رواية احببت حمقاء الفصل الاول1والثانى2والثالث3بقلم ملك محمد

الفصل الثانى والثالث 

بقلم ملك محمد 

بعد مرور يومين

ياماما انتي كدا بتوديني لبابا عافيه انا مش عايزه اروح اعيش معاه

والدتها : هتروحي ورجلك فوق رقبتك انا زهقت منك اساسا يعني انا يطلع عيني هنا وهو عايش مع الهانم مراته ومرتاح لا روحي طلعي هبلك عليه وع مراته اجري 

منه بذمجره : طب وجامعتي مفكرتيش فيها

: ملفك اتنقل من امبارح وخلاص جامعتك بقت هناك مش هنا 

منه بغضب : بقى كدا طب انا هنتحر علشان ترتاحي مني 

وسابتها ودخلت المطبخ

والدتها : بت تعالي هنا اقولك

منه بغضب: متحاوليش انا قولت هنتحر يعني هنتحر

والدتها : يابت بقولك السكينه الصغيره حاميه انما الكبيره برده زيك ف استعملي الصغيره علشان نخلص ع طول 

منه بصدمه رجعتلها : انتي ماما انتي دانتي لا يمكن تكوني ام ابدا قولي انك لقتوني قدام باب الجامع اعترفي

والدتها : ايوا انا مش امك ولقناكي قدام باب الجامع ممكن بقى تتفضلي تلمي شنطتك

منه رفعت شعرها لفوق وربطته بالقلم ال ف ايدها وقالت

: ماشي ياماما انا ماشيه وسيبهالك بقى دا كله علشان ال 2000جنيه ال ادتهملي اجيب بيهم طلبات ونسيت الطلبات ف المترو واي يعني ما انساهم بقولك كنت واقعه ف مصيبه 

والدتها بغضب : يلا ياحيوانه هما ال 2000 جنيه دول بس دانتي لسه مولعه ف الشقه مكملناش شهر وطلع عيني ف تشطيبها من الأول ولا الزيت ال دلقتيه على باب الشقه علشان القطه متدخلش عندنا وقال اي لو دخلت تتزحلق ورجليها تتكسر وأنا ال اتزحلق فيه واتجبست شهريين بسببك ولا شعر جارتنا ال حرقتيه قال اي هساعدك ياماما وافتح كوافير ف اوضتي وتيجي الست الغلبانه تستشور شعرها تقوم تصوت ونلاقي شعرها مولع ونجري نطفيه دانا يومها خدت تهزيق للركب بسببك ولا  .....

قاطعها اسلام وهو خارج من اوضته بيضحك وبيقول لمنه 

: اي هتروحي تعيشي مع تنط هدى خلاص

منه بغضب : ادخلي ياريهام انتي جوه لما نعوزك هنندهلك

اسلام اتعصب وطلع يجري وراها 

منه طلعت تجري وتصوت

الحقيني ياماما 

___________

لمت شنطتها ومشيت على بيت والدها

خبطت ع الباب 

والدها بخوف : منه !

منه بضحكة سذاجه وهي مبينه اسنانها: اها منه وحشتك مش كدا 

وزقتوا ودخلت على جوه 

والدها : جيتي ليه في حاجه حصلت 

قعدت ع الكرسي وحطت رجل على رجل: بصراحه يابابا انا هعيش معاكوا انا عارفه انك مبسوط دلوقتي بس مش قادر تعبر عن فرحتك

والدها بيبلع ريقه بخوف : انتي تنوري ف اي وقت يابنتي بس عملتي اي المرادي اوعي تكوني ولعتي ف امك 

منه بحزن : كلكوا ظالمني كدا لا اطمن يابابا انا ولعت ف الشقه بس مش اكتر 

والدها برعب: ولعتي ف الشقه!

