قصة #التميمة
الجزء الأخير
انا مش عارفه اتكلم وساكته ..ومش متخيله انها ممكن تعمل
فيا كده بس مش قادره اقولها حاجه لأني مش معايا دليل بس
انا مفيش حد بيخش بيتي غير عمتو ذكيه وهيا ..وعمتو ذكيه
اضعف من انها تعمل حاجه زي كده وهيا اصلا بتحبني جدا
وطول عمرها عايشه معانا وكأنها من عيلتنا ..."
- انا... مش قادره اصدق يافريده ... مش ممكن تكوني بتشكي
فيا ومصدقه كلام عمتك ذكيه المجنونه دي ...
- ماتقوليش عليها كده يافريال هيا مش مجنونه ...
- " فريال بعدت عني وملامح وشها باين عليها الصدمه الكبيره
في موقفي...بس... انتوا حطوا نفسكوا مكاني هتفكروا في ايه لو في موقفي
كان قلبي بينخلع مني وفريال بتجري على باب الشقه وهيا
منهاره من العياط ومش مصدقه اني بشك فيها ...بس.. انا بني
ادمه برضو وكل الدلائل بتقول انها هيا ..، والكارثه الأكبر ليييه تعمل فيا انا كده..؟!!
ده انا مليش غيرها في الدنيا بحالها ..!! "
- وحدي الله يابنتي ...، انا لو في ايدي اعرف مين اللي عمل كده وبيحاول يأذيكي كنت ساعدتك بس انا مش هقدر احدد لأن في عالم الجن العلاقات مختلفه عننا هنا ...
- " رديت على الشيخ حازم وانا مش قادره اوقف نهر الدموع من عيني
- ايوه ياشيخ بس دي صحبتي الوحيده وعمري مااعتبرتها غير اختي ... ازاي تعمل فيا كده ؟!!
- يابنتي ماتنسيش انك لسه مااتأكدتيش من انها هيا اللي عملتلك العمل ده ... وبعدين ... لو اتكلمنا بالعقل هتلاقي ان صحبتك لو فعلا هيا اللي كانت عايزاكي تتأذي منين عملتلك العمل ومنين كلمتني عشان اشوفك واعرف مشكلتك وهيا عارفه اني مش بقبل اي حد ولابتعامل مع اي حد ...؟
- " بصيتله بااستغراب ودهشه لأني جوايا مش قادره اصدق ان ممكن فريال تعمل فيا انا كده .."
- طب... وانا اقدر اتأكد ازاي ياشيخ حازم ؟؟
- بصي يافريده يابنتي .. مااكذبش عليكي انتي موضوعك كبير وصعب انا اللي استشفيته من بيتك من وقت ماجيت ان الموضوع ملوش علاقه بعمل واذى وبس انتي في حاجه كبيره مش مفهومه فيكي او في البيت نفسه ...
- البيت...!!
- ايه افتكرتي حاجه معينه نسيتي تقوليلي عليها...؟؟
- " جريت بسرعه على اوضتي وجبت القلاده اللي تشبه التميمه اللي اديتهالي فريال واديتها للشيخ حازم وحكيتله كل حاجه وازاي وصلتلنا ...، فضل يبص فيها شوية واستغربها جدا وبعدين بصلي وقال .."
- انا اول مره في حياتي اشوف حاجه زي دي يابنتي..؟؟
- بس ده مايمنعش انها ممكن تكون اللي ورا الموضوع ده كله ...، سيبيني ابحث عنها في الأنترنت واشوف هقدر اوصل لاايه ...
- ربنا يخليك ياشيخ حازم ...، والله بجد من غيرك انا مش عارفه كنت ممكن اعمل ايه ...
- ولا اي شكر يابنتي انتي وفريال زي بناتي وصحبتك انسانه محترمه وغاليه عندي جدا وانا متأكد من برائتها انتي دلوقتي اللي تقدري تحددي مين بيدخل بيتك غير فريال وممكن يأذيكي فعلا ..
- مفيش غير.... عمتو ذكيه...!!!
- بس ده مش ممكن...!!
