رواية هرجع الفصل الاول1والثاني2 بقلم سما طارق

الجزء الثاني♡

الكاتبه: سما طارق♡

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

مشيت روحت قعدت في ستنر قدام مدرستي... لغايه ما الساعه 9 الصبح روحت

 دورت على محل موبايلات فاتح علشان ابيع موبايلي... تعبت اوى وانا بدور لغايه ما لقيت محل فاتح أخيراً... دخلت للراجل

 قولتله عايزه ابيع التليفون ده... واديتله التليفون قالى ده هبيعهولك ب 2000... انا مكنتش اعرف الأسعار بس قولت اتذاكى شويه علشان ممكن احتاج فلوس.

- ل لا 2000 ونص. 

= يا آنسه بقولك 2000 جنيه. 

- بليز يا عمو... انا محتاجه الفلوس دي جداً، وقعدت الح عليه لغايه ما وافق أخيراً واداني 2500.

- طيب دلوقتي انا عايزه تليفون مستعمل. 

طلعلي تليفون مستعمل وقالى 1500... انا اديتله 1250 ومشيت قبل ما يعترض... حطيت الشريحه وكل حاجه في التليفون وفتحته واتصلت بصاحبتي جنى. 

- الو يا جنى. 

= الو يابنتي... ايه الحوار... انا مفهمتش حاجه من الرسايل اللى بعتيهالي. 

- بصي فكك من الرسايل دي دلوقتي.. هفهمك بعدين المهم... انا هربت. 

= هربت منين. 

- هربت من البيت. 

= انتي مجنونه ازاى تعملي حاجه زي كده. 

رديت عليها بصوت عالى وانا بعيط. 

- انا تعبت مفيش حد حاسس بيا... حاولت كتير اقرب منهم بس معرفتش... خلاص تعبت..

. بس انا هرجعلهم... هرجع لما ابني نفسي ويكون ليا اسم... واثبتلهم اني من غيرهم وصلت. 

ردت عليا بعصبيه وصوت عالى. 

= انتى مجنونه... ايه الهبل ده... انتي فين دلوقتي اخلي اