رواية حلة محشي / الجزء الخامس
بقلم / مي علي
صحيت علي صوت واحده ست بتزعق وعاوزه تدخل بس خضرا مانعاها
معرفش اي اللي خلاني لبست ونزلت وخرجت جري وراها ....
قربت منها وانا بجري
لو سمحتي ...لو سمحتي ياست
بصتلي بإستغراب وقالت ...
- نعم اؤمري
- ممكن اتكلم معاكي شويه بعد اذنك
- وانتي تطلعي مين ... انا اعرفك أو أنتي تعرفيني ؟!
- لا ... بصي انا مني الممرضه اللي جايبنها تشرف علي علاج حسام بيه ... اللي حضرتك كنتي بتزعقي مع خضرا من شويه عشان تدخوليلو
- اه اهلا وسهلا .
- اهلا بيكي .... انا مصدقت لقيت حد يعرف حسام ... ممكن نتكلم شويه ده بعد اذنك
ممنعتش ...أخدتها وقعدنا ف جنينه جمب البيت بس بعيد شويه
بصتلها وقولت ....
- انا من ساعة ما جيت هنا بقالي اسبوعين اهو وانا مش فاهمه حاجه وحياة النبي فهميني اي حكايتو احسن انا برج من دماغي هيطير
- طب اهدي كده واحكيلي اي اللي حصل .... أو اي اللي انتي عاوزه تعرفيه
- حسام ده اي حكايتو
- بصي ياستي صلي ع النبي
- عليه الصلاة وأفضل السلام
- حسام ده متربي علي ايدي من وهو اد كده ... ابن ناس ومتربي بس الزمن جار عليه يابنتي من ساعة ما امه ماتت .... واسودت الدنيا أكتر من بعد ما ابوه كمان اتوفي من سنتين ف هو ...
- استني استني انتي بتقولي اي ... ابوه وامه اي اللي متوفين ..ده ابوه وامه دول هما اللي جم المستشفي وطلبو ممرضه تشرف علي علاجو
- سلامة عقلك يابنتي ...والله ميتين انتي هتعرفي اكتر مني بقولك انا اللي مربياه
- يا ست اقسم بالله انا شوفتهم بنفسي بالأماره امه اسمها كوثر وابوه اسمو علي ...صح كده
- لا امو لا اسمها كوثر ولا ابوه علي ....حسام ابوه اسمه محمود ....
وسكتت شويه وقالت ...
- عارفه كوثر دي تبقي مين ... دي ام لبني وعلي ده جوزها ...اللي اتطلقت من جوزها واتجوزتو ...اكيد هما اللي راحوا يجيبولو ممرضه
- طب ولما هما بيهتمو بيه كده مفكروش ليه يخلو بنتهم تتقي الله فيه أو حتي يجو يطمنو عليه ....كملي اللي كنتي بتقوليه
- حسام ليه اخ واحد اسمو مراد ...بس مراد طول عمرو وهو شيطاني كده ومع نفسو ... الاتنين بيشتغلو ف مجال واحد بس حسام طلع بمجهودو إنما مراد دخل ووصل بالفلوس وفضل ورا ابوه لحد اخر ما مات مخلاش حيلتو حاجه
- وبعدين كملي
- حسام بيه حياتو كانت زي الفل وكان متجوز واحده اميره وبنت ناس وطيبه
- واحده مين ....غير لبني
- ايوه كان اسمها نور
- طب وفين دي دلوقتي
- منا جيالك ف الكلام اهو ... حياتهم كانت زي الفل ...ست نور كانت مهنياه ومحافظه علي فلوسه وبنت معاه طوبه طوبه لحد ما ربنا كرمو وفتح الشركه الخاصه بيه وجابو البيت ده
بس حسام كان شايفها كئيبه وحياتهم بدأت تمل وبالذات لما عدي كام سنه ومخلفوش وجريو ع الدكاتره والعيب لا كان منو ولا منها بس هو ربنا عاوز كده .... ف الفتره دي بقي حسام ابتدي يهتم بشغلو ويكبر دماغو منها ويفضل بره وسايبها...بس هيا كانت أميره وطيبه استحملت منه كتير
