رواية جدو حبيبي مغلبني بقلم حياة محمد الجدوي
رواية جدو حبيبي مغلبني الفصل الخامس5 بقلم حياة محمد الجدوي
بعد الظهر رجع الأولاد من المدرسة حضنتهم ساره بفرحه
ساره: حمد الله على السلامه وحشتونى قولوا لي عملتوا إيه في المدرسة انبسطوا
مروان : لأ
مازن: مدرسه مقرفه
مرام: أنا مش عايزه اروح المدرسه دى تانى
بصت ساره لعملها
إمام : مش من أول يوم إنتوا لسه جداد ومش عندكم أصحاب بس شويه شويه هاتتعودوا على المدرسه وتحبوها
ساره: جدو عنده حق اصبروا شويه وبكره هتحبوا المدرسه أوى . يالا يا حلوين اطلعوا غيروا لبسكم وتعالوا نتغدى أنا عملت لكم كريب فراخ وكمان كيكة حلوه
فى المساء كان الأولاد بتلعب والموبايلات
مازن: خد دى
مروان : ده أنا هفرتكك
دخل الجد وقال بعصبية : إيه الإزعاج ده كله مش كنتوا في المدرسه يعنى عندكم واجبات ومذاكره
مروان: مفيش واجب
إمام : والله!.... طيب ورينى كده
مازن: بصراحه يا جدو عندنا واجب رياضيات بس احنا مش فاهمين حاجه
إمام : وإللى مش فاهم حاجه بيلعب ولابيسأل عشان نساعده
مازن : ومين هيساعدنا ياجدو ماما مش بتفهم في الرياضيات وإنت مش بتعرفها
إمام: مين قالك لعلمك أنا أحسن واحد يحل المسائل الحسابيه تعالوا كده وأنا هوريكوا
وأخد إمام الكتاب و الكراسات وجلس الأولاد بجواره وهو بيشرح لهم
مروان بإنبهار : واو إنت عبقرى يا جدو عرفت الحاجات دي إزاى
إمام : هو إنتوا فاكرين إن جدكوا مش متعلم أنا كنت وكيل وزاره يعنى أعرف أكتر منكم ومن أمكم
مروان : أكتر من ماما طبيعي عشان ماما مش بتعرف أى حاجه
( كانت ساره داخله عليهم وهى شايله صينيه عليها عصير وسمعت كلمة إبنها فزعلت أوى)
إمام : عيب يا مروان تقول كده على ماما
مازن: ماهى دى الحقيقة
إمام: لأ طبعا يمكن ماما مش بتعرف تحل واجباتكم بس بالتأكيد دى اكتر واحده في الكون كله بتحبكم وبتخاف عليكم ونفسها تكونوا أحسن ناس فى الدنيا دى كلها
دخلت ساره بالصينيه وقالت: عندك حق يا عمو مفيش حد فى الدنيا دى بيحبهم قدى
(وسابتهم وراحت للمطبخ)
إمام : اكيد ماما سمعتكم وزعلانه قوموا بسرعه اعتذروا لها وصالحوها يالا
قام الإتنين ودخلوا المطبخ وحضنوا أمهم
كانت ساره فى الجنينه بتسقى الزرع قرب منها عمها
إمام : الله ينور عليكي بجد الجنينه بقت تحفه
ساره بفرحه : بجد يا عمو
إمام : بجد
دخل محمود الجنينه وقال
محمود: ولسه لما الزرع يطرح وتلاقى الفلفل والباذنجان والطماطم هتحس الجنينه حاجه تانيه خالص
ابتسمت ساره : كله بفضلك يا باشمهندس
محمود: عشان إنتى شاطره المهم ياعمى أنا هزرع الأرض قمح هتزرع زيي
إمام: طبعا إنت عارف إنى بزرع زيك عشان نسقي مع بعض ونحصد مع بعض
ساره: هو إنت عندك أرض يا جدو
إمام: أيوه ومحمود يبقى جارى وبيجيب ناس تزرع لى أرضى
ساره: آه عشان كده كنت بتسأل عن عمو
محمود: غير كده احنا عشرة عمر لأن عمو إمام صاحب بابا .المهم أخبار أولادك إيه
