
رواية تاني فرصة الفصل الخامس5والسادس6 بقلم هاجر سلامة
ندى كانت قاعدة على الكنبة والدموع نازلة على خدها ورا بعض وجسمها كله بيترعش من كتر التوتر والخوف
الشقة كانت هادية تماماً وصوت الهوا برة الشباك كان مسموع وزاد من رهبة اللحظة دي
طارق قعد جنبها وقرب منها وحط إيده على كتفها بحنان وقال بصوت واطي ودافي اهدى يا ندى وفهميني فيه إيه المذكرات دي مكتوب فيها إيه يخليكي بالحالة دي أنتي مش مجرد زعلانة أنتي حاسة بذنب كبير وأنا شايف ده في عينيكي
ندى بلعت ريقها وبصت في عينيه الوسيمة القريبة وحست إن المخبى لازم يبان وإن مفيش فايدة من السكوت
ندى اتنفست بصعوبة وقالت بصوت مخنوق طارق أنا قرأت كل السطور اللي كتبتها بخط إيدي قبل ما نكتب الكتاب وقبل ما ندخل البيت ده وقرأت سر الخناقات والبرود اللي كان بيننا
طارق اتنهد وسند ضهره لورا وقال بنبرة فيها حزن قديم أنا عارف يا ندى وعارف إنك مكنتيش عايزاني بس عمري ما فهمت السبب الحقيقي كنت دايماً بحس إنك شايفة فيا عيب أو مش مال م عينيكي برغم إني عمري ما قصرت معاكي
ندى هزت راسها بسرعة وقالت لا يا طارق الموضوع مكنش كد خالص الفكرة كلها إني انصدمت ليلة ما جيت تتقدم لي
طارق قطب حواجبه واستغرب وانصدمتي ليه هو أنا كنت وحش للدرجة دي
ندى نزلت عينيها في الأرض وقالت بصوت واطي أنا مكنتش أعرف إنك أنت اللي جاي تتقدم بابا قالي إن ابن عمه جاي يخطبني وأنا دماغي وتفكيري راحوا لشريف أخوك الكبير
طارق أول ما سمع اسم شريف جسمه اتخشب وملامحه اتغيرت فجأة والصدمة ظهرت في عينه كأنه اتضرب بالقلم
طارق سكت لثواني طويلة والسكوت ده كان أصعب من أي زعيق وبصلها بذهول وقال شريف أخويا أنتي كنتي عايزة شريف
ندى بكت بحرقة وتمسكت بطرف الجاكيت بتاعه وقالت اسمعني للاخر يا طارق عشان تفهم أرجوك أنا كنت شايفة شريف في العزومات الكبيرة وكان دايماً يبتسم لي ويشجعني في دراستي فتهيأ لي إنه معجب بيا ولما بابا قالي فيه عريس جاي افتكرته هو ولما دخلت الصالة ولقيتك أنت انصدمت ومبقتش عارفة أقول إيه
طارق سحب إيده منها براحة وقام وقف في نص الصالة ووشه باين عليه الوجع والكسرة وقال وعشان كد مكنتيش طايقاني وعشان كد منعتيني عن نفسك وكنتي بتعامليني كأني سجن ليكي لأن قلبك كان مع أخويا الكبير
ندى وقفت وراه بسرعة وقالت والدموع مغمية عينيها أنا وافقت عليك عشان خوفت على بابا خوفت أكسر كلامه قدام عمه وصاحب عمره وأخوه وأنت عارف إنهم بيعزوا بعض قد إيه والأهم من كد إني خوفت من كلام الناس عليا أنا كنت مخطوبة خمس مرات قبل كد يا طارق وكل مرة الموضوع كان بيبوظ لأسباب مختلفة والناس في العيلة والمنطقة بدأوا يتكلموا على حظي وسيرتي بقت على كل لسان لو كنت رفضتك بعد ما جيت الشقة كانت هتبقى الخطوبة الستة اللي تفشل وكان زماني كسرت ضهر أبويا وخليت وشي في الأرض ووشه هو كمان قدام الناس وافقت وأنا بموت من جوه وعشت معاك وأنا دافنة السر ده ومقولتوش لمخلوق لحد ما الحادثة حصلت ونسيت كل حاجة
طارق لف ليها وعينيه كانت حمرا من الزعل والوجع وقال بنبرة مكسورة يعني العيشة دي كلها كانت كدبة والاهتمام اللي شفته منك بعد الحادثة والضحكة اللي نورت وشك لما عرفتي إني جوزك كل ده عشان أنتي مش فاكرة الحقيقة ودلوقتي بعد ما عرفتي هترجعي تكرهيني تاني وتكرهي القعدة معايا وتفتكري حبك لشريف
