رواية مهرة في عرين القحطاني بقلم اماني سيد
رواية مهرة في عرين القحطاني الفصل الرابع والثلاثون34 بقلم اماني سيد
عند مهره كانت مهرة قد اتخذت قرارها بالفعل، وقررت أن تختفي عن صفوان تمامًا حتى يوم كتب الكتاب. أرادت أن تترك له مساحة يشتاق إليها فيها، بعدما اعتاد أن يراها ويتحدث معها كل يوم.
جلست مع خديجة في غرفتها، وأخبرتها بما تنوي فعله، فضحكت خديجة وهي تقول:
- إنتِ بتتكلمي بجد؟ يعني هتعملي نفسك مشغولة ومش هتشوفيه لحد يوم كتب الكتاب؟
ابتسمت مهرة بمكر:
- أيوه، عايزاه يوحشني وأوحشه، هو من ساعة ما أعلن إننا هنتجوز وهو شايفني كل يوم، لازم يحس شوية إن في حاجة ناقصاه.
- طب وهو لو اتضايق؟
- هيتضايق يومين، وبعدها هيفرح لما يشوفني يوم كتب الكتاب.
هزت خديجة رأسها ضاحكة:
- ربنا يستر من صفوان، ده شكله مش هيسيبك في حالك.
وبالفعل، بدأت مهرة تنفيذ خطتها من اللحظة دي. لما اتصل بها صفوان، ردت عليه باختصار، وحين طلب منها أن يمر عليها في المساء أخبرته أنها مشغولة مع خديجة في التجهيزات.
وفي المساء اتصل مرة أخرى.
- إنتِ فين يا مهرة؟
- في البيت يا صفوان.
- طب ما تنزلي أقعد معاكي شوية.
- مش هينفع، عندي حاجات بجهزها مع خديجة.
- كل يوم عندك حاجات؟ أنا بقالي يومين مشوفتكيش غير من بعيد!
ضحكت وهي تحاول إخفاء ابتسامتها:
- معلش، استحمل شوية.
- استحمل إيه بس؟ هو أنا هفضل أكلم خطيبتي في التليفون؟
- أهو تتعود على صوتي لحد ما نتجوز.
ضحك رغمًا عنه، ثم قال:
- إنتِ بتعملي فيا كده ليه؟
- مفيش، تصبح على خير.
- مهرة، استني...
لكنها أغلقت المكالمة قبل أن يكمل، ثم نظرت إلى خديجة التي كانت تراقبها وتكتم ضحكتها.
- إنتِ مستمتعة أوي باللي بتعمليه، صح؟
ردت مهرة وهي تضع الهاتف جانبًا:
- جدًا.
وفي صباح اليوم التالي، خرجت مهرة مع خديجة لشراء ما تحتاجانه من ملابس وأغراض خاصة . تنقلتا بين المحلات، واختارت مهرة بعض الأشياء التي تحتاجها، بينما كانت خديجة أكثر حماسًا منها، وتصر على أن تشتري لها أشياء إضافية.
قالت مهرة وهي تراجع قائمة المشتريات:
- كفاية كده يا خديجة، إحنا اشترينا حاجات كتير.
- لسه يا بنتي، إنتِ فاكرة إن كتب الكتاب ده يوم عادي؟ ده يوم العمر، ولازم تبقي مجهزة نفسك من كل حاجة.
ابتسمت مهرة:
- أنا مش فارق معايا غير إن اليوم يعدي على خير، وإن الناس اللي بحبهم يكونوا حواليا.
- وصفوان؟
ضحكت مهرة:
- وصفوان أكيد.
- طب ما تتصلي بيه تطمنيه بدل ما الراجل هيتجنن من غيابك.
- لأ، هو اللي يتصل.
- يا سلام! ده إنتِ بقيتي تقيلة أوي.
ضحكتا معًا، ثم واصلتا التسوق، وكانت مهرة تشعر بسعادة لم تعتدها منذ وقت طويل؛ سعادة فتاة تستعد ليوم زفافها دون خوف أو إجبار، وتنتظر حياة اختارتها بقلبها.