كان عشمها أن الأمور تتظبط بس اللي حصل أن العقربه دي دخلت حياتو .... كان طالب إعلان سكرتيره وكانت من ضمن اللي قدمو ... كانت مقيحه متلبسيهاش ف رجلك شبشب ... بس كانت مايصه وتسرق الكحل من العين وعامله أنها رقيقه بقي
فضلت تاكل بعقلو حلاوه ... وحسام بدأ يتعلق بيها ويظهرها معاه ف كل حته ... نور كانت هتتجنن وحاولت بكل ما عندها ترجع جوزها ليها
بس التانيه كانت قويه وفرضت سيطرتها وعمت عينيه وقلبو ...وبدل ما يرجع لمراتو قرر يتجوز العقربه دي
- كملي
- ست نور استحملت اللي محدش استحملو وقالت ماشي ومالو ...انا اللي مسكت فيها وقولتلها بكره يعرف مين عدوه ومين حبيبه لكن البت مسبتهاش ف حالها وحسام بيه بقي قاسي عليها زي متكون عملتلو غسيل دماغ وكان بيقف ضدها ومبينصورهاش وهي بقت مقهوره بعد ده كلو يعمل فيها كده
ف طلبت الطلاق وكانت فاكره انو هيتمسك بيها وهيفوق لما يحس انها هتضيع منو وزي مانا كمان كنت فاكره كده
لكن يا حبة قلبي طلبت الطلاق وهيا مره ومتنهاش وافتكر انو لما يديها فلوس وحقها هترضي وهيبقي كده مظلمهاش لكن هيا مرضيتش تاخد حاجه واكتفت باللي كان بينهم زمان واحتسبت حقها عند الله
- ياااه ده حسام طلع قلبو قاسي اوي وظلم فعلا
- متظلميهوش ...اللي معاكي ف البيت حيه بسبع تلوان ربنا يكفيكي شرها
- طب ونور فين دلوقتي
- رجعت بيت اهلها وفضلت علي أمل انو يفوق ..لكن يئست وكملت حياتها وربنا يسهلها
- وبعدين كملي
- بعد ما طلقها البت بانت علي اصلها لما خليلها البيت وحدها ... جشعه ميملاش عينيها كوم فلوس .... جابت امها وجوز امها يعيشو معاها ... وامها اوحش منها كمان ...وجابو خضرا دي معاهم ...عقربه
- يعني خضرا مش بقالها اسبوع زي ماقالت... معاهم من زمان
- اه وياما حصل بنا مشاكل انا وهي.... المهم حسام الحال مكنش عجبو وابتدي يفوق لما لاحظ انها كل يومين والتاني عماله تسحب بالفلوس والحنيه والدلع اللي كانو موجودين بح خلصو ...وحرمتو من الخلفه شرطت عليه يخلفو بس قدام شويه
المهم حسام الفتره الاخيره كان بيتخانق وياها كتير وهي لعبتها صح وكانت عاوزه تكوش ع الباقي ... والشركه بتاعته بقت بتقع عشان هيا مخليه عينو ف وسط راسو وطلبت الطلاق .... وطبعا كانت عاوزه تاخد مؤخر ونفقه وفلوس كتبها اد كده ... مرضيش يطلقها وقال يانا يا هي ... بعد ما صرف وبعتر فلوس عاوزه تخلع وتاخد فلوس كمان
جه وحكالي وقالي انو مستعد ينحبس ولا تطولش منو جنيه ... وقال انو هيسحب كل فلوسو من البنك أو اللي فاضل منها ويخبيه وتروح تدور ع الفلوس هيا بقي ...بس مكنش عارف يخبيهم فين ...
اقترحت عليه يعمل زي مابويا كان بيعمل زمان كان بيخبي الفلوس ف الحله اللي بنسوي فيها المحشي الحله الالمونيه .... هو استغرب اوي ومكنش موافق ...قال معقول هخبي فلوسي ف الحله ... قولتلو اه هجبلك اكبر حله عندي ونخبيها ف البدروم وسط الحاجه ومحدش بينزل تحت ابدا
المهم وافق وفعلا ومن غير ما حد يدري راح وجاب الفلوس وخبيناها ...
