رواية حب موثق بالكمال الفصل الاول والثاني بقلم مني الاسيوطي
قولت اسمه وانا مش مصدقة ،اكيد جدي بيهزر، بس بصه امي وابويا وعمي ومرات عمي بتأكد الكلام، بعد وقت قصير اتلحلت اخيرا وقولت لجدي..
اكيد بتهزر يا جدي
وههزر في الحديت دا بردك يا بت ولدي
يا حزني يا لهوي رجعوني اسكندرية تاني، ماما بطلو هزار
وهنهزر ليه، جدك بيعمل الصالح ليكي
الصالح دا بقي يبقي عبد المتجلي
ايوا
بصيت لبابا مش مصدقة انه موافق علي المهزله دي، انا اتجوز عبد المتجلي، طب ازاي يا ناس،دا انا بخاف منه،وبطلت اجي الصعيد بسببه، انا كان اي اللي جابني هنا بس،اربع سنين محطتش رجلي في الصعيد بسببه، انا فاكرة اخر مرة جيت هنا، كانت زيارة عاديه لبيت اهل بابا في الصعيد، بس غلطتي الوحيدة اني خالفت العادات زي ما بابا قالي،لحد النهاردة مش فاهمه اي العيب اني وقفت في البلكونة، ايوا زي ما قريتم كدا، يومها عبد المتجلي ابن عمي شافني وانا واقفة في البلكونه،
عمري ما هنسي القلم اللي ضربهولي، ودلوقتي عايزني ابقي مراته مستحيل،فوقت من تفكيري علي بابا وهو بيقول اسمي
منار مالك يا بت!
هاا مفيش، بس انا مش عايزة اتجوز عبد المتجلي
مش بكيفك
جسمي كله اتنفض لما سمعت صوته ورايا، مقدرتش الف وابصله، جريت علي جدي ووقفت وراة،مرفعتش عيني من الارض، لقيته بيقرب من بابا وبيسلم عليه وبيقولو
نورت الصعيد يا عمي
منور بناسه يا ابني
وراح ناحيه ماما وبكل ادب وطي علي راسها وباسها وقالها
كيفك يا مرات عمي
الحمد لله يا ضنايا، انت عامل اي؟
بخير الحمد لله
عملت اي في المحصول يا ولدي؟
اتحمل كله علي العربيات يا ابوي
ميلت علي جدي وهمستلو
وحيات عيالك خبيني منه
الكل استغرب لما جدي ضحك من قلبه وبصوت عالي، وطيت تاني وقولتلو
بس يا جدي فضحتني،اهون عليك اتجوز الكائن دا
والله يا غاليه ما تهوني،انا بس بحافظ عليكي
احيه يا جدي، انت كدا بتحافظ عليا، دا انت بترميني للتهلكا بإديك
اتحشمي يا بت ليسمعك
كمل يا جدي انا سامع كويس من الاول
تنحت بمعني الكلمه،سامع من الاول، يالهوي يا صغيرة علي الهم يا لوزة، اخر حاجة فاكراها لما قرب مني وقالي
بجي انا تهلكا
اغمي عليا اول ما قرب مني،انا فعلا بخاف منه،اتجوزو ازاي بس، انا نسيت اعرفكم بيا، انا منار الدمنهوري، عندي عشرين سنه ومعايا دبلوم تجارة، مقدرتش ادخل الجامعه لان جدي رفض، انا محجبه وبصلي وبحفظ قران ،امنيه حياتي احفظ القران كله، معنديش اصحاب وحيدة،امي هي صاحبتي واختي، لاني برضو معنديش اخوات،انا اهلي من الصعيد ،بس عايشه في اسكندرية، وعبد المتجلي دا ابن عمي منصور، عمي سماه علي اسم جدي،حاجة كدا استغفر الله العظيم مستفزة، هو شكله حلو بس مش مناسب ليا،حسيت بايد خشنه
بتضربني براحة علي وشي، فتحت عيني ويارتني ما فتحتها، اتنفضت لما لقيت عبد المتجلي في وشي، بس كمان كان بابا وماما وجدي وعمي ومرات عمي معانا، اتلغبطت وارتبكت من بصته ليا، وفقت علي كلام مرات عمي لما قالتلي
انتي زينه يا بتي؟
احم،ايوا يا مرات عمي
اي اللي حصلك يا بتي، ما كنتي زينه؟
هاا، مفيش يا عمي انا بس جعانه
عيني يا صنايا، حالا هجهز الوكل
لا يا مرات عمي متتعبيش نفسك
لاه كيف دا،دا انا محضرالك الوكل اللي عتحبيه، والبتاو سخن ويستاهل خاشمك
سقفت بايدي وقولت بفرحة
بجد عامله بتاو
ايوا يا ضنايا
جريت عليها وحضنتها ونسيت كل حاجة، انا حرفيا بموت في مرات عمي، ضحكت وقولتلها
والله انتي اجدع من امي
يا بنت الجزمه،بتبعيني عشان رغفين عيش
طبعا امي اللي قالت كدا، لفيت ليها وقولتلها بهزار
انا بعمل الصالح
بتعملي الصالح في البتاو
مش احسن ما اعمله في عبد المتجلي
صمت عم المكان،اي الهدوء دا!!المفروض ماكنتش اقول كدا، ازاي نسيت ان عبد المتجلي واقف، يا لهوي هو بيبصلي كدا ليه، اعمل اي! يارب الارض تنشق وتبلعني، قولت بعد ما عرفت حجم المصيبه اللي عملتها
احم اسفة، مقصدش انا بس ...انا، اصل انا، احم كنت يعني ....
معرفش الكلام راح فين لما لقيته بيقرب مني، وفجأة .....
