رواية نارين بين الحب والوجع الفصل الحادي والاربعون41 بقلم ليلي طاهر
تسمرت الحاجة نعمة عند عتبة الباب، والتفتت ببطء نحو لينا، وقد تلاشت البسمة عن وجهها البشوش لتحل محلها نظرة دهشة وقلق. ضربت كفًّا بكف وهي تقول بنبرة مستغربة ومستنكرة:
- «مش هتجعدي في البيت؟! أومال هتروحي فين عاد في الوجت ده والليل خلاص عيهلّ علينا؟ وأنتِ غريبة اهنيه، لا تعرفي حد اهنيه ولا ليكي حد اهنيه.. يبجى هتروحي فين يا بتي؟!»
خطت لينا خطوة إلى الأمام، وقالت بتردد حاولت إخفاءه:
- «أنا عايزة حد بس يوصلني عند دكانة الحاج مصطفى..»
عقدت الحاجة نعمة حاجبيها باستغراب، فلاحظت لينا نظرتها وسارعت إلى توضيح موقفها:
- «هو.. هو كان متفق معايا على كده في القطر، إن أنا هشتغل معاه.»
هدأت ملامح الحاجة نعمة، وتخلّت عن وقفتها المتحفزة، ثم اقتربت من الفراش وجلست بجوار لينا. ربّتت على فخذها بحنان، وقالت بنبرة دافئة، لكنها حاسمة:
- «لاه.. ما ينفعش الكلام ده واصل يا بتي، ما فيش بنية عتطلع في الصعيد لحالها في وجت زي ده! وأنا ما جدرش أطلعك عاد واصل دلوجت.. اصبري يا بتي، هي كلها ساعة ولا اتنين وييجي الحج مصطفى، ونبجى نشوف الموال ده معاه، بس أنا ما جدرش أطلعك عاد دلوجت.»
تأملت لينا عيني الحاجة نعمة، فرأت فيهما خوفًا حقيقيًّا عليها، وشعرت بالطمأنينة وهي تجلس إلى جوارها. أومأت برأسها موافقة، وقررت الانتظار حتى يعود الحاج مصطفى.
ــــــــ
مرت الساعات ثقيلة كالجبال منذ ذلك الاتصال المشؤوم في الصباح. ومع اقتراب الشمس من المغيب، كان الجد ما يزال قابعًا في مكتبه، يذرع الغرفة ذهابًا وإيابًا بخطوات مضطربة، وعقله يكاد ينفجر من فرط التفكير.
توقف فجأة وسط الغرفة، وقبض على حافة مكتبه الخشبي بقوة، وهو يتمتم بصوت مبحوح يملؤه الفزع:
• "مجنون.. مجرم.. ده مستحيل يكون إنسان طبيعي! اللي بيعمله ده واللي بيفكر فيه مش تصرف شخص عاقل أبدًا.. ده مريض نفسي، مريض ومشوه ومستعد يدمر كل حاجة عشان يرضي جنونه!"
أخذ نفسًا عميقًا، ومسح العرق البارد عن جبينه، قبل أن ينهار بجسده فوق مقعده من شدة الإعياء. وضع كفيه على وجهه المجهد، وضغط على عينيه بقهر، وهو يهمس بنبرة مكسورة:
• "أنا السبب.. أنا اللي طردتها بإيدي وسبتها تبعد عن القصر وعن عيني.. كبريائي اللعين وعنادي هما اللي وصلونا لهنا.. لو كنت سبتها تحت جناحي وفي أمان القصر ده، ما كانش المجرم ده حلم مجرد الحلم إنه يقرب منها.. أنا اللي رميت لينا للتهلكة!"
نهض مجددًا بتثاقل، كأنما يحمل جبالًا فوق كتفيه، واقترب بخطوات واهنة من النافذة العريضة. أسند جبهته إلى زجاجها البارد، وظلت عيناه الحائرتان معلقتين بأشجار حديقة القصر الواسعة، التي بدأت تكتسي بظلال المساء الموحشة.
شعر برعب حقيقي ينهش صدره، فصاح بصوت مخنوق وهو يحدق في الفراغ:
• "يا ترى روحتي فين يا لينا؟ من غير ما حد يحميكي من بطش مجنون مش طبيعي زي ده؟!"
