#المرايا_الملعونة
الجزء التاني
بقلم محمد عباس
جرينا كلنا نشوف ايه اللى حصل..
لقينا الباب مقفول.. البنات اتخضوا و فضلوا يندهوا على بيتر وانا وسامى بنحاول نكسر الباب..
انا: بيتر.. انت سامعنى.. لو سامعنى حاول تفتح الباب..
سامى: بيتر.. انت كويس.. اي اللى بيحصل عندك..
وأثناء لحظات الخوف وجو الرعب اللى كنا فيه دا لقينا الباب بيتفتح لوحده.. وبيتر طالع فى حالة هيستيريا ضحك وعمال يخبط على رجله من كتر الضحك ويقولنا: اتخضيتوا صح..
انا وسامى نزلنا فوقه ضرب والبنات فضلوا يشتموه..
ماريا: انت بتستهبل يا بيتر احنا موتنا من الرعب افتكرنا حصلك حاجه.. وبعدين ايه صوت الخبط اللى حصل عندك دا..
بيتر: اهدوا ياجماعة مفيش حاجة.. انا كنت بشيل الصندوق وعديت على المرايه الغريبة ال جوه دى فحسيت انى شوفت فيها حاجه غريبه بتتحرك فقربت منها اشوف فيها ايه فشوفت واحد شكله مخيف اتحرك جواها عشان كدا صرخت والصندوق وقع من ايدي بس لما رجعت بصيت تانى ملقيتش حاجه فقولت اكيد كان بيتهيألى عشان منمتش كويس.. وبعدها سمعت صوتكم طالعين جرى على السلم فبصراحه استغليت الموقف وقولت اخضكم.. فوقفت ورا الباب وحطيت رجلى على الحيطه عشان تفتكروا ان الباب اتقفل عليا وحقيقي نفسي تشوفوا شكلكم دلوقتى عامل ازاى.. زى اللى شوفتوا عفريت..
واستمر كلامه بضحك وكمل.. يلا يلا يا هبل انتوا هتصدقوا ان الشاليه مسكون بجد ولا ايه!! اكيد حد مطلع الكلام دا عليه عشان حاطط عنيه عليه وعاوز يشتريه بسعر رخيص ولا حاجه.. المهم دلوقتى فوقوا كدا ويلا ننزل نفتح الصندوق دا ونشوف جواه ايه ليكون محبوس فيه شيطان ولا جنى يطلع يخضكم وفضل يضحك و اخد الصندوق ونزل..
هما فضلوا يهزروا ويضحكوا ونزلوا وراه وانا كل اللى شغل تفكيري الراجل اللى هو قال انه شافه.. هل دا نفس الراجل اللى انا شوفته..!! معقول نكون احنا الاتنين اتهيألنا نفس الشخص.. مستحيل.. اكيد فيه حاجه غلط.. انا هنزل اشوف ايه حكايه الصندوق دا ويمكن يطلع فيه حاجه تعرفنا حكاية الاوضه دى والمرايتين المرعبين دول والشخص المخيف دا..
ويمكن بردو تكون مجرد لعبة عاديه وانا اللى مكبر الموضوع على الفاضى ما انا بردو مامريتش بشويه فى الليله دى..
نزلت وقعدنا فى الصالون.. حطوا الصندوق على الارض.. كان زى علبة الشطرنج فعلا زى مابيتر قال بس كان موجود عليه راس الحية اللى موجوده على كل المرايات اللى ف البيت وحتى نفس الكتابات الغريبة.. الصندوق ملوش اى مكان يتفتح منه ولا حتى ليه مفتاح بس كان عليه رسومات غريبه ومكان كدا قد بصمة الصوباع بالظبط..
رنا كان عندها شغف شويه بالآثار واللغات الفرعونيه القديمة.. قربت من الصندوق وفضلت تشوف الرسومات الموجوده عليه وتجمع كلمات تقدر توضحلنا هنفتحه ازاى.. شويه ولقيناها سكتت وفضلت تبصلنا ب قلق.. ف قولتلها: فيه ايه يا رنا..!! ايه المكتوب على الصندوق!!
فقالت بتردد: دم..
رد سامى: دم!! دم ايه!!
