رواية_قلوب_حطمها_العشق
الفصل الثاني عشر
#بقلم_ايمان_جمال
وقفنا الحلقة اللي فاتت لما ندى نزلت ليذيد وضربته بالقلم، يذيد اتفاجئ بإنها ضربته وواقف مصدوم
ندى بغضب: القلم دا عشان اللي انت عملته امبارح
يذيد واقف مش مستوعب اللي بيحصل وازاي ندى تمد ايدها عليه ومش عارف يرد ولا حتى يحاول يبرر، وليلى نزلت وشافتهم واقفين
ليلى: يلا انا نزلت
ندى: يلا ياليلى هنمشي احنا
ليلى بتبص ليذيد: ازاي مش احنا راحيين مع يذيد
ندى: لا
ليلى بتحاول تفهم في ايه ويذيد واقف وساكت تماماً وبيبص لندى، ندى متأكدة وعارفة ان اللي عملته مش هيعدي بالساهل ولا يذيد هيعديه عادي كدا وزعلت اوي انها عملت كدا
ندى: يلا ياليلى
ندى اخدت ليلى ومشيوا من ادام يذيد اللي لسة واقف مكانه، يذيد طلع تليفونه وكلم مي وطلب منها تدخل تشرح مكانه النهاردة
البنات وصلت الجامعة ودخلوا المدرج واتفاجئوا بدخول مي
مي بتتكلم في المايك: انا اللي هشرح ليكم محاضرة النهاردة مكان دكتور يذيد
ليلى بإستغراب بتكلم ندى: ليه هو راح فين؟
ندى: معرفش
ليلى بشك: ايه اللي حصل قبل ما انزل ياندى؟
ندى: مافيش
مي بدأت تشرح المحاضرة وندى ماركزتش في اي كلمة خالص وفضلت تفكر في يذيد وفي اللي هي عملته
يذيد راكب عربيته ورن على زين
زين: حبيبي
يذيد: عاوز مفتاح شقة العجمي
زين بإستغراب: ليه؟!
يذيد: عادي عاوز اغير جو اسبوع
زين: في ايه اللي حصل
يذيد: مافيش يازين
زين: طب انت فين؟
يذيد: قريب من الڤيلا
زين: طب تعالى انا لسة في الڤيلا ماخرجتش
يذيد: ماشي
بعد شوية يذيد وصل الڤيلا وطلع لزين
زين: ممكن بقى اعرف حصل ايه؟
يذيد: مافيش يازين انا عاوز المفتاح
زين بشك: انت اتكلمت مع ندى؟
يذيد اول ماسمع اسمها اتعصب واتكلم بكل غضب: الاسم دا ماتجيبش سيرته ادامي
زين: ايه اللل حصل يايذيد
يذيد بعصبية: قولتلك مافيش وهات المفتاح
يذيد اخد المفتاح من زين ودخل اوضته حضر شنطته ونزل اخد عربيته واتحرك لإسكندرية
زين نزل وراح الشركة عند مراد عشان يقابل كاميليا ووصل وسأل عليها وعرف انها في اجتماع ودخل يستناها على مكتبها، شوية وكاميليا خرجت من الاجتماع واتفاجأت بزين
كاميليا: زين؟!
زين: كلمتك قبل ما اجي بس ماردتيش
كاميليا: اسفة والله بس كنت في اجتماع
زين: ولا يهمك، انا كنت جاي اسألك عن حاجة
كاميليا: ايه هي؟
زين: تعرفي ايه حصل بين يذيد وندى؟
كاميليا: هي في حاجة حصلت ولا ايه؟
زين: ايوا ويذيد اخد مفتاح شقة العجمي وهيكون هناك اسبوع
كاميليا بإستغراب: ليه كل دا؟!
زين: مش عارف بس عشان خاطري افهمي من ندى حصل ايه
كاميليا: حاضر هتكلم معاها النهاردة واعرف ايه اللي حصل
زين: ماشي، يلا انا همشي
كاميليا: ماشي
زين مشي وراح المكتب
ليلى وندى خلصوا يومهم وخلاص هيروحوا ومي جات وقفت معاهم
مي: يلا عشان اوصلكم معايا
ليلى: ايوا بقى
ندى: مش عاوزين نتعبك
مي: تعب ايه انا كدا كدا مروحة يلا
ندى وليلى ركبوا مع مي وندى طول الطريق سرحانة وبتفكر في يذيد، بعد شوية ندى وصلت وطلعت اوضتها وكانت عاوزة تكلم هشام وتحكيله عن اللي حصل بس كانت خايفة من ردة فعله فبعتتله رسالة مكتوبة وحكت فيها كل اللي حصل وهشام قرأ في ثانية ورن عليها وهي خايفة ترد وفتحت المكالمة وساكتة
هشام بعصبية: ردي
ندى بخوف: انا عارفة اني غلطانة بس والله اسفة
هشام: ليه سمحتيله يعمل كدا تاني
ندى: والله ياهشام ما كنت اعرف انه هيعمل كدا
هشام بعصبية: كل مرة بتقولي كدا وباردوا مافيش فايدة
ندى عيطت: ما انا رديت على اللي هو عمله
هشام: وتفتكري القلم اللي ضربتهوله دا صح؟
ندى: ايوا صح عشان يستاهل
هشام: تمام ياندى اقفلي الوقتي
هشام قفل معاها ورن على يذيد بس تليفونه كان مقفول، ورن على زين
هشام: اذيك يازين؟
زين: الحمدلله عامل ايه يا إتش
هشام: تمام الحمدلله، بقولك تليفون يذيد مقفول ليه
زين: مش عارف، انت كنت عاوزه؟
هشام: اه كنت برن عليه ولاقيته قافل التليفون لما تشوفه قوله اني عاوزه
زين: يذيد في اسكندرية ياهشام لسة ماشي النهاردة ومش هيجي غير بعد اسبوع
هشام بإستغراب: اسبوع؟!
