قصة #التميمة
الجزء التاني
بقلم محمد عباس
لما صحيت لقيت عمتو ذكية نايمه جمبي زي الملايكه والمنبه
بتاعي مارنش زي كل يوم وطبعا الوقت كان متأخر كانت
الساعه داخله على ١٢ الضهر انا استغربت بس قولت اكيد في
مشكلة في البطاريات بتاعته ولاحاجه هبقى اغيرها ...،
مسكت التليفون اشوف مين عبرني من امبارح لقيت مكالمه
الساعه ٩ الصبح من رقم غريب ...اكيد دي الشركة بتاعة
امبارح اكيد ده م/حاتم انا اقوم اغسل وشي كده واكلمه على نضافه...
قومت بالراحه عشان مااصحيش عمتو ذكية اكيد ياعيني
فضلت سهرانه جمبي طول الليل دخلت الحمام بس حسيت
بريحة عفونه مش طبيعيه وغريبه ومقززه جدا ومش طبيعي
اني اشم الريحه دي في بيتي لأني نضيفه جدا جدا !!
اكيد الريحه دي من بره يافريده يعني مش كل حاجه تعملي
عليها حوارات بقى ياشيخه...
غسلت وشي ورفعت راسي في المرايه لقيت وشي مرتاح
واحسن من امبارح كتير الحمدلله على الأقل اتأكدت اني كنت
بهلوس امبارح ومكنتش طبيعيه ...
نشفت وشي وبسرعه روحت المطبخ عشان احط اللبن عالنار
عشان اشرب الدوا بتاعي اللي انتوا عارفينه طبعا سبته
وخرجت ومسكت التليفون وكلمت الرقم ...
الو...الو...!!
سمعت صوت غريب محشرج كده كأن حد صوته مكتوم مش عارف يتكلم ...
الو ...الووو!!
برضو الصوت غريب جدا ومحدش بيتكلم بس الأغرب اني سامعه صوت نفس منتظم جدا كأن حد سامعني ومش عايز يرد عليا ...ممكن اي حد يعتبر ده طبيعي او حد بيعاكسني بس انا باللي حصلي وشوفته امبارح عمري ماهفكر التفكير ده اكيد دماغي هتروح لحاجه تانيه ...
سبت الموبايل على الترابيزه وقومت اشوف اللبن في المطبخ بس...انا لقيت اللبن بارد زي ماهو كأني ماسخنتوش ولاحطيته على البوتجاز!!!
اكيد في حاجه غلط ..اكيد انا نسيت افتح النار عليه منا مش طبيعيه من امبارح اساسا...
فتحت النار واتأكدت اني فتحتها وانا ببص عليها كويس سمعت نغمة الموبايل بتقطع صوت السكون اللي مالي الشقه حواليا واللي خلتني اتنفض مكاني لأني كنت مركزه جدا في النار بتاعة البوتجاز...
ايه ده..!!
ده نفس الرقم...الو..ايوه
صوت رجولي بيقولي مساء الخير ياافندم ..
ايوه مساء النور ياافندم ...
حضرتك انسه فريدة ...؟
ايوه مع حضرتك تحت امرك...
احم.. انا حاتم اللي عملت مع حضرتك الأنترڤيو امبارح في الشركة...
ايوه...ايوه ياافندم طبعا ياريت يكون عندك اخبار كويسه عن الوظيفه...
طبعا حضرتك ممكن تشرفينا عشان تمضي العقد وتبتدي شغل من بكره ان شاء الله...
بجد...!! ربنا يخليك يام/حاتم بجد مش عارفه اقولك ايه ميرسي جدا على تعبك معايا اكيد حضرتك ليك دخل في الموضوع ده ...
لا ابدا انا ماعملتش حاجه خالص حضرتك مؤهلاتك هيا اللي اجبرت الأدارة انها تختارك ...
ربنا يخليك شكرا جدا ليك حضرتك ماتعرفش انا مبسوطه جدا قد ايه ..
ربنا يسعدك ...عموما ماتتأخريش بكره عشان تمضي العقد معادنا الساعه ٩ الصبح تمام ...
تمام هكون عندك تسعه بالثانيه
قفلت المكالمه وفضلت اتنطط مكاني كأني مش مصدقه لحد دلوقتي اني اتقبلت في وظيفه وسجدت وحمدت ربنا اني اتقبلت ...
