رواية حب مكتوب
الجزء الثاني عشر
للكاتبه / مي علي
وطي علي ركبتو وانا متافجئه جدا من اللي حصل ده
وقال :
تتجوزيني يا مي
الزمن وقف هنا
وكل الاصوات اختفت حتي انا كمان توهت ف حته تانيه
ودماغي بدأت تفكر وتلف كتير اوي
انسي وأكمل ولا افضل عايشه علي الامل اللي راح وانا عارفه انو مش راجع
بس انا مبحبش عبدالرحمن وكل اللي فيه ده انبهار بس بشخصيته
لو وافقت ابقي بخدعه طب هو انا بطلت احب محمود ونسيته فعلا
ولا انا بطلت احب اصلا
بس لا انا لازم اكمل حياتي وأشوف مستقبلي وانسي
انسي زي مهو نسي وأكمل وعمري مهلاقي فرصه احسن من دي
بصتله بنظرة تحدي لنفسي واني خلاص هنهي الصفحه دي وقولت ...
انا موافقه
للكاتبه مي علي
كل الناس صقفت وتصفير جامد
ودعاء حضنتني جامد اوي
- الف مبروك يا ميوي يا روح قلبي
- بس انا صح مقولتش لأهلي وكده مينفعش بقي
لقيته بصلها وقال ..
وسعي كده يا دعاء
واداني التليفون
- اتفضلي امسكي كده
- امسك اي بس
- امسكي الموبايل واتكلمي
اخدت منو الموبايل وحطيتو علي وداني
- استني بس معلش الشاشه اتطفت
اتكلمي فيديو كول
حط بصمة ايدو والشاشه اتفتحت
لقيت ماما ع الموبايل وبابا جمبها وبصتلي وقالت ...
- مبروك يا حبيبتي مبروك
- ماما انتي انتو اي اللي
بابا قال ...
بلاش لعبكه اتبسطي بيومك ولما ترجعي نبقي نحكيلك
مبروك يا حبيبتي
للكاتبه مي علي
اخد عبد الرحمن التليفون وقال ...
ده ولا تخطيط للحرب والله
سامعه ماما بتضحك ..
مبروك يابني معلش بقي من طلب العلا
- قصدك من طلب مي يا طنط
وانا واقفه مش فاهمه اي حاجه
مش عارفه اذا كنت مبسوطه ولا لا
بس اليوم عدي والناس كانو مبسوطين اوي
ورجعت تاني يوم علي طول
وحكولي اللي حصل
وان عبدالرحمن راح من ورايا وكلم بابا انو عاوز يخطبني
بس بابا قالو أن انا رافضه الموضوع ده تماما وصعب اوافق
وعبد الرحمن اقترح الخطه دي عليه
واحنا هناك مرضيش يقولي اي حاجه وفضل أن هما اللي يحكولي
ماما كانت مبسوطه اوي بيا
وف خلال أيام كنا موضبين قاعه فخمه اوي
وعملنا خطوبه وكانت فرحه كبيره
بس انا فين من كل ده
انا مش عارفه
انا مش مستوعبه
هو انا اصلا اللي قولت اه موافقه ولا مش انا
وعدت الايام ونزلت الشغل بس علاقتي بعبدالرحمن ف الشغل زي ما هيا
هو مديري وليه احترامه
إنما بره الشغل حاجه تانيه
وهو كان محافظ جدا ع النظام ده
محبتهوش ولا هو كمان حبني كل الحكايه من وجهة نظري ونظرو اننا مناسبين لبعض وممكن نبني حياه سعيده تيجي بعد الجواز ونمحي بيها الماضي
واللي أكدلي ده
طلبت منو أننا نقعد ونتكلم وفعلا بعد الشغل وصلني غيرت هدومي وهو كمان روح وغير هدومه وعدي عليا تاني عشان نخرج ونقعد ونتكلم
قعدنا وطلبنا العشا وبدأت اتكلم :
عبدالرحمن هو انت بتحبني
للكاتبه مي علي
- اي السؤال ده يا مي
- ممكن ترد عليا انت عارفني صريحه جدا ف رد عليا بعد اذنك انت ليه فكرت تخطبني
عشان بتحبني
سكت شويه وبعدين قال
عوزانا نتكلم بصراحه
- اه ياريت
- في جزء من الحب بس مش بالطريقه التقليديه
- ازاي يعني
- يعني زي وجهة نظرك بالظبط
انتي مبتحبنيش بس شايفه اني مناسب وانك عاوزه تتخطي المرحله دي بقي عشان تبدأي حياه جديده