- مش ممكن ليه يافريده يابنتي هيا معصومه من الغلط ؟؟!
- مش قصدي ياشيخ بس.... عمتو ذكيه طول عمرها معانا في البيت هنا وعمرها ماكانت مؤذيه ولا شوفنا منها حاجه ابدا مش كويسه بالعكس ده اهلي كانوا معتبرينها مننا ...
- طيب انتي ممكن تخليني اشوفها عمتك ذكيه دي ...؟؟
- اكيد مفيش مشكلة ممكن واحنا نازلين نعدي عليها ...
- طيب يلا بينا يابنتي نتوكل على الله دلوقتي ...
- " اول ماوصلت عند باب عمتو ذكيه خبطت على بابها مره...واتنين...وتلاته... بس ... مفيش حد بيرد ...!!! "
- يمكن تكون نايمه يابنتي ...طب ابعدي كده عشان عايز اشوف حاجه...
- " الشيخ قربت ودنه من الباب ببطئ شديد وبدأ يقول كلام مش مفهوم بالنسبالي صعب جدا ومش هقدر احفظه ... وفجأه..، عينه برقت بطريقه مش طبيعيه وبصلي بصه خوف وفزع رهيبه وكان باين عليه انه متوتر فعلا…" يلا يافريده يابنتي نمشي من هنا دلوقتي ...
" وشدني من ايديا عشان اجري معاه بره في الشارع ..."
- في اي ياشيخ هو حضرتك...سمعت ايه ..؟؟
" فضل يجري في الشارع كأن حد بيجري ورانا ومش عايز يقف ولاحتى يرد عليا ..، وقف تاكسي وركب وهو مفزوع وقاللي.."
- هكلمك النهارده بااذن الله اوعي تدخلي البيت دلوقتي روحي لصحبتك بسرعه عشان تطمني عليها...
- " انا مش فاهمه حاجه .. ايه اللي حصل خلاه يطلع يجري كده ...؟؟!!
- طلعت موبايلي عشان اتصل بفريال الحقها المجنونه دي عشان ماتعملش حاجه في نفسها ... الجرس رن ... "
- الوو.. حقك عليا يافريال...
- الووو...
- فريال ياحبيبتي والله ماكنت اقصد ...دي لحظة انفعال وكنت مصدومه من اللي لقيناه...
- الووو....
- " انا سامعه صوت انفاس ... بس.. انفاس خايفه ومتوتره مش مظبوطه... وفجأه اتكلمت وهيا بتبكي بخوف وصوتها مرتجف جدا..."
- الحقيني يافريده...
- الحقيني... وقفلت السكه في وشي...!!!
- فريال... الوووو... يافريال...
- " وقفت تاكسي بسرعه وركبت زي المجنونه وقولتله اطلع بسرعه يااسطى ... "
- خير ياانسه ان شاء الله ماتقلقيش...
- تمام خير بااذن الله بس ياريت بسرعه الله يخليك...
- ماتقلقيش ان شاء الله مايحصلش حاجه ...
- " بصتله في المرايه بااستغراب ..." حاجه زي ايه مش فاهمه...؟!!
- زي ان فريال مثلا تموت..... " وفجأه وشه قلب في المرايه وعينه اسودت وبدأ بضحك ضحكه شيطانيه .... طبعا انا صرخت وفضلت اقول.."
- نزلني هنا ... حالا ...
- نزلني بقولك وقف العربيه دي ...
- " التاكسي وقف نزلت من العربيه جري ... وببص للسواق لقيته ... بني ادم عادي جدا ومفهوش اي حاجه ...!!!
ولاعيون سودا... ولابيضا ولا اي حاجه...!! "
- انا... اااسفه جدا ... ماقصدتش اني....
- الله يخربيتكوا تعبتونا معاكوا بطلوا شرب بقى دماغكوا اتلحست... روحي ياانسه الله يسهلك ...
- " انا كده اتجننت رسمي خلاص ... كده مبقاش فيا اي ذرة عقل ..."
- " لما وصلت عند باب شقة فريال وانا بنهج ...، فضلت اخبط بشكل هيستيري وماكنتش قادره افكر في اي حاجه غير ان قلبي هيتخلع من خوفه عليها ..."