اللبن يانهار ابيض ...
طبعا لقيت الدنيا بايظه خالص واللبن مغرق البوتجاز وحاجه اخر جمال يعني ...
انتي بتعملي ايه يافريده...؟!
عمتو ذكية...انتي صحيتي امتى؟
لسه صاحيه ياحبيبتي انتي بتعملي ايه مش المفروض ترتاحي انتي تعبانه من امبارح ...
لا انا كويسه جدا قولي كده مين كلمني الصبح النهارده ؟!
الشركة بتاعة الشغل اكيد ...
ايوه ياعمتو وقبلوني ومستنيني بكره عشان امضي العقد انا مش مصدقه نفسي بجد ...
لا صدقي ياحبيبتي انتي طيبه وتتستاهلي كل خير ...
روحي يلا ريحي وانا هعملك الفطار ...
حضنتها وبوستها ...بس الغريب ان ريحة العفونه كانت واضحه قوي في عمتو ذكية ...!!
قعدت على السرير ولفيت عشان ....
عمتو ذكية نايمه جمبي لسه ....!!!
اممم...امااال...ممم...مين اللي انا كنت بكلمها بره دي ؟!
صوت عمتو ذكية جايلي من بره ...اعملك ساندوتش واحد ولااتنين يافريده ياحبيبتي...؟؟
انا مبرقه وعماله ابص على السرير وعمتو اللي نايمه جمبي وابص على الباب والصوت اللي جاي من بره ومش عارفه ولاقادره انطق ...
معرفش انا قومت ازاي من مكاني وفتحت الباب بالراحه واتمشيت بهدوء ناحية المطبخ عشان اشوف مين اللي في المطبخ ...اصل ياانا اتجننت ياالا في حاجه طبيعيه بتحصل وانا مش فاهماها...
حطيت ايدي على بقي عشان امنع صرخه عاليه جدا من انها تطلع لما لقيت المطبخ مفهوش حد واللبن زي ماهو ولا كأن في حاجه حصلت من كام دقيقه ...
صوت باب قديم بيتفتح صوته كأنه بقالي سنين مااتفتحش ولاحد خرج من او دخل فيه بقالو سنين طويله جدا عارفين الصوت المزعج بتاع الأبواب اللي في افلام الرعب ده ...اهو ده اللي انا سامعاه وصوته واضح جدا وعالي ...فضلت باصه على باب المطبخ وانا جسمي بيترعش والدموع في عيوني كتيره جدا ونفسي ودقات قلبي كأنهم في سباق مع بعض ومبرقه بطريقه مش طبيعيه ومش قادره ابلع ريقي وانا شايفه الخيال الأسود اللي بيوضح شوية بشوية عند باب المطبخ وبيتشكل على هيئة بني ادمه شكلها بشع وشها اسود وباين فيه عروق بيضا وعيونها حمره جدا وفجأه ...بسرعة البرق اتوجهت ناحيتي ومسكتني من رقبتي وصرخت بكل قوتها في وشي ...
انا هنتقم منكوا كلكوا ....جه الوقت اللي هاخد فيه حقي منكوا ....انا مش هسيبكوا هتموتوا واحد ورا التاني وكل اللي يعرفك او يقرب منك هيموت باابشع طريقه محدش يتخيلها....صوت زمجره خرج من بقها وريحة العفونه زادت جدا قبل ماتختفي في ثانيه وكأن مفيش حاجه حصلت ...
لقيت نفسي واقعه على الأرض ومنهاره بس مفيش اي صوت خارج مني كل اللي بعمله اني بعيط كتير جدا ...
قومت من مكاني بصعوبه وكنت مخنوقه ونفسي باخده ببطئ جدا والدنيا حواليا مغيمه سندت على الحيطه لحد ماوصلت لااوضتي وصحيت عمتو ذكية ووقعت على الأرض ...
لما فتحت عينيا لقيت عمتو ذكية قاعده بتقرا قرآن جمبي لقيتني بسألها هيا فين ؟؟
سابت المصحف وقامت بسرعه بتهديني ..اهدي ياحبيبتي اهدي خير ان شاء الله ماتقلقيش هتبقي كويسه ..