زين: ايوا
هشام: خلاص ماشي يازين انا هاجي بكرة ان شآء الله وهحاول اكلمه
زين: خلاص ماشي
هشام قفل مع زين وإتأكد ان يذيد أخد موقف من ندى بسبب اللي هي عملته
كاميليا خلصت شغلها ورجعت البيت وشافت ندى وقعدت جمبها
كاميليا: القمر بتاعي ماله؟
ندى ابتسمت: مافيش
كاميليا: يعني مش عاوزة تحكيلي حاجة؟
ندى بصتلها وسكتت
كاميليا: طب يذيد عامل ايه؟
ندى بعصبية: وانا مالي وماله
كاميليا لسة هتتكلم بس تليفونها رن وكان زين وردت وفتحت الاسبيكر
زين: روحتي؟
كاميليا: ايوا
زين: طب سألتي ندى؟
كاميليا بتبص لندى: ايوا وقال مافيش
زين: مافيش ازاي ويذيد سافر اسكندرية ومش هيرجع غير بعد اسبوع وكمان قافل تليفونه
ندى سمعت كلام زين ومكانتش تتوقع ان يذيد هيتصرف كدا
كاميليا: انا هحاول اعرف في ايه يازين بس هي يارب تقول
زين: فهميها ياكاميليا ان يذيد بيحبها بجد وانا اول مرة اشوف اخويا بيحب حد كدا
كاميليا: حاضر
كاميليا قفلت مع زين ومستنية ندى تتكلم، ندى بتعيط من غير صوت
كاميليا: بتعيطي ليه بس
ندى: عشان انا السبب في سفره
كاميليا: طب ايه اللي حصل احكيلي
ندى حكتلها اللي حصل وبتحكي وصوت عياطها بيعلى
كاميليا: طب اهدي
ندى: عشان هو زعل مني وسافر
كاميليا: هو غلط وانتي كمان غلطي ليه اتصرفتي كدا
ندى يإنهيار: معرفش معرفش
كاميليا بغضب: هسألك سؤال وتردي عليا بكل صراحة مفهوم
ندى بصتلها: حاضر
كاميليا: انتي بتحبي يذيد؟
ندى بصتلها وسكتت
كاميليا بعصبية: ردي ياندى انتي بتحبي يذيد؟
ندى: ايوا
كاميليا بهدوء: طب ليه بتتصرفي معاه كدا؟
ندى: معرفش انا من يوم ماعرفته وانا بتخانق معاه وانتي عارفاني انا مش بحب الزعل وبحب الهزار والضحك
كاميليا: طب ناوية على إيه دلوقتي
ندى: مافيش
كاميليا: ندى يذيد مشي عشان انتي ضربتيه بالقلم يذيد باين انه بيحبك بجد وزين قال كدا وانتي سمعتيه، الراجل كرامته بتتهان لما بنت تضربه بالقلم حتى لو غلطان
ندى: يعني كنتي عاوزاني اعدي اللي حصل كدا؟
كاميليا: انتي فعلا عدتيه ياندى وطلعتي وقتها لكن قعدتي طول اليوم تقولي ازاي دا يحصل وتاني يوم رديتي عليه
ندى قعدت تعيط جامد: طب اعمل ايه؟
كاميليا: لازم تعترفي بمشاعرك تجاه يذيد
ندى: لا مش هقوله حاجة
كاميليا: انتي حرة ياندى وطلاما مش هتقولي حاجة يبقى تقلعي الخاتم اللي اشتراه هدية ليكي ومن يومها وانتي لبساه
كاميليا سابتها ودخلت تاخد دش عشان شوية وهيروحوا لصافي
يذيد قاعد ادام البحر مخنوق ومضايق وبيفتكر اللي حصل من ندى وزعلان اوي وبيكلم البحر: انا عارف ان اللي عملته غلط بس انا بحبها، هي ليه مش شايفاني ليه بتحاول تخبي مشاعرها عني ليه مش عاوزة تفرحني لو بكلمة واحدة
يذيد فضل يتكلم مع البحر وشوية وقام يتمشى لحد ماوصل الشقة
في المساء البنات جهزت عشان يروحوا لصافي عشان عادل رايح هو وأهله
نور: يلا هنتأخر
كاميليا: خلاص انا جهزت
نور: فين ندى؟
كاميليا: ندى جوا ومش هتيجي معانا
نور: ليه؟
كاميليا: عادي ملهاش مزاج يلا احنا
كاميليا ونور نزلوا واشتروا هدية لصافي ووصلوا عندها وكانت فرحانة بيهم اوي والمفاجأة اللي كانت صافي ومامتها مايتوقعهاش ان جدها وابن عمها وصلوا عندهم، صافي فتحت ليهم الباب ودخلتهم ومامتها كانت في المطبخ
منى: عادل واهله وصلوا؟
صافي بتوتر: لا لسة
منى: امال مين اللي في الصالون؟
صافي بصت لكاميليا عشان تتكلم هي وفعلا اتكلمت: دا جد صافي وابن عمها
منى بصدمة: مين؟!
