صقر بلاش تحرمني من ابني...
والله ما ليا ذنب في كل دااا اديني بس شويه وقت افهمك ان
كل داا لعبه عليناا بلاش نخسر بعض في ساعه شيطان
_ بدموع صقر استني ابني لا بالله عليك...
في يوم من الايام بيفوق صقر من النوم علي صوت بكاء طفل ميتعداش ال 5 شهور
صقر بعيون مغمضه وصوت نايم: صفاا قومي فارس بيعيط صفاا قومي
بيفتح عيونو بيلاقي الاوضه الواسعه فاضيه وصفا مش موجوده بيفتكر ان خلاص صفاا بقت مجرد ذكري في حياتو
بيقوم يغسل وشو ويمشي في طرقات القصر لحد مابيوصل للمطبخ الكبير الي في الدور الاول من ادوار القصر
بيلاقي المساعده كارما ذات ال 45 سنه شايله فارس وبتحاول تسكتو ومش عارفه
صقر بيقرب منها وياخد فارس ششش بس بس
مش عارفه تسكتي طفل يا كارماا مش عارفه هو عاوز اي يعني
كارما: كلنا هنا عارفين هو عاوز اي بس انت الوحيد الي مش عارف ياصقر او عارف ومتجاهل داا
صقر بيغير الكلام: هاتي البيبرونه
كارما: اتفضل
صقر: ششش شوف البيبرونه بتاعتك اهي
فارس لسه بيعيط وبيرمي البيبرونه علي الارض
صقر: طيب عاوز اي هاا عاوز اي ياروح البابا عاوز تلعب نخرج شويه في الجونينه طيب نركب العربيه
_ فارس مش راضي يبطل عيااط
كارما: طفل في سنو محتاج ام في حياتو هات أم ليه
صقر: متجبيش سيرتهاا هنا تمام
كارما: بس انا مجبتش سيره صفاا انا بقول تجيب ام تانيه لفارس غيرهاا
صقر بيبصلها بعيون جامده وقاسيه بيسكتها بنظرتو
سحر: كل يوم هنصحي علي صوت الباشا الصغير ولا اي
صقر بيلتفت للصوت الي جاي من وراه صباح الخير يا ماما
سحر: صباح النور ياحبيبي
صقر: ياريت تسكتيه لاني زهقت ومش عارف اتعامل معاه
بيديها الطفل ويطلع يغير هدومو علشان يروح الشركه بتاعتو
سحر بتبص لفارس وهو بيعيط وبتنادي كارمااا خوديه سكتيه انا مبقتش اعرف اهتم بأطفال
كارما: حاضر
تعريف بسيط بالشخصيات علشان منتوهش من بعض
صقر شاب عندو 32 سنه صاحب شركات كتير وعندو 3 قصور في اماكن مختلفه شخص غامض وجادي وعصبي مش سهل ابدا يبين الي جواه قدام حد لكن صفا غيرهم..
بيتصرف بمزاجو ومش بيدي لحد فرصه يسئلو هو مين وعاوز اي
بيتعامل بصمت وبجديه مش مفهمومه
صفاا بنت عندها 27 سنه جميله مختلفه جداا عن صقر هاديه من عائله فقيره جداا اتجوزت صقر بعد 3 سنين من تعرفها عليه وقدرت تدخل قلبو بالرغم انهاا محاولتش اصلا انها تقرب منو
سحر مامت صقر عندها 50 سنه كانت من عائله فقيره جداا قدرت تلفت نظر عمران ابو صقر وتتجوزو
عمران صاحب اكبر الشركات والقصور الي سابهم كلهم ورث لصقر بعد وفاتو كان طيب جداا وهادي بعكس سحر فهي عقل مدبر وشخصيه قويه ومش ساهله ابداا وبتعرف تتحكم في قلبها كويس جداا
أما ماضيهاا الخفي وعائلتهاا التي اخفتها عن الأنظار ف محدش يعرف عنهم حاجه غيرهاا هي وبس
كارما كبيره الشغالين في القصر عندها 45 سنه بتشتغل في القصر دا بقالها 25 سنه وكانت بتهتم بصقر دايما وبتعتبرو ابنها
القصر فيه 8 شغالين غير كارما راجلين و 6 حريم
نكمل
صقر بيركب عربيتو وبيروح علي الشركه واول حاجه بيأمر بيها السكرتيره هي انها تشيل صوره صفاا من علي المكتب ومن علي الحائط الكبير الي قدامو وتحطهم في صندوق وتحطهم في مكان بعيد عن نظرو
في القصر
في غرفه الطفل فارس
كان نايم علي سريرو بيلعب باللعب المتعلقه فوق السرير
الباب بيتفتح وبيدخل حد بخطوات هاديه علي صوابع رجلو بيقرب من الطفل بهدوء ويحط تليفون علي ودن فارس
صفا: حبيبي فارس وحشتني ياماما انا هنا ياعيوني جمبك بس تكبر شويه هاخدك ونعيش سواا متعيطش خالص ياروحي تمام انا هكلمك كل يوم واخليك تسمع صوتي دايماا انت مش ناسيني صح اوعي تنساني ياروحي
مامي بتحبك كتير ونفسها اوي تحضنك وتلعب معاك
كانت صفا بتسمع صوت ضحكه ابنهاا وملاغاتو ليهاا لانو لسه مش بيقدر يتكلم لصغر سنو
_ اتقفلت المكالمه وبنفس الهدوء خرج الشخص المجهول من اوضه فارس
سحر: كارما اعمليلي قهوه
كارما: حاضر بس كنت عاوزه اكلمك في موضوع
سحر: اتكلمي
كارما: انا حاسه ان في حد معانا مش كويس
سحر: انتي بتقولي اي و ليه
كارما: من شويه شوفت خيال حد خارج من اوضه فارس بس لما مشيت ورا الخيال ملحقتهوش و مقدرتش اعرف مين
سحر بفزع: طيب وفارس
كارما: متقلقيش اطمنت عليه هو كويس وكان بيلعب في اوضتو بس معرفش الشخص الي دخل مين وكان عاوز اي و ليه حتي مفيش حاجه اتسرقت من الاوضه
سحر: طيب والحل
كارما: اممم ممكن نحط كاميرات مراقبه في اوضتو علشان نقدر نعرف مين الشخص داا وبيعمل اي في اوضة فارس
سحر: اه فكره كويسه هكلم المهندس محمد يجي يشوف موضوع الكاميرات داا
كارما: تمام هعمل لحضرتك القهوه حالا
كارما بتروح علي المطبخ وسحر قلقانه وبتفكر في الي موجودين في البيت وتقول ياتراا مين منهم الي كان عند فارس و ليه....معقول تكون صفاا بس هتدخل ازااي
في الشركه
صقر خلص شغلو وخرج بعربيتو وراح علي المكان الي عرف صفا فيه
نزل من العربيه ورفع عيونو علي المطعم الكبير الي في المكان اللي بناه لصفاا
بيرجع بذاكرتو ل5 سنين وراا
فلاش باك..
