قصة التميمه الجزء الرابع4بقلم محمد عباس

قصة  #التميمة 

الجزء الرابع

بعد مافوقت لقيت نفسي نايمه على الكنبه وفريال قاعده 

جمبي بتعيط واول ماشافتني فتحت حضنتي جامد وقالتلي 

الحمدلله انك قومتي بخير ياحبيبتي انا كنت هموت عليكي ..."

- هو...ايه اللي حصل يافريال انا اغمى عليا ليه...؟!

- هاه...مممم...مفيش ياحبيبتي انتي تعبتي بس وضغطك وطي...

- هاه ايه يافريال قوليلي بالله عليكي ايه اللي حصل انا فيا ايه ...؟؟

- " حطت راسها في الأرض وقالت بحزن شديد جدا "

- انتي تقريبا كده ملبوسه يافريده ...في جن لبسك...

- " ممسوسه " ..." صوت الشبخ حازم جاي من بعيد وهو شايل كباية عصير وجاي بيها ليا..."

- اللفظ الصحيح يافريال يابنتي انها ممسوسه هيا الحمدلله مااتلبستش بس اللي مستها جنيه مش جني وانا اتأكدت لما صاحبتك جاتلي ان الموضوع كبير اكبر من المس واللبس في حلقه في الموضوع مش مفهومه ...انا مش عارف اكمل الصوره في عقلي ...، الكلام اللي انتي بلغتيني بيه وحكيتهولي كله مظبوط ومنطقي على اللي شوفته النهارده انما في حاجه انا مش فاهمه او مش عارفه ومحتاج اجي البيت عندها عشان اشوفه واعرف اكتر بااذن الله...

- مفيش مشكلة ياشيخ ممكن حضرتك تشرف في اي وقت بس حضرتك ممكن تبينلنا الفرق بين المس واللبس...

- بس كده بسيطه ياستي شوفي... 

- المس : هو عارض من الجن يمس الانسان .. يعنى أذى روحاني يؤثر على الإنسان ويجعله يتخبط في حياته .. وهو له درجات مختلفة .. ويندرج تحت هذا المسمى كل أنواع الاتصال الروحاني الذي به ضرر ..

- اما اللبس : وهو مس يسبب صرع من الجنى للانسان .. سواء عشقا أو انتقاما  ...

- اااه...يعني افهم من كده ان اللبس ده هو المؤذي اكتر من المس...؟؟

- تمام يابنتي ..مظبوط كده...

- طب والموضوع ده ليه حل ياشيخ حازم...؟؟

- يابنتي ربنا ليه حكمه في كل حاجه بتحصل في حياة الإنسان ومفيش ضرر ولانفع الا بااذنه ...ارمي حمولك على ربنا وماتقلقيش بااذن الله كله هيتحل...

- " بصيت لفريال والدموع في عيني واترميت في حضنها ..."

- " واحنا مروحين فريال حبت تغير الموود العام لقيتها بتقولي ..."

- شايفه ياهانم ضيعتي عليا اليوم كنت رايحه اجيب هديه ليكي بمناسبة الشغل الجديد وسيادتك نستيني بموضوعك ده ...ينفع كده..؟؟

- " بصيتلها باابتسامه خفيفه كده وحضنتها تاني.."

- ربنا مايحرمنيش منك يافريال انتي فعلا اختي اللي من لحمي ودمي اللي ربنا كرمني بيها ...بجد مش عارفه من غيرك كنت هعيش ازاي...

- عيب يافريده لما تقولي كده انتي مش صحبتي انتي حته مني وانتي عارفه اني مليش غيرك في الدنيا دي عمري ابدا مااشوفك عايزاني جمبك واتخلى عنك حتى لو فيها حياتي...

- انا عارفه ياحبيبتي انا عارفه ربنا يخليكي ليا ...

- هاه...قوليلي بقى عملتي ايه في الشغل النهارده ..؟؟ 

حكيتلها كل حاجه لحد اما وصلنا البيت وانا طالعه مع فريال باب عمتو ذكية اتفتح ولقيتها بتجري عليا زي المجنونه ومسكتني من ايديا الأتنين 

- كده يافريده تقلقيني عليكي ..كده ياحبيبتي..؟ 

- " وبصت لفريال بصه شر غريبه جدا اول مره احس ان عمتو ذكيه بتكره فريال قوي كده ولقيتها بتصرخ فيها وبتقولها.."