صافي: جدي علي وشريف
منى: وايه اللي جابهم الوقتي؟
كاميليا: ادخلي ليهم ياطنط وبعدين دي حاجة كويسة انهم جم الوقتي
منى: مش عاوزاهم يحضروا حاجة
نور بهدوء: ادخلي بس ياطنط ونشوف جايين ليه
منى سمعت كلامهم ودخلت الصالون ووقفت ادام علي وشريف
منى: منورين
شريف وقف بإحترام: نورك ياطنط
منى واقفة ادام علي اللي قاعد يبصلها: جاي ليه؟
علي: جاي لحفيدتي مش ليكي
منى: هو انت تعرف ايه عن حفيدتك عشان تيجي تشوفها
شريف بيحاول يهديهم: ياطنط جدي جاي يشوف صافي مش يأذيها
منى بعصبية وصوت عالي: ومين قالك اني اصلا هسمحله يأذيها
علي بغضب: انا مش هسيبهالك تربيها
منى ضحكت بسخرية: انت جاي بعد ما بقى عمرها 24 سنة وتقول مش هسيهالك تربيها
علي وقف وبكل عصبية: انا لو سمحتلك بس تربيها السنين اللي فاتت فدا بمزاجي لكن دلوقتي حفيدتي تكون معايا
في الوقت دا صافي دخلت واتكلمت بكل حزن
صافي: ومين قال لحضرتك ان هاجي معاك واسيب امي؟ امي اللي ربتني 24 سنة احسن تربية وعلمتني احسن تعليم دلوقتي حضرتك جاي تدور عليا وتقول حفيدتك لا حضرتك غلطان
شريف: الكلام مش كدا ياصافي
صافي دموعها نزلت: لا كدا عشان حضرته جاي يتكلم ويزعق
في الوقت دا جرس الباب رن وكان عادل واهله ودخلوا وعادل عشان عارف جد صافي قلق اول ماشافه
عادل واقف هو واهله ومنى بتعرفهم ببعض رغم عصبيتها
علي بهدوء: اهلا بيكم
صفية (ام عادل): اهلا بحضرتك
عبدالله (ابو علي): اهلا بحضرتك
منى: اتفضلوا اقعدوا واقفين ليه
عادل وأهله قعدوا وصافي كان باين عليها العياط وعادل بيبصلها وبيحاول يفهم في ايه
عبدالله: احنا جايين عشان نطلب ايد الانسة صافي لإبننا عادل
علي اتفاجئ ان النهاردة جاي عريس لحفيدته
شريف بإبتسامة: واحنا موافقين
منى بتبصلوا بإستغراب وشريف بيبص لجده عشان يتكلم
علي: احنا موافقين
عادل فرح اوي وبص لصافي اللي وشها احمر من الكسوف رغم اثار الدموع اللي على وشها
كاميليا دخلت بالعصير وزرغدت ونور دخلت وراها
نور بفرحة: مبروك ياقلبي
صافي: الله يبارك فيكي ياحبيبتي
كاميليا: يلا بقى نقرأ الفاتحة كلنا
الكل بيقرأ الفاتحة وعادل كان جايب خاتم فضة لصافي بمناسبة قراية الفاتحة ولبسهولها وكانت طايرة من الفرحة، والبنات فرحانين بفرحتها
علي: حفلة الخطوبة هتكون في القصر عندي
منى بعناد: لا هتكون هنا
علي بعناد اكبر: انا قولت هتكون في القصر عندي
صافي وقفت في النص: بااااااااس دي حفلة خطوبتي وانا حرة اعملها فين
عادل: ياجماعة انا وصافي اللي نحدد حفلة خطوبتنا تكون فين
شريف: عادل عنده حق
علي: طب هتكون فين؟
عادل: هنحتفل بيها مع نور وهاني
نور بفرحة: ايوا بقى
عادل ابتسم: انا وهاني متفقين وعشان صافي ونور اصحاب يبقى نحتفل في يوم واحد لينا
علي: ايوا هتكون فين يعني؟
عادل: هتكون في قاعة كبيرة ان شآء الله ومن بكرة انا وصافي هننزل نجيب الشبكة وهنروح مع هاني ونور نحجز القاعة
علي: بس انا اللي ادفع تمن الحجز
عبدالله: حضرتك جدها واللي تشوفه
منى: لا انا اللي هدفع الحجز
علي: دي فلوسها وفلوس ابوها وانا اللي هدفع
صافي بعصبية: بصوا عشان انا زهقت وكفاية خناق اولا القاعة هتكون بيني وبين نور ثانيا بقى انا معايا فلوس لا هقولك ياماما هاتي فلوس ولا هقولك ياعلي باشا هات فلوس
علي بحزن: يعني مش هاين عليكي تقولي جدو
صافي حست بنبرة الحزن اللي في صوت جدها: تصرفات حضرتك اللي خلتني اقول كدا
علي بص لكل اللي واقفين: حددوا المعاد اللي تحبوه واتمنى تعرفوني هيكون امتى
علي سابهم ومشي وشريف حزين عشان جده ووقف ادام بنت عمه
شريف: محدش يعرف جدك أدي وصدقيني طلاما علي المصري جه هنا ولحد عندك يبقى انتي بقيتي حاجة كبيرة اوي عنده
شريف سابهم ونزل ورا جده وصافي قعدت زعلانة
عبدالله: مهما كان الخلاف اللي بينكم مكانش ينفع الكلام يوصل لكدا
عادل: حضرتك يابابا ماشفتوش يوم مارحتله انا وصافي اتعامل معانا بقسوة
صفية: ذي ماقال ابن عمك ياصافي ان جدك بيحبك
صافي بدموع: انا زعلانة اني زعلته
عبدالله: تقدري تصالحيه
منى: حضرتك تقصد ايه؟
عبدالله كان لسة هيرد بس كاميليا اتكلمت: بعد اذن حضرتك ياعمي انا اللي هقول، عمو يقصد ياطنط ان صافي تروح تصالح جدها هو بيحاول يكون قاسي بس والله باين انه طيب اوووي
منى: هو فعلا جواه طيبة بيحاول يخبيها عشان تفضل هيبته بين الناس والكل يخاف منه
عادل: تسمحيلي يا طنط اخد صافي بكرة قبل مانشتري اي حاجة نروحله الأول
منى بصت لبنتها اللي بتبصلها اوي وكأنها نفسها تروح: ماشي موافقة
صافي جريت عليها حضنتها: ياحبيبتي ياماما
منى بحب: انا عارفة انك عاوزاه جمبك يابنتي وانا مش همنعك عنهم
ندى قاعدة في اوضتها بتعيط وبترن على تليفون يذيد وهو مقفول، كاميليا ونور رجعوا البيت وحكوا لندى اللي حصل بس هي كانت بتسمعهم وهي سرحانة ومش معاهم خالص
زين بيحاول يوصل ليذيد ومافيش فايدة وعاوز يروحله يطمن عليه وراح لخالد اوضته
زين خبط ودخل: صاحي؟
خالد: اه تعالى
زين دخل وقعد ادامه: بقولك ايه تيجي معايا اسكندرية
خالد: الوقتي؟!
