رواية مكتوبة ليك الحلقة الرابعة عشر والخامسة عشر بقلم ايمان جمال
وقفنا الحلقة اللي فاتت لما حامد السيوفي قال لفهد ان ندى عاوزة تكون عند فارس وتطلق من فهد، فهد انصدم ومكانش متوقع ان دا ممكن يحصل كان عنده امل انها هي ترفض قرار جدها
فهد بثبات عكس النار اللي جواه: يعني هي اللي طلبت من حضرتك كدا؟
حامد السيوفي: اه يافهد
فهد: ممكن تخلي حد يدجل يجيبها
حامد طلب من فارس انه يدخل يجيب ندى وهي خرجت
ندى: ايوا ياجدو
حامد بص لفهد، وفهد اتكلم: جدك قالي انك عاوزاني اطلقك عشان انتي طلبتي تقعدي عند فارس في ڤيلته طول فترة دراستك
ندى بصت لجدها: ايوا انا طلبت منه كدا وانا بشكرك عاللي عمـ....... ولسة هتكمل كلامها فهد اتكلم: انتي طالق ياندى..... وبص لجده مختار: بعد اذنك ياجدي انا محتاج انام عشان اليوم كان طويل
مختار: اتفضل ياولدي
فهد طلع اوضته وفارس ومهند وعبدالرحمن وياسين طلعوا وراه بسرعة
فهد دخل اوضته ومخنوق ونفسه يصرخ اوي قعد على الأرض جمب السرير والشباب دخلوا عليه الأوضة
فارس: فهد
فهد من غير مايبص لأي حد فيهم: مش عاوز كلام من حد وسبوني لوحدي
فهد: يافهد ماينفعش نسيبك لوحدك
فهد وقف واتكلم بصوت عالي: انا قولت سبوني لوحدييييييييي
عبدالرحمن قرب منه: ليه ماقولتش لا طلاما حبيتها
فهد اتكلم بسخرية: مين دا اللي حب؟! انا مابحبش حد وانتوا فاكرين ان يوم ما احب هحب عيلة لا فوقوا دا انا فهد المنياوي
كلهم واقفين مستغربين فهد بس مهند فهم واتأكد ان فهد ذي ماقلبه دق لأول مرة باردوا اتوجع وانجرح لأول مرة ودا اصعب حاجة
مهند: طب اهدى
فهد بغضب: انت شايفني مجنون ادامك يالا اخرجوا وسبوني
الشباب خرجوا ومستغربين ردة فعله
فارس: انا اول مرة اشوفه كدا
مهند: فهد حب يافارس خلاص بس انجرح للاسف ودا اصعب حاجة
عبدالرحمن: فهد غضبه وحش اوي واللي باين من كلامه انه فعلا ندم انه سمح لقلبه يحب
ياسين: يعني هو بإيده ياعبدالرحمن الحب مش بإيدينا
فهد: هنعمل ايه؟
عبدالرحمن: مش عارف وكمان هو مش سامح لينا بالكلام معاه
مختار طلع وشافهم واقفين
مختار: واقفين كدا ليه؟
فارس: مافيش ياجدو
مختار: جدك مشي وانت خليك هنا الليلادي اوضتك جاهزة
فارس: حاضر ياجدي
مختار: فهد فين؟
عبدالرحمن: جوا في اوضته
مختار سابهم ودخل لفهد، وفهد قاعد على الأرض
مختار: حفيد المنياوي مايقعدش القاعدة دي
فهد وقف ودور وشه بعيد عن عيون جد
مختار: بتهرب من عيون جدك يافهد؟
فهد: عشان خاطري ياجدي سبني لوحدي الوقتي
مختار: ليه وافقت يافهد؟
فهد بغضب: كنت عاوزني اقولها ايه؟ لا والنبي خليكي معايا؟!