بس اللي حصل بعدها أن لبني دي رجعت ف قرارها وراحت تستسمحو ...معرفش اي قلب حالها
- انتو في حد شافكو وانتو بتخبو الفلوس
- لا البيت كان فاضي ...كانت عند امها واخدت خضرا معاها ...اصل حسام مشاهم كلهم
- المهم كملي
- بس وحسام قولتلو بلاش يابني ....بس هيا فضلت تتمسكن وتتحايل وتعيط بالدموع وتقولو انا مش عارفه قولت كده ازاي وانا بحبك وتستسمح وتعيط ... حسام وافق ودي كانت اغبي حاجه عملها
- اغبي حاجه ... والله حسام ده طلع اغبي خلق الله ف كل حاجه مش دي بس ...
- معلش يابنتي بردو البت مش ساهله وعليها اسلوب ما يعلم بيه الا ربنا ...انا الست اهو اقتنعت
- اه وبعدين
- وبعدين ...رجعت والدنيا مشيت عادي وكانت مطيعه ع الاخر يعني ....بس ابتديت الاحظ علي حسام ف الفتره الأخيره انو عصبي طول الوقت وبيزعق وده مش طبعو ....وبعدين أحواله مبقتش حلوه بقي ب مليون حاجه ف وقت واحد ... يزعق ويصرخ ع الفاضيه وع المليانه ... انا مبقتش فاهمه ...قولت جايز عشان شركتو وقعت خالص ومتعصب عشان شغلو ... ولبني كانت واقفه جمبو ودي مش عادتها
المهم ف يوم حسام وقع وجابولو دكتور ونصحو ياخدوه مكان يشمو شوية هوا ...يغيرو جو يعني ... ف الست لبني أخدتو وسافرو ومعاهم خضرا عشان يغيرو جو
انا قلت انا هقعد ف البيت لوحدي اعمل اي ...حسام كان عاوز ياخدني معاه ...بس ف الوقت ده بنتي كانت تعبانه وكان لازم اسافرلها اشوفها ... ف استأذنته اروح وهو وافق ... وسافرو هما وانا كمان ف نفس اليوم بعدها مشيت ...
وياريتني ما مشيت ...رجعت تاني يوم علي طول ...لقيت البوابه مفتوحه والباب مكسور .... اول ما شوفت كده معملتش حاجه غير اني دخلت البدروم عشان الحله اللي فيها الفلوس ولقيتها...
- لقيتيها مسروقه ....
- ايوه .... اتصلت بيه وبلغت الحكومه ورجعو وهو بقي هيتجنن ومبقاش عارف مين اللي عمالها
- كمان مش عارف يعني غبي اوي كده ....دي واضحه زي الشمس
- قصدك اي ؟!
- هيا كانت عارفه أن الحله دي فيها الفلوس
- مكنش في حد معانا بقولك
- اكيد في كاميرا ف البيت ....أكيد في حاجه وهنعرفها
المهم كملي
- بس البوليس استغرب وكلو استغرب حد يخبي الفلوس دي كلها ف الحله
- والنبي مستغربين من كده بس ومش مستغربين من اللي خبي الفلوس اصلا ف الحله بتاعت المحشي من الاول ...في حد يعمل كده
- يقطعني انا اللي قولتلو ... وبقي هيتجنن ولبني كانت عماله تزعق وتقوله خبيتها ف الحله وف البدروم ...والبوليس لما سأله متهمش حد ...بس هيا كانت عاوزه تتهمني انا عشان انا اللي كنت عارفه مكانها ..
بعدها علي طول ابتدي يتعب والحالة تزيد ومبقاش واعي للي حواليه وحسيت انهم زي مايكونو بيسقوه حاجه عشان هو مكنش كده ...