قالت: الصندوق مش هيتفتح غير بدم عذراء.. يعنى لازم بنت تعور ايديها وتحط كام نقطة دم فى المكان اللى زى البصمة دا عشان يتفتح بس بشرط تكون عذراء..
أمل: ايه الهبل دا ياجماعه لا طبعا انا مش مرتاحه للبتاع ده وبعدين انا شوفت كتير حاجات زى دى فى افلام الرعب وبتبقا نتيجتها مش كويسه خالص خاصة انها بتدخل فيما يخص العالم الآخر وتحضير الجن والحاجات دى وبصراحه انا بخاف.. لا مش هشارك معاكم..
وقامت رجعت ورا وقعدت على الكنبة وكانت خايفه وقلقانه.. +
بيتر: ايه يا امل الجنان اللى بتقوليه دا.. انتى بتصدقى الكلام الفارغ دا.. وبعدين احنا جاين عشان نغير جو ونعمل اى حاجه جديده بدل روتين الملل اللى احنا عايشين فيه كل يوم وجت الفرصه اهى.. تقومى انتى تقوليلي جن وعالم آخر هو انتى اتعديتي من حسن ولا ايه.. على العموم لو مش هتفتحوا الصندوق انا هفتحه ولو حتى هعمل بدمى انا المهم نشوف ايه اللى جواه وهثبتلكم ان كل اللى بتقولوه دا هبل وملوش اى اساس..
قاطعته رنا: لا يا بيتر.. محطوط شرط ان الصندوق مش هيفتح غير بدم بنت عذراء وانت مش بنت ولو حطيت دمك منضمنش ايه اللى ممكن يحصل وخاصة ان الصندوق غريب وانا اول مره اشوف حاجه بالغرابه دى فبلاش نغامر..
بيتر: انتوا بتصدقوا الهبل دا ازاى.. كلنا عارفين ان الافلام ال بنسمعها كلها مش حقيقة ومجرد تشويق واثاره مش اكتر.. وبعدين بصراحه لو محدش فتح الصندوق دا انا هفتحه واللى يحصل يحصل لأن انا معتش قادر اصبر عشان اشوف ايه اللى جواه..
ماريا: خلاص يا جماعه دى مجرد لعبة يعنى وبعدين ممكن يكون دا كلو من ضمن اللعبه ولازم يكون فيها حتة غرابة كدا عشان تشدنا.. خلاص خلاص انا هحط الدم.. دا مجرد نقطة دم بسيطه يعنى نعتبرها تحليل بس هاتولى دبوس ولا حاجه حادة عشان اعمل بيها..
انا بصراحه مكنتش عارف انا احساسي ايه من كل اللى بيحصل دا.. كلام امل دخل دماغى وف نفس الوقت بردو عاوز اعرف ايه اللى فى الصندوق.. لكن ملقتنيش بعمل اى حاجه غير انى طلعت مطوة من جيبي و اديتها ل ماريا وقولتلها خودى اعملى ب دى..
سامى: اووبااا شايل مطوة ف جيبك يابو على لا لا دا انت اتغيرت خالص..
بيتر: ايوا بقا كدا يابو على انا طول عمرى بقول انت هيطلع منك حاجه كويسه..
انا: يا جدعان والله انا حاطتها ف جيبي ع طول بس مبطلعهاش.. الواحد بردو ميضمنش ايه اللى ممكن يحصل معاه فى الايام اللى احنا فيها دى..
ماريا اخدت المطوه بس معرفتش تفتحها.. بيتر اخدها منها وفتحها و اداهالها.. هى اخدتها وعورت بيها دراعها بس كانت تعويره بسيطه.. المهم انها جابت دم كفاية عشان تتحط ف البصمه دى..
ماريا اول ما حطت الدم ف مكان البصمة دا.. النور فى الشاليه كله بدأ ينور ويطفى بشكل غريب كأننا فى فيلم رعب أجنبى بس بعد فترة بسيطة النور رجع اتظبط..
وبعدها بيتر قالنا : ايه يا جدعان انتوا هتصدقوا ولا ايه دا عادى يعنى ممكن حصل حاجه ف الكهربا.. يلا نشوف ايه اللى مستنينا جوا الصندوق الغامض..