منه بضحكة سذاجه: اطمن دا كان من فتره المهم فين تنت هدى ال بعشقها 

والدها قعد ع الكرسي بتوتر وقالها

: منه بقولك ايه طالما هتعيشي معانا هنا ملكيش دعوه بطنط هدى خالص 

فجأه خرجت هدى مرات ابوها وهي بتقول

: بتكلم ف مين يا ايمن

بصت شافت منه قاعده ع الكرسي وجمبها شنطت هدومها جالها تشنجات 

ايمن قام بسرعه سندها وقعدها وقالها متخفيش متخفيش 

منه بقرف بتكلم نفسها : هي دي مقابله تقابلني بيها صه 

وبعدين قالت لوالدها : بابا انا داخله اوضتي لما تنت هدى تفوق انده عليا 

هدى برعب وهي ماسكه ف ايد ايمن 

: اي ال جابها ياايمن

ايمن بضيق : جرا اي ياهدى دي بنتي ولا انتي ناسيه وبعدين متخفيش انا هقولها تفضل بعيد عنك وانتي حاولي متديقهاش خالص اصل البت دي طالعه شرسه معرفش لمين 

هدى اتعدلت ورفعت شعرها وورته اسار العضه ال لسه ف رقبتها منها وقالتله بعياط

: دي مش شرسه بس دي متوحشه ياايمن

منه دخلت أوضتها وقعدت تظبط ف هدومها وتحط الكتب بتاعتها على مكتبها وترص حاجاتها ال جبتها معاها وهي حاطه الهاند فري ف ودانها وعماله تدندن مع الأغنيه ومش فارق معاها حاجه

خلصت تظبيط وراحت على دولابها طلعت هدوم جديده علشان تاخد شاور وتغير هدومها

وبعدين افتكرت انها متراقبه 

قعدت ع الأرض وهي بتضحك وبتقول

اديني نقلت بيت جديد اما اشوف بقى هتراقبني ازاي 

____________

تاني يوم الصبح 

خرجت من اوضتها لابسه وشايله شنطتها على كتفها  علشان تروح الجامعه الجديده 

منه بإبتسامه : صباح الخير

هدى بخوف : صباح النور اقعدي افطري 

منه بإبتسامه شدت مفتاح عربيت هدى من ع التربيزه وقالت : هفطر ف الجامعه انا أتأخرت

هدى بغضب : انتي واخده مفتاح عربيتي ليه

منه بتعجب : يعني اول يوم دراسه ف جامعه معرفش فيها حد ادخل عليهم كدا لازم اتفشخر قدامهم طبعا يامرات ابويا

هدى بعصبيه: انتي عارفه اني بدايق من كلمة مرات ابويا دي 

منه شدت صباع بطاتس من ع التربيزه حطته ف بوئها ومشيت وهي بتقول : خلاص منزعليش يا مرات ابويا 

وخرجت وقفلت الباب وراها 

هدى بغضب : انتي يابنت هاتي المفتاح

خرج ايمن من الحمام وهو بيقول 

: بتزعقي كدا ليه ياهدى ع الصبح

هدى بعياط : ربنا يعوض عليا ف عربيتي 

__________ 

" ف الجامعه "