- استني صح انا افتكرت حاجه .... انا فعلا بلاحظ انو لما خضرا بتجبلو حاجه يأكلها أو يشربها بيتنكس بعدها .... ايوه ايوه صح يوم المانجا اول يوم جيت فيه لما كان كويس ورما عليها الكوبايه واتحول
- مش عارفه بقي يابنتي ..... انا طردتني بعدها وقلبي كان واكلني عليه ... وحلمت بيه امبارح جاي وبيعيط وبيقلي إلحقيني .... ف جيت جري اتطمن عليه .... بس الحمد لله ربنا بعتك نجده ليه ..إلحقيه يا بنتي إلهي يسترك
- متقلقيش انا هوديها ف داهيه هيا والغجر اللي معاها .... بس انا لازم اجيب إثبات انها هي اللي سرقت الفلوس لازم اربط الأمور ببعض ... اصلها هتغيبو ليه مثلا
قوليلي صح هو حسام عندو أملاك ولا حاجه
- اه عندو عماره وعندو ڤيلا ع البحر ..والعربيه بتعتو كمان والشركه
- حلو ... سؤال اخير ... أخو مراد اي علاقتو بيه
- والله اللي شوفته أن مراد مريح دماغو من الكل ...وكافي خيرو شرو ...علي طول بعيد
- تمام .... انا متشكره ليكي جدا ...واتأكدي اني هحاول اعمل ما بوسعي وقريب اوي هبعتلك عشان ترجعي الڤيلا معاه لما يخف انشالله
- يارب يا بنتي ... سلميلي عليه وقوليلو حقك عليا كان علي عيني والله
- يوصل انشالله . شكرا ليكي جدا واشوفك علي خير بإذن الله .
- مع السلامه ربنا يستر طريقك ويكفيكي شر الأذي
سبتها ومشيت وعديت ع الصيدليه وجبت الحاجه اللي انا عوزاها ورجعت علي طول
دخلت اول ما شافتني حسيتها عاوزه تسألني اتأخرت ليه بس انا مديتهاش إهتمام
وطلعت ...ولقيتهم حبسينو ف الاوضه وعمال يصرخ ...دخلت وحاولت أهديه لكن كل مره بيتنكس فيها بيبقي أسوأ معرفتش أهديه واضطريت اديلو حقنه مهدئه ونام زي الطفل بعدها .... فضلت قاعده ف اوضته كتير اوي ... وبعدها قومت احضرلو الاكل بإيدي عشان انا انا متأكده أنهم بيحطولو حاجه ف الاكل والشرب ...عملتلو الاكل وصحيتو اكل ...بس مفعول الحقنه كان مأثر.... فنام تاني
وانا كمان غلبني النوم ونمت جمبو محستش بنفسي
قلقت ...وصحيت ...بصيت ف الساعه لقيتها واحده بليل ...يااااه انا نمت كتير اوي
بصيت عليه لقيتو لسه نايم ....ومعرفش اي حبو انو يتكلفت بالبطانيه
قومت وشيلت الغطا من عليه ...حسيت جسمو متلج ...قولت ده اكيد بسبب الحقنه
سبته وخرجت من الاوضه اشوف اي الدنيا بره ...خرجت لقيتها ضلمه كحل ..قولت اكيد كلو نايم والهانم لسه صايعه بره
قولت أما اروح الصالون وأقف قدام البلكونه ف الهوا ...
عديت قدام أوضتها لانها ف طريقي ...
بس سمعت صوتها بتتكلم مع حد
الفضول قتلني ...قربت ناحية الباب اسمع
سمعت صوتها هيا عماله تتكلم بس مش مفسره بتقول اي
شويه وسكتت وسمعت صوت حد بيتكلم ...صوت غير صوتها بس صوت واطي ومكتوم ومش مفسره اي حاجه
فضلت واقفه كده شويه بحاول اكتر ...لقيت الصوت سكت خالص
رجعت ورا بضهري ...
وفجأه لقيتها فتحت الباب وواقفه قدامي مبرقه
انا اتخضيت .... كانت خارجه بقميص النوم
بصتلي بغضب وقالت ....
الجزء السادس من هنا