امير : انها تبقا مع واحد مشوه دة ظلم .. حتى لما ييجي الوقت الي اقولها فيه كلمة بحبك هتصدقها ازاي وهي مش شايفة ملامحي .. مش شايفة انا اد ايه فعلاً بحبها .. اظن انا لو خيرتها بين وجودها معايا وبين انها تمشي هتختار تمشي 💔
محمد : ع فكرة انت مكنتش شايف ملامحها وهي بتتكلم عنك بس انا كنت شايفها ومن وجهه نظري انا متأكد انها شيلالك مشاعر جواها وبما انك فقري ومش بتاع مفاجأت ف انا هقولك المفاجأة الي كنت هقولهالك ف عيد ميلادك 🙄
امير : مفاجأة ايه ؟؟
محمد : واحد صاحبي دكتور كان ليه واحد صاحبه دكتور تجميل ف وراه صورتك وعاوز يقابلك
امير : انت عارف اني قفلت السكة دي من زمان ✋
محمد : انت خسران حاجة ؟؟
امير : ي بني .........
محمد : مش خسرااااان ي عم روح وقابله وبعدين دة دكتور شاطر جداً ومش مصري دة لبناني وعايش ف لندن وانت هتسافرله اصلاً مش هنا
امير : كمان هسافر !!!
محمد : اه كمان هتسافر دة كام يوم انت وراك ايه يعني هنسافرله انا وانت
امير ب تفكير : مش عارف 😕
محمد : اسمع كلامي بقا انت لسة قايل حبيتها وخايف مش يمكن يطلع دكتور كويس وينفع يعملك حاجة والدنيا تتصلح 🤷🏻♂
امير : طيب ماشي .. هنسافر امتى ؟؟
محمد : انا كنت هقولك ف عيد ميلادك الي هو بعد اسبوعين لسة ف كدة عادي جهز نفسك ونسافر اي وقت
امير : ماشي
( بعد شوية ، عند خلود ، تطلع م التواليت بتنشف شعرها كانت بتاخد دش )
خلود ب تذكير : احييييه دة انا نسيتك 🤦🏻♀
( تجري ع الفون الارضي وتحط الرقم وتتصل ، امير نايم ، يرن فونه ، يقوم ب لهفة يقعد )
امير : الو
خلود : انا اسفة والله بس ماما واخويا كانوا هنا لما وصلت لقيتهم ف اتلهيت معاهم ونسيت اكلمك 😬
امير : ولا يهمك انا كنت بس عاوز اطمن عليكي
خلود : لا انا تمام وصلت واكلت وأخدت دش وكلوا زي الفل 😊
امير : كل دة ي مفترية وسيباني مستني 🤦
خلود ب فرحة : كنت مستنيني بجد 😍
امير : اه والله .. كنتي وحشاني 💜
خلود : والله وانت كمان ♥️
امير : من قلبك ولا مجاملة ؟
خلود : مسيرك تعرف اني دبش ومبعرفش اجامل ع فكرة 🤷
امير : لا عارف عارف ✋
خلود : هههههه 😄
امير : بتعملي ايه ؟
خلود : ولا حاجة ف اوضتي .. وانت بتعمل ايه ؟
امير : كنت نايم
خلود : احيه صحيتك انا اسفة روح كمل نوم 😕
امير : لا مش مهم .. بتتأسفي كتير انتي !
خلود : اتعودت طلاما غلطت لازم اتأسف 🤷
امير : هو انتي ليه اطلقتي ؟!
خلود : خضتني ع فكرة 😅💔
امير : معلش دخلت قفش كدة 🤦
خلود : ولا يهمك .. تاني مرة اتوفى مطلقتش
امير ب استغراب : هو كان فيه مرة اولى !!!!
خلود : هو انت متعرفش ؟؟
امير : لأ 😐
خلود : لا انا اتجوزت مرتين .. مرة اطلقت عشان اتسجن وتاني مرة اتوفى
امير : اه
خلود : انت اتضايقت ؟
امير ب تنهيدة : لأ .. بس محدش قالي ف اتفاجأت !!
خلود : معلش بقا هما مختارينلك واحدة منتهية الصلاحية 😅💔
امير : ايه الي بتقوليه دة لأ طبعاً انا بس مستغرب سنك صغير ع كل دة !!!!!
