"عاليا طول عمرها بتخسر وهي راضية..
أمها ماتت وهي طفلة، وأبوها مات وهي محتاجاه، وأحمد باعها وهي بتحبه.
فكانت فاكرة إن السلسلة دي هي الحاجة الوحيدة اللي عمرها ما هتسيبها.. لحد ما جه اللي بتحبه هو اللي رماها بإيده."
عاليا ببكاء: "انت عملت إيه يا زين وقف العربية بسرعة.. وقف العربية يا زين حرام عليك السلسلة بتاعتي".
اتكلم زين بغضب: "مش هوقف العربية ومش عايز أسمع صوتك لحد ما نوصل".
عاليا بانهيار: "حرام عليك وقف العربية بسرعة السلسلة هتضيع مني ومش هلاقيها حرام عليك والنبي وقف العربية يا زين أبوس إيدك".
تجاهلها زين وعينه كانت على الطريق بغضب.
حاولت تفتح باب العربية لكنه كان مش بيتفتح.. حاولت تكسر زجاج العربية وهي منهارة من البكاء وعمالة تصرخ بجنون.
وقف زين العربية فجأة وهو مستغرب حالتها دي وفتحت عاليا باب العربية وخرجت بسرعة وهي بتجري على الطريق وبتصرخ وبتنادي على مامتها ومش عارفة هو رمى السلسلة فين والعربية مشت كتير جدا عن المكان اللي رماها فيه.. نزل زين هو كمان وحاسس بحاجة غريبة ووقف مصدوم من انهيار عاليا ولهفتها على السلسلة دي بالطريقة الغريبة دي وكمان بتنادي على مامتها ببكاء وده استغربه جدا واتحرك بسرعة وراها وهو بيحاول يوقفها وفضلت هي تجري وكانت بتصرخ وبعد ما تعبت من الجري وبدأت تشعر إن مفيش أمل وإنها مش هتلاقيها، قعدت على الأرض وهي بتعيط وتصرخ: "يا ماما أنا آسفة أنا اللي ضيعتك تاني أنا آسفة يا ماما سامحيني.. مقدرتش أحافظ عليكي أنا آسفة.. ارجعيلي يا ماما والنبي أرجوكي ارجعيلي أنا لما صدقت إنك رجعتيلي تاني".
قرب منها زين وحالتها كانت صعبة جدا.. قعد على الأرض قصادها وهو بيبصلها بصدمة من الحالة اللي بقت عليها.
رفعت عاليا عنيها وهي بتعيط ولقته قدامها بصت له بحزن واتكلمت بحرقة: "حرام عليك يا زين، ليه تحرمني منها تاني، أنا عمري في حياتي ما هسامحك، أنا بكرهك يا زين، بكرهك".
وأغمى عليها على الأرض.. اتصدم زين من الكلام اللي هي قالته وشالها بسرعة من على الأرض وأخدها ورجع بيها على العربية وحطها جوه العربية بهدوء ووقف يبصلها وحس إن فيه لغز في السلسلة دي وإنها بالنسبة لها مش مجرد سلسلة عادية ومسك تليفونه وعمل مكالمة وبعد أن أنهى المكالمة شغل عربيته وطلع بيها.
رواية زين وعاليا بقلمي ملك إبراهيم.
في صباح اليوم التالي.
فتحت عاليا عنيها بتعب وبصت حواليها لقت نفسها في أوضة أول مرة تشوفها ولقت ست كبيرة قاعدة جنبها وماسكة كتاب الله بتقرأ القرآن بصوتها الحنون.
بصت لها عاليا بدهشة واتكلمت بضعف: "لو سمحتي".
بصت لها الست وابتسمت بسعادة: "حمد لله على السلامة يا حبيبتي".
عاليا بدهشة: "هو أنا فين وحضرتك تبقي مين".
ابتسمت الست: "انتي هنا في بيتي وأنا أبقى جدة زين".