زين: ايوا
خالد: في ايه؟
زين: نروح ليذيد
خالد: حصل حاجة؟
زين: ايه ياخالد نازل اسئلة كدا ليه
خالد: ياعم مش بفهم
زين: طب هتيجي معايا ولا لا
خالد: جاي يعني هسيبك تروح لوحدك
زين: طب يلا البس على ما البس انا كمان
خالد: ماشي
بدأوا يلبسوا وخالد كلم هالة وعرفها انه نازل اسكندرية، زين وخالد في طريقهم لإسكندرية وبعد ساعات وصلوا عند يذيد وخبطوا كتير لكن مافتحش وعرفوا من بواب العمارة انه مش في الشقة ونزل من شوية
زين: هيكون راح فين بس
خالد: انت نسيت قعدته المفضلة عالبحر
زين: بس الجو برد الوقتي
خالد: وايه الجديد ماهو على طول كدا يلا نروح نشوفه
زين وخالد راحوا مكان ما بيقعد وفعلا كان هناك والجو كان هوا وسقعة
خالد: كنت متأكد انك هنا
يذيد اتفاجئ بيهم: انتوا جيتوا امتى؟!
زين: لسة واصلين
يذيد: ايه اللي جابكم؟
خالد: ايه ياعم يذيد ماكنتش عاوز تشوفنا ولا ايه
يذيد: انا عاوز اقعد لوحدي
زين قعد جمبه: ليه يايذيد حصل ايه؟
يذيد: مش عاوز اتكلم ولا احكي انا عاوز اكون لوحدي وبس
خالد قعد جمبه من الجهة التانية: واحنا ماينفعش نسيبك لوحدك
زين لسة هيتكلم بس تليفونه رن وكانت ندى: دي ندى اللي بترن
يذيد بعصبية: قولتلك ماتجيبش سيرتها ادامي
زين صمم انه يرد عليها ويفتح الاسبيكر: ايوا ياندى
ندى بصوت معيط: كلمت يذيد؟
زين بص ليذيد: لا ياندى لسة قافل تليفونه
ندى بإنهيار: انا برن عليه من زمان وتليفونه مقفول وعرفت من كاميليا اه سافر اسكندرية
زين: ايوا هو راح يقعد في شقتنا هناك اسبوع
ندى: عشان خاطري يازين روحله واطلب منه يكلمني
زين بيبص ليذيد عشان يكلمها وهو مصمم على قراره: حاضر ياندى هروحله وانا في طريقي لهناك
ندى: بالله عليك خليه يكلمني لو حتى من عندك
زين: حاضر
زين قفل مع ندى وبص ليذيد
يذيد بغضب: اقسم بالله لو فتحت سيرتها هسيبكم واقوم
خالد بهدوء: يذيد احنا لحد دلوقتي مانعرفش ايه اللي حصل
يذيد: مش لازم تعرفوا
زين بغضب: واحنا من امتى بنخبي على بعض يايذيد
يذيد قام: انا هسيبكم واقوم
خالد بيقعده تاني: ياعم اقعد نتكلم
يذيد بكل وجع وحزن: انا مش عاوز اتكلم مش عاوز اكون ضعيف سبوني وامشوا
زين بصله اوي كأنه بيحاول يقرأ اللي في عنيه ويذيد بيهرب من نظرات اخوه عشان عارف ان زين هيكشفه
زين بشك: عارف اخر مرة شفتك بالحزن دا كان امتى؟
يذيد بصله وساكت وخالد اتكلم: يوم وفاة مامتكم؟
زين: لا يوم ما بابا اتخانق مع يذيد لما ماسمعش كلام بابا وركب الحصان ووقع من عليه فاكر ياخالد بابا ساعتها عمل ايه؟
خالد: ايوا طبعا فاكر لان الموضوع دا من سنتين بس
زين: طب قولي ايه حصل
خالد: ساعتها عمي ضرب يذيد بالقلم وبعدها يذيد بعد عننا وعن البيت شهر كامل عشان كرامته وانه ازاي ينضرب بالشكل دا
زين: تمام اوي كدا…..زين بص ليذيذ: تحب تحكي ايه اللي حصل ولا اخمن انا يا يذيد
يذيد سكت وبص في الأرض ومعرفش يرد على زين
خالد: انت خمنت ايه يازين؟
زين بص ليذيد: لا انا مش هقول خمنت ايه انا هسيب يذيد يحكي
يذيد عارف ان زين مش هيسيبه غير لما يحكي وبدأ يحكي اللي حصل وزين وخالد واقفين يسمعوه بإهتمام
يذيد: دا كل اللي حصل
زين بعصبية: لأول مرة اشوفك بالضعف دا
يذيد بغضب: عشان حبيت يازين
خالد: الحب مش بيضعف صاحبه يايذيد
يذيد بحزن: لا بيضعفه لو كان طرف من الطرفين مش بيحب التاني
زين: من كلامك ان ندى بتحبك يايذيد
يذيد بوجع: وهي وجعتني واهانت كرامتي
خالد: بس انت غلط يايذيد
يذيد: انا عارف اني غلطان بس انا مشيت ورا قلبي انا حبيتها وبجد مش عاوزها تكون بعيدة عني كدا انا عاوزها قريبة