- انتي عملتي فيها ايه وخدتيها وديتها فين...؟؟

- ااا...انا...انا

- انتي ايه ...!!

- انتي اللي زيك ماتنفعش تكون صاحبه اكيد انتي اللي بتأذيها كده عشان غيرانه منها اكمنها احلى منك...

- عمتو....ايه اللي انتي بتقوليه ده...، عيب مش كده ياعمتو...

- " فريال كانت بتبص لعمتو ذكيه وهيا مستغربه كلامها وردودها جدا اللي مش طبيعيه دي ...لفيت ليها وقولتلها معلش يافريال حقك عليا هيا بتخاف عليا بس ...ماتقصدش انها تزعلك بكلامها ده..."

- ولايهمك يافريده مفيش حاجه حصلت والتفتت لعمتو ذكيه...على فكره انا بحب فريده اكتر من نفسي وعمري ماافكر اأذيها ولو كنت غيرانه منها زي مابتقولي كنت اذيتها من زمان احنا اخوات مش اصحاب وانا مليش غيرها عشان اأذيها ولاابقى اخلص منها انا كنت مودياها لشيخ قريبنا محترم عشان يعرف ايه اللي بيحصلها ده....

- شيخ....!!

- شيخ مين ده ..؟!

- وبتروحيله بمناسبة ايه يافريده انتي مش قولتي انك هتيجي معايا...؟!

- " بصيت لفريال فيما معناه ايه اللي انتي هببتيه ده "

- لا لا لا ياعمتو ياحبيبتي ده مش شيخ ده مقرأ كده فضل يقرا عليا شوية قرآن وبس وحياتك الموضوع مفهوش شيوخ ولاحاجه من دي ...

- " بصت ليا بنظره عتاب خلتني اراضيها واستسمحها.."

- ياحبيبتي انا عارفه انك عايزه مصلحتي وخايفه عليا بس فريال دي حته مني مش ممكن تأذيني ولااتخيل انها ممكن تعمل حاجه تضرني...

- ماشي يافريده ياحبيبتي اللي انتي عايزاه بس برضو هتشوفي الشيخ ابو الحسن ولازم اخدك ليه والا انتي حره هزعل منك وانتي عارفه انا زعلي وحش ازاي...

- انتي هتضحكي عليا انا هو انتي تقدري تزعلي مني اساسا يابكاشه انتي

- كده... عشان عارفه انا بحبك اواي بتستغلي ده يالئيمه ...ماشي والله هوريكي ...

- " فضلنا نضحك انا وفريال واحنا طالعين على السلم بس ماكنتش اعرف ان عمتو ذكيه لسه بتتابع فريال بنظره كلها شر وغل كأنها متأكده فعلا انها بتعمل حاجه فيا وعايزه تأذيني..."

- " ريحت جسمي على السرير شوية ولقيت نفسي بروح في سااابع نومه ماصحيتش غير الصبح على جرس المنبه قومت جري عشان البس واجري   على الشغل ...، لقيت فريال سايبالي ورقه جمب الكومدينو كاتبالي فيها انها مشيت بعد مانمت وسابتلي فطار على الترابيزه جاهز عشان لو قومت تعبانه الصبح... اه يابت انتي لو كنتي راجل...كنت اتجوزتك يابنت اللذينه ياجدعه انتي من اول مااعرفك..."

- صباح الخير ياندى...، صباح الخير ياشذى 

- اهلا...صباح النور يافريده ...اخبارك ايه النهارده..؟

- الحمدلله تمام زي الفل...

- واخبار المز بتاعك ايه...؟؟

- " شذى خبطتها على كتفها باايديها وقالت "

- مز ايه يابت انتي واحنا مانا عندها مز ولا لا يخصك انتي ايه؟؟

- يابت يارخمه انتي بهزر معاها ايه مااهزرش معاها ...!!

- " ضحكت وقعدت على مكتبي " هو انتوا كده دايما ناقر ونقير مابتفصلوش ...؟!

- " بصت شذى لندى وقالت "وتفصل ليه هيا وراها ايه غير الكلام ...