سمعت عاليا اسم زين وافتكرت لما نزع منها سلسلة والدتها ورماها وحطت إيديها على رقبتها مكان السلسلة وبدأت الدموع تنزل من عنيها بحزن.
قربت منها جدة زين وحطت إيديها على شعرها بحنان: "مالك يا حبيبتي بتعيطي ليه".
بكت عاليا أكتر وضمتها جدة زين وهي بتحاول تهديها: "طب اهدي يا حبيبتي وقوليلي انتي ليه بتعيطي كده".
دخل زين الأوضة وبص على عاليا وهي جوه حضن جدته ونطق اسمها بهدوء.
رفعت عاليا وشها من حضن جدته وبصت له بغضب: "أنا عايزة أمشي من هنا وأرجع شقة بابا".
زين وهو بيحاول يسيطر على غضبه: "مش هينفع يا عاليا وانتي عارفة كويس إنه مش هينفع".
وقفت جدته وقربت منه وهي بتغمز ليه إنه يهاود مراته ويتعامل معاها بالراحة واتكلمت بهدوء: "أنا هخرج وأسيبكم لوحدكم شوية".
وخرجت جدة زين وهو قرب من السرير اللي عليه عاليا وقعد على طرف السرير واتكلم بهدوء: "فيه فيديو شوفته امبارح واحنا في الحفلة وكان المهندس اللي أنقذك من الكلب بيلبسك فيه سلسلة وانتي كنتي فرحانة بيها أوي، ممكن أفهم إيه حكاية السلسلة دي وليه عشانها تنهاري بالطريقة دي".
ردت عاليا بحزن وهي بتعيط: "السلسلة دي أغلى هدية جتلي في حياتي".
بص لها زين بصدمة: "يعني إيه أغلى هدية جتلك في حياتك، ومين المهندس ده عشان هديته تبقى أغلى هدية جتلك في حياتك".
عاليا بغضب: "السلسلة دي كانت هدية من أمي قبل ما تموت والباشمهندس ده هو اللي رجعهالي تاني يعني رجعلي روحي بالسلسلة دي".
وبدأت الدموع تنزل من عنيها تاني وكملت كلامها: "وانت ضيعتها يا زين، انت ضيعت روحي".
اتصدم زين لما عرف إن السلسلة دي كانت ذكرى من والدتها، واعتقد إنها وقعت منها لما الكلب جرى وراها وإن الأكيد المهندس ده لقاها ورجعهالها.. بس برضه ليه المهندس ده يقرب منها بالشكل ده ويلبسها هو السلسلة وسأل عاليا بغضب مكتوم: "طب ليه المهندس ده يلبسك السلسلة بنفسه ويقرب منك بالشكل ده".
عاليا بانهيار: "هو ما قربش مني وما لبسنيش حاجة أنا اللي كنت بلبسها وشبكت في شعري وهو كان بيساعدني بكل احترام وما قربش مني ولو كان فكر بس إنه يقرب مني أنا مكنتش هسكت له.. بس هو إنسان محترم وكان بيساعدني مش أكتر، بس انت اللي شكاك ومعندكش ثقة فيا وعشان كده لازم تطلقني يا زين".
وقف زين بغضب وانفعال: "بقى أنا معنديش ثقة فيكي؟ لا يا عاليا أنا عندي ثقة فيكي وثقتي فيكي كبيرة جدا ولو مكنش عندي ثقة فيكي كنت أولى أشك فيكي انتي وأحمد اللي كان خطيبك اللي جه وراكي لحد القرية وكان موجود طول الفترة اللي احنا كنا موجودين فيها هناك".
عاليا ببكاء: "خلاص يا زين احنا حكايتنا كانت غلط من الأول وأنا خلاص مش هقدر أكمل".
زين بصدمة: "يعني إيه يا عاليا".
نطقتها عاليا بصعوبة: "طلقني يا زين".
بص لها بغضب: "انتي أكيد اتجننتي لو فاكرة إن أنا ممكن أطلقك أو أسمحلك تبعدي عني لحظة".
