رواية زين وعاليا الفصل السادس والثلاثون36 بقلم ملك ابراهيم
"الخير والشر جوة كل بيت، جوة كل عيلة، جوة كل حد بنثق فيه.. في حاجات مبتتعرفش غير لما القناع يقع.. طول ما الناس لابسة وش الطيبة، هتفتكر إنهم بيحبوك.. بس أول موقف حقيقي، أول لحظة خوف، أول كوباية بتتقدم لك بحب مزيف، هتعرف مين كان معاك بجد ومين كان بيمثل"
قربت عاليا العصير من شفايفها وعينيها كانت على حمزة وهي بتفتكر كلام زين وهو بيقولها: "عاليا.. أنا عايزك تاخدي بالك من كل اللي حواليكي.. أنا عايزك ما تصدقيش الوشوش اللي انتي شايفاها قدامك... فيه ناس حوالينا عاملين بيحبونا لكن الحقيقة إنهم عمرهم ما حبونا وهدفهم الوحيد هو أذ..يتنا".
بصت عاليا قدامها بشرود بعد ما افتكرت كلام زين وفهمت هو كان بيحذرها من مين وبصت لجدة زين اللي كانت بتبتسم لها وبتهز راسها بتشجيع وهي بتقولها "اشربي" وعينين حمزة اللي بتتكلم وبتقولها "أوعي تشربي".
حركت إيديها فجأة ووقعت كوب العصير على الأرض.. وقفت جدة زين بفزع واتكلمت بانفعال.
جدة زين: "ليه كده يا عاليا".
بصت لها عاليا بدهشة واتكلمت: "آسفة يا ماما.. وقع غصب عني".
اتنهد حمزة براحة وهو بيحاول يداري شعوره بالارتياح لما عاليا وقعت العصير.
وقفت جدة زين واتكلمت بابتسامة ماكرة: "ولا يهمك يا حبيبتي.. أنا هدخل أعملك غيره".
بصت لها عاليا بعمق وهي حاسة إنها أول مرة تشوفها بعد ما ظهر وشها التاني لما وقع قناع الطيبة اللي كانت لابساه..
وقفت عاليا واتكلمت برفض: "لا يا ماما شكرا أنا مش عايزة أشرب حاجة.. أنا أصلا تعبانة".
لتتابع وهي بتبص لحمزة: "أنا آسفة يا باشمهندس مش هقدر أقعد معاك أكتر من كده..".
حاولت جدة زين تتكلم وتوقفها لكن عاليا أسرعت في خطواتها وطلعت السلم بسرعة وطلعت على أوضتها وقفلت على نفسها كويس زي ما قالها حمزة.. سندت على باب أوضتها بخوف وهي مرعوبة ومش فاهمة مين معاها ومين عليها وليه بقت شايفة جدة زين بشكل تاني.. قعدت على الأرض ورا باب أوضتها وهي بتكتم صوت بكائها وبتتمنى لو زين يكون موجود دلوقتي وياخدها في حضنه ويحميها من كل ده.
في الأسفل وقفت جدة زين وهي هتتجن من فشل خطتها.. قرب منها حمزة واتكلم بتوتر: "أنا لازم أمشي دلوقتي قبل زين وزياد ما يرجعوا".
ردت جدة زين بانفعال: "لا مش هتمشي وأنا هطلع أشربها العصير دلوقتي في أوضتها..".
لتتابع بقسوة: "أنا مش هضيع كل الترتيبات اللي أنا عملتها دي بسبب غبائها".
اتكلم حمزة بقوة: "أنا مش هينفع أفضل هنا أكتر من كده".
ليتابع وهو بيتجه للخروج: "عن إذنك أنا ماشي".
تابعت جدة زين خروجه بغضب وهي بتلعن في عاليا لأنها ضيعت كل حاجة بغبائها.
خرج حمزة من الفيلا وركب عربيته وحاول الاتصال مرة تانية بزين وبرضه ما بيردش وزياد تليفونه مقفول.. شغل عربيته وخرج من الفيلا لكنه وقف بعربيته في مكان قريب من الفيلا عشان يراقب الدخول والخروج وكان خايف لتنفذ جدة زين خطتها مع شخص تاني وفضل وقت طويل جدا وهو مستني في عربيته وبيراقب مدخل الفيلا لحد طلوع الفجر.
رواية زين وعاليا بقلمي ملك إبراهيم.
في قسم الشرطة عند طلوع الفجر قدر المحامي يخرج زياد بعد ما أثبت إن زياد بريء وإن اللي حصل ده كان تمويه من بعض المجرمين عشان يسرقوه وخرج زياد مع جده ووصلهم المحامي بعربيته للفيلا.
