رواية#تلاقينا_بقلم
_إيمان_جمال
*الحلقة التالتة*
وقفنا الحلقة اللي فاتت لما سليم مشي
عايده: ايه اللي كنت خايف منه و ايه حصل؟
احمد: طلبت من سليم انه يتجوز ايه
عايده: ايه ؟!
احمد: ذي ماسمعتي كدا
عايده: ليه كدا يا احمد صغرتها اوي وطبعا هو مشي متعصب بسبب كدا
احمد: انا خلاص صحتي بتدهور وخايف عليها عاوزلها واحد يحافظ عليها ويعوضها عن حياتنا دي مش قادر احقق ليها حلمها هو هيخليها تحققه وتعمل الدبلومة
*في اللحظة دي كانت ايه خرجت من اوضتها على صوت سليم وراحة لأبوها تشوف في ايه وسمعت الكلام اللي حصل بين مامتها وابوها)
ايه: و عشان أحقق حلمي اللي نفسي فيه تقوم ترخصني يا بابا
احمد انصدم من ان بنته سمعته: ايه!
ايه: ليه عملت فيا كدا يا بابا ليه😢
احمد: غصب عني يابنتي مش قصدي والله كل الموضوع ان عاوزك سعيدة من بعدي
ايه: هي دي سعادة دي اسمها تعاسة
عايده: اهدي يا ايه بس واسمعي
ايه: مش عاوزة اسمع حاجة
*خرجت وراحت اوضتها وقفلت على نفسها وقفلت النور ونامت* كأنها بتهرب من الحزن بالنوم
نرجع لعايده واحمد
عايده؛ شفت انت عملت ايه اهي زعلت قولي بقى هتعمل ايه
احمد: انا كنت خايف من ردهم هما الاتنين لان عارف انه هيرفض وكمان عارف السبب وهي افتكرت اني كدا برخصها وانا والله خايف عليها ياعايده
عايده: طب سبب رفضه ايه؟
احمد: سليم اصلا متجوز
عايده: نعم انت بتقول ايه يعني ايه انت عاوز بنتك تكون زوجة تانية لا معندكش حق في كدا يا احمد
احمد: كنت عاوزاني اعمل ايه ولا افكر ازاي وانا شايف حزنها وهي بتداريه
عايده: دا جواز يا احمد مش لعب عيال
احمد: عارفة ياعايده على الرغم من ان انا دايما بكلم اخوات سليم وبسأل عليهم بس هو مكانش بيتكلم معايا ذيهم كان دايما شديد وجد وقافل على نفسه من صغره وهو ماسك الشركة مع ابوه وبعد ما ابوه مات شال كل حاجة لوحده حتى جوازته كانت بالنسبة للعيلة مصالح عشان الميراث وبس وهو كل اللي عليه يريح ابوه وعشان كدا اتجوز بنت عمته
عايده: يعني عاوز بنتك تبقى مع واحد قاسي وشديد
احمد: لا ياعايده سليم جواه حاجة حلوة بس بيعاند انا كل اللي طالبه انه يحميها من بعدي لو هيتجوزها سنة لحد ماتاخد الدبلومة حتى
عايده: يعني ايه ؟
احمد: يعني جواز سنة وعالورق حتى لحد ماتحقق حلمها
عايده: انت شفت بنفسك يا احمد هو مشي متعصب وهي قفلت على نفسها وانت عارف بنتك في وقت زعلها بتعمل ايه
احمد: قلبي واجعني عليها اوي ياعايده
عايده: قوم صلي وسيب كل حاجة على ربنا
احمد: ونعم بالله
***********************
في القاهرة في ڤيلا الشامي رجع سليم من عند احمد والد ايه متعصب وبيندم انه راح ودخل على مكتبه عمته وفاء شافته وهو في الحالة دي راحتله
وفاء: ايه ياسليم مالك
سليم: سبيني الوقتي ياعمتو
وفاء: لا مش هسيبك في ايه مالك راجع ذي المجنون من عند الحاج احمد ليه
سليم: يارتني مارحت
وفاء: ما تقولي بقى في ايه
سليم: طلب مني أغرب طلب ماكنتش اتوقعه خالص
وفاء: ماتخلص ياواد انت وقولي قالك ايه انت هتنقطني بالكلام
سليم: اتجوز بنته