وقفت عاليا قدامه بتحدي: "هطلقني يا زين ومش هعيش معاك تاني وده آخر كلام عندي".
قرب منها ومسك دراعها بعنف: "لا يا قلب زين آخر كلام دايما بيكون من عندي أنا وآخر كلام عندي إني مش هطلقك".
صرخت عاليا بصوتها كله وهي بتقول له: "بكرهك يا زين طلقني".
صفعها بقوة ووقعت من قوة الصفعة على السرير ودخلت جدته بسرعة ووقفت قدامه واتكلمت برجاء: "زين عشان خاطري ما تقربش منها ما ينفعش كده يا ابني دي مراتك".
اتكلم زين بانفعال وجنون: "لو فاكرة إني ممكن أطلقك وأسيبك يا عاليا تبقي بتحلمي، ده أنا أقتـ.. لك وأدفنك مكانك".
اتكلمت جدته وهي بتحاول تهديه: "عشان خاطري يا زين تعالى معايا وسيبها ترتاح هي لسه تعبانة ماينفعش كده".
خرج زين مع جدته وفضلت عاليا تبكي مكانها وتكرر كلمة بكرهك بكل حزن.
رواية زين وعاليا بقلمي ملك إبراهيم.
خارج أوضة عاليا اتكلمت جدته بلوم: "ينفع تمد إيدك على مراتك يا زين انت اتربيت على كده".
زين بانفعال: "دي هتجنني خلاص، عايزاني أطلقها بعد كل الحب اللي حبيتهولها ده".
جدته بهدوء: "مراتك زعلانة شوية وأعصابها تعبانة وانت من واجبك تستحمل ده وتحاول تراضيها مش تضربها وتكبر الموضوع".
غمض زين عينه بتعب: "يعني أنا اللي أعصابي مش تعبانة.. أنا امبارح كان المفروض يبقى أجمل يوم في حياتي وأصبح أسوأ يوم والمفروض إن أنا اللي أستحمل وأدادي كمان وأسمعها بتطلب مني الطلاق وأبقى هادي صح؟".
جدته بحزن على حال حفيدها: "خلاص يا زين يبقى انت تبعد شوية وتاخد فرصة تريح أعصابك وتسيب عاليا كمان تريح أعصابها".
زين بانفعال: "عاليا مش هترجع شقة باباها ومش هتعيش لوحدها، عاليا هتعيش معايا غصب عنها".
جدته برفض: "مفيش حاجة اسمها تعيش معاك غصب عنها يا زين وكمان مفيش حاجة اسمها تعيش لوحدها في شقة باباها، عاليا هتفضل معايا هنا وانت ترجع عند جدك لحد ما تهدوا انتوا الاتنين".
فكر زين في كلام جدته وكان صعب عليه جدا إنه يسيب عاليا تبعد عنه بس كلام جدته كان صح وتقريبا هو ده الحل الوحيد حاليا وبص لجدته بحزن: "بس تفتكري هي هتوافق تفضل هنا".
جدته بابتسامة: "سيب الموضوع ده عليا وأنا هتكلم معاها وأقنعها".
زين بإصرار: "تمام بس أنا هنتظر لحد ما حضرتك تتكلمي معاها دلوقتي عشان أعرف ردها لأنها لو رفضت تفضل هنا يبقى هاخدها معايا غصب عنها".
جدته بابتسامة: "ما تقلقيش يا حبيبي أنا هتكلم معاها دلوقتي وهقنعها".
ووقفت جدة زين ودخلت عشان تتكلم مع عاليا وكان زين منتظر يشوف ردها إيه وكان بيتمنى إنها لو ترجع معاه أو هو يفضل معاها هنا ودخلت جدة زين لعاليا وقربت منها بهدوء وكانت عاليا نايمة وكاتمة صوت عياطها في السرير وعمالة تعيط بحزن.. حطت جدة زين إيديها على شعر عاليا بحنان واتكلمت بهدوء: "عاليا حبيبتي ما تزعليش وحقك عليا أنا، بس صدقيني يا عاليا زين بيحبك واللي عمله ده غصب عنه اعذريه".