- ماشي يختي سبنالك السكوت ويلا اقعدي بقى قعدت عليكي عربيه ...

- يانهار اسود...م/رؤوف اجري اجري..

- صباح الخير يااساتذه...ياريت النهارده تعرفوا ان اليوم مهم جدا ومفيش اي مجال للغلط النهارده لأن اللي هيغلط هزعله بجد وانا عرفت ان في وشوش جديده معانا في الشركة اهلا بيكم وشرفتونا طبعا بس احب اقولكم لو عايزين تكملوا معانا هنا انسوا ان في حاجه في الحياه اسمها دلع او عدم انضباط لأني مابسمحش بغلطه اولى عشان اسمح بتانيه...ياريت يكون كلامي مفهوم...

- " سكوت تااام في المكتب ومحدش رد نهائي الا انا الوحيده اللي قولت...مفهوم ياافندم..!!!

- لدرجة ان كل الناس بصتلي بااستغراب...حتى م/رؤوف نفسه بصلي بااستغراب وبعد كده كمل كلامه..."

- جميييل استاذه فريده هيا الوحيده اللي فايقه على الصبح وعارفه شغلها تمام ...

- ياريت تشرفيني بعد ربع ساعه ياانسه فريده في مكتبي هستناكي بعد ربع ساعه لو اتأخرتي دقيقه ياريت ماتخبطيش على الباب وخليكي قاعده مكانك...

- " بصيتله بااستغراب وحركت راسي في خوف بالموافقه يعني..."

- يابنات ده شكله صعب قوي هخش جوه ليه ده ممكن يرفدني لو قولتله كلمه كده ولاكده ...

- ردت شذى عليا بثقه يابنتي ماتقلقيش هو بيحب البنات والشباب اللي بيحبوا شغلهم وبيحافظوا عليه بينيله بس انتي انك بتحبي شغلك وهو احتمال يرقيكي ...

- ماشي اما اشوف ايه اخرتها معاكي ياشذى...

- اخرتها عنب ان شاء الله ماتقلقيش انتي بس خشي وادعيلي...

- " عينيا راحت لندى اللي لقيتها بتبصلي بغل مبالغ فيه وكنت مستغربه جدا خصوصا اني مليش ذنب في اي حاجه من اللي حصلت …"

بصيت في ساعتي لقيت باقي دقيقه على الوقت جريت بسرعه ناحية مكتبه وعدلت هدومي وخبطت ودخلت..."

- صباح الخير يام/رؤوف.. 

- " شاورلي باايده اني ادخل واقفل الباب واقعد.. لأنه كان معاه تليفون واضح انه عميل مهم..."

- ياافندم ازاي...تحت امر حضرتك...انا بقول لحضرتك انك تقدر تعتبر الموضوع منتهي فلوسك هتوصلك مع هدية شخصيه مني وياريت تقبل اعتذاري ...، ميرسي ياافندم لزوق حضرتك ده شرف ليا خدمتك وشرف للشركة ان حضرتك عميل فيها...مع السلامه ياافندم ...

- انسه فريده عبدالله...ممم...انا على فكره شوفت ملفك ومؤهلاتك كويسه جدا...بس يارب تكوني مجتهده زي اللي في الورق مظبط والشركه تقدر تستفيد منك ...

- ياافندم انا بحب الشغل جدا حضرتك ماتقلقش من النقطه دي نهائي...

- لازم تحبي الشغل ياانسه فريده لأني معنديش حد بيكره شغله عشان اللي بيكره شغله مايستحقش يكون فيه...ولاانتي شايفه ايه؟!

- اكيد ياافندم كلام حضرتك صح مليون الميه...

- تمام...اكيد انتي سمعتي عني كلام كتير واني مؤذي والحاجات دي صح...؟

- الحقيقه...انا مابعرفش اكذب ياافندم وفعلا اه الكلام ده انا سمعته...بس... انا متأكده ان حضرتك ممكن تكون عصبي انما مش مؤذي يعني...

- لا...خالص...انا اكتر من كل الكلام اللي سمعتيه بره ده هما لسه لحد دلوقتي ماشفوش مني وش وحش ...انا لسه لحد دلوقتي ظريف معاهم ياريت تكوني فاهمه الكلام ده لأني مابقبلش بغلط في الشغل نهائي...

