رواية حب مكتوب
الجزء السابع
للكاتبه مي علي
فتحت الرساله بعد ما نامو لقيته كاتبلي....
انا محمود يا مي
فكرت كتير اكتب اي ملقتش غير احساسي بانك بجد وحشتيني
ووحشتني كل حاجه فيكي
واكتشفت اني بحبك اكتر من نفسي
اوعي اغيب عن بالك يا مي
انا عارف ان ده مش ممكن لانك مبتغبيش عن بالي
عاوز اطمنك اني كويس وعاوزك تخلي بالك من نفسك
وانا كل فتره هتطمن عليكي يا حبيبتي ... متنسيش تمسحي الرساله
بحبك جدا
انا قريت الماسدج ومع كل حرف قلبي كان بيرفرف من الفرحه
فضلت اقراها واقراها واقراها لحد ما حفظت كل حرف
بحبه اوي يارب
ونفسي تعوضني بيه خير
ومسحت الماسدج ونمت وانا مرتاحه لاول مره
من فتره طويله
الجيش بتاعه كان سنه
كل يوم يعدي بيمر عليا أضعاف أضعاف السنه دي
بس اللي كان بيصبرني رسايله اللي كان بيبعتهالي دايما
هو ده اللي انا بتمناه وبتمني وجوده ف حياتي
يارب يرجعهولي بالسلامه
كانت اخر سنه ليا ف الجامعه
وكنت بعدلو الايام والشهور يوم بيوم ولحظه بلحظه
ويوم عيد ميلادي كان جالي رساله منه مكتوب فيها ...
حبيبتي
كل سنه وانتي بخير ومبسوطه وبتضحكي وعقبال ١٢٢ سنه يا مكحكحه ... ربنا يخليكي ليا
كان نفسي اوي اكون معاكي .. بس هنعمل اي بقي ... كلها كام شهر وارجع اقرفك
بحبك
هو مكنش بينزل اجازات
كان بيستتقل
وعاوز يخلص اوام اوام
وفضلت اعد الايام
كان لسه فاضل علي انتهاء السنه بتاعته شهرين
ومكنتش اعرف ان عدم نزوله بيخليه يخلص بدري
وهوب وانا راجعه من السوق متبهدله
لقيته ف وشي
جاي من بعيد
انا كنت هسيب الاكياس ف الأرض واجري اخدو بالحضن
ياااااه وحشني اوي
مكنش واخد بالو مني وهو ماشي
بس اول ما عيني جت ف عينو وقف وبصلي بحنيه واشتياق
لكن قطع نظراته بنظره بيقولي فيها اطلع ومفضلش واقفه كده
طلعت جري وانا هموت من الفرحه
- ماما ماما ماما
- يابنت المصروعه في اي
- امسكي البصل ده بسرعه ... يعني حبكت تنزليني النهارده مش عارفه أن جايلنا يوم أخبر
- يابت في اي
- انا هخش استحمي بسرعه
- اي بنت المجانين دي ... يا م...
سبتها ودخلت اجري ع الحمام واستحميت ولبست واتبرفنت
وفضلت قاعده مستنيه انو يجي
اكيد هيتصل بمروان
وفعلا جه مروان والفرحه علي وشه بس محمود مكنش معاه
وقال لماما أن محمود رجع
ماما بصتلي بلؤم وبعد ما مشي قالت ...
اه يا معفنه... بقي بتستحمي عشان هو جه
مبقالك اسبوع أما رحتك فاحت
- اكتئاب يا ماما كان عندي اكتئاب
- اكتئاااااب!!!!
ضحكت ... وماما دخلت ورا مروان قالتله...
مروان خليه يجي عشان يتغدي معانا
- قولتله يا ماما والله
بس هو مرضيش
هو رجع امبارح وأخوه كان هنا ف مصر وقال عايزه ف موضوع مهم اوي
انا اتوغوشت ... موضوع اي اللي عايزه فيه اخوه ده
ده يدوبك لسه خارج من الجيش
طب مش هشوفه ولا اي
فضلت دماغي تودي وتجيب
وبليل لقيت بابا داخل ومبسوط اوي
وقعدنا واتغدينا وكلو تمام
وبابا مبسوط اوي وبيبصلي نظرات غريبه
معقول محمود يكون كلمه تاني
وقطع تفكيري بابا وهو بيقول ..
قربي يا مي تعالي عايزك
- ايوه يا بابا
- حبيبة قلبي انتي كبرتي ومبقتيش صغيره وانتي عارفه أن انا وانتي أصحاب من زمان
- اه يا بابا طبعا
- عندي خبر حلو اوي هيفرحنا كلنا
انا انشكحت اوي وابتسمت ومتوقعه هيقولي محمود جالي واتقدم وانا وافقت
قال....
توفيق شريكي ... كلمني انهارده عليكي عاوز يخطبك لكريم ابنه الكبير
الضحكه اللي علي وشي راحت
كمل بابا كلام وقال
شاب كويس ومتدين وبتاع شغل ومتعلم وعنده وظيفه بسم الله ماشالله
محاسب اد الدنيا وشقه وعربيه
وكامل من مجاميعه
بصتله بنظرة خذلان وقولت ...
بس يا بابا انا
- انا عارف انتي هتقولي اي ...