مختار: لا تقولها انك بتحبها
فهد بصله وعنيه كلها غضب: فهد المنياوي مايحبش عيلة
مختار: الكلام دا تقوله لحد غيري يافهد
فهد سكت وماردش وقعد تاني على الأرض
مختار قعد جمبه بس على السرير: الحب مش ضعف يافهد انك تقول انك بتحب دا مش ضعف يافهد
فهد: عشان خاطري ياجدي انا مش قادر اسمع اي كلام ولا قادر اتكلم سبني لوحدي
مختار وقف: حاضر ياولدي هسيبك لوحدك وهخرج ولينا كلام تاني مع بعض
فهد: لا ياجدي اي كلام في الموضوع دا تاني مش هسمح بيه انا خلاص اعتبرت الفترة اللي عدت دي مكانتش في حياتي خالص
مختار بيأس: ماشي يافهد
مختار خرج وسابه
فهد فضل قاعد مكانه لحد الصبح
###################
تاني يوم الصبح في اوضة سليم(مش واخد حقه خالص في الحلقات نشوفه شوية بقى 😂)
سليم صحي من نومه وبيبص جمبه وكانت سلوى مراته باسها برقة من خدها ودخل اخد دش، بعد شوية خرج وبدأ يصحي في سلوى
سلوى فتحت عيونها وابتسمت بخجل
سليم: صباح الورد على اجمل عروسة
سلوى: صباح الخير
سليم: يالا ياقلبي قومي خدي دش عشان زمان الفطار طالع
سلوى بإبتسامة هادية: حاضر
سلوى قامت ودخلت اخد دش وسليم في بلكونة اوضته وشوية والفطار طلع
سليم اخد الفطار ووضعه على الترابيزة في البلكونة وسلوى خرجت كانت لابسة بيچامة لونها بينك وسايبة شعرها
سليم: ايه الجمال دا؟
سلوى اتكسفت ومش ردت
سليم: شكلك حلو وانتي مكسوفة كدا
سلوى: طب بس بقى
سليم ضحك: ماشي يالا عشان نفطر
قعدوا سوا يفطروا
######################
الشباب قاعدين تحت مع مختار وفجأة فهد نزل ولابس بلوزة وبنطلون ومصفف شعره والكل مستغرب ان فهد مش باين عليه اي حاجة
فهد قعد: صباح الخير ياشباب عريسنا صحي ولا لسة
مهند بإستغراب: اه صحي وبيفطر، فهد انت كويس؟
فهد: ايوا يا ابني في ايه؟
عبدالرحمن: مافيش حاجة ياحبيبي
نهلة دخلت عليهم: صباح الخير يافهد
فهد: صباح الخير ياحبيبتي
نهلة: اخليهم يعملوا قهوتك؟
فهد: ياريت لاني مصدع
نهلة: حاضر
فارس: فهد
فهد بصله وفارس اتكلم: ناوي نسافر اجازتنا ولا ناوي على ايه
فهد: اكيد عشان نهلة تقضي اجازتها
فارس: تمام
مهند: كنت عاوز منك خدمة ياجدي
مختار: خير ياولدي؟
مهند: كنت عاوز اتقدم لصافي بنت عم فارس
مختار: زين ما اختارت ياولدي
مهند: ربنا يخليك لينا يارب، ها هتيجي معايا؟
مختار: طبعا يامهند جاي معاك
مهند: ربنا يخليك ياحاج
عبدالرحمن: طب ممكن انتهز الفرصة بقى واطلب ايد نهلة
نهلة في الوقت دا كانت شايلة القهوة واول ماسمعت طلب عبدالرحمن
فهد وقف جمبها: ولا يهمك ياقلبي على سلامتك
نهلة واقفة مكسوفة
عبدالرحمن لمختار: قولت ايه ياجدي؟
مختار بص لنهلة: ناخد رأي العروسة الاول
الكل بص لنهلة وهي مكسوفة اوووي ومش بترد
مختار: يبقى السكوت علامة الرضا