مش معقول هتفضلي كده
ده بردو نفس تفكيري
انتي مناسبه ليا جدا وهنبني حياه سوا
اكيد في حب وتقدير
بس حب حب ده اكيد هيجي بعد الجواز
- عجبتني صراحتك جدا
- متنسيش اننا تقريبا زي بعض ف التجربه وانا عرفت حاجات بسيطه عن تجربتك بس ميهمنيش تكمل تفاصيلها
- اومال اي اللي يهمك
- انك معايا وأننا هنتخطي ده مع بعض وهننسي ونملي حياة بعض جدا
- طب انت نسيت
- نسيت اي
- نسيتها هيا
انت من فتره كنت عايش علي أمل أنها
- اتخطيت الموضوع بمجرد ما فكرت اخطبك
واوعي تفتكري من كلامي اني واخدك سد خانه
انتي هتبقي مراتي وشريكة حياتي والحب هيجمعنا مع الوقت
- فهمت وده شئ كويس جدا
- احنا متفاهمين يا مي وأنا متفائل جدا بيكي وبوجودك واكيد هنكمل حياة بعض
- اكيد
للكاتبه مي علي
كلامه منطقي لان ده نفس تفكيري انا كمان
وشال من عليا الإحساس بالذنب
لاني كنت فاكره انو بيحبني بس انا مبحبوش
طلعنا متفقين ف وجهة النظر
اتفقنا هنتجوز خلال سنه
ف السنه دي عانيت جدا من الوجع والذكريات
بس كنت بشغل نفسي ف تجهيزات البيت والمشاوير وهو كان مالي الفراغ جدا
اي نعم احنا طبيعين جدا وبنتعامل بعفويه علي عكس كل المخطوبين
كنت بحس دايما أن في حاجه ناقصه بنا
بس كنت بصبر نفسي أن كل ده هيجي بعد الجواز
وجبنا شقه فخمه وجميله وبدأنا ف تشطيبها وانا بدأت اجهز حاجتي
بس طبعا انتو عارفين أن الأهل بيبقو حاسين إذا كان ابنهم أو بنتهم فرحانين ولا لا
بابا كانت نظراته غريبه بس متكلمش
ماما اللي فاتحتني ف الموضوع
- مي عاوزه اتكلم معاكي شويه
- طبعا يا ماما اتفضلي
- احنا يا بنتي مغصبناش عليكي ف العريس ده صح
- ايوه يا ماما صح
- طب اومال ليه حاسه انك مش مبسوطه
- مين قال كده يا ماما مبسوطه جدا
- مي انا امك وعرفاكي ومعنديش غيرك بنات يا حبيبتي صارحيني لو في حاجه
- يا ماما مفيش حاجه متقلقيش
للكاتبه مي علي
- يعني مفيش اي ذكريات او مثلا بتفكري ف القديم
- قديم يا ماما اديكي قولتي
بس اسمه الماضي يا ماما
وبعدين هزعل علي اي ده واحد باعني وسابني سنين مستنياه مفكرش حتي يعتذر
يمكن لو كان قالي انا اسف مفيش نصيب كنت عديت الموضوع
كنت هتعب بس كنت هعدي وهفوق
- انك فاكراه وبتتكلمي عنو يبقي لسه ف بالك
- ماما دول تسع سنين من عمري عدو منهم سته وانا مستنياه لازم افتكر
لو مفتكرتش مش هفوق
انا بصبر نفسي بده
عشان مقعدش اندب حالي
- اهم حاجه انك قبل ماتدخلي بيتك تكوني ناسيه تماما
متفتكريش حتي الاذيه عشان متعتبرش خيانه وربنا يحاسبك عليها
واوعي تعملي حاجه وانتي مغصوبه
احنا مش عايشلنك
- متقوليش كده يا ماما بس
ربنا يديكو الصحه وطولة العمر
- ويفرح قلبي بيكي يا بنت عمري
بوستها وحضنتها
فعلا كلامها صح
مش لازم افكر ف الموضوع ده ابدا
وانشغلت ف الشغل والتجهيزات والفرش
ودعاء معايا
هو كمان كان مشغول وبيتابع بنفسو
والأمور ماشيه طبيعي
وخلصنا كل حاجه
واتفقنا أن كتب الكتاب والدخله ف يوم واحد
ولفينا ع القاعات وحجزنا قاعه
جميله اوي بجد
انا كنت مبسوطه
الصعب بقي كان ف اختيار الفستان
لفيت علي محلات كتير ومفيش حاجه عجبتني
وفضلت قاعده زعلانه ومبوذه
ماما دخلت عليا ...
