رواية بنت السارق التوام
الفصل السابع .....
بقلم سالى مصطفى
وكالعادة ماسة وملك خارجين من كليتهم .... لقت ملك سيف
واقفلها على باب الكليه .... أتفاجأت ملك بيه وسابت اختها وراحتله ......
ملك متفاجاة : سيف ؟؟ ليه مقولتليش انك جاى النهاردة ....
سيف : قولت اعملهالك مفاجاة .....مفاجاة حلوة ولا وحشة بقى ......
ملك : اكيد حلوة ياسيف ....
سيف : طب مالك مكشرة ليه ....
ملك : مش مكشرة ولا حاجة عادى ....
سيف : هوه انا مش عارفك ياملك قوليلى ايه اللى حصل مزعلك كده؟؟
ملك : امى ياسيف ..... حتتجوز .....
سيف باستغراب : ماتتجوز وايه يعنى حقها ....
ملك : حقها ازاى يعنى ؟؟ واحنا نروح فين ؟؟ وازاى نعيش مع راجل غريب فى البيت ؟؟؟
سيف : متعقديش الامور عشان تزعلى نفسك امك من حقها تعيش حياتها وتتجوز ...... زى ماابوكى عاش حياته بالظبط فكرى انتى فى نفسك شوية ياملك ....
ملك باستغراب : افكر فى نفسى ازاى يعنى؟؟
سيف : قصدى كلهم فكروا فى مصلحتهم ودوروا على راحتهم ...... انتى كمان فكرى فى مصلحتك ودورى على راحتك واعملى اللى انتى عوزاه .....
ملك باستغراب : مش فهماك ياسيف برضو ....عاوزنى اعمل ايه يعنى ؟؟
سيف : تتجوزينى ياملك ؟؟
ملك بفرح : اجوزك ؟؟
سيف : ايه مش موافقة ...
ملك : لا طبعا موافقة ..... بس ممكن ماما مترضاش العلاقة بينكم مش حلوة من زمان .... وهيه مش بتحبك الصراحة .... كلم بابا بقى اكيد حيوافق ....
سيف بضحكة : لا انتى مش فهمانى ..... مهو احنا مش حنقول لماما ....
ملك : ايوه حتطلبنى من بابا فاهمة ....
سيف : بصى ياملك .... امك مش بتحبنى ولو عرفت مش حتوافق على الجواز تمام فهمتى .... وابوكى لما اقوله انى عاوز اجوزك حيقولى انك لسة صغيرة استنى لما تخلص كلية تمام كده ........... ده غير انه حيطلب منى طلبات كتيرة عشان الجواز وانا دلوقتى ظروفى مش حتتحمل مصاريف جواز ..... احنا حنجوز عرفى ياملك ....
ملك متفاجأة : انت بتقول ايه ياسيف .... نجوز عرفى ؟؟؟
سيف : اه ياملك ..... ولما ظروفى تتحسن وتخلصى كلية حبقى اطلبك من ابوكى بقلب جامد .... قولتى ايه ياملك ؟؟؟
ملك : مش حينفع طبعآ .... انا مقدرش اعمل حاجة زى كده من ورا اهلى ....
سيف بغضب : مهو اهلك دول برضو مش سائلين فيكى .... وكل واحد حيجوز ويعيش حياته زى ماانتى قولتى ...... يهموكى فى ايه بقى ..... انتى مبتعمليش حاجة غلط .... ده جواز ...
ملك : انت بتقول ايه ياسيف مهما كان دول اهلى ولازم يعرفوا ......
سيف بعصبية : انا مش عايز رد منك دلوقتى على اى حاجة ..... خدى وقتك وفكرى وردى عليا ..... ماشى ياملك .....
ملك : ماشى ياسيف .... انا حمشى بقى ....
سيف : ماشى ياملك روحى ..... وانا مستنى ردك ....
ومشت ملك راحت لاختها اخدتها وروحوا على البيت ..... دخلوا البيت وهما زعلانين ومش عاوزين يتكلموا مع فريدة نهائى وباين عليهم الحزن اوى من كل اللى بيحصل ....
وتانى يوم قابلت ماسة جاسر بعد كليتها فى كافتيريا جمب الكلية ....... فى نفس اليوم اللى حيسافر فيه .....
وصلت ماسة الكافيتريا وقالت لجاسر : اتاخرت عليك ؟؟
جاسر : لا ابدآ.... انا لسة واصل ....