- ياافندم...انا قولت لحضرتك اني بحب شغلي جدا ومخلصه فيه ...يعني بلاش اسلوب التهديد ده لأنه اسفه يعني ملوش لازمه انا لو حسيت اني غير جديره بمكاني في الشغل او الشركة احسنلي اسيب مكاني لحد يستفيد بيه ويكون اجدر مني بيه ...

- " حسيت انه استغرب كلامي جدا واتعدل في الكرسي بعد ماكان تقريبا متحفز انه يطردني بره مكتبه..."

- تمام...كلام جميل وانا اسف مكانش قصدي اهددك بس انا بفهمك اني مابحبش التقصير ايا كان نوعه في الشغل وبما انك جديده وانا متأكد ان شاء الله   انك خامه كويسه وهتفيدي الشركة حبيت اتكلم معاكي كلمتين على انفراد عشان تكوني عارفه طبيعة مديرك وتتعاملي معاه على اساسها...

- ماتقلقش ياافندم انا عارفه حدودي كويس مش مع حضرتك بس مع اي حد وقواعد شغلي حفظاها صم زي اسمي واقدر اسمع لحضرتك دلوقتي طريقة الشغل في الشركة وطبيعة عملنا كشركة ادارية ومحاسبيه

- تمام...لا مش محتاج اعرف انا متأكد منك واتفضلي تقدري تروحي على مكتبك...

- افففف... ده انسان لايطاق فعلا...، انتي بتحبيه على ايه ده ياندى...؟!! 

- وسامته ..." قالت كده وهيا سرحانه في ملكوت تاني وشذا كانت بتبصلها وبتضحك على طريقتها " 

- على ايه ياروحي...؟؟

- وسامته...

- " طبعا وقعنا من الضحك عليها"

- " كان يوم شغل مرهق جدا ...فعلا تعبت فيه...ده انا هروح اترمي على السرير مااقومش ...ياااه...كنت بفكر وبحلم بسريري وانا بطلب الأسانسير   لاني اخيرا مروحه احنا في الدور ال١٥...دوست على الدور الأرضي وياريت ينزل بااسرع حاجه في الدنيا بس ماكنتش متخيله ان امنيتي هتتحقق..."

- الأسانسير فعلا قفل الباب بسرعه غريبه جدا ولقيته بيرتفع بدل ماينزل وطالع على الدور ال٢٠ لوحده ...، مسكت في الحديده اللي في جمب الأسانسير وبدأت اصرخ من سرعه الأسانسير لأني كنت خايفه جدا لان ده الدور الأخير...عداد الأسانسير بيعد بسرعه رهيبه جدا وفجأه...وقف في الدور العشرين وفتح الباب عشان الاقي...دور مهجور تمام وكأنه ساكنه اشباح وضلمه جدا ...خرجت راسي عشان ابص يمكن يكون في حد يساعدني ويشوف الزفت ده باظ ولاايه اللي حصله بس... مالقتش حد نهائي ...

- في حد هنا... ياجماعه...الأسانسير في....في مشكله...

- سمعت صوت خطوات جايه من بعيد منتظمه بس مفيش حاجه واضحه لأن الدور كله ضلمه زي ماقلت ...

- واحده واحده بدات توضح قدامي دي....دي فريال !!!

- مش....مش ممكن...!!!

- فريال عينيها بتبرق في الضلمه زي عيون القط...

- لا...مستحيل.. قلبي بدأ يتنفض وبدات اتنفس بسرعه رهيبه ودقاته زادت بجنون لما لقيتها بدأت تسرع خطواتها وتجري ناحيتي وهيا بتصرخ جامد وبتقول التميمه يافريده التميييييمه.... هاخد روحك يافريده هاخد روحك...

- بسرعه دخلت الأسانسير ودوست على الأرضي لكن...الباب مابيقفلش...اقفل بقى اقفل...، فضلت ادوس على الزراير كلها وفريال جايه بتجري عليا وبتصرخ هاخد روحك يافريده ….

- " باب الأسانسير قفل على ايد فريال...، فتحت الباب ودخلت وهيا بتضحك ضحكه شيطانيه ووشها كلها اسود وعينيها بيضا تماما وهيا بتقول ..غمضت عينيا وفضلت اقول ..."