ركنت منه عربيتها ونزلت منها والكل بيبص عليها واحد من الطلاب قال 

: اي القمر ال دخل علينا داه

خبطته حبيبته ف كتفه وقالتله

: انت بتعاكسها قدامي ياحيوان

الشاب بضحك : بصراحه البت تاخد العقل واضح انها جديده هنا اول مره اشوفها

منه كانت ماشيه بثقه علشان محدش يستقل بيها خصوصاً ان دا اول يوم ليها هنا

دخلت مدرجها وقعدت 

طلعت البيبس والشيوتس على الديسك قدامها علشان تاكل قبل المحاضره ماتبدأ 

زميلتها ال قاعده جمبها : اي دا انتي هتاكي 

منه بإبتسامه : اه خدي كلي معايا

زميلتها بضحك : واضح انك فرفوشه خالص 

نتعرف انا مريم

منه بحب  مدت ايدها :وانا منه وانتي بقيتي صاحبتي خلاص 

مريم بضحك : واضح انك بتاخدي ع الناس بسرعه

منه فتحت البيس ورفعتها وبتشرب شافت نادر الشخص ال انقذها امبارح 

فضلت تكح والبيس ادلقت من بوئها 

مريم خبطت على ضهرها وقالتلها 

: انتي كويسه 

فجأه نادر بص ناحيتها 

منه شدت كتاب وحطته على وشها ونزلت لتحت الديسك وهي بتكلم نفسها وبتقول

: واضح انك عامله مصيبه يامنه لدرجة ان امن الدوله بذات نفسها بتراقبك ف الجامعه

وقعدت تعيط زي العيال 

نادر اول لما بص عليها لقاها غطت وشها ونزلت لتحت مداش اهتمام وقعد مكانه 

مريم : اطلعي من تحت الديسك يابنتي في اي

منه طلعت بالراحه وقالتلها

: في حد باصص عليا

مريم بتعجب : لا مفيش 

منه قعدت وهي حاطه الكتاب على وشها وقالتلها بصوت واطي

ال قدام داه بيعمل اي هنا 

مريم بتعجب : مين تقصدي نادر 

منه بهمس: معرفش اسمه اي المهم بيعمل اي هنا 

مريم بتعجب : طالب عادي هيكون بيعمل اي يعني

منه بصدمه : طالب ! الشحط دا كله طالب 

مريم بضحك : لو سمعك هيعمل منك بتاتس محمره دا محدش بيستجرأ يتكلم معاه 

منه ببكاء : هما امن الدوله كدا محدش يقدر يكلمهم 

مريم بتعجب : امن دوله اي بس انتي عارفه قصة الشاب دا اي 

منه وهي بتتكلم من ورا الكتاب ال ع وشها : لا معرفش

مريم : دا ياستي ابن واحد غني جدا ورجل اعمال مشهور كان عايش حياته بسعاده واسرته مبسوطه جدا لحد ما ف يوم والده قال انه مسافر بس حصل ظروف ومسافرش فرجع وشاف مراته قاعده مع واحد ف كافيه جمب الفيلا 

عرف بعدها انها بتقابل الشخص دا ع طول واعترفت انها بتحبه رغم ان مستواه الأجتماعي مش عالي ولا حاجه بس زي مابيقولوا مراية الحب عاميه المهم ياستي سابت نادر مع والده وطلبت الطلاق وقررت تتجوز الشخص ال خانت جوزها معاه 

جوزها من الصدمه قرر يسافر ويسيب مصر اما نادر ففضل 3سنين مبيجيش الجامعه ومأجل كل الفتره دي كلها لأن الطلاب هنا كانوا بيعايروه بخيانة والدته وكان اي حد بيتكلم نادر بيضربه فحصل مشاكل كتير ف الجامعه 

منه بتعجب : اه علشان كدا شحط ولسه ف اولى جامعه 

مريم بضحك : هو دا ال لفت نظرك من القصه كلها

منه : صحيح قوليلي لما والده سافر هو مسافرش ليه معاه

مريم : حصل مشاكل بينه وبين والده فعايش هنا لواحده بس والده مش مقصر معاه ف حاجه مخليه مش محتاج اي حاجه دا يابنتي يعتبر اغنى واحد هنا ف الجامعه 

معرفش والدته الغبيه ازاي تخون واحد غني كدا مع حد شبه فقير واحده مبتفهمش صحيح 

منه بتعجب : بس هو مقلكوش أنه شغال ف امن الدوله قبل كدا

مريم بضحك: أمن دوله اي ياهبله بقولك اي اقفلي ع الموضوع داه واوعي تفكري تقولي قدامه اي حاجه عن والدته وقتها ممكن يرتكب جريمة قتل فاهمه نادر بالذات محدش ف الجامعه بيستجرا يتكلم معاه خليكي بعيد عنه خالص 

"خلصت المحاضره ومنه خدت شنطتها وخرجت قابلها نادر ف الطرقه صدفه اول لما شافته جي قصادها رفعت شنطتها على وشها واستخبت وراها وكملت مشي "

نادر كان بيبص عليها بتعجب ومستغرب مين دي وبتعمل كدا ليه

منه وهي ماشيه حاطه الشنطه على وشها كانت هتلبس ف الحيطه لأنها مش شايفه حاجه

نادر شافها من بعيد وبدل مايروح يشدها بعيد الحيطه سابها تكمل طريقها وهو بيتفرج

منه لبست ف الحيطه فعلا

قالت بصراخ : ااااا 

نادر مشي وسابها وهو بيقول حمقاء 

وبردو ماشفش وشها 

منه رفعت شنطتها من ع وشها وبصت وراها بالراحه شافته وهو ماشي 

خدت نفسها وقالت بذمجره

: المتعجرف شافني وانا هخبط ف الحيطه ومهنش عليه يقولي حاسبي حتى 

وبعدين قعدت ع الأرض وهي بتعيط زي العيال الصغيره وبتدب برجليها ف الأرض وبتقول 

انا عايزه ارجع جامعتي تاااااني مليش دعوه 

جاتلها مريم وقالتلها 

انتي قاعده هنا بتعملي اي الطلاب كلهم ف المعمل عندنا تدريب 

منه بخوف : هو كل الطلاب هناك حتى ال اسمه نادر داه

مريم : اكيد طبعا قومي يلا تعالي معايا اوريلك المعمل منين

منه قامت من ع الأرض وهي بتقول ببكاء : هو انا عامله مصيبة اي بس توقعني ف ناس شريره زي دي 