ماسة : مواعيدك مظبوطة يا حضرة الظابط ....
جاسر : ماقولنا بلاش ظابط دى ..... حتوحشينى ياماسة لحد ماارجع ...... ممكن السفرية دى تطول شوية ....
ماسة : وانت كمان .... فى رعاية الله .... بس متتاخرش عليا ..... وتكلمنى علطول ...
جاسر : مش حتاخر وحكلمك .... انا وعدتك ياماسة ..... اول ماارجع من السفر لازم اقابل باباكى واتعرف على اهلك .....
ماسة بقلق : بس فى مشكلة كبيرة ... انا مش قولتلك عليها ....
جاسر : ايه المشكلة ؟؟؟
ماسة : انا بابا وماما منفصلين ...... وبابا متجوز واحدة تانية .....
جاسر : وانتى عايشة مع مين فيهم؟؟
ماسة : مع ماما ....
جاسر : خلاص يبقى حقابل ماما الاول لوحدها وبعدين حقابل بابا برضو لوحده ..... فين المشكلة بقى ...... مفيش مشكلة ممكن تبعدنى عنك ياماسة ماشى ....
ماسة بابتسامة : خلاص كده ...... يبقى مفيش مشكلة ....
جاسر : انا كان نفسى اعد معاكى اكتر من كده ........ بس انا مسافر حالآ دلوقتى كويس انى لحقت اشوفك .... حمشى انا بقى ... وخلى بالك من نفسك ....
ماسة : وخلى بالك انت كمان من نفسك حتوحشنى .... ومشى جاسر ...
وروحت ماسة وملك على البيت ..... وملقوش امهم فريدة فى البيت ..... استغربوا جدآا ....
ماسة بقلق : تفتكرى ماما تكون راحت فين لحد دلوقتى ياملك ؟؟
ملك : مش عارفة ... ومش عاوزة اكلمها الصراحة ...
ماسة باستغراب : غريبة .... اول مرة تعملها لما بتنزل كانت بتقول انها نازلة ... وبتقول هيه رايحة فين ....
وفى نفس اللحظة ..... دخلت فريدة البيت ومعاها راجل شكله غريب ......
ماسة باستغراب : كنتى فين ياماما ؟؟ ومين الراجل ده ؟؟
فريدة بثقة : ده جوزى ياماسة ..... دكتور سامى ...
اتصدمت ماسة وملك من رد فريدة ده ...... ومعرفوش ينطقوا كلمة واحدة ....
سامى باستغراب : ايه ده انتى مش قولتلهم ولا ايه يافريدة ؟؟؟
فريدة بثقة : لا طبعآ قولتلهم وعارفين كل حاجة ....
سامى : امال مالهم مش مبسوطين ليه ؟؟ وراح بصصلهم من فوق لتحت وقال : بس مكنتش اعرف يافريدة ان بناتك قمرات كده ..... بسم الله ماشاء الله عليهم ....
وبسرعة دخلت ماسة وملك على اوضتهم علطول وهما متعصبين جدا ...... منغير مايردوا كلمة واحدة على دكتور سامى ولا فريدة ......
ملك بغضب : امك اتجننت ياماسة .... هيه فاكرة نفسها عيلة صغيرة .... ايه اللى بتعمله ده ؟؟
ماسة بغضب : بجد انا مبقتش قادرة استحمل كل ده ...... ومش طايقة الراجل ده فى البيت ... وبعدين ده مش شكل دكتور اصلا ....... مخدتيش بالك من نظراته كان بيبصلنا ازاى ؟؟
ملك : اه اخدت بالى ..... انا بفكر اروح اعيش مع بابا مش حسة انى حعرف ارتاح هنا ...... امك اتجوزت عشان تغيظ ابوكى لما عرفت انه اجوز مفكرتش فينا ...... هما الاتنين دوروا على راحتهم ومصلحتهم زى ماسيف قال وكله على حسابنا احنا .......
ماسة : بصى ياملك احنا نصبر يومين ونشوف الامور حتمشى ازاى ...... ولو معرفناش نعيش هنا نبقى نروح لبابا .....
ملك : تمام كده كويس .....
وشوية وقالت لماسة : وانتى عملتى ايه بقى مع جاسر النهاردة ؟؟؟
ماسة بقلق : المفروض انه مسافر النهاردة .... واول ما يرجع من السفر عاوز يقابل اهلى ويتعرف عليهم .... وانا مش عارفة حيقابل مين دلوقتى الامور عمالة تتعقد اكتر .....