ضرب بقبضته إطار النافذة الخشبي، ثم استدار ليواصل سيره المضطرب في الغرفة، وقد بلغ به العجز حد الاختناق:
• "أعمل إيه بس؟ لو تحركت ودورت عليها.. صابر وعيونه مراقبيني وماشيين ورايا خطوة بخطوة، وهيصلوا لها عن طريقي وياخدوها غصب عنها.. ولو فضلت قاعد مكاني مش بعمل حاجة.. المجنون ده ممكن يوصل لها قبلي!"
توقف في منتصف الغرفة، ثم جثا على ركبتيه، رافعًا كفيه المرتجفتين نحو السماء. انهمرت دموعه أخيرًا، بعدما شلّت الحيرة حركته وأسقطت ما تبقى من كبريائه، وخرج صوته متهدجًا بالبكاء، محملًا برجاء حار:
• "يا رب.. أنا عارف إن عمري ما عملت حاجة كويسة، وعارف إن قسوتي وكبريائي هما السبب في كل ده.. ماليش عين أطلب منك حاجة لنفسي، وعارف إني ما استاهلش.. بس أرجوك احميها هي.. احميها عشانها هي مش عشاني أنا.. البنت غلبانة وملهاش أي ذنب في كل اللي أنا عملته.. يا رب تكون بعدت عنه وعني، وتختفي خالص عن عيوننا إحنا الاتنين، وتسترها معاها.. لحد ما ألاقي طريقة أخلصها بيها من المجرم ده!"
------
وفي تلك الأثناء، وعلى الجانب الآخر من المدينة...
كانت مائدة الطعام الفاخرة تتوسط صالة الفيلا الواسعة، وقد ازدحمت بأصناف الغداء التي أُعيد تسخينها، لكنها بردت من جديد دون أن تمتد إليها يد. جلست الأم وحيدة على رأس الطاولة، تتأمل المقاعد الفارغة من حولها بغصة مريرة؛ فلم يعد الأمر مجرد كسل عابر من ابنتها، بل تحول إلى نمط حياة خانق فرضته عليها شاهندة، التي باتت لا تنزل من غرفتها، ولا تشاركها وجبة، ولا تكاد تلمح طيفها.
لقد طفح بها الكيل من تناول وجباتها وحيدة وسط هذا الصمت الثقيل، وشعرت بجفاء ابنتها ينهش روحها يوماً بعد يوم. لكن غضبها هذه المرة كان ممزوجاً بخوف حقيقي؛ فنوم شاهندة المتواصل منذ ليلة أمس، وامتداد غيابها طوال النهار، باتا أمراً يثير القلق ويتجاوز حدود الاحتمال.
شبكت أصابع يديها بقوة، وأسندت رأسها إليهما، مغمضة عينيها في محاولة لالتقاط أنفاسها، بينما ارتسم الإرهاق والضيق على ملامحها.
قاطعت خلوتها خطوات خافتة ومترددة. رفعت رأسها لتجد الخادمة تقف على مقربة منها، وقد بدت علامات الحرج والخوف على وجهها. ابتلعت الخادمة ريقها وقالت بنبرة حذرة:
• "شاهندة هانم ما رضيتش تصحى يا هانم.. حاولت معاها كتير، بس هي نايمة في سابع نومة، ولما ألحيت عليها اتعصبت عليا وطردتني من الأوضة."
كانت كلمات الخادمة بمثابة عود ثقاب أُلقي في جوف الأم المشتعل. فالنهار أوشك على الرحيل، والليل بدأ يقترب، وابنتها ما زالت غارقة في نومها. أطبقت على أسنانها بغيظ، ثم أشارت للخادمة بيد مرتجفة وقالت بصوت حاد ومكتوم:
• "طيب روحي إنتِ دلوقتي."
انسحبت الخادمة سريعاً، بينما نهضت الأم من مقعدها باندفاع، فاندفع الكرسي خلفها وأصدر صريراً مزعجاً فوق الأرضية الرخامية، كاسراً صمت المكان.
لم تعد قادرة على تحمل هذه العزلة أو تجاهل هذا النوم غير الطبيعي. صعدت درجات السلم المؤدي إلى الجناح العلوي بخطوات سريعة، وقد عقدت العزم على وضع حد لهذا الوضع الذي استنزف أعصابها.