أما صفوان، فكان في مكتبه يحاول التركيز في عمله، لكن عينيه كانتا تنتقلان إلى هاتفه بين الحين والآخر. اتصل بها أكثر من مرة، وحين لم يجد منها إلا ردودًا مقتضبة، اتصل بخديجة.
- خديجة، مهرة معاكي؟
- أيوه، إحنا بره بنجهز شوية حاجات.
- طب خليها تكلمني.
ضحكت خديجة:
- هي مشغولة يا صفوان.
- مشغولة بإيه؟ أنا عايز أسمع صوتها بس.
- ما تكلمها إنت.
- كلمتها، وكل مرة تقفل المكالمة بحجة إنها مشغولة. إنتِ عارفة هي مالها؟
لم تستطع خديجة منع ضحكتها:
- لا والله، معرفش.
- خديجة، متتواطئيش معاها عليا.
- أنا ماليش دعوة، دي خطيبتك وإنت حر معاها.
أنهى صفوان المكالمة وهو يبتسم رغم ضيقه، فقد بدأ يفهم أن مهرة تتعمد الابتعاد، لكنه قرر أن يترك لها لعبتها الصغيرة، وإن كان ينتظر اليوم الذي تنتهي فيه هذه المسافة بينهما.
في منزل شاهندة، لم يكن الهدوء يشبه الهدوء الذي يعيشه الآخرون استعدادًا لفرحة قريبة. كان زيدان يقضي معظم وقته بعيدًا عنها، إما في الشركة أو في مكتبه ، وإذا جمعهما المكان اكتفى بكلمات قليلة ثم انشغل بأي شيء آخر.
لم يعد قادرًا على النظر إليها كما كان يفعل من قبل. كلما وقعت عيناه عليها تذكر صوتها وهي تتحدث مع والدها عن الحادث الذي دبرته، وكيف دفعت المال لسائق الونش والممرضات والطبيب حتى يصدق الجميع أن عتمان على وشك الموت.
كان أكثر ما يؤلمه أنها لم تكتفِ بالكذب عليه، بل جعلته يعيش ساعات من الخوف والقلق على رجل كان يظن أنه قد يفقده، بينما كانت هي تعرف الحقيقة وتراقب رد فعله.
في ذلك المساء، دخل الغرفة وبدأ يجمع بعض ملابسه في حقيبة سفر صغيرة. كانت شاهندة تجلس على الفراش، فراقبته باستغراب وسألته:
- إنت بتعمل إيه يا زيدان؟
- هقعد كام يوم بره.
اعتدلت في جلستها:
- بره فين؟ وليه؟
- عندي شغل كتير، ومحتاج أبقى قريب من الشركة الفترة دي.
- طب ما الشركة مش بعيدة عن هنا، إيه اللي جد؟
أغلق حقيبته، ثم قال بهدوء:
- أهلِك موجودين معاكي، ودي فرصة تقعدي معاهم براحتك، وأنا مش عايز أحسسك إن وجودي مقيد حركتهم أو إنك مش قادرة تاخدي راحتك وسطهم.
نظرت إليه بعدم تصديق:
- وإنت شايف إن ده سبب كفاية إنك تسيب البيت؟
- مش بسيبه، أنا بس هقعد بره فترة، ولما الأمور تستقر هرجع.
اقتربت منه وأمسكت بذراعه:
- زيدان، هو إنت متضايق مني؟
نظر إلى يدها للحظة، ثم رفع عينيه إليها:
- لأ.
- أمال إيه اللي حصل؟ إنت متغير من فترة، ومش بتتكلم معايا زي الأول، وكل ما أقرب منك تلاقي أي حجة عشان تبعد.
أبعد ذراعه برفق، وقال:
- مفيش حاجة يا شاهندة، أنا فعلًا محتاج أركز في شغلي شوية.
- طب استنى لما بابا وماما يلاقوا شقة، وبعدها ابقى اعمل اللي إنت عايزه.
- لا، أنا قررت خلاص.
حملت ملامحها ضيقًا واضحًا، لكنها لم تجد ما تقوله أمام إصراره. أما هو فحمل حقيبته واتجه إلى الباب، ثم توقف للحظة وقال:
- خلي بالك من نفسك.
لم تنتظر منه أن يخرج، بل سألته بصوت متوتر:
- وهترجع إمتى؟
أجاب دون أن يلتفت:
- لما أخلص اللي ورايا.