رواية حب موثق بالكمال الفصل الثاني
معرفش الكلام راح فين لما لقيته بيقرب مني، وفجأة ميل عليا، وقال بغضب مكتوم
حالا تخفي من جدامي
ا انا ان...
جولتلك اخفي من جدامي
جسمي كله اتنفض لما صرخ في وشي، جريت علي برة بسرعه ،طلعت الجنينة وعارفة ان دا غلط، بس حسيت ان نفسي رايح وعايزة اشم هوا،التقاليد هنا غريبة اووي،مينفعش اقف ف البلكونه عشان عيب ومينفعش اطلع الجنينه عشان برضو عيب،انا عايزة ارجع بيتنا،فجأة عيطت ودموعي غرقت وشي، انا معملتش حاجة عشان كل شويه يزعقلي ويخوفني،انا ماكنش قصدي اقول كدا، ياربي انا اي اللي جابني بس،فضلت اعيط كتير لحد ما سمعت صوته ورايا، وبرضو كان بيزعق
أنتي مين سمحلك انك تجعدي إهنه؟
ممكن متزعقش؟
انتي السبب اني بزعج وبعلي صوتي، جومي ادخلي جوة
قومت من غير ما اتكلم ،مسحت دموعي ودخلت جوة، بس جريت علي اوضتي، مش عايزة اتكلم مع حد،كل اللي عايزاه ارجع اسكندريه وبس، سمعت صوت خبط علي باب اوضتي، مسحت دموعي اللي غرقت وشي تاني، وفتحت الباب وكان جدي ،ابتسمت وقولت
اتفضل يا جدي
جلب جدك انتي،ليه عتبكي يا بتي؟
عشان خاطري يا جدي، بلاش الجوازة دي
ليه بس يا بتي!
عشان خاطري، انا بخاف منه،طب انت مش يهمك سعادتي؟
طبعا يا بتي، بس بردك عايز اطمن عليكم
يعني حضرتك مصمم
انا مجدرش اغصبك، بس ممكن توافقي علشان خاطر جدك العجوز يطمن عليكي
طب انا ممكن اطلب طلب؟
انتي تؤمري يا ست البنات
عايزة خطوبه الاول
موافج
ومحدش يغصب عليا
موافج
وتقولو يبطل يزعقلي، عشان بخاف
من عنيا
قومت وجريت عليه وحضنته وقولتلو
حبيبي يا جدو
يلا يا جلب جدك عشان تاكلي
حاضر
خرجنا سوا وكنت مبتسمه، لقيت مرات عمي جهزت الاكل والريحة تجنن، وتقريبا اتعميت من كتر جوعي، لدرجه اني مشوفتش عبد المتجلي وهو قاعد علي الطربيزة وقولت
جدو هو مين سماك عبد المتجلي؟
ابوي
طب وهو ابوك ليه سماك عبد المتجلي؟
نصيب يا بتي
يعني حبك النصيب دا يقع في ارابيزي
كيف يعني؟ مش فاهم
الله يسامحكم مكنتوش قادرين تسموه حاجة تانيه غير عبد المتجلي
اتجاهلت نظرات الكل بغبائي، وحتي لما ماما فضلت تقول مناار
منار اي بس، شوفتي اسمي حلو ازاي، انا اتجوز واحد اسمه عبد المتجلي ليه! ودا يبقي دلعه اي
مناار
بس يا ماما الله يرضي عليكي، اديني يا مرات عمي البطة دي، انا حزينه جدا، وعندي كبت
إكدة حزينه!!
ايوا يا عمي والله، هو عشان ابنك استغفر الله عينيه ملونه ادبس فيه، ولا عشان شكله في الكاجول انقح من لبس الصعايدة بتاعكم دا، فين البتاو يا مرات عمي
خدي يا ضنايا
كله كان بيضحك علي شكلي، وبصراحة عندهم حق، انا كنت بطلع غلي في الاكل،وباكل بطريقة متخلفة
بتضحكو علي احزاني، جدو الله يخليك اديني طبق الباميه دا
خدي
اخدت الطبق وكملت اكل، وقعدت ادور علي طبق الملوخية لحد ما لقيته وقولت
عبد المتجلي اديني طبق الملوخيه دا الله .......
سكتت وبرقت ومش عارفة ازاي مخدتش بالي انه موجود، يالهووي غبية طول عمري، معرفتش اعمل اي حاجة غير اني صرخت باسمه وانا بجري علي الاوضة
وسمعت صوتهم وهما بيضحكو عليا،دخلت اوضتي وكل اللي علي لساني كلمه واحدة
غبيه غبيه غبيه غبيه
.......
اما عند عبد المتجلي كان قاعد بياكل وسامع كلامهم كله، بس مش مركز معاهم،عقله وتفكيرة كان مع منار،هو بيحبها بس ميقدرش يقول كدا،عارف إنها خايفه منه،بس هو هيطمنها، عارف انه عصبي، بس عندة أمل انها هتقدر تحتويه وتغيرة،انا عارف اني بالنسبالها رجل الغابة،بس وعد مني لاخليكي تحبيني يا بنت عمي،هو دا اللي كان بيفكر فيه لحد ما انتبه لكلام جده وهو بيقوله
اي رايك يا ولدي؟
هاا معلش يا جدي مخدتش بالي انت جولت اي
بجولك هنعمل خطوبه ثلاث شهور الاول
خطوبه!!اي الحديت دا يا جدي
والله يا ابني منار محتاجة وجت عشان تبقي مطمنه وانا وافجت
جولتلي هي فيها منار، طيب
عبد المتجلي خلص كلامه وقام جري ووقف قدام اوضةمنار وخبط علي الباب جامد وهو بيقول
افتحي الباب دا لافتح دماغك