ندى قربت منه ووقفت قصاده بالظبط وبصت في عينيه وقالت بثبات وعياط لا يا طارق والله العظيم لا أنا لما قرأت الكلام ده حسيت إني بقرأ عن بنت غريبة مش أنا أنا في الحاضر دلوقتي مش حاسة بأي مشاعر ناحية شريف لما شفته في بيت بابا انهارده حسيته راجل غامض وبعيد عني تماماً ومحركش فيا أي حاجة غير نغزة قديمة تافهة لكن أنت يا طارق أنت الراجل اللي فتحت عيني عليه بعد الحادثة شفت في عينك خوف عليا وحنان واهتمام وسند عيشت معاك الأيام اللي فاتت دي وأنا حاسة بأمان عمري ما دوته وشايفة فيك زوج وسيم وطيب ويتحب بجد أنا حبيت طارق بتاع دلوقتي ومش عايزة البنت القديمة ولا مذكراتها
طارق بصلها بنظرة طويلة مليانة حيرة وشك وزعل وقالها بس المذكرات دي هي الحقيقة يا ندى وانتي دلوقتي مشاعرك مشوشة عشان فقدان الذاكرة بكرا لما تخفي وتفتكري كل حاجة هترجعي لنفس النقطة وتطلبي الطلاق تاني زي الليلة المشؤومة إياها
ندى مسكت إيديه الاتنين وضغطت عليهم وقالت له طب جربني يا طارق اديني فرصة وأدي لنفسك فرصة بلاش نهد كل حاجة دلوقتي المذكرات دي أنا هقطعها وأرميها ومستعدة أبدأ معاك صفحة بيضاء بجد من غير أي كدب أو حاجز أنا عايزة أفضل معاك لو أنت لسه عايزني
طارق سحب إيديه براحة وتنهد تنهيدة طويلة خرجت من دبايب قلبه وقال بنبرة هادية بس فيها حذر أنا مش هطلقك دلوقتي يا ندى زي ما قولتلك قبل كد أنتي لسه تعبانة ومحتاجة وقت عشان تخفي تماماً بس الكلام اللي قولتيه انهارده غير حاجات كتير جوايا ومبقاش ينفع نتعامل زي الأول العيشة بيننا هتفضل هادية لحد ما نشوف الأيام مخبية لنا إيه ودماغك دي هتوصل لفين
سابها ودخل أوضته وقفل الباب وندى قعدت على الأرض ودفنت وشها بين إيديها وعيطت وهي حاسة إنها كسبت طارق كإنسان بس خسرت ثقته اللي هتحتاج وقت طويل عشان ترجع تاني
طارق دلوقتي عايش في حيرة وشك وندى بتحاول تثبت له حبها الجديد
يتبع
الفصل السادس
الجو جوه الشقة بقى مشحون ببرود غريب بعد ليلة المواجهة
طارق بقى زي الضل بيتحرك بحساب ويتكلم بحساب وكل ما عينه تيجي في عين ندى يفتكر كلام المذكرات ويحس بغصة في حلقة
ندى مكنتش مستسلمة للوضع ده وبقت تحاول بكل الطرق تقرب منه وتعمل الحاجات اللي تبسطه
تصحى بدري تحضر له القهوة بالطريقة اللي بيحبها وتستناه يرجع من الشركة ووشها منور بابتسامة حقيقية
بس طارق كان دايماً بيبص لابتسامتها دي بشك ويسأل نفسه يا ترى الضحكة دي ليا أنا والا للبنت اللي ناسية هي كانت بتحب مين
في يوم شريف اتصل بطارق وقاله إنه هيعدي عليهم بالليل في الشقة عشان فيه موضوع مهم وعايز يكلمهم فيه سوا
طارق أول ما قفل مع شريف حس إن قلبه انقبض وفضل رايح جاي في الصالة ويفكر يا ترى شريف جاي ليه وهل لاحظ حاجة
طارق نادى على ندى وقال بنبرة جافة شريف أخويا جاي بالليل وعايزنا في موضوع مهم
ندى بصت لطارق ولحظت الخوف والتوتر اللي باين في عينه وقربت منه وقالت بهدوء ينور يا طارق البيت بيته بس أنت ليه قلقان كد اهدى مفيش حاجة تستاهل كل العصبية دي
طارق بصلها بسخرية وقال أصلك متعرفيش المقابلة دي هتعمل فيا إيه يا ندى وخليكي فاكرة كلامنا كويس
على الساعة تمانية الباب خبط وطارق قام فتح ودخل شريف ووشه كان رايق ومبتسم على غير العادة
