قصة #الممسوسة
الجزء الأول
التوقيت : الساعة الرابعة عصرا
المكان : الاسكندرية - احدى الكافيهات الهادئة ب شارع فؤاد
الأسم: ماذن
السن : 30 سنة
المهنة : كاتب
الجلوس في مكان هادئ..صوت الامطار بالخارج ورؤيتها من وراء الزجاج..رؤية المارة وهم يهرعون ليحتموا خوفا من البلل. .. طقس رائع محمل بالامطار والغيوم ..رياح عاصفة تهب من حين لآخر من مكان ما .تخيل معي.منظر البحر الهائج في هذا الطقس .. كوحش كاسر ينتظر من يلتهمه...أهالي المدن الساحلية يستطيعون فهم ما اتحدث عنه ...كل هذه الخواطر تاتني وانا امن في داخل الكافيه حيث افكر واتناول كوب من قهوتي المفضلة .. … ما اريد ان اقول سوى ان هذه هي الأجواء المفضلة لمن هم مثلي …
كتاب أدب الرعب ..فهذا الفرع من الأدب هو الاكثر غرابة واثارة ..لطالما كتبت عشرات القصص عن الرعب ..الاشباح..الجن..العفاريت ..البيوت المسكونة ..الخ ..لكن جميعها من وحي خيالي فأنا لي باع طويل في الكتابة في هذا الأدب ..لي عدة روايات قد نشرتها في السوق و أواصل الكتابة على الصفحات الالكترونية ..لي مدونة خاصة بي أقوم بنشر قصصي بها وهناك مجلة الكترونية ايضا انشر بها بعض القصص والمقالات التي تتناول مواضيع متعلقة بالرعب وهكذا كالكثير من الكتاب . ولكن هذه المرة ..هي المرة الأولى التي اصطدم بها بقصة حقيقية ليس لخيالي اي تدخل بها ..فالحقيقه انا سأقوم بدور الراوي وليس المؤلف..ساروي لكم بدقة ما قد حدث مع احد اصدقائي تدعي أينور خلال 28 يوم ..…سأرويه علي لسانها ..كما حكته لي ..امس
.فتحت الكمبيوتر النقال الخاص بي لابدا في الكتابة
…………
عمري ماكنت اتصور اني تحصل معايا حاجة زي دي ..عمري مصدقت ف حكايات الجن والعفاريت اه طبعا الجن مذكور فالقران لكن ان انا ابقي جزء من حكاية زي كدا .. استحاله لكن فعلا الي بحكيهولك من اغرب الحاجات الي ممكن لو سمعتها من حد مكنتش اصدقه ابدا ..
مش هطول في المقدمة اكتر من كدا يا ماذن ..زي منت عارف انا بشتغل في شركة ادوية ..ميديكال ريب .. الحمد لله ربنا كرمني و بدأت في شركة جديدة كبيرة بقالي 4 شهور احد شركات الادويه المعروفه عالميا وطبعا ليها فرع فى مصر. هشرحلك ببساطة شغلي عبارة عن ايه علشان تتصور معايا ...بص شغلي عبارة عن بيع و دعاية و يومي بيتلخص في زيارات للمستشفيات و الدكاتره في عيادتهم واكلمهم ف طبعا انا مش محكومة بساعات عمل محددة بأوقات محددة شغلي يعتمد على مواعيد عيادات الدكاترة اللي فاتحين فيها و المستشفيات ... فطبيعتي كل يوم بخلص شغل و اخد بريك بروح كافيه صغير جدا عبارة عن 4 ترابيزات بمساحة صغيرة في إحدى المناطق المعروفة بقعد اشرب نسكافيه واراجع حاجات ع السيستم عالاي باد بتاعي والحقيقه المكان دا بيقدم احلى نسكافيه شربته و بحس بالدفا فيه وأنه بيتي حتى انا فكرت أجره قبل كده من صاحبه ..بس هو رفض
..