شاف حمزة عربية بتقرب من الفيلا وقلق جدا.. نزل من عربيته وهو بيقرب من الفيلا عشان يشوف مين في العربية دي.
نزل زياد وجده قدام الفيلا عشان المحامي يكمل طريقه.
قرب منهم حمزة واتكلم بقلق.
حمزة: "زياد انت كنت فين كل الوقت ده وليه زين مش بيرد عليا".
اتفاجئ زياد من وجود حمزة في وقت زي ده واتكلم زياد بقلق: "حمزة انت بتعمل إيه هنا في الوقت ده".
رد حمزة وهو بيبص على الفيلا بتوتر: "مش هينفع نتكلم هنا.. بس لازم تعرفوا إن عاليا في خـ..طر وأنا مش عارف أوصل لزين".
خاف الجد على عاليا جدا وزياد اتكلم بقلق: "عاليا في خطر إزاي".
حمزة بتوتر: "قلتلك مش هينفع أتكلم هنا ممكن جدتك تخرج وتشوفني معاكم".
اتكلم المحامي بتفهم: "طب اتفضلوا اركبوا معايا نتكلم في العربية".
قعد الجد جنب المحامي وقعد حمزة وزياد ورا وبعد المحامي شوية عن الفيلا ووقف جنب عربية حمزة.
اتكلم الجد بقلق: "عاليا مالها يا حمزة اتكلم".
حمزة بتوتر: "جدة زياد كلمتني عشان أجي هنا وحاولت أكلم زين وزياد عشان أبلغهم لكن زين مش بيرد وزياد تليفونه مقفول ولما جيت عرفت منها إنها مخططة إنها تدي لعاليا حباية تخليها شبه غايبة عن الوعي وطلبت مني إنها تصورنا مع بعض في أوضاع يعني...... أوضاع تظهر إن عاليا بتخو..ن زين".
اتصدم الجميع من تفكيرها الشيطاني واتكلم زياد بانفعال وغيرة على شرف أخوه وعرضه اللي جدته فكرت تلعب بيه.
زياد: "لا بقى دي زودتها أوي ما بقاش ينفع معاها الذوق ولا الاحترام..".
ليتابع بغضب أشد: "فين زين بقى يجي يشوف اللي كانت عايزة تعمله في مراته عشان بعد كده ما يقولش دي مهما كان من ريحة أمي واحنا حتة منها.. يجي يشوف كانت عايزة تحط شرفه في الأرض إزاي".
انفعل الجد أيضا وكان بيتمنى إنه يطلع يقـ.. تلها على كل الأذى اللي سببته لأحفاده.
اتكلم المحامي وهو بيحاول يهديهم: "يا جماعة الانفعال ده مش هيفيد دلوقتي.. احنا لازم نعرف الباشمهندس زين فين دلوقتي ونطمن عليه".
اتكلم الجد: "ممكن يكون رجع".
رد حمزة بنفي: "لا ما رجعش أنا واقف هنا وما اتحركتش ومفيش حد دخل ولا خرج".
رد زياد بقلق: "هيكون يعني راح فين".
اتكلم حمزة: "أنا بحاول أتصل عليه من بدري ومش بيرد.. ثواني هحاول أكلمه تاني يمكن يرد".
في المستشفى في شرم الشيخ.
قعد زين قدام أوضة العناية المركزة وهو بيفكر في والده ومش مصدق إزاي والده بيتعاطى مخد... رات وهما ما يعرفوش.. طب كان بيجيبها إزاي ومنين.. فيه لغز كبير وهو لازم يعرفه.. بس يطمن على والده الأول.. افتكر عاليا وافتكر إنه لازم يكلمها ويطمنها.. أكيد هتتجنن عليه.
دور على تليفونه ما لقاهوش وافتكر إنه مامسكش تليفونه من وقت ما خرج من الفيلا.
وقف من مكانه بسرعة ونزل يشوف تليفونه في العربية..
في الوقت ده كان حمزة بيحاول الاتصال به وجده وزياد والمحامي مستنيين رده.
قرب زين من عربيته وفتحها وشاف ضوء التليفون وهو واقع تحت مكان القيادة.. مد إيده وخد التليفون اللي كان بيعلن عن اتصال من حمزة.
اندهش زين ليه حمزة يكلمه في الوقت ده.
فتح زين المكالمة ورد عليه.
اتكلم حمزة بلهفة: "زين.. ألو".
رد زين بدهشة: "أيوا يا حمزة خير أنا سامعك".