هيا فين ياعمتو الست السودا راحت فين؟؟
ست...ست مين يافريده يابنتي؟!
الست اللي عايزه تنتقم مننا كلنا انا مش عارفه ايه اللي بيحصلي ....انا مش فاهمه انا عملت ايه لكل ده ؟!
اهدي ياحبيبتي اهدي ...الموضوع مش مستاهل تلاقيكي مجهده شوية يافريده يابنتي ...
صرخت فيها بحده محدش يقولي مجهده انا كويسه والله كويسه بس...في حاجات بتحصل انا مش فاهماها ولاعارفه اي اللي بيحصلي ده وكمان في....
الريحه الوحشه اللي شميتها الصبح ...انا شماها دلوقتي وبدأت اتأكد انها مش من بره ...دي من هنا ...من بيتي ...!!
شامه ياعمتو الريحه ؟؟
ريحة ايه يافريده انا مش شامه حاجه ياحبيبتي ...!!
ازاااي بس انا شاماها من الصبح وواضحه قوي كمان ريحة كمكمه غريبه ...
لاااا..انتي كده ماينفعش نسكت عليكي لازم ناخدك المستشفى...
لا ياعمتو انا كويسه مفياش حاجه كل اللي انا فيه ده انا متاكده ان في حد عايز يوصلي رساله او حاجه حصلت انا مش فاهماها وهفهمها...
مسكت الموبايل واتصلت برقم فريال ...ايوه يافريال تعالي دلوقتي عشان عيزاكي في موضوع مهم ...
حاضر يافريده ..بس انتي كويسه ؟؟
اه...اه كويسه تعالي انتي بس ..ماتتأخريش
قومي ياعمتو ...انزلي ارتاحي تحت شوية ياحبيبتي كفايه تعبك معايا من امبارح للنهارده ...
ده كلام برضو يافريده ... بقى انا بعتبرك زي بنتي وانتي تقوليلي كده ... ده احنا ملناش غير بعض يابنتي..وعيطت!!
قومت حضنتها بسرعه وطبطبت عليها ...انا والله مااقصدش ازعلك ياعمتو انا ياحبيبتي قصدت انك ترتاحي بس مش اكتر انزلي وكده كده فريال جايه دلوقتي هتفضل معايا وياستي لما ترتاحي وتقومي ابقي اطلعي تاني اقعدي معايا مفهاش حاجه يعني ...
ماشي ...خلاص يافريده انا نازله اهو ..
ابتسمت عشان اوقات بحس عمتو ذكيه كأنها عيله صغيره عمتو دي طيبه قوي اطيب انسانه في الوجود كله ...
الباب خبط فتحت لفريال ملحقتش تقولي ازيك شديتها من ايديها بسرعه وسحبتها على الأوضه وقعدتها جمبي على السرير وبدأت احكيلها كل حاجه بالتفصيل من امبارح للنهارده...
علامات التعجب والدهشه باينه جدا على وش فريال بعد ماسمعت كل الأحداث اللي حصلت دي ولقيتها بكل عفويه بتقولي هو النهارده ايه؟؟
بصيت في الموبايل يانهار ابيض ده النهارده ذكرى وفاة بابا وماما وستي ...
اه منا نسيت اقولكوا ان ستي اتوفت في نفس اليوم اللي اتوفى فيه بابا وماما ...!!
طيب تفتكري ان التاريخ ده ليه علاقه باللي بيحصلك يافريده!!!
انا...ماافتكرش يافريال انه ليه علاقه ... يعني على الأقل كان يحصل حاجه في السنين اللي فاتت...!!
امم...طب اشمعنا دلوقتي وفي اليوم ده بالذات تظهرلك الحاجات الغريبه دي ؟!
مش عارفه ...بس...
هو انتي ازاي صدقتيني بسرعه كده وماقولتيش اني بتخيل او اني مجهده وتعبانه زي مابيقولولي ؟!!
اصل...اصل...
اصل ايه يافريال ..انطقي انا مش ناقصه كفايه اللي انا فيه ...
هحكيلك يافريده اصبري بس عليا ...
اتفضلي انطقي ..
بالراحه عليا يافريده انا قولت انها حاجه عاديه يعني حلم عادي ...
يابنتي ماتشلنيش انطقي ...
حاضر حاضر اهو ...بصي انا امبارح حلمت ان باباكي وممتك
عايشين مماتوش واني جيت خبطت عليكوا فتحلي باباكي
ووشه باين عليه الإجهاد والرعب قالي بنفس اللفظ كده انتي
ايه اللي جابك ...طبعا انا استغربت لأنهم عارفين اننا اصحاب
واخوات جدا ..بس ده عادي لأني المفروض اني بحلم طبيعي جدا يبقى فيه هبل في الأحداث ...
لما دخلت البيت لقيت دخان ريحته وحشه قوي وممتك قاعده
على كرسي مبرقه ليا بطريقه مفزعه تخوف اي حد
ومابتنطقش بس بتبصلي ومبرقه جامد جدا وراسها ماشيه
معايا لحد مادخلت اوضتك ... لما فتحت اوضتك لقيتك قاعده
على السرير وماسكه حاجه زي عقد في ايدك عقد غريب كده
وشكله قديم جدا فضلت اندهلك لكنك كنتي عماله تقولي كلام
غريب وغير مفهوم بالمره وعماله تحركي نصك الفوقاني رايحه
جايه على السرير وبترددي نفس الكلام الغريب ده صرخت
فيكي لقيتك وقفتي مكانك وبطلتي تقولي اي حاجه وبصتيلي
بصه عمري في حياتي ماهنساها وجريتي عليا عشان تلبسيني
العقد اللي كان في ايدك وطبعا انا صرخت ووقعت على الأرض واغمى عليا ...
ولما صحيت من النوم لقيت ده جمبي...
خرجت فريال عقد قديم من شنطتها اللي كنت المفروض اني
مسكاه في الحلم ولقيتها بتدهولي اول مامسكته كأني افتكرت
حاتم وهو بيبصلي بوشه المقزز ده وبيقولي التميمه يافريده
.التميمه...وفجأه رجعت كل حاجه زي ماكانت كأنه كان فلاش باك ...
لقيتني بقولها دي التميمه اللي قصدهم عليها يافريال ....
تميمه..؟!!
تميمة ايه يابنتي انا مش فاهمه حاجه ؟!!
فضلت ابص للعقد ولفريال وانا مبحلقه وبحاول استوعب ايه
اللي بيحصلي ومش فاهمه حاجه خالص ... لحد ماتنفضت من
مكاني وصرخت في فريال قومي نفتش اللبيت ده كله حته حته قومي يلا معايا
وفعلا فتشنا البيت كله كل الدواليب والأدراج والمراتب وتحت
السرير وفي كل حته لكن...ملقيناش اي حاجه خااص توضحلنا ايه اللي بيحصلنا
انا تعبت يافريده بس اناعندي فكره جهنميه ...
قولي انا معاكي في اي حاجه ...
الشيخ حازم...
الشيخ حازم... مين الشيخ حازم ده؟!!
الشيخ حازم ده من اكبر الشيوخ اللي ليهم علاقه بالجن وبيفهم
في الحاجات دي جدا هو اللي هيقدر يفيدنا ...
وانتي تعرفيه منين ؟؟
عن طريق واحده صاحبتي هيا اللي اتعاملت معاه وحكيتلي
عنه بس انا بصراحه ماجربتوش ولااعرف اي حاجه عنه غير اللي قولتهولك ده ..
طيب خلاص مستنيه ايه تعالي نروحله سوا ...
نروحله ايه بس يامجنونه انتي انتي عارفه الساعه كام دلوقتي ؟؟
يانهار ابيض ده الوقت اتأخر فعلا ...
خليها بكره حتى كمان يكون معانا فلوس عشان لو طلب منا فلوس ...
هو...هو ممكن ياخد مننا فلوس يافريال ؟
ممكن...بس مش اكيد
طيب ماشي ربنا يستر يلا روحي وبكره نتقابل الصبح عشان اروح الشركة امضي العقد ...
ايوه ياسيدي يسهلوووو مش قولتلك حاتم واقع لشوشته ..
بس يابت يامجنونه انتي مش ناقصه هبل انا ..
ماشي ياستي انا هابله بكره هتقولي فريال قالت ..
يلا سلام ...