مريم بتعجب : هي مين الناس الشريره دي

منه بحزن : امن الدوله

مريم : هو اي حوار امن الدوله معاكي يابنتي انتي عليكي قضايا

منه بإحباط : لا انا بريئه وربنا بس بيراقبوني علشان يمسكوني متلبسه 

وبعدين مشيت لقدام وهي عماله تعيط 

مريم شدتها من قفاها وقالتلها

: المعمل من هنا 

#احببت_حمقاء (3)

مشيت منه مع مريم ووصلوا للمعمل 

دخلت وهي حاطه الكتاب ع وشها علشان نادر ميشوفهاش 

الدكتوره شافتها داخله قالتلها

: انتي الطالبه الجديده اسمك منه مش كدا

منه ردت من ورا الكتاب 

: اها انا منه

الدكتوره : طب تعالي هنا جمب نادر علشان يعرفك النظام هنا ماشي ازاي 

منه برعب : ايه نادر مين !

الدكتوره : شيلي الكتاب من على وشك وانتي بتتكلمي 

نادر كان قاعد وبيبص عليها ومستغرب البنت دي بتحاول تخبي نفسها ليه 

منه ملقتش حل غير انها تمثل ان بطنها بتوجعها 

فقالت : ااااه بطني لازم اخرج حالا انا اسفه انا اسفه مضره امشي

وطلعت تجري والكتاب على وشها 

وهي بتجري خبطت ف شاب 

منه : انا اسفه وثابته ومشيت

رامي بتعجب : مالها دي

سابته وطلعت تجري 

فجأه لقى نادر بيجري هو كمان علشان يلحقها

وقف وبص عليهم من بعيد وهو بيقول 

اممممم معقول نادر بينه وبين البنت دي حاجه 

منه مكنتش تعرف اي حاجه ف الجامعه ففضلت تجري لحد ما لقت نفسها لبست ف حيطه ومفيش مكان تروحله 

لسه بتلف وشها لقت نادر حط ايد ع الحيطه 

عرفت انها وقعت ف مصيبه 

راحت فاكه شعرها بسرعه ومداريه وشها بيه

نادر بتعجب : حركاتك مريبه من وقت ماجيتي مين انتي 

منه وهي مخبيه نفسها بشعرها : انا بريئه اقسم بالله ياباشا 

نادر بتعجب : باشا!

فضل قلبها يدق وواقفه مرعوبه : ممكن تسبني امشي 

نادر كان قريب منها لدرجة انه كان شامم ريحة شعرها 

رد وقالها : هتمشي بس مش قبل مااعرف انتي مين وعايزه اي

منه بخوف وهي مداريه ف شعرها وباصه لتحت

: لو عرفت انا مين هتحبسني ؟

نادر حس ان البنت دي وراها مصيبه : احبسك ليه ! اي ال انتي بتقوليه داه ارفعي وشك بقولك 

منه فضلت موطيه لتحت وخايفه

نادر رفعلها وشها بإيده وشال شعرها من على وشها وبصلها 

رامي كان واقف من بعيد بيراقب الموقف اول لما شاف نادر بيرفع وشها لفوق وبيحوش شعرها من ع عنيها عرف ان فيه حاجه بينهم وشك انها تكون حبيبته 

ابتسم بخبث وقال لنفسه : شكلنا هنتسلى كتير وسابهم ومشي 

نادر اول لما رفع وشها عرف انها البنت بتاعت المترو قال بصدمه : هو انتي !

منه نزلت ع الأرض ومسكت ف رجله وقالت بعياط 

: سامحني ياباشا سامحني ارجوك متبلغش عني 

بص عليها وهي ماسكه ف رجله زي العيال الصغيره وعماله تعيط 

حاول يزقها وهو بيقول

: اي ال انتي بتعمليه داه انتي مجنونه

منه ببكاء: ارجوك انا غلبانه دانا بابا وماما منفصليين ومرات ابويا بتعذبني أاااأ أاااا 

