قصة التميمة كامله بقلم محمد عباس جميع الفصول مكتملة للاخير الخاتمه

قصة #التميمة

الجزء الأول 

بقلم محمد عباس 

اسمي فريده...، عندي ٢٧سنه ..، طول عمري نفسي احس اني 

زيي زي اي بنت في سني ...،كتير قوي ببص في المرايه 

وبلاقي نفسي كبرت جدا لدرجة اني بشوف وشي مكرمش 

ومليان  تجاعيد ...،حاولت بكل الطرق اني اشوف دروس على 

اليوتيوب عن التفائل والطاقه الإيجابيه وتحليل الشخصيه 

وعلوم النفس بكل انواعها ودراستها ولكن...ملقتش اي حل 

للمشكلة الكبيره اللي بعيشها ...وهيا الوحده

طبيعي جدا هتسألوا عن اهلي 

اهلك فين ..؟!

طب اخواتك..؟!

طيب اصحابك حتى على الأقل .؟!

الحقيقه اني معنديش غير فريال...، فريال دي صديقة عمري والأخت الوحيده اللي عرفتها في حياتي ...

بابا وماما ماتوا في حادثه وانا صغيره وكل الناس اللي كانوا يعرفونا قالوا إنها حادثه غير طبيعيه ..،

يمكن عشان نزولهم في وقت متأخر بالليل وهما بيتخانقوا ورايحين عشان يكملوا خناق في بيتنا لوحدهم لأننا كنا عند ستي ...، وسابوني معاها كنت صغيره وقتها كان عندي ٨سنين...بس من وقتها لحد دلوقتي بابا وماما ماظهروش ...!!

محدش شافهم خااص ..!!

محدش سمع صوتهم من جيراننا بيتخانقوا في الشقه اساسا..!!

محدش شاف عربيتهم حتى ...!!

ده لو كانوا عملوا حادثه كنا سمعنا عنهم اي خبر او ظهروا في اي مكان.!!

كل اللي فكراه من كلام بابا مع ماما قبل ماينزلوا هو صرخته في وش ماما وهو بيقولها...

انتي السبب..!!

انتي اللي عملتي كل ده !!

طمعك وجشعك هو اللي وصلنا للي بقينا فيه ده !!

وقتها بس حسيت ان ابويا اتظلم وكل اللي انا عايشه فيه لحد دلوقتي كان بسبب امي ...

جايز اكون ظالمه او مفتريه ..، بس..حطوا نفسكوا مكاني لو كنتوا سمعتوا الجملتين دول زي ماانتوا سمعتوهم كده كنتوا هتقولوا ايه وقتها؟!

عارفه انكم دلوقتي بتقولوا عليا مريضه...، بس انا اتظلمت كتير قوي وعشت حياه مش بتاعتي لأني اكتشفت من ستي قبل ماتموت ان بابا وماما مش هما ابويا وامي الحقيقين ...!!

وانهم اتبنوني من ملجأ لأن امي ماكانتش بتخلف وكان لازم يكون عندهم بنت عشان يقدروا يكملوا حياتهم ويستفيدوا بالتميمة... او اللي انا بسميها تميمة الشر ...!!

خليني احكيكلوا كل لحظة رعب عيشتها ..، خليني اقولكوا قد ايه انا اتظلمت واعرفكوا ان اوقات بيبقى الجشع والطمع سبب رئيسي في ضياع ناس ونهاية سوده لناس...

صحيت زي كل يوم عشان انزل ادور على شغل لأني بقالي ٣سنين من يوم وفاة ستي وانا مش لاقيه شغل انا بنت جميله حسب كلام اللي حواليا وعلى مستوى عالي من الثقافه والحمدلله..،ملتزمه الى حد كبير ويمكن ده سبب رئيسي في اني مش لاقيه شغل او مش عارفه اشتغل لحد دلوقتي 

في كتير بنات بنص مؤهلاتي بيشتغلوا لمجرد ان لبسهم وشكلهم غير ماانا اتربيت في بيت ستي خالص...

جايز ستي كانت غلط وجاييز برضو كانت صح ...

بس ...على اي حال انا دلوقتي بعاني جدا بسبب احترامي لنفسي ولربنا خصوصا لما تلاقي المجتمع في مشاكل اخلاقيه كتير وكلهم عايزينك تبقى شبههم...