خلود : متحسبهاش بالسن لما يكون عندك اب كل همه يلم من وراك فلوس ويعمل مصالح .. مش مهم انت ولا مهم تحس ب ايه ولا مهم لما تعيش مع الشخص دة هيحصلك ايه 💔
امير : اول مرة اعرف ان عم رضا جشع كدة !!!
خلود : واكتر من كدة .. انا عمري م هسامحه ابداً ع الي عمله فيا طول حياتي 😒💔
امير : اتجوزتي ازاي اول مرة ؟؟
خلود : كنت بكرهوا جداً كان عبارة ضرفة دولاب ب كرش كبير 🤰🏻
امير : كنتي قصاده عصفورة !!!!
خلود : صرصار وحياتك 🙄
امير : ههههه 😄
خلود : وكان يعتبر بلطجي المنطقة الي قارف نص بناتها معاكسات ف الرايحة والجاية بس انا كان بذيادة شوية .. قالي انه بيحبني وانه عاوز يتجوزني مع انه يقدر يعمل الي هو عاوزه من غير جواز الي هو يعني تهديد ورومانسية ف نفس الوقت 🙄
امير : و*خ بس حنين
خلود : هههههههه بالظبط كدة 😄
امير : وبعدين ؟؟
خلود : انا رفضت واتخانقت معاه اكتر من مرة .. لحد م روحت ف يوم لقيته عندنا ف البيت قاعد مع ابويا .. اتخضيت وقتها وقلت اكيد مش جاي عشاني .. مشي وكعادة اي اب زي ابويا قالي انه متقدملي وانه كمان وافق وقرا فاتحتي عليه والجواز كمان شهر .. طبعاً انهرت والدنيا اتقفلت ف وشي لان محدش بيقدر ع ابويا ف م الاخر هتجوزوا هتجوزوا 🤷
امير : واتجوزتيه ؟
خلود : واتجوزتوا .. وراني اسود ايام حياتي ومن اول يوم لقيت اول قلم بينزل ع وشي انه ازاي واحدة زيي ولا تسوى ترفضه وتزله كدة وكأنها جريمة مع ان دة حقي زي اي بنت اني اقبل او ارفض .. كنت كل يوم بصحي ع زعيق وضرب وانام ع زعيق وضرب لدرجة كانت الناس بتبصلي ب شفقة الي هو انتي ايه الي رماكي الرامية السودة دي ي بنتي !!!
امير : مفكرتيش تمشي او تهربي ؟؟
خلود : فكرت كتير بس مكنتش هستفاد حاجة غير العار ل اهلي وكان هيعرف يجيبني من تحت الارض وكمان بقيت حامل ف فرحت وفكرت ممكن يتعدل معايا وحياتي تبقا احسن بس عادي جداً ضربني ف مرة لحد م اجهضت وكنت هموت فيها 💔
امير ب خضة : ي نهار اسود 😐
خلود : اتمسك بعدها ف قضية شروع ف قتل ودة كان فرح بالنسبالي 😊
امير : طبعاً
خلود : استغليت الموضوع ورفعت عليه قضية طلاق من ورا اهلي وكسبتها .. يادوب عدى ٣ شهور العدة لقيت نفسي ف بيت واحد تاني وبردوا بالغصب .. دة قعدت معاه سنة كان ارحم بكتير م الي قبله بس بردوا كان دايماً مشاكل وهم ومكانش فيه بينا اي تفاهم وكان تعبان .. كان كبير ف السن بس مش عجوز .. اتوفى وبعدها ب ٣ شهور كنت ف بيتك
امير : ايه ي بنتي دة كلوا في ايه !!!!
خلود وعيونها بتدمع : والله اعلم الي جاي ايه .. في ناس كدة اتخلقت عشان يتلعب بيها .. وانا من ضمن الناس دي 💔
امير : طب وانا ؟؟
خلود : انت ايه ؟
امير : من ضمن الناس الي ظلمتك ؟؟
خلود : انت اكتر بني ادم ف الدنيا دي حسيت معاه بالامان والراحة .. حسيت انه محترمني .. رغم اني مش مهمة عندك بس حسيت اني بني ادمة ف بيتكوا
امير : مين قالك انك مش مهمة عندي
خلود : انت
امير : انا قلت كدة 🤨
خلود : مش بطريقة مباشرة يعني 🤷
امير : اياً كان انا عاوزك تسيبك من كل الي فات دة .. انا عارف انه صعب يتنسي بس انا هحاول انسيهولك
خلود : كلامك بيطمن .. وانا بقيت اخاف اطمن 😟
امير : متخافيش .. بس انا عاوز اسألك سؤال وتردي عليا بصراحة
خلود : اسأل
امير : لو خيرتك بين وجودك معايا وبين اني اسيبك واطلقك هتختاري ايه ؟؟
خلود : ا ........