ثم غادر.
ظلت شاهندة واقفة في مكانها، تنظر إلى الباب المغلق، وقد بدأت تشعر بأن هناك شيئًا يتغير بينهما لا تستطيع تفسيره. لم يكن زيدان غاضبًا أو عابسًا، ولم يفتعل شجارًا معها، لكنه كان ينسحب منها بهدوء، وهذا ما جعلها أكثر قلقًا.
وفي الخارج، ركب زيدان سيارته ووضع الحقيبة بجواره، ثم انطلق دون أن يخبرها إلى منزل والده
كان يحتاج إلى مسافة يلتقط فيها أنفاسه، ويعيد ترتيب أفكاره بعيدًا عن المرأة التي أحبها، ثم اكتشف أنه ربما لم يعرفها يومًا كما كان يظن.
كان زيدان جالسًا مع والده في منزله ، بعدما طلب منه أن يتحدث معه في أمر يشغله منذ أيام. ظل صامتًا قليلًا، ثم بدأ يحكي له ما حدث منذ اكتشافه حقيقة الحادث الذي دبره عتمان وشاهندة، وكيف أصبح غير قادر على التعامل مع زوجته بصورة طبيعية.
استمع والده إليه دون مقاطعة، ثم تنهد وقال:
- عتمان طول عمره أناني يا زيدان، وبيفكر في مصلحته قبل أي حد، حتى لو على حساب أقرب الناس ليه. بس أنا عايز أسألك سؤال، وإجابته تكون بينك وبين نفسك قبل ما تكون قدامي... إنت بتحب شاهندة؟
خفض زيدان عينيه قليلًا، ولم يُنكر:
- مش عارف يا بابا. أنا مهما حاولت أقنع نفسي إني مبقتش عايزها، مش قادر أنكر إن ليها مكان في قلبي. بس وجود أبوها في حياتنا مخليني دايمًا قلقان، حاسس إن أي كلمة أو تصرف منها وراه حاجة تانية، ومش عارف أصدقها تاني.
هز والده رأسه بتفهم:
- بص يا ابني، إنت مش مطلوب منك تنسى اللي حصل في يوم وليلة، لكن كمان متاخدش قرار نهائي وإنت لسه مش عارف الحقيقة كلها. طالما خدت احتياطاتك، واجهها وشوف هتقولك إيه، واديها فرصة أخيرة تثبتلك هي فعلًا بتحبك ولا كانت مجرد جزء من لعبة أبوها.
رفع زيدان عينيه إليه:
- خايف من المواجهه؟
- واجهها وشوف لو رفضت قرارك ساعتها تبقى هي اللي اختارت تخسرك. قولها بوضوح إنك مش هتقبل إنها تفضل مكملة في الطريق ده، وإن لو عايزة تحافظ على بيتها وجوازها، لازم تبعد عن تدخلات أبوها .
صمت قليلًا ثم أضاف:
- وأنا شايف كمان إنك تقعدها في البيت الفترة دي، وتمنعها من الشغل لحد ما الأمور تستقر، خصوصًا إن شغلها وعلاقاتها ممكن يكونوا وسيلة تانية عشان تساعد أبوها في اللي بيخطط له.
لم يبدُ زيدان مقتنعًا تمامًا، لكنه لم يعترض:
- أنا مش عايز أظلم نفسى ولا اظلمها .
- محدش قالك تظلمها، بس من حقك تحمي بيتك وشغلك. إنت مش هتمنعها من حاجة لمجرد إنك شاكك فيها، إنت هتطلب منها توقف أي تصرف ممكن يضر حياتكم، ولو رفضت يبقى هي اللي اختارت.
أومأ زيدان ببطء، ثم قال:
- خلينا نستنى لما فرح صفوان يعدي، مش عايز أفتح مشاكل جديدة في العيلة دلوقتي، وبعدها هتكلم معاها وأحاول أفهم منها كل حاجة.
ابتسم والده وربت على كتفه:
- ربنا يهدي لك الحال يا ابني، بس افتكر إن الثقة لما بتتكسر مش بترجع بالكلام، لازم اللي كسرها يتعب عشان يبنيها من جديد.
مرت الأيام سريعًا، وجاء اليوم الذي انتظرته مهرة طويلًا.