فتح الصندوق وكان عباره عن رسومات وكتابات هيروغليفيه وفيه ورقه متطبقة ومحطوطه جواه ومعاه قطعه حجر صغيرة ومدببه من قدام..
رنا فتحت الورقه.. بس الغريب انها كانت مكتوبه صريحة باللغة العربية..
وكان المكتوب كالتالى..
"مرحبا بك معنا فى عالم " اللاعودة " ، لقد تم إختيارك من قبل الملوك الأربعة لإستكمال هذه الجلسة ، ويجب عليك قراءة الشروط وتطبيقها جيدا بدون أخطاء ، لكى لا تحل عليك لعنة الصندوق ويأتوا إليك ليأخذوك معهم إلى عالمهم.. عالم " الجحيم الأبدي ".. هناك حيث لا مكان إلا للخوف حد الجنون "
شروط اكمال الجلسة..
_ يجب أن تتم الجلسه على الكراسي حول منضدة الجلوس.
_ يجب ان توضع المرآتين مباشرة أمام بعضهما البعض على جانبى المجلس.
_يجب أن يكتب كل شخص من المختارين إسمه فى المكان الفارغ خلف الورقة بشرط أن تتم الكتابة بواسطة الدم "كلا بدمه".
_يجب بدأ الجلسة فى تمام الساعة الواحدة والنصف بعد منتصف الليل ولا تتم قبل ذلك.
شرح الجلسة..
_مع إعلان دق الساعة تمام الواحدة والنصف يجب على جميع الأشخاص وضع أيديهم فوق بعضها على حجر الإختيار الذى يوجد فى الصندوق ويبدأوا بتحريكه فى اتجاه واحد من اليمين الى اليسار مع ترديد عبارة..
" واحد اثنان ثلاثة اربعة اختاروا يا ملوكنا الأربعة.. من سيكون حليفكم هذه الليلة "
وتردد العبارة ثلاث مرات متتالية ثم ترفعون ايديكم من على الحجر وتنتظروا إلى أى إتجاه سيذهب.
_الشخص الذى تختاره الملوك يجب أن يجلس على كرسي ولى العهد ويجلس حوله من معه ويوضع الصندوق على المكان المحدد أمام المختارين.
_يأخذ كل شخص دوره بالترتيب بداية من يسار المختار ، حيث يقوم الشخص بوضع يده على الحجر ويحركه من اليمين الى اليسار مع تريد عبارة..
" سيلڨليون سيلڨليون نحن لإحضارك موجودون اختر لنا من سيكون ".
_ويأخذ كل شخص دوره بالترتيب حتى نصل إلى المختار فيقوم بوضع يده عليها ويغمض عينه دون تحريك يده حتى يختار له كيف تكون النهاية.
سيأخذ الحجر دوره فى تكوين كلمة ويجب عليكم قراءتها قبل مرور خمس ثوان وبعدها سيتحرك الحجر مره أخرى حتى يختار الشخص المطلوب للقيام بهذا العمل.
احذروا...
يجب تطبيق القواعد كاملة بدون أى اخطاء وعند البدء فى الجلسة لا يجب التراجع أبدا وإلا ستكون العواقب وخيمة..
بعد ما رنا خلصت قراءة احنا فضلنا مذهولين شويه من اللى سمعناه وفضلنا نبص لبعض مش مستوعبين الكلام اللى اتقال..
قطع لحظة الصمت دى سامى بكلامه: معلش بس ايه دا!! وجلسة ايه!! وملوك مين!! انا مش فاهم حاجه.. يا جماعة بصراحه انا مش مرتاح للحوار دا..
رد بيتر: ايه ياعم سامي انت هتعمل زيهم انت كمان.. يعنى بالعقل كدا لو الكلام دا صح هيتكتب بالعربى الصريح كدا.. اكيد دى لعبة حد عملها غرضه منها يخوفنا وبصراحه انا اللعبه دخلت دماغى وهكمل فيها.. ها مين معايا..!!
رديت عليه: يا بيتر اصبر بس مش عاوزين تهور.. احنا اصلا مش ضامنين البتاعه دى ومش عارفين فعلا هى لعبة ولا حاجه ممكن يكون ليها علاقة بتحضير الجن والعالم الآخر..