صقر كان بيتمشي مخنوق في نفس المكان داا بيلفت نظرو ريحه جايه من عربيه الكبده اللي في المكان بيبتسم بهدوء وبيستنشق ريحتها الجميله وبيقرب من العربيه ويقول بصوت حاد ممزوج بالعصبيه والتعب
2 سندوتش كبده لو سمحت
مش بيلاقي رد من صاحب العربيه غير انو حرك راسو بالموافقه وبدأ يعملو السندوتشات في صمت تام
صقر كان متابع الراجل وهو بيعمل السندوتشات ومستغرب طريقتو لابس چاكيت تقيل وقافل السوسته لحد دقنو ولابس كوفيه ولاففها علي وشو لحد تحت عيونو ولابس طاقيه علي شعرو ومداريه حواجبو وفوق كل داا لابس شال علي راسو ولاففها علي رقبتو
صقر بيقول لنفسو: الجو ساقعه فعلا بس مش مستاهل كل اللبس داا
السندوتشات خلصت وصاحب العربيه مد ايدو لصقر
صقر: كام الحساب
صاحب العربيه شاور ب ايدو علي ورقه مكتوب عليها
ساندوتش الكبده 4 جنيه
صقر طلع من جيبو 10 جنيه وحطها قدام الراجل ومشي ومستناش ياخد الباقي
طعم السندوتشات شدتو لدرجه انو بقا كل يوم بعد الشغل بيجي لنفس المكان ويطلب اكل من صاحب العربيه ومش بيلاقي منو اي رد بس اتفاجئ ان الراجل ادالو كل الباقي الي صقر كان بيسيبو ويمشي
صقر: المكان عجبني وريحه الكبده عجبتني والطعم كمان والنضافه الي عند صاحب المحل شدتني صحيح هو مش بيتكلم خالص واحتمال كبير يكون اخرس بس مش مشكله المهم اني بقدر اخرج من اي مود بيضايقني وبستمتع بطعم الاكل
في الاول كنت باخد السندوتشات واكولها في عربيتي الي كنت بسيبها بعيد شويه وبنزل اتمشي لحد عربيه الكبده
بس دلوقتي صاحب العربيه اشتري كراسي وعمل نظام ترابيزات قدام العربيه وبقا شبيه للمطعم وبدل ماكان عندو طاسه واحده بقا عندو اتنين وبقا يعمل شاي وعندو بيبس بيسقعو في تلج عشان معندوش تلاجه والناس بدأت تيجي كتير والعربيه بدأت تكون معروفه
وبدل ماكنت باكل السندوتشات في عربيتي بقيت اقعد علي ترابيزه قدام عربيه الكبده ولان المكان علي النيل ف المكان وريحتو كانت بتنسيني اي تعب
وفي يوم كنت رايح اطلب نفس السندوتشين بس لقيت المكان فاضي جداا يمكن عشان مروحتش الشغل النهارده والساعه 11 الصبح وانا متعود باجي دايما بليل بلاقي موت علي العربيه وقفت قدام الراجل ولسه هطلب بس لقيت ورقه كبيره نظام منيو وفيها كذا صنف جديد
كبده سجق كفته لحمه شرايح
ابتسمت وقولت عاوز سندوتشين كبده وواحد لحمه
مستنتش رد كالعاده بس الغريب اننا بقينا في الصيف والجو حر جداا
هو ليه لسه بيلبس شال وطقيه وكوفيه صيفي وبيلف نفسو بالطريقه دي
فوقت علي طبق الاكل بيتحط قدامي ف اخدتهم ولفيت عشان اروح اقعد علي ترابيزه بس وقفني صوت بنت بتقول
لو سمحت نسيت ساندويتش اللحمه
لفيت ملقتش غير صاحب العربيه ف استغربت وقولت هو مين الي نادا علياا
لقيت صاحب العربيه باين عليه القلق ف تقريبا شكلي كدا فهمت
قربت منها وقولت انتي بنت
ردت بصوت هادي ممزوج بالخوف وقالت مش عشان بنت هبقا فريسه سهله ليك او لغيرك انا اقدر احمي نفسي كويس اووي
ابتسمت بسخريه علي كلامها وقولت بس انا مش بفكر في كدا اصلا ولا عاوز افكر انا بس استغربت كنت فاكرك راجل طول الوقت داا اخدت الساندويتش ومشيت ركبت عربيتي وأكلت وكل ما افتكر كلامها اضحك عليه
روحت كذا مره ومتكلمتش معاها في الموضوع ولا حسستها ب اهميه ولا فرحان اني الوحيد وسط الناس دي كلها الي عارف انها بنت مش راجل كنت بتعامل عادي زي كل مره والغريب انها اصلا بتتعامل كأنها متكشفتش قدامي وسرها بان ومحسساني انها ناسيه انها شافتني قبل كدا ولا تكون فعلا ناسياني بس ازاي وانا باجي بقالي كام شهر اكيد معندهاش زهايمر يعني بدأت الاحظ انها بتقفل العربيه ساعات وبتتأخر ساعات في الفتح ومبقتش تفضل لبليل اوي بس مع ذلك مأهملتش في الاكل ولا في النضافه
وفي يوم كنت قاعد باكل السندويتشات ومديها ضهري وكنت بفكر في الشغل والشركه والحمل الي علياا وبعدين سمعت صوتهاا بتزعق وتقول اتلم ياقليل الادب
بصيت علي الصوت بسرعه لقيتها واقفه علي وشها علامات العصبيه وشعرهاا الناعم مفرود علي ضهرهاا وقدامها شاب ماسك شالها في ايدو ف الي اكتشفتو ان الشاب داا شد الشال من علي شعرها بالقوه
قربت منهم وسمعت الشاب بيقول انا كنت شاكك من الاول انك بنت مش راجل مخبيه نفسك ليه مخبيه الجمال داا كلو ليه بس
من غير ولا كلمه قربت من الشاب الي قدامهاا ونزلت ضرب فيه لحد ما أغمي عليه طلعت كل الطاقه السلبيه الي كانت جواياا محستش بنفسي غير لما لقيتو استسلم في ايدي ف عرفت انو اغمي عليه فضلت اتنفس بسرعه وقومت بعيد عنو بصتلها لقيتها لسه واقفه مكانها علي ملامحها جمود او برود مش عارف توقعت هلاقيها بتعيط او بتصرخ او بتطلب المساعده بس كانت قويه متماسكه وكأن اللي حصل داا مهزش منها شعره واحده اتفاجئت ومبينتش اني متفاجئ اخدت الشال الي ع الارض وادتهولهاا كنت متوقع انها اتعصبت علي الشاب علشان شعرها بان او علشان كان ممكن يتهجم عليهاا استنيت منها تغطي شعرها تاني