منذ الصباح الباكر، كانت السرايا تعج بالحركة، والسيارات تصل تباعًا محملة بالورود والهدايا، والخدم يتنقلون بين الغرف والصالات استعدادًا لاستقبال المدعوين. كان صفوان قد أصر على دعوة أهل البلد جميعًا، إلى جانب الأقارب والمعارف وكبار العائلات، فتحولت السرايا إلى خلية عمل لا تهدأ.
خُصص مكان للرجال، بينما جُهز الجزء الآخر لاستقبال السيدات، وزُينت الساحة والحديقة بالأضواء والورود، في أجواء احتفالية لم تشهدها البلد من قبل
وفي غرفة مهرة، كانت خبيرة التجميل قد وصلت بصحبة مساعدتها، وبدأت تجهيزها هي وخديجة.
جلست خديجة أمام المرآة، بينما كانت خبيرة التجميل تضع اللمسات الأخيرة على مكياجها، وظلت تتأمل نفسها بإعجاب وهي تقول:
- إيه الجمال ده! أنا كده هخطف الأضواء من العروسة.
ضحكت مهرة وهي تجلس على المقعد المجاور:
- يا ستي خدي الأضواء كلها، أنا مش هزاحمك.
- لا يا حبيبتي، النهارده مفيش غيرك، وأنا هبقى مجرد خلفية جميلة جنبك.
بعد قليل، انتهت خبيرة التجميل من وضع اللمسات الأخيرة، وطلبت من مهرة أن تقف حتى ترتدي فستانها. وما إن خرجت من خلف الستار حتى توقفت خديجة عن الكلام، وظلت تنظر إليها بإعجاب.
كانت مهرة ترتدي فستانًا راقيًا يليق بها، اختير بعناية ليبرز جمالها دون مبالغة، وانسدل شعرها بتسريحة ناعمة، بينما منحها المكياج إطلالة رقيقة زادت ملامحها إشراقًا. بدت كالقمر، هادئة وواثقة، ولم تكن بحاجة إلى أي محاولة لإثبات جمالها.
قالت خديجة بانبهار:
- يا نهار أبيض! صفوان لو شافك دلوقتي مش هيعرف ينطق.
ابتسمت مهرة بخجل،
فى فيلا شاهنده استاجرت ميكب ارتيست لها ولوالدتها وارتظت فستان يشبه العروس ووضعت الكثير من مستحضرات التجمل وفعلت والدتها مثلها كانت شاهنده تريد أن تبدوا هى العروس وتلغى وجود مهره
بينما في الجهة الأخرى من السرايا، كان صفوان يستقبل المدعوين، يتنقل بين الرجال ويصافح كبار العائلات، لكن عينيه كانتا تبحثان عن شيء واحد؛ ظهور مهرة.
جلس زيدان إلى جوار والده، وكان يتعامل مع الجميع بصورة طبيعية ويجلس بجانبه عز الذى يتابع ما يحدث بملل فهو يريد ترك تلك العائله وذلك المكان الذى لم يشعر فيه بأى انتماء
، وحين اقتربت شاهندة بعد انتهاء تجهيزها، رحب بها بهدوء وسألها إن كانت قد تناولت شيئًا، دون أن يظهر أي توتر أو ضيق.
جلست بجواره، وحاولت فتح حديث معه، فبادلها الكلام بصورة عادية، بينما ظل هو محافظًا على هدوئه، ولم يترك لشكوكه أن تفسد المناسبة.
ومع اقتراب موعد كتب الكتاب، طلب صفوان من المقربين من العائلتين التوجه إلى المكان المخصص داخل السرايا، حيث أُعد مجلس أنيق بحضور جاسر وعتمان وزيدان ووالد زيدان وبعض أفراد الأسرة.
دخلت مهرة برفقة خديجة، وما إن وقعت عينا صفوان عليها حتى تبدلت ملامحه، وظهرت ابتسامة واسعة على وجهه. ظل يتأملها للحظات، وكأنه نسي وجود كل من حوله.
اقتربت منه وجلست في المكان المخصص لها، فمال نحوها وهمس:
- أخيرًا شوفتك! إنتِ عارفة إنك وحشتيني قد إيه؟
ابتسمت بخجل:
- دول كام يوم بس يا صفوان.