شربت الدوا بتاعي وهتستغربوا لما اقولكوا ان الدوا ده عبارة عن كباية شاي بلبن شاي تقيل مع كام بقسماطه حلوين كده لزوم الفطار برضو مش هننزل بطننا فاضيه كده يعني طلعت الموبايل عشان اكلم فريال واقابلها عشان نروح الإنترڤيو سوا لأننا كنا مقدمين في نفس الشركة ويااارب ربنا يكرمنا ونشتغل فيها مع بعض لأننا تقريبا واحد...

ايوه يابنتي انتي فين يازفته..؟

حبيبة قلبي ...وحشتيني يابت انتي...

بطلي بكش وشغل حلق حوش بتاعك ده يابت انتي بتاخديني بالصوت عشان مااهزقكيش لأن حضرتك اكيد لسه مانزلتيش مش كده ياروحي..؟

يخربيتك ...دايما قفشاني كده وعارفه الاعيبي..، ياحبيبتي وحياتك انا نازله اهو وهقابلك زي مااتفقنا قدام الشركة بالظبط...

ماشي ياستي لما نشوف انا نازله اهو...

قفلت السكه وفتحت الباب عشان انزل ..بيت ستي عباره عن عماره صغيره متهالكه ٣ادوار احنا عايشين في الدور التاني ...، والدور الأول عايشه فيه الست ذكية وهيا طيبه جدا وبتحبنا من زمان وكانت تعرف امي وابويا وكانت بتخدم ستي اوقات ماكنتش ببقى موجوده فيها ..،جوزها متوفي من زمان برضو ...، اما الشقه اللي فوقينا فا دي مقفوله بقالها اكتر من ٢٠سنه ودي كان بابا وماما بيجوا يقعدوا فيها لما كانوا بيجوا لستي وجدي الله يرحمهم...

انا متعوده اصبح على الست ذكية وانا نازله كل يوم بس النهارده في حاجه غريبه جدا حصلت معايا...!!

وانا نازله على السلم في درجة في اول دور قدام الست ذكية مكسوره من السلم انا متعوده اني اتكعبل فيها كل يوم وانا نازله بس النهارده لقيت قط كبير شوية اسود واقف عندها وبيبرقلي كأنه بيحذرني اني اخد بالي ومااتكعبلش فيها ولأني مابخافش من القطط قربت منه ومديت ايدي عشان اطبطب عليه...

فريده...!!!!

اتنفضطت مكاني كأني اتكهربت حسيت للحظه ان القط هو اللي ندهلي ومش هبالغ لو قولت اني حسيت ان قلبي اتحرك لما سمعت اسمي ...!!

بس لما بصيت لقيت الست ذكية واقفه وبتضحكلي حطيت ايدي على قلبي وانا بقولها...حرام عليكي ياعمتو كنتي هتجبيلي سكته قلبيه...!!!

ضحكت بصوت عالي وقالتلي ...انتي اتخضيتي من ايه يا مجنونه انتي طب منا كل يوم بندهلك كده وانتي نازله...!!

ايوه...بس انا كنت بحاول الاعب الق....!!

ببص على مكان القط مالقتهوش...!!

برقت شوية وبعدين رديت عليها ...خلاص ياعمتو ماتاخديش في بالك صباحك فل...

ماتستغربوش اني بقولها عمتو انا اللي زيي بيعامل الناس كلها كأنهم اهله وناسه عشان ...هو محروم من الأهل...

طلعت موبايلي واتصلت بفريال...،

انا وصلت يابنتي انتي فين ..؟!

ردت عليا وهيا بتنهج ..انا خلاص داخله عليكي اهو دقيقه واحده وهتشوفيني قدامك...

طبعا الدقيقه دي بتوقيت فريال غير الدقيقه الطبيعيه بتاعتنا...لما تيجي هقتلها...هقتلها...

طلعنا سوا الشركة وسجلنا ابليكيشن التوظيف وقعدنا واستنينا دورنا...

فريال دخلت الأول وانا كنت بعديها على طول بس ملحقتش اعرف منها سألها في ايه بس مش مهم انا اتعودت وجاتلي مناعه خلاص ...

اممممم...فريده عبدالله فريد...

اسمك جميل ومتناغم مع بعضه كده يافريده...

كان الشاب اللي بيعمل معايا الأنترڤيو بيحاول يفتح سكة للكلام بس بطريقه انا بعتبرها غير اخلاقيه حتى لو ده عادي عند بنات كتير...

لو سمحت ياافندم ياريت نتكلم في حدود الوظيفه اللي انا متقدمالها...

بصلي بااستغراب جدا...وكان باين عليه التوتر من ردي الغير متوقع والفظ طبعا...

