الحلقة الرابع
والخامسة
أنا مش بنت بنوت
بقلم دينا عماد
ايمان بتفتح شقتها... بتدخل وهى ماسكة مايا
"تقعدى ف اوضتى ولا اوضة نسرين..تعالى ف اوضتى احسن"
مايا مستسلمة وماشية معاها
دخلوا اوضة... قعدتها على السرير
"نامى وارتاحى يا مايا"
مايا بتبص لايمان وتعيط
"متعيطيش... انا مش هلومك دلوقتى بس ده ميمنعش انى مش زعلانة منك... غلطتى يا مايا وغلطتك كبيرة اوى... وياخوفى يكون كلامهم صح ويكون حمزة"
يزيد عياط مايا ... عياط بحرقة
وتفتكر حمزة
فلاش باك
مايا قاعدة ع السلم لوحدها"12 سنة"
باب البيت مقفول... بتفتحه نسرين
بتقوم مايا تجرى عليها
"عملتى ايه ف الامتحان"
"الحمدلله...بدأنا الاجازة يامايا وخلاص مفيش مذاكرة"
"انا اول واحدة اخدت الاجازة بس محسيتش بيها علشان مخلصتوش"
"انتى قاعدة لوحدك كده ليه"
"نينة مش عايزانى اطلع العب بره...بتقولى عيب"
"ما احنا كبرنا يا مايا ومعدش ينفع نلعب بره"
"ماحمزة وفارس بيلعبوا وهما كبار"
"ماما وبابا قالوا البنات عيب تلعب ف الشارع"
"وبعدين هنعمل ايه ف الاجازة... حمزة وفارس هيلعبوا مع اصحابهم واحنا لأ"
"تعالى اطلعى اقعدى معايا ف البيت"
*********************
مايا ونسرين داخلين البيت
نسرين"مامااااااااا"
ايمان جاية من المطبخ
"ايه يانسرين عملتى ايه"
"الحمدلله كان سهل...هدخل انا ومايا نقعد جوه "
دخلوا اوضة نسرين... غيرت نسرين هدومها
"تيجى نتفرج ع التليفزيون ولا نفتح الكاسيت"
"عندك اغانى حلوة"
"عندى... تيجى نرقص"
"ياريت"
فتحت نسرين الكاسيت... ومسكت فرشاة الشعر عملتها مايك.. وعلت الصوت
"ويااااترى يا حبيبى ...ياترى
قريب ولااااا بعيييييد ولااااااا"
واندمجوا البنتين مع صوت بهاء سلطان وهما بيغنوا ويرقصوا
اتفتح الباب عليهم فجأة
"ايه الدوشة اللى انتوا عاملينها دى"
نسرين"ايه ياحمزة بنغنى"
حمزة بيقفل الكاسيت
نسرين"ايه الغتاتة دى"
حمزة"بذاكر يا نسرين...ازيك يامايا"
نسرين وهى خارجة من الاوضة
"ياماماااااااااا.. تعالى شوفى حمزة"
حمزة"معلش يامايا...انا عايز اذاكر والصوت شتتنى"
مايا"طيب...هاخد نسرين وننزل"
حمزة"انتى مسافرة امتى"
مايا"لما بابا ييجى هسافر معاه"
حمزة"بتحبى هنا اكتر ولا لندن"
مايا"هنا اكتر... هناك ببقى لوحدى مع بابا او ماما بس ببقى عايزة ارجع اقعد معاكم"
جت ايمان
"مزعل اختك ليه"
"مش عارف اذاكر"
نسرين"واحنا عايزين نرقص...هو لا يبقى لعب ف الشارع ولا نقعد براحتنا ف البيت"
ايمان بتفكر"ما تطلع تذاكر مع فارس"
حمزة"هو علمى وانا ادبى... وهو بيذاكر بطريقة وانا بطريقة"
ايمان ساكتة
"خلاص يابنات... انزلوا دلوقتى وانا هتصرف"
*********************
نسرين مع باباها ومايا ف سطح البيت
مصطفى بيعمل تندة ... وايمان بتفرش سجادة قديمة
وبتحط كراسى وترابيزة
ايمان"ايه رأيكم بقى... تقعدوا هنا براحتكم... تلعبوا ترقصوا تتنططوا براحتكم"
نسرين"فكرة حلوة اوى ياماما"
مصطفى وايمان بعد ما خلصوا نزلوا