رد حمزة وهو بياخد نفسه براحة إنه أخيرا رد عليه: "انت فين يا زين.. كلمتك كتير".
اتكلم الجد وهو بياخد التليفون من حمزة يكلم هو زين.
الجد: "هات يا حمزة أنا لازم أكلمه".
اتفاجئ زين لما سمع صوت جده مع حمزة في الوقت ده.
أخد جد زين التليفون واتكلم بلهفة: " زين انت فين..؟".
اتوتر زين وهو مش عارف يقول إيه وفكر إن جده بيبحث عنه عند حمزة.
زين: "خير يا جدي فيه إيه..؟".
الجد بقوة: "أنا بسألك انت فين يا زين وسايب مراتك وسايبنا في كل المصايب دي".
اترعب قلب زين على عاليا واتكلم بلهفة: "مالها مراتي يا جدي..؟".
الجد وهو بيحاول يتحكم في انفعاله وغضبه: "تعالى على الفيلا وانت تعرف كل حاجة".
اتكلم زياد بانفعال: "احنا لسه هنستنى لما يجي يا جدي.. ما تقوله إن اللي طول الوقت بيدافع عنها ويقولنا من ريحة أمي واحنا حتة منها كانت عايزة تعمل إيه في مراته.. قوله إزاي كانت عايزة تدوس على شرفه وتنيم مراته في حضن واحد غيره".
اتصدم زين لما سمع كلام زياد.
صدمة.. ذهول.. غضب.. انفعال.. قسوة.. جنون.
مشاعر كتير مختلطة اقتحمت قلب زين مع مشاعر الخوف والقلق على حبيبته.
جد زين كان حاسس باللي زين حاسس بيه دلوقتي لما سمع كلام زياد.
أخد زياد التليفون من جده واتكلم مع زين بغضب: "انت فين دلوقتي يا زين.. أنا عايزك تسمعني كويس.. أنا مش هسكت المرة دي واللي جدتك حاولت تعمله مع مراتك ده أنا مش هعديه أبدا ولازم تتحاسب على كل غلطة غلطتها في حقنا".
سمع زين كلام أخوه وهو حاسس بنار بتزيد اشتعال في قلبه ولو بإيده كان و.. لع في جدته وكل اللي اشترك في أذية حبيبته أو خوفها.. اتنفس بعنف وغضب واتكلم بقوة.
زين: "ما تعملش أي حاجة يا زياد غير إن انت تكون جنب عاليا وبس وأنا راجع القاهرة دلوقتي وأنا اللي هتصرف معاها".
اتكلم زياد بدهشة: "راجع منين..؟!!".
زين: "لما أرجع هتعرفوا كل حاجة المهم دلوقتي تفضل جنب عاليا وعينك عليها.. ما تسيبهاش لوحدها ولو دقيقة واحدة".
رد زياد بتأكيد: "حاضر يا زين.. ما تقلقش".
قفل زين التليفون وكلام زياد بيتردد في ودانه..
ركل عربيته بقوة وعنف.. ووقف يفكر بسرعة هيعمل إيه وإزاي يقدر يوصل القاهرة في أسرع وقت وإزاي هيسيب والده في الظرف ده لوحده.
بص للسما وشاف طلوع النهار وشروق الشمس اللي بيعلن عن بدء يوم جديد.
بص لتليفونه واتصل على عاليا.
كانت عاليا نايمة في مكانها ورا باب الأوضة وهي قاعدة على الأرض وضامة نفسها وسانده راسها فوق ركبتيها.
فتحت عينيها على صوت رنة تليفونها..
وقفت من مكانها بتعب من أثر النوم بالطريقة دي.. واتجهت للسرير وأخدت تليفونها بلهفة لما شافت اسم المتصل {زين}..
عاليا بلهفة: "زين حبيبي طمني عليك وطمني على باباك".
رد زين بقلق: "طمنيني عليكي انتي حبيبتي.. انتي كويسة؟".
بكت عاليا غصب عنها واتكلمت بخوف: "لا يا زين أنا مش كويسة خالص.. أنا خايفة وأنا هنا لوحدي".
اتكلم زين وهو بيحاول يطمنها: "ما تخافيش يا حبيبتي.. أنا كلمت زياد وهو هيبقى معاكي وجنبك لحد ما أنا أرجع".
ردت عاليا ببكاء: "بس زياد مش هنا.. زياد في القسم وجدي راح يخرجه".
رد زين بصدمة: "إيييه؟؟! زياد كان في القسم".