فهد حضن اخته: مبروك ياقلبي
والكل بيبارك لنهلة وعبدالرحمن
نهلة اخيرا اتكلمت: فهد ممكن اطلب منك طلب عشان خاطري
فهد بصلها ودور وشه وهي اتكلمت: عشان خاطري يافهد صدقني هكون محتاجاها
مهند فهمها: ماتقلقيش يانهلة هي هتكون هنا على اخر الاسبوع
نهلة بفرحة: بجد
مهند: ايوا
فهد سابهم وخرج وعبدالرحمن كان خارج وراه بس مختار وقفه
مختار: سيبه ياعبدالرحمن براحته
مختار سابهم وطلع فوق وعبدالرحمن قرب من نهلة: فعلا السكوت علامة الرضا ذي ماقالوا؟
نهلة بصت في الارض بكسوف وماردتش
عبدالرحمن: عاوز اسمع موافقتك بنفسي
نهلة باردوا ماردتش
عبدالرحمن بخبث: يعني انتي كدا مش موافقة؟
نهلة بسرعة: لا موافقة
عبدالرحمن: ايوا كدا
نهلة بصتله بغضب عشان خلاها تقولها
عبدالرحمن ضحك: بحبك يانهلة
نهلة اتفاجأت بالكلمة ومشيت من ادامه بسرعة
#####################
في قصر السيوفي، ندى قاعدة مع جدها في اوضته وسرحانة
حامد: مالك يابنتي؟
ندى: مافيش ياجده سرحانة بس شوية
حامد: سرحانة في ايه؟
ندى: في اللي جاي ياجده وفي دراستي
حامد: خير ياقلبي ان شاء الله، انا عاوز اتكلم معاكي شوية في حاجة مهمة
ندى: خير ياجده
حامد: ورث ابوكي
ندى: ماله؟
حامد: كل ورث ابوكي هيكون ليكي وبإسمك في البنك
ندى: مش عاوزة حاجة ياجده غير وجودكم جمبي بس
حامد حضنها: واحنا كلنا جمبك بس دا حقك ولازم تاخديه
ندى: هعمل بيه ايه؟
حامد: اللي انتي تحبيه ياحبيبتي، المهم يكون معاكي
ندى: ماشي ياجده اللي حضرتك تشوفه
حامد: ربنا يخليكي ياحبيبتي
####################
نرجع تاني لقصر المنياوي، سليم نزل للشباب والبنات طلعت للعروسة
عبدالرحمن: اهلا بالعريس
سليم قعد: عقبالك ياعبده انت كمان
عبدالرحمن: قريب ياحبيبي خلاص انا طلبت نهلة وجدك وافق وهي موافقة
سليم بفرحة: بجد
عبدالرحمن: ايوا يا ابني امال ايه
سليم: مبروك ياحبيبي دا انا فاتني حاجاتي كتير بقى
مهند بص لياسين واتكلم: من ناحية انه فاتك فهو فاتك اهم حاجة
سليم: في ايه؟
ياسين: فهد طلق ندى
سليم بصدمة: ايه؟
عبدالرحمن: ايوا
سليم: ازاي وليه هو مش كان حبها؟
عبدالرحمن حكاله عن اللي حصل
سليم: باللي انت حكيته دا يبقى الكلام صعب مع فهد
مهند: ايوا مش سامح لأي حد فينا حتى جدك اننا نتكلم معاه في الموضوع دا
وهما بيتكلموا فهد دخل
فهد: صح النوم ياعريس
سليم حضن على فهد وهمسله: يعني انا اتجوز وانت تطلق يافهد
فهد بصله وسكت وقعد معاهم
وهما قاعدين حامد السيوفي وندى والبنات دخلوا عليهم
الشباب وقفوا احتراما لحامد السيوفي
حامد: اذيكم ياولاد
كلهم: اهلا ياجدي
وفارس كان في الجنينة واتفاجئ بجده: كنت لسة رايح اكلم حضرتك عشان اجي اخدك
حامد: ولا يهمك ياحبيبي انا جبت العربية والبنات وجيت