..المهم ويمر الوقت و بفضل في الكافيه واتغدى فيه و بعد كدا اكمل شغل ..في يوم زي كل يوم خلصت بس اتاخرت شوية وقررت اروح الكافية برده كانت الساعة حوالي 6 المغرب في شهر يناير عز الشتا والبرد والمطر طبعا مفيش داعي نحكي عن جو اسكندرية في الشتا عامل ازاي . الدنيا فاضيه و العربيات ماشيه بسرعه والناس الي ماشيه علي رجليها بتجري من المطر وانا بس الي ماشيه مستمتعه ..الكافية في شارع جانبي كدا متفرع من الشارع الرئيسي ..اه انا كل يوم بمشي فيه بس اول مره احس برهبه كده جوايا وتوتر معرفش ليه حتى حسيت ان في كهرباء في جسمي كله و برد غريب ..قلت دا اكيد طبعا الشتا يبدو اني اتبليت مثلا مع اني ماسكه الشمسيه بس اكيد مشيت شويه حسيت قلبي اتقبض جدا ..مش فاهمه في ايه ؟ بس كملت عادي لحد موصلت ادام الكافيه بعدين فجاه لقيت شاب قدامي بيقولي : حضرتك هتعدي هنا ؟
طبعا نطيت من مكاني من الخضه لقيته اعتذرلي وقال
انا اسف مش قصدى اخضك بس اناا اول مره اجي وانا شبه تايه انا من مدينة تانية و تعبت من المشي ولقيت الكافيه دا بس دخلت حطيت شنطتي و ملقتش حد خالص ف لما لقيتك متجهة عليه قلت اسالك
لا مفيش مشكله اه هعد هنا انا بعد كل يوم و مكان كويس والناس متعاونه جدا هو بس احمد صاحب المكان تلاقيه راح يشتري حاجه عادي اقعد وهتلاقيه جاي
خلاص هقعد وعلي ضمانتك
..لقيته قام داخل وواخد شنطته الي بيقول عليها ..شنطه آلة موسيقية شنطة كمانجا اخذها وحطها علي حجره وفتحها وطلع الكمانجا وبدأ يعزف
استغربت جدا ماله دا؟
مش لسه كان تايه هو يعني كان مستنيني عشان يعد يعزف ولا ايه بيخليه يعزف اساسا انا بحب الكامانجا اوي وبلعب عليها بس هو ميعرفنيش ولا يعرف اهتماماتي دا وعمري ما شوفته قبل كدا ما علينا..مليش دعوه ؟ روحت اعدت علي الترابيزة الي بعد فيها كل يوم وقلت خليني ف حالي؟
الحقيقه كان بيعزف بشكل جميل جدا مقطوعه غربيه حزينه طول ماكان بيعزف كان نفسي يستمر للابد مكنتش عايزاه يبطل عزف ابدا معزوفة قمة فالروعة مفتكرش اني سمعتها قبل كدا كانها مش من العالم بتاعنا
..الشاب فالحقيقة كان شكله وسيم بس طبعا انا مليش دعوة ... طلعت الايباد واعدت ابص فيه وهو عمال يعزف يعزف مبطلش ..فات نص ساعه وبرده مبطلش عزف واحمد صاحب الكافيه مرجعش ودي حاجه !
غريبه جدا ازاي يسيب الكافيه بتاعه كل دا
الاغرب من كدا ان حرفيا مفيش انسان ماشي فالشارع مع ان الساعه لسه 6 ونص المغرب و الشتا بيزيد مبيبطلش ..عادي انا مبسوطه والحمد لله بس برده الشاب د مبطلش عزف.. هو موهوب جدا الصراحة وانا مستمتعة جدا بالمعزوفة بس الوضع ابتدى يبقى مريب ..مرت نص ساعه كمان و انا ابتديت اصدع واتوتر بشكل غريب ..قررت اقوم فقمت وخدت حاجاتي وقايمه .. لقيته بيقولي
استني انتي رايحه فين مش هتسمعى باقي المقطوعة؟
قلتله افندم؟
انا بعزفلك
بتعزفلي انا؟
اه هو في حد فالكافبه غيرك؟
والله متشكره جدا جدا لكن انا مضطره امشي
لقيته اتعصب جدا وقالي بصوت تخين كدا مش شبه صوته ابدا لي كان بيتكلم بيه من شويه
يعني ايه تمشي انتي فاكره اني هسيبك انا اما صدقت اتكلمت معاكي وجهها لوجه ..انتي ليا انا انتي مش عارفه انا بعمل ايه علشانك وخاصمت مين وعاديت مين وايه التنازلات الي عملتها والجرائم الي ارتكبتها ومحكوم عليه ب ايه ! انتي لي الي آخر الزمان ولا إرادة لك في الأمر ولا عصيان منك سيكون مقبول …. والآن لنقوم بتقديم القربان الاول …
وقام قاطع وتر القوس بتاع الكمانجا الي في ايده بقوه غريبه
وقام دابح نفسه......