- مين اللي بيخبط كده ده ...، حاضر ياللي عالباب اصبر شوية ...
- "صوت ماما فريال جاي من جوه بس واضح ان مفيش حاجه ان شاء الله لأنها صوتها عادي ... دقات قلبي مع كل خطوه من خطوات ام فريال بتقربها من الباب بتنتظم وبتطمن..."
- فريده...مالك يابنتي جايه وشك مخطوف كده ليه..؟؟!
- معلش ياماما انا اسفه ياحبيبتي على طريقة خبطي دي بس فريال فين ...؟؟
- فريال... هيا كلمتني وقالتلي انها هتتأخر معاكي ...
- كلمتك امتى ياماما بالظبط..؟؟
- يعني ياحبيبتي ... من ٣ ساعات كده تقريبا ...
- ياخبر... يعني سابتني ومارجعتش على البيت
- ماتفهميني يافريده انتوا مالكوا بقالكوا كام يوم كده مش مظبوطين ...!!
- هااه... لا... مفيش ياماما احنا كويسين ماتقلقيش ..
- " سبتها ونزلت جري بعد مافهمتها انها تكلمني اول ماتوصل فريال للبيت ...
كده انا بدأت اتأكد من اللي عايز يأذيني بس فاضلي اعرف ايه اللي بيحصل حواليا عايزه اربط الأحداث وافهم ليه عايزه تأذيني ...، انا عملتلها ايه ؟!
لما وصلت البيت الوقت كان اتأخر والدنيا ضلمت بقينا وقت العشا ...، قبل مااطلع البيت افتكرت كلمة الشيخ حازم ' اوعي تدخلي البيت دلوقتي ' طبعا انا بصيت في الساعه ولقيت الوقت متأخر قولت هو قالي ماتدخليش دلوقتي ...، ودلوقتي الوقت اتأخر ومحدش كلمني هطلع بقى وامري لله مفيش قدامي حل تاني ...
بس اول ماحطيت رجلي على السلم نور البيت كله انقطع...، طبعا انا كتمت صرخه باايدي لأني كنت هتفضح وعمتو ذكيه هتخرجلي وانا بقيت خايفه قوي منها ...، طلعت موبايلي عشان انور الكشاف حواليا واعرف اطلع على السلم ونورت بيه على درجات السلم وطلعت كل مابطلع شوية قلبي بيرتاح ودقاته بتنتظم ...، فجأه وقفت وجسمي كله اترعش وشهقت شهقه مرعبه لدرجة ان قلبي كان هيقف وانا الكشاف بتاعي متوجه على رجل حد واقف قدامي على السلم ووشه في وشي ...، رجلين بني ادم طبيعيه بس مش لابس شوز في رجله حافي ...، انا ... سامعه صوت دقات قلبه ... بس... مششش قادره ارفع الكشاف اشوف وشه... جسمي كله بيتنفض وايدي بتترعش من الخوف ...، بدأت اقول بصوت زي همس كده - اعوذ بالله من شر ماخلق..
- اعوذ بالله من شر ماخلق...
- وبدأت اقرا آية الكرسي وانا بطلع بالكشاف ببطئ شديد عشان اشوف وش مين اللي قدامي ...، لما وصلت عند وشه فضلت موقفه النور على وشه وانا ايدي بتترعش ومبرقه ودقات قلبي تكاد تكون موتور عربيه ماشيه بااقصى سرعه عندها ...،
- بابا....!!!!
- مش ممكن ..!!!
- مستحيل...!!
فضلت بصه لبابا برعب شديد وانا بتهته في الكلام ومش عارفه ولاقادره اتكلم كلمتين صح على بعض ..."
- انت....ازاي... طب... والسنين دي كلها كنت... فين... انا... مش فاهمه اي حاجه... انت... حقيقي ؟!!!
- " بابا ساكت مابيتكلمش ولابيتحرك كل اللي بيتحرك فيه هيا دموعه اللي بتنزل من عينيه وبس وصوت نفسه اللي كاسر الصمت اللي حسه بيه في الضلمه والسكون المرعب ده ... واخيرا طلع من سكوته المرعب عشان يقولي جمله ارعبتني اكتر ..."