نادر زقها برجله لبعيد وقالها 

: انا مش فاهم حاجه انتي خايفه ابلغ عنك ليه 

قامت من ع الأرض بسرعه وقالتله

: مش انت امن دوله وبتراقبني علشان تمسكني متلبسه

رد بتعجب : امن دوله اي انتي مجنونه

منه بصدمه : مش انت ال قايلي انك بتراقبني وكمان عرفت موضوع اسلام وريهام 

نادر افتكر يوم المترو وهو مروحها قالها انه بيراقبها

ابتسم وقال : انتي فعلا مصدقه ان انا براقبك 

هزت راسها يعني اه

قالها : انا كنت بهزر مفيش حاجه من الكلام دا انا مجرد طالب هنا 

منه بصدمه : بتهزر قول وربنا كدا 

 نادر بجديه:

 ‏ ايوا كنت بهزر وأفضل حاجه تفضلي تتجنبيني كدا ع طول تمام 

 ‏وسابها ومشي 

منه شاطت من الغضب علشان ضحك عليها جريت ووقفت قدامه وقالتله

: انت فاكر ال انت عملته دا هيعدي عادي انت ازاي تضحك عليا كدا ها انت فاكرني عيله علشان تهزر معاها الهزار البايخ داه 

وقامت رافعه ايدها علشان تديله بالبوكس راح باعد وشه وماسكلها ايدها تناها

منه : اااه ايدي 

راح زقها لبعيد وقعت ع الأرض 

قرب منها وقالها

: خليكي بعيد عني فاهمه 

وخرج من الأوضه 

دراعها كان اتعور من وقعتها ع الأرض 

قعدت تكلم نفسها: دا كله وطلع بيضحك عليا وانا هبله وصدقت وقال اي ابعدي عني ع اساس هموت واكلمه اوي اووف انسان بارد 

قامت وهي ماسكه دراعها ورجعت للمعمل تاني 

رامي اخد باله انها دخلت بعد نادر وماسكه دراعها 

مريم بلهفه : كنتي فين يابنتي كل داه

منه قعدت جمبها : مفيش حاجه قوليلي وصلنا لفين 

رامي طول الوقت قاعد بيبصلها وسرحان 

منه لاحظت كدا ف قالت لمريم 

: مين داه وبيبصلي كدا ليه 

مريم بخوف : دا بقى بلطجي الدفعه زي مابيقولوا 

 رامي دا ياستي  العدو اللدود لنادر الاتنين مبيطقوش بعض بينهم كم كره رهيب وكل شويه مشاكل سوا ع أتفهه الأساب والسبب ان والد رامي دايما بيهينه لو نادر جاب درجات أعلى ف الأختبارات وبيقوله لازم تبقى افضل منه

 ‏دا غير ان الاتنين مشتركيين ف نادي رياضي وبيلعبوا لفريق كرة سله واحد بس نادر متفوق دايما عن رامي فبيحقد عليه جدا 

  تحسي نادر كدا الطالب المثالي هنا ف الدفعه وهو مدايق من كدا 

  ‏منه بتعجب : معقوله يكون دا سبب يخليهم مش طاييقين بعض

مريم بهمس: بصراحه انا سمعت ان المشاكل بين العائلات نفسها يعني الكره متوارث 

  ‏بقولك اي كفايه رغي بقى وركزي علشان هنطرد كدا

رامي كان قاعد يبص ع منه وهو بيكلم نفسه 

: معقوله نادر حب وكمان جاب حبيبته هنا الجامعه معاه لا لا نادر انسان معقد مش معقول يحب بسهوله كدا 

وبعدين افتكر لما نادر كان بيرفعلها وشها وبيبعد شعرها عن عيونها (هو كان واقف بعيد فحس ان دا موقف رومانسي بس هو مكنش كدا خالص)

قام من ع الكرسي بتاعه وشده ف ايده وراح قعد جمب منه 

منه بخوف : في اي 

رامي وهو بيبص لنادر من بعيد : مفيش طلبت معايا اقعد هنا عندك مانع 

نادر مداش اهتمام وبص قدامه 

رامي استغرب وقال ف نفسه هي مش مفروض انها حبيبته ويدايق لما اجي اقعد جمبها 

او ممكن يكون مش عايز حد يعرف انها حبيبته 

وبعدين بص على منه لقاها ماسكه ايد مريم وبترسملها ساعه على ايدها

رامي بتعجب : انتي بتهببي اي  

منه بصتله وقامت شاده ايده وقالتله : هات اعملك ساعه انت كمان

رامي حس كأن حاجه منعته يرفض وسابها تمسك ايده وترسمله ساعه 

فضل يبص عليها بتعجب وهي بتشخبط على ايده وبيقول ف نفسه

: معقول نادر يحب دي دي مختلفه عنه تماما واضح انها بنت ساذجه 

منه بإبتسامه : خلصت حلوه مش كدا 

رامي بتوتر خبى ايده بسرعه علشان محدش من الطلاب يشوفه لأنه دي اول مره يخلي بنت تعمل معاه كدا 