ساره بحزن : بيشتكوا مش مبسوطين
محمود: معلش شويه بشويه هيبقى لهم أصحاب وساعتها هيحبوا المدرسه ويتعودوا عليها
إمام: ده الكلام إللى قلته لها
محمود: الموضوع هياخد شويه وقت طيب أنا عندى اقتراح حلو إيه رأيك تجيبى الأولاد المزرعه بتاعتى يوم الجمعه الجايه أولاد اختى نجوى هيكونوا موجودين
إمام : خلاص ماشي نيجى يوم الجمعه
ساره: لا يا عمى مش عايزين نتقل على حد
ضحك محمود: إيه كلامك ده احنا اهل وعمى كان دايما بيزورنا واحنا بنزوره
إمام : طبعا ربنا يديم المعروف مابينا
محمود: خلاص مستنيكوا يوم الجمعه يلا مع السلامه
فى المساء كان الأولاد قاعدين مع جدهم وبيلعبوا شطرنج
ساره : مين اللي غلب
مرام: جدو غلبهم دورين
مازن: أن شاءالله نغلبوا الدور ده
إمام: ورونى شطارتكم وأنا عند كلمتى كل دور تكسبوه هتاخدوا ١٠٠ جنيه منى
مروان : مانت لعيب يا جدو هنغلبك إزاى
إمام: فكروا اللعبه دى بتعتمد على الذكاء والتخطيط وإنتوا اذكياء بس مش بتعرفوا تخططوا
مرام: اقول لكم إحنا نحرك الفيل عند الملك كده
مروان: هيتاكل يا ذكيه
مرام : لأ الوزير حاميه
مازن : أنا مش لاقى لعبه غير دى خلاص امرى لله ( وحرك الفيل)
ابتسم الجد : بأولاد الإيه غلبتونى أنا الملك بتاعى مات
صرخ الأولاد بفرحه: هيه غلبنا جدو هيه إحنا الفائزين هات ال١٠٠ جنيه ياجدو إحنا متفقين
خرج إمام من جيبه الفلوس
إمام : تستحقوها يالا روحوا جيبوا لكم حاجه حلوه
ساره: من ساعة ما علمتهم لعبة الشطرنج وهما مشغولين بها اكتر من الموبايل
إمام: أهالى اليومين دول بقوا كسلانين عشان يريحوا دماغهم يشغلوا لأولادهم قنوات الكارتون ليل ونهار ولما أولادهم يكبروا شويه يدوهم الموبايلات وبيحسبوا إنهم كده بيتعلموا مايعرفوش إنهم بيعلموا أولادهم التناحه والغباوه
ساره: لا يا عمو مش للدرجه دى الموبايلات مهمه والأولاد بتطلع فاهمه وعارفه حاجات أكتر مننا
إمام : وإنتى متطمنه للى بيشوفوه وبيعرفوه
ياحبيبتي الأخلاق والتربية والدين بيتعلمها أولادك لما بيشوفوكى إنتى وأبوهم بتمارسوها
وأولادك محتاجين ذكريات حلوه يفتكروها لما يكبروا مش مجرد موبايلات ويمكن إللى بتبنيه في سنه يهدوا الموبايل فى ضغطه ذر واحد
ساره: عندك حق
إمام: أنا مابقولش نلغى الموبايل لأ يبقى له وقت بس يبقى للأهل الوقت الأطول وكمان لازم يتابعوا أولادهم لأن ياما سمعنا عن هكرز بيبتزوا الأولاد أو عن فيلم كارتون بسيط بس بيعلم التطرف والعنف والأفكار الوحشه إللى تهد ماتبنيش المهم سيبك من ده كله تقولى لى كنتى بتكلمى مين من شويه
ساره: الأستاذ صبحى المحامى
إمام : وده عايز إيه
ساره: بيقول فيه حاجات كتيره حصلت وعايزنى فى أسرع وقت
إمام : وإنتى هتروحى إمتى
ساره: بفكر أروح يوم الجمعه
إمام: بس احنا معزومين يوم الجمعه عند محمود
ساره: عارفه فبقول الأولاد هيبقوا مشغولين وأنا اروح اقضى مشوارى
