رواية اخترتك انت الحلقة الخامسة والسادسة بقلم ايمان جمال
الحلقه الخامسه
مليكة شافت باب الاوضة اللي ادام شقة عمها اشرف وكان مفتوح وراحت تجاهه وقفلته وطلعت لشقتهم ، معتز اخوها قاعد يلعب بلايستيشن وهي دخلت
مليكة: بتعمل ايه
معتز بخضة: خضتيني يالوكا
مليكة: سايب مذاكرتك وقاعد تلعب بقى
معتز: انا باخد راحة شوية وهقوم اكمل
مليكة: وركز عشان الامتحانات قربت
معتز: حاضر
مامتها خرجت من المطبخ على صوتها
سناء: انتي جيتي يالوكا
مليكة: ايوا ياماما
سناء: 'هنا' فين ماطلعتش معاكي ليه
مليكة: هي وصلتني ومشيت عشان وراها مشوار
سناء: ماشي يا حبيبتي
مليكة: ماما عاوزة فنجان قهوة حلو كدا عشان عندي صداع
سناء: عيوني يالوكا
مليكة: تسلملي عيونك يامامتي
سناء دخلت تعمل القهوة ومليكة دخلت غيرت هدومها وصلت الضهر ومسكت اللاب وفتحت النت وشافت رسالة جيالها على اكونت الصراحة بتاعها
(بحبك من يوم ماجيتي على الدنيا ، حاسك مكتوبة ليا واني ليكي ، قلبي حبك وقافل على حبك و مستحيل اي حد ياخد مكانك ، دقات قلبي مع كل دقة بتعشقك)
مليكة قرأت الرسالة وقعدت تفكر ياترى مين اللي على طول بيبعت ليها الرسايل دي لان دي مش اول مرة
رامي دخل الاوضة اللي مش بيدخلها حد غيره ، وواقف ادام صور مليكة: (ياترى بتقرأي رسايلي ليكي طب ياترى ايه احساسك لما بتشوفيها ، انا عارف ان تفكيرك عمره ما يوصل ان انا اللي ببعتلك الرسايل دي ، بس غصب عني اني افضل بعيد عنك وحتى لو قربت انتي اصلا مش بتحبيني وطريقتي هي السبب بس غصب عني)
فضل يكلم الصور ومخنوق اوي وشوية وخرج ودخل شقتهم
-في المساء-
مليكة لبست وجهزت ونزلت و 'هنا' كانت مشتنياها عشان توصلها الكافيه اللي فيه الاجتماع ، رامي جهز وطلع فوق عشان يشوفها وياخدها معاه ، خبط على الباب وسناء مرات عمه فتحت: تعالى يارامي
رامي دخل: اذيك ياطنط امال مليكة فين
سناء: 'هنا' صاحبتها فاتت عليها وقالت هتوصلها لمكان الاجتماع
رامي زعل اوي وبان عليه: ماشي ياطنط خلاص
سناء لاحظت زعله: انتوا كنتوا متفقين تروحوا سوا
رامي: لا بس امجد قالي انها تروح معايا عشان انا عارف المكان
سناء: دا هما لسة ماشيين من شوية
رامي: ماشي ياطنط عاوزة مني حاجة
سناء: لا يا حبيبي سلامتك
رامي نزل وركب عربيته وزعلان اوي بس اكتر حاجة زعلان عليها هي نفسه انه بيحب بس من طرف واحد ودا اصعب حب ، طول الطريق وهو بيفكر هيعمل ايه ومعتش عارف يصالحها ولا يبعد عنها خالص ولا يعمل ايه ، بعد تلت ساعة وصل للكافيه وركن عربيته ونزل ودخل شاف امجد قاعد ومليكة معاه وزميل ليهم تاني ، امجد شافه شاورله وراح عليهم
امجد: دا انا قولت انك هتيجي انت ومليكة سوا
رامي بصلها وهي استغربت من نظرته ليها ومش فاهمة معناها ايه وبص لأمجد: انا اللي ماكنتش في البيت كنت في مشوار وجيت منه على هنا (طبعا بيكدب)
امجد: ماشي يا سيدي
شوية وبقية الناس وصلوا وكانوا عبارة عن المدير والسكرتيرة الخاص به ورئيس الحسابات (دي شركة داخلة مع شركة امجد الزيني شراكة في المناقصة)
امجد بيوجه كلامه لمدير الشركة(امير): اهلا امير اتفضلوا
امير قعد هو واللي معاه واول ماشاف مليكة اعجب بيها (هو مش اول مرة يشوفها بس المرادي بارة الشغل وبعيد عن الشركة ، ومليكة كانت لابسة دريس شيك جداااا درعته شفافة وشعرها سيباه على ضهرها وحاجات بسيطة من الميك اب) رامي لاحظ نظرات امير لمليكة ودا ضايقه اوي ووجه كلامه لأمجد: احنا المفروض هنعمل ايه الوقتي
امجد: المفروض نناقش دراسة الجدوى اللي انت ومليكة جهزتوها ولو في اي تعليق نضيفه
رامي: طب تمام يالا نبدأ
امجد: مستجعل على ايه مش لما نتعشى الأول
رامي: احنا جايين عشان نشتغل يا امجد مش عشان نقعد ناكل ونسهر
امجد استغرب من عصبية رامي: في ايه مالك؟!