منه بتعجب : بتخبيها ليه مش عجباك ارسملك واحده تانيه

رامي بتوتر: بس بقى اقعدي ساكته احنا هنهزر 

منه بضيق : هما كل ال هنا متعجرفين كدا ليه تشه

______________

بعد الجامعه ماخلصت وكل طالب روح على بيته والوقت كان بليلل 

نزل نادر يشتري أكل ليه لأنه عايش لوحده ومفيش حد يعمله أكل 

وهو خارج من المطعم وف ايده شنطة الأكل لسه هيركب عربيته شاف بنت قاعده ع الرصيف وحاضنه رجليها ونايمه 

ف الأول كان مقرر يمشي ويسبها بس شاف ان الوقت متأخر والشارع فاضي ف راحلها 

نادر من بعيد : انتي يا أنسه 

مردتش عليه 

قرب منها ووطى ع الأرض وحرك راسها راحت واقعه عليه وفجأه دماغها بقت على صدره 

ريحة شعرها مكنتش غريبه عليه حس بنبضات قلبه بتزيد 

منه فتحت عينها لقت نفسها ف حضن واحد متعرفوش زقته لبعيد وقامت بسرعه وهي بتقوم خبطته براسها ف بوئه فسنانه جابت دم لأن الخبطه شديده 

نادر وهو حاتط ايده على بوئه :  انتي تاني انتي دايما وجودك لازم يسبب مشاكل انتي ع بعضك مشكله

منه بأسف : انا اسفه بس اتخضيت لما لقتني واقعه عليك 

نادر بغضب : ولما انتي اتخضيتي بتعملي اي لحد 10بليلل بره البيت وبلبس الجامعه انتي معندكيش بيت تعيشي فيه دايما الاقيكي ف الشارع

منه بحزن : لا عندي واتنين كمان بس ماما مش عايزاني فبعتتني اعيش عند بابا وبابا متجوز وعارفه ان مراته مدايقه من وجودي فقررت افضل طول اليوم بره واروح ع النوم علشان ميحسوش بيا  

نادر هدي شويه لما قالتله كدا 

منه بسرعه فتحت شنطتها وطلعت منديل وقربت منه ومسحتله الدم ال نزل من بوئه 

نادر حس بإحساس غريب قالها بتعجب : انتي بتعملي اي

منه : بمسحلك بوئك انا اسفه بجد 

نادر شال ايدها وقالها : هو انتي اي حد تقربي منه وتمسحيله بوئه عادي كدا

منه بتعجب : هو انا مش مفروض اساعد ال قدامي خصوصاً ان انا السبب ف ال حصلك

نادر بإحباط : واضح انك ساذجه جدا بعد كدا تخلي مساحه بينك وبين اي حد وسيبك من العبط داه 