ومسكت مايا ونسرين مجلات معاهم وقعدوا يتفرجوا
مايا"هو حمزة هيخلص امتى"
نسرين"هيخلص بكرة...وفارس هيخلص النهاردة"
"ما تيجى ننادى لحمزة يتفرج على القعدة الجديدة"
"طيب هنزل انادى لفارس وحمزة"
تنزل نسرين وتطلع ومعاها فارس وحمزة
يتفرجوا على مكانهم الجديد
حمزة كل ما يقوم ولا يقعد...مايا وراه
فارس كل ما ييجى يكلم مايا...يلاقيها منتبهه لحمزة بس
يزعل من اهتمامها الزايد بحمزة... وينزل يكمل مذاكرة
***********************
مايا لابسة.... وقاعدة جنب نسرين وكل شوية تبص ع الساعة
فؤاد قاعد جنب الشنط المتحضرة مستنى العربية اللى هتوديهم المطار
مايا بهمس لنسرين"هو حمزة اتأخر كده ليه"
نسرين"بيجيب النتيجة...ربنا يستر"
يسمعوا صوت الباب الخارجى بيتفتح ويتقفل
تجرى مايا ع الباب تستقبل حمزة
تفوجئ انه فارس
"ماما فين...انا نجحت"
مايا"وحمزة فين؟"
فارس بكسرة خاطر
"معرفش...انا هروح افرح ماما زمانها قلقانة"
نسرين"مبروك يافارس"
فارس"الله يبارك فيكى ...مطلعتش من حد تانى"
مايا"معلش يافارس...مبروك...اصل خايفة حمزة يتأخر ومشوفوش قبل ما اسافر"
حمزة يوصل البيت... تنزل مايا السلم وتقابله ع الباب
"عملت ايه ياحمزة طمنى"
"الحمدلله"
"مبروك... انا مسافرة كمان شوية"
بص فارس عليهم...وعلى اهتمام مايا بحمزة وعدم اهتمامها بيه... حس ان وجوده مالوش لازمة... وطلع
*******************
بعد سنتين
نسرين وحمزة وفارس قاعدين ف السطح
فارس ونسرين بيلعبوا كوتشينة
فارس"مش عايز تيجى تلعب برضه"
حمزة"مش عايز"
نسرين"سيبه ياعم ده بقى نكدى"
حمزة"هى مايا بتتأخر عند مامتها كتير كده ليه...كانت بتقعد اسبوع بقوا اتنين وتلاتة... مش كتير كده"
نسرين وهى بتلعب
"انت هتبص لها ف الكام يوم ف السنة اللى هتقعدهم مع مامتها... تلاقيها بتوحشها ياعينى"
حمزة"ماهى بتوحشنا احنا كمان"
نسرين وهى بتبص له وبعدين بتغمز لفارس
"مش ملاحظ ان حمزة بقى رقيق اوى"
فارس بيبتسم بمرارة وهو كل يوم بيتأكد من احساسه
ان حمزة بيحب مايا ومايا بتحبه
******************
مايا راجعة من السفر مع فؤاد...ملهوفة على حمزة
بتوصل البيت... واول ما بتدخل عند جدتها وبتسلم عليها
"حمزة ونسرين وفارس فين؟"
"خرجوا"
"كده مش مستنيينى"
"ماهو انتم مقلتوش جايين امتى..دول هيتجننوا عليكى"
"هطلع اسلم على عماتى واستناهم فوق ف السطح"
******************
مايا قاعدة ف السطح تستناهم... ملل وحنين واشتياق حاساه ناحيتهم كلهم... وبالاخص حمزة
يدخل حمزة اول واحد ويسلم عليها وهو بينهج
"حمدالله ع السلامة يامايا"
"الله يسلمك...مالك"
"مفيش اصل اول ما نينة قالت انك هنا طلعت السلم جرى...وحشتينى"
"وانت كمان وحشتنى اوى"
تدخل نسرين ووراها فارس ويسلموا عليها
يقعدوا كلهم مع بعض يتكلموا ومايا بتحكى عن اجازتها
يقوم حمزة يقف
"مايا... تعالى عايز اقولك حاجة"
قامت مايا ... وراحت معاه بعيد عن فارس ونسرين وف نفس الوقت على مرمى بصرهم
"نعم ياحمزة"
"متبقيش تتأخرى اوى كده تانى"
"متأخرتش ولا حاجة دول كلهم 3 اسابيع"
"كتير اوى يا مايا... انا مبقدرش استحمل يوم وانتى بعيد"
ابتسمت مايا بكسوف
"بصى انا مش عارف افضل ساكت اكتر من كده"
"تسكت على ايه"
"انا عارف انك لسه صغيرة على اللى هقوله"
"صغيرة ايه يا حمزة انا رايحة تانية ثانوى"
"برضه صغيرة.. بس بحبك من وانتى اصغر كمان"
فرحة مايا بكلام حمزة اللى كانت بتتمناه... خلاها طايرة من السعادة
"اتفاجئتى؟"
"لا... يعنى... اصل.. ما احنا كلنا بنحب بعض زى الاخوات"
"لا اخوات ايه... انا قدامى سنتين ف الجامعة تكونى انتى خلصتى ثانوى واكلم ماما وبابا ونتخطب رسمى"
مايا بفرحة الدنيا كلها
"انت بتتكلم بجد ياحمزة"
"اه طبعا... بس علشان خاطرى متغيبيش تانى عند مامتك... انا كنت هتجنن وحاسس انى لوحدى من غيرك"
"انا اللى كنت هموت وارجع بس بابا كان عنده شغل وانت عارف مش بيوافق يخلينى اروح او اجى لوحدى"
فارس ونسرين قاعدين مع بعض
فارس كل شوية يبص عليهم
نسرين"هما بيرغوا ف ايه كل ده"
قامت نسرين راحت لهم
"عيب اوى تفضلوا واقفين مع بعض وسايبيننا..هو فيه اسرار علينا"
حمزة"مفيش اسرار ولا حاجة"
فارس قام نازل
حمزة"رايح فين يافارس"
فارس"نازل البيت"
نسرين"استنى يافارس... مالكم شكلكم فيه حاجة مخبيينها علينا"
حمزة"لا طبعا مفيش حاجة تستخبى عليكم"
مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"
*********************
فارس طالع البيت... حزنه عميق ف قلبه
وغصب عنه عيونه مليانة دموع متحجرة مبتنزلش
بص على بيت جدته المفتوح
شاف فؤاد والجدة قاعدين...دور بعنيه على مايا بحركة لا ارادية
توفيق"يالا يا فارس... لاحسن يفتكروك عايز ترجعلها...مبقاش ينفع"
حياة"هدخل لماما"
توفيق"استنى علشان اجى معاكى نتكلم ف اجراءات الطلاق...اطلع انت"
طلع فارس بشنطة وحزنه وصدمته
وهو على السلم ومعدى من قدام شقة ايمان
شاف حمزة ومايا وهما خلال فترات حياتهم اللى فاتت
الطفولة والصبا وهما داخلين او خارجين او قاعدين ع السلم
نزلت دموعه لاول مرة من ساعة اللى حصل وصدمته
حس انه لوحده ومحدش شايفه
كمل السلم...وصل عند باب شقته...حط الشنطة جنب الباب
وكمل لحد السطح
دخل السطح... كل حاجة بقت اطلال
التندة مقطوعة من عوامل الزمن
الترابيزة مكسورة ومحطوطة على جنب
اصص الزرع اللى كان موجود... موجودة وفاضية
فلاش باك
مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"
نزل فارس...بسرعة قبل ما حد ياخد باله انه اتضايق
دخل شقتهم... ودخل على اوضته وقفل على نفسه
"ايه اللى مضايقنى كده... ما انا كنت حاسس من الاول اهتمامها بيه هو مش بيا... مش ذنبنهم انى حبيتها وسكتت... حمزة اخويا ولازم افرح لهم... مش لازم حد فيهم يحس بحاجة...ولا لازم حد من الكبار يعرف علشان مايا وحمزة ميزعلوش منى... والحمدلله ان الدراسة قربت وهركز ف المذاكرة وابعد عنهم شوية"