إمام: لأ إنتى تيجى معانا يوم الجمعه تنبسطى وتغيري جو مع الأولاد خلى مشوار المحامى ليوم السبت
ساره: ماشى
فى يوم الجمعه كان الأولاد بتجرى وهى فرحانه اوي فى مزرعه الفواكه الكبيرة عند المهندس محمود
مازن: كل الجنينه دى بتاعتك يا عمو
محمود: أيوه
مازن : دى كبيره اوى
محمود وفيه كمان أرض تانيه بزرع فيها الخضار وكمان القمح و البرسيم عشان البهايم والحيوانات
مرام بفرحه : عندك بقره يا عمو
ضحك محمود: بقره واحده بس لأ أنا عندى معلف كبير تحبوا تشوفوه
الأولاد بحماس: أيوه عايزين
محمود: ماشي بس شايفين شجره البرتقال إللى هناك دى
الأولاد بحماس: أيوه
محمود: يالا ورينى شطارتكم في قطع البرتقال وإللى هيقطع اكتر هخليه يركب الحمار
جرى الأولاد بسعاده
محمود: إيه رأيك في الجنينه عجبتك
ساره: ماشاء الله حلوه اوي أنا مش عارفه اشكرك ازاي الأولاد فرحانين أوى
محمود: ولسه لما يجى عمر وجمال ومنه ونورا ولا اختى هيلعبوا سوا وهيفرحوا اكتر
وبعد شوية جهم اولاد أختواو كان الأولاد كلهم بيتفرجوا على الحيوانات
مروان : عمو هو كل الحيوانات دى كلها بتاعتك
محمود: أيوه
مروان: ينفع يبقى عندى زيك
محمود: ينفع طبعا بس لازم تتعلم عشان تعرف إزاى تراعيهم صح وساعتها هيبقى عندك أكتر منى
جمال: حالوا ينفع اخد مازن ومروان ونلعب بالكوره
عمر: أيوه أنا واخويا ضدك إنت وأخوك
نورا : لأ إحنا هنلعب قفوشة الملك
منه : أيوه إحنا ومرام
محمود: طيب أنا عندى فكره حلوه إيه رأيكم تروحوا المخزن هتلاقوا دراجات كتيره اوي كل واحد ياخد واحده ويلعب بها إيه رأيكم
الأولاد: يالا نروح نلعب تعال معانا يا جدو
وبعد شويه كان إمام راكب دراجة والأولاد كلهم بيصقفوا ويشجعوا الجد
(شاطر يا جدو -حريف يا جدوا - هيه جدوا بيسوق العجله)
ابتسمت ساره وقالت: شايف عمو تحس إنه صغر عشرين سنة
محمود: فعلا لقى ونس وناس تسأل عنه وتحسسه إنه له قيمه
ساره: عندك حق تعرف وأنا صغيره كنت حريفه في ركوب العجله بس بطلت من زمان بس شكل جدو وهو راكب بيحمسنى إنى أركب تانى
محمود: وإيه مانعك ماتركبى
ساره: أركب إيه خلاص أنا كبرت على الحاجات دي خلاص
محمود: العمر مجرد رقم وإنت ماكبرتيش ولا حاجه قومى واعمل كل إللى فى نفسك
وجاب دراجه من جوه
ساره: إنت عندك معرض دراجات ماشاء الله اكتر من ١٠ في المخزن
محمود: ياستى اولاد اخواتى كتير وكل واحد كان بيجيب لأولاده عشان يلعب وينبسط بس معظمهم كبر وبطل يلعب بالعجل عشان كده عندى كتير يالا خدى دى صغيره تعرفى تركيبها
ساره بضحك: أركب إيه بس أنا نسيت بنركبها إزاى
محمود: سهله خالص إنتى تحطى رجلك كده وتسوقى كده
( وفجأة وقع محمود ووقعت العجله جانبه قعدت ساره تضحك عليه ومحمود قعد يضحك معاها)
فى اليوم التالى
ساره : طمنى يا استاذ صبحى إيه الأخبار
الأستاذ صبحى: البوليس الدولى قبض على الأستاذ حامد طليقك