وفاء: ايه بتقول ايه؟ مش هو عارف انك متجوز بنت عمتك
سليم: اه عارف وطلب مني كدا
وفاء: وانت عملت ايه
سليم: سبته ومشيت
وفاء: لا انت كدا تهدى وتقعد تحكيلي ايه حصل بالظبط
(فلاش باك)
سليم دخل اوضه الضيوف ومعاه احمد والد ايه
احمد: حمدلله عالسلامة معلش عارف ان المشوار طويل
سليم: الله يسلمك...لا ابدا مش طويل خير في ايه
احمد: كنت عاوز اتكلم معاك في موضوع بس بعد الغدا ان شاء الله
سليم: لا انا مش جاي عشان اكل انا جاي عشان اعرف حضرتك طلبتني ليه وامشي على طول فلو سمحت اتكلم على طول
احمد وهو عارف طبع سليم الشديد: بطلب منك تتجوز بنتي
وكأن الصدمة مسكت لسان سليم عن الكلام
احمد: ايه ساكت ليه يا ابني
سليم: مش مستوعب اللي انت قولته
احمد: انا عارف انه طلب غريب وبتمنى توافق عليه
سليم: يعني عاوزني اتجوز بنت حضرتك ازاي وانا اصلا متجوز
احمد: انا عارف انك متجوز
سليم: وطلاما عارف كدا ايه الطلب الغريب دا
وبدأ صوت سليم يعلي
احمد: انا طالب انك تحميها من بعدي وتحقق ليها حلمها
سليم بصوت عالي: وانا مالي بعد اذنك عشان عندي شغل وسابه ومشي
نرجع بقى لوفاء وسليم
وفاء: انت غلطان يا سليم
سليم: ليه ياعمتو انا عملت ايه
وفاء: دا راجل اد ابوك ليه تتكلم بالطريقة دي معاه
سليم: ياعمتو عاوزاني اعمل ايه وهو بيقولي تعالى اتجوز بنتي
وفاء: بص يا سليم احمد صاحب ابوك الله يرحمه الروح بالروح و دايما بيسأل عليك انت واخواتك ورجل بيحب ولاده وزوجته وحالته المادية متوسطة بس قادر يصرف على بيته ليه ماتساعدوش وتوافق على طلبه وتقف جمبه وجمب بنته
سليم: ياعمتو هو طلب مني مساعدة مالية او اي مساعدة عادية وانا قولت لا دا جواز فاهمة يعني ايه
وفاء: وفيها ايه ياسليم
سليم: لا ياعمتو أنا غلطت مرة وللأسف عايش فيها ومش هغلطها تاني
وفاء: ومين قالك إنها هتبقى ذي مريم مراتك
سليم وقد وصل لقمة غضبه: عمتوووووووو خلاص قولت لا يعني لا
سابها ومشي وطلع اوضته
***************
نرجع بقى لبطلتنا....عدا يومين وايه في أوضتها لا بتاكل كويس ولا بتنام كويس وعلى طول بتعيط....دق جرس الباب فتح مازن وكانت بطه بنت خالته
مازن: ايه دا بطوط ايه المفجأة دي
بطه: ازيك يامازن
مازن: تمام يابطوط ادخلي يالا يابت انتي لسة واقفة
بطه دخلت وهنا جات عايده علي صوت بنت اختها
عايده: بطه وحشتيني يابنتي تعالي في حضني يابت
بطه: انتي اكتر ياخالتو والله عاملة ايه
(بطه بنت خالة ايه وقريبة منها وفي نفس سنها بس خلصت تعليم متوسط)
عايده: يالا يابكاشة لو وحشاني كنتي تسألي
بطه: معلش بقى يادودو انتي عارفة اختك مش بعرف اسيبها لوحدها...امال فين البت ايه مش شيفاها
عايده وهي حزينة على حال بنتها: جوا في اوضتها ادخلي شوفيها
بطه: في حاجة ولا ايه ياخالتو هي ايه مالها حساكي مضايقة ليه في ايه
عايده وهي خلاص بدأت تعيط: ادخلي بس ليها وانا هحضر الغدا
بطه سابتها ودخلت لأيه
*ايه كانت قافلة النور والشبابيك والستاير وقاعدة في الضلمة والجو كئيب وباين في جو الأوضة*
