قصة #الممسوسة
الجزء الرابع
فضلت انادي يا خالد ياخالد انت سامعني يبني
كنت سامعه صوت مياه عماله تنقط ..فضلت احاول امشي اوصل للمطبخ اجيب شمعة حتي ..طول منا ماشيه عماله ادوس ف مياه ..وسامعه الصوت ..هي الشقة غرقت؟ وفجأة سمعت صوت الكامنجا
خالد ابني كان بيعزف مقطوعة حلوة جدا ..بس طبعا مش وقتها خالص ..عماله انادي عليه يا خالد يا خالد مفيش اي استجابة ..لحد موصلت للحمام
لقيت الباب مفتوح وخالد ابني قاعد علي طرف البانيو وعمال يعزف يعزف مش بيبطل..انا شيفاه عيني خلاص خدت ع الظلمه و قادرة اميز الأشياء..المقطوعة حلوة جدا جدا ..عايزة اقوله بطل وتعالي ساعدني نلاقي شمعة ..مش عارفه انطق وفجأة بصلي
عنيه كانت صفرا زي عيون القطط ..سمعت صوت فحيح زي فحيح الثعابين ..مبقتش عارفه جاي منين هل دا خارج من ابني ولا من مكان تاني في الحمام ..وبعدين اتكلم
انا اسف يا ماما
حاجه شالتني وطيرتني بره الحمام بقوة غريبة
وباب الحمام اتقفل
فضلت اعيط واصرخ وانادي عليه لحد مالنور رجع ولقيت سارة بنتي جت جري من اوضتها
في ايه يا ماما بتصوتي كدا ليه؟ وايه الي موقعك عالارض كدا يا حبيبتي انتي اتكعبلتي ؟
لقيت باب الشقه بيخبط ..الواضح ان الجيران سمعوا صوتي وانا بصرخ ..
قلتلها افتحي
ناس جيرانا جم يطمنو علينا فعلا لما سمعو الصوت ...ولما دخلو ..لاكان في مياه فالارض ولا باب الحمام كان مقفول مبقتش عارفه اقولهم ايه
ولما سالوني قلتلهم لما النور قطع وقعت
لقيت سارة بتقولي نور ايه ياماما الي قطع ..النور مقطعش خالص !!!
فاللحظة دي لقيت خالد ابني خارج من اوضته عادي جدا ولا كان في حاجه ..واستغرب لما لقانا متجمعين ؟ مكنش فاهم في ايه
قلتله النور قطع وانا اتكعبلت يبني فالصاله وفضلت اصرخ وانادي عليكو بس مسمعتونيش
النور مقطعش ياماما
ومر اليوم دا يا بنتي ..كان اخر يوم شفته عايش فيه ..كنت ناويه اتواصل مع حد يشوفلي معالج او شيخ لان الموضوع كبير واكبر من ان خالد ابني يكون عنده مرض نفسي..كنت بفكر فى كده فالاول دا استنتاج ممكن يجي فعقل اي حد ..بس انا سمعت بنفسي المحادثة بينه وبين الجن ..تاني يوم كان يوم الحادثة أخذ الكمانجا وقبل ما ينزل قرب مني وقالي انا نازل رايح درس الكمانجا ياماما هتوحشيني اوي اوي ..معرفتش امنعه اتخشبت مكاني ...وحضني وبعدين نزل
جالي مكالمه منه حوالي الساعه 7 المغرب
الموبايل يرن وارد مسمعش حاجه غير صوت متحشرج و اخره كلمه ماما..واللي عرفته بعد كدا ان تقريبا دا الوقت الي انتحر فيه …….بس وابني خالد مرجعش تاني ابدا...
خلصت كلامها وفضلت تعيط تعيط تعيط
مكنش قدامي غير اني احضنها و اطبطب عليها و اعيط انا كمان
مسكت موبايلها وقالتلي ومن يومها وانا كل يوم الساعه 7 تجيلي مكالمه من ابني خالد من رقمه مع ان تليفونه موجود جوه اوضته واسمع نفس الحشرجة و فالاخر ياماما ..واخر مكالمه جاتلي كلمني بصوته وقال احكي لأينور عني ياماما لازم تعرفني ...بس و اديني حكيتلك كل حاجه يابنتي
شكرتها علشان حكيتلي كل حاجة واعتذرت لها ان كنت انا سبب فالي حصل لابنها بدون علم او قصد و ودعتهم و مشيت وقررت اني لازم ارجع البيت اتكلم مع ماما ..ماما مخبيه عليا حاجات كتير اوي ولازم اعرفها
روحت البيت وانا كلي تساؤلات عن الي حصل وعن الي ماما هتحكيهولي ...
دخلت البيت ملقتش ماما بصيت عليها فالبيت كله مش لاقياها ..اتصلت عالموبايل لقيته بيرن ومحطوط ادامي عالترابيزه اومال راحت فين
فجاه سمعت باب الشقه بيتفتح ورايا بيتفتح براحه لدرجه انه بيعمل صوت تزييق حسيت زي ميكون حد واقف ورايا وبيتنفس ادورت
لقيتها ماما
عنيها بيضا تماما و فتحت بؤها عالاخر زي مكان خالد بيعمل وقالتلي بصوت غير صوتها خاااالص
..
انتي لي ..ستكونين لي لاخر الزمان ..موعد زواجنا فجر اليوم والا ستهلكين
وسيهلك كل من تحبين ......