بس اخدت الشال وقالت مبقاش يفيد و حدفتو علي الشنطه الي فيها مستلزماتهاا وبدأت تنضف العربيه عشان هتمشي بصتلها بفضول وكنت عاوز اسئلها ليه مستخبيه وليه الشال مبقاش يفيد وليه اتنكرتي في زي راجل وليه بتشتغلي هناا اصلا اسئله كتير بس مسئلتهاش ولا سؤال
قولت بجديه: خلصي ويالا هوصلك
بصتلي شويه وقالت: شكرا ليك علي مساعدتك بس انا هروح لوحدي متتعبش نفسك
بصتلها وتجاهلت كل كلامها وقولت هستناكي علي الترابيزه بتاعتي خلصي وهوصلك
مردتش علياا فضلت قاعد مستنيها لحد ماخلصت ساعدتها تشيل الكراسي والترابيزات وقفلت عليهم بجنزير وقفل واخدت شنطتهاا وبدأت تمشي ف قولتلها بصوت مسموع
استني هوصلك
_ شكراا همشي لوحدي
: متتكلميش كتير العربيه هناك تعالي
فضلت ماشيه جمبي لحد ماوصلنا فتحت العربيه ولسه بفتح الباب علشان اركب لقيتها عدت العربيه ومكمله طريقهاا اتعصبت قولتلك هوصلك بصتلي بهدوء وقالت
_ صوتك ميعلاش عليا تاني داا اولا
_ مش عاوزاك توصلني داا ثانيا
_ شكراا علي مساعدتك تقدر تمشي داا ثالثا
فضلت واقف متعصب وعاوز اروح اضربهاا بس انا فعلا غلطان هي حره انا شاغل بالي ليه
روحت علي المكان بعد 3 ايام
لقيتها لابسه بنطلون وبلوزه وكوتشي وسايبه شعرهاا ومش مغطيه وشهاا اتفاجئت طلبت اكلي واكلتو ومشيت
بعد يومين كنت قاعد باكل سمعت صوت شابين بيتكلمو
شاب1: تفتكر البنت دي بنت صاحب العربيه ولا مين
شاب2: مش عارف بس هي حلوه اووي
شاب1: طيب ماتيجي نفضل لحد ما الكل يمشي وضحك
شاب2: بضحكه مستفزه تمام اتفقناا
قالو كداا وبعدين فضلو يضحكو بقرف
فضلت اقول لنفسي امشي ملكش دعوه عاقبها علي تصرفهاا....بس هي بنت ومن واجبي ك راجل احميهاا وطالما عارف بالخطه الوسخه دي ف مينفعش اسيبها واقول انا مالي
خلصت اكلي وفضلت قاعد وهما قاعدين
الكل بدأ يمشي وانا وهما لا
كل شويه يبصو علياا ومتضايقين وانا مش هاممني
فضلنا قاعدين ساعتين لحد ما زهقو ومشيو استنيت لحد مالقيتهم مشيو فعلا وبعدين مشيت استخبيت في مكان علشان لو رجعو بس مرجعوش واطمنت انهاا مشيت من المكان ورجعت علي القصر بتاعي فضلت افكر كتييير في موضوع معين واخيراا اخدت قرار
تاني يوم روحت علي نفس المكان بس مفتحتش
واليوم الي بعدو كمان مفتحتش
اليوم التالت فتحت بعد العصر
كنت اخدت القرار وواثق منو
روحت وقفت قدامها وقولت
عاوزك في موضوع وعاوز اجابه ب تمام موافقه او لا مش موافقه
_ اتفضل
مديت ايدي اسمي صقر
سلمت عليا وقالت صفاا
صقر: تمام شوفي انا عاوز اشتغل معاكي هناا
صفا: لا مش موافقه
صقر: ليه يعني
صفا: علشان انا مش محتاجه حد يشتغل معايا دا اولا
ومش هقدر اشغلك واديك أجر شهري او يومي دا ثانيا
صقر: وانا مش عاوز اجر اصلا
صفا: وليه الشغل بقاا
صقر: عاوز اكتسب خبره
صفا: مش فاهمه
صقر: بفكر افتح محل وحابب اخد فكره منك عن الاكل والبهارات وكداا
صفا: مش سبب مقنع
صقر: مش مهم يكون مقنع ليكي بس هو مقنع لياا انا
صفا: تمام اتفقناا مفيش مشكله بس انا فعلا مش هقدر اديك اي أجر
صقر: وانا فعلا مش عاوز فلوس
صفا: تمام هقولك مواعيد الشغل لو مش مناسباك عرفني
صقر: تمام
صفا: انا حاليا بدرس في جامعه وليا ايام معينه بروحها ف بضطر مفتحش العربيه ف ممكن تفتحها انت
صقر: موافق
اشتغلت معاها انا لا هفتح مطعم ولا عاوز اخد خبره ولا حتي عشانهاا هي فعلا متهمنيش بس الفكره اني اتولدت لقيتني في قصر وتحت رجلي 3 شركات مستنيني أكبر كان كل حاجه حواليا متاحه ترفيه دراسه فلوس كل حاجه تتخيل كانت معايا وملكي وعشاني
بس مكنش عاجبني الوضع داا كنت عاوز اتعب واكسب فلوس من الصفر وابني بيت بتعبي واحس بالفرحه دي كنت عاوز اوصل للي انا فيه بعد تعب سنين وسنين وافتخر قدام الكاميرات واقول تعبت ونولت بس كل داا محصلش بحس ان صورتي الي في الجرايد دي كذبه انا اتولدت لقيتني كداا اتولدت ابن باشا وانا كنت عاوز ابقا ابن غفير ممكن غيري بيتمني الي انا فيه بس انا فعلا مش عاوز
ف اشتغلت في المكان داا علشان افرح انا مش بدور علي فلوس انا بدور علي فرحه وراحه
يوم ويوم ويوم ويوم
الوقت بيعدي وشغلنا بيكبر وبالرغم من كداا لسه اي ساندويتش ب 4 جنيه بقينا نوصل دليڤري ل اي مكان وكنت انا بوصل الطلبات بالليل وهي بالنهار رغم اني معايا عربيه بس هي كانت مصممه نوصل الطلبات بالفزبه بتاعتها كان شكلي مضحك بالفزبه البينك بتاعتها بس كنت فرحان اني بشتغل وبتعب ومكنتش مكسوف وانا بوصل أكل للموظفين الي شغالين في الشركه بتاعتي واي يعني هما شغالين عندي وانا شغال عند صفا محدش احسن من حد
صفاا: صقررر النهارده اشتغلنا ب 4000 جنيه انت متخيل انا فرحانه اووي دا اول مبلغ اوصلو من ساعت مافتحت
صقر بإبتسامه: كويس جداا في تقدم
صفا: اتفضل
صقر: اي داا
صفا: راتبك
صقر: بس انا مش عاوز راتب
صفا: داا رزقك ولولاك مكنتش هعرف اعمل حاجه خدهم مني دول تعبك متكسفنيش الألفين دول هنجيب بيهم طلبات للعربيه والألفين التانين قسمتهم علينا
اخدت منهاا 1000 جنيه وكنت فرحان جداا دول تعبي اناا
صحيح المبلغ داا يجي 1٪ من راتبي الاساسي في الشركه بس فرحتي بيه كانت كبيره جداا حتي مصرفتوش حطيتو في المكتبه بتاعتي وكتبت عليه تعبي...