ردت عاليا ببكاء: "بس أنا مش بحبه وعايزاه يطلقني دلوقتي حالا".
ابتسمت جدة زين بهدوء: "عارفة يا عاليا إن أنا لو عندي شك واحد بس إن انتي ما بتحبيش زين زي ما هو بيحبك وأكتر كمان أنا كنت أنا اللي طلبت منه إنه يطلقك، بس يا عاليا انتوا الاتنين بتحبوا بعض وحرام يا بنتي تتحرموا من بعض بالشكل ده".
ردت عاليا ببكاء وحزن: "أنا عمري ما أخدت حاجة بحبها ومفيش حد حبيته وفضل جنبي، أمي ماتت وأنا طفلة في أكتر وقت كنت محتاجاها فيه وبابا مات لما كبرت وبرضه كان ده أكتر وقت كنت محتاجاه فيه، يعني أنا خلاص اتعودت إن كل اللي بحبهم بيسيبوني في أكتر وقت بكون محتاجاهم فيه".
كلامها وعياطها وجع قلب جدة زين وردت عليها بهدوء: "بس والدك ووالدتك الله يرحمهم ما سابوكيش بمزاجهم يا عاليا ده قضاء ربنا، وزين ربنا يحميه ويحفظه عمره ما هيسيبك.. هو بيحبك بجد يا عاليا صدقيني واللي حصل بينكم ده كان ترتيب شيطان".
عاليا بقوة: "ده ضربني حضرتك عارفة يعني إيه ضربني، أنا مستحيل أكمل معاه ولا دقيقة واحدة ولو ما طلقنيش أنا هرفع عليه قضية وأخلعه".
ضحكت جدة زين بهدوء : "طب اهدي بس وفعلا انتي عندك حق وهو مش من حقه إنه يضربك".
وخفضت صوتها وكلمت عاليا بغمزة: "بس احنا هنربيه وندفعه تمن ضربه ليكي ده غالي أوي إيه رأيك".
بصت لها عاليا وهي بتمسح دموعها وهزت راسها بموافقة: "فعلا أنا لازم أدفعه تمن ضربه ليا وشكه فيا ده غالي أوي".
جدة زين: "يبقى تسمعي كلامي وتفضلي معايا هنا وأنا هخرج دلوقتي أقول له ملوش دعوة بيكي نهائي".
عاليا باعتراض: "بس أنا هرجع شقة بابا مش عايزة أبقى معاه في نفس المكان".
جدة زين بهدوء: "يعني عايزة تروحي شقة والدك وتبقي فيها لوحدك وأنا أفضل هنا لوحدي، طب ليه يا عاليا ما نعيش مع بعض أنا وانتي ولا انتي مش حابة تبقي معايا".
ردت عاليا بسرعة: "لا طبعا أنا بجد حبيت حضرتك جدا وحسيت معاكي بحنان ماما اللي اتحرمت منه".
ضمتها جدة زين بحب: "وأنا كمان حبيتك أوي يا حبيبتي وغلاوتك عندي بقت نفس غلاوة زين وزياد".
ابتسمت عاليا بهدوء: "بس أنا مش هينفع أعيش معاه في نفس البيت".
جدة زين بمرح: "ومين قالك إنه هيعيش معانا في نفس البيت، أنا هخرج دلوقتي أقول له مع السلامة يرجع على بيت جده احنا هنا ستات مع بعض".
ضحكت عاليا بحب وحقيقي حست إن جدة زين قد إيه ست طيبة ومرحة جدا وحبتها عاليا جدا وهزت راسها بالموافقة: "خلاص يبقى هفضل مع حضرتك هنا بس بشرط إن هو ما يجيش هنا نهائي".
ضحكت جدة زين: "طبعا يا حبيبتي، حقك".
