رواية سر الكارما الفصل الرابع4الاخير بقلم يارا علاء الدين

رواية سر الكارما 
الفصل الرابع4الاخير
بقلم يارا علاء الدين
سر كبير فضل مستخبي سنين بس كان لازم يتكشف!

ـــــــــــــــــــــــــــــــــ

دخل توفيق الفيلا زي الإعصار. "نسمة" كانت قاعدة في الصالون بتشرب القهوة ببرود.
أول ما شافته داخل وشكله متبهدل وعينيه حمرا زي الجمر، قامت وقربت منه بابتسامة متوترة:
"مالك يا توفيق يا حبيبي؟ شكلك تعبان أوي.."

مردش عليها بكلمة.. مسكها من شعرها بعنف ، وزقها على الأرض وبدأ يضرب فيها وهو بيصرخ بصوت زلزل المكان:
"كنتي بتحطيلي أدوية في القهوة عشان تقضي عليا؟ أنا ؟ طب ليه؟ دمرتيني عشان تفضلي قاعدة جنبي؟! حرمتيني من العيال يا زبالة عشان عقلك المريض ده!

نسمة انهارت تحت إيده وهي بتصرخ وتتوسل:

"سامحني يا توفيق!! عملت كده عشان بحبك!! كنت خايفة تطلقني وترميني وتتجوز غيري واحدة تجيبلك عيال! أنا مكنتش أقدر أعيش من غيرك!"

ساب شعرها ورجع لورا، بص ليها بنظرة كره وغضب، وقال وهو بينهج ونفسه مقطوع:
"أنتي دمرتيني.. بس ربنا أراد إني يكون ليا بنت رغم كل اللي عملتيه!

مريم طليقتي، هربت وهي حامل مني.. وأنا عندي بنت دلوقتي!

عندي بنت من دمي ولحمي عايشة في الدنيا دي، كارما بنتي!!

وأنتي هتفضلي طول عمرك عاجزة ومحبوسة هنا لحد ما أشوف هتسلى عليكي إزاي ؟ لإن اللي زيك مينفعش يمـ.ـــوت بسهولة!"

أمر حراسه يكتفوها ويحبسوها ، وخرج يجري.

توفيق بقى راجل تاني خالص.. راجل مكسور ومجنون في نفس الوقت. اكتشف إن حبه الأخير كان وهم ، وإن كارما هي بنته الوحيدة اللي تَحمل اسمه ودمه في الدنيا دي.

وفجأة.. اتهز الموبايل في إيده.

فتح الخط، وسمعه بيقول:
"عرفت خسرت إيه يا توفيق بيه؟ عرفت إن البنت اللي اتخـ.ــطفت من الملاهي هي بنتك الحقيقية؟"

صرخ توفيق في الموبايل:
"أنت مين يا مجنون أنت؟! وعرفت الكلام ده منين وخطـ.ــفت بنتي ليه?!"

صابر ضحك ضحكة ميتة وقال ببرود مرعب:
"أنا صابر.. الموظف اللي كنت شغال في مكاتب المحاماة اللي مدام مريم طلبت فيها الخلع منك من ست سنين! ولما شبكتك القذرة خطـ.ــفت بنتي ومحدش نجدني، فتحت ملفاتك القديمة.. راجعت أوراق الخلع وميعاد هروب المدام، دورت كتير لحد مافهمت اللعبة كلها! عرفت إن كارما بنتك أنت، خطـ.ــفتها عشان أحرق قلبك زي ما حرقت قلبي!"

قال توفيق بشموخ حاول يصطنعه:
"عايز كام يا صابر وتسيب البنت؟!

بس صابر رد بقسوة:
"فلوسك تحت جزمتي! قدامك 12 ساعة بس.. 12 ساعة تستخدم فيهم شبكتك ونفوذك وترجعلي بنتي اللي اتباعت برة مصر.. لو الـ 12 ساعة خلصوا ومرجعتليش بنتي، هبعتلك كارما جثـ.ــة في صندوق! وساعتها هنكون متساوين!"

الخط قطع.. والموبايل وقع من إيد توفيق ودموعه نزلت لأول مرة في حياته!

الذهول والصدمة اللي كانوا في عينيه اتقلبوا في ثانية لشرارة جنون. الراجل اللي كان بيتاجر بالأطفال بيع وشرا من غير ما يتهز له جفن، صحي جواه فجأة وحش كاسر مستعد يهد الدنيا، مش مستوعب إن الجزء الوحيد اللي فاضله في الدنيا من دمه ولحمه ممكن يضيع منه.