احم...انا...انا اسف ياانسه...انا كنت بحاول بس افك التنشنه اللي باينه على وشك من ساعة مادخلتي...انا اسف مره تانيه...

لا...ولايهمك حضرتك تقدر تسألني عن اي حاجه تحبها...

فجأه...

لقيت وشه في وشي وبيصرخ جامد فيا وعروقه كلها سودا ونافره جدا في وشه  وبيقولي بصوت مرعب...التميمة يافريده...التميمة يافريده...

للحظه قلبي وقف فعلا وكأني مش عارفه انا مين ولاحتى انا فين وبعمل ايه...!!

انسه فريده...انسه فريده..

بصيت للشاب اللي كان بيحاول يعرف انا سرحت في ايه ومبرقه جامد قوي كده ليه وتقريبا كان بقالوا مده بيندهلي...

انااا...انا اسفه جدا...اسفه...كنت بتكلم وانا بنهج كأني كنت طالعه سلم طويل جدا وانا بجري...

انا مش عارفه انا سىرحت في ايه ياافندم ..متأسفه جدا

لا..ولايهمك كلنا كده بنسرح...وابتسم وانا كمان ابتسمت يمكن اقدر اغير فكرته عني شوية..

طيب حضرتك دارسه اداب انجليش وواخده كورس كويسه جدا وقويه تؤهلك انك تشتغلي في شركات كبيره بمرتب احسن من هنا بكتير...ممكن اعرف ايه السبب في انك تقدمي في شغل اقل من مستواكي كده لو مش هيضايقك...

والله انا حضرتك مالقتش مكان تاني يناسبني ورفضته لمجرد الرفض انا بس اللي اسلوبي غريب شوية والناس بتحسه اغلب الأحيان رخم...طبيعي يعني الناس بتحب اللي بيجامل وبيتدلع وبينافق وانا مش كده عشان الأسباب دي مش لاقيه شغل في اي مكان.

اااه..قولتيلي بقى عشان كده ردك على هزاري معاكي كان غلس شوية .؟

حطيت راسي في الأرض وابتسمت بخجل وقولت ..اه تقريبا كده...

ابتسم وقاللي عايزه الصراحه ..انا اول مره اشوف بنت في الأيام دي بشخصيتك واسلوبك ده...، عموما انا مش عايزك تقلقي ان شاء الله هعمل كل اللي اقدر عليه عشان تبقي معانا هنا في الشركة...

بجد...بصتله بفرح هو استغرب منه اساسا جدا بس ده طبيعي جدا من واحده بقالها ٣سنين بتدور على شغل ومش لاقيه ...، شكرا ليك جدا ياافندم انا مش عارفه اشكر حضرتك ازاي بجد...انا فعلا محتاجه الشغل جدا ..

ابتسملي وقاللي خلاص ان شاء الله استني تليفون مننا قريب ...

شكرا لحضرتك جدا ..

شكرا ليكي ياانسه فريده شرفتينا...

الشرف ليا ياافندم..

وانا بفتح الباب سمعت صوته من ورايا بيقول..

حاتم...اسمي حاتم

بصتله وابتسمت مع اني شوفت في عينه نظره غريبه جدا مافهمتهاش ...اتشرفت بحضرتك يامستر حاتم ..طلعت بره لقيت فريال مستنياني وبتبتسم وبتقولي...هاه الشاب اللي جوه ايه رأيك فيه ؟!

رأيي فيه... ازاي يعني يافريال..؟!!

متبقيش رخمه بقى ده احنا اخوات يابنتي لو مش هتحكيلي انا هتقولي لمين يعني ...

اووف ...يلا يامجنونه انتي باينك اتلحستي باين ولاايه ...

نزلنا وطلبنا الأسانسير ودخلنا فيه كنا لوحدنا وفريال بتكلمني وانا مش مركزه معاها في اي حاجه غير اني كل اللي بفكر فيه الكلمتين دول...التميمة يافريده...

معرفش ليه عيني راحت للمرايه اللي انا فيها وتخيلت للحظه كده اني انا ببص لنفسي وببتسم ابتسامه شيطانيه غير طبيعيه حتى اني برقت جامد جدا وقربت وشي من المرايه بس الغريب...اني فضلت ثابته وببص بنفس النظره الحاده الشيطانيه دي هو مش المفروض...خيالي...يتحرك معايا...!!!

فريده... فريده!!!

الله...!! 

انتي مالك يابنتي في ايه سرحتي في ايه؟!