- اعوذ بكلمات الله التامات من شر ماخلق

- اعوذ بكلمات الله التامات من شر ماخلق 

- " فضلت اردد فيها اردد اردد... لحد ماحسيت ان مفيش حاجه حواليا ...، فتحت عيني في وسط ذهول الموظفين اللي واقفين قدام باب الأسانسير اللي انا ماسكه بابه باايدي ومغمضه عيني ولسه في نفس الدور بتاعي ..."

- كنت هموت وقلبي كان هيقف من مجرد حلم...؟!!

-" حسيت ان الناس في الأسانسير خايفين مني وبيحاولوا يبعدوا عني ...، لما وصلت الدور الأرضي طلعت في الشارع عشان الاقي ندى وشذى   واقفين بيتكلموا مع بعض وبيبصولي بحذر شديد...طبعا انا حطيت عينيا في الأرض ومشيت وتقريبا كنت بجري ووقفت اول تاكسي شوفته قدامي ..."

- الووو ايوه يافريال ...،

- لا مش وقته انا لازم اشوفك النهارده ضروري ...،

- لا الموضوع مايستناش ...،

- خلصي يافريال...،

- بطلي هزار بقى ...،

- ايوه يعني هتيجي وتجيبي الشيخ حازم طيب تمام هستناكي ...باي

- " لما وصلت البيت كنت تقريبا ماشيه بكلم نفسي ...ده حتى سواق التاكسي خاف مني وكان مبرقلي جامد وانا بديله الأجره لدرجة اني حسيت انه عايز يجري مني ... عمتو ذكيه فتحت الباب وانا طالعه عالسلم وجريت عليا..."

- كده يافريده بقيتي بتيجي من غير ماتعدي على عمتو ذكيه ...كده ؟!

- رديت بااعياء شديد ...معلش ياعمتو حقك عليا انا جايه تعبانه ومش عارفه اتكلم خالص ...

- طيب ياحبيبتي تعالي بس في ضيف عندي عايز يسلم عليكي ...

- ضيف مين ده ياعمتو..؟!!

- تعالي بس وانتي تشوفيه...

- " مااستناش الضيف اني ادخل البيت لأنه فتح الباب بتاع شقة عمتو وشوفته...شخص يخوف ...تحس ان وشه عليه علامات غضب وشر مش طبيعيه...، عينه كلها شر وخبث ...شخص تخاف منه حتى من ضحكته الغريبه اللي بيضحكهالي دي ..."

- انسه فريده...كان نفسي اشوفك من زمان .."ومد ايده عشان يسلم عليا وبمجرد مامسك كف ايدي شده جامد ناحيته وبدأ يبص فيه وهو مبتسم ابتسامه فعلا غريبه..."

- اااه تمااام...يظهر ان كلام عمتك صح ...

- كلام عمتي...كلام ايه ده ؟!!!

- كلام عمتك ذكيه في الحاجات اللي بتشوفيها وبتقابلك...

- ايوه يبقى حضرتك الشيخ ابو الحسن...ايوه عمتو قالتلي عليك...

- " بصلي بخبث وضحك ضحكه سمجه قوي.."

- ايوه انا ابو الحسن...سيدك ابو الحسن ...

- سيدي...!!!

- ده من انهو ناحيه يعني ...؟!!!

- " لقيت عمتو ذكيه بتشدني من ايدي وبتقولي...عيييب ده البركه بتاعة عيلتنا ... كلميه كويس بدل مايزعل منك .."

- انا معرفش غير سيد واحد بس وهو سيد الكون ربنا سبحانه وتعالى...

- " ابتسملي بنفس الإبتسامه المخيفه تاني ..وقرب من ودني وقاللي.."

- انتي فاكره انه هينفعك..؟؟

- انتي فاكره انه هيقدر يقف جمبك او يساعدك ؟؟

- هو مين ده انت تقصد ايه بكلامك ده ..؟!!!

- انا اقصد اللي جايلك النهارده...

- وسابني ودخل وساب باب الشقه مفتوح...

- " انا من الصدمه بقيت واقفه مذهوله وسط ابتسامه غريبه مرسومه على وش عمتو ذكيه ... طيب هو ممكن يكون عارف موضوع الشيخ من عمتو انما محدش يعرف انه جاي النهارده واني مكلمه فريال عشان تيجي وهيا اللي قالتلي ... مشيت وراه للبيت عشان احاول افهم منه هو عرف ازاي..."

