجد من الخارج ونادى على ساره
إمام: ساره يا ساره
ساره : أيوه ياعمو
إمام : من بكره تجهزى الأولاد عشان هاخدهم على المدرسه
ساره بدهشة: مدرسة إيه يا عمو إنت عارف إنى لسه ما خلصتش اوراق التحويل لهم
إمام: أنا عارف بس اتفقت مع مدير المدرسه إنهم يروحوا بصوره وديه كده على ما تخلصى أوراقهم عشان مايفتهمش دروس كتيره وكمان عشان يتعرفوا على أولاد تانيه ويبقى لهم أصحاب
ساره بفرحه: بجد يا عمو شكرا جدا
الأولاد بضيق: يووووه. مش عايزين نروح المدرسه
ضحك الجد: ليه بس دى المدرسه حلوه وهتتعلموا حاجات كتيره وكمان هيبقى لكم أصحاب كتير وماتخافوش أنا هاجى معاكم بكره ومش هاسيبكم غير وإنتوا في فصلكم
ساره: خلاص قولو لجدو شكراً
مرام بزعل: شكرا عشان هناخد واجب ونكتب وإيدينا توجعنا
الجد : خلاص إنتى ماتروحيش وماتجيش معانا
مرام : هتروحوا فين
الجد: هاخد أخواتك وأروح اشترى لهم شنط ولبس مدرسى وكمان هجيب كراسات وألوان
مرام: لا لا خلاص يا جدو هروح المدرسه وهاجى معاكم
الجد: طيب يالا بسرعه البسى عشان هنخرج بعد صلاة العصر
جريت مرام مع اخواتها عشان تلبس فنظرت ساره لعمها
ساره: ليه كده يا عمو إنت هتكلف نفسك فلوس كتيره اوي
طبطب الجد على كتفها وقال
إمام: ولا يهمك يا حبيبتي خير ربنا كتير
ساره: ربنا يخليك لينا يا عمو
فى اليوم التالى قامت ساره وهى نشيطه وقالت بفرحه
ساره : اخيرا البيت فاضي وهادى أقوم بقى أنفذ فكرتى
ودخلت المطبخ وخرجت الخضار من الثلاجة وبعد ما غسلتها كويس جدا قطعتها أجزاء وبعدها خرجت على الجنينه
ساره : بسم الله وعلى بركة الله هبدأ مشروعى بزراعه خضار اورجانك
ومسكت الفأس وبدأت تحفر وتحط قطعه من الخضار المتقطع في الحفره
وبعد شويه سمعت صوت ضحك من وراها
إلتفتت فوجدت راجل غريب وبيضحك
ساره: إنت مين وبتعمل إيه هنا
محمود: أنا أسف إنى خضيتك أنا ابقى المهندس محمود علام وكنت عايز عم إمام
ساره: عمو إمام مش هنا هيرجع بعد شويه
محمود: خلاص هابقى أجى له تانى بس معلش ممكن أسألك بتعملى إيه بالظبط
ساره: إنت مش شايف بزرع الجنينه خضار
محمود: بجد
ساره: طبعا عشان أولادى ياكلوا خضار أورجانك خالى من الهرمونات
ضحك محمود بصوت عالى
محمود: بس أولادك للأسف مش هياكوا من خضارك ده
ساره: بعد الشر ليه يعنى
محمود: أصل خضارك ده مش هيطلع لا دلوقتي ولابعد سنه كمان
ساره: ياسلام ليه إن شاء الله
محمود: عشان الخضار إللى بتزرعيه لا يمكن يطلع بقى فيه حد عاقل يقطع الطماطم والخيار والفلفل شرايح ويزرعه
ساره: هو كده غلط المفروض كنت قطعتهم ارباع
ضحك محمود: مش معقول كلامك ده لأن فيه حاجه اسمها شتلات وفيه بذور بتتزرع مش خضار مقطع
ساره: بجد يا خسارة كان نفسى أوى ازرع كان نفسي اعمل حاجه واحده صح بس للاسف فشلت فيها
محمود : خلاص مادمتى نفسك تزرعى خلاص هجيب لك شتلات من عندى وإزرعى كل إللى نفسك فيه
ساره : بجد أنا متشكره لك أوى بس أنا كده هكلف عليك
محمود: ولا تكلفه ولا حاجه أنا عندى اراضي مخصصه لزراعه الخضار و الشتله موجوده هجيب لك شتلات طماطم وخس وفلفل وكوسه و باذنجان كمان
ساره: أنا مش عارفه اشكرك ازاي
محمود: ولا شكر ولا حاجه بس ورينى شطارتك
بعد شويه رجع إمام فقابل ساره
ساره بلهفه: اخبار الأولاد إيه
إمام: إطمنى هما كويسين وبخير وأنا وصيت المدرسين كلهم عليهم
ساره : بجد شكرا يا عمو كتر خيرك
إمام: سيبك من كلامك الفاضي ده روحى اعملى لنا فنجانين قهوه وتعالى نشربهم سوا فى الجنينه قبل ما يجوا الأولاد ويصدعونا بصوتهم العالى
ساره: حالا وكمان أنا عملت كيكه برتقال حلوه اوي هجيب لك قطعه
فى الجنينه
ساره: ماتزعلش يا عمو عشان يعنى أولادى كانوا متضايقين منك وكانوا بيعاندوك
إمام: إنتى إللى ماتزعليش منى أنا عارف انى صعب ومعاملتى شديدة بس والله أنا بحب أولادك وعايز مصلحتهم
ساره: أنا عارفه ياعمو
إمام: يمكن عشان أنا كبير في السن فبقي خلقى ضيق وبقيت اتعصب بسرعه بس أنا بجد بحب أولادك وبحب وجودكم حوليا
ساره: وهما كمان بيحبوك أوى وخاصه بعد ما غيرت طريقتك معاهم وبقيت تعاملهم بحب حتى لما بتشد عليهم بتعوضه في حاجه تانيه إنت عوضتهم إحساسهم بالأهل وحسيتهم بحب الجد إللى ماحسوش به طول عمرهم
إمام: وإنتوا جيتوا مليتوا حياتى وحسيتونى باللمه إللى كنت نسيتها من زمان إنتى ماتعرفيش يعنى إيه وحده ويعنى إيه تعيشى حياتك بين أربع حيطان ومفيش حد يسأل عنك بجد احساس مر يارب ما تدوقيه ولا تشوفيه في حياتك أبدا