- سامحيني يابنتي في اللي هعمله...
- " وحط ايده على بقي وكتم انفاسي فضل النور الضعيف بتاع كشاف تليفوني يختفي شوية بشوية لحد ماالدنيا ضلمت خالص واختفت معالم اي حاجه حواليا ..."
- حضرتك بتقول ايه ياشيخ .... يانهار ابيض ازاي ده ... الكلام ده مش ممكن يكون حقيقي ....!!!
- زي مابقولك كده يافريال يابنتي هو ده اللي انا عرفته ان ذكية هيا السبب ورا كل ده ...
- طيب... حضرتك عرفت ازاي ..؟!
- هحكيلك كل حاجه يابنتي ...، تعرفي حاجه عن البني ادم الزوهري..؟؟
- حضرتك تقصد انسان عنده مرض الزوهري...؟؟
- لا يابنتي لا ... الإنسان الزوهري ده يعني الأنسان الشفاف اللي يقدر يتواصل مع عالم الجن من غير مايأذوه ويكتشف اسرارهم ويعرف اسرار الأرض والكنوز وليه هبات كتير جدا ...، هبات ربنا وحده خصه بيها ولو حد عرفه من اللي قلوبهم سودا بيستخدموه في الشر واللعياذ بالله
- طيب ياشيخ حازم وده ايه علاقته بفريده صاحبتي ...؟!!
- فريده صحبتك هيا نفسها الشخص الزوهري ده وهيا عايزه تستغلها في كده ...
- اييييه...!!!
- مش ممكن اللي بتقوله ده ياشيخ حازم...!!!
- ليه يابنتي مش ممكن...، الأشخاص دول موجودين منذ الأزل قبل سيدنا محمد وقبل ديانات كتير وكانوا بيستخدموه في السحر الأسود وزي ماقولتلك بيستغلوا قدرته وشفافيته على معرفة اماكن الكنوز الأرضيه المخفاه عن عيون الناس واللي بيعرف مكانها ربنا ومن ثم الجن...
- ايوه ياشيخ طيب حضرتك عرفت ازاي الموضوع ده ان صاحبتي شخص زوهري وكده ...؟!
- دي حاجه بسيطه يابنتي ...، فاكره التميمة اللي انتي لقيتيها في ايدك بعد ماصحيتي من النوم واللي حكيتلي فريده عنها ...
- ايوه ياشيخ طبعا مالها بقى...
- دي تميمة بيلبسها الشخص الزوهري مكتوب عليها حروف معينه عشان تفتح بوابه من بوابات العوالم الخفيه عشان يقدر الشخص ده يتواصل مع الجن ويلبي كل طلبات الشخص الشرير لأنه بيبقى تحت تأثير طلسم مخفي محدش يقدر يشوفه ولايقراه غير اللي عمل التميمه دي
- عشان كده حضرتك ماعرفتش تشوف الطلسم لما مسكتها مش كده...؟!!
- ايوه يابنتي للأسف..
- وكمان الأرواح اللي شافتها فريده وهيا بتحذرها وبتحاول تفهمها موضوع التميمه ده اكدلي الكلام ده ...
- طب وحضرتك عرفت منين ان ذكيه هيا السبب في ده كله بقى ...؟!!
- كنا نازلين انا وفريده على السلم وهيا حبت تعرفني على عمتها ذكية دي خبطت عليها مافتحتش قولتلها خليني اجرب انا يافريده ولما قربت من الباب قريت شوية قرآن واقسمت قسم يجعلي الباب شفاف اقدر اشوف من وراه كأنه زجاج شفاف ...
- وبعدين ياشيخ...
- شوفت يابنتي ابشع منظر ممكن يشوفوا بني ادم في الدنيا ...،
- لقيت ذكية راسمه دايره حواليها طلسم تحضير وتلبس انا عارفه كويس جدا وفي نص الدايره راجل نايم على ضهره وعينه كانت بيضا خالص واضح انها بتحضر عليه الروح انما روح مين الله اعلم ...