مفكرش يكلم حد ولا كان حاطط في حسابه شرطة ولا قانون؛ بالنسبة له هما مجرد ناس ضعيفة مالهمش أي وجود في الصراع ده.

داس بنزين وطار بالعربية بسرعة جنونية وهو بيكلم نفسه بصوت حاد، مكتوم، ومليان غل كفيل يحرق البلد كلها:
"12 ساعة يا صابر.. 12 ساعة وهوريك مين هو توفيق النويري!

فاكر إنك بتلاعب راجل عادي؟! كارما بنتي، ويا إما ترجعلي حية في حضني.. يا إما هحـ.ــرقك وأحرق كل اللي يقف في طريقي!


الـ 12 ساعة اللي عرفنا إن المجرم أداهم لتوفيق كمهلة أخيرة كانوا بيعدوا على قلبي سنين.. كل دقيقة بتعدي كانت بتاكل في روحي ودمي.

المباحث واللواء حازم كانوا حاطين خطة محكمة؛ تتبعوا تحركات توفيق في السر من غير ما يحس، لأنهم كانوا عارفين إن راجل بغروره وإجرامه مستحيل يبلغ الشرطة وإن تحركاته هي اللي هتوصلنا لمكان الخاطف.

إحنا كنا راكبين في عربية اللواء حازم ورا عربية توفيق بمسافة أمان، أنا وطارق ماسكين إيدين بعض، صوابعنا متشبكة برعشة ورعب، وبندعي ربنا إن كارما ترجع لحضننا بسلام.

عربيات توفيق وقفت فجأة قدام مخزن قديم ومهجور في أطراف المنطقة الصناعية.. مكان مقطوع مفيهوش بني آدم.

نزل توفيق من عربيته بكل جبروته ورجالته المسلحين وراه، ودخل المخزن بثقة. وفي نفس اللحظة، قوات الشرطة انتشرت وحاصرت المكان من كل جنب في صمت تام، ونزلنا من العربية إحنا وحازم بيه بحذر شديد وبتخفي من غير ما حد يلاحظ وجودنا حاولنا نقرب جزء بسيط نقدر نتابع بيه اللي بيحصل.

كان فيه راجل واقف في وسط القاعة الفاضية، وجنبه كانت واقفة كارما.. كارما بنتي بفستانها الأصفر اللي غرقان تراب، وعينيها المليانة دموع!
أول ما توفيق شاف صابر وكارما، صرخ بصوت هز جدران المكان:
"صابر!! اوعى تفكر تأذيها سامعني؟

صابر بص حواليه بثبات ، وقاله:
"فين بنتي يا توفيق؟! الـ 12 ساعة خلصوا.. فين حبيبة بنتي جبتها معاك زي ما اتفقنا؟!"

توفيق ضحك ضحكة باردة، مليانة استهانة وقسوة ، وقال ببرود وثقة:

"بنتك؟! بنتك انساها تماماً يا صابر! بنتك أنا بعتها برة مصر من شهرين وخلاص الموضوع خلص.. الناس اللي برة دول محدش يعرف يلعب معاهم ولا يقدر يرجع طفل عندهم! بنتك راحت عليك وأنا أقدر أعوضك عنها كويس أوي بس خليك ناصح وأفهم الموقف اللي إنت فيه كويس!

الكلام نزل على قلب صابر زي السـ.ــكينة , عينيه اتملت بكسرة وذهول مرعب:

يعني إيه؟ يعني بنتي مش هترجعلي تاني يا توفيق؟!

توفيق رفع إيده لرجالته عشان يهـ.ــجموا وياخدوا البنت بالقوة:
قولتلك انسى يا غبي! أنا خلصت العملية دي من زمان وتوفيق النويري مبيعملش عملية ويرجع فيها, أنا طول عمري أي عملية بعملها بتكون نضيفة مفيهاش ديول!

وفجأة.. في اللحظة دي بالظبط!

صوت حركة ظباط الشرطة ظهرت في المكان.
اللواء حازم وقوات المباحث اقتحموا المخزن وسلاحهم كان موجه للجميع:

"ارمي السـ.ــلاح أنت وهو!! المكان كله محاصر! سلموا نفسكم .

رجالة توفيق وقفوا متثبتين تحت تهديد سـ.ــلاح المباحث، بس صابر.. صابر اتخض، ورفع مسـ.ــدسه في لحظة ذهول ورعب على دماغ كارما، وعينيه بقت تتنقل بين توفيق وبين طارق وبيني وأنا بدخل ورا المباحث وبصرخ :

"كارما!! كارما يا حبيبتي!!"

كارما أول ما شافتني وشافت طارق، صرخت بصوت مرعوب:
"بابا طارق!! ماما مريم!!"