سليم: منورين والله ياجدي
حامد: مبروك ياعريس
سليم: الله يبارك فيك ياجدي
البنات طلعوا للعروسة فوق وفهد اتعامل كأن ندى مش موجودة خالص
فوق عند العروسة، البنات قاعدين وندى وبنات عمها دخلوا وشيماء اول ماشافتها اضايقت اوي
نهلة شافتها جريت عليها حضنتها: حبيبتي
ندى: ايه يابت في ايه ما انا كنت عندك امبارح
نهلة: اصل حصل حاجة
ندى: في ايه؟
عزة: عبدالرحمن اتقدم لندى وفهد وجدي موافقين
ندى حضنتها: مبروك ياحبيبتي
نهلة: الله يبارك فيكي ياقلبي عقبالك انتي كمان
عزة: عقبالها ليه ماهي متجوزة فهد
ندى: لا احنا اطلقنا امبارح
شيماء اتكلمت بفرحة: بجد؟
الكل مستغرب فرحتها ورجعت اتكلمت بزعل مزيف: بجد زعلتيني
نهلة لندى: دا حصل ازاي وانا معرفش؟
ندى: امبارح بالليل بعد الفرح قبل مانمشي من هنا
نهلة: ليه ياندى؟
ندى: دا اللي لازم يحصل يانهلة، فهد كتر خيره على وقوفه جمبي
نهلة زعلت وسكتت
عزة: مبروك ياصافي ليكي انتي كمان
صافي بإستغراب: مبروك على ايه؟
عزة: مهند هيتقدم ليكي النهاردة
صافي اتكسفت وبصت في الأرض
ليلى: طلاما اتكسفت وسكتت تبقى موافقة
صافي: بس يارخمة، وبعدين ما احنا هنفرح فيكي قريب
نهلة: بجد مين؟
صافي: اخويا حمزة
نهلة: ايوا بقى ايه الفرحة الحلوة دي
البنات فرحانة وقاعدين يتكلموا مع بعض
تحت عند البنات، مختار وحامد والشباب قاعدين
فارس اتكلم: جدي مختار طالب من حضرتك طلب
مختار: خير ياولدي؟
فارس: انا طالب ايد عزة حفيدتك
مختار: انا موافق يافارس بس نشوف رأيها الأول
فارس: ماشي ياجدي
مختار بص لحامد: بص بقى ياحامد مهند طالب ايد صافي
حامد: وانا موافق
مهند بفرحة: ربنا يخليك ليا يارب
حامد: ربنا يسعدكم ياولدي
فهد قاعد سرحان ومش معاهم خالص بس بيحاول يبان كويس
حامد: ايه يافهد مش بتتكلم معانا ليه؟
فهد: لا ابدا انا معاكم اهو
حامد: مش باين
فهد بصله وخرج بارة
ندى نزلت الجنينة وشافت فهد وقربت عليه
ندى: ازيك يافهد
فهد بصلها وماردش
ندى سكتت وحست انها احرجت نفسها عشان هو ماردش عليها ودورت وشها عشان تمشي
فهد: المفروض ان احنا دلوقتي مطلقين يعني الافضل ان مايبقاش فيه بنا كلام
ندى بصتله واضايقت اوي من كلامه: انا اسفة ولو كنت اعرف انك هنا انا ماكنتش نزلت....ودمعة نزلت من عنيها ومشت من ادامه
فهد اضايق من نفسه عشان خلاها تعيط بس مش عارف يعمل ايه
شيماء كانت قريبة منهم وسمعت كلام فهد وفرحت من رد فهد وقربت عليه
شيماء: فهد
فهد بصلها: ايه ياشيماء
شيماء: بحبك
الحلقة 15
#رواية_مكتوبة_ليك❤
#بقلم_ايمان_جمال❤
________________________
شيماء: بحبك
فهد اتفاجئ بالكلمة دي وانصدم اوي ومن صدمته معرفش يرد عليها
شيماء: ايه يافهد مالك مصدوم كدا ليه هو انا قولت حاجة غريبة