امير : ثواني ✋
( تسكت )
امير : ذائد انك لو مش عاوزة ترجعي ل اهلك عشان ابوكي والي هيعمله انا ممكن اساعدك ان يبقالك بيت وشغل خاص بيكي ولو عاوزة تسافري تبقي بعيدة خالص هسفرك وكلامي جد ومستعد انفذه من بكرة لو اخترتي كدة
خلود : وانت هتعمل كدة عشان صعبت عليك من افعال ابويا فيا ولا عشان ايه ؟؟
امير : لا عشان انتي مهمة عندي 😐♥️
( تفرح خلود وتنزل دموعها )
خلود ب حب وحزن : وانا ولا عاوزة شقة ولا شغل ولا عاوزة اسافر .. انا كنت بس الي بتمناه م الدنيا سند .. سند بس اتحامى فيه وميجيش عليا .. انا عوزاك انت ومش عاوزة ابعد عنك 💜
( يفرح امير )
خلود : الا لو انت الي مش عاوزني
امير : انا منكرش اني ف الاول مكنتش عاوزك .. بس عشان الموقف الي حصل فيا مش اكتر .. لكن بعد كدة انا بدأت اتشدلك مع اني كنت فاقد الامل ف حاجة زي كدة .. بس انتي جيتي حركتي حاجات كتير جوايا كنت مفكرها ماتت اصلاً .. انا كمان عاوزك ومحتاجلك .. بس هتصبري معايا لحد م اظبط باقي الحاجات المكركبة الي جوايا ؟؟
خلود : هصبر طبعاً هو انا ورايا غيرك ي بيضة انتي 🥺♥️
امير : هههههههه ايه الدلع الغريب دة 😂
خلود : ههههههه الله جوزي حبيبي 😂💚
امير : جوزك ايه ؟؟؟
خلود ب احراج : احم انت م الي بيعلقوا بقا وكدة 😅
امير : جداً لا ورخم كمان ف قوليها احسنلك ☝️
خلود : هههههه .. حبيبي 😄♥️
امير : فاكرة الحاجات المكركبة اظن انها اترتبت خلاص ومحمد بقا زي الفل نص ساعة واكون عندك 😊💜
خلود : ههههههه 🤭🧡
امير : انا مسافر قريب
( تتخض خلود )
خلود : لييييه 😟
الحلقة الرابعة والعشرون { ٢٤ } 🌘
( يحكيلها كلام محمد )
امير : ف هسافر اشوف هيقولي ايه
خلود : امير والله انت كدة كويس وانا عوزاك كدة زي م انت دة مش فارق معايا والله العظيم 😕
امير : عارف بس هجرب انا مش خسران حاجة 🤷🏻♂
خلود : خلاص الي انت شايفه لو دة هيريحك .. بس عوزاك لو منفعش متزعلش انت رايح تسأل وبس ☝️
امير : لا مش هزعل لأ
خلود : هيكون خير ب أذن الله
امير : ب أذن الله .. يلا روحي نامي الساعة بقت ٣ !!!
خلود : لا بجد !!!
امير : والله
خلود : محستش بالوقت .. انت راجع بكرة ؟؟
امير : اه عشان ابدأ اشوف اجراءات السفر وكدة واجهز نفسي
خلود : تروح وترجع بالسلامة ان شاء الله ♥️
امير : الله يسلمك .. تصبحي ع خير
خلود : وانت بخير
( يقفلوا ، يخطر ف بال خلود فكرة ، تقوم تخرج م الاوضة ، تقرب ع اوضة امير تفتحها وتدخل وتقفل الباب ، تقرب ع ترابيزة عليها صور ل امير وقت م كان وشه سليم ، تتفرج عليها ، ، تلاقي البوم تاخده وتقعد ع السرير تقلب فيه ، تبتسم ع صورة ليه مع امه ، اد ايه كانت ضحكته حلوة ووسيم ، يطلع الصبح ، يوصل امير البيت ، يطلع اوضته ، يتخض يلاقي خلود نايمة ع طرف السرير والالبوم جنبها ، يقرب عليها ، يمسك الالبوم يقفله ويرجعه ع الترابيزة ويرجع يقرب عليها يغطيها ويبعد شعرها عن وشها ويفضل باصصلها ، يقرب ع دولابه ياخد هدوم ويدخل التواليت يغير وينزل يروح شغله ف طنطا ، قاعد احمد اخو امير ف عربيته مع حبيبته )
احمد : انتي مأڤورة الموضوع اوي ع فكرة !!!