ملك : سيبيها على ربنا ياماسة .... عقبال ماييجى تكون الامور اتظبطت ...
وفى نفس اليوم بليل بعد مانامت ماسة وملك فى أوضتهم .... حست ماسة بحد بيفتح بابا الاوضة عليهم ... قامت ماسة مفجوعة وخايفة بتشوف مين ؟؟ لقت دكتور سامى ...
بصتله ماسة بغضب وعلت صوتها وقالت : انت بتعمل ايه هنا ؟؟؟
اتلخبط سامى وقال : معلش انا اتلخبطت فى الاوضة ..... البيت لسة جديد عليا انا آسف .... وخرج سامى بسرعة بره الاوضة .....
وقامت ملك من النوم على صوتهم وقالت : ايه اللى جابوا هنا الراجل ده دلوقتى ؟؟؟
ماسة بغضب : بيقول اتلخبط فى الاوضة ..... وانا حاسة بقى انه بيستهبل وشكل ايامه كده مش حتعدى معايا على خير .....
ملك : كويس انك كنتى صاحية ياماسة ..... انا صحيت على صوتك وانتى بتزعقى ....
ماسة : انا مش حعرف انام فى البيت ده كويس بعد كده ولا حاخد راحتى تانى ابدآ ...... انا مش مرتاحة للراجل ده .....
ملك : بكره بقى ابقى قولى لماما على كل اللى حصل ده عشان ميكررهاش تانى وشوفى ماما حتعمل ايه ؟؟ افتكر لازم تاخد موقف منه ....
ماسة : اه اكيد .... لازم أقولها .... ونامت ملك وفضلت ماسة قلقانة طول الليل لحد الصبح منمتش .......
وتانى يوم الصبح دخلت فريدة اوضة البنات لقتهم قعدين مع بعض استغربت وقالت : ايه مش رايحين كليتكم النهاردة ولا ايه ؟؟؟؟
ماسة بسرعة : لا ياماما مش رايحين تعبانين شوية بس ....
فريدة : على راحتكم قوموا عشان تفطروا بقى انا حضرت الفطار ..
ملك : حاضر ياماما جايين دلوقتى ... وخرجت فريدة من الاوضة ...... وطلعت ماسة وملك وراها علطوول وقعدوا على السفرة يفطروا مع فريدة وجوزها سامى ......
وكانت نظرات ماسة للدكتور سامى على السفرة كلها نظرات احتقار ....... منغير ماتنطق كلمة واحدة ...... ودكتور سامى عمال يبعد عينه عنها متعمد من نظراتها الحادة ليه .......حبة كده وقامت ماسة من على الاكل .....
استغربت فريدة وقالت : لحقتى تفطرى ياماسة ....
ماسة بقرف : اه ياماما مليش نفس ......
واستنت ماسة لما خلصوا فطار وامها شالت السفرة .... راحت دخلت لها المطبخ وقالت : عوزاكى فى حاجة مهمة ياماما ....
فريدة : قولى ياماسة ..... وحكت ماسة كل اللى حصل مع دكتور سامى ودخوله اوضتها بليل ونظراته الوقحة ليها ولاختها .....
اتعصبت جدآ فريدة وقالت : دى طريقة جديدة بقى عشان اتطلق من سامى كمان ده اللى كنتم قاعدين بتخططوله انتى واختك وترتبوه عشان يمشى من البيت ......
ماسة بوجع : احنا مخططناش حاجة هوه ده كل اللى حصل ..... واسالى ملك كمان او اساليه هوه اكيد مش حينكر .......
فريدة : انا مش حسال حد الموضوع خلص ...... وايه المشكلة يعنى لما يتلخبط فى الاوضة ...... البيت لسة جديد عليه وبعدين انا محستش بكل اللى انتى بتقوليه ده .......
طلعى سامى من دماغك احسن لك ياماسة .... ولو بتعملى كده عشان اسيبه اطمنى ده مش حيحصل ......
اتصدمت ماسة من كلام امها وطلعت من المطبخ وهيه
متعصبة جامد ومدمعة من كلام امها ..... لقت سامى قدامها
علطول كان بيسمع الكلام اللى دار بينها وبين فريدة ..........
بصتله ماسة بغيظ جامد ........ راح ابتسم لها وضحكلها
ضحكة مستفزة ونظرة الانتصار فى عنيه ..... شاطت ماسة
جامد من بصته ودخلت على اوضتها ورزعت الباب وراها ......