فهد والصدمة لسة مأثرة عليه: انا هقولك حاجة وافهميها كويس، انا الفهد يعني اللي الكلام معاه بحساب ومش سهل اوي اني اصدقك بصي يابنت عمتي انا عمري ما افكر احبك ولا حتى ارتبط بيكي عشان انا وانتي عارفين كويس انك مش بتحبي حد انتي كل همك الفلوس وبس وللأسف امك فهمتك ان الدنيا فلوس وبس وعلى الرغم من انها عمتي بس للأسف مش بتعجبني
شيماء انصدمت من رده ووقفت مكانها ومش عارفة ترد بإيه وفهد قبل مايسيبها ويمشي
فهد بصلها: انا هعتبر نفسي ماسمعتش الكلمة دي وانتي تشليني من دماغك خالص
فهد سابها ودخل وهي هتولع وبتتوعد لفهد
#####################
فهد دخل جوا وقعد مع عمه وجده مختار وجده حامد واصحابه وشوية وندى نزلت وباين على وشها الزعل والدموع
ندى لجدها حامد: ممكن ياجدو نمشي؟
حامد استغرب شكلها والدموع اللي في عنيها وبص لفهد وفهد دور وشه: يالا ياحبيبتي
مختار: راحين فين هو احنا لسة قعدنا سوا وبعدين اتفقنا اننا نقضي اليوم كله سوا
حامد بجدية: لا هنمشي، وبص لفارس: هات اختك وبنت عمك وحصلني
حامد اخد ندى وخرج وفارس والبنات خرجوا وراهم
مختار بص لفهد: عاوزك في اوضتي
مختار سبق فهد على فوق وبعد دقايق فهد طلع وراه
في اوضة مختار
فهد دخل: خير ياجدي؟
مختار بصله اوي: انت قولت ايه لندى عشان تعيط يافهد؟
فهد: وليه حضرتك متأكد ان انا اللي زعلتها؟
مختار: عشان جدها بصلك وانت دورت وشك ومعنى كدا انك اتكلمت معاها
فهد: دا كلام عادي
مختار: قولتلها ايه يافهد؟
فهد: عادي انا كنت قاعد في الجنينة وهي جات تتكلم معايا وانا قولتلها ان خلاص معتش فيه كلام بنا من النهاردة
مختار: وليه قولت كدا؟
فهد: عشان دي الحقيقة ياجدي
مختار: بلاش القسوة دي يافهد
فهد: معلش ياجدي انا مش عاوز اتكلم في الموضوع دا
مختار: انت حر ياولدي
فهد: حضرتك عاوز مني حاجة تانية؟
مختار: لا يافهد
فهد نزل تحت للشباب وكل واحد قاعد مستني نزول فهد
عبدالرحمن: تعالى يافهد عشان نشوف هنعمل ايه؟
فهد قعد: هنعمل ايه في ايه؟
ياسين: في سفرنا للسخنة
فهد: كل حاجة جاهزة والڤيلا اتنضفت
مهند برخامة: طب وانا مسموح اني اروح معاكم ولا لا؟
فهد: هتبطل رخامة ولا اقوم اضربك
مهند ضحك: لا ياعم بلاش ضرب والنبي
سليم: طب بما اني عريس جديد فخدوني معاكم بقى
فهد ضحك: ماتقلقش عامل حسابك وفي مكان لوحدك كمان عشان مانبقاش عزول
سليم: الله عليك يافهد
##################
في قصر حامد السيوفي، ندى في اوضتها وجدها خبط ودخل
حامد: ممكن ادخل؟
ندى: طبعا ياجدو
حامد قعد جمبها: مالك زعلانة من ايه؟
ندى: مافيش ياجدو
حامد: لا فيه، ويالا احكي لجدك حبيبك
ندى: هو انا ليه حسيت اني خايفة ومش في آمان؟
حامد: ليه بتقولي كدا واحنا كلنا جمبك وآمانك