كبرنا سواا والعربيه بقت محل صفاا للساندويتشات كانت فرحانه جداا بس انا كنت فرحان اكتر علشان حاسس اني فقير وبنجح رغم انو مش مشروعي بس فرحان
طول فتره الشغل انا وصفا بنتعامل بجديه مع بعض لاهي شاغله بالي ولا انا شاغل بالهاا بنتصرف بطبيعتنا ومفيش اي هزار ولا سهوكه بنات كانت راجل واقف معايا رغم جمال ملامحها
بس كنت غلط انا اتعلقت من غير ما اعرف....قلبي حب من غير ماياخد إذني حتي
معرفتش كداا الا لما سبت الشغل مع صفاا علشان سفريه مهمه تبع الشركه وفعلا كنت مفتقدهاا جداا ومفتقد ملامحهاا الي وقعت فيها وانا مش حاسس
لما نزلت من السفر روحت ليها الاول قبل حتي ما ارجع القصر بس كنت مختلف كنت هادي ومبتسم وقلبي بيدق ل اول مره اسمع صوت دقاتو ول اول مره بطل الروايه يحب حلوفه لا تبالي
صقر: اذيك يا صفا
صفا: صقر اذيك الحمدلله علي سلامتك
صقر بإبتسامه: موحشتيكيش ولا اي
صفا: وهتوحشني ليه
صقر: احم لا عادي يعني بهزر بقول إفيه
صفا: ااه لا عادي يعني
صقر: طيب مكاني موجود ولا اي
صفا: ااه طبعا موجود في اي وقت وفي بنت اشتغلت معايا بردو
صقر: طيب انا فعلا مش عاوز مرتب اديها مرتبي وانا بشتغل عادي انا عاوز كدا
صفا: لا انت بتتعب ولازم تاخد علي قد تعبك والحمدلله الشغل كويس والفلوس كويسه كل واحد وليه رزق
صقر: طيب انا هروح البيت وارجع بعد ساعه
صفا: خود باقي اليوم اجازه علشان ترتاح مش هخصمهم من راتبك متخافش
صقر بإبتسامه وبيقول لنفسو والله ما عاوز ابعد عنك الساعه دي وبعدين بيبصلها لا ساعه وهاجي متقلقيش مش تعبان
صفا: تمام
بااك
بيرجع للواقع الي عايش فيه واد اي قرار صعب انك تبعد عن الشخص الي بتحبو بيبص علي المطعم الكبير ويقول لنفسو العربيه الصغيره كانت احسن بكتير يا صفاا عارف انك مكنتيش عاوزاني أبني المطعم داا وكنتي عاوزه تفضلي صفاا صاحبه عربيه الكبده بس انا شوفتها من زاويه تانيه وهي ان مقامك كبير وجوزك مقامو كبير في المجتمع مكنتش اعرف ان الفلوس مش بتشتري السعاده بجد وان الحاجه البسيطه احلي وافضل واطعم مليون مره من الحجات الكبيره حسبتها غلط للمره التانيه..
غمضت عيني وافتكرت اول يوم لما عرضت عليها تشتغل معايا في الشركه ورفضت رفض تام رغم اني توقعت توافق علشان محتاجه الفلوس لكن عندها عزة نفس جامده
وابتسمت للحظه لما افتكرت الطريقه الي عرضت عليها الجواز وردها قتلني وقتهاا كل حاجه فيها كانت مميزه بطريقه قادره توقعني في شباكها رغم انها معملتش شباك توقعني فيهاا
وقعت فيهاا من غير هي ماتاخد بالهاا
حبيتهاا بدون مجهود منهاا...
قررت ابعد عن المكان داا لاني مش قادر اقعد فيه لحظه كمان عاوز ابعدها عن تفكيري وافتكر حاجه واحده بس وهو السبب الي خلانا نفترق لازم السبب دا يفضل محفور في بالي علشان محنش...
ركبت عربيتي وقررت اروح علي اي مكان ياخدني ليه قلبي علشان يرتاح شويه من الصراع الداخلي
كنت سايق بس مش مركز عقلي وقلبي بيفكرو فيهاا وعيني بس الي مع الطريق
وقفت بالعربيه في مكان لما ركزت فيه لقيتو اصعب مكان علياا وكان بيتناا..
بيتي انا وصفاا فضلت ابص عليه وقلبي بيدق وحاسس بخنقه انا تحت بيتي ومش قادر اطلع علشان هي فوق رغم اني نفسي اووي اطلع واحضنهاا نفسي اكون معاها بس هي ليه عملت فياا كدا
نزلت من العربيه سندت عليها من قدام فضلت رافع راسي لفوق وباصص علي الشباك الكبير الي في اوضه نومنا والنور الي شغال فيها لمحت خيالها جمب الشباك قلبي فضل يدق وبتمني تشوفني وتعرف اني صعب علياا اكون بعيد عنهاا العالم كلو بيشوفني قاسي الا انتي بتحطي ايدك جوا قلبي وتطلعي الجزء الحنين فيه
فضل خيالها قريب من الشباك متحركش اكيد بتقرأ كتاب دلوقتي طيب هي حاسه بغيابي وتعبانه زيي ولا متأقلمه وعارفه تعيش عادي وبتنساني معقول تكون محبتنيش..
غمضت عيني ونزلت مني دمعه سخنه اوي علي خدي
قولت بصوت هادي ومخنووق
صفاا انتي ليه خونتيني...
رواية ما وراء الخيانه
الجزء الثاني
صفاا انتي ليه خونتيني...
فتحت عيني وبصيت بنظره اخيره علي خيالها الي في الشباك
وركبت العربيه ورجعت القصر كان في جوايا احساس بيقولي
اطلع اديها فرصه يمكن تكون بريئه بس ازاي وانا شوفتها
بعيني مع واحد وفي اوضتنا كفايه تفكير فيهاا بقا انساها وشوف حياتك..
في قصر صقر
الكل كان نايم وفي هدوء في المكان طلعت علي اوضه فارس كان نايم قعدت قدامو وفضلت سرحان في ملامحو
انت ازااي شبها اوي كدا ازاي اخد شكل عينها ومناخيرها حتي شفايفها ولون بشرتهاا انا هنا بعافر علشان انسي الشكل داا وانت في كل نظره بتفكرني بيه تعرف انك هتبقا مشكله كبيره في حياتي وهضطر ابعد عنك علشان مش عاوز افتكر ملامحها الي هي اصلا محفوره في قلبي
تعرف اني كنت بحبها اووي ويصعب عليا اقول كنت
انا فعلا مش قادر انساها ولا انسي حبهاا يمكن علشان حبيتها في وقت كنت محتاجها فيه بجد
يمكن علشان عمري ماحبيت قبلها
يمكن كمان علشان حبي ليها صادق
بس هي ازاي قدرت تخون وتتخطاني كدا هي كسرتني ومحافظتش علي غيابي انا كنت بثق فيها اكتر من نفسي
خيانتها وجعتني اوي يا فارس
تعرف اني بحكيلك علشان معنديش صحاب ومعنديش حد غيرها احكيلو عن الي جوايا بس هي مبقتش موجوده
كويس انك نايم ومش فاهمني مش سهل عليا تكرها هي مهما كان أمك وزي ماوعدتك ووعدتها هخليك تشوفهاا بكره
بوستو من جبينو ورجعت علي اوضتي الي ببقا تايه فيها انا مبقتش احب القصور ولا الاماكن الفخمه الواسعه الي بنتوه من بعض فيها
انا اخدت علي بيتي انا وصفا البيت الصغير الي كان مليان بالدفا والحب انا دلوقتي فهمت ليه صفا رفضت نتجوز في القصر هناا وصممت نبني بيت علي قدناا
مش هنسي كلامها لما قالت
* انا عاوزه بيت يكون مملكتي الصغيره يكون علي قدنا مش عاوزه بيت فخم وكبير منقدرش نمليه كلو بالحب *
رجعت بضهري علي السرير وبصيت للسقف شويه وافتكرت لما عرضت عليها تشتغل معايا في الشركه
صفا: لا شكراا مش عاوزه
صقر: ياصفا هو انا بقولك هعطف عليكي انا بقولك هتشتغلي معايا في الشركه داا شغل ياستي اعملي انترڤيو ولو مناسبه تمام مش مناسبه خلاص نصيب
صفا: هدفي مش الشركه انا عمري ما اشتغل عند حد
طالما قادره اشتغل لوحدي واصرف علي نفسي خلاص هطمع عليه
صقر: مش عاوزه يبقا معاكي فلوس كتير تحققي احلامك
صفا: حلمي واحد وهو الستر مش عاوزه افضل اكوش فلوس قد كدا في حسابي وفي الاخر ملاقيش الراحه الي بحلم بيهاا انا مش عاوزه فلوس معرفش اوديها فين انا عاوزه فلوس علي قد احتياجي وتخلص واجيب غيرها بتعبي انا مبسوطه كداا
صقر: مش سبب مقنع
صفا: مش مهم يكون مقنع ليك بس هو مقنع لياا انا
صقر: تمام براحتك مش هضغط عليكي
صفا: شكرا
ارتسمت ابتسامه علي وشي لما افتكرت كلامها وقتهاا
عمري ماتوقعت ان الخيانه تيجي من واحده بنفس شخصيتهاا متخيلتش حتي في بالي انها تطلع كداا
محستش بالوقت لان التفكير كان شاغل كل وقتي معرفتش انام ولا ارتاح لحد الصبح فضلت قاعد علي السرير لحد ما سمعت صوت فارس بيعيط ف نزلت اشوفو
كارما: خلاص ياحبيبي اهدي يالا ارضع بقاا
صقر: هاتيه هنخرج الجونينه شويه
كارما: طيب اتفضل البيبرونه اهي
اخدتو وخرجت الجونينه فضلت اهز فيه لحد ما أكل ونام كنت واخدو في حضني ومش عاوز ابعدو عني كنت محتاج للحضن داا
كارما: مدام سحر البشمهندس محمد برا
سحر: طيب دخليه وطلعيه اوضت فارس وخلي البواب يطلع السلم فوق
كارما: حاضر
سحر: يعني كدا هقدر اشوف مين دخل ومين خرج من التليفون بتاعي وانا في اي مكان
محمد: ايوا يافندم لو تحبي ممكن اركبلك كاميرات في القصر كلو
سحر: لا صقر رافض الكاميرات في المكان هنا
محمد: تمام عن اذنك يافندم
صقر: ماما انا عندي شغل كتير النهارده ومواعيد ضروريه مش هقدر اروح انا ف عاوزك تاخدي فارس لصفاا خليها تقعد معاه ساعه ورجعيه تاني
سحر: حاضر ياحبيبي وكويس انك مش هتروح ولا هتشوفها
صقر: انا رايح الشركه
سحر: تمام كارما خليهم يجهزو العربيه علشان هخرج انا وفارس وجهزي شنطتو
كارما: حاضر يافندم
صقر: في مواعيد تانيه يا هبه
هبه: لا يافندم كلو خلص
صقر: طيب انا خارج لو حصل حاجه كلميني
هبه: حاضر يافندم
صقر: الو يا ماما روحتي
سحر: ايوا روحتلها وقعدت معاه ساعه ورجعت القصر تاني
صقر: اا قالت حاجه
سحر: لا مقالتش
صقر: طيب مع السلامه
في القصر
_ مش هقدر اخليكي تكلميه النهارده كدا ممكن حد يشك فيا ولو شافوني هتبقا مصيبه
صفا: ابني وحشني اووي كان في وعد بيني وبين صقر انو يجيبلي ابني النهارده ومجابوش قالي هخليكي تشوفيه مرتين في الاسبوع وبقالي كذا يوم مشوفتوش
_ ازااي صقر بيه مدي أمر لسحر هانم انها تجيبلك فارس وهي خرجت من القصر فعلا معاه ورجعت من شويه
صفا: بس هي مجاتش ولا شوفتو
_ ازاي بس وهي خارجه قدام عنينا كلناا وكارما بنفسها محضرالها البيبرونه والشنطه بتاعتو
صفا: يعني اي...بقولك والله ماشوفتها لا ثانيه واحده هي كذبت علي صقر وقالتلو انها جتلي
_ معرفش
صفا: طيب فارس كويس
_ ايوا وكلنا بنخلي بالنا منو متقلقيش
صفا: طيب انا عاوزه اشوفو بالله عليكي
_ اا طيب خلاص هحاول افتح الكاميرا من بعيد وتشوفيه
صفا: شكراا اوي
في المطبخ
كارما: جهزتو الشوربه بتاع سحر هانم
هويدا: ايوا جاهزه اهي
كارما: فين الكراويه بتاع فارس
سميه: اهي جاهزه
كارما: هي حنان فين
ساره: كانت بتتكلم في التليفون بره
كارما بحده: مش قولت التليفون ممنوع وقت الشغل لما تيجي قوليلها لو اتقررت تاني هتاخد جزا
ساره: حاضر
حنان: اهو شوفتي قاعد بيلعب ومبسوط ازاي
صفا: حبيبي وحشني اوي
حنان: غصب عني مش هقدر اقرب علشان سحر هانم وكارما حواليه
صفا: تمام
حنان: يالا هقفل بقاا سلام
صقر: مساء الخير
سحر: مساء النور ياحبيبي
صقر بيقرب من فارس وبيشيلو انا هخرج شويه
سحر: علي فين
صقر: هخرج مع ابني
سحر بهدوء: تمام اتفضل واه لما تهدي كدا وتكون رايق ابقا فكر في موضوع الجواز وياريت متاخدش وقت كتير
صقر بيبصلها بنظره جمود ويخرج من القصر
بيفضل يلف بالعربيه شويه وبيروح يقعد في مكان هادي علي النيل
صقر: عارف انا مستحيل اتجوز ولا افكر ابص علي بنت تانيه او ادخلها حياتي وبيتي واوضتي مستحيل انام جمب ست تانيه غيرهاا او اشاركها يومي وكلامي مش هبقا بظلمها لوحدها لاني لو سمحت بكداا هظلم نفسي قبلهاا وهعيش بدون قلب صحيح انا بردو مش عايش بس ع الاقل مسموحلي افكر فيها واتخيلها جمبي ومعايا بتخيلها في كل وقت واقفه وبتضحكلي هو اناا ليه مش عارف انساها..