مالك يا ميوي
- مفيش فستان عاجبني يا ماما خالص
- في محلات ف نص البلد
- روحتها وبردو مفيش حاجه عجبتني
في حاجه ف دماغي معينه
دخل مروان ...
اه يا ست العروسه
مفيش حاجه عجباكي
للكاتبه مي علي
- يا حبيبي جيت امتي
- كنت بره من بدري
وحشاني يا مي
الف الف مبروك يا عروستنا
انا هرقص بيكي ف الفرح لما ادوخك
حضنته جامد اوي
ماما .. ربنا يحميكو يا ولادي
- حبيبتي يا ماما
مروان ...
هتخرجي من انهي كوافير
- في السويت اللي ف الاوتيل اللي في الفرح
- ايوه بقي يا عم محدش ادك
- عبدالرحمن مرضيش انزل ف كوافير كده
اتفق هو مع بيوتي سنتر
وحجزلي اوضه ف الاوتيل هيا هتيجي تجهزني بنفسها
- الواد ده برنس والله
ماما ...
وانت مطلعتش ليه زيه
- ليه مالي يا ماما
- مش عارف تجيبلي نونه افرح بيها
- اي الكسفه دي
- كسفة اي جتك وكسه علي طول كاسفني
يواد اتلحلح
- اتلحلح اعمل اي مانا ببوسها علي طول
- يا خرابي هتجلطني
- ههههه بهزر معاكي يا امي
- لا متهزرش انا عاوزه حفيد العب بيه
- حاضر حاضر من عنيا هشوف بيتجاب منين واجيبلك واحد
- قوم اولا من هنا انت ناوي تشيلني انا عارفه
- بعد الشر عليكي الوحي
المهم بس سيبك مني
فهمتي الاخت دي ولا لا
- فهمتها اي
- يالهوي هتجلطيني
- ههههه امشي يا قليل الادب
بره
- اااااه شكلنا هنتفضح وهنروح ناخدها ليلة الدخله وهيا ضرباه بالقله وعملالو محضر تحرش
- امشي يا جزمه بره
- طالع طالع اهو
انا كنت عماله اضحك مش قادره
ماما قالت...
لمض الواد ده
بس بيحبك اوي
- وانا بعشقه يا ماما والله
تليفوني رن
- عبدالرحمن يا ماما
- طب ردي
رديت
- الو
- اي يا مي
- اي يا عبدالرحمن عامل اي خلصت شغل ولا لسه
- انتي ف البيت
- اه
- بابا عندك
- ايوه قاعد بره في اي يا عبد الرحمن
- مفيش انا تحت بس وطالع
- تحت البيت عندنا
- ايوه
- طيب ماشي اطلع يلا
- باي
وقفلت
- ماما عبد الرحمن طالع
تحت وطالع
- طيب قومي كده ظبطي نفسك عشان تطلعيلو
- اوك ماشي
وقومت لبست بسرعه
وماما طبعا خرجت تستقبلو
وطلعت انا بعدها
وهو قاعد مع بابا
- عبدالرحمن اي قلقتني
- اي يابنتي وهي اول مره اجي فاجأه
وانا جاي عشان حاجه مهمه اصلا
ماما ...
يابنتي خليه ياخد نفسو
- معلش انا اسفه اقعد طيب
- لا امسكي
- اي ده
- افتحيه بس
- دي هديه كبيره اوي
كل دي علبه
- يلا افتحيهاا
وفتحتها
جايبلي فستان فرح
طلعته وقولت ..
اي الجمال ده
- حلو بجد
- ده تحفه اوي يا عبد الرحمن
جبتو منين
- واحد صحبي شغال طيار وعارف أن فرحي قريب وبالصدفه كان طالع رحله لباريس
وجابو هدية الفرح
حتي مسألش إذا كنا اخترنا الفستان ولا لا
- حلو اوي بجد تحفه تحفه
- اهم حاجه انو عجبك
- اه جدا
مروان قال...