- يانهار اسود ... ، طب والعمل ايه دلوقتي ...؟؟
- العمل يابنتي انا نحاول نحذر فريده ونعرفها اللي حصل لأني سبتها وجريت عشان كان لازم اتأكد من الكتب عندي هنا في البيت من موضوع التميمه دي عشان في معلومات يابنتي مابتتجابش من الأنترنت
- " طلعت فريال موبايلها عشان تتصل بفريده ...، اتصلت بيها كتير جدا ومفيش اي رد الجرس بيرن ومفيش حد بيرد عليها ..."
- انا قلقانه قوي ياشيخ حازم على فريده مابتردش ...
- انا حذرتها انها ماترجعش البيت يابنتي الا لما اكلمها ...
- " الشيخ حازم ماكملش كلامه لقينا موبايلي بيرن برقم فريده..."
- الو.. الوووو فريده طمنيني عليكي ياحبيبتي ...
- " فريال سامعه صوت انفاس كأن انسان بيتوجع وبيتألم وصوت تأوهات غريب جدا ..."
- اسمع كده ياشيخ حازم...
- " الشيخ حازم اخد التليفون وحطه على ودنه فجأه برق برعب شديد جدا وصرخ فيا بكل قوته ..."
- مسكوا فريده يافريال يابنتي يلا بينا بسرعه …
فريده فاقت لقت نفسها متكتفه وقاعده على كرسي في اوضه ضلمه وحواليها شموع يادوب منوره نور ضعيف موضحلها الدايره اللي مرسومه وحواليها كلام مش مفهوم بالنسبالها ...، وفجأه سمعت صوت ضحكه مرعبه جايه من ركن ضلمه في الأوضه اللي هيا مش عارفه مكانها وصوت ... ذكية بتسألها ..."
- فين التميمه يافريده...؟؟
- تميمة ايه ..؟!!
- انا مش فاهمه حاجه...؟!!
- " فجأه بسرعه غير طبيعيه ظهرت ذكية قدام وش فريده وهيا على وشها اقوى تعابير شر ممكن تشوفها في حياتك ..."
- التميمه اللي هيا مفتاح كل حاجه ...،
- التميمه اللي انا تعبت وضيعت عمري كله عشان الاقيها...،
- التميمه اللي خلتني اضيع عمري وافضل خدامه تحت رجل ستك الخرفانه الهابله اللي صدقتني وصدقت اني زي بنتها ... ، واللي كانت لازم تموت لما عرفت اني ورا موت ابوكي وامك ...،
- " فريده بصتلها بغضب شديد وصرخت فيها بكل قوتها..."
- يعني انتي اللي قتلتي كل عيلتي ...؟!!
- " ضحكت ذكية بكل شر وبصت لفريده بحده ..."
- ماتزعليش قوي كده ياحلوه ...، اهلك اللي انتي خايفه عليهم دول مش اهلك ولاليهم علاقه بيكي ولافي بينك وبينهم صلة دم ...
- ايه اللي انتي بتقوليه ده يامجنونه انتي..!!!
- مجنونه عشان بعرفك الحقيقه ...، للأسف هحكيلك الحقيقه عشان تعرفي انتي كنتي عايشه مع مين كويس ...
- " قعدت ذكية قدام فريده وبدأت تحكيلها كأنها قاعده مع واحده صحبتها عالمصطبه ومش على وشك انها تقتل فريده ...
- ابوكي وامك كانوا مابيخلفوش ولاكان معاهم حتى فلوس يعيشوا عيشه كويسه فضلوا يلفوا على دكاتره كتير واستلفوا فلوس كتير عشان يخلفوا بس برضو ماعرفوش يوصلوا لحاجه...،
- ستك بقى شارت عليهم يروحوا لشيخ مشهور قوي في البلد عندهم اسمه ابو الحسن ....
- اااايوه ابو الحسن اللي انتي شوفتيه عندي ... ده يبقى خالي ...
- ماتستغربيش لما تسمعي باقي كلامي هتفهمي كل حاجه...