********************
فارس قاعد بيذاكر ف اوضته...يخبط عليه الباب
"ادخل"
تدخل نسرين
"ازيك يافارس"
"الحمدلله...عاملة ايه"
"انا كويسة... انت اللى فين مبتطلعش تقعد معانا فوق ليه"
"انتى عارفة انى عندى مذاكرة كتير"
"ما كلنا عندنا مذاكرة"
فارس بيضحك علشان يدارى احساسه
"ايه جاب دراسة الهندسة للحاجات السهلة بتاعتكم دى"
"سهلة... ما مايا ثانوية عامة...مش هتبقى اصعب منها"
"لا يا ستى انا اصعب...وبعدين انا عايز اركز واذاكر كويس علشان اجيب تقدير واتعين ف الكلية"
"الله الله ده احنا راسمين على تقيل اوى"
"اوى اوى"
ضحكوا مع بعض... وسألته نسرين بتبرة جدية
"فارس...انت بجد كويس ولا زعلان من حد فينا"
"زعلان...لا طبعا هزعل ليه"
"معرفش...حسيت كده انك اخدت جنب بقالك فترة فحبيت اطمن عليك"
"ربنا يخليكى يا نسرين...طول عمرك اخت جدعة"
"احنا كلنا منستغناش عن بعض... متبقاش تغيب علينا...ابقى حتى اطلع اقعد معانا كل خميس"
"حاضر"
"يالا اسيبك علشان معطلكش"
فارس واقف وبيفتكر ايامهم الحلوة قبل ما تتبدل حياتهم
رغم انها كانت ايام صعبة عليه الا انها مكنتش اصعب من اللى فيه دلوقتى
بص لاطلال المكان اللى بيجمعهم
"اكيد اللى حصل كان هنا... كده ياحمزة تعمل كده... لو كنت حبيتها زى ما انا حبيتها مكنتش تضرها بالطريقة دى... انا ليه بعد ده كله مش عارف اكرهكم"
احساسه انه متضايق منهم من اللى عملوه...واحساسه انه بيفتكر ايامهم الحلوة وعدم قدرته على كرههم... تعبه اكتر
وخرج بسرعة من السطح...وكأنه بيهرب من ذكرياته وخيالاته اللى بتطارده
انا_مش_بنت_بنوت
الحلقة الخامس
توفيق وحياة قاعدين مع فؤاد ومامته
توفيق"هتعمل ايه معاها يا فؤاد"
فؤاد بانكسار"هعمل ايه...العمل عمل ربنا"
توفيق"يعنى ايه... يعنى هتسكت لها"
فؤاد"هعمل ايه اكتر من اللى حصل"
توفيق"انت راضى يعنى انها تحط راسك ف الطين"
فؤاد بضيق" اللى حصل حصل خلاص... لما تخف هبقى افهم منها ايه اللى حصل بالظبط"
توفيق"اخص على كده...عيشتك بره خلتك بارد"
فؤاد"راعى كلامك يا توفيق... انت عازينى اموت بنتى الوحيدة"
توفيق"ده انت تموتها وترمى جتتها للكلاب"
فؤاد بنرفزة"انت عايز ايه بالظبط... ملكش حاجة عندى...بنتى وانا حر فيها...فارس طلقها وخلاص انتهينا...كفاية انى اتسرعت واتعاملت معاها بنفس طريقة ابنك الهمجية...مش كفاية المنظر اللى لقيناها فيه...عاجبك الضرب اللى كان ضاربهولها ده...والله لو ما كان ابن اختى ماكنت سيبته الا وانا حابسه"
الام بتحاول تهدى فؤاد
"اهدا يافؤاد خلاص"
توفيق قام يزعق هو كمان
"انت ليك عين تتكلم بعد اللى بنتك عملته... ده انت المفروض مترفعش عينك فينا بعد اللى حصل"
فؤاد"اسكت يا توفيق احسن لك انا اللى فيا مكفينى"
حياة"خلاص يا توفيق...خلاص يا فؤاد...يالا ياتوفيق"
توفيق"يالا ايه... حق ابنى عند مين؟"
فؤاد"حق ايه"
توفيق"فرحته اللى اتكسرت...المصاريف اللى صرفها على الجهاز والبيت والفرح"