انا ليه مش بكرها..
اكيد لما شافتك النهارده حضنتك بس ليه ريحتها مش فيك..
توقعت اني هشم ريحتها وانا حاضنك وكنت مستني اليوم يخلص بسرعه علشان ارجع واحضنك واشم ريحتهاا واغمض عيوني واتخيل اني بحضنها...فارس هو انا مريض هو انا اتجننت بيها انا ليه بقيت تعيس كدا..
ياريتك كنت كبير شويه وبتعرف تتكلم ياريتك قولتلها اني لسه بحبها ومش قادر انساها ياريتك رجعتها معاك...
بصيت عليه لقيتو باصصلي ومستغرب شكلي مستغرب دموعي مستغربني قرب مني ونام في حضني وحسيتو بيهديني وبيطبطب علي قلبي
مسحت دموعي وبصيتلو تاني وقولت نديهاا فرصه..؟
بصلي وضحك انا عارف انو مش فاهمني ولا فاهم الوضع الي احنا فيه بس اخدتها اشاره ب انو ضحك وقولت مستعد اسامحهاا والله بس تجري عليا وتحضني هسامحهاا
اخدت فارس وروحنا علي بيتناا لقيت نور الاوضه شغال وخيالها فيهاا جمب الشباك طلعت بسرعه ع السلم ووقفت قدام باب الشقه وحسيت قلبي بيتسابق مع انفاسي كنت متوتر وخايف ومرتبك ومش عارف اعمل اي بس لقيتني بقرب من الباب وبخبط عليه استنيت شويه مفتحتش خبطت تاني وتالت بس مبتفتحش قولت
صفا انا عارف انك صاحيه وانك جواا انا شوفت خيالك من الشباك افتحي انا صقر انا جوزك وحبيبك عارف انك زعلانه ومش حابه تشوفيني بس انا الي المفروض ازعل مش انتي بس انا جاي علشان بحبك ولسه عاوزك مفتقدك جداا وحاسس اني تايه صفاا افتحي علفكرا فارس معايا لو مش عشاني ف افتحي علشانو هو افتحي عاوز اشوفك وحشتيني عاوز اخدك في حضني وانام علي رجلك صفا انا محتاجك بجد والله سامحتك ومستعد انسي كل داا واعتبرو فات بس افتحي..
فضلت قاعد قدام الباب بس هي مفتحتش نزلت وقبل ما افتح العربيه بصيت للاوضه لقيت خيالها مكانو حسيت اني تايه ومش مرغوب هي خلاص اتخلت عني ومبقتش عاوزاني ركبت عربيتي ومشيت ورجعت القصر وانا داخل من بوابه القصر الكبيره افتكرت اول مره طلبت منها الجواز ولما وافقت تشوف بيتي واهلي الي عايش معاهم
فلاش باك
صقر: صفا في اوردر في المكان داا
صفا: طب ثواني وهجهزو
صقر: لا هو جاهز اهو اتفضلي
صفا بتبص في ساعتها بس الساعه 11 ياصقر وانت الي بتوصل بليل
صقر: بس انا عندي مشوار مهم تبع الشغل مش هقدر اروح لاني لازم امشي
صفا بتردد امم طيب اا
صقر: اتفضلي
صفا اخدت منو الاوردر ومش مطمنه ومش عاوزه تروح
بتقول لنفسهاا انتي خايفه ليه
ولا يمكن علشان كان دايما موجود ومش بيخليني احس بخوف ويمكن علشان ولا مره وصلت اوردر متأخر كداا
ركبت فزبتي واتكلت علي الله وروحت علي المكان الطريق للمكان دا مكانش مقطوع زي ماتخيلت في بالي وكان كلو عواميد نور ومحلات ومفيش خوف كنت مطمنه حتي المكان الي مكتوب كان في مكان كلو انوار وفيه ناس كتير في المكان قريت العنوان بالظبط وكان احد الاماكن الي موجوده قدامي كان شارع كلو اماكن غاليه وباين عليهاا الثراء بالرغم من ان المكان جميل وديكورو فخم بس انا مكنتش قادره اتنفس مبحبش الثراء والغني والحياه المرفهه مش لوني ولا شكلي مش بحب اكون في اماكن كداا وبحس اني تايهه فيها مكنتش مرتاحه وكنت عاوزه امشي علطول وصلت قدام المكان المطلوب كان نظام قاعه كبيره وفاضيه مش عارفه احدد اذا قاعه افراح فاضيه ولا مطعم فاضي ولا اي دخلت وفضلت ابص حوالياا ملقتش حد ف كتبت الرقم الي مكتوب في الفاتوره وبعد ماكتبت 4 ارقام منو ظهرلي اسم صقر علي تليفوني قارنت بين رقمو والرقم الي في الفاتوره وكان نفس الرقم توقعت انو نسي وكتب رقمو بالغلط ف اتصلت بس لقيت صوت رنه تليفونو في المكان مشيت بإتجاه الصوت ولقيت كرسي في النص وكان اول كرسي اشوفو من ساعه ما دخلت المكان داا قربت منو ولقيت تليفونو علي الكرسي وجمبو علبه صغيره قدرت افهم فيها اي من غير ما افتحها ومع ذلك فتحتها علشان اتأكد ان فيها خاتم مش حاجه تانيه علشان ماخدش موقف واكسفو واكسف نفسي وتطلع علبه فيها حاجه تانيه ولما اتأكدت انو خاتم الماظ ملامح وشي اتغيرت واتخنقت ولما لفيت علشان امشي لقيتو واقف بيحاول يقرأ ملامحي
صفا: خلصت اللعبه كداا انا همشي
صقر: تتجوزيني
صفا وقفت مكانهاا وظهر علي ملامحها اثار ضيق وبصت لصقر وقالت مش موافقه
صقر: بحبك