- لما وصلوا لاابو الحسن كان هو في الوقت ده بيدور على حد بقدرات خاصه زيك انتي ...،
يقدر يفتحله بوابه يقدر يتواصل بيها مع عشائر الجن القويه جدا واللي يعرفوا اماكن كنوز في الأرض مفيش حد يعرفها ولايقدر يمتلكها ...،
مامتك بقى حبت ابو الحسن ...،
وخانت ابوكي معاه ...،
وطبعا مكانش يعرف حاجه لحد ماوالدتك عرفت بموضوع الطفل ذو القدرات الخارقه ده وقالت لابو الحسن انها تقدر تساعده... ، لما سألها ازاي قالتله انها تعرف ست لسه مخلفه طفله جميله جدا بنفس المواصفات اللي بيدور عليها ...،
وطبعا مش عايزه اقولك ان الطفله دي هيا انتي ...، خدوكي طبعا من امك وقتلوها....!!!
ايوووون قتلوها وابو الحسن قرا عليكي تعويذه تخفيكي عنها عشان كده كانت بتطلعلك وعايزه تأذيكي عشان فكراكي من نسلهم...
كل ده ووالدك مايعرفش اي حاجه لحد لما عرف خيانة مراته وقرر انه ينتقم منها بس ابو الحسن سبقه وقتلهم هما الأتنين ...
- " فريده كانت بتسمع ومبرقه مش مصدقه اي كلمه من اللي بتقولها ذكيه ... مفيش عقل يستوعب ان في حقاره بالشكل ده في الحياة ...!!!"
- ماتستغربيش يافريده انا اه وحشه ومجنونه بس مش زي اللي كانوا عاملين فيها ابوكي وامك ...بدأت فريده تفقد قدرتها على التحمل وتبكي بألم فظيع ...، شوية وابتدت تتامالك نفسها من تاني وبصت بكل قوه لذكية اللي ابتسمت بشر واضح وقالتلها.."
- انتي بتقولي انك قتلتي والدي... او اللي كان عامل والدي امال اللي انا شوفته ده مين...؟
- قصدك على ده ...
- " بصيت جمبي فجأه لقيت وش والدي في وشي وبيبتسم ابتسامه شيطانيه ... صرخت من الخوف ووشه اللي كان اشبه بوش الميتين وملامحه بارده وقاسيه جدا ..."
- ده الشيخ ابو الحسن يابنتي هو بس قاللي احضر عليه روح ابوكي عشان تبقي شايفه ابوكي وتثقي فيه انتي ازاي مش عارفاه...
- " وضحكت ذكيه حتى والدي ضحك ... او اللي انا فكراه والدي ...!! "
- هنعمل ايه دلوقتي البنت مش معاها التميمه ..؟؟
- ماتقلقيش ... التميمه هتيجي لحد عندنا ...
- " بعد دقيقه مظبط سمعنا خبط عالباب وصوت الشيخ حازم وفريال جاي من بره..."
- " فضلت اصرخ وانادي عليهم عشان يسمعوني لكن... ولاكأني
بنادي ولا طالع مني اي صوت .. جاني صوت بيهمس جمب
ودني ... صوت ابو الحسن ..."
- انتي فاكره انك لما تنادي هيسمعوكي ...، اتفرجي عليا ونا
بقتلهم واحد ورا التاني عشان نرتاح منهم بقى ونخلص ...
- " دخل الشيخ حازم الأوضه اللي احنا فيها ومعاه فريال ..،
الأتنين اختفوا في الضلمه ..، فريال اول ماشافتني جريت عليا وصرخت..."
- فريده حبيبتي عملوا فيكي ايه المجرمين دول حسبي الله
ونعم الوكيل ربنا ينتقم منهم ...
-
ماتقلقيش يافريال فكيني بس الله يخليكي عشان نمشي من
هنا ... خد بالك ياشيخ حااااز...
- " فجأه خرج من الضلمه ابو الحسن ومسك الشيخ حازم من
رقبته وفضل يخنق فيه ...يخنق يخنق... ، وحدفه بعيد خبط
في الحيطه ووقع اغمى عليه ... وبعدين بص ناحيتنا باابتسامه كلها شر..."