فؤاد"يعنى مشكلتك ف الفلوس...ياخد اللى صرفه"
توفيق"ده انت غريب...دى لو كانت بنتى والله كنت دبحتها وانا رافع راسى"
فؤاد"الحمدلله انها مش بنتك... ومن هنا ورايح لا انت ولا ابنك ليكم دعوة بيها... وانا هظبط امورى واخدها تعيش معايا هناك"
توفيق"خدها...علشان تبقى على كيفها اكتر"
فؤاد"اخرس بقى ده انت معندكش دم"
حياة"عيب كده يافؤاد... محصلتش انك تشتمه"
فؤاد"كلمة زيادة وهضربه... سيبونا ف حالنا بقى"
قام فؤاد وسابهم ودخل اوضته
وقام توفيق وهو بيشتم ويزعق
وحياة طلعت وراه والام شايفة كل اللى بيحصل ومش عارفة تقول ايه ولا تعمل ايه...بعد ما طلعوا دخلت لفؤاد
*******************
فؤاد قاعد ف اوضته ...دخلت مامته عليه
"متزعلش يافؤاد...جوز اختك برضه زعلان على ابنه"
"وانا زعلان على بنتى وزعلان من اللى عملته... مصيبتى اكبر بكتير منه وهو جاى يلومنى... انا هتجنن من اللى عملته وف نفس الوقت لما افتكرها وهى واقعة ف ايد ايمان مبتنطقش بقول لنفسى انا ازاى قدرت اعمل فيها كده... وازاى هى قدرت تعمل فيا كده...ليه ياماما ماحفظتيش عليها"
واتفاجئت الام بتوجيه الاتهام ليه
"انا؟؟ انا محافظتش عليها يا فؤاد... ده انا كنت حاطاها ف عنيا...دى مكنتش بتخرج لوحدها ابدا غير ع المدرسة ولا الكلية... ولما كانت بتخرج بيكون ولاد عمتها معاها"
"هو ليه توفيق شك ف حمزة بالذات؟؟"
*******************
توفيق وحياة داخلين شقتهم... دخلوا لقوا فارس قاعد
توفيق"شوف انت صرفت كام علشان اجيبهولك من خالك"
فارس"مش عايز فلوس...كفاية اللى خسرته"
توفيق"هيبقى خسارة من كله.. انت تاخد الفلوس وتتجوز احسن واشرف منها"
قام فارس يدخل اوضته وهو بيرد عليه
"مش عايز اتجوز حد... كفاية اللى حصل"
توفيق"شفتى...الواد اللى حيلتنا عقدته بنت اخوكى"
حياة"انا مبقتش عارفة اقول ايه ولا اعمل ايه بعد اللى حصل... مش عارفة هتعامل مع اخواتى ازاى... معقول يكون حمزة صحيح"
"انا مش ياما قلت لك قعدة السطح دى غلط... كتير كنت بشوفهم نازلين من فوق لوحدهم...ولما لمحت لامك طنشت ولا مفهمتش مش عارف"
"الله يجازيهم ع اللى عملوه فينا"
*********************
ايمان داخلة بكوباية لبن على مايا
شافتها نايمة... اتسحبت رجعت تانى وقفلت الباب عليها
طلعت قعدت بره...وافتكرت انها متصلتش تطمن على نسرين
فاتصلت بيها
"الو... ازيك يانسرين"
"ازيك ياماما...مال صوتك"
"مفيش يا حبيبتى...انتى عاملة ايه السفر تعبك ولا حاجة؟"
"لا الحمدلله...بس قوليلى صوتك ماله... واخبار مايا وفارس ايه"
"ممدوح عندك؟"
"لا نزل"
وعيطت ايمان غصب عنها
"مايا وفارس اتطلقوا"
صرخت نسرين
"بتقولى ايه ياماما... انتى بتهزرى صح؟"
"والحاجات دى فيها هزار"
"ليه طيب...ايه اللى حصل؟"
"اللى حصل ميتحكيش"
"ماما احكى لى ...ايه اللى حصل علشان يتطلقوا تانى يوم"
"مطلعتش بنت"
شهقت نسرين من الصدمة
"مش معقول... اكيد فيه حاجة غلط...هى قالت ايه"