شذى : ولما تقولي نطلع بيتي دي مش اڤورة 💁🏻♀️
احمد : م انتي قلتي جدتك مش فوق بايتة عند خالك
شذى : عشان انت سألت مش عشان اطلعك ف غيابها ي احمد .. وع العموم شكراً اوي انك وضحتلي انت شايفني ايه .. عن اذنك 💔
( تنزل شذى تطلع البيت ، يتنهد احمد )
احمد : ام القرف 🙄
( يعدي الوقت ، تصحى خلود تلاقي نفسها مازالت ف اوضة امير ومتغطية ، تعرف انه جه ، تبتسم وتقوم تخرج م الاوضة تخبط ف رؤية )
رؤية : ايه ي جميل بتعمل ايه عندك 😊
خلود : اسكتي عشان منظري رهيب حالياً 🤦🏻♀
رؤية : ليه كدة ؟!
خلود : مكانش جايلي نوم امبارح ف عارفة ان امير مش موجود ف جيت اتفرج ع اوضته وصوره وراحت عليا نومة وشكله جه الصبح وشافني 😬
رؤية : طب وفيها ايه دي اوضة جوزك والمفروض تبقا اوضتك 🤷
خلود : اه بس رخامة مني يعني مستأذنتش 😊
رؤية : ههههه لا عادي مش هيدقق .. شوفتي شكله قبل الحادثة ؟
خلود : اه وزعلت جداً .. كان جميل 😕💚
رؤية وهي بتاخد خلود اوضة امير : تعالي هقولك حاجة
( يدخلوا يقعدوا )
رؤية : انا حاسة ان امير ابتدى يتشدلك .. حساه ممكن ع ايدك يرجع زي الاول واحسن
خلود : بس موضوع الحادثة دة مأثر ف نفسيته جامد 😕
رؤية : الي حصل ل امير مكانش حادثة عربية
خلود ب استغراب : اومال كان ايه ؟!!!
رؤية : امير كان خاطب بنت .. والبنت دي خانته مع صاحبه وهما الي عملوا فيه كدة 😐
خلود ب خضة : احيه محمد 😦
رؤية : لا طبعاً واحد تاني
خلود : ازاااي ؟؟؟؟!!!!
( تحكيلها كل حاجة ، عند احمد ، لسة واقف تحت بيت شذى متردد يطلع ، يطلع من جيبه كيس بودرة ، يفتحه ويشمه ، يفتح باب العربية وينزل ، يدخل العمارة ويقرب ع الاسنسير ، وفجأة )
الامن : رايح فين حضرتك ؟
احمد ب ارتباك : اااا طالع فوق 😐
الامن : لمين ؟؟
احمد : واحد صاحبي
الامن : اسمه ايه ؟
احمد : ااا .. مروان
الامن : مفيش حد ساكن هنا بالاسم دة
احمد : اه .. شكلها عمارة غلط .. اسف 😅
الامن : ولا يهمك
( يطلع احمد م العمارة ع اخره ، يركب عربيته ويمشي ، ف بيت امير ، تنزل دموع خلود )
خلود ب عياط : ازاي تعمل فيه كدة .. ازاي بجد .. دي مش بني ادمة .. الاتنين مش بني ادمين دول حيوانات 😥
رؤية : كان ليه حق يتأثر ب كل دة وب اكتر من كدة كمان
خلود : دة بجد اتحمل كتير اوي 💔
( يذيد عياطها )
رؤية : اهدي بس انا مبقولكيش عشان تضايقي بس كان لازم تعرفي وامير مظنش كان هيحكيلك
خلود : انا بس صعبان عليا .. الي حصل صعب 😔
رؤية : عانى كتير جداً انا كنت باجي اقعد معاهم وكنت بسمعه بالليل بيصرخ م الوجع 💔
خلود : منهم لله بجد
رؤية : بس هو هيبقا احسن ان شاء الله
خلود : ان شاء الله .. انا هقوم اغسل وشي
رؤية : اوك
( تقوم خلود تخرج م الاوضة تقابل امير )
امير ب استغراب : مالك ؟!!!