مبروك ويارب يتمملكو بخير
- يارب اللهم امين
للكاتبه مي علي
وقعدو مع بعض وانا دخلت قيستو
هو كان بس محتاج شوية تظبيط
خرجتله ..
- ها طلع حلو
- شكلو تحفه بس محتاج حبة تظبيط
- مش مشكله هبعتلك حد يظبطه ع السويت
هتروحي امتي
- هروح بكره الكوافيره كلمتني
يادوبك ألحق اخلص
- تمام هعدي عليكي الصبح اوديكي
ياه انا نسيت
- نسيت اي
- المفروض بدري اروح اخلص اخر حاجات ف الشقه
طلعو كل حاجه فاضل التظبيطات
ماما قالت...
علينا احنا دي بقي
بكره هنروح نظبط كل حاجه
- اوك يا طنط بس انا هوصلك لاني لازم اروح بكره
مروان قال ..
خلاص روح انت مع ماما وانا هوصل مي عشان متروحش لوحدها
- خلاص اوك
- طيب هستأذن انا بقي
- اقعد يا عبد الرحمن لسه بدري
- معلش يا مي هروح لاني محتاج انام ومتنسيش اني كمان لازم اجهز نفسي
وغمزلي
ومشي
ماما قالت ...
ابن حلال فعلا وطيب
- اه يا ماما
بصيت لمروان وقولت ...
بكره بدري علي عشره كده ها اوعي تنام
- لا إله إلا الله حتي وانتي هتتجوزي قرفاني
- هههههه طبعا وهتجوز واخلف وبردو علي قلبك
- زي العسل والله
- حبيب قلب اختك
- طب هروح انا بقي احسن اتأخرت وبكره هكون عندك
بابا قال ...
اجري لحسن تضربك اتأخرت
- تضربني هههه ليه مخلف قطه
انا بخاف بس لا تقفل الباب بالمفتاح وتسيبني بره
- هههههههههههههه
ضحكنا كلنا عليه
- تصبحو علي خير
- وانت من اهلو يابني
ومشي
وانا كنت فرحانه بالفستان اوي لدرجة نمت وانا حضناه
والصبح نزلت بدري انا ومروان
وماما كانت نزلت هيا وخلاتي وعماتي عشان يوضبو الحاجه
وروحت وطلعني مروان السويت ونزل راح شغله
وانا قولتله اني هبقي اروح لوحدي أو مع دعاء
وجت الست اللي هتظبطلي الفستان والكوافيره
كان فاضل علي فرحي تلت ايام بالظبط
ظبطنا شوية حاجات ف الفستان ف اليوم ده
وقالتلي هتكمل بكره حاجات بسيطه
وروحت والدنيا كانت حلوه جدا وكنا منسجمين اوي كلنا وفرحانين ووزعنا الدعوات وكل حاجه كانت كويسه
وتاني يوم روحت السويت ووصلني عبد الرحمن ومشي
وطلعت وكانت الكوافيره لسه مجتش
بس اللي بتظبط الفستان جت
وظبطته وطلبت مني اقيسو
ولبستو وبقي حلو اوي والطرحه تحفه
وجالها تليفون
ف خرجت تتكلم بره
وشويه ودخلت وانا بقي واقفه قدام المرايه وفرحانه بشكلي اوي
وقالتلي ...
في واحد بره وعاوزك
- واحد ؟!
واحد مين
- بيقول اخوكي واسمه مروان
- مروان ؟!
اي اللي جابه ده الساعه واحده الضهر
طيب قوليله يدخل واقف بره ليه
- طيب هقوله
انا كده خلصت
اقلعيه بقي وعلقيه والف مبروك عليكي يا عروسه
ولو في حاجه كلميني علي طول
- تسلميلي يارب
طب حسابك كام كده
- استاذ عبدالرحمن حاسبني
الف الف مبروك
- الله يبارك فيكي
- هقوله يدخل انا
- طيب ماشي
وخرجت
وانا بصيت ف المرايه وبقول ف نفسي
مروان اي اللي جابه هنا ودلوقتي
مش مهم المهم يالهوي علي جمالي وجمال الفستان
والنبي عروسه حلوه انا
ودخل وانا واقفه
فقلت وانا مدياله ضهري
مروان تعالي بص اختك وهيا ف فستان الفرح
مش حلوه بذمتك
- اه فعلا حلوه
لفيت ع الصوت
واتصدمت ....
محموود ......