ندى حكتله عن اللي قاله فهد: وبعد اللي قالوا دا حسيت اني خايفة وان الآمان اللي كنت مطمنة بيه مبقاش معايا
حامد بزعل: يعني انتي خايفة وانتي جمب جدك حبيبك
ندى: مش قصدي والله ياجدو، انا بس بحكيلك عن اللي حسيت بيه
حامد: يعني انتي حاسة انك غلطي انك طلبتي انه يطلقك؟
ندى: مش عارفة ياجدو بس لما كنت مراته كنت في آمانه وكنت مطمنة اوي لكن الوقتي حسيت بخوف، عارف ياجدو ساعات بتمنى اني اكون مكان نهلة عشان اكون في حمايته
حامد: طب ترجعيله تاني؟
ندى: لا ياجدو انا ماقبلش اني اكون تقيلة على حد ما احبش حد يشيل مسيؤليتي غصب عنه
حامد: طب انتي عارفة انكوا راحين السخنة الاسبوع اللي جاي؟
ندى: مين اللي رايح؟
حامد: انتي وفارس وحمزة وليلى وصافي وفهد ونهلة واصحابه وسليم وعروسته وكمان ولاد عمته
ندى: يعني كلنا هنكون سوا؟
حامد: ايوا
ندى: انا فرحانة بجد عشان اول مرة هخرج خروجة ذي دي وان كلهم حواليا
حامد: واكيد فرحانة كمان عشان هتكوني جمب فهد وعشان ماتبقيش خايفة
ندى: تفتكر ياجدو؟
حامد: وليه لا
ندى: ما اظنش
حامد: ماتقلقيش ياحبيبتي احنا كلنا جمبك مش عاوزك تخافي من اي حاجة ولا من اي حد مهما كان
ندى: حاضر ياجدو
عدا يومين والامور ذي ماهي مافيش جديد غير ان الشباب بيحضروا للخطوبتهم
####################
نروح شوية لأم فهد، خلاص هي رجعت مع مصر مع جوزها وقاعدين في شقتهم
سعد: ممكن تهدي بقى لحد مايرجعوا
هناء: انا عاوزة اروحلهم
سعد: يعني عاوزة تروحي عند مختار المنياوي؟
هناء: يعني عاوزني اعمل ايه؟
سعد: عاوزك تهدي وبعد كدا نشوف هنعمل ايه
هناء: انا مش هقدر اصبر لحد مايروحوا السخنة ويرجعوا
سعد: معلش احنا صبرنا كتير نصبر شوية كمان
هناء: طيب
################
في قصر المنياوي، فهد قاعد في الجنينة ومهند جه قعد معاه
مهند: عاوز اقولك على حاجة
فهد: قول
مهند: بابا رجع مصر النهاردة
فهد بصله: قصدك تقول رجعوا مش رجع
مهند: ايوا يافهد رجعوا وهي عاوزة تشوفكم
فهد: وانا مش عاوز اشوفها والأحسن ليها اني ما اشوفهاش
مهند: حاول تنسى بقى يافهد
فهد بغضب: انا عمري ماهنسى انها اتخلت عني وعن اختي وسابتنا ومشيت
مهند: بس دي امك
فهد: وهي ليه معرفتش كدا لما سابتنا ومشيت
مهند سكت ومعرفش يرد عليه
فهد: شفت انت نفسك مش عارف ترد بإيه عشان انت عارف اني صح
مهند: عارف يافهد بس كلنا بنغلط وعندك اكبر مثال للغلط حامد السيوفي باللي عمله مع ابنه
فهد: ماليش دعوة بغلط حد
مهند: خلاص يافهد اللي تشوفه بس نهلة محتاجة ليها وطلبت منك كذا مرة انها تشوفها
فهد: هي حرة تعمل اللي هي عاوزاه
عبدالرحمن جه عليهم: انتوا قاعدين هنا وسايبنا ملبوخين
فهد: بتعملوا ايه؟
عبدالرحمن: المفروض اننا بنجهز لخطوبتنا، احنا اتفقنا انها هتكون عادية وفي الفرح ان شااء الله هيكون حفلة كبيرة