صرخت صرخت اوي اوي كاني عمري مصرخت قبل كدا ..لحد ما ماما صرخت هي كمان بصتلي وصرخت وحضنتني جامد وقالتلي اينور حبيبتي ؟ بتصرخي ليه ؟
اقولها ايه؟ اقولها ان واضح ان في جن بيطاردني و هو الي اتسبب في قتل شاب مسكين اتقدملي قبل كدا وانتي مقتليش وخبيتي عليا لسبب مش عارفاه ..وان مروحتلوش مش عارفه ازاي هيقتل كل الي بحبهم وانتي اولهم؟
طلبت من ماما تحكيلي كل الحقيقه ..
ماما بصتلي وقالتلي ..الحكاية قديمة يا بنتي من وانتي صغيرة
انا عمري ما حكيتلك الموضوع دا عشان كنت عايزة ابعدك عن اللي حصل دا كله وتعيشي حياه سعيده لكن للاسف جه الوقت خلاص
احكيلي يا ماما من فضلك
حاضر يا بنتي ….انا وابوكي كنا عايشين في قرية من قرى الصعيد كان بيشتغل باليومية..يعني الي بيطلب عامل بالأجر بيروحله ..اي شغل في البناء في الحفر ..اي مقاولات بيحتاجوا فيها عمال بيروح يابنتي علشان يقدر يصرف علينا ..كان الحال ماشي ..الحمد لله على كل شي ..الفقر مش عيب المهم فلوسنا حلال ..لحد في يوم مقالي ان في شغل كويس اوي اوي و هيجي من وراه فلوس كويسه جدا وكتيره حتى اننا ممكن نشتري بيت في اي مدينه ثانيه ونسيب الصعيد ..قلت له ايدي علي كتفك ..قالي هروح الشغل دا حوالي 5 ايام مش هرجع..انتي خلي بالك من بنتنا ..قلتله حاضر..وراح يا بنتي
بعد خمس ايام رجع بشنطة فلوس ..مصدقتش قلتله انت سرقتها..قالي والله العظيم ابدا ودا نصيبي في الشغلانه الي عملناها ...والحقيقه يبنتي الفقر وحش ..وصعب والعيشة اللي علي الاد دي مستحيلة ….قلت حتى لو سرقها اهو هو هيشيل ذنبها هو حلف انها مش سرقه وانا مسألتوش منين ...قلت خلاص نروح نعيش ف اسكندرية ..ووافق ..قلنا نرتب امورنا في اسبوعين او تلاته ونسافر علي طول... فالوقت دا كان عندك 5 سنين
وخلال الايام دي ماشوفناش خير ابدا
كنا كل يوم الساعه 3 بليل ..ابواب البيت كلها تفضل تتفتح وتتقفل لوحدها و ابواب وادراج الدولايب تفضل تفتح وتقفل لوحدها والنور يفضل يفتح ويقفل لمده ربع ساعه ..ابوكي كان يبصلنا ويسكت ويقولنا نامو ؟ مفيش حاجه
بعد كدا الموضوع دا زاد اوي .كنا نسمع صوت راجل يصرخ في الصاله ..وخبط وخربشه فالحيطان
وفضل يزيد يوم بعد يوم لحد ما في يوم صحينا كالعاده مخضوضين من الأصوات ..لقينا كل عفش البيت طاير فالهوا وكل الكوبايات والأطباق بسم الله الرحمن الرحيم طايرة فوق وفجأة اتهبدو كلهم فالارض مره واحده واتكسرو
خدتك ف حضني وفضلت اصرخ واقول لابوكي في ايه ؟ ايه الي بيحصل ؟ قالي متقلقيش فتره وهتعدي هم غضبانين من الي عملناه و هيهدو الشيخ قاسم مأكدلي
قلتله الشيخ قاسم مين؟ ومين الي غضبانين؟ انت هببت ايه؟
ملحقش ينطق ..قام حاجه رفعته لفوووووق واتهبد علي الارض ..وفضلنا نصرخ ونعيط انا وانتي لحد ما
لحد ما ايه يا ماما؟
لحد ماظهر يبنتي
هومين ياماما؟
الجن يبنتي ..ظهر وكلمني..كان شكله يخوف ..عنيه شبه عنين القطط ..صفرا بتنور فالضلمه ..وصوته شبه فحيح الثعابين ..بس كلمني
قالي اني لازم ارجع الي جوزي سرقه والا مش هشوفك تاني .
قلتله وبنتي ذنبها ايه دي طفله صغيرة
قالي ان هم ملهمش شان الي سرق المخطوطة لازم يتعاقب هو واللي من دمه ..اي حد من دمه ونسله يتعاقب معاه
.فجأة كنتي جمبي ومسكاكي لقيتك يبنتي انتي كمان بتطيري فالهوا وروحتي نحيته
فضلت اصرخ واقوله لا سيب بنتي اينور خدني انا طيب
قالي انه مينفعش ولازم ياخدك ..مش هيأذوكي طالما هنفذ اومرهم وارجع الي اتسرق والا مش هشوفك تاني..وفجاة ازاز الشباببيك كله انفجر واتكسر
وخدك يبنتي ونزلتو تحت الارض
ازاي يعني تحت الارض ياماما؟
مش عارفه يبنتي والله هو خدك و نزل بيكي تحت الارض ومشفتكيش
وبعدين؟
ابوكي فاق وحاولت يتكلم بس مكنش قادر..ناديت عالجيران ووديناه المستشفي وحكالي الي بيحصلنا دا كله سببه ايه ؟
سببه ايه ياماما؟ ايه الشغل الي بابا راحه واتسبب ف كل دا ؟ عمل ايه؟
ابوكي هو وزمايله ………...