رامي: مافيش
رامي سابهم وخرج بارة ومليكة استغربت من عصبيته المفاجأة وامجد خرج وراه ، رامي واقف وساند على عربيته
امجد: في ايه يارامي مالك
رامي: مافيش يا امجد مافيش ادخل انت وانا هدخل بس لما أهدى
امجد: طب ايه حصل لدا كله بس يا صاحبي
رامي بخنقة: مافيش يا امجد انا شوية وهكون كويس
امجد فاهمه رغم ان رامي معرفوش حاجة: بس يا صاحبي صعب انك تفضل كاتم جواك اي حاجة ومش عارف تخرجها ادامك حاجة من الاتنين ياتخرج الحاجة اللي انت مخبيها ياتبعد عن اي حاجة تخص الحاجة دي
رامي بصله: قصدك إيه
امجد: انت تقريبا فهمتني يارامي واللي عصبك كدا غيرتك على الحاجة اللي انت مخبيها
رامي: انا مخنوق اوي ومش عارف اعمل ايه حاسس اني عاوز اصرخ اوي
امجد: اهدى وبعد الاجتماع نتكلم سوا وتعالى ندخل
امجد ورامي دخلوا وبدأوا يتكلموا في الشغل وياكلوا
امجد بيسأل امير: ها يا امير عندك اي تعليق على دراسة الجدول للمناقصة
امير بص لمليكة بإعجاب: لا بالعكس كل حاجة تمام التمام انا بحييكي انسة مليكة
امجد بص لرامي: بس يا امير دا شغل مليكة ورامي مش هي لوحدها
مليكة ردت: ايوا فعلا دا مش شغلي لوحدي ، رامي ساعدني ومن غير افكاره ماكنتش هعرف اسلمه ليكم النهاردة
رامي بيسمع كلامها و مافيش اي ردة فعل منه
امير: بس دايما لما يكون في بنت في اي مشروع بتبقى افكارها كويسة جدا
رامي اتكلم: على كدا بقى حضرتك لو انت في مشروع لوحدك من غير مايكون معاك اي بنت يبقى المشروع فاشل؟
امير اضايق من رد رامي بس مابينش: انا ماقصدش دا
رامي: امال ايه اصل كلام حضرتك مالوش معنى غير كدا
مليكة مستغربة من رده بس افتكرت انه اضايق لما امير لغي وجود رامي(مش بتفهم دي ولا ايه😂)
امير سكت وماردش وامجد حاول يغير الموضوع: وبعدين يعني سواء في بنت او مافيش الشغل هيمشي ويالا نكمل أكل مليكة جالها تليفون وكانت 'هنا': معلش يا مستر امجد لو كان الاجتماع خلص ممكن امشي؟
امجد: اه تقدري تمشي بس كملي أكلك
مليكة: لا انا الحمدلله أكلت بعد اذنكم
رامي فضل باصص عليها لحد ما خرجت وشوية العشا خلص وامجد اخد رامي لمكان في مكان صحراوي ووقفوا العربيات
رامي: انت جبتنا هنا ليه
امجد: مش بتقولي حاسس انك عاوز تصرخ يالا اهو المكان واسع ومحدش حواليك وخرج اللي جواك
رامي بصله بإستغراب وسكت
امجد: بتبصلي كدا ليه مش دا احساسك يالا خرجه
رامي سمع كلام أمجد وبدأ يصرخ بكل صوته وامجد زعلان عليه ومش عارف يعمل ايه
رامي اتكلم: شكرا يا امجد انك جبتني هنا
امجد: على ايه بس يا صاحبي ممكن تهدى بقى ونتكلم
رامي: انا بقيت احسن بعد ماصرخت
امجد: طب ناوي تعمل ايه
رامي بصله: مش هعرف اعمل حاجة يا امجد صعب اوي
امجد: ليه يا رامي دي بنت عمك وانت يعني مش هتقول اكون نفسي والكلام دا
رامي: يا امجد انت فاكر يعني اني مش عارف اقول لعمي او لأبويا
امجد: امال في ايه بس فهمني