خلود : ماليش 😔
( تروح اوضتها ، يشوف رؤية )
امير : هي مالها ؟!!!
رؤية : مين ؟
امير : خلود
رؤية : معرفش 🤷 انت ايه الي جايبك دلوقتي ؟!!!
امير : ورايا حاجات .. هروح اشوفها
رؤية : اوك
( يقرب امير ع اوضة خلود ويخبط )
خلود م التواليت : ادخل
( يدخل امير )
امير : انتي فين ؟!
خلود : هنا جاية
( تنشف وشها وتطلع )
امير : مالك في ايه ؟!!!!
خلود : مفيش 😔
امير : انتي معيطة مفيش ازاي !!!!!!
خلود : مفيش والله ماما تعبانة بس شوية
امير : الف سلامة عليها .. طب اوديكي تزوريها ؟
خلود : ينفع 😟
امير : ينفع طبعاً انا ورايا شوية حاجات بس للسفر هخلصها واكلمك تجهزي
خلود : شكراً ي امير 💜
امير : العفو ع ايه
( يقرب عليها )
امير : ياريت منعيطش تاني اوك
خلود : حاضر 😊
امير : امسكي
خلود : ايه دة ؟!!
امير : موبايل عشان اعرف اكلمك
خلود ب فرحة : الله بجد .. دة ايفون كمان 😍
امير : هبقا اعملك تستخدميه ازاي بس اما ارجع وهجيبلك خط وانا جاي
خلود : م انا معايا الشريحة القديمة
امير : طيب زي م تحبي
( يطلع علبة من جيبوا )
امير : انااا مجبتلكيش دبلة ولا انا لابس دبلة
( يفتح العلبة فيها دبلتين واحدة الماس والتانية فضة ، ياخد دبلتها ويمدلها ايده ، تديله ايدها ب فرحة ، يلبسهالها )
خلود ب فرحة : حلوة اوي بجد والماس شكله جميل 😍
امير : دة حقيقي
خلود ب صدمة : بجد 😳
امير : والله
خلود : لا انا كدة هخاف البسها لتقع مني 😕
امير : لا متقلعهاش فداكي مش مهم 🧡
( لسة هيلبس دبلته ............ )
خلود : ايه دة استنى انا الي هلبسهالك
( تاخدها منه وتمسك ايده تلبسهاله )
خلود : كدة انت متجوز
امير ب ضحك : ي راجل 😄
خلود : ههههه ايوة 😄
امير : عاوزة حاجة وانا جاي ؟؟
خلود : عوزاك بخير 💜
( يبوس دماغها ويمشي ، تفرح جداً وتقعد ع السرير تتفرج ع الدبلة والفون ، يعدي الوقت وامير بيخلص ف اجراءات السفر ، تدق الساعة ٦ ، امير يتصل ب خلود يقولها تجهز وييجي ياخدها ويروحوا عند اهلها ، يوصلوا تحت البيت )
امير : بصي هستناكي هنا
خلود : مش هتطلع معايا ؟
امير : لا عشان تقعدي معاها براحتك
خلود : لا مينفعش تفضل قاعد ف العربية اطلع معايا يلا
امير : حاضر
( يطلعوا البيت ، تخبط خلود ، يفتح اخوها )
كرم ب فرحة وحماس : خلوووووود 😃
خلود وهي بتحضنه : حبيبيييييييي 😍
( يدخلوا )
خلود : سلم ع عمو امير
( ميردش كرم باصص ل امير وخايف )
خلود ب صوت واطي : كرم سلم عيب كدة 😐
امير : سبيه ع راحته
كرم : انت مال وشك ؟؟
خلود : ملكش دعوة روح انده ماما امشي
( يجري كرم ع جوة )
خلود : اتفضل 👋
( يقعدوا ف الانتريه ، تقرب مامتها )
الام : خلود 😍
( تسلم عليها )
خلود : ماما امير جوزي
( يقوم امير )
الام : ازيك ي بني عامل ايه 👋
امير : الحمدلله حضرتك عاملة ايه 👋
الام : بخير ي حبيبي اتفضل اقعد .. ي كرم حط الشاي ع النار
كرم : حااااضر
الام : هروح اصحي ابوكي دة هيفرح اوي لما يشوفك
خلود ب تريقة : اوي 🙄