زين: طب دلوقتي هتعمل ايه؟
يذيد بحزن: هعتبر نفسي ماشفتهاش ومعاملتش معاها هتكون في حدود التعليم وبس يازين
خالد: هتقدر؟
يذيد: ايوا هقدر ياخالد وهتشوف
زين: طب يلا ارجع معانا
يذيد: لا يازين انا هقعد هنا شوية لان بجد محتاج اكون لوحدي ويوم ماهرجع هرجع يذيد واحد تاني اقوى من الأول انا كنت غلطان لما فكرا احب عيلة لسة مش فاهمة حاجة
خالد: هتتحل يايذيد
يذيد: انا مش عاوزها تتحل خلاص انا هنسى اني قابلتها وعرفتها
زين عارف ان يذيد طلاما عمل كدا يبقى ندى هتتعب اوي لحد ماتكسبه تاني او يمكن تكون باللي حصل خسرته للأبد
زين: طب يلا نروح الشقة الجو برد اوي
يذيد: ماشي
زين وخالد اخدوا يذيد وراحوا الشقة وناموا لحد الصبح، زين صحي تاني يوم على رنة كاميليا ورد عليها
زين: صباح الخير
كاميليا: صباح النور يازين انت عند يذيد؟
زين: ايوا
كاميليا: طب اتكلمتوا؟
زين قام من السرير وخرج بارة الاوضة: ايوا ياكاميليا
كاميليا: طب ايه؟
زين بحزن: ندى للأسف خسرت يذيد
كاميليا: ازاي؟
زين حكالها عن اللي قالوا يذيد وعن احساسه وعن الوجع اللي جواه
كاميليا: بس هي بتحبه
زين: للأسف دا مش هيفيد بحاجة يذيد موجوع وهي باللي عملته خسرته
كاميليا بعصبية: ماهو غلطان
زين: عارف انه غلطان بس ليه اتصرفت كدا رغم انها استنت لتاني يوم
كاميليا: هي فكرت بغباء طب هنتصرف معاهم ازاي؟
زين: بصي احنا مش هنعرف نعملهم حاجة عشان يذيد مانع اي حد يتكلم معاه في الموضوع او يسمع حتى اسمها وفي الحالة دي يا اما ندى هتتعب لحد ماتكسب قلبه تاني يا اما تكون خسرته للأبد
كاميليا بتبص لندى اللي سامعة كل حرف وبتعيط: خلاص يازين اقفل دلوقتي
زين قفل معاها وقعد زعلان على حال أخوه وشوية وخالد صحي
خالد: انت صحيت امتى؟
زين: من شوية
خالد قعد: بقولك ايه انا جعان
زين: وانا كمان
خالد: طب تعالى ننزل نجيب فطار على مايذيد يصحى
زين: ماشي يلا
عند ندى وكاميليا، ندى بتعيط وكاميليا بتهديها
كاميليا: اهدي ياندى
ندى: اهدى ازاي وزين بيقولك ان خلاص خسرته
كاميليا: زين قال كمان ان ممكن تكسبي قلب يذيد تاني بس هتتعبي شوية
ندى: مش مهم بس اكسب قلبه تاني
كاميليا: يبقى قربي منه ياندى واستحملي منه اي حاجة
ندى: حاضر بس هو يرجع
كاميليا: هيرجع ياندى لان خالد طلب من هالة انه هيروح يتقدم ليها بعد يومين واحتمال كبير هشام يعمل خطوبته على ليلى مع نور وهاني وصافي وعادل
ندى: يبقى لازم اكون اجمل بنت في اليوم دا
كاميليا: ان شآء الله
عدا يومين ويذيد لسة في اسكندرية وهشام رجع وقرر انه يروح يتقدم لليلى وصفي وافق وقرأوا الفاتحة وقرروا ان الخطوبة هتكون مع هاني ونور وعادل وصافي، خالد طلب يتقدم لهالة وقرأوا الفاتحة وصمموا ان خطوبتهم هتكون مع الباقي، صافي ظبطت امورها مع جدها وقربت منه وبيحاول يعوضها عن اللي فات اما الاستاذ كمال بقى كل يوم بيكلم حياة بحجة ابنها وهي عارفة ومتأكدة انه عامل ابنها حجة، ندى مارحتش الكلية اليومين دول ومضايقة وبتحاول توصل ليذيد مش عارفة ومضايقة اوي، اما زين مشغول مع خالد في ترتيبات الخطوبة وكاميليا مع نور وصافي وهالة وبيرتبوا للخطوبة، مراد وعزيز اتفقوا مع المهندس عشان يظبط الاوض في الڤيلا الجديدة وكلها اسبوعين وينقلوا فيها
ندى قاعدة في اوضتها زعلانة ومضايقة وهشام خبط ودخل
هشام: قولت اجي اشوفك طلاما انتي قاعدة لوحدك ومش عاوزة حد يتكلم معاكي
ندى: تعالى يا إتش
هشام قعد جمبها: حبيبة إتش مالها
ندى بصتله: وحشني
هشام بغضب: بت اتلمي
ندى ضحكت: ماخلاص بقى
هشام ضحك: ايوا كدا اضحكي، المهم انا رايح اسكندرية