"مقالتش... احنا روحنا لقيناها مضروبة ومعدومة العافية ولما فارس قال فام عليها فؤاد وفضل يضرب فيها لحد ما اغمى عليها بين ايديا وجبنالها الدكتور قالت فقدت النطق"
"يا حبيبتى يامايا...ياريتنى ماكنت مشيت"
"بالعكس...الحمدلله انك مشيتى... كان هيبقى ايه موقفنا قدام ممدوح... اوعى تقوليله حاجة"
"بس انا عايزة اجى لمايا"
"لو عايزة تيجى قولى له اى حاجة وتعالى لوحدك..مش ناقصين فضايح"
"طيب ... هى فين دلوقتى مينفعش اكلمها"
"مبتنطقش يا نسرين...بقولك ايه؟؟انتى كنتى تعرفى حاجة"
"لا والله ابدا انا اتفاجئت بكلامك ...بس عايزة اعرف منها ايه اللى حصل وليه سابت نفسها لحد ماتتجوز ماقالتليش ليه على الاقل"
"مش قادرة اضغط عليها ف الاسئلة... لو شفتى شكلها يصعب ع الكافر"
"ياحبيبتى يامايا... واخص عليه فارس..كده يطلقها"
"المصيبة انهم شاكين ف حمزة"
*********************
فؤاد بالليل لابس ورايح ع الباب
"انت رايح فين دلوقتى"
"عايز اطلع اطمن على مايا"
"طيب استنى اجى معاك"
"طيب"
فؤاد ومامته بيخبطوا على ايمان
"اهلا ياماما...اتفضلوا"
فؤاد"مايا اتكلمت؟"
ايمان"لآ"
الجدة"وهى فين"
ايمان"من ساعة ماجت وهى بتعيط...فضلت تعيط كتير اوى ولما اخدت الدوا بعدها بربع ساعة لقيتها نامت"
********************
مايا بتفتح عينيها...شافت ايمان نايمة جنبها
قامت تتسحب من جنبها...وايمان محسيتش بيها
خرجت من الاوضة... راحت اوضة حمزة وفتحتها
دخلت فتحت النور... بتبص على كل جزء ف الاوضة
راحت على المكتب... قعدت على الكرسى
فتحت الدرج... شافت برواز صغير فيه صورتهم هما ال4
فارس ونسرين وهى وحمزة قاعدين جنب بعض ف بيت الجدة
حطت الصورة ع المكتب... وشافت اجندة
طلعتها من الدرج...فتحتها وقعدت تقلب فيها بابتسامة حنين ودموع
فلاش باك
حمزة ماسك الاجندة بتاعته وقاعد
راحت مايا قعدت جنبه...قفل الاجندة
"بتعمل ايه"
"ملكيش دعوة"
"اخص عليك ياحمزة...هزعل منك والله"
"هوريكى بس مش دلوقتى"
"امتى طيب"
"لما اخلص"
"طب ايه هو اللى هتخلصه"
"بكتب لك حاجة"
"وتكتبها لى ..ماتقولهالى"
"اصلها مش اول مرة"
"ازاى"
"كنت كل ما احب اقولك حاجة اكتبها ف الاجندة دى... يوم خطوبتنا هديهالك تبقى تقراى فيها براحتك... ونبقى نحتفظ بيها ف بيتنا ونوريها لولادنا"
تمسح مايا دموعها وهى بتقلب فى الاجندة اللى مليانة كلام كتير كلها بخط حمزة
يلفت نظرها رسمة تصميم لدعوة فرح
صممه حمزة وكتب فيه اسمه واسمها ويوم الخطوبة
فلاش باك
حمزة واقف قدام باب المدرسة ومايا خارجة راحت ناحيته
"ايه الاخبار"
"تمام"
"مبروك"
"على ايه مش لما النتيجة تبان"
"هتبان وهتنجحى وهتدخلى الجامعة ان شاءالله"
"يارب يا حمزة"
بيكملوا كلامهم وهما ماشيين
"انا اتكلمت مع بابا وماما امبارح وقلت انى عايزهم يكلموا خالو فؤاد"
"وبعدين"
"بابا رفض"
مايا بزعل"ايه؟"
حمزة بيضحك"قالى مينفعش يتكلم الا لما اشتغل ..قال اول ما اشتغل واستقر ف الشغل ساعتها هيقدر يكلم خالو فؤاد"