ردت عاليا ببكاء: "آه كلموا جدي بالليل وبلغوه إن زياد في القسم وجدي سأل عليك وأنا ما عرفتش أقوله إيه خوفت عليه لو عرف إن والدك في المستشفى..".
لتتابع وهي بتحاول تمسح دموعها وتقوي نفسها: "المهم طمني باباك حالته إيه دلوقتي".
رد زين بشرود وهو بيفكر إن أكيد جدته لها يد في دخول زياد القسم: "الحمد لله يا حبيبتي اطمني بابا بخير".
ليتابع بتأكيد: "المهم انتي ما تخافيش.. أنا مراتي قوية وما بتخافش من حد.. زياد لسه مكلمني وهتلاقيه عندك دلوقتي هو وجدي وأنا راجع القاهرة دلوقتي ما تقلقيش".
اتكلمت عاليا وهي بتبص حواليها بخوف: "زين هو انت لما كنت بتحذرني كنت بتقصد جدتك".
اتنهد بغضب ورد بتأكيد: "أيوا يا عاليا كنت بقصدها هي وعايزك تاخدي بالك من نفسك وخليكي مع جدي وزياد وابعدي عنها لحد ما أنا أرجع وأنا هتصرف معاها".
اتكلمت عاليا بخوف وهي بتبص حواليها: "ما تتأخرش عليا يا زين.. أنا خايفة".
وجعه صوت بكائها وخوفها وهو بعيد عنها وكان بيتمنى لو يكون جنبها وياخدها في حضنه ويطمنها.
اتكلم بحزن: "ما تخافيش يا حبيبتي.. أنا كلها ساعتين وهكون عندك أنا هتحرك على المطار دلوقتي وهرجع بالطيارة ما تقلقيش".
ردت عاليا ببكاء: "ماشي يا حبيبي وما تقلقش عليا.. خلي بالك من نفسك.. لا إله إلا الله".
رد زين وهو بيبص قدامه: "محمد رسول الله".
أنهى المكالمة وبص قدامه بتفكير واتجه لداخل المستشفى بسرعة وطلب يقابل مدير المستشفى.
رواية زين وعاليا بقلمي ملك إبراهيم.
قدام الفيلا وقف زياد مع جده وحمزة والمحامي واتكلم بهدوء.
زياد: "زين طلب إن أنا أبقى جنب عاليا لحد ما هو يرجع وما قالش هيرجع منين.. أنا مش فاهم حاجة".
بدأ الجد يحس بالقلق على كمال ابنه واتكلم بإيمان وهو بيحاول يطمن قلبه بذكر الله: ".. «اللهم إني أستودعك أبني وأحفادي، اللهم احفظهم»".
بص لهم المحامي واتكلم بتأكيد: "كده الموضوع كبر جدا ولازم نلاقي باسل وتخرجوهم كلهم من حياتكم".
اتكلم الجد بتفكير: "مهما حاولنا نخرجهم من حياتنا هيفضلوا فيها..".
رد زياد بتأكيد: "لا يا جدي ما بقاش ينفع يفضلوا في حياتنا أكتر من كده هما خلاص أخدوا كل الفرص وللأسف استغلوها ضدنا".
أكد المحامي وحمزة على كلام زياد.
اتكلم المحامي بهدوء: "أنا هروح أشوف رجالتنا اللي بيبحثوا عن باسل وصلوا لإيه".
واتكلم حمزة: "وأنا هروح شركتي ولو فيه أي حاجة كلموني في أي وقت".
شكرهم زياد وجده وركب المحامي عربيته وركب حمزة عربيته وكل واحد راح في طريق ودخل زياد هو وجده الفيلا..
رواية زين وعاليا بقلمي ملك إبراهيم.
دخل زين لمدير المستشفى وطلب منه وضع حرس خاص تبع المستشفى على أوضة والده وعدم السماح لأي ممرضة أو دكتور غير موثوق فيهم للدخول لوالده وشدد على عدم السماح لأي شخص بالزيارة وأكد على خطورة الوضع وإن حياة والده في خـ.. طر.
تفهم مدير المستشفى الوضع وأكد على تنفيذ كل طلباته.. طلب زين طلب أخير إنه يشوف والده.
واستنى دقايق ليتم نقل والده لأوضة عادية وسمحوا له بالزيارة.