\- كام يوم كانوا كفاية يخلوني أندم إني وافقت أسيبك تعملي اللي إنتِ عايزاه.
ضحكت بخفة، ثم بدأ المأذون إجراءات كتب الكتاب، وتبادل الحاضرون التهاني والدعوات، حتى أُعلن إتمام الزواج، وتعالت الزغاريد من ناحية السيدات، بينما صافح الرجال صفوان وباركوا له.
نظر صفوان إلى مهرة، ثم مد يده إليها ووضع الخاتم في إصبعها، وبعدها أخرج الشبكة وبدأ يلبسها إياها وسط ابتسامات الحاضرين.
وحين انتهى، اقترب منها وهمس بصوت لا يسمعه سواها:
- أنا عايزك بعد الفرح، أوعى تنامي.
نظرت إليه بدهشة، ثم احمر وجهها وهي تهمس:
- صفوان! إحنا لسه كاتبين الكتاب!
ابتسم بمكر:
- وأنا عارف، بس أنا مستني اليوم ده من زمان، وعايز أقعد معاكي وأتكلم براحتنا بعيد عن دوشة الناس .
ضحكت وهي تخفض عينيها، بينما كان هو لا يستطيع إخفاء سعادته.
وعلى الجانب الآخر، ظل زيدان جالسًا بجوار والده، يبادل المهنئين الحديث ويبتسم في وجوههم، وحين التفتت إليه شاهندة، وجدته يتعامل معها بصورة طبيعية تمامًا،
لكن خلف هدوئه كان هناك قرار مؤجل، ينتظر انتهاء هذه الليلة حتى يواجهها بالحقيقة التي لم تعد تحتمل التأجيل.
بعد انتهاء كتب الكتاب، بدأت الحركة تدب من جديد داخل السرايا، وتعالت الزغاريد في أرجائها ، بينما تقدمت خديجة من مهرة واحتضنتها بسعادة.
- مبروك يا عروسة، ربنا يسعدك ويهني قلبك، وتفضلي دايمًا منورة كده.
ابتسمت مهرة وهي تضمها:
- الله يبارك فيكي يا خديجة، فرحتي مش هتكمل من غيرك جنبي.
وقف والده مهره بين الحضور وبجوارها مهره وخديجة اقتربت بعض السيدات لتهنئتها، والتفتت خديجة نحوهن وهي تقول:
- يلا يا جماعة، العروسة معانا، هنروح نقعد وسط الستات ونسيب الرجالة لفرحتهم.
تحركت مهرة برفقة خديجة وباقي نساء العائلة إلى المكان المخصص للسيدات، وكان قد جُهز بصورة تليق بالمناسبة، زُينت جوانبه بالورود والإضاءات، وانتشرت الطاولات والكراسي في تنسيق أنيق، مع مساحة واسعة للرقص والاحتفال.
حاول الجميع التقرب مره اخرى من والده مهره حتى يعلموا أخبارها وما يحدث
فاخذهم الفضول وكثيراً ما حاولوا التلميح بإختفائهم وبخصوص شاهنده وزوجه عتمان الجديدة ولكن والده مهره استطاعت اسكاتهم
أما صفوان، فبعد أن صافح المهنئين واطمأن على مهرة قبل ابتعادها، اتجه إلى ساحة الرجال برفقة والده وزيدان وعتمان
كانت السرايا والطرق المحيطة بها قد تحولت إلى ساحة احتفال كبيرة، فقد امتدت الطاولات على جانبي الطريق، وتوزعت المقاعد في صفوف طويلة لاستيعاب الأعداد الكبيرة من المدعوين. لم تقتصر الدعوة على الأقارب والمعارف، بل حضر أهل البلد من مختلف العائلات، كبارًا وشبابًا، وكل من أراد أن يشارك العائلة فرحتها.
وفي مساحة واسعة قريبة من السرايا، أقيمت أماكن الطهي، ووقف عدد كبير من الطهاة ومساعديهم أمام المواقد الضخمة، يعملون على إعداد الطعام بكميات تكفي الجميع. كانت رائحة الطعام تنتشر في البلد بأكملها ، وأصوات العاملين تختلط بأصوات المدعوين والموسيقى، بينما يتحرك المسؤولون عن الضيافة بين الطاولات للتأكد من تجهيز كل شيء.
