قصة التميمه الجزء الثالث3 بقلم محمد عباس

قصة  #التميمة 

الجزء التالت

بدأت توضح ليا الحاجه اللي بتاكلها فريال هيا...بتاكل...القط الأسود...!!!!

مسكت نفسي بالعافيه من اني يغمى عليا من بشاعة المنظر اللي عيني شايفاه...

فريال بتاكل قط اسود والقط عمال يعوي كأنه حي وهيا بتاكله وهو عايش...

بدأت دموعي تنزل مني غصب عني وصوتي بدأ يترعش وانا بنده عليها ومش قادره...

ف ر ي ا ل...

فجأه...التفتتلي ونطت عليا بكل قوتها ومسكتني من وشي باايديها اللي مليانه دم وهيا بتضحك ضحكات شيطانيه عاليه جدا ومش صوتها اللي خارج منها ده صوت كائن غريب زي فحيح ثعبان كده...، وقعتني على الأرض ومسكتني من رقبتي وفضلت تخنقني جامد...، جامد كأنها عايزه تموتني وتخلص مني وانا شايفه على وشها علامات الأنتصار...، بدأت الدنيا تلف بيا وعينيا تقفل وتتقل والنفس يقل كأني روحي بتخرج مني خلاص...هيا دي النهايه...معقول!!!

اااااااه....اشهد ان لا اله الا الله وان محمد رسول الله

أشهد أن لا إله إلا الله وأن محمدا رسول الله...

كنت باخد نفسي بصعوبه وعرقانه كأني كنت بتخنق فعلا...،

معقوله ده كان حلم...!!! 

-فريده مالك ياحبيبتي ايه اللي مصحيكي مفزوعه كده ؟!

كابوس...وحش قوي يافريال...

-كابوس...!!

كابوس ايه ياحبيبتي احكيلي...؟!

لا...لا خلاص ماتاخديش في بالك كملي انتي نوم انا هقوم عشان اصلي الفجر...

- بعد الصلاه رجعت نمت تاني بكل هدوء لحد الصبح...

-وانا بلبس لقيت فريال بتبصلي بتعجب وبتبتسم...

-طبعا قايمه نشيطه وبتلبسي اللي على الحبل كمان ورايحه لحبيب القلب...

-بس يامصيبه انتي...بطلي عبط انا رايحه الشغل الجديد ياماما...

-شغل...!!!

- ماشي ياستي روحي الشغل...

- ايوه هروح اهو مااروحش ليه...

- ضحكنا احنا الأتنين وانا نزلت ورايحه كلي تفاؤل وامل عشان هستلم شغلي الجديد النهارده وهبتدي اتعرف على ناس جديده وان شاء الله ارتاح في المكان ده...

- خبطت بالراحه على باب م/حاتم ودخلت مبتسمه...

- صباح الخير يام/حاتم..

- اهلا صباح النور ياانسه فريده...في ميعادك بالثانيه يظهر انك مش بس انسانه محترمه وعندك كفاءات لا ده انتي كمان نشيطه وبتحافظي على مواعيدك....لا بجد شابوه..

- ابتسمت بخجل والله انا بحاول اكون منتظمه يام/حاتم والشركه تستفيد مني على اكمل وجه ...

- اممم...تمام ربنا معاكي وان شاءالله ترتاحي معانا هنا احنا كلنا اخوات وبنعامل بعض بااحترام وبنخاف على بعض ..،

- اكيد طبعا يام/حاتم انا متأكده انكوا شركة محترمه وسمعتها سابقاها...

- طيب ياستي اتفضلي ده عقدك جاهز تقدري تمضيه وتتفضلي تشوفي مكتبك وتتعرفي على زمايلك في المكتب...

- كنت بمضي والفرحه مش سايعاني بجد مكنتش مصدقه اني اخيرا حياتي هتتظبط...بس... مكنتش اعرف انها بداية الرعب اللي هينهي كل حاجه حلوه في حياتي....

- فرحتي كانت بتكبر كل شوية لما تحصل حاجه احسن من اللي قبليها ...، يعني منظر مكتبي الجديد وزمايلي اللي منتظريني يرحبوا بيا...، والجو النضيف اللي مفيهوش اي مشاكل او عيوب...، كأني بحلم بجد مش مصدقه حد يصحيني...، او لا... بلاش تصحوني بالله عليكوا سيبوني مبسوطه وبحلم كده...

- اهلا بيكي معانا يا....

- فريده...فريده عبدالله...

- اهلا يافريده انا ندى ودي صحبتي وزميلتي شذى...