دخل زين الأوضة وقرب من والده وهو بيبص له بحزن.. كلام كتير جواه نفسه يقوله بس مش عارف يبدأ منين ولا إزاي.. حاسس إنه كان بعيد عن والده جدا.. حاسس إنه أول مرة يشوفه من سنين.. والده كان عايش معاهم بجسمه بس لكنه روحه وقلبه وتفكيره كانوا في مكان تاني.. والده كان عايش معاهم جسد بلا روح وده اللي اكتشفه دلوقتي لما شاف والده قدامه.. حس إن كان فيه حاجز كبير بيمنع والده إنه يوصلهم.. كان فيه حاجة قوية بتبعده عن حياتهم..
قرب من إيديه وقبلها بحزن واتكلم بندم: "أنا آسف يا بابا لو كنت قصرت معاك.. أنا عارف إن أنا انشغلت عنك بحاجات كتير.. وعارف إن انت أكيد كنت محتاجني جنبك بس مش قادر تتكلم.. حاسس إن انت كنت محبوس جوه حاجة بتبعدك عننا..".
فتح والده عينيه بتعب واتكلم بصوت ضعيف: "زين".
ابتسم زين بسعادة لما سمع صوت والده واتكلم بلهفة: "بابا.. حمد لله على السلامة.. بابا انت كويس.. حاسس بحاجة".
اتكلم والده بتعب: "اطمن يا حبيبي أنا بخير".
ليتابع وهو بيحط إيده فوق مقدمة راسه: "هو إيه اللي حصل..؟".
بص زين لوالده بدهشة واتكلم بهدوء: "بابا انت مش فاكر إيه اللي حصلك".
بص له والده بدهشة واتكلم بصدق: "أنا مش فاكر أي حاجة غير إني كنت بحس بصداع جامد أوي ووجع في جسمي كله.. حتى الصداع ده أنا لسه حاسس بيه لحد دلوقتي".
اتكلم زين وهو بيبص لوالده بترقب: "أكيد الصداع ده بسبب المخد.. رات اللي حضرتك كنت بتتعاطاها".
بص كمال لابنه بدهشة واتكلم بعدم فهم: "مخد... رات إيه..؟".
اتكلم زين بترقب: "لما عملولك تحليل هنا في المستشفى ظهر إن حضرتك بتتعاطى نوع من أنواع المخد... رات".
رد والده بذهول: "كلام إيه اللي بتقوله ده يا زين.. لا طبعا أكيد فيه حاجة غلط.. أنا عمري ما أخدت حاجة زي دي ولا عمري حتى شربت سيجارة يبقى هتعاطى مخد.. رات.. أكيد التحاليل دي غلط أو بتاع حد تاني".
سرح زين بتفكير بعد ما اتأكدت ظنونه لأنه كان عنده إحساس قوي إن والده عمره ما تعاطى حاجة زي دي.
اتكلم كمال بتعب: " زين هو إيه اللي بيحصل".
اتكلم زين بغضب مكتوم بيحاول يداريه عن والده: "ما تقلقش يا بابا أكيد التحاليل دي فعلا غلط".
اتكلم والده بلهفة: "جدك فين يا زين.. أنا عايز أشوفه".
رد زين بهدوء: "حاضر يا بابا أنا هبلغ جدي وهخليه يجيلك النهاردة لأن أنا لازم أرجع القاهرة".
اتكلم والده بتعب: "أنا هرجع معاك".
زين برفض: "مش هينفع يا بابا.. حضرتك لسه تعبان ومحتاج ترتاح".
ليتابع زين جواه: "وكمان لازم تكون بعيد عن المجرمين اللي عملوا فيك كده".
بص لوالده وتابع بإصرار: "أوعدك يا بابا إني أخدلك حقك منهم وأندمهم على كل لحظة أذوك فيها".
رواية زين وعاليا بقلمي ملك إبراهيم.
في مكان بعيد قعد باسل بغضب بعد ما حاول الاتصال بجيلان للمرة الألف واكتشف إنها عملاله بلوك عشان ما يقدرش يوصلها..
دخل واحد من المجرمين واتكلم معاه بعنف: "لسه الهانم أختك ما ردتش برضه".
رد باسل بتوتر: "لأ لسه".
دخل شخص آخر ضخم يظهر عليه القوة واتكلم بحدة: "كنت عارف من الأول إن انت مش هتقدر توصل لأي حاجة يا باسل.. لأنك إنسان فاشل".
رد باسل بخوف: "مسيو إدوارد ممكن تديني فرصة تانية.. وأنا أوعدك هرجعلك كل فلوسك".
رد إدوارد بقوة: "خلاص ما بقاش فيه فرص عشانك باسل.. وفلوسي أنا هعرف أخدها بطريقتي".
ليتابع إدوارد كلامه مع واحد من رجالته: "اقتحموا بيت عيلة الشافعي واقـ..تلوا كل اللي هناك..