رامي: مش بيقولوا دايما ان اللي بيحب بيضحي
امجد: طب وانت هضحي ليه و عشان مين
رامي حكاله كل حاجة سمعها لما عز كان بيتكلم مع صاحبه
امجد: طب ما يمكن هو بس اللي بيحبها ذيك كدا وهو مش في دماغها اصلا
رامي: لا يا امجد هي قريبة منه جدا لكن انا لا
امجد: عشان هو طيب معاها وبيهزر ويضحك ويخرج وانت بتتعامل معاها بقسوة
رامي: انا مش مبسوط وانا بتعامل معاها كدا بس من يوم ماسمعت عز وانا مش عارف اعمل ايه ولا اتصرف ازاي
امجد: حاول تقربها منك
رامي: ازاي وهي اصلا مش بتتكلم معايا وكمان زعلانة مني
امجد: انا فعلا لاحظت دا بس كل دا بسبب تصرفاتك
رامي: انا عاوز اجازة يا امجد
امجد: حاضر بس مش دلوقتي عشان المناقصة الجديدة
رامي: ماشي بس بعد مانكسبها هاخد اجازة لاني محتاجها واكون لوحدي شوية
امجد: حاضر بس ممكن تحاول تريح اعصابك وماتفكرش في اي حاجة تتعبك
رامي: ياريت كنت اقدر يا امجد ياريت وفي وسط كلامه دمعة نزلت من عينيه ومسحها بسرعة
امجد زعلان على صاحبه: سيبها تنزل يا صاحبي
رامي بصله وسكت ، قعدوا مع بعض شوية وكل واحد فيهم رجع بيته ، رامي وصل البيت ودخل من بوابة الجنينة شاف اعمامه وابوه قاعدين ، ابوه اول ماشافه نده عليه
رامي: مساء الخير
اشرف: مساء النور يا حبيبي مالك شكلك تعبان
رامي: مافيش حاسس اني تعبان شوية وهطلع انام
مليكة نزلت وجايبة الشاي وشافت رامي واقف
صالح: مالك يارامي انت كويس
رامي شاف مليكة وبصلها وبص لعمه: انا كويس ياعمي ماتقلقش
عز جه من وراه: ايه يا رامي قافل تليفونك ليه
رامي: مافيش يا عز فصل شحن...وبص لأبوه واعمامه: انا طالع انام تصبحوا على خير
مليكة مستغربة انها اول مرة تشوفه بالحالة دي انه مضايق ومخنوق وحست انها قلقت عليه وكالعادة ماتعرفش ايه سبب الاحساس دا وباردوا ماجاش على بالها انها بتحبه
رامي طلع وقف ادام الاوضة اللي ادام باب شقتهم وبيكلم نفسه: من النهاردة. هخاف على زعلي ونفسيتي وقلبي وبس ماليش دعوة بأي حاجة ، وكنت الأول بدخل هنا (بيشاور على الاوضة) عشان ببقى مخنوق من النهاردة الزعل والحزن هبعدهم عن حياتي وهركز في شغلي....ودخل شقتهم
الحلقه السادسه
#اختارتك_انت
#بقلم_ايمان_جمال❤
تاني يوم عز صحي وطلع لرامي وخبط على الباب وحنان فتحت
عز:صباح الخير يا طنط
حنان:صباح النور يا حبيبي تعالا
عز دخل:رامي صحي
حنان:لا لسه نايم
عز استغرب:معقول لسه نايم ده مش عادته
حنان:ادخل صحيه على ما اجهز الفطار
عز دخل يصحى رامي
عز:يارامي
رامي فتح عينيه:اي يا عز في اي
عز:اي يابني انت نسيت ان عندنا شغل ولا اي
رامي:انا تعبان شويه النهارده ومش هقدر اروح
عز:مالك في اي انا حاسس من امبارح ان فيك حاجه
رامي:مفيش يا عز مرهق شويه ومحتاج ارتاح النهارده
عز:ماشي يا حبيبي الف سلامه عليك انا هنزل بقا عشان لوكا زمانها جهزت
رامي:ماشي يا عز