استني هنا سلام ايه ..انتي هتسيبيني ياندله بعد كل اللي حكيتهولك ده ؟!!
ايوه صحيح ...هسيبك ازاي ده انا ممكن يحصلي حاجه انا كمان لا يختي هفضل معاكي هنا ...
ايوه كده هيا دي الصحاب الجدعه ولابلاش قومي بقى خديلك
دش لذيذ كده وتعالي نقعد سوا عشان نفكر هنعمل ايه في
البلاوي اللي بتحصلنا دي اتكلمنا شوية انا وفريال وفضلنا
نسترجع ايام الطفوله الجميله وازاي كنا بنلعب طول الوقت
ومش في دماغنا اي مسئولية ولااي هموم شاغله بالنا...،
- ايه ده ...كل ده بق...!!
يخربيتك...اقفلي اقفلي ...
- جرا ايه يافريده صاحيه من بدري ياشيخه...خلي عندك
شوية من الأحمر البتاع ده اللي بيسموه...دم
- ماشي ياستي يلا عشان ننام كده كده انا عندي بكره شغل ان
شاء الله ومش عايزه اترفد من اول يوم...
- قريت الورد بتاعي قبل النوم وقفلت النور وطبعا فريال كانت
راحت في سابع نومه ومحطتش منطق تقريبا اغمى عليها...!!!
- مش عارفه ليه مش جايلي نوم وحاسه اني مش عارفه
انام...صوت دقات الساعه هيجنني...
- مش قادره....خلاااص...صدعت...
قومت جري على الساعه المتعلقه على الحيطه عشان اشيل
منها الحجاره لأن صوتها هيجنني...لكن...!!!!
الساعه...وووو....واقفه..!!!
عقارب الساعه مابتتحركش..!!
بس بتدق كأنها شغاله مظبط ...!!
انا...مش فاهمه حاجه..ايه اللي بيحصل ده؟!
فجأه....
صوت باب اترزع جامد جدا بره في الصاله...برقت جامد جدا
لأني متأكده وعارفه ان مفيش حد في الشقه ممكن يرزع الباب
بالمنظر ده وفريال نايمه زي السطيحه ولاحست بااي حاجه...
فرييييال...ففف....ريال... بنادي عليها بصوت تقريبا مش
طالع...مرتجف على خايف على مرعوب...رجليا مش شيلاني
اروح لحد عندها حاسه ان قلبي هيقف وانا شايفه باب اوضتنا
بيتفتح ببطئ شدييييد ونور الصاله بيبان واحده واحده....
مممم...مين؟!
هه...قال يعني حد هيرد عليا ...!!
الباب اترزع في ثانيه اول ماقولت مين كان حد خاف وهرب...
اتشجعت وروحت ناحية الباب وفتحته لكن....لكني ملقتش اي
حاجه غريبه...الصاله فاضيه والنور الضعيف اللي فيها موضح
كل حاجه يعني مفيش حد خالص ...بس...
قلبي طار من مكانه وانا مبرقه ناحية الظل الأسود اللي بيزحف
ناحية الحمام ودخل جواه...انا مش فاهمه انا جايبه الجرأه دي
منين اني ماشيه وراه وعايزه اعرف ده عباره عن ايه...!!!
بس جايز اكون عايزه افهم ايه اللي بيحصلي ده وبيحصلي ليه...
صوت فظييع وريحه مقرفه وانا بفتح باب الحمام كأن ماتأخذونيش في حيوان ميت جوه بقالو فتره...
فتحت النور في الحمام وفضلت ابص في كل ركن لكني ملقتش حاجه...، قفلت النور ولفيت....
- كتمت صرخه كانت هتخرج من بقي بايديا الأتنين وبكل
قوتي لما لقيت فريال قاعده على الأرض باايديها ورجليها
وبتاكل حاجه من على الأرض بنهم شديد جدا بس معرفش ايه هيا...
مشيت ببطي ناحيتها وهيا بتاكل ومشغوله جدا ومش واضح هيا بتاكل ايه...
فريال...فريال حبيبتي انتي بتعملي ايه...؟!
مابصتليش...!!
ولسه بتاكل بنهم شديد جدا...،
بدأت توضح ليا الحاجه اللي بتاكلها فريال هيا...بتاكل...القط الأسود...!!!!