رواية مهرة في عرين القحطاني بقلم اماني سيد
رواية مهرة في عرين القحطاني الفصل الثاني والثلاثون32 بقلم اماني سيد
ظل زيدان جالسًا أمام مكتبه، يتفحص الأوراق التي وصلته من الإدارة المالية، وكلما انتقل من ملف إلى آخر ازدادت ملامح وجهه صرامة. لم تكن المسألة مجرد أخطاء إدارية أو قرارات اتخذتها شاهنده دون الرجوع إليه، فهناك تعاقدات تمت بأسعار مبالغ فيها، ومبالغ تحتاج إلى مراجعة دقيقة، وأسماء موردين تكررت في أكثر من معاملة بصورة أثارت شكوكه.
أغلق الملف ببطء، ثم نظر إلى الرجل الجالس أمامه.
- أنا عايز مراجعة لكل التعاقدات اللي شاهنده كانت مسؤولة عنها، من أول يوم مسكت فيه الملفات لحد النهارده. ومش عايز أي حد يعرف إن المراجعة دي بطلب مني.
- حاضر يا فندم.
- وأي تعامل جديد مع الموردين دول يتوقف مؤقتًا لحد ما نراجع الحسابات.
غادر الرجل، بينما ظل زيدان يفكر. كان أكثر ما يزعجه أنه لم يعد يعرف إن كانت زوجته تتصرف من تلقاء نفسها أم أن هناك من يدفعها إلى ذلك، لكنه لم يكن مستعدًا لمواجهة دون دليل واضح.
أخرج هاتفه، وتوقف قليلًا عند اسم شاهنده قبل أن يضغط على الاتصال.
في بيت جاسر، كانت شاهنده تجلس بجوار والدها عتمان، بينما كان صفوان ومهرة يتحدثان في الجهة الأخرى من غرفة الجلوس. رن هاتفها، فالتقطته ونظرت إلى الشاشة.
- زيدان بيتصل.
رفع عتمان عينيه إليها، وأشار لها أن تجيب.
- أيوه يا زيدان.
جاءها صوته هادئًا، لكنه يحمل شيئًا من الجدية.
- إنتِ هتيجي إمتى يا شاهنده؟ طولتي عند باباكي.
نظرت إلى عتمان قبل أن تجيبه.
- بكرة إن شاء الله. بابا بقى كويس، والدكتور طمّنا عليه، ونقدر نرجع.
- الحمد لله، ربنا يتم شفاه على خير.
- وهنبقى جايين كلنا، مش أنا بس.
- كلنا مين؟
- أنا وبابا وصفوان ومهرة وعمو جاسر. كلنا هنرجع مع بعض بكرة.
صمت زيدان لحظة، ثم قال:
- تنوروا.
ابتسمت شاهنده وهي تتابع:
- وبعدين صفوان ناوي يبدأ يجهز للفرح، خلاص بقى مفيش داعي للتأجيل.
- ربنا يتمم لهم على خير.
- إنت عارف إن صفوان مش عايز يضيع وقت، وخصوصًا إنه قرر يعمل الخطوبة وكتب الكتاب في نفس اليوم.
- ربنا يسعدهم.
أنهى زيدان المكالمة بعد كلمات قليلة، وعاد ينظر إلى الملفات أمامه. لم يكن لديه ما يقوله لشاهنده الآن، لكنه كان يريد عودتها حتى يرى بنفسه كيف ستتصرف، وهل ستواصل إدارة الأمور بالطريقة نفسها أم ستتغير بعدما بدأت خطوات الزواج الجديد تقترب.
في الجهة الأخرى، وضعت شاهنده الهاتف على الطاولة، فنظر إليها عتمان.
- كان عايز إيه؟
- بيسأل هرجع إمتى، وقلت له بكرة.
- وقلتي له إننا كلنا راجعين؟
- أيوه، قلت له إننا هنرجع كلنا، وإن صفوان هيبدأ يجهز للفرح.