وشد منها المنديل وكمل مسح بنفسه 

سكوت شويه 

نادر : مش مفروض تروحي بقى 

منه : مش عارفه خايفه الاقيهم لسه صاحيين ويدايقوا من دخلتي عليهم

نادر : ووالدك عارف انك قاعده ف الشارع

منه : لا طبعا انا قيلاله ان انا عند واحده صاحبتي وهتأخر 

نادر بإحباط : أكلتي 

منه بلهفه : لا لا شكرا مش جعانه 

نادر : بقولك أكلتي مش اجبلك أكل 

منه بإحراج قالت بصوت واطي  : انسان بارد اوي 

نادر سابها وراح على عربيته 

منه  : دا سابني ومشي من غير مايقول انه ماشي اي الواد المعتوه داه 

فتح عربيته وطلع منها شنطة الأكل ال جابها من المطعم 

ورجع لمنه تاني وقالها

: قومي

منه بتعجب : اقوم فين 

نادر : واحد _ اتنين _ تل

منه قامت بسرعه وقفت جمبه 

اخدها ودخلوا المطعم ال جاب منه الأكل وقعدوا ع تربيزه 

طلع الأكل وحطه قدامها وقالها 

: كلي 

منه بتعجب : ها 

نادر : انجزي علشان الوقت 

منه زقت الأكل قدامه وقالتله : وانا هاكل لوحدي ليه هو انت بتعطف عليا

نادر بعصبيه : كلي وانتي ساكته

منه : وربنا مانا واكله الا لما تاكل

نادر  بتوتر : بصراحه مبعرفش أكل مع حد متعود اكل لوحدي انجزي بقى واتزفتي كلي 

منه بضحك : واحد بالطول والهيبه دي بيتكسف ياكل مع الناس 

نادر بضيق : ع فكره مش حاجه تضحك

منه بضحك شدة الأكل من قدامه وحطته قدامها وبدأت تاكل وتعمل صوت علشان تدايقه

: واو الأكل تحفه طعموا جميل اوي 

قطعت حته من الفراخ وحطتها ف بوئها وهي بتقول

: المطعم داه بيعمل الفراخ حلوه اوي يم يم

نادر مكنش كل من الصبح وقاعد عمال يبلع ريقه 

قالها : ممكن تاكلي بدون صوت

منه مردتش عليه وكملت أكل 

نادر : كنتي بتقولي ف الجامعه ان مرات ابوكي بتعذبك

منه فتحت بوئها وتنحت وافتكرت انها هي ال مطلعه عين مرات ابوها : ها !

وبعدين ضحكت بسذاجه وقالت وهي بتبلع الأكل : اها بتعذبني 

نادر : بجد بتعذبك

منه بإحباط :  انا بكرها اوي الستةدي لولا انها دخلت حياتنا كان زمانا عايشين اسره سعيده مع بعض بس بسببها ماما اطلقت واحنا بقينا مشتتين معرفش بابا حب فيها اي

اقولك حاجه بس متقولش لبابا

نادر بتعجب : وانا اعرف والدك منين علشان اقوله

منه خبطت دماغها بإيدها وقالت : اه صحيح انت متعرفوش 

وطت عليه وقالت بصوت واطي 

تعرف ماما قالتلي ان الست دي كانت متجوزه وحبت بابا وهي متجوزه جوزها دا راجل مهزء اظاهر كدا 

نادر الذكريات رجعت بيه لورا وافتكر والدته سرح شويه وبدأت ملامحه تتغير

منه قطعت حته من الفرخه ومدت ايدها ليه 

نادر بغضب زق ايدها لبعيد وسابها ومشي وهو بيحاول يتمالك نفس

طلعت تجري وراه وسألته

: مالك في حاجه انا عملت حاجه دايقتك

نادر وهو بيتمالك نفسه علشان متشوفوش وهو منهار قالها : ادخلي كملي اكل وروحي انا ماشي

وسابها وركب عربيته ومشي فعلا

منه بتعجب : ماله هو انا عملت حاجه زعلته

___________

نادر رجع البيت دخل وقفل على نفسه وقعد ع الأرض وكان بيعيط بطريقه هستيريه ويفتكر ال والدته عملته فيه وف والده وخيانتها ليهم

بعد مده من الوقت هدي شويه ودخل يغير هدومه 

مد ايده ف الجاكيت بتاعه يطلع مفاتيحه وموبايله لقى وسطهم المنديل ال منه كانت بتمسحله بوئه بيه 

مسك المنديل لقى عليه  كلام مكتوب 

فرده وحاول يقرا المكتوب عليه لقاها راسمه فيل وكاتبه تحته مرة في حينا زارنا فيل ظريف برفق قال لنا ليس هناك مايخيف 

ابتسم تلقائيا وافتكر الاغنيه دي لما كان بيسمعها وهو صغير كعبل المنديل وراح علشان يرميه ف الباسكت 

وقف قدام الباسكت افتكر شكلها وهي ماسكه المنديل ومقربه منه بتمسحله بوئه فضل يتخيل شكلها وحركاتها وهي بتاكل وطريقة كلامها 

غمض عينه وافتكر ريحة شعرها وهي قريبه منه

حس بتوتر وشال المنديل تاني بعد ما كان مقرر يرميه طبقه وحطه ف الدرج  جمب سريره  

_______

ف نفس الوقت كان رامي نايم على سريره وبيبص ع الساعه ال منه رسمتهاله ع ايده ابتسم وقال لنفسه 

غبيه اوي البنت دي ازاي نادر حبها 

                   الفصل الرابع من هنا

لقراءة باقي الفصول من هنا