- التميمه فين يافريال...؟؟
-
مفيش تميمه ... فك فريده الأول وانا اديك التميمه ...
- " ضحكاته صوتها عالي جدا ومزعج ومخيف..."
- التميمه يعني فريده وفريده يعني التميمه...
-
صرخ بكل قوته صرخه خلت الأوضه تتهز ...فين التميمه
انطقي لأحرقك دلوقتي ... وفضل يهمهم بكلام مش مفهوم
لحد مافجأه خرجت ذكيه ومسكت فريال عشان تقيدها ...،
بس فريال اقوى منها وقدرت تغلبها وتوقعها على الأرض واغمى عليها هيا كمان ...
- " بدأ جسم ابو الحسن يعلى يعلى في الأوضه كأنه طاير وهو
رافع رقبته لفوق وعينه بيضا تمام وبيتمتم بكلام غير مفهوم ..."
- احضروا الساعه....
- اجيبوا يامردة النار ...
- العجل العجل...
- بدأت الأوضه يظهر فيها اصوات زي اصوات الأطفال الصغيره
بس بتكري في كل جنب منها وبتصرخ من الألم ...، فريال
جريت عليا فكت ايديا وحضنتني قوي باايديها ...، بعد شوية
سمعنا صوت باب بيتكسر ودخل نور ابيض من الباب ده بس
مكانش واضح ده هيئة مين ...، مسك ابو الحسن من رقبته
ونزله على الأرض وفضل يخنق فيه وهو رافعه في الهوا ...،
وعلى ابو الحسن اكتر علامات مفزعه ممكن تشوفها في حياتك
وهو بيصرخ بصوت مكتوم بيختفي شوية بشوية ..."
- انت ...طب... ازاي....ازاااي
- "وبعد كده النور اللي متمثل على هيئة شخص ده كسر رقبته
وقتله ... وبدأ يجي ناحيتنا انا وفريال حضنا بعض بقوه
وفضلنا باصيين ناحية النور اللي جاي علينا ده..."
- مين ...بابا ...!!!!
- كنت عارفه انك مش هتسيبني ... كنت عارفه انك بتحبني ...
- " مد ايده وقربها مني كأنه بيتحسس وشي وهو بيبكي
بفرحه وبعدين بدأ يختفي واحده واحده..."
- " بعد اللي حصل ده اقدر اقولكوا اني رجعت حياتي زي
ماكانت من غير اي مشاكل ولاكوابيس ولا حاجات بتتحرك
ولااي حاجه ...، لما فاق الشيخ حازم وخرجنا بره الأوضه
وفضل يستعيذ بالله من الشيطان شرحناله اللي حصل ...، قال
يابركة ربنا يابركة ربنا .... دي روح والدك اللي حضرها الكلب
ابو الحسن ...، ماعرفتش تنتقم منهم وهيا عايشه انتقمت منهم
وهيا ميته يابنتي ...، اما بالنسبه لوالدتك اللي كانت عايزه
تنتقم منك بمجرد انك حرقتي التميمه بتاعتك كل شئ انتهى
وهيا عرفت انك بنتها وبعدت عنك ...، اما بالنسبه لذكيه ...
اللي بيعمل شر بيلاقي شر يابنتي ابو الحسن قبل مايموت
حضر عشيرته واللي بدورهم خدوا روح ذكية معاهم وهما
بينصرفوا عشان كده لقيتوها ميته بعد مامات ابو الحسن ... والله اعلم
- " مااقدرش اقول ان حياتي رجعت زي ماكانت قوي ... لأني
لسه بشوف حاجات غريبه...بس مش مؤذيه ليا .. يعني اقدر
اقول لحد حاجات عنه مثلا بحس ان في حد بيهمسلي في
ودني بيها ..، اترقيت في شغلي وبقت ليا مكانه كبيره عند م/
رؤوف ...، م/حاتم طلع معموله عمل بالحب من شذى واحنا مكناش نعرف
- عرفت انا كل ده ازاي ....!!!
- ماتنسوش اني موجوده وقوتي كل يوم بتزيد ومسيري هنتقم
من كل قلب اسود مليان شر بيأذي الناس ....
النهاية