- اهلا شذى...وكمان اسمكوا قريب من بعض ...، انا كمان عندي صحبتي الأنتيم اسمها فريال...

- شذى وندى ضحكوا في وقت واحد وكملت ندى كلامها ...،

 ربنا يخليكوا لبعض صعب تلاقي صديق وفي وطيب الأيام دي يلا هنعمل ايه ايام وبنعيشها...

- شذى ردت عليها بضحك يلا ياعم عمرو دياب لحسن

م/رؤوف يجي ويشوفنا بنتكلم وينفخنا...

- رديت عليها بااستفهام...، مين م/رؤوف ده ياشذى؟؟

- هاااه...ده ياستي البعبع بتاع الشركة دي ...، اي حد نفسه يتخصم من مرتبه او يتحقق معاه او حتى يترفد واللعياذ بالله يقوله صباح الخير ...، حاجه كده استغفر الله العظيم تركبيتها غلط في غلط ...

- ندى بترد عليها بااستحياء...، ياشيخه حرام عليكي ماتظلميهوش...

- شذى بصتلها بغضب..، بت انتي بلاش المحن ده مش عشان انتي معجبه بيه تفضلي تدافعي عنه كده ده انسان مستفز..هو اه...قمر ومز وشيك وچنتل وكل حاجه بس شخصيته مش راكبه على شكله خالص ...

- ضحكت بصوت عالي شبه ملفت للإنتباه على اسلوب الأتنين مع بعض ...فعلا شكلي هنبسط في الشغل هنا قوي ...

- ايوه...خلاص مااحنا بقينا شركة حكاوي مش شركة شغل وبيانات عملاء..

- صوت ضخم شوية جه من ورايا من على بعد وتبع الصوت ده سكوت عام في المكاتب كأننا في فصل في مدرسه فعلا والطلاب خايفين من المدرس..،

- التفت عشان اشوف انسان فعلا شكلة محترم وانيق جدا ووسيم بس تعبيرات وشه غريبه وغاضبه قوي ومش راكبه فعلا على مظهره...

- ندى هانم واستاذه شذى...ياريت حضراتكوا تكونوا خلصتوا حكاوي القهاوي...، يعني اذا سمحتوا ناخد من وقت حضراتكوا شوية للشركة لو مفهاش اساءة ادب يعني ..؟!

- ااا..احنا كنا بنرحب بالموظفه الجديده يام/رؤوف  والله ...مش قصدنا نتكلم ونحكي ولاحاجه...

- ا/شذى الترحيب بالموظفين سلام وكلمتين وابتسامه وخلاص مش وقفه ربع ساعه من وقت الشغل عشان ترحبوا بيها ...اتفضلوا يلا على مكاتبكوا مش عايز كلام كتير...

- طبعا انتوا من الموقف اللي حصل كرهتوه ...، مهو اكيد مفيش حد شخصيته تبقى كده وتتحب برضو ... بس الغريبه بقى اني احترمته جدا...، بس برضو مايمنعش انه قليل الذوق ده حتى ماسلمش عليا ورحب بيا في الشغل ...

- بشويش شاورت لندى وشذى انهم يقربوا وسألتهم ...

- طب انا عايزه افهم لما هو شخصيته صعبه كده مكمل ليه في الشركة والشغل هنا..؟!

-ردت عليا شذىبكل هدوء وثقه..، انتي لما تشتغلي هتعرفي ان الشركة دي تعتبر قايمه على مجهود م/رؤوف ده لو مشي ممكن الشركة تقع ...

- ياااه ...للدرجه دي مهم..؟!

- ايوه يابنتي ده بيدخل ارباح سنويه بالملايين للشركة امال انتي فاكره مجلس الأداره سايبه يشوط فينا كده ليه وارجعي بقى مكانك لحسن لو شافنا تاني احتمال يعذبنا زي ايام الكفار عدى اليوم على خير الحمدلله ومفيش مشكلة لحد دلوقتي والشغل تمام وسهل بالنسبالي طبعا مفيش اسهل من كده انا اساسا ممكن اعمل الشغل المطلوب مني ده بصباعي الصغير ...

- واحنا مروحين طلبت ندى مني انها توصلني ..، طبعا قولتلها ربنا يخليكي مش عايزه اتعبك انا هركب تاكسي واروح...، لا يابنتي تعب ايه مفيش تعب ولاحاجه احنا اخوات وبعدين انا وشذى ارتحنالك وان شاءالله هنكون اصحاب واخوات ...

- ربنا يخليكوا انا اللي مبسوطه اني اتعرفت على ناس جميله زيكوا ..