ندى: بجد؟
هشام: ايوا ياندى
ندى: خدني معاك اروحله
هشام: لا ياندى انا رايحله عشان لازم يحضر الخطوبة مش عشان يكلمك
ندى بدموع: بس انا عاوزاه يكلمني
هشام: هحاول اظبط الموضوع
هشام ساب ندى ومشي وهي مضايقة اوي وقعدت تعيط، هشام راح لزين واخده وسافرا اسكندرية ليذيد وكالعادة قاعد عالبحر وراحوا قعدوا جمبه
هشام: الاستاذ اللي قافل تليفونه
يذيد ابتسم: حمدلله على السلامة
هشام: الله يسلمك
زين: هشام جه عشان يرجعك معانا
يذيد: انا كدا مرتاح
هشام: وبالنسبة لخطوبتي انا وليلى؟
يذيد: هكلمها وابارك ليها وخلاص
هشام بغضب: والله العظيم لو ماحضرت لهيكون اخر تعامل مابنا
يذيد: مش هقدر احضر
زين بعصبية: انت بتهرب يايذيد
يذيد بعصبية اكبر: انا مش بهرب ولا عمري ههرب
هشام قام: يلا يازين احنا غلطنا اننا جينا
زين مشي مع هشام وسابوا يذيد لوحده مضايق ومخنوق
عدا كام يوم والنهاردة يوم الخطوبة والكل مشغول وبيجهز والبنات مع بعض في البيوتي سنتر
كاميليا: يلا ياندى عشان تعملي شعرك
ندى: حاضر
ندى اختارت دريس لتحت الركبة بشوية لونه بمبى وفيه ورد احمر ضيق على جسمها ولبست جزمة كعب حمرا وفردت شعرها وسابته نازل، اما كاميليا فلبست دريس طويل لونه اسود وفيه نجوم دهبي ضيق من على الصدر ونازل واسع ولبست جزمة كعب دهبي وسابت شعرها كالعادة على ضهرها
اما نور فكانت لابسة فستان خطوبة لونه ازرق جميل ضيق ونازل بوسع من الوسط، بالنسبة لصافي لبست فستان لونه بنفسج جمييل اوي عليها، وليلى لبست دريس لونه احمر ضيق على جسمها وسابت شعرها ولبست جزمة كعب فضي وهالة لبست فستان كاشمير وجميل جدا عليها
الشباب مع بعضهم بيجهزوا والعرسان لبسوا بدل كحلي بقمصان بيضا
هشام: باردو مجاش؟
زين: للأسف لا
خالد: اهدوا واكيد هيجي
زين: ياريت
الشباب خلاص جهزت وخرجوا عشان يروحوا يجيبوا البنات واتفاجئوا بيذيد
زين: كنت متأكد انك هتيجي
يذيد ابتسم: مكانش ينفع ما اجيش
هشام: كويس انك جيت
يذيد ضحك: خلاص بقى يا إتش
يذيد لابس بليزر لونه نبيتي وتحته قميص لونه ابيض وبنطلون كحلي، كل واحد فيهم ركب عربيته واتحركوا للبنات، هشام كلم ندى وعرفها ان يذيد جه
ندى بتوتر: انا قلقانة
ليلى: اهدي بقى وكله هيكون تمام
الشباب وصلوا بارة وكل عريس دخل اخد عروسته وكاميليا وندى خرجوا سوا، يذيد قاعد في عربيته ما اتحركش منها
زين: تعالي معايا ياكاميليا…...وبص لندى اللي بتبص على يذيد: يلا ياندى
ندى: حاضر
زين اخد ندى وكاميليا سوا معاه ويذيد كانت مي جمبه، شوية ووصلوا الفندق اللي فيه الخطوبة والكل دخل وندى عنيها ما اتشالتش من على يذيد وعاوزة تتكلم معاه
ندى: كوكي
كاميليا: ها
ندى: عاوزة اتكلم معاه
كاميليا بصت على يذيد اللي قاعد جمب مي وبيضحك: هتقدري؟
ندى: ايوا
كاميليا: ماشي اتكلمي معاه
نيجي لزين واقف يبص على كاميليا من بعيد وسرحان فيها وهي شافته وبصت في الأرض وهاجر جات وقفت جمبه
هاجر: واقف لوحدك ليه؟
زين: ابدا ما الاساتذة سبوني وخطبوا
هاجر: عقبالك
زين بص على كاميليا: يارب وعقبالك انتي كمان
هاجر بصتله: يارب بس معاك
زين بصلها اوي: تاني ياهاجر
هاجر: غصب عني على فكرة
زين: مش وقته الكلام دا عن اذنك عشان اشوف الشباب
زين مشي من جمبها وراح قعد جمب اخوه
زين: انت ياعم
يذيد: ها
زين: مشالتش عنيها من عليك
يذيد بعصبية: زين
زين: بلا زين بلا بتاع بقى انت حر
زين بص لمي: ابقي عقلي ابن خالك
زين سابهم وقام وراح وقف جمب كاميليا
زين: ايه الجمال دا
كاميليا بكسوف: شكرا
زين: بقولك ايه تيجي نتجنن
كاميليا: ازاي؟!