وصلت إلى باب غرفة ابنتها، ودون أن تطرق، دفعته بقوة واقتحمت الغرفة المعتمة. كانت الستائر المسدلة تحجب آخر خيوط الضوء، والهواء داخل الغرفة ثقيلاً خانقاً. وعلى السرير، كانت شاهندة مستغرقة في نوم عميق، وكأنها تحاول الاختباء من العالم بأسره تحت أغطيتها.
تقدمت الأم نحوها، والغضب يمتزج بالقهر في صدرها. لم تحتمل رؤية ابنتها على هذه الحال مجدداً، فجذبت اللحاف عنها بعنف، وهزت كتفها بقوة وهي تصرخ بصوت مبحوح:
• "شاهندة! شاهندة قومي! إخلصي قومي كلميني هنا!"
تململت الشابة بثقل، وفتحت عينيها بصعوبة. بدا وجهها شاحباً، وجسدها مثقلاً بوهن غريب، وهمست بصوت ضائع:
• "في إيه يا ماما.. سيبيني نايمة.. أنا عايزة أنام، حرام عليكي.."
اشتعل غضب الأم وهي ترى إصرار ابنتها على العودة إلى النوم، فصاحت في وجهها، مشيرة إليها بيد مرتجفة:
• "تنامي؟! تنامي إيه وزفت إيه اللي بتناميه؟! أنا عايزة أعرف إنتِ إيه حكايتك بالضبط؟! ما عادش حد بيشوفك! وصلتي للدرجة دي ليه؟! النهار مشي كله وإنتِ مفيش وراكي حاجة في الدنيا دي غير القعدة في الضلمة والسرير؟!"
حاولت شاهندة إسناد جسدها، واعتدلت بنصف قعدة، واضعة كفها فوق رأسها، كأن صوت أمها يطرق جمجمتها، ثم قالت بضيق ونبرة مثقلة بالنعاس:
• "يا ماما في إيه دلوقتي؟ سيبيني في حالي، أنا تعبانة ومحتاجة أنام.."
اقتربت الأم منها أكثر، وقد تجمعت الدموع في عينيها، واختلط غضبها بوجع لم تعد قادرة على كتمانه. قالت بصوت مرتفع، تعلوه نبرة عتاب موجعة:
• "تعبانة من إيه؟! عملتي إيه يهد حيلك للدرجة دي؟! ما إنتِ طول النهار والليل نايمة ومرمية كده زي القتيلة! لا دراسة، لا نزول، لا حتى كلام معانا.. إنتِ بتهربي من إيه يا شاهندة؟! قوليلي إيه اللي جرالك وبقيتي بالمنظر ده؟!"
ساد الصمت الغرفة مجدداً، لكنه هذه المرة كان أثقل من أي إجابة.
وقفت الأم أمام ابنتها، تتفحص ملامحها بعينين يملؤهما القلق والشك، تبحث عن تفسير لهذا التغير الذي لم تعد تفهمه. أما شاهندة، فظلت صامتة، متشبثة برغبتها في العودة إلى النوم.
------
منذ لحظة عودتها إلى البيت ودخولها غرفتها، وهي على هذا الحال؛ لم تذق للنوم طعمًا، ولم يهدأ لها بال. ظلت ساعات الليل تمر عليها ثقيلة وبطيئة، بينما تتخبط في حيرتها وتأكل أظافرها بعصبية مفرطة، حتى بدأت خيوط الفجر الأولى تتسلل من بين ستائر غرفتها، لتجدها كما هي، عاجزة تمامًا عن إيجاد مخرج ينقذها من المأزق الذي وضعت نفسها فيه بسبب عنادها.
كانت تحتضن وسادة صغيرة أمام صدرها، وعيناها تجولان في أنحاء غرفتها الأنيقة بقلق حقيقي، بينما يغلي عقلها بالأفكار المتضاربة منذ ساعات. وفجأة، تحولت حيرتها إلى موجة عارمة من الضيق تجاه «سليم»، فاستدارت واستلقت على ظهرها، محدقة في السقف بعينين تشتعلان غيظًا، وبدأت تلوم نفسها وتصب جام غضبها عليه، شاتمة إياه بصوت خافت ومكتوم:
• «الله يخرب بيتك يا سليم يا ابن أم سليم! بني آدم مستفز، بارد، معندوش ريحة الدم! بقى يستغل ارتباكي ويلبسني الليلة ويهرب؟ ده مش ظابط.. ده ثعلب، ده مصيبة ماشية على الأرض! ماشي يا سليم.. إلهي وأنت جاه يا رب المأمورية دي تطلّع عينك، وما تعرفش تنام فيها ساعة على بعضها، عشان تسيبني هنا في النار دي وتخلع أنت!»