- طيب تمام يلا بينا اركبي معانا بقى...

- ركبت فعلا وطول الطريق واحنا بنتكلم وبنضحك ومبسوطين ... 

- لما وصلت عند اول الشارع عندي نزلت وشكرت ندى جدا على تعبها معايا وسلمت عليهم وطلبت منهم يخشوا نتغدى سوا بس رفضوا بشياكه على اعتبار انهم هيروحوا يتغدوا سوا...،

- الغريبه بقى نظره ندى اللي مش فاهماها لحد دلوقتي ...هيا كانت بتبصلي بصه غريبه جدا ومرعبه في نفس الوقت ...

- التليفون بيرن اكيد فريال ...

- الو... ايوه يافريال

- هاه احكيلي بقى عن اول يوم وعن حبيبك ...

- بس يابت انت اقفلي جتك نيله...

- وانا طالعه على السلم عمتو ذكيه فتحت الباب وكان باين عليها التوتر والخوف لقيتها بتشدني من ايدي بسرعه وبتبص حواليها كأن في حد   مراقبها استغربت جدا من اللي عملته وليقيتها بتجررني للبيت بتاعها من جوه وقفلت علينا وفضلت واقفه على الباب وهيا بترتعش مش عارفه مالها....

- مالك ياعمتو انتي بتنهجي كده ليه في ايه...؟!

- فريده...حبيبتي انتي لازم تروحي لشيخ ضروري عشان الموضوع كبير جدا ...

- في ايه ياعمتو....قلقتيني قوي انا مش ناقصه خوف انا اليومين اللي فاتو دول ربنا يعلم عدوا عليا ازاي ...

- اسمعي بس كلامي يافريده...لازم اخدك اوديكي لشيخ بااسرع وقت انتي في خطر...

- شيخ..!!

- شيخ ايه بس وبتاع ايه ياعمتو انتي بتصدقي في الكلام ده ...؟

- يابنتي بصدق ايه بس انتي فاكره انه اي حد وخلاص انتي ماتعرفيش ان الشيخ ده عارف اسرار عيلتك كلها وياما وقف جمب باباكي وممتك...

- بجد...

- يعني هيعرف سر التم...

- التم ايه يافريده فهميني ...انتي مخبيه حاجه عني يافريده ...؟

- ابدا ياعمتو الموضوع لسه حاصل امبارح واللي قالتلي عليه فريال بس والله ماخبتش حاجه عليكي ...وحكيتلها كل حاجه حصلت والكلام اللي دار    بيني وبين فريال ... والغريبه اني لقيت عمتو ذكيه مااتفاجئتش من موضوع التميمه ده...

- بصي يافريده ياحبيبتي انتي لازم تاخدي بالك من فريال انا مش قصدي حاجه انا لازم اخاف عليكي انتي بنتي اللي مخلفتهاش بس...الموضوع كده مشكوك فيه انا قلقانه منها حاولي تبعدي عنها عشان هيا كده ممكن تكون بتفكر تأذيكي...

- طيب فهميني انتي ليه بتقولي كده ...

- وانتي في الشغل النهارده انا قلقت عليكي جبت الشيخ اللي بقولك عليه اسمه الشيخ ابو الحسن دخل شقتي وشقتك واكتشف ان في حاجات   غريبه ومش كويسه في البيت وشم الريحه الوحشه اللي انتي بتشميها في بيتك وقاللي ان الموضوع ده غريب وانه حاسس باان في حد معاكي في الشقه...

- حد معايا في الشقه ازاي...؟!!!

- يعني يقصد اننا... اننا...

- اننا ايه ياعمتو...؟

- اننا متسلط علينا جن مؤذي...

- كانت عمتو بتتكلم وعلى وشها علامات رعب غير طبيعيه وان الموضوع بدأ يخوف ويرعب اكتر من الأول ...بس انا مؤمنه وموحده هخاف من ايه وعمتو نفس الكلام يبقى ليه الخوف...؟!

- ياعمتو انا لازم اشوف الشيخ ده وافهم منه ايه موضوع التميمه دي ...

- حاضر ياحبيبتي هخدلك معاد معاه ونروحله ونشوف ايه الحل للي احنا فيه ده ربنا يستر ...

- طيب ياعمتو انا هطلع عشان جايه تعبانه ومحتاجه اصلي وارتاح ...

- هتسيبيني وتطلعي وتقعدي لوحدك يافريده ...انا اخاف عليكي...