صفا: بس انا مش بحبك
صقر بيقرب منها وبيقول طيب والدمعه دي معناها اي
صفا: دي من التوتر والزهق والخنقه مش علشان الحب انت محتاج واحده مناسبه ليك
صقر: بس انا شايفك اكتر واحده مناسبه
صفا: بس انت مش مناسب لياا
صقر: بس
صفا: انا مش عاوزه اتجوزك او اتجوز واحد زيك يا صقر
صقر: ليه يا صفا ليه بتبعدي عني ومش بتديني فرصه اقرب
صفا: علشان انا مش بحب الاغنياء ولا عاوزه اعيش عيشتهم ولا معاهم
صقر: عملولك اي الاغنيا علشان تكرهيهم اوي كداا
صفا: مش بيحسو بالبشر الي تحتهم ياصقر بيدوسو ع الفقير
صقر: بس انا مش زيهم
صفا: بس طبيعه شغلك بتحكم عليك تبقا زيهم
قولي تقبل تشغل في شركتك ناس من المتشردين في الشوارع
صقر: معنديش مشكله ماهم بشر زينا بس مش متعلمين علشان يفهمو طبيعه شغلنا
صفا: انت والي شغالين معاك متولدتوش متعلمين
صقر: بس انا مش هقدر اعلمهم كلهم
صفا: بس تقدر تبنيلهم مكان يعيشو فيه انت تقدر تبني مكان لكن انا لا ومع ذلك بسااعدهم وبحاول اوفرلهم اوض يقدرو يعيشو فيهاا صحيح مش الكل بس ع الاقل انقذت اتنين من الشارع
صقر: قوليلي طيب ابدأ ازاي وانا هبدأ
صفا: المشكله مش في هتبدأ منين ولا ازاي
المشكله انك مش عاارف هتعمل اي اه هو دا الي كنت بقولك عليه الاغنيا مش بيربو عيالهم علي مساعده الغير دول بيخلوهم يدوسو عليهم علشان يعيشو وانا مش عاوزه عيالي يطلعو اغنياا ويتربو علي النظام دا مش عاوزه اودي عيالي افخم مدارس واديهم ساندويتشات كفته وبرجر وبيتزا وبانيه وياخدو ع الاكل دا ولو في يوم حالتنا الماديه اتدهورت وجيت اديهم جبنه بيضه هيتبطرو علي النعمه انا عاوزه بيت فقير متربي ع البركه والحب والدفا مش عاوزه قصر اتوه فيه ياصقر اسفه مش هقدر اوافق علي طلبك..
خرجت من المكان وفضلت دموعي تنزل ياريتك مكنتش غني ياصقر ياريتك من نفس مستواياا
بعد شهرين
صقر: صدقيني بيتي وعيلتي غير تفكيرك يا صفاا مامتي كويسه وبتحب الخير وهتحبك اوي
صفا: مش قادره اوافق مش مرتاحه وانا مبعرفش ادخل علاقه مش مرتحالها
صقر: ياصفا انا بقالي شهرين بقنع فيكي تيجي تتعرفي علي مامتي وتشوفي البيت بتاعنا ومش هغصبك لو مارتحتيش مش هزن عليكي تاني وعد
صفا بتأفف طيب هاجي معاك بس لو قولتلك بردو مش موافقه هتسيبني في حالي
صقر: لا هشوف طريقه تانيه اقنعك بيهاا...يالا بس قبل ماتغيري رائيك
صفا بضحك انا مش موافقه يا صقر استني متشدنيش طيب
قدام القصر
صفاا: هو داا بيتك الي قولتلي تعالي شوفيه
بيت دا ولا قاعه افراح
صقر بضحك: علفكراا بقا صغير من جواا ومليان حب ودفاا وبركه
صفا: طب بركه دي بتاعه ربنا لكن حب ودفاا ازاي في الحجم داا يابني انا حاسه اني هتوه منك جواا وهقعد اسبوعين علي ما اعرف اخرج منو
صقر بضحك متخافيش انا بحس بيكي وهعرف مكانك علطول مش هسيبك تتوهي مني
فضلت باصه في عيونو ومبتسمه
صقر بيقرب منها ويمسك ايديهاا وبيدخلو القصر سواا
كارما وباقي المساعدين واقفين في استقبالهم
صفا بتبص عليهم بإهتمام وبتركيز لحد ماسمعت صوت سحر
سحر: اهلا وسهلا نورتي ياروحي
صفا: شكرا لحضرتك ياطنط
سحر: صقر حكالي عنك كتير ووصف فيكي كتير
صفا: اه وطبعاا هتقولي بس انتي في الحقيقه احلي
صقر بيبتسم
سحر: احم للدرجادي الاسطوانه دي معروفه اووي
صفا: اوي ياطنط
كارما: اتفضلي العصير وقبل مابتقرب من صفا كانت الكوبايه وقعت علي الارض اتكسرت
صفا: برااحتك
صقر: حصل خير
سحر: اخدت الشر وراحت نضفي المكان بسرعه يا كارما
كارما: حاضر ياهانم انا اسفه اووي وراحت علي المطبخ تجيب ادوات التنظيف
صفا اخدت منها الحجات بسرعه ونزلت تنضف
سحر بتبرق وبتبص عليها
صقر: ارتاحي انتي ياصفاا متتعبيش نفسك
صفا: مش احسن مانتعبها هي الي في مقام امي دي
صقر نزل نضف معاها بسرعه وقعدو كملو كلام
صفا: انا همشي
صقر: هسيبك تفكري النهارده واسئلك بكره
صفا: ان شاء الله
تاني يوم
صقر: عجبك البيت
صفا: لا
صقر: بس
صفا: انا مش هعيش في قصر ابداا وبالأخص القصر داا
صقر: ليه طيب
صفا: علشان في مساعدين كتير ومش هقبل اني اكون في مكان حد بيخدمني فيه ويمسح مكان ما اوسخ
صقر: هاخدلك قصر لوحدك او حتي ڤيلا
صفا: انا عاوزه بيت صغير علي قدنا...