ممم..ش عارفه يافريال ...مش عارفه انا من الصبح مش طبيعيه ومش فاهمه ايه اللي بيحصلي ؟!!

بدات تطبطب عليا وتقولي..معلش ياحبيبتي انا عارفه ان قعدتك لوحدك دي صعبه عليكي ومش عارفه تعملي فيها ايه والله انا لو باايدي هاجي اقعد معاكي ومش هسيبك ابدا ...

عارفه...عارفه يافريال..انا مليش غيرك اساسا خلاص ...

وصلنا للأول دور باب الأسناسير فتح وخرجنا ..بس ياترى بقى خيالي خرج معانا ولا ...؟!

قضينا اليوم سوا خرجنا واكلنا مع بعض وبعدين شربنا عصير وعلى اخر اليوم تقريبا كده فريال قالتلي ماتيجي ندخل سينما...؟

سينما ايه بس يامجنونه انتي انا مش باقي معايا فلوس خالص غير حاجات بسيطه تمشيني لحد مااتنيل اشتغل...

ياستي خلاااص انا عازماكي على حسابي ولما تشتغلي ابقي ردهالي ...

اردلك ايه ولاايه بس يافريال ..!!

عيب عليكي كده يافريده انتي كده هتزعليني منك بجد احنا اخوات يابت مفيش بيننا الحاجات دي...

خلاص ياحبيبتي ماشي ماتزعليش مني يلا ياستي شوفي عايزه ندخل فيلم ايه وانا معاكي انا بثق في ذوقك...

ايه رأيك في فيلم رعب بيتعرض في السينما اللي في الميدان هناك ده يلا ندخله سوا؟

رعب...!!

رعب ايه يابت انتي!!

انتي شكلك اتهفيتي في عقلك باين ولاايه يعني انا عايشه لوحدي في بيت طويل عريض وتقوليلي رعب...!! الله يخربيتك لبيت معرفتك السوده

ضحكت بصوت عالي...، والله نسيت يافريده طيب خلاص يلا ندخل الفيلم التاني هو فيلم اكشن كوميدي بس تحفه انا شوفت التريلر بتاعه يجنن...

ماااشي يلا ياستي...

جبنا الفشار بالجبنه اللي بنحبه ودخلنا الفيلم والفيلم ابتدا وكانت بدايته فعلا كويسه قوي وكنت متابعه احداثه كويس جدا لحد ما ....بطني وجعتني قوي جالي مغص شديد جدا فيها مش عارفه ده من الفشار ولا من ايه..!!

فريال حست بااني مش مظبوطه ولقتني ماسكه بطني وبتوجع..

مالك يافريده ؟

حبيبتي انتي بطنك وجعاكي..؟

اه تقريبا كده يافريال عندي مغص فظيع مش عارف في ايه...انا هقوم ادخل الحمام واجيلك...

ماشي ياحبيبتي قومي انا مستنياكي اهو ...

قومت جري على الحمام سألت الموظف فين مكان الحمام شاورلي بصباعه على مكانه جريت عليه ودخلت بس انا اول مافتحت الباب ودخلت...

المغص راح...!!!

فجأه كده مفيش مغص ولاوجع ولااي حاجه نهائي...!!!

وقفت قدام المرايه عشان اغسل وشي لأن دموعي نزلت مني غصب عني من الوجع اللي كنت حساه فتحت الحنفيه وغسلت وشي وبصيت في المرايه لقيت عينيا شاحبه وشكلي مرهق جدا..استغربت لأني بنام كويس والحمدلله مواظبه على الصلاه والقرآن ...

فرييييده....فرييييده.... 

انا...انا... سامعه اسمي بيتنده في حمام من الحمامات المقفوله دي...!!!

انا اكيد مش بحلم...انا...سامعه اسسس...

فريييييده....

التفتت عشان اشوف اسمي بيتنده من انهي مكان بالظبط...هما كانوا ٣ابواب ...،

فتحت الأول لقيته فاضي ...، 

التاني فتحته برضو كان فاضي ...، 

التالت فتحته ببطئ....

لكني برضو لقيته فاضي...!!!

التفتت ناحية المرايه لقيت....

طلعت مني صرخه غير طبيعيه هزت المرايات في الحمام تقريبا لما شوفت خيالي في المرايا واقف مكانه مابيتحركش وعينيا بيضا تماما وعلى وشي ابتسامه كلها شر وغير طبيعيه ...، ولقيت خيالي حاطط في ايده حاجه زي سلسله ونازل منها....دم !!!