- ياحبيبتي ماتقلقيش عليا ربنا هو الحافظ محدش يقدر يقربلي الا بمشيئته...

- اللي مش قادره افهمه هو انا جايبه كل القوه دي منين... وازاي انا عارفه ومتأكده اني في كيان غريب في بيتي وطالعه انام فوق عادي ولوحدي اكيد انا اتجننت او من كتر العيشه لوحدي فقدت الأحساس...

- طلعت التليفون وكلمت فريال...الو... ايوه يافريال انا في البيت تعالي بقى عشان نقعد شوية مع بعض  وكمان احكيلك اللي حصل النهارده...

- فجأه...سمعت صوت حاجه وقعت في المطبخ عندي جامد...

- الصوت بدأ مايبقاش واضح ..الو...الووو ...فريال ...الوووو...، صوت حشرجه غريبه ونفس الصوت اللي كان بيتنفس نفس منتظم ومابيردش عليا معايا على التليفون دلوقتي ...

- الوووو...فريال...ال....

- فريده....

- "صوت غريب صوت راجل بس واضح انه عارفني " الو ...مين حضرتك ..ده تليفون صاحبتي...؟

- فريده...

- ايوه انا فريده مين حضرتك ممكن افهم هو حضرتك سرقت تليفون صاحبتي ولاايه؟؟

- اهربي يافريده...اهربي يابنتي...

- "الصوت ده مش غريب عليا كأني عارفاه او سمعته قبل كده..."

- اهربي يابنتي... انا خايف قوي ...

- بابا......!!

مش ممكن يكون ده بابا...بس ده صوته فعلا " 

- انت بابا ...؟!

- " الصوت اتغير ورجع صوت فريال وهيا بتقول ايوه يافريده انتي روحتي فين يابنتي ...

- مممم...مفيش حاجه يافريال تعالي ...عشان...نقعد سوا..

- منا بقولك مش هعرف اجيلك النهارده عندي كام مشوار عايزه اخلصهم بكره هجيلك ياحبيبتي خدي بالك من نفسك ...

- ممم...ماشي ...باي ...

- " قلبي بيدق بطريقه مرعبه وخايفه جدا وحاسه ان في صوت انفاس ورايا بتحرك خصلات شعري ...صوت انفاس منتظمه وسخنه كأن في حد كقرب بوشه جدا من ضهري ..."

- طبعا مستحيل اي حد في مكاني يلف بوشه عشان يشوف مين وراه بس انا اتشجعت وفضلت اردد

اعوذ بالله من الشيطان الرچيم ...

اعوذ بالله من الشيطان الرچيم...

اعوذ بالله من الشيطان الرچيم...

- " صرخت بااعلى صوت عندي لما شوفت وشها الأسود وعروقها النافره البيضا الظاهره من وشها وهيا واقفه ورايا بكل هدوء وبتبصلي نظره    شر مش ناسياها لحد اللحظه دي وبتتنفس بانتظام وهدوء وكأنها كانت واقفه تسمعني.."

- فجأه... مسكتني من كتافي وصرخت فيا بكل قوتها مش هتعرفي تهربي منيييي.... مش هسيبك... لازم تموتوا كلكوا... لازم تموتوا...

- فضلت اصرخ بهيستريا ودفنت وشي بين ايديا وفضلت اعيط بقوه وانا عماله اصرخ واقول انا معملتش حاجه ...انتي عايزه مني ايه ... انا مش فاهمه حاجه...

- رفعت وشي من بين ايديا لقيت كل حاجه حواليا هاديه ولاكأن كان في حاجه طلعت اجري على باب الشقه وفتحته وجريت بسرعه على السلم خبطت بجنون على عمتو ذكيه لكنها مافتحتش طلعت   اجري في الشارع زي المجنونه مش عارفه اروح فين وقفت تاكسي وقولت مفيش حل غير اني اروح لفريال الشغل واستناها ونروح سوا عند الشيخ حازم بتاعها وفعلا روحت عليها واستنيتها لما نزلت وشديتها من ايديها في وسط اصحابها ....

- ايه يامجنونه اللي بتعمليه ده في ايه ...؟!

- احنا لازم نروح للشيخ حازم بتاعك ده دلوقتي ….

فريال ماكذبتش خبر كأنها كانت مستنيه اني اطلب منها الطلب ده وطبعا انا كنت على اخري من اللي بيصحلي ده فاكان لازم اعرف ايه اللي بيحصل وليه انا اللي بيحصلي كده "

- ايه ده يافريال ده بيت عادي ..!!

- يعني ايه يافريده بيت عادي...!!