صقر: هشتريهولك
صفا: توء لو فعلا بتحبني وحابب تتجوزني ف تعالا نحقق حلم بتمناه
صقر: اي هو
صفا: نشتري قطعه ارض في مكان شعبي وواحده واحده نبنيها سوا ونبيضها سوا ونفرشها سواا واعيش كل لحظه معاه وهو بيتبني وافرح لما اشوفو خلصان قدامي واقول اخيراا هنسكن فيه
قصر: موافق اعمل كل داا والله
صفا بتبصلو بإبتسامه يبقا موافقه ياصقر
صقر بفرحه بجد....بيحط ايدو في جيبو وبيطلع العلبه كل يوم كنت بقول هلبسهولك امتاا بقاا
صفا: هلبسو لما تجبلي خاتم فضه يالا هنتأخر علي الشغل
بااك
ابتسمت لما افتكرت الذكريات دي ورجعت تاني للواقع دخلت القصر وطلعت علي اوضه فارس علشان انيمو في سريرو
نيمتو وبوستو من جبينو ولما لفيت علشان اخرج لقيت حنان واقفه قدامي
صقر: في حاجه يا حنان
حنان: الظرف داا حد جابهولك
صقر: متعرفيش مين
حنان: لا حضرتك مقالش اسمو ولا اي حاجه
صقر: طيب شكراا اتفضلي انتي
اخدت الظرف ودخلت اوضتي كان ظرف لونو خشبي وقافلو شمع احمر ولما ركزت ع الشمع لقيت محفور اسم صفاا ف فتحتو بسرعه
لقيت صورتين للشاب الي كان مع صفا في بيتنا اتجننت وحاولت اهدي نفسي واحاول اعرف هي تقصد اي
كان صوره قريبه ليه وصوره بعيده واقف في مكان ما
لقيت مع الصور ورقه كان محتواهاا
*. طالما نويت تسامح ونرجع لبعض ف لازم تعرف الحقيقه بنفسك وتعرف اني مظلومه دور علي الخاين الحقيقي.*
صفاا
فضلت اقلب في الظرف يمكن الاقي حاجه تانيه بس ملقتش
رجعت تاني للصوره وشوفت ملامحو من القريبه بس انا مش عارفو ولا فاكر اني شوفتو قبل كداا ف شوفت الصوره الي كان واقف في مكان وحاولت اجمع المكان داا فين
بعد ما ربتت الاماكن ببعض وشوفت كذا يافطه الاسم بتاعها مش باين اوي بس قدرت اعرف المكان داا وقررت اني هروح علي المحل الي كان واقف فيه واسئل عليه
تاني يوم
صقر: السلام عليكم حضرتك تعرف الشخص الي في الصوره داا
صاحب المحل: ايوا دا شهاب كان شغال هناا
صقر: كان
صاحب المحل: اه ساب الشغل من اسبوعين بالظبط ومن ساعتها مشفنهوش ولا نعرف راح فين
صقر: تمام شكرا
ساب الشغل من اسبوعين تعتبر نفس المده الي شوفتو فيها مع صفاا طيب الاقيك فين دلوقتي
رجعت علي الشركه ومش قادر اركز ولا اشتغل
هبه: طلبتني حضرتك
صقر: اه خودي الصور دي وحاولي تعرفيلي الشخص دا مين وساكن فين اسمو شهاب عاوز بقيت اسمو
هبه: طيب حضرتك انا جوزي مقدم وممكن يفيدنا لو تحب طبعاا اني اقولو
صقر: تمام جداا مفيش مشااكل
هبه: انا بعتلو شكل الراجل وهو قال لو عرف حاجه هيبلغني
صقر: ماشي ياهبه شكرا اوي
هبه: ولا يهمك يافندم
بعد ساعتين
هبه: اتفضل حضرتك دا كل حاجه عن شهاب
صقر: تمام شكراا
بعد ما قرأ كل المعلومات عرف عنوان بيتو واخد مفتاح عربيتو وراح علي العنوان
صقر: دا بيت شهاب سلامه
واحده: ايوا انا اختو مين حضرتك
صقر: شهاب كان بيدور علي شغل ووعدتو اني هكلمو بس تليفونو مغلق ف جيت اشوفو
اختو: اه ماهو غير الخط واشتغل في شركه تبع المعلومات كدا
صقر: شركه اي حضرتك
اختو: مش عارفه هي تبع كمبيوترات ومعلومات وكدا
صقر بشك قصدك شركه PHP للبرمجه
اختو: مش عارفه استني هجبلك الاعلان بتاعها الي في الجورنال
صقر: تمام اتفضلي
بعد دقايق
اختو: اهو حضرتك دي صوره الشركه من براا ودا صاحب الشركه اي دا يخلق من الشبه اربعين دا شكل حضرتك اوي
صقر بغل: عن اذنك
وركب عربيتو ورجع بسرعه ع الشركه
صقر: هبه عاوزك تجبيلي السي ڤي بتاع كل الموظفين الي اشتغلو من الاسبوعين الي فاتو
هبه: حاضر يافندم......اتفضل
صقر: فضلت اراجع علي كل الملفات لحد مالقيت واحد بدقن وشكلو مألوف شويه للصوره الي معايا بصيت ع الاسم لقيت اسمو سمير عبدالرحمن
صقر: هبه هاتيلي الشخص دا
هبه: حاضر
صقر: مش عارف اي خلاني مستناش في مكتبي لحد مايجي ف خرجت ورا هبه لقيتها بتكلمو وبتطلب منو يروح علي مكتب المدير لقيتو اتوتر وفجأه جري ف جريت ورااه لحد ما الامن مسكو واخدتو للمكتب بعصبيه
شهاب: والله ماليا ذنب انا بريئ والله
صقر: اخرجو براا
الامن: بس حضرتك
صقر: اخرجو
شهاب: حضرتك انا مليش دعوه
صقر: بكل بجاحه بتشتغل في شركتي وبإسم مستعار
شهاب: والله يا باشا ما ليا دعوه انا انطلب مني اروح البيت داا واعمل الي انطلب مني
صقر: اي الي اطلب منك
شهاب: اني اروح البيت لما صاحبتو تخرج واقعد في اوضتها واستناها ومسبهاش تخرج الا لما حضرتك تيجي وتشوفها معايا
صقر: مين الي طلب منك كدا
شهاب: معرفش والله مشوفتش الراجل الي اتفق معايا
صقر: يعني اي مشوفتوش
شهاب: كان بيلبس طقيه وجوانتي مسمعتش غير صوتو والله العظيم ما شوفتو خالص وهو بردو الي عملي اسم مستعار وطلب مني اشتغل هنا قالي ان حضرتك مش هيجي في بالك اني هنا
صقر: ياا أمن خدووه من وشي
في القصر
سحر: حنان الظرف الي ادتيه لصقر كان فيه اي
حنان: معرفش حضرتك حد اداهولي وقالي اديه لصقر بيه
سحر: وهو انتي فضلتي سهرانه لحد ما صقر جه الساعه 2 بليل وادتهولو
حنان: ما ماهو ان انا مكانش جايلي نوم ف لما جه ادتهولو
سحر: امم هو دا شكل الظرف
حنان بتبلع ريقها ايوا ياهانم
سحر: شوفي كدا مكتوب اي ع الشمع
حنان بخوف ص ص صفا
سحر: بالظبط يعني الي كان في الظرف من صفااا كان في اي في الظرف يا حنااان
حنان: والله يا هانم ما اعرف
سحر: بتقابلي صفا ازااي
حنان: مش بقابلها والله
سحر: انطقي بتقابليها ازاي
كارما: شوفتي حضرتك الرقم الي لقيتو في تليفونها بإسم مين
حنان اا انا اا
سحر: امم بتكلمي صفا كمان ناويه علي اي انتي وصفاا يا حنان بتقولك اي تعمليه في القصر هنااا كان في اي في الظرف وخلتك تديه لصقر
حنان بدموع: والله ما اعرف
سحر: كارما اتصرفي معاها عاوزاكي تقطعي لسانهاا قبل ما ترميها برا القصر
كارما: تؤمري يا هاانم
حنان: لا بالله عليكي والله ياهانم ما عملت حاجه والله ما اتفقت معاها سامحيني ياهاانم بالله عليكي...