زين: نرقص اللي قاعدين دول
كاميليا ضحكت: تصدق فكرة عشان الجو كدا ممل
زين مسك ايديها: طب يلا
زين اخدها وراحوا عند الدي چي وشغلوا مهرجان والعرسان اتفاجئوا وقاموا يرقصوا
مي قاعدة جمب يذيد وعاوزة تقوم
مي: يلا نقوم معاهم
يذيد: لا انا مخنوق وهخرج اقف بارة شوية
مي: امممم براحتك
مي سابته وقامت وهو خرج وندى شافته وخرجت وراه وكانت خايفة اوي من الكلام معاه بس هي هتستحمل اللي هيحصل، يذيد واقف وضهره ليها وهي مترددة اوي وخبطت دراعه بخفة وهو دور وشه ليها وما اتكلمش خالص
ندى بصت في الأرض واتكلمت بحزن: انا اسفة
يذيد لسة هيمشي من ادامها هي مسكت ايده: ممكن ماتمشيش عاوزة اتكلم معاك
يذيد: خير؟!
ندى بتوتر: ممكن تقبل أسفي
يذيد: اظن ان دي حاجة ماتخصكيش
ندى بصتله: لا تخصني عشان انا زعلتك
يذيد: عادي فكك
يذيد باردوا مصمم يمشي وهي وقفته تاني
يذيد بعصبية: عاوزة ايه؟
ندى: انا هستحمل منك أي حاجة عشان عارفة اني غلطانة في حقك
يذيد: تمام حاجة تانية؟
ندى بتوتر: انا عارفة انك هتقبل اعتذاري
يذيد ضحك بسخرية: وجبتي الثقة دي منين؟
ندى: من قلبي
يذيد سكت وما اتكلمش خالص
ندى بكسوف: انا عارفة ان اللي حصل منك دا عشان انت بتحـ….
يذيد حط ايده على بوقها: ماتكمليش عشان دا مش صحيح، ولو كان عقلك صورك كدا تبقي غلطانة
ندى مكانتش تتوقع رده بس بتحاول تستحمل: بس مش عقلي اللي صورلي كدا، هشام اللي قالي كدا
يذيد ضحك بسخرية: معلش اصل إتش بيفهم غلط، وبلاش تسمعي كلامه غير لما تبقي تتأكدي بنفسك الأول
ندى ماسكة دموعها بالعافية: يعني إيه؟
يذيد ببرود: يعني ماتخليش عقلك يروح لبعيد ويصورلك حاجات ملهاش وجود
ندى دموعها خانتها ونزلت ووقفت مكانها ما اتكلمتش ولا قادرة ترد على كلامه، يذيد سابها ودخل جوا وهي فضلت واقفة مكانها مش قادرة تتحرك وسيف خرج وشافها واقفة لوحدها وقرب منها ولاحظ دموعها
سيف بقلق: ندى انتي كويسة؟
ندى بدموع وتعب: ممكن تسندني عشان مش قادرة اتحرك
سيف سندها وقلق اوي: في ايه مالك؟
ندى: مافيش انا بس مش قادرة اتحرك اسندني لحد ما ادخل بس جوا
سيف: حاضر
سيف ساندها وهي بتحرك رجليها بالعافية
سيف: ندى اشيلك؟
ندى: لا انا كويسة دخلني بس
سيف دخلها وهشام كان بيرقص وشافها جري عليها بقلق
هشام: في ايه؟
ندى بتعب: مش قادرة اقف
هشام بصلها اوي: ايه اللي حصل
سيف: انا خرجت لاقيتها واقفة بارة وبتعيط ومش قادرة تتحرك
هشام مسك ايديها وسندها واتكلم بغضب: ايه اللي حصل ياندى
ندى بدموع: مافيش يا إتش انا كويسة
هشام بيبص على يذيد ورجع بص لندى: اتكلمتي معاه؟
ندى ابتسمت من وسط دموعها: لا ياحبيبي انا بس اللي افتكرت اللي حصل ممكن بقى تقعدني
هشام شالها وكل دا تحت انظار يذيد وقعدها جمب مامتها
عفاف: في ايه؟
هشام: مافيش هي مش قادرة تمشي
سهام: حصل ايه زعلك ياندى؟
ندى بإبتسامة: محصلش حاجة
كاميليا جات عليهم: في ايه ياندى؟
ندى بتبصلها وكأنها بتقولها اوعي تتكلمي: انا كويسة
هشام بغضب: الهانم مش قادرة تقف واكيد دا سبب حاجة زعلتها
كاميليا: روح انت ياهشام لليلى ماينفعش تسيبها كدا وانا هشوف مالها
هشام راح لخطيبته وكاميليا قعدت جمب ندى
كاميليا: حصل ايه؟
ندى بصوت بيطلع بالعافية: عشان خاطري انا مش قادرة اتكلم بلاش تضغطي عليا
كاميليا بتبص ليذيد اللي دور وشه بسرعة بعيد عنهم: ايه اللي حصل ياندى وصلك للحالة دي انتي بقالك سنين ماوصلتيش للحالة دي
ندى بتعب: خلاص ياكاميليا بقى
كاميليا: ماشي ياندى لما نروح
هشام طول الحفلة قلقان على ندى ونزل من على الاستيدچ وراح عندها
هشام: مش هنرقص سوا؟
ندى ابتسمت: حظك كدا بقى ارقص مع ليلى
هشام قعد على ركبته: اقسم بالله ماهتنامي الليلادي غير لما اعرف حصل ايه
هشام سابها ورجع مكانه وهي عارفة ومتأكدة انه مش هيسكت، اما يذيد فقاعد مستغرب اللي بيحصل حواليه ومستغرب اكتر حالة ندى
مي: يذيد
يذيد: نعم
مي: بتحبها؟
يذيد: لا
مي: كداب
يذيد بعصبية: احسنلك ماتتكلميش
الحفلة خلصت والكل هيرجع بيته، هشام خرج بعروسته وركبها العربية ودخل جوا تاني شال ندى وركبها معاه في عربيته