- يعني مش بيبقوا عندهم بيوت كده في حتت مقطوعه وغريبه ومخيفه وطالع منها روايح وحشه...؟!!

- " فريال ضحكت بااستهزاء " ليه ياحبيبتي هو احنا بنعمل فيلم التعويذه..؟

- والله يافريال اللي انا بشوفه ده اوحش من فيلم التعويذه بمراحل ...

- معلش ياحبيبتي ان شاء الله الموضوع هيتحل باإذن الله ماتقلقيش  ...

- " خبطنا على باب في الدور الأول خرجلنا منه شيخ محترم كده وبيبتسم ووشه بشوش مش زي مابشوفهم ولابسمع عنهم خالص..."

- اهلا بيكم نورتوني اتفضلوا اتفضلوا..

- " البيت كان منظم وريحته كويسه جدا ومفيش اي سبب يخليني اخاف او اقلق منه بالعكس انا كنت مرتاحه جدا وحاسه انه مش هيعمل حاجه اساسا.."

- طبعا انتي بتسألي نفسك يافريده انا ازاي مش زي الأفلام ومكشر كده ووشي يخوف وبيتي عامل زي الكهف والحاجات دي مش كده ...

- " بصيت لفريال بااستغراب شديد جدا بس لقيتها مبتسمه خلتني استغرب اكتر .."

- انا ...هو حضرتك عرفت اسمي منين وعرفت اللي بفكر فيه ازاي...؟!!

- يابنتي الموضوع مش محتاج... باين على تعبيرات وشك الموضوع نباهه مش اكتر انا معالج بالقرآن مش دجال ...، اما بالنسبه لموضوع اسمك فا ده عشان الأخت فريال قالتلي اسمك قبل ماتجيوا شوفتي الموضوع بسيط ازاي ...

- ايوه...تمام 

- طيب ... بصي يابنتي هنبتدي ان شاء الله مع بعض هرقيكي واقرا شوية قرآن ولو حسيتي باان المكان اللي بقرأ عليه نمل او حسيتي اي احساس غريب قوليلي تمام... 

- " بصيتله بخوف بسيط وهزيت راسي بالموافقه "

- " حط ايده على راسي وقاللي غمضي يابنتي واستهدي بالله وماتقلقيش انتي مؤمنه وموحده...، بعد وقت اقل من دقيقه سمعت صوت جهوري بيقول.."بسم الله الذي لايضر مع اسمه شئ في الأرض ولافي السماء....،

اعوذ بكلمات الله التامات من شر ماخلق...

اعوذ بكلمات الله التامات من شر ماخلق... 

- " وبدأ يقرا الآيه دي.."

- ﴿وَإِذ صَرَفنا إِلَيكَ نَفَرًا مِنَ الجِنِّ يَستَمِعونَ القُرآنَ فَلَمّا حَضَروهُ قالوا أَنصِتوا فَلَمّا قُضِيَ وَلَّوا إِلى قَومِهِم مُنذِرينَ﴾

- " فضل يعيدها كذا مره وبعدين وقف عند " ولوا الى قومهم منذرين " وفضل يعيدها اكتر من مره لحد لما حسيت ان جسمي بدأ يسخن ...وبعديها بشوية صوته وطي وقال كلام مش مفهوم ماقدرتش افهم منه حاجه لأنه كان زي همهمه مش واضحه...بعد شوية صوته علي تاني وبدأ يبقى اقوى وهو بيقول.."

- ﴿وَاستَفتَحوا وَخابَ كُلُّ جَبّارٍ عَنيدٍ۝مِن وَرائِهِ جَهَنَّمُ وَيُسقى مِن ماءٍ صَديدٍ۝يَتَجَرَّعُهُ وَلا يَكادُ يُسيغُهُ وَيَأتيهِ المَوتُ مِن كُلِّ مَكانٍ وَما هُوَ بِمَيِّتٍ وَمِن وَرائِهِ عَذابٌ غَليظٌ﴾

بدأ جسمي يترعش ونفسي يبقى سريع جدا وبدأت احس كأن نافوخي بيتشد من راسي وبيخرج لدرجه ان نن عيني بدأ يترفع لفوق وحاسه بشلل تام في جسمي ....، 

- فجأه...قومت وقفت مكاني ورفعت راسي لفوق وصرخت صرخة مرعبه من كتر الألم اللي حسيت بيه وكأن كان فيه حاجه بتخرج من رقبتي لأني حسيت ان في حاجه كبيره محشوره فيها...."

                   الجزء الرابع من هنا 

لقراءة باقي الفصول من هنا