مهند: والفرح امتى بقى عشان انا عاوز فرحي يبقى بدري
عبدالرحمن بص لفهد: بالنسبالي فرحي هيتأخر على الأقل لما نهلة تكمل دراستها، وانتوا بقى شوفوا عاوزين تعملوا فرحكم امتى
فهد: خلي الفرح بعد سنة وتبقوا كلكم في يوم واحد
عبدالرحمن: قصدك مين بكلنا؟
فهد ابتسم: اقصد انت والشباب ياعبده، المعهد اللي نهلة ناوية تدخله مدة دراسته تلات سنين ومافيش مشكلة انها تاخد اخر سنتين وهي في بيتك
عبدالرحمن من فرحته قام باس فهد: الله عليك يافهد عقبالك يارب
فهد بصله وسكت
مهند: بس سنة دي كتير اوي
فهد: مابلاش لأحسن انت عارف اني اقدر بكلمة مني لحامد السيوفي ومختار المنياوي اخليهم سنتين
مهند: لا ابوس ايدك خلاس سنة حلوة
فهد ضحك: ايوا كدا
عبدالرحمن: طب يالا ندخل جوا عشان شوية وهناخد البنات ونجيب الشبكة
فهد: طب مانطلب الجواهرجي وجيب لينا الحاجة هنا
عبدالرحمن: ما انت عارف جدك وعارف عاداته
فهد: طيب
دخلوا جوا وبعد ساعتين عبدالرحمن وفهد ومهند في عربيتهم ومختار المنياوي في عربيته الخاصة ومعاه عزة ومامتها هناء ونهلة
راحوا لقصر السيوفي بس مادخلوش وفارس وحمزة نزلوا ومعاهم امهاتهم وركبوا عربيتهم وحامد السيوفي نزل ومعاه ندى وليلى وصافي، الكل جاهز وشوية ووصلوا عند محل الدهب وصاحب المحل في استقبالهم
*عزة وفارس*، *عبدالرحمن ونهلة*، *مهند وصافي*، *ليلى وحمزة*، كلهم اختاروا لكل عروسة طقم مكون من اسويرة وسلسلة وخاتم ودبلة وغوشتين بس كل عروسة شكل دهبها مختلف عن العروسة التانية
حامد السيوفي واقف بيختار لندى خاتم وسلسلة ووقف جمبها: ندوش ايه رأيك في دول؟
ندى: حلوين اوي ياجدو
حامد: دول ليكي
ندى: ليا انا؟
حامد: ايوا
حامد لبسها السلسلة ورايح يلبسها الخاتم بس هي كانت لابسة الخاتم اللي فهد جابه ليها في نجاحها ولسة جدها هيقلعوا ليها
ندى: لا ياجدو انا هلبسه في صابع تاني
حامد: ليه ياحبيبتي خليه في ايدك اليمين والخاتم دا اقلعيه والبسيه في الشمال
ندى: لا ياجدو مش عاوزة اقلع الخاتم دا وانا هلبس التاني في ايدي التانية
فهد سامع كل حرف هي قالته ومن جواه فرحان انها مش راضية تقلع خاتمه
حامد: مين جايبلك الخاتم دا؟
ندى بصت لفهد وسكتت وجدها فهم ان فهد هو اللي جابه ليها
حامد: ماشي ياندى البسيه في ايدك التانية
ندى لبست خاتم جدها في ايدها التانية وسابت خاتم فهد مكانه
الشباب خلاص خلصوا وكلهم مستعديين للرجوع
حامد: احنا كلنا هنرجع عندي القصر عشان نتغدا سوا
مختار: طب نخليها عندنا في القصر
حامد: مين فينا بيته اقرب في الرجوع
مختار ضحك: انا عارف انك هتقول كدا
حامد: يبقى هنروح لعندنا
####################