تدخل صفوان بابتسامة وهو ينظر إلى مهرة:
- مش هسيب الموضوع يطول أكتر من كده. أنا عايز أخلص تجهيزات الخطوبة وكتب الكتاب في أسرع وقت.
احمر وجه مهرة قليلًا، وحاولت أن تخفي ابتسامتها وهي تنظر إلى والدتها.
- براحتك يا صفوان، المهم تعملوا حاجة تليق بيكم وبالعيلة.
رد صفوان بثبات:
- أنا مش فارق معايا المظاهر قد ما فارق معايا إن مهرة تكون مبسوطة، وإن كل حاجة تتم بالطريقة اللي هي عايزاها
نظرت إليه مهرة بامتنان، بينما تبادل جاسر وعتمان نظرة قصيرة.
قال جاسر:
- يبقى أول ما نرجع نحدد اليوم، ونعرف مين هيتولى التجهيزات، ونخلص كل حاجة من غير تأخير.
أومأ صفوان موافقًا، ثم التفت إلى مهرة:
- وإنتِ بقى، عايز أعرف رأيك. تحبي الخطوبة وكتب الكتاب في قاعة كبيرة، ولا حاجة بسيطة وسط العيلة؟ ولا تحبى نعملها فى السرايا
أجابته مهرة بهدوء:
- أنا مش عايزة حاجة مبالغ فيها، المهم أكون مرتاحة، وكل اللي بحبهم يكونوا موجودين.
- يبقى اتفقنا.
ابتسم صفوان، بينما كانت شاهنده تراقب الحديث في صمت. لم تكن سعيدة تمامًا بفكرة أن مهرة ستصبح زوجة صفوان، لكنها أدركت أن هذه الزيجة ستجعلها أكثر ارتباطًا بالعائلة، وأن عليها أن تحافظ على مكانها وسط الجميع.
أما عتمان، فكان يفكر في عودته إلى الشركة، وفي الخطوات التي يمكن أن يتخذها بعدما أصبح صفوان زوجًا لابنته قريبًا.
وفي اليوم التالي، بدأت العائلة تستعد للعودة. كان صفوان منشغلًا بالاتصالات وترتيبات الخطوبة وكتب الكتاب، ومهرة تجلس إلى جوار والدتها، بينما عتمان يتابع كل شيء بعين لا تفوّت تفصيلة.
لكن في الشركة، كان زيدان قد بدأ بالفعل أولى خطوات المراجعة الحقيقية، ولم يعد الأمر بالنسبة إليه مجرد شك في تصرفات زوجته.
فقد وصل إليه تقرير جديد يحمل اسم مورد لم يكن يتعامل معه من قبل، وبجواره توقيع شاهنده بالموافقة على تعاقد ضخم، رغم أن الإدارة لم تكن قد اعتمدته.
تأمل زيدان التوقيع طويلًا، ثم رفع عينيه وقال بصرامة:
- واضح إن الموضوع أكبر مما كنت متخيل.
في صباح اليوم التالي، كانت العائلة تستعد للعودة، بعدما اطمأن الجميع على حالة عتمان. تحرك صفوان مع جاسر لترتيب السيارات، بينما كانت مهرة تساعد والدتها في جمع بعض الأغراض.
كانت وابده مهره تساعد مهره ولكنها لم تكن تنوى الشهاب مره اخرى الى البلد
وعندما انتهوا من وضع الحقائب فى السياره سألت مهره والدتها عن حقائبها
- أنا مش راجعة هناك.
التفتت مهرة إليها باستغراب.
- ليه يا ماما؟ إحنا راجعين بيتنا.
- بيتنا إيه يا مهرة؟ أبوكي قاعد هناك مع مراته التانيه ، وأنا مش مسمحاه على اللي عمله فيا، ومش هقدر أقعد في مكان هو فيه. كفاية العمر اللي ضاع مني وأنا مستحملة.
اقتربت منها مهرة وأمسكت يدها.
- وأنا مش هسيبك يا ماما، لو مش عايزة ترجعي مش هنرجع.
لكن صفوان، الذي كان قد استمع إلى الحديث، اقترب منهما وتحدث بهدوء:
- لا، إنتوا هترجعوا.