- وحضرتك عرفت منين انه جاي النهارده ...

- هو انتي فاكره انا مش هعرف ايه اللي هيحصل لما هو هيجي هنا ويطلع معاكي فوق لشقتك...يابنتي انتي مفيش حد في الكون بحاله هيقدر يطلعك من اللي انتي فيه ده غيري انا ...

- غيرك..!!

- غيرك ازاي ؟!

- انا بس اللي اقدر احلك مشكلتك وابعدها عنك...

- هيا مين دي ...!!

- اللي بتجيلك وعايزه تنتقم منك ومن كل القريبين منك...

- " فضلت بصالو بخوف كبير جدا وفضلت ارجع لورا من خوفي لحد مالتفتت وطلعت اجري ... بس سمعت صوته جاي من بعيد وهو بيقول "

- مسيرك هتجيني عشان اساعدك هاه ماتنسيش...

- " فتحت باب شقتي بسرعه ودخلت جري غيرت هدومي واتوضيت عشان اصلي ...بس الغريبه اني بعد ماخلصت صلاه وقومت اشيل السجاده حسيت اني مش فاكره حاجه...مش فاكره اذا كنت صليت    ولا لا اساسا..، لميت المصليه واستنيت لحد مااتصلت بيا فريال وقالتلي انهم جايين قومت عشان اوضب الشقه واعدل الحاجات الغريبه اللي كل يوم بشوفها من فرش بيتشال لوحده لعفش بيتحرك من مكانه حاجات كده ظريفه بتحصل... وبصراحه اتعودت عليها "

- اهلا وسهلا ياشيخ حازم نورت...

- اهلا يابنتي السلام عليكم...

- اتأخرتي ليه يافريال...؟؟

- ابدا والله يافريده ده الطريق كان وحش بس ماانتي عارفه ان التوقيت ده غلس كده...

- " وطيت عليها وهمست في ودنها..." 

- هو الشيخ ماله ...شكله مجهد وتعبان والعرق ماله نازل عليه كتير كده ليه ...

- مش عارفه يافريده ..، بس هو كان جاي كويس واول ماطلع على أول سلمه ابتدى ينهج جامد ويعرق زي ماانتي شايفه كده...

- استر يارب ...

- " الشيخ حازم كان عمال يلف في الشقه ويبص للسقف وهو متوتر وباين عليه الإجهاد..، لما وصل عند الحمام وقف وفضل يهمهم بكلام مش مفهوم وبعد شوية مسح باايده على وشه وفتح الباب ببطئ وقال بصوت عالي "

- اعوذ بك من الخبث والخبائث

- اعوذ بك من الخبث والخبائث

- اعوذ بك من الخبث والخبائث

- " ودخل...اول مادخل شمينا ريحه فظيعه مقرفه جدا لدرجة انها كانت اوحش من اللي كنت بشمها قبل كده ... وبدأ يتكلم بصوت جهوري.."

- اقسمت عليكم يا معاشر الارواح الروحانية والاملاك الارضية الطاهرة ان تاتوا الي مسرعين سامعين طائعين بعزة..

- ارشدونا...اقسمت عليكم بال ن وال ق...ارشدونا....

- اقسمت عليكم بملك سليمان من حكم الجان...

- ارشدونا...

- ارشدونا...

- ارشدونا...

- " وبدأ يكرر كلمة ارشدونا وهو مغمض عينه وكل مره صوته بيعلى عن المره اللي قبليها وبيقولها بقوه اكتر ... لحد ماسكت مره واحده...وفتح عينه وكانت بيضا تماما...، احنا الأتنين اتخضينا ورجعنا لورا لدرجة اننا خبطنا في باب الحمام فاصرخنا ..."

- " بدأ الشيخ حازم يتحرك في الحمام بهيستريا كأنه اسفه يعني بيشمشم زي الكلاب في كل حته ... احنا كنا مستخبين في جمب كده وخايفين جدا لدرجة اننا بدأنا نبكي من غير مانحس ... لحد مافلحظه    وقف قدام المرايه اللي في الحمام ... انا عندي مرايه كده متعلقه على الحيطه في الحمام بس قديمه شويه من ايام ستي الله يرحمها بس انا عمري ماشكيت انها ممكن تكون فيها حاجه او مؤذيه... بدأ يقرب من المرايه ببطئ ويبصلها كأنها حاجه جديده بالنسباله اول مره يشوفها وفجأه...رفع المرايه ولقينا وراها.....