مايا"يارب ياحمزة تلاقى شغل"
حمزة"النتيجة تظهر بس وانا هقلب الدنيا على شغل علشان نتخطب واقدر اقول للدنيا كلها انى بحبك"
********************
حمزة ومايا وفارس ونسرين قاعدين ف بيت الجدة
فارس بيقوم"الوقت اتأخر هطلع انام انا...تصبحوا على خير"
نسرين"اه واحنا كمان يالا ياحمزة انت لازم تنام بدرى"
حمزة وهو قايم"ماشى جاى معاكم اهو"
حمزة بيميل على مايا
"عايزك فوق ضرورى"
"ف ايه؟"
"نص ساعة واطلعى قابلينى فوق... هستناكى"
"لما نينة تنام هطلع"
****************
مايا داخلة السطح شافت حمزة مستنيها وقاعد ع الارض وساند ضهره على السور وممدد رجله
راحت ناحيته وقعدت جنبه
"ايه ياحمزة عايزنى ف ايه"
"عايز اقعد معاكى لوحدنا"
"لو كنت عايز تقعد معايا مكنتش تسافر وتسيبنى"
"اساااافر ههههه...دول 3 ايام مع اصحابى ف اسكندرية"
"بتضحك وبتستهون بيهم صح"
"ما انتى يا ستى بتسافرى وتسيبينى"
"ماشى يا حمزة براحتك"
"لا مش عايز اخر حاجة اشوفها قبل ما امشى تكشيرة...انا عايز اشوفك مبسوطة على طول"
"هتوحشنى"
"وانتى هتوحشينى..هبقى اكلمك كل شوية لحد ما تزهقى منى"
"طب يالا انزل علشان زى نسرين ما قالت لازم تنام بدرى"
"لا يا مايا خليكى معايا"
مسك ايدها وهو بيبص لها بحب... وقرب وباسها من خدها
"مايا...مايا"
مايا بتصحا
"قومى احنا نعسنا وافجر هيشقشق"
"يا خبر اسود... لتكون نينة صحيت وملقتنيش نايمة ف اوضتى"
"قومى انزلى بسرعة وانا هنزل بعدك... اشوف وشك بخير انا يدوب هلبس قبل ما اصحابى يعدوا عليا"
"ماشى...سلام"
مايا بتفتح الباب وبتتسحب وهى داخلة البيت
راحت بصت على جدتها...اطمنت انها نايمة
جريت على اوضتها ...غيرت هدومها بسرعة ونامت
مايا بتصحا على صوت صراخ عالى
الصوت قريب منها اوووووى
بتقوم تخرج من الاوضة تجرى
بتلاقى جدتها بتعيط وايمان ونسرين بيصرخوا
وحياة بتاخد ايمان ف حضنها وتعيط
مايا بتجرى عليهم
"فى ايه"
حياة"حمزة... ياحبيبى يابنى"
مايا وهى بتعيط"ماله حمزة"
حياة"عمل حادثة هو واصحابه...وراحوا كلهم ...يصبر قلبك يا ايمان يا ختى"
***************
تعيط مايا بحرقة وهى بتحضن اجندة حمزة وصورتهم اللى ع المكتب... صوت عياطها عالى
دخلت ايمان الاوضة على صوت مايا
"قمتى امتى... الله يرحمك يابنى"
مايا بتعيط وهى حاضنة حاجته
ايمان بدأت دموعها تنزل وهى بتاخد منها الحاجة بهدوء
"قومى يامايا... انا مبحبش ادخل اوضته... قلبى بيتوجع وانا مبقتش مستحملة احزان... كفاية ان ابوه راح وراه بسنة م الحسرة عليه"
قامت مايا معاها... دخلوا اوضة ايمان
قعدت مايا ع السرير... وايمان قصادها
مايا بتعيط ... وايمان بتحاول تتماسك وبتمسح دموعها
"قوليلى... لو مش قادرة تتكلمى هزى راسك... طمنينى انا هموت من امبارح ومش عايزة اضغط عليكى...ريحينى الهى يريح قلبك"
مايا بتنتبه لايمان وبتمسح دموعها
ايمان بتكمل
"هو حمزة فعلا؟؟ غلطتى مع حمزة؟؟"