كل ده انا تقريبا مش عارفه انطق ...فقدت القدره على النطق مش حاسه بااي حاجه حواليا ...فجأه...

اتفتح باب الحمام اللي ورايا واتمدت ايد منه خنقتني بكل قوتها ولقيتها بتصرخ في وشي وبتقول ...

التميمة يافريده...التمييييمة

وصوت فحيح غير طبيعي كأن حد بيطلع في الروح ...

غمضت عيني وفضلت اصرخ اصرخ اصرخ وبدأت اجري في الحمام واقول انتوا عايزين مني اييييه...تميمة اييييه...انا مش فاهمه حاجه...!!!

واغمى عليا....

صحيت لقيت نفسي ممده على سرير تقريبا كده كنت في مستشفى ...وفريال جمبي ماسكه ايدي باايديها وبتعيط ...

الحمدلله ...الحمدلله ..فاقت يادكتور فاقت...

انا كنت هتجنن عليكي ياحبيبتي ايه اللي حصل يافريده ..؟!

ايه اللي حصل..؟!

اتكلمت وانا بقاتل لأني كنت حاسه ان لساني لسه تقيل ومش قادره انطق كويس ...، انااا.. مش فاكره حاجه يافريال ...!!

عايزه اشرب مايه...

حاضر ياحبيبتي ...المايه اهي ...، وفتحت فريال ازازه مايه ورفعت راسي شوية عشان اعرف اشرب ...،

بعد ماشربت وبليت ريقي الحمدلله لقيت الدكتور بيمسك ايدي وبيشوف نبضي وهو بيبص في ساعته ...

لااا ..الحمدلله بقينا احسن كتير ...صحبتك ياستي كانت هتموت عليكي ده انتوا لو بينكوا صلة دم مش هتخاف عليكي كده...

هو...حضرتك هتقولي يادكتور فريال دي اختي مش صحبتي واللي طلعت بيها من الدنيا...

بصيت ليها وسألتها بضعف واضح هو...ايه اللي حصل يافريال ؟!

مفيش ياستي انا لما لقيتك طولتي في الحمام قلقت عليكي جدا جينا نفتح عليكي لقيتك واقعه في الأرض ودماغك بتنزف بس كان جرح بسيط صرخت ولميت الناس شالوكي وجابوكي هنا كتر خيرهم وبعد ماالدكتور كشف عليكي اكتشفنا انك اغمى عليكي واتخبطتي في الحيطه بتاعة الحمام وعشان كده وقعتي على الأرض ...الدكتور بيقول انه اجهاد وانك مش بتنامي كويس يافريده ومش بتاكلي كويس ..ليه كده ياحبيبتي هو انا مقصره معاكي في حاجه؟؟

اتكلمت بصعوبه برضو بس احسن من الأول بكتير ...مين قال كده يافريال انا مليش غيرك وانتي عمرك مابخلتي عني بحاجه ولاحتى عمري احتجتك ومش لقيتك جمبي بس انا بنام كويس وباكل كويس الحمدلله وبصلي الفرض بفرضه ومعنديش اي مشكلة فين بقى اللي الدكتور بيقول عليه ده ..؟!!!

بصتلي بااستغراب وبعد كده بصت للدكتور اللي بدوره بصلي وقاللي ولايهمك ياستي احنا هناخد شوية الڤيتامينات دي معاهم شوية عصاير كده وننام من ٧ل٨ ساعات كده كويسين عشان نبقى تمام وترجع صحتك زي ماكانت واحسن... تمام...

تمام يادكتور...حاضر اللي حضرتك شايفه...

تمام...انتي دلوقتي بخير الحمدلله واتحسنتي لو تحبي تخرجي مفيش مشكلة ولو حابه تكملي يومك معانا هنا تشرفينا مفيش مشكلة برضو ...

لا يادكتور الحمدلله انا بقيت كويسه ممكن اخرج اذا سمحتلي..

لقيت فريال بتوطي عليا وبتقولي ياحبيبتي لو لسه تعبانه نقعد مفيش مشكلة ده كله على حسابهم يعني انا مادفعتش حاجه...

ضحكت طبعا منها ومن تفكيرها ورديت عليها لا ياستي انا مش عايزه اقعد هنا انا مابحبش المستشفيات ولا العلاج يلا طلعيني وروحيني بقى...

نزلنا سوا وركبنا تاكسي كان الوقت اتأخر شوية لقيت تليفوني بيرن رقم عمتو ذكيه ...الو ايوه ياعمتو ....