بطه لما دخلت وشافت كدا عرفت ان اكيد في حاجة كبيرة حصلت بس قالت في نفسها انها لازم تخرجها من اللي هي فيه
بطه: يايويو وحشتيني اوووووي
ايه اتخضت على صوتها بس فرحت لما سمعت صوتها: بطوط وحشتيني يابت كل دا ماشفكيش وسلموا على بعض وقعدوا سوا
قامت بطه تفتح الشب والستاير: ايه يا بنتي الجو الكئيب دا
ايه: انتي عارفاني اني لما اكون زعلانة بعمل كدا انتي يعني تايهة عني
بطه: مين بقى مزعل القمر بتاعي
ايه: اقعدي بس وأنا هحكيلك
(ايه حكتلها كل حاجة سمعتها من مامتها وباباها بس لحد دلوقتي ماتعرفش انه متجوز لانها ماسمعتش الجملة دي منهم)
بطه وهي متفهمة الموضوع: بص يايويو ليه بتفكري من الجهة السلبية اللي هي ان عمو احمد بيرخك ودا طبعا استحالة ليه مش بتفكري انك كدا هتحققي حلمك وتاخدي الدبلومة
ايه: لا يابطه كل اللي أنا حسيته ساعتها اني ولا حاجة ورخيصة اوي ازاي بابا هو اللي يطلب منه كدا دا يابنتي سابه تمشي وكان متعصب
بطه وهي بتحاول تهديها: يابنتي ما يمكن اتفاجئ ذيك كدا وانه مثلا كان عايش حياته وفجأة هيتجوز في ناس كتير بيحصل معاها كدا
ايه فضلت ساكتة بتفكر في كلام بطه اللي حسن ان نص كلامها صح
بطه: ايه يايويو رحتي فين
ايه: ها....لا مافيش معاكي
بطه: طب يالا قومي كدا وخدي دش وغيري هدومك وناكل عشان انا عصافير بطني بتصوصو
ايه ضحكت عليها: ضحكتيني يابت والله انتي علي طول كدا مفجوعة يالا يامجنونة
*وخرجوا هما الاتنين من الاوضة ايه اخدت دش وغيرت هدومها وصلت وقعدت معاهم تاكل*
مازن اول ماشاف ايه: اخيرا يايويو خرجتي
ايه: معلش ياميزو بقى
مازن: ماشي يالمضة البركة في المجنونة
بطه: ميزو يا حبيبي لم الدور كدا واتلم عشان المجنونة اللي بتقول عليها هتوريك الجنون على حق
(الكل ضحك عليهم اوي علي شقاوتهم)
احمد: يويو بعد الاكل عاوز اتكلم معاكي
ايه: حاضر يا بابا
خلصوا اكل وبطه وعايده شالو الاكل ودخلوا المطبخ ومازن قعد ادام التليفزيون و ايه دخلت هي وباباها اوضته عشان يتكلم معاها
احمد: اقعدي يابنتي
ايه قعدت وفضلت ساكتة
احمد: حقك عليا يابنتي والله
ايه: انت بتقول ايه يا بابا انت اللي حقك عليا عشان عليت صوتي
احمد: لا يابنتي انتي كنتي مضايقة من اللي حصل
ايه سكتت لان فعلا هي اضايقت وموجوعة من الكلام
احمد: ساكتة ليه يا بنتي انا عاوز سعادتك والله
ايه: ازاي سعادتي يا بابا و حضرتك لما قولتله سابك ومشي
احمد: اتفاجئ يابنتي هو كان فاكر انه جاي مثلا ان انا محتاج مساعدته في حاجة او اسأله عن حاجة بس الطلب دا كان مفجأة حتى على امك
ايه سكتت شوية وبعد كدا قالت: بص يا بابا انا مش بفكر في ان انا ارتبط بجد انا كدا مبسوطة حتى لو مش عملت الدبلومة انا هقدم في اي مدرسة وجو البيت هنا انا بعشقه والضحك والهزار فاروح لحياه تانية ليه وواحد معرفش عنه حاجة وباين عليه من كلامه معاك انه عصبي وشديد.....بص يا بابا هقولك حاجة سيب كل حاجة على ربنا و اكيد ربنا قادر يحلها
احمد: ونعم بالله يابنتي..حاضر يا حبيبتي
ايه قامت باست ايد ابوها وخرجت بارة لمامتها ولبنت خالتها ومازن