قاطعتنا ماريا: بصراحة يا جماعه على قد ماكنت خايفة فى البداية بس دلوقتى حسيت انى عندى شغف اكبر انى اكمل الشروط واشوف اخر اللعبة دى اى..
ردت أمل: انتوا بردو مصرين على تكملة اللعبة اللى احنا لسه مش متأكدين اصلا اذا كانت لعبة ولا لا.. انتوا مش هترتاحوا غير لما حد يحصله حاجه وبصراحه انا مش هستحمل اشوف اللى هيحصل.. انا هروح اوضتى وبعد ماتخلصوا عرفونى اللى هيحصل..
دخلت أمل اوضتها واحنا فضلنا ساكتين شوية وبعدها بيتر قالنا: ها هتكملوا معايا ولا هتبقوا عيال!!
ف سامى قاله: يلا ياعم يعنى هيحصل ايه هنموت.. يلا نكمل اما نشوف اخرتها ايه فى ليلتكم اللى مش فايته دى..
شيلنا اللعبه ورفعناها على السفرة وبدأنا نقرأ الكلام كويس عشان نشوف هنعمل ايه وبدأت رنا تقرا الكلام تانى.. كانت الساعه حوالى 1.20 ومكتوب فى الشروط مينفعش نعمل اى حاجه قبل الساعه 1.30 فكملت رنا قراءة وبدأنا نرتب قعدتنا.. اول حاجه كان مكتوب ان فيه مرايتين لازم يتحطوا قصاد بعض على جنب المكان اللى هنقعد فيه وطبعا جه فى بالى ان المرايتين دول اكيد هما اللى فوق فى الاوضه.. طلعت انا وسامى جيبناهم ونزلنا وعلقناهم على الحيطه وكان محطوط فعلا مسمارين على الحيطه قصاد بعض زى ما اللعبة بتقول.. علقنا كل واحده عليهم.. وبعدها كل واحد فينا اخد المطوة اللى كانت معايا وعور ايده بيها.. وجيبنا عود كبريت من المطبخ وكل شخص كتب اسمه بنفسه.. واول ما الساعه دقت 1.30 كلنا قعدنا حوالين الصندوق حطينا ايدنا على الحجر ورددنا
" واحد اتنين تلاته اربعة.. اختاروا يا ملوكنا الأربعة من سيكون حليفكم هذه الليلة " 3 مرات وبعدها شيلنا ايدينا واستنينا اللى هيحصل.. وفعلا بعد ثوانى معدوده النور بدأ يطفا وينور لحد ما ثبت.. وفجأة اتحرك الحجر نحية ماريا.. بعد لحظات الذهول والصدمه اللى كنا فيها.. ماريا قعدت على الكرسي المختلف وجنبها سامى ورنا من الشمال.. وبيتر وانا من اليمين.. وحطينا الصندوق قدامنا و اخد سامى اول دور عشان هو اللى كان على شمال ماريا.. وبدأ يحرك الحجر مع ترديد عبارة "سيلڨليون سيلڨليون نحن لإحضارك موجودون اختر لنا من سيكون".. وبعده رنا وبعدها انا وبعدى بيتر لحد ما وصل الدور لماريا..
حطت ماريا ايديها على الحجر وغمضت عينيها.. وبعد ثوانى بدأ الحجر يتحرك نحية حروف بدأت رنا تجمعها وكونت منها كلمة " اختناق".. وعدا 5 ثوانى بالظبط وفجأة اتجه طرف الحجر نحيتي.. بعدها المكان بدأ يترج زى مايكون قام زلزال والسفرة بدأت تتحرك والمرايات بدأ يخرج منها نور ابيض واتسلط على ماريا وعليا.. واحنا قاعدين مكانا مش قادرين نتحرك وف خلال لحظات كل حاجه بدأت ترجع لطبيعتها والهزة الارضية اختفت.. انا قومت وقولتلهم: لا كدا فيه حاجه مش طبيعية.. انا طالع انام ومش هكمل التفاهه دى..