هتقولي محمود .. اللي قلبك متعلق بيه ولا فكراني مش عارف يا حبيبتي مش احنا اصحاب
- ايوه يا بابا
- عندك شك أن حد هيخاف عليكي وعلي مصلحتك وعاوزلك احسن حاجه و الدنيا اكتر مني
- لا طبعا يا بابا انت الخير والبركه
- طب ولو قولتلك اني مش شايف مصلحتك معاه نهائي ولا شايف ليه مستقبل وأن مصلحتك ف اللي هخترهولك انا وهو ده اللي هيسعدك
انا سكت مرضتش
- ساكته ليه يا حبيبتي اتكلمي
فضلت ساكته بردو
- بصي يا حبيبتي انا مش هغصب عليكي ابدا
وهسيبك تفكري وهديكي الحريه ف القرار
بس بلاش حريتك دي تدمرك وتستني حاجه مش هتحصل ولو حصلت هتتعبي طول حياتك
هزيت دماغي وسحبت نفسي ودخلت ..
فضلت اعيط وماما مش عارفه تهديني
وحتي محمود مش عارفه اشوفه واحكيله اللي حصل
بس افتكرت رقمه انا كنت حفظاه
وقولت أما ينامو لازم اكلمو
وفعلا لما نامو كلمتو ...
رد
الو
- محمود
- مي حبيبتي وحشتيني
- إلحقني يا محمود
- مالك في اي ... انتي بتعيطي
- محمود بابا جايبلي عريس عاوز يخطبني
- اي !!! انتي بتقولي اي مش ممكن مستحيل
- والله يا محمود زي ما بقولك
- تقولي اي بس ... حرام اللي بيحصل فيا ده يعني بعد كل ده حد تاني ي ...
لا مستحيل علي جثتي
- هعمل اي بس يا محمود
- مش انتي اللي هتعملي انا اللي هعمل .. عليكي بس ترفضي ... انتي عوزاني ولا لا
سكت
- مي ردي عليا عاوزاني ولا لا
- اه طبعا يا محمود ايوه عاوزاك
- اهدي متعيطيش يا حبيبتي طيب انا هتصرف وفرجت والله
امسحي دموعك ومتشليش هم
- هتعمل اي
- ملكيش دعوه بس
اقفلي دلوقتي وامسحي المكالمه وبكره يحلها حلال
وفعلا قفلت
يارب أنا مش حمل تفكير يارب
تعبت
وتاني يوم فضلت ساكته خالص وتعبانه مبتكلمش ولا ليا نفس اعمل اي حاجه
حاطه ايدي علي خدي ومستنيه النجده
بابا جه بدري وانا اصلا كنت ف اوضتي
ومسألش عليا فأنا استغربت
وسمعت صوت بره
جايه أخرج
لقيت ماما ف وشي وبتقولي محمود هنا هو وأخوه خليكي جوه
حسيت بفرحه جوايا بس خفت اطلعها الموضوع ميكملش
يارب يحنن قلبك يا بابا
فضلت واقفه بحاول اسمع اي حاجه
معرفتش
ومشيو
جريت جري علي ماما اسألها ...
دخلت
- ها يا ماما اي اللي حصل
- والله ما عارفه اقولك اي
- قولي اي حاجه يا ماما
اي حاجه قولي هو قال اي
- قال لابوكي أنه بيحبك وأنه هيموت لو ماتجوزكيش وأنه مستعد ينحت ف الاسفلت عشان يخدك بس يضمن منه كلمه
وانو عاوز يديلو فرصه لمدة سنتين بس علي الاقل يديلو كلمه وتقرو فاتحه
- طب دي حاجه حلوه اوي ياماما
- حاجه حلوة اي بس ... انتي عارفه عاوز السنتين يعمل فيهم اي
- اي يا ماما
- هيسافر الخليج مع اخوه
- اي ؟!؟!!
- اه يا حبيبتي هيروح يشتغل هناك ويربطك هنا وحليني بقي علي ما يرجع
مبقتش عارفه اقول اي
- طب وبابا قال اي يا ماما
- قال لا طبعا ... هو عاوز يربطك هنا ويمشي يسافر واسمك مخطوبه علي اسمو
مترخصيش نفسك انتي لازم تتخطبي وتتجوزي وتعيشي زي البنات
وهو معندوش حاجه يعني سنتين مش هيكفوه
- يا ماما ما يم
- مفيش يمكن .. في تعززي نفسك انتي مش بايره ولا هخليكي تقعدي جمبو لحد ما تبوري
- بس انا بحبه يا ماما
- بكره تنسي لما تتجوزي راجل يهنيكي ويستتك هتنسي
فضلت اعيط
- لا حول ولا قوه الا بالله يابنتي متقطعيش قلبي بقي
حاولت تهديني كتير اوي
وأخر ما يئست سابتني وخرجت
وبليل لما نامو اتصلت بيه
وكان حزين اوي ..
- هنعمل اي يا محمود
- هنعمل كل خير بإذن الله
- انت هتسيبني وتسافر
- هرجعلك علي طول انا مسافر اكون نفسي
هنحت ف الصخر عشانك
مش هسيبك ابدا متخفيش
- انا عندي فكره يا محمود
- فكرة اي
- تعالي نهر
- اوعي تقوليها يا مي اوعي انتي غاليه اوي وانا يوم ما هاخدك هاخدك من بيتكو وهدفع دم قلبي عشانك بس متفكريش كده
- انا مش قادره هموت
- بعد الشر عليكي بصي يا مي انا معرفتش اخد كلمه من ابوكي انك ليا بس انا اوعدك اني هرجعلك علي طول وهشتغل ليل نهار عشان اخدك معززه مكرمه
بس عاوز اخد منك كلمه انك مش هتسيبيني أو تنسيني ولا تستسلمي للأمر الواقع
- اوعدك ... اوعدك من غير ما تقول ... بس انت لما تسافر اكيد هيجيبولي عريس واتنين وتلاته اعمل اي انا بقي
- انا هقولك تعملي اي
ولسه هيتكلم لقيت حد فتح الباب فجأة وفتح النور
رميت التليفون من ايدي وتنحت ومت من الرغب ولقيت قدامي .....