عز خرج ورامي قام من سريره ووقف في شباك اوضته يبص على عز ومليكه وقلبه موجوع على حب عمره اللي مخبيه عن الكل، غير هدومه وخرج من اوضته
حنان:ايه يا حبيبي انت مش رايح الشغل النهارده
رامي:اه يا ماما حاسس بأرهاق بس شويه قولت اريح النهارده
حنان:سلامتك يا حبيبي ثواني والفطار يكون جاهز
رامي:لا يا ماما انا هخرج اجري شويه ولما ارجع هبقي افطر
حنان:زي ما تحب يا حبيبي
رامي خرج يجري حوالي ساعه او اكتر وهو مش حاسس بالوقت وكان سرحان وحس انه تعب من الجري وقف، وكان في بنت بتجري وشافته وراحت عليه بسمه:رامي
رامي:ايه دا بسمه معقول
بسمه:اي يا عم فينك عامل اي
رامي:الحمدلله تمام انتي عامله اي، نزلتي من السفر امتي
بسمه:انا تمام والله لسه نازله من اسبوع
رامي:حمدلله على السلامه واخبار شغلك اي
بسمه:شكلي هرجع اشتغل معاكم عند أمجد تاني
رامي ضحك:يابنتي قولتلك البلد دي احسن من غيرها
بسمه ضحكت:والله وحشتوني اوي يارامي اخباركوا اي انت وعز ولوكا
رامي:كويسين والله الحمد لله
بسمه:وانت وحشتني على فكره
رامي بصلها:لسه بردو زي ما انتي
بسمه:الحب مبيروحش يارامي
رامي:بس يمكن يجي حد تاني احسن
بسمه:بس في حاجه اسمها حب العمر حتى لو ذي ما انت بتقول يمكن حد تاني ياخده بس مش هيبقى حب العمر
رامي قلبه وجعه:عندك حق بس صدقيني هتلاقي الإنسان اللي تديله كل الحب دا
بسمه:مش هلاقي زيك يارامي
رامي:صدقيني هتلاقي واكيد هيبقى احسن كمان
بسمه:وانا مش عايزه حد تاني انا مش بقولك كدا عشان تحبني أو تقرب مني انا حبي اللي هيفضل زي ما هو وجوايا
رامي سكت وعرفش يرد عليهاا لان كل كلامها صح بس كل كلمه قالها كأنه بيهون على قلبه مش على قلبهاا هي (بسمه زميله رامي وعز ولوكا وكانت مع رامي في حقوق وبتحبه من زمان واعترفتله وهو قالها نفضل اخوات وأصحاب احسن وهي سافرت عشان تشوف فرصه عمل بره مصر وخلاص رجعت وترجع تشتغل في شركه الزيني تاني معاهم)
رامي فضل ماشي معاها شويه وبعد كدا رجع البيت
**********************
نيجي لشركه الزيني مليكه قاعده على مكتبها و مركزه في الشغل عز جالها وجايب ليها اكل:يالوكا جيتلك بيتزا
مليكه:مليش نفس والله يا عز
عز:ليه في اي مالك
مليكه:مفيش دماغي بس مصدعه وحاسه بأرهاق
عز:سلامتك ياحبيبتي انتي ورامي مالكم كدا بس خلاص هانت ونخلص المشروع ونكسب المناقصه وتاخذي الاجازه
مليكه لأول مره تحس انها قلقانه على رامي بس تفكيرها مش جايب فكره الحب هي قلقانه عليه بس عشان ابن عمهاا
عز:اي يا لوكاا سكتي لي
مليكه:لا ابدا ياعز ولا حاجه بقولك اي انا وهنا هنخرج نتغدا بره تعالا معانا
عز فرح:بجد عوزاني اجي معاكم
مليكه:اه يا ابني عادي في ايه
عز:ماشي نخلص شغل ونروح
عز ومليكه خلصوا شغل وراحو لهنا عشان يتغدوا سوا بس مليكه بالها مشغول برامي وتعبه وهنا فرحانه ان عز قاعد معاهم وعز عينيه على مليكه شويه والاكل جه وبدأو ياكلوا