كان صفوان قد أصر على أن تكون الوليمة مفتوحة لأهل البلد جميعًا، فلم يرد أن يقتصر الاحتفال على أصحاب الدعوات فقط، بل أراد أن يشارك الجميع فرحته بزواجه من مهرة.
وما إن ظهر صفوان في ساحة الرجال حتى التف حوله عدد من كبار البلد، يتقدمهم بعض التجار وأصحاب العائلات الكبيرة، وبدأت التهاني تتوالى عليه.
ـ ألف مبروك يا صفوان بيه، ربنا يتمم فرحتك على خير.
ـ تستاهل كل خير يا ابن الأصول.
ـ عقبال ما نفرح بولادك ونشوفك بألف خير.
كان صفوان يستقبل الجميع بابتسامة وترحاب، بينما وقف جاسر إلى جواره، وقد بدت عليه سعادة كبيرة وهو يرى ابنه محاطًا بهذا القدر من المحبة والتقدير.
أما عتمان، فكان حريصًا على الوقوف بالقرب منهما، يتحدث مع كبار البلد ويعرفهم على بعض الحاضرين، وكأنه يريد أن يؤكد للجميع أن علاقته بصفوان لم تعد مجرد علاقة عم بابن أخيه، بل أصبحت علاقة مصاهرة أيضًا.
وكان زيدان حاضرًا بجوارهما، يتلقى التهاني ويشارك في الحديث، وقد بدا هادئًا ومتزنًا كعادته، بينما كان بعض التجار يقتربون منه للسؤال عن أحوال العمل والفرع، فيجيبهم باختصار ولباقة.
اقترب أحد كبار التجار من صفوان، وقال وهو يصافحه:
- بصراحة يا صفوان بيه، فرحتنا بيك النهارده كبيرة، واللي عملته لأهل البلد ده مش غريب عليك. ربنا يديم المعروف، ويجعل بيتك عامر بالخير.
ابتسم صفوان:
- ده واجبنا يا حاج، والبلد دي بلدنا كلنا، وفرحتي مش هتكمل غير بوجودكم معانا.
تدخل عتمان سريعًا:
- ودي فرحة عيلة القحطاني كلها يا حاج، صفوان ابننا، ومهرة بنتنا، وإحنا النهارده بقينا أهل أكتر من الأول.
ابتسم الرجل وهو يبارك لهما، ثم انتقل الحديث إلى أحوال البلد والتجارة، بينما ظل الحاضرون يتوافدون على صفوان وجاسر وزيدان وعتمان. ووالد زيدان
كان جاسر يراقب ابنه بفخر، فقد رأى كيف أصبح صفوان قادرًا على إدارة العمل وتحمل المسؤولية، وكيف استطاع أن يجمع حوله احترام الناس وثقتهم.
مال جاسر نحوه وقال بصوت منخفض:
- ربنا يسعدك يا ابني، النهارده فرحتك كبيرة، والناس كلها جاية تشاركك فيها.
رد صفوان بابتسامة:
- وجودك جنبي هو اللي مكمل فرحتي يا بابا انا لولا اسمك عمرى ما كنت هبقى كده
ربت جاسر على كتفه، بينما عتمان انشغل بمصافحة مجموعة جديدة من كبار العائلات، محاولًا استغلال المناسبة لتقوية علاقاته بهم من جديد.
وفي تلك الأثناء، كانت أصوات الزغاريد القادمة من ناحية السيدات تصل إلى ساحة الرجال، فعرف صفوان أن الاحتفال هناك بدأ يأخذ مجراه، فالتفت ناحية السرايا، وظهرت ابتسامة عريضة على وجهه وهو يتخيل مهرة وسط النساء بفستانها الأبيض.
لم يكن ينقصه من فرحة اليوم شيء، سوى أن تنتهي الزحمة ويختلي بها قليلًا، بعيدًا عن عيون الجميع وضجيج الاحتفال.
وكان زيدان ينتظر بفارغ الصبر انتهاء الفرح واخذ شاهنده والذهاب لمنزل والده كى يتحدثوا براحتهم