شريف سلم على طارق ودخل الصالة ولقى ندى واقفة ومبتسمة له ابتسامة عادية ترحيب بضيف
شريف قعد وقال بلهفة وفرحة باينة في عينه أنا بجد مكنتش قادر أستنى وقولت لازم أجي أفرحكم بنفسي في بيتكم
طارق قعد على الكرسي اللي قصاده ووشه متخشب وقال خير يا شريف فرحنا معاك إيه الموضوع المهم
شريف فرك إيديه بابتسامة واسعة وقال أنا قررت أخطب يا جماعة وخلاص لقيت البنت اللي قلبي اختارها وكلمت بابا انهارده ووافق جداً وهنروح نتقدم لها الأسبوع الجاي
ندى أول ما سمعت الكلام ابتسمت من قلبها وقالت بفرحة بجد يا شريف ألف مبروك ربنا يتمم لك على خير يا رب دي خطوة ممتازة والبنات الحلوين كتير وتستاهل كل خير
طارق في اللحظة دي مكنش سامع كلام ندى العادي ولا فرحتها الطبيعية لأي حد
طارق كان مركز في عينيها وبيدقق في كل تفصيلة في وشها وحسب في سره إن ندى بتداري صدمتها ووجعها ورا الابتسامة دي
تفكيره المريض بالشك خلاه يشوف فرحتها كأنها قناع بتداري بيه كسرة قلبها بعد ما عرفت إن الراجل اللي كانت بتتمناه زمان في السر رايح يخطب واحدة تانية غيرها
طارق حس بنار بتاكل في صدره وبص لشريف وقال بنبرة حادة ومبروكة يا شريف ومين بقى سعيدة الحظ دي اللي قدرت تثبت قلبك الكبير
شريف ضحك وقال زميلتي في الشغل يا طارق بقالنا فترة بنتعامل سوا وحسيت إنها المناسبة ليا وبابا فرح جداً وقال لازم نعمل حفلة كبيرة تلم العيلة كلها
ندى قعدت جنب طارق وحطت إيدها على كتفه بتلقائية وقالت لـ شريف وأحنا هنكون أول الحاضرين طبعاً يا شريف والبيت هنا مفتوح لكم في أي وقت
شريف قعد حوالي ساعة يتكلم عن تفاصيل الخطوبة والترتيبات وندى كانت بتتجاوب معاه بكلام كله ذوق ومباركة
وطارق كان قاعد زي القنبلة الموقوتة اللي مستنية اللحظة عشان تنفجر
أول ما شريف استأذن وقام وطارق قفل وراه باب الشقة التفت لندى ووشه كان غرقان في العصبية والزعل
طارق زعق بصوت هز أركان الصالة ها ارتحتي دلوقتي وفرحتي وباركتي له من قلبك
ندى اتخضت من صوت العالي وبصت له باستغراب في إيه يا طارق مالي فرحت بإيه شريف أخوك وجاي يفرحنا إنه هيخطب إيه الغلط في كد
طارق قرب منها وعينه حمرا من الغل والشك وقال بطل تمثيل بقى يا ندى بجد أنا تعبت أنتي فاكراني عبيط والا مش واخد بالي من النظرة اللي في عينك وانتي بتباركيله أنتي ميتة من الجوه دلوقتي لأن الحلم القديم طار تماماً وشريف رايح لواحدة تانية صح
ندى دموعها نزلت من الظلم والصدمة وقالت وهي بتهز راسها لا والله العظيم أنت ظالمني يا طارق أنا بباركله زي أي أخت بتبارك لأخو جوزها أنا والله العظيم ما بقيت ب أفكر فيه ولا حاسة بناحيته بأي حاجة أنت ليه مش عايز تصدقني وليه متمسك بالماضي ده وبتعذبني وتعذب نفسك بيه
طارق صرخ فيها وعشان الماضي ده هو الحقيقة يا ندى أنتي نسيتي بس مذكراتك منستش ومشاعر الكدب اللي عايشة فيها دلوقتي دي كلها وهم بكرا لما تفتكري هتندمي على كل لحظة ضيعتيها معايا وأنا مش مستعد أكون العوض أو السجن اللي بتعيشي فيه لغاية ما ذاكرتك ترجع
سابها ودخل الأوضة ورزع الباب وراه وندى وقفت في نص الصالة تعيط بحرقة وحست إن الجدار اللي طارق بناه المرة دي في قلبه بسبب الشك أصعب بمليون مرة من الجدار اللي هي كانت بنياه زمان بسبب شريف