- مش ممكن....!!!

- مستحيل يكون اللي عيني شايفاه ده حقيقي ...!!! 

- " انا اعرف شكل الأعمال وكده انما اول مره اشوف عمل مكتوب بالدم حقيقي في حياتي كلها ... اول ماالشيخ شاف الطلسم والكلام المكتوب اغمى عليه ووقع على أرض الحمام..."

- ياخبر ابيض الحقي يافريال الراجل وقع لايكون مات...

- لايابنتي مات ايه ده تلاقيه اغمى عليه..

- الله يخربيتك انتي هتودينا في داهيه...

- تعالي شديه معايا نقعده بره على الكنبه عشان نفوقه ولانشوف هنتصرف ازاي معاه...

- " كنا بنشيله بصعوبه جدا بس الحمدلله قدرنا نحطه على الكنبه في الصاله وجبناله ميه وبدانا نفوق فيه لحد ماالحمدلله فاق وفضل يذكر ربنا كتير ويستعيذ بالله ويتنفس بسرعه غريبه ..."

- هاه ياشيخ ... انت الحمدلله بقيت كويس دلوقتي ..؟؟

- الحمدلله يابنتي ...الحمدلله...

- ايه اللي حصل ياشيخ احنا قلقنا عليك جدا ...؟؟

- ماتقلقيش يابنتي انا متعود على كده ...

- طيب ايه اللي حصل ياشيخ...حضرتك ....عينك...بقت..غريبه جدا كده وابيضت احنا خوفنا لايكون حصلك حاجه...!!!

- " الشيخ بصلنا بااستغراب وخوف وباين عليه التوتر جدا ووقف مره واحده وقال احنا لقينا ايه في الحمام...؟؟ "

- " لقيناه جري على الحمام بسرعه ومسك المرايه كسرها وبص ورا المرايه ..لقينا حروف مكتوبه بالمقلوب جوه مربع حواليه ارقام ورموز غريبه والحروف كانت كالتالي.... " ا ذ ى .. ا ج ه ا د .. خ و ف "

- " ولقينا رجل فرخه...او ديك... مربوطه وملفوف عليها ورقه... الشيخ مسك الرجل وفك من عليها الرباط وفتح الورقه... دي مش ورقه ...دي ...دي صورتي وانا صغيره....!!!!

- " اتخضيت وحطيت ايدي على بقي عشان اكتم الصرخه اللي كانت هتخرج مني ...."

- دي صورتي ياشيخ ...صورتي ...!!

- معلش يابنتي ... اللي بيبقى عايز يأذي بيعمل اي حاجه عشان يأذي حتى لو هو كمان ممكن يتأذي ...

- " بصيت لفريال والدموع في عيني وحابسه جوايا مليون سؤال ومش عارفه اقولها ايه ..."

- انتي .... انتي بتبصيلي كده ليه يافريده...؟!!!

- انتي... بتشكي فيا يافففريده...؟!!

- " انا مش عارفه اتكلم وساكته ..ومش متخيله انها ممكن تعمل فيا كده بس مش قادره اقولها حاجه لأني مش معايا دليل بس انا مفيش حد    بيخش بيتي غير عمتو ذكيه وهيا ..وعمتو ذكيه اضعف من انها تعمل حاجه زي كده وهيا اصلا بتحبني جدا وطول عمرها عايشه معانا وكأنها من عيلتنا ..."

- انا... مش قادره اصدق يافريده ... مش ممكن تكوني بتشكي فيا ومصدقه كلام عمتك ذكيه المجنونه دي ...

- ماتقوليش عليها كده يافريال هيا مش مجنونه ...

- " فريال بعدت عني وملامح وشها باين عليها الصدمه الكبيره في موقفي بس. انتوا حطوا نفسكوا مكاني هتفكروا في ايه لو في موقفي…. 

                    الجزء الخامس من هنا

لقراءة باقي الفصول من هنا