صابر بص للبنت الصغيرة اللي ماسكة في إيده وبتترعش.. بص لدموعها اللي نازلة، ولبراءتها اللي ملهاش ذنب في القذارة والإجـ.ــرام اللي بيحصل. صابر مكنش مجـ.ــرم.. صابر كان مجرد أب موجوع، وجعه خلاه يتعاطف مع طفل تاني.

صابر مسح دموعه بضهر إيده، ونزل المسـ.ــدس على الأرض ببطء شديد.. حط إيده على رأس كارما بحنان وقال بصوت مخنوق ومكسور:
"روحي يا حبيبتي.. روحي لماما, أنا مش مجـ.ــرم زي الناس دي، ولا يمكن أحرق قلب أم وأب زي ما قلبي اتحرق."

وزق كارما بالراحة ناحيتنا..

في ثانية واحدة.. طارق اتحرك لقدام زي السهم!
جرى بأقصى سرعة عنده، وفتح دراعاته الاثنين وخد كارما في حضنه.

أنا مشيت وراه بس رجلي مكنتش شايلاني, كنا بنحضن كارما إحنا الاثنين ونبوس في وشها، وإيديها، وشعرها، ودموعنا نازلة.

"كارما.. يا روح قلب ماما! يا نور عيني أنتِ كويسة؟! جرالك حاجة يا حبيبتي?!" كنت بصرخ وببكي وأنا بمسك وشها بين إيديا ومش مصدقة إنها في حضني.

كارما حطت إيديها الصغيرين حولين رقبة طارق ودفنت وشها في صدره وهي بتشهق بحرقة:

"بابا.. أنا كنت خايفة أوي! كنت كل يوم بدعي ربنا يخليك تيجي تاخدني.. أنا عارفة إنك عمرك ما هتسيبني!"

طارق كانت دموعه نازلة وبيضمها لصدره كأنه بيحاول يدخلها جوه قلبه عشان يحميها من الدنيا كلها.. صوته كان بيطلع بالعافية وقال:
"أنا هنا يا حبيبة بابا.. أنا جنبك ومحدش في الدنيا دي كلها يقدر ياخدك من حضني تاني أبداً.. أنتِ بنتي يا كارما.. بنتي وحبيبتي ونور عيني!"

في اللحظة دي.. عرفت إن الحبل اللي بين طارق وكارما أعمق مليون مرة من أي نقطة دم! الحب، والأمان، والأبوة الحقيقية اللي عاشت فيها بنتي من أول يوم اتولدت فيه كانت أقوى من أي حاجة تانية.

على الناحية الثانية.. توفيق كان واقف مذهول شايف البنت في حضن طارق, وحاول يلم نفسه بسرعة، عدل جاكيت بدلته، وبص للواء حازم ببرود وتكبر وقال:

"إيه اللي بيحصل ده يا حازم بيه؟! أنتوا بتهـ.ــجموا عليا أنا؟! أنا راجل أعمال معروف، وجاي هنا عشان أنقذ بنت طليقتي من المجرم ده! أنا مقبوض عليا ليه؟ بتهمة إيه؟

ابتسم صابر ضحكة باهتة مليانة نصر ، ومد إيده جوة جيب الجاكيت بتاعه.. طلع جهاز تسجيل صغير جداً كان معلقه في زراير قميصه!

صابر بص لتوفيق وقال :
لأ يا توفيق بيه.. الدليل أهو! التسجيل ده فيه اعترافك على الشبكة بتاعتك، وعن الناس اللي برة مصر، وعن بنتي اللي بعتوها, أنا مكنتش عايز أقـ.ــتلك ولا أقـ.ــتل كارما.. أنا كنت مستنيك تعترف بلساانك ده عشان أوقعك وأفضـ.ـح شبكتك قدام الدنيا كلها!

توفيق عينيه اتوسعت بذهول ورعب حقيقي، وشفايفه بدأت ترتعش ومعرفش ينطق بكلمة واحدة! إمبراطوريته وقوته ونفوذه انهاروا في ثواني معدودة قدام تسجيل صغير!

اللواء حازم أخد التسجيل، وقرب من توفيق والكلبشات الحديدية في إيده:
اللعبة انتهت يا توفيق.. القانون هيجيب حق كل طفل د مرت حياته وحياة أهله."

أما توفيق فكان واقف بيبص لكارما نظرة أخيرة.. كارما مكنتش باصة له أساساً، كانت ماسكة في رقبة طارق ومستخبية في حضنه.
وأثناء ما الظباط كانوا بياخدوا توفيق ورجالته، أنا قربت بكارما وطارق من اللواء حازم وصابر.