انتي فين يافريده كل ده قلقتيني عليكي ياحبيبتي....؟

ماتقلقيش ياعمتو انا كويسه فريال صحبتي جايباني وجايه اهو ...

جايباكي..!!

جايباكي ازاي يعني انتي كويسه ولابتضحكي عليا يابنتي..؟!

والله انا كويسه ياعمتو انا بس اغمى عليا من التعب وفريال جايباني وجايه اهو ..

طيب ياحبيبتي تيجوا بالسلامه انا مستنياكي اهو...

فضلنا نضحك لحد ماروحت ولما الست ذكيه قابلتني شهقت كأني لسه خارجه من اوضة العمليات طازه ..، ساعدتني هيا وفريال طلعنا فوق وحلفت انها هتبات معايا مش هتسيبني عشان مااقعدش لوحدي وانا تعبانه 

وحلفت على فريال تروح عشان اهلها مايقلقوش عليها اكتر من كده ...

ربنا يخليكوا ليا انا مش عارفه من غيركوا كنت عملت ايه ...حضنتهم الأتنين وفريال مشيت وسمعت صوت الباب وهو بيتقفل والست ذكية بتودعها بعد كده بصتلي عمتو ذكية من ورا الباب وقالتلي هروح اعملك حاجه سخنه تشربيها ياحبيبتي ماشي ...

ربنا يخليكي ليا ياعمتو يارب اتفضلي البيت بيتك...

معدتش دقيقه لقيت الست ذكية بتبصلي تاني من الباب وبتقولي هروح اعملك حاجه سخنه تشربيها ياحبيبتي ماشي....!!!

صوتي سكت للحظه وفضلت مبرقه شوية...لحد مانطقت ببطئ ...ربنا ييي..خليكي ياعمتو يارب اتفضلي البيت بيتك...

فضلت مبرقه شوية لحد مالقيت الباب اتفتح ولقيت الست ذكية واقفه عند الباب وبتبصلي وبتضحك ضحكات هيستيريه ومرعبه جدا وماسكه في ايديها طبق كبير وبتقلب فيه حاجه مش عارفه ايه هيا ولقيتها داخله عليا كأنها بتطير من على الأرض مش ماشيه زيينا كده ...كل ده وانا مبرقه ومش قادره ولاعارفه انطق وطت عليا بكل هدوء وقالتلي بحنيه مش طبيعيه بصي يافريده ياحبيبتي علمتلك شوربة جميله ازاي ....

ببص في الطبق لقيته كله احمر زي الدم وكان فيه صوابع بني ادمين ...صوابع بتاعتنا دي...؟!!

ببص ناحية الباب لقيت فريال واقفه عند الباب وصوابعها مقطوعه وايديها بتنزل دم زي النافوره وبتعيط جامد قوي وبتقولي شايفه خدت صوابعي ازاي كلها يافريده....

ولقيت الست ذكية بتضحك ضحكه مرعبه ورفعت راسها لفوق وبعد كده بدأت تصرخ بصوت محشرج غير طبيعي وبصتلي فجأه ولقيتها بسرعه جدا بتقرب الطبق من بقي وبتقولي اشربي....اشربييييي عمايل ايديا وبتضحك...

في الوقت ده انا مقدرتش امسك نفسي الصرخه طلعت مني بصوت غير طبيعي حسيت ان قلبي هيقف من قوة الصرخه بتاعتي وانا بحاول احوش الطبق من على بقي وابعدها عني وعماله احرك ايديا الأتنين يمين وشمال وانا مغمضه عيني...

فريده...فريده حبيبتي اهدي ...مالك يابنتي بس ايه اللي حصلك...؟!

فتحت عينيا لقيت عمتو ذكية واقفه قدامي وبتعيط وعماله بتهديني ...لاحول ولاقوة إلا بالله مالك يابنتي ايه اللي حصلك في ايه؟!!

انهرت وفضلت اعيط بطريقه مش طبيعيه ...وبدات اصرخ بهيستريا..انا مش عارفه مالي انا فيا ايه ؟!!

من الصبح في حاجات مش طبيعيه بتحصلي ومش فاهمه ايه السبب...؟!!

استغفر الله العظيم..استغفر الله العظيم...

خدتني في حضنها وضمتني جامد وانا بعيط وفضلت تهدي فيا وتقرالي قرآن لحد مانمت رحت في نوم عميييق ومحستش بااي حاجه لحد الصبح…

                الجزء الثانى من هنا