في قصر السيوفي، مختار طلب ان كل عريس وعروسته يقعدوا لوحدهم ودا اللي فعلا حصل كل اتنين قاعدين بيتغدوا لوحدهم
*عبدالرحمن ونهلة*
قاعدين والغدا ادامهم ونهلة مكسوفة تاكل
عبدالرحمن: يالا عشان ناكل سوا
نهلة بخجل: مش جعانة
عبدالرحمن بدأ يمسك المعلقة ويأكلها وهي بتاكل بس بكسوف
نهلة: خلاص هاكل لوحدي
عبدالرحمن: انا عاوز اكلك بإيدي
نهلة اتكسفت وسكتت
*حمزة وليلى*
حمزة: اخيرا بقيتي ليا
ليلى بكسوف: ما انا ليك من زمان
حمزة: بس المرادي تختلف انتي الوقتي خطيبتي
ليلى اتكسفت وبصت في الأرض
حمزة: بحبك ياليلى
ليلى بصتله واتكسفت
حمزة: يالا ناكل سوا لأول مرة ناكل لوحدنا
قعدوا ياكلوا سوا وفرحانين
* فارس وعزة*
قاعدين ياكلوا وطبعا هما الاتنين لأول مرة ياكلوا سوا ولوحدهم
فارس: مش بتاكلي ليه؟
عزة بكسوف: انا باكل اهو
فارس: طب ممكن اكلك انا؟
عزة اتكسفت ومش عارفة ترد تقول ايه
وفار بدأ يأكلها
*صافي ومهند*
مهند: تعرفي اني بحبك من زمان؟
صافي اتكسفت ومعرفتش ترد
مهند: بجد انا بحبك اوي
صافي بخجل: طب ممكن بلاش الكلام دا عشان بتكسفني
مهند: حاضر ويالا ناكل سوا
قعدوا ياكلوا سوا والكل كان فرحان
نيجي بقى لحامد ومختار وفهد وندى وصفية(ام حمزة وصافي) ونادية(ام ليلى وفارس) وهناء ام عزة وقاعدين على السفرة بيتغدوا سوا، وطبعا ندى جمب جدها
حامد: مش بتاكلي ليه ياندى؟
ندى: باكل والله ياجدو
حامد بيأكلها وهي مكسوفة من اللي قاعدين
ندى: خلاص ياجدو هاكل والله
حامد: لا هأكلك انا بإيدي
حامد صمم يأكل ندى بإيده وفهد قاعد بياكل ومتابع كل اللي بيحصل بس عامل نفسه مش واخد باله بس حامد واخد باله منه 😂
حامد لفهد: عاوز اتكلم معاك بعد الغدا
فهد: ماشي
مختار: احنا نحتفل بالولاد بكرة ان شااء الله عشان يسافروا براحتهم
ندى اتكلمت بسرعة: ممكن ياجدو افضل معاك هنا
حامد بإستغراب: ليه؟!
ندى: يعني هما كلهم هيبقوا سوا وانا مش هبقى مرتاحة وانا لوحدى
حامد: لا هتروحي لان انتي فرحتي انك هتسافري معاهم وبعدين ازاي هتكوني لوحدك هما كلهم حواليكي
ندى: ماشي
حامد: احنا نعمل حفلة عائلية بكرة وهنكتب الكتاب
مختار: انا كنت عاوز اقولك كدا بحيث خروجاتهم تكون شرعية وخصوصا انهم هيسافروا
حامد: وعشان كدا هنكتب الكتاب
حامد خلص غدا ودخل مكتب القصر وفهد دخل وراه
حامد: تعالى يافهد اقعد
فهد: في ايه؟
حامد: عاوز اتكلم معاك عن ندى شوية ممكن؟
فهد: حضرتك تتكلم في اللي انت عاوزه طبعا بس ممكن بلاش الموضوع دا
حامد: بص يافهد انا ندى غالية عندي اوووووي وعمري ماهقلل منها بس انت كمان غالي عليا
فهد: حضرتك عاوز تقول ايه؟
حامد حكتله عن اللي ندى حكته وعن انها فاقدة الآمان، وفهد مستغرب وفي نفس الوقت حاسس بفرحة
فهد: باردوا مافهمتش حضرتك عاوز تقول ايه؟
حامد: ترجع ندى ليك تاني