ووقفت جدة زين: "أنا هروح بقى أمشيه وأرجع عشان نحضر الغدا مع بعض وندردش شوية".
ابتسمت عاليا وخرجت جدة زين من عندها وقفلت الباب وراها وراحت لزين وهي بتضحك: "بقى دي بنت تشك فيها، البنت طيبة وبريئة جدا أنا كنت حاسة إني بتكلم مع طفلة".
ابتسم زين بعشق: "هي فعلا بريئة وجميلة زي الأطفال وصدقيني أنا والله مكنتش شاكك فيها ولا حاجة أنا بس كنت غيران عليها من قرب الزفت ده منها بالطريقة دي".
جدته بمرح: "خلاص اللي حصل حصل المهم اتفضل انت يلا على بيت جدك وحاول ترتاح شوية وعاليا هتفضل عندي كام يوم لحد ما تهدى".
زين برفض: "بس أنا مش هينفع أبعد عنها أنا هفضل هنا".
جدته بضحك: "مش هينفع عشان ده شرط عاليا عشان توافق تفضل هنا".
ابتسم زين بحزن: "لدرجة دي مش طايقة تشوفني".
جدته بابتسامة: "مين قال كده دي هتموت عليك بس انت اصبر عليها شوية وسيبها تهدى".
وقف زين بتردد وهو بيبص على أوضة عاليا ومشى وسابهم.
دخلت جدته لعاليا وطمنتها إن زين مشي ودخلوا الاتنين المطبخ عشان يجهزوا الغدا مع بعض وفضلت جدة زين تحكي لعاليا عن حياتها وإزاي اتعرفت على جد زين وعن قصة الحب اللي كانت بينهم.
رواية زين وعاليا بقلمي ملك إبراهيم.
في فيلا عيلة الشافعي.
وصلوا كلهم من القرية والجد كان غضبان من زين بسبب الطريقة اللي أخد بيها مراته وخرج بيها من الحفلة.
وكانت جانيت سعيدة جدا بنجاحها في إخراب الليلة على زين وعاليا بس كانت مستغربة هما فين والمفروض إنهم كانوا يرجعوا الفيلا هنا.
وصل زين الفيلا وهو حقيقي تعبان ومرهق جدا واتفاجئ إن كلهم موجودين وبص له جده وفهم من حالته إن فيه مشكلة وسأله عن عاليا ورد زين إن جدته جت من السفر وإن عاليا هتقعد معاها يومين وطلب جده إنه يتكلم معاه على انفراد بس زين اعتذر منه لأنه تعبان واستأذن منه إنهم يتكلموا في وقت تاني.
بصت جانيت لزين وكانت سعيدة جدا بالحالة اللي هو فيها واللي واضح جدا إن حصل مشكلة بينه وبين عاليا وكمان عدم وجود عاليا معاه ده فرحها أكتر وشعرت بالفخر إنها قدرت تبعد عاليا عن زين وتخرجها من حياتهم.
طلع زين أوضته وفتح الباب وهو بيبص للأوضة بحزن.. قعد على طرف السرير وخلع قميصه ورماه على الأرض بإهمال ونام على السرير بتعب وإرهاق.
طلع الجميع غرفهم يرتحوا بعد الغدا ووقفت جانيت وهي بتبص على زوجها بعد ما نام عشان تتأكد إنه راح في نوم عميق ولما اتأكدت إنه نام لبست ملابس نوم قصيرة وخرجت من أوضتها بهدوء وراحت بسرعة على أوضة زين وفتحت ولقته نايم على السرير.. دخلت وقفلت الباب من جوه وقربت منه وهي بتبص له وبتتأمل ملامح وشه وعضلات جسمه البارزة.. وقعدت على طرف السرير جنبه وهي بتبص له بلهفة وقربت من وشه عشان تقبله بهدوء.. في اللحظة دي زين حس بحاجة غريبة وهو نايم وفتح عينه على لمستها.. واتفزع أول ما شافها قريبة منه بالشكل ده ودفعها بعيد عنه بسرعة....