سكتت فجأة، ثم رفعت كفها الغاضبة وضربت بها جبهتها بخفة، وتابعت بنبرة امتزج فيها الندم بالتهكم، وهي تلوم نفسها بمرارة:
• «أنا أستاهل.. أيوة أستاهل كل اللي يجرالي! يعني كان لازم العناد والتحدي اللي ركبوني فجأة دول؟ كان لازم أروح عشان أضايقه وأكسر بروده قدام أهله؟ أهو قلب الترابيزة عليا، وأنا اللي اتدبست في الآخر! طب والعمل دلوقتي؟»
نهضت من سريرها بحركة سريعة، وراحت تذرع الغرفة ذهابًا وإيابًا، بينما تعكس خطواتها المتوترة مدى اضطرابها، ثم تابعت بضيق:
• «الموضوع كبر أوي، ومامي لو عرفت باللعبة دي، رد فعلها هيكون صعب جدًا ومش هتقف في صفي أبدًا، وأبيه عاصم ومراد.. يا نهار أبيض! أبيه عاصم بالذات هيزعل مني أوي، وممكن يفقدوا ثقتهم فيا تمامًا.. كفاية لحد كده مشاكل يا سيلا!»
تقدمت نحو مرآتها الكبيرة، ووقفت أمامها تتأمل انعكاس وجهها الشاحب والمضطرب، بعدما غمر ضوء الفجر أرجاء الغرفة. رفعت يديها لتزيح خصلات شعرها المتمردة عن وجهها، ثم همست بخوف وقلق حاولت إخفاءهما:
• «طب والعمل؟ لو رفضت بكرة وعملت مشكلة.. إزاي هبرر لمامي؟ واللواء رأفت الجارحي مش راجل عادي عشان نلعب معاه.. ده لواء وله هيبته، وكلمته سيف! لو عرفوا إن كل ده كان تمثيل عشان أضايق ابنه، شكل إخواتي هيبقى إيه؟ مراد وأبيه عاصم هيشيلوا وشهم من الناس إزاي؟ سمعتهم هتبقى في الأرض بسببي، ويتقال إن أختهم طايشة وبتلعب برتب البلد! يا ربي.. أنا حطيت نفسي وحطيتهم في ورطة سودا، مش عارفة أطلع منها، ومش عارفة هعمل إيه بكرة!»
أطبقت بكلتا يديها على حافة تسريحة الزينة، وضغطت عليها بقوة، ثم عادت تقضم أظافرها، بينما ارتسم الندم على ملامحها. كانت في حالة ضياع تام؛ عاجزة عن قول الحقيقة وما قد يترتب عليها من فقدان ثقة إخوتها وتدمير صورتها أمام عائلتها، وفوق كل ذلك، رافضة تمامًا فكرة الارتباط برجل يثير جنونها بمجرد رؤية ابتسامته المستفزة.
هزت رأسها بعزم، وارتسمت على وجهها ملامح حاسمة، بينما عادت نبرة العناد والتحدي إلى صوتها:
• «لأ.. زواج إيه؟ مستحيل! مستحيل أوافق على الجوازة دي مهما حصل.. لازم أشوف حل!»
وفجأة، لمعت فكرة في رأسها كطوق نجاة أخير، فاستدارت بسرعة واندفعت نحو الطاولة المجاورة للسرير، والتقطت هاتفها على عجل، وعيناها تلمعان ببريق الأمل في المحاولة الأخيرة. همست برجاء وإصرار، وهي تبحث عن اسمه:
• «أنا لازم أكلمه! أيوة.. لازم أكلمه دلوقتي وأخليه ينهي المهزلة دي بطريقته، أكيد هو عنده الحل ويقدر يتصرف مع أهله ويلغي الموضوع من عنده!»
أسرعت بالضغط على زر الاتصال، ورفعت الهاتف إلى أذنها، وقلبها ينبض بعنف من شدة الترقب. لم تمر سوى ثوانٍ معدودة حتى فُتح الخط، وأتاها صوته الرخيم الواثق، والمستفز للغاية، وهو يقول ببرود، وكأنه يبتسم خلف الشاشة:
• «خير يا سيلا.. لحقت وحشتك؟»