ليلى بقلق: مالك ياندى؟
ندى بإبتسامة: مافيش يالولا انا كويسة
هشام ساق العربية واتحرك بيهم، اما زين فلسة واقف مع الباقي وكاميليا وباباها وعمها لسة واقفين
زين: يلا
كاميليا: على فين؟
زين: هوصلك ذي ماجيتي معايا
كاميليا: هرجع مع بابا وماما
زين: براحتك هكلمك الصبح
زين مشي ويذيد كمان اخد مي ومشيوا وكل عريس اخد خطيبته ومشيوا والكل رجع بيته
هشام وصل ليلى واخد ندى ورجعوا البيت وشالها لحد اوضتها وقعدها على سريرها وقاعد ادامها
هشام: احكي
ندى بتعب: والله ماهقدر احكي
هشام: لآخر مرة هسألك اتكلمتي معاه؟
ندى بصت في الأرض وسكتت
هشام: تمام نامي
هشام سابها وخرج وهي لسة قاعدة مكانها لانها مش قادرة تتحرك وشوية وكاميليا دخلتلها
كاميليا: هتحكي؟
ندى: صدقوني مش هقدر ياكاميليا
كاميليا بحزن عليها: لازم تقفي على رجلك كدا غلط
ندى: مش قادرة والله ساعديني عشان انام وبكرة الصبح تساعديني امشي شوية
كاميليا: لازم نروح للدكتور ياندى
ندى: حاضر بس محتاجة انام
مراد دخل عليهم وواقف قلقان على بنته: بكرة الصبح هنروح للدكتور
ندى بإبتسامة: يابابا انا كويسة وبكرة هرتاح والله
مراد: لا الدكتور قال لو الحالة دي رجعت تاني لازم نروحله وخصوصا ان بقالها سنتين مش بتجيلك
ندى: يابابا انا بس افتكرت حاجة ضايقتني فحصل كدا
مراد قعد جمبها واخدها في حضنه: ربنا يحميكي يابنتي ويبعد عنك اي حاجة وحشة يارب
ندى: يارب
مراد لكاميليا: ساعديها عشان تنام ياكاميليا
كاميليا: حاضر يابابا
تاني يوم الصبح في ڤيلا صفي الكل قاعد عالفطار وخصوصا ان النهاردة اجازة
خالد: هتخرجي انتي وهشام يا ليلى؟
ليلى: لا هشام كلمني وقالي انه مش هيقدر يجي عشان رايح مع ندى عند الدكتور
في اللحظة دي يذيد كان بيشرب وشرق وقعد يكح
زين: هي مالها؟
ليلى بحزن: مش عارفة هي امبارح تعبت ومقدرتش تمشي عشان كدا هشام شالها
مي: انتي مش غيرانة عليه؟
ليلى ضحكت: انا اغيير عليه من اي حد الا من ندى لانها اخته في الرضاعة ومتربية على ايده
صفي: جدعة يالولا
ناريمان: لما تطمني عليها ابقي طمنيني
ليلى: حاضر ياماما
يذيد سابهم وخرج الجنينة وزين وخالد خرجوا وراه
خالد: مش ناوي تقولنا حصل ايه امبارح؟
يذيد: انتوا ليه مصممين ان في حاجة حصلت؟
زين: امال تقدر تفهمني الحالة اللي فيها ندى دي من ايه؟
يذيد: معرفش يازين
زين لسة هيتكلم بس تليفونه رن وكانت كاميليا ورد وفتح الاسبيكر عشان عاوز يسألها ويسمع يذيد
زين: صباح الخير
كاميليا: صباح النور يازين
زين: عاملة ايه؟
كاميليا بحزن: مش كويسة خالص
زين بقلق: في ايه؟
كاميليا: ندى اختي تعبانة شوية
زين بص ليذيد واتكلم: هو ايه اللي حصل؟
كاميليا: مش عارفة وهي مش قادرة تحكي بس كل اللي متأكدين منه ان حصل حاجة زعلتها لان ندى الحالة اللي هي فيها دي بسبب الزعل
زين: هي حصلت ليها قبل كدا؟
كاميليا: ايوا كانت بتحصل دايما بس بقالها سنتين مش بتحصل والدكتور طمنا بس قالنا لو حصلت تاني نروحله واحنا دلوقتي هنروحله
زين: ان شآء الله هتكون كويسية
كاميليا: يارب، عشان خاطري يازين حاول تفهم من يذيد ايه اللي حصل لان انا متأكدة انها اتكلمت معاه
زين بص لأخوه: حاضر
كاميليا: متشكرة، انا هقفل عشان نازلين باي
زين: باي
زين قفل معاها وبص ليذيد واتكلم بغضب: قولتلها ايه؟
يذيد: ماقولتش حاجة
خالد بعصبية: انطق ياذيد وقولنا حصل ايه
يذيد حكالهم اللي حصل وزين وخالد واقفين مصدومين
زين بعصبية: يعني جات تعتذر وانت رفضتها لا وكمان نكرت حبك ليها
يذيد بعصبية: انا مش بحب حد ولا هحب ولو حبيت مش هتكون هي
خالد ضحك بسخرية: وهو انت لسة هتحب انت خلاص حبيت بس للأسف يايذيد بدل ماكنت تحلها عقدتها أكتر يا ابن عمي
زين: كنت بقول لكاميليا ان ندى خسرت يذيد باللي هي عملته اهو انا دلوقتي بقولك انت اللي خسرت ندى يايذيد
يذيد ببرود وقسوة: ومين قالك ان عاوز اكسبها؟
زين: تمام يا اخويا
زين وخالد مشيوا من ادامه وهو قعد مكانه ودمعة نزلت من عينه ومسحها بسرعة واتكلم: مش كل حاجة بنتمناها بتحصل💔