نظرت إليه والدة مهرة بضيق.
- إنت مش حاسس بيا يا صفوان. أنا مش عايزة أشوفه، ولا أشوف مراته، ولا أعيش تحت سقف واحد معاهم. لو مش عايزنى اقعد هنا انا ممكن اشوف مكان تانى اعيش فيه
جلس صفوان أمامها، وقال بجدية:
- أنا حاسس بيكي أكتر ما تتخيلي، وعشان كده بالذات مش عايزك تتنازلي عن بيتك. السرايا دي بتاعتك، وإنتِ اللي عيشتي فيها وبنيتيها وتعبتي فيها سنين. مش معقول بعد كل اللي حصل تسيبيها وتمشي، وتسيبي مكانك لواحدة تانية.
- بس هو موجود فيها يا ابني.
- وجوده مش معناه إنك إنتِ اللي تمشي. إنتِ صاحبة حق، ومش مطلوب منك تهربي من مكانك عشان هو قرر يدخل واحدة تانية حياتكم. بالعكس، لازم ترجعي وتاخدي حقك.
هزت رأسها بحزن.
- وأنا هعمل إيه لما أشوفه قدامي؟ هقدر أعيش معاه إزاي؟
- محدش قالك تعيشي معاه أو تسامحيه. إنتِ مش مطالبة تنسي اللي عمله، ولا تتعاملي معاه كأن مفيش حاجة حصلت. لكن لازم تعرفي إن البيت ده بيتك، وإنك مش ضيفة فيه عشان تستأذني انك تدخليه ولو البيت مايسعش غير شخص واحد يبقى يساعك انتى بس لانه بيتك
ثم أضاف بنبرة أكثر حسمًا:
- وإذا كان فيه حد المفروض يخرج من السرايا، فاللي المفروض يخرجوا هي وولادها، مش إنتِ. البيت ده بتاعك، وإنتِ اللي بنيتيه معاه، ومش من حقه يمحي كل السنين دي لمجرد إنه اتجوز واحدة تانية.
نظرت إليه والدة مهرة، وقد بدأت الدموع تتجمع في عينيها.
- أنا تعبت يا صفوان، تعبت من إني طول عمري أتنازل عشان البيت يفضل واقف واضحى
- وعشان كده مش عايزك تتنازلي المرة دي. إنتِ لازم ترجعي، وتبقي ست البيت كله زي ما كنتِ. مش عشان تثبتي حاجة لحد، لكن عشان ده حقك، وعشان مهرة تشوف أمها واقفة على أرضها، مش مضطرة تسيبها لغيرها.
تدخلت مهرة وهي تضغط على يد والدتها:
- صفوان عنده حق يا ماما. إحنا مش هنسيب بيتنا، ومش هنسمح لحد يحسسنا إننا غرب فيه. إنتِ صاحبة المكان، واللي يدخل بعدك هو اللي لازم يعرف حدوده ويبقوا عارفين أنهم ضيوف
تنهدت والدتها ومسحت دموعها، ثم نظرت إلى صفوان.
- خايفة أرجع وألاقي نفسي ضعيفة قدامه تاني.
رد صفوان بثقة:
- المرة دي مش هتكوني لوحدك. وأنا مش هسمح لحد يقلل منك أو من حقك، لكن لازم إنتِ كمان تكوني مقتنعة إنك مش أقل من أي حد في البيت ده.
ظل جاسر صامتًا يستمع إليهم، ثم قال مؤيدًا كلام ابنه:
- صفوان عنده حق. السكوت عن الحق مش هيحل حاجة، واللي حصل لازم يتواجه، لكن بالعقل ومن غير ما حد يظلم حد.
أما عتمان، فكان يجلس فى سياره منفصله هو وشاهنده وتحركت سيارتهم أولا وكان يعلم من داخله ان زوجته ضعيفه لا تقوى على الذهاب او مواجهته ، فظن انها ابتعدت عن طريقه نهائيًا فطوال فتره جلوسه عند جاسر لم يلمح طيفها ولو لمره ،
وبعد تردد طويل، وافقت والدة مهرة على العودة.