بصيت لصابر.. الأب المكسور اللي عيونه مليانة دموع ووجع يهد جبال، وقالت للواء حازم :

"حازم بيه.. أنا و طارق بنتنازل رسمياً عن أي بلاغ ضد صابر.. صابر مش خاطـ.ــف ولا مـ.ــجرم، صابر أب مظلوم كان بيدور على بنته، وهو حمى كارما وسلمهالنا حية وسليمة من غير ما يمس شعرة منها."

صابر بصلي بعيون مليانة دموع وصدمة، وبلع ريقه بتوسل وهو بيبص للواء حازم:
"أنا مش عايز تنازل ولا عايز أهرب من حاجة يا باشا.. أنا تحت أمر القانون ومستعد لأي عقاب.. بس أنا عايز بنتي! أنا عايز حبيبة بنتي يا باشا.. أرجوك قولي إنكوا هترجعوها!"

اللواء حازم حط إيده على كتف صابر وقال بصرامة:
"وعد مني يا صابر ، أجهزة الدولة والإنتربول هيقلبوا الدنيا برة وجوة، وحبيبة بنتك هترجع لحضنك والعدالة هتاخد مجراها."

بعد شهرين كاملين..
الضوء كان داخل دافي من بلكونة شقتنا والحب واللعب مالي المكان.
شبكة توفيق النويري اللي هنا في مصر اتقـ.ــبض عليها بالكامل، ونسمة مرات توفيق اتسـ.ــجنت على اللي عملته فيه، وقضية الأطفال والخـ.ــطف اتفتحت تاني.

أما صابر.. فالقضاء راعى ظروفه القاسية والتنازل اللي عملناه، والشرطة قدرت بالتعاون الدولي توصل لمكان بنته "حبيبة" وتستردها وترجعها لحضنه من جديد.

الحاجة الوحيدة اللي فضلت أنا وطارق مستغربين منها طول الشهرين دول، إن توفيق، بالرغم من كل جنونه ورغبته إنه يكون ليه بنت من دمه، محاولش يطـ.ــعن في نسب كارما ولا يفتح قضية يطالب بيها بتحليل ولا حاجة.

كنا بنفكر ونحاول نفهم إزاي راجل بقسوته وسلطته ما حاولش يحارب عشان ياخد البنت أو يثبت نسبها، لحد ما حسيت إن ربنا عمى بصيرته، أو يمكن اللحظة اللي شاف فيها كارما مستخبية في حضن طارق خلته يستسلم ويستوعب إن الأبوة مش مجرد أوراق ونسب، وإن محاولته إنه ينسبها ليه هتقتلها وتدمر حياتها مش أكتر, وخصوصًا بعد الحكم اللي خده.

كنت واقفة في البلكونة، طارق جه من ورايا وحضنني بدفا وراحة بال مكناش حسينا بيها من فترة.

سندت رأسي على كتفه، وبصينا إحنا الاتنين لكارما وهي بتجري في الصالة بفستانها الأصفر. مكنتش محتاجة أشرح أو أقول أي كلام.. نظرة كارما لطارق وهي بتجري وتحضن رجله كانت بتقول كل حاجة.

ابتسمت وأنا بفتكر السنين اللي فاتت، معرفش ليه في الوقت ده تحديدًا افتكرت كلام طارق لما جالي وقالي إنه مش هيسيبني وإننا هنواجه كل حاجة سوا, وقعد معايا وحطينا الخطة كلها, واللي كانت إننا نظهر للناس جوازنا عشان كارما تتكتب باسمه, لكن محدش كان يعرف إن اللي ظهر قدامهم وقتها مكنش عقد جوازنا الحقيقي.

إحنا كنا مستنيين لحد ما أولد كارما وتنتهي عدتي بوضع الحمل، وساعتها بس تم جوازنا بعقده الحقيقي.

مكنش ينفع نسمح لأي حد يشك في نسب بنتي، ولا نسيب سرها يوصل لتوفيق، حتى لو اضطرينا نعمل خطط زي الأفلام وفي نفس الوقت مكنش ينفع حياتي النضيفة مع طارق تكون مبنية على حرام .

بصيت لطارق، ولقيته بيبصلي بنفس النظرة اللي طمّنتني من أول يوم عرفته فيه. فهمت من غير ما نتكلم إننا أخيرًا قدرنا نعدّي كل الخوف ده، وإن كارما هتفضل بنتنا اللي جمعنا حبها، مهما كانت الحقيقة اللي ورا حكايتها.

لأول مرة من ست سنين، حسيت إن الهوا بيدخل صدري نقي ومفيش فيه ريحة للخوف.
تمت بحمد الله
تعليقات



<>