هنا بتبص لمليكه:ايه يا لوكا سرحانه في اي ومش بتاكلي
مليكه:ها.....لا ابدا يا حبيبتي باكل اهوو
عز:لا انتي مش بتاكلي خالص
مليكه:لا باكل والله اهو.....بقولك اي يا عز هنا عربيتها في التوكيل ممكن تركب معاها تاكسي عشان متبقاش لوحدها لان انا عاوزه اشتري حاجه كدا واتمشى شويه (طبعا هيا بتعمل كدا عشان عز وهنا يقربو من بعض)
عز:طب ما نوصلها واجي معاكي عشان متبقيش لوحدك
مليكه:لا انا عاوزه اروح اشتري حاجه لوحدي وانا خلاص شبعت وهقوم امشي
عز:طب ما نيجي معاكي ونمشي كلنا سوا
مليكه:عشان مأخرش 'هنا' لأن وراها مشوار مع باباها
عز:خلاص ياحبيبتي ذي ما تحبي
هنا اضايقت من كلمه حبيبتي اللي قالها لمليكه وغيرانه على عز، مليكه سابتهم ومشيت وشويه ورجعت البيت وأمل ومريم قاعدين سوا في الجنينه ورامي قاعد بس لوحده في جمب دخلت وسلمت على البنات وعينها على رامي وراحت عنده:انت كويس
رامي اتفاجئ من سؤالها هو شافها لما دخلت بس متوقعش انها تتكلم معاه:اه الحمد لله
مليكه:يارب دايما اصل عز قالي انك تعبان وعشان كدا مجتش الشغل
رامي:انا بقيت احسن الحمد لله
وكان لسه هيقوم عشان يطلع فوق شاف بسمه داخله من بوابه الجنينه
رامي:اي دا بسمه بنفسها عندنا اهلا اهلا
بسمه:كنت قريبه منكم قولت اجي اشوفكم
مليكه شافتها وفرحت:بسومه وحشتيني حمدلله على السلامه جيتي امتي
بسمه حضنتها:الله يسلمك ياحبيبتي لسه واصله من اسبوع واتقابلت مع رامي النهارده الصبح
مليكه:فرحانه انك جيتي والله
بسمه:لا وخدي المفاجأه بقا هنزل الشغل معاكم من بكره
رامي:يعني خلاص
بسمه:اه اتكلمت مع أمجد وقالي مكانك لسه موجود
مليكه لأول مره تحس بغيره على رامي (ليه بيتعامل مع الكل بطيبه وهزار وضحك ومعاها هي بطريقه قاسيه وشديده)
امل ومريم سلمو على بسمه وقعدو كلهم ومليكه حاسه انها مخنوقه:معلش يا بسمه انا لسه راجعه من الشغل وتعبانه هطلع انام شويه
بسمه:براحتك يا حبيبتي انا كدا كدا قاعده مع رامي والبنات
مليكه اضايقت ومش عارفه ايه السبب:تمام عن اذنكم
سألتهم وطلعت فوق ودخلت اوضتها ونامت وشويه وعز جه وشافهم قاعدين
عز:اي دا بسمه مش معقول
بسمه:عز عامل اي وحشتني كتييير
عز سلم عليها:وانتي كمان عامله اي واخبارك اي
بسمه:الحمد لله والله كله تمام
عز:وشغلك اخباره اي
رامي اللي رد:بسمه هترجع الشغل معانا تاني
عز:ايه الاخبار العسل دي هي فين لوكا عشان تسمع زمانها لسه في مشوارها
بسمه:يا ابني هي كانت لسه قاعده معانا من شويه وطلعت تنام
عز استغرب:معقول!
رامي:هو في حاجه ولا اي
عز:ابدا أصلها طلبت مني اركب مع هنا تاكسي عشان مبتركبش لوحدها مع حد عشان عربيتها في الوكيل وقالتلي ان عندها مشوار وتتمشى شويه وهترجع البيت بعد ما تخلص...رامي استغرب ان مليكه رجعت البيت بدري يعني مفيش مشوار طب ليه قالت لعز كدا....