قاطعتنى رنا: استنا يا حسن مينفعش تسيبنا.. من شروط اللعبة اننا لازم نكمل فيها للآخر عشان محدش يتأذى..
قولتلها: انا اسف يا رنا بس انا مش هكمل فى المهزلة دى.. تصبحوا على خير..
وسيبتهم وطلعت اوضتى وانا رامى كل حاجه ورا ضهرى وبصراحه مكنتش مستوعب اطلاقا اللى بيحصل وبعدها اترميت على السرير وحاولت اشغل دماغى بأى حاجه تانية لحد مانمت..
صحيت على برد شديد ونور الشمس داخل فى عيني كإنى نايم فى الأوضه من غير سقف وحسيت بحاجه خشنه تحتى زى مايكون.. رمل.. فتحت عيني في حالة خضة وصحيت.. صحيت لقيتنى على الرمل فعلا وقميصى متقطع.. وشكلى متبهدل خالص.. انا كنت نايم على الرمل.. مكنتش فاهم حاجه.. ازاى وصلت لهنا وايه اللى حصل.. حرفيا كانت دماغى واقفة ومش قادر افكر ف اى حاجة..
قومت وفضلت ابص حواليا.. شوفت الشاليه بتاعنا من بعيد.. اخدت الطريق جرى لحد ما وصلت.. واول مادخلت لقيتهم كلهم جوا قاعدين على الارض وبيعيطوا.. وماريا نايمه على الارض قدامهم ومغطينها.. قبل ما اتكلم و اقول اى حاجه لقيت بيتر جاى جرى عليا وضربنى فى وشى وبيقولى: انت ليك عين ترجع تانى.. ليك عين ترجع بعد ما قتلتها..
ومسك فيا ونزل ضرب وانا كنت ف حالة من اللاوعى ومش فاهم ايه اللى بيحصل.. لحد ما سامى بعده عنى وقاله: استنا يا بيتر اما نشوف هو رجع ليه.. وبصلى وقالى: عاوز ايه يا حسن.. عاوز تقتلنا زى ما قتلت ماريا.. انت صدقت ان اللعبة بجد ولا ايه..
قاطعته: لعبة ايه!! انا مش فاهم حاجه.. والله ماعملت حاجه ولا قتلت حد انا سيبتكم امبارح ودخلت نمت.. صحيت لقيتنى مرمى على الرمل بره وزى مانتوا شايفين قميصي مقطوع ومعرفش ايه اللى بيحصل..
ردت امل: انا قولتلكم فيه حاجه غلط.. اللعبة دى مش طبيعية وهى السبب ف اللى احنا فيه دا.. يا حسن انا صحيت امبارح الفجر كنت رايحه اشرب وشوفتك وانت طالع من اوضتك وكان شكلك غريب وكانت عنيك كلها شر وداخل اوضه ماريا انا روحت وراك عشان بصراحه كنت خايفه وحاسه بحاجه غلط ، بصيت وشوفتك مسكت المخدة وحطيتها على وشها وكنت بتخنقها حتى هى فضلت تتحرك وتصوت بس صوتها مكانش طالع من المخدة وشدتك من قميصك.. وانا لما شوفت اللى حصل صرخت ودخلت ابعدك عنها وندهت للشباب.. وجه سامى شدك وخبطك فى الحيطة عشان يبعدك عنها بس.. بس للأسف ماريا كانت ماتت..
وبعدها انت نزلت جرى وطلعت بره الشاليه واحنا من ساعتها قاعدين مش عارفين نعمل حاجة..
رديت عليها: انا.. انا عملت كل دا.. والله ماحصل.. لا مستحيل.. انتوا لازم تصدقونى.. احنا لازم نبلغ البوليس وناخد هدومنا ونمشى من المكان دا حالا..
بيتر وقف وكان باين على وشه ملامح الخيبة والغضب وبصلنا وقال: محدش هيتحرك من هنا.. ماريا ماتت ومش هستنا لحد ما الاقى نفسي زيها.. يلا يا سامى تعالا معايا..
سامي: على فين!!
بيتر: هندفن ماريا فى الجنينه اللى ورا وهنيجى نكمل اللعبة دى.. ومش هنسيبها لحد مانشوف اخرتها ايه...