لم تكن عودتها مصالحة مع عتمان، ولا قبولًا بوجود زوجته الجديدة، بل كانت قرارًا بألا تترك بيتها مرة أخرى والحفاظ على حقها
وفي طريق العودة، كانت مهرة تنظر من نافذة السيارة، بينما صفوان يتابعها من حين لآخر، مدركًا أن الأيام القادمة لن تكون سهلة، خصوصًا بعدما يجتمع الجميع تحت سقف واحد، وتبدأ الاستعدادات لخطوبتهما وكتب كتابهما.
وصلوا إلى السرايا بعد رحلة طويلة، وكانت سيارة عتمان قد سبقتهم بالفعل. نزل عتمان أولًا، ومن بعده شاهنده ، ثم دخل معها إلى البيت وهو يظن أن زوجته الأولى لن تجروء على الدخول مره اخرى
لكن ما إن توقفت سيارة جاسر أمام البوابة، حتى تغيرت ملامحه عندما رأى مهرة تنزل منها برفقة والدتها.
لم يخفِ دهشته، وظل واقفًا عند مدخل السرايا يراقبهما وهما تتقدمان، بينما كانت والدة مهرة تحاول أن تبدو متماسكة، رغم أن قلبها كان يخفق بعنف كلما اقتربت من الباب الذي غادرته مجبرة في المرة السابقة.
تقدمت مهرة بجوارها، ممسكة بيدها، وقالت بصوت منخفض:
ـ ارفعي راسك يا ماما، إنتِ راجعة بيتك.
أومأت والدتها، ثم رفعت عينيها إلى عتمان الذي كان ينتظرهما في المدخل.
قال عتمان محاولًا أن يبدو هادئًا ورسم على وجهه ابتسامة
ـ حمد لله على السلامة.
لم ترد عليه، ولم تمنحه حتى نظرة طويلة، بل تجاوزته ودخلت إلى السرايا، وكأنها لم تسمع صوته من الأساس.
أما مهرة فتوقفت أمامه للحظة،
ـ الله يسلمك يا بابا
لم ينتظر عتمان ردًا، فقد كان ينظر إليها وإلى والدتها بارتباك، ثم ابتعد قليلًا ليفسح لهما الطريق.
دخلت والدة مهرة إلى الصالة، وتوقفت تتأمل المكان الذي عاشت فيه سنوات عمرها، ثم اتجهت إلى الأريكة وجلست، بينما وضعت مهرة حقيبتها بجوارها.
اقتربت شاهنده من والدتها ، ثم نظرت إلى مهرة وقالت:
ـ حمد لله على السلامة اعتبروا البيت بيتكم :
اجابتها مهره
ـ الله يسلمك يا شاهنده بس ليه اعتبره بيتى مهو بيتنا فعلاً ده بيت ماما وهى اتاخرت فى ضيافتكم بس ملحوقه ماما رجعت البيت تانى وهتعرف تضايفكم كويس
لم تستطع شاهنده الحديث والرد عليها فهى لم تجد ما تقوله لكن
في تلك الأثناء، دخل صفوان وجاسر وخديجه والجميع وامرت امينه الخادمه أن تجهز لهم الغرف
و بمجرد أن استقرت والدة مهرة في الصالة، بدأت تستعيد شيئًا من ثباتها الذي فقدته طوال الفترة الماضية. لم تعد تلك المرأة التي تدخل السرايا بخطوات مترددة، أو تنتظر إشارة من عتمان لتعرف ماذا تفعل. كانت عودتها هذه المرة مختلفة، وقد قررت ألا تسمح لأحد بأن يتعامل معها كأنها غريبة عن بيتها.
نظرت إلى إحدى العاملات وقالت:
ـ اعملي لنا شاي، وبعدها عايزاكي تطلعي تشوفي أوضتي، وتفضيها وتغيرى الفرش عشان احط حاجتى فيها .
ارتبكت العاملة، ونظرت ناحية عتمان قبل أن تجيب:
ـ حاضر يا هانم.
التقطت والدة مهرة نظرتها، فقالت بحزم:
ـ أنا اللي بكلمك، ولما أطلب منك حاجة تردي عليا أنا، مش تبصي لحد تاني. مفهوم؟
ـ حاضر يا هانم.
وفي الوقت نفسه، كانت مهرة قد صعدت إلى غرفتها، لكنها ما إن فتحت الباب حتى توقفت مكانها بصدمة. الغرفة التي كانت تخصها لم تعد كما تركتها؛ فقد امتلأت بأغراض اخرى ، وملابس متناثرة فوق السرير، واشيتء مبعثره هنا وهناك
تقدمت إلى الداخل، وأزاحت بعض الملابس عن المقعد، ثم فتحت خزانة الملابس لتجدها ممتلئة بأشياء لا تخصها.
لم تنتظر مهرة أن تاخذ الاذن لتستعيد غرفتها فعندما قررت العوده كانت تعرف جيداً انها مقبله على ح.رب ، وقفت فى منتصف الغرفه ، ونظراتها تتنقل بين الحقائب والملابس الملقاة فوق فراشها، وكأنها لا تصدق أن أحدًا تجرأ على تحويل غرفتها إلى مخزن لمتعلقات شخص آخر.
نادت على احدى الخادمات لتنقل تلك الأشياء لتضع اشيائها
ـ عايزاكم تجيبوا شنطه كبيره تفضوا فيها الحاجه دى كلها خلال ساعه عايزه الاوضه ترجع فاضيه
اجابتها احدى الخادمات
ـ دى غرفه عز بيه ومانقدرش نشيل حاجه منها
تحدث مهره بعصبيه
- أنا مش هكرر كلامي تاني، الأوضة دي أوضتي، والحاجات دي تتشال حالًا عز ولا غيره كانوا ضيوف هنا ولو رفضتى تنفذى كلامى وقتها سيبى السرايا واخرجى حالا
ردت إحدى العاملات بتردد:
- يا هانم، إحنا بننفذ التعليمات اللي اتقالت لنا، والست شاهندة هي اللي أمرتنا نحط حاجات عز هنا.
نظرت إليها مهرة بحدة:
- وأنا بقولك إن شاهندة مش صاحبة الأوضة دي، ولا من حقها تتصرف فيها. من النهارده أي حد في البيت ده مش هينفذ كلامى ياخد بعضه ويمشى انتى فاهمه .
ثم أشارت إلى الملابس:
- شيلوا كل حاجة وحطوها في كيس ولو حد فيكم رفض ينفذ، يقدر يعتبر نفسه مش محتاج ييجي الشغل من دلوقتي.
لم تنتظر إجابة منهم، بل خرجت من الغرفة وأغلقت الباب خلفها، وهي تحاول السيطرة على غضبها. لم تكن المشكلة في الملابس أو الأغراض، بل في الرسالة التي أرادت شاهندة إيصالها لها؛ أنها لم تعد صاحبة مكان في هذا البيت، وأن بإمكانهم التصرف في غرفتها وخصوصيتها كما يشاؤون.
وفي الطابق الآخر، كانت والدتها تقف أمام باب غرفتها، تتأمل التغيير الذي طال كل ركن فيها. لم تجد دولابها كما تركته، ولا أثاثها الذي اختارت تفاصيله بنفسها، بل وجدت ملابس زوجة عتمان الجديدة معلقة في الدولاب، ولا توجد لها اى أغراض، حتى فراشها لم يعد كما كان.
دخلت زوجة عتمان خلفها، وقالت بنبرة متعالية:
- خير؟ إنتِ واقفة كده ليه؟
التفتت إليها والدة مهرة ببطء:
- أنا واقفة في أوضتي، ؟
ابتسمت المرأة بسخرية:
- مكانك؟ هو إنتِ لسه فاكرة إن ليكي مكان هنا؟ عتمان اتجوزني، وأنا مراته، ومن حقي أعيش في بيته وأختار الأوضة اللي تناسبني.
- مش لما يبقى بيت عتمان أصلا البيت ده بيتى أنا وانتى وعتمان ضيوف هنا وغير مرحب بيكم كمان وقريب اوى هتخلص الضيافة دى
تغيرت ملامح المرأة، وقالت بعناد:
- أنا مش هلم حاجة، واللي عنده كلام يقوله لعتمان.
وفي تلك اللحظة ظهر عتمان عند الباب، بعدما ارتفعت أصواتهما، فنظرت إليه زوجته وكأنها تنتظر منه أن يحسم الأمر لصالحها.
قالت والدة مهرة دون أن تمنحه فرصة للكلام:
- كويس إنك جيت يا عتمان. أنا رجعت بيتي، ولقيت أوضتي متاخدة، ومراتك حاطة حاجتها فيها. أنا عايزاها تشيل حاجتها وترجع الأوضة زي ما كانت.
نظر عتمان إلى زوجته، ثم إلى والده مهره ، وبدا عليه الارتباك. كان يعرف أن طلبها حق، لكنه لم يكن يريد الدخول في مواجهة جديدة مع زوجته الحالية، خاصة بعدما بدأت تشعر أن عودتهما ستغير كل شيء.
حاول تهدئة الموقف:
- يا جماعة، إحنا لسه راجعين، ومش ناقصة مشاكل. نقدر نتفاهم ونشوف حل يرضي الكل.
ضحكت زوجته بسخرية:
- حل إيه يا عتمان؟ هي جاية من أول يوم عايزة تمشيني من أوضتي!
اجابتها امينه بحظه
- أوضتك إنتِ؟ إنتِ نسيتي إنك دخلتي البيت ده بعد ما أنا خرجت منه؟ ولا افتكرتي إن غيابي معناه إنك بقيتي صاحبة كل حاجة فيه؟
ثم اقتربت من عتمان، وقالت بوضوح:
- أنا مش جاية أطلب منك فضل، ولا جاية أعيش على حسنة منك. أنا رجعت عشان آخد حقي، واول حاجه هترجع يا عتمان بيتى واوضتى ومحدش هيفرض عليا أعقد فين وماقعدش فين عايزه تقعدى فى اوضه فاضيه تحت جمب اوضه الخدم انقلى فيها لان للأسف غرف الضيوف جهزت للضيوف ومش من مقامهم يقعدوا فى اوضه الخدم
ظل عتمان صامتًا، بينما زوجته الجديدة عقدت ذراعيها أمام صدرها وقالت:
- أنا مش هسيب الأوضة، واللي عايز يغير الوضع ده يتصرف!
وقبل أن يرد عتمان، ظهرت مهرة عند باب الغرفة، بعدما سمعت آخر كلمات المرأة، وكانت لا تزال غاضبة مما حدث معها في غرفتها.
نظرت إلى والدتها، ثم إلى عتمان وزوجته، وقالت بهدوء يحمل الكثير من الغضب:
- واضح إن كل واحدة فينا رجعت لبيتها، واكتشفت إن في ناس قررت تستولى على مكانها في غيابها بصى يا حاجه ده مش بيتك عشان يبقالك حق تقولى هخرج او مش هخرج إحنا هنا بنبلغك مش بناخد رايك وماما كتر خيرها انها سامحتلك تقعدى فى غرفه الخدم
ثم التفتت إلى أبيها:
- يا بابا، أنا مش عارفة إنت كنت متوقع إيه من رجوعنا، لكن إحنا مش راجعين عشان نعيش ضيوف في بيتنا. إحنا راجعين عشان ناخد مكاننا وحقوقنا، ومش هنقبل إن حد يتعامل معانا كأننا دخلاء.
نظر عتمان إلى مهرة، ولم يجد ما يقوله. فقد عاد وهو يظن أن الأمور ستظل كما تركها، وأن زوجته الأولى وابنته ستكتفيان بالوجود في البيت دون أن تطالبا بشيء، لكنه بدأ يدرك أن هذه المرة لن تمر الأمور بهذه السهولة