شويه وبسمه كانت عايزه تمشي ورامي قالها انها تتعشى معاهم والعشا النهارده في شقه اشرف (ابو رامي)
(الأخوات دايما متعودين ان كد يوم العشا عند واحد فيهم عشان يجمعو بعض على طول وهما اصلا طول اليوم سوا)
الكل كان قاعد وشويه ومليكه صحيت ونزلت وكانت لابسه بيجامه لونها لبنى هادي بنص كم واللون دا بيبقى جميل اووي عليهاا وخصوصا مع بشرتها الخمريه وسايبه شعرها نازل على ضهرها سحرت عيون الكل حواليهاا وأولهم رامي اللي عاوز يخبيها عن عيون الكل
عز اول ما شافها:ايه الجمال والحلاوه دي يا لوكا
مليكه اتكسفت:شكرا يا عز
رامي متضايق وغيران عليها اووي واللي لاحظت دا بسمه (لأنها زيه بتحبه من طرف واحد ذي ماهو بيحب مليكه من طرف واحد)
كلهم اتعشوا والشباب والبنات نزلو يقعدوا شويه مع بعض تحت في الجنينه ورباب (ام عز) ندهت على مليكه عشان تطلع تاخد عصير وطلعت ورامي مضايق ان مليكه نزلت بلبس ده عشان لو حد غريب جه وكأن قلبه حاسس لان ياسين جه، كلهم قاعدين بيتكلمو
ياسين دخل:ماشاء الله ايه التجمع دا
رامي:تعالا يا ياسين
ياسين: ايه يا ابني برن عليك عشان اعرفك ان جاي لاقيت تلفونك مقفول
رامي: معلش انا مامسكتوش النهارده وتلاقيه فاصل شحن من امبارح وبعدين انت محتاج تستأذن عشان تيجي يعني يارخم
ياسين: بتأكد انك هنا بس
رامي: يعني هكون فين يعني يا اخويا
ياسين شاف بسمه:مش معقول انتي جيتي امتى يابت
بسمه: باردو بت ماشي يا ابو لسان طويل لسه واصله من اسبوع
ياسين: حمد لله على السلامه
رامي: بقولك اي يابسمه انتي وأمل ومريم اطلعو انتو فوق وانا وياسين وعز هنقعد هنا
ياسين: ايه يا ابني ما تسيبهم قاعدين ولا انا هاجي ابوظ القاعده
رامي: لا يارخم بس عشان البنات تكون على راحتهم (رامي مش عايز ياسين يشوف مليكه)بسمه تقريبا فهماه:ليه يارامي ماهي مليكه بتجيب العصير ونازله اهي
رامي: لا اطلعو انتو ليها وخلي معاذ ينزلنا العصير
بسمه اتأكدت انه مش عاوز ياسين او اي حد غريب يشوف مليكه وهي بلبس البيت اللي مخليها جميله، وياسين شافها: ايه الجمال ده هو في كدا
مليكه اتكسفت من كلام ياسين وقدمت العصير من غير ولا كلمه ورامي مضايق من نظرات ياسين واتعصب اووي وبيحاول يداري بس بسمه هي الوحيده اللي ملاحظه
ياسين:معقول مانجا جايبه مانجا
مليكه اتكسفت ومردتش
رامي اتعصب اووي: يالا يابنات اطلعو فوق وسيبونا قاعدين لوحدنا...البنات طلعو والشباب تحت وبسمه سهرت معاهم ونزلت عشان تروح ورامي كان لوحده تحت وشافها لما نزلت
رامي: ايه راحه فين
بسمه: همشي بقى عشان مش اتأخر
رامي: تحبي اوصلك
بسمه:لا خليك انا معايا عربيتي وقربت منه: وحشتني اووي يارامي مضايقه من بعدك دا
رامي: هنرجع للكلام دا تاني احنا خلاص قفلناه من زمان وانا مكدبتش عليكي في حاجه
___________
فوق عند البنات بسمه نست مفاتيحها ومليكه قالت هتنزلها المفاتيح
بسمه:متزعلش مني بس انا والله بحبك اوووي ومش قادره ابطل احبك
رامي:ملوش لازمه الكلام دا يا بسمه
بسمه:ليه بتحب حد تاني
رامي سكت ومردش عليها
بسمه شافت مليكه جايا عليهم فحضنت رامي وهو اتفاجئ بالحضن وهو بيحاول يبعدها بس مليكه شافتهم وافتكرت ان رامي بيبادلها الحضن وهو رافع ايده عشان يبعد بسمه عنه..بسمه عملت نفسها متفاجئه بمليكه:مليكه!
رامي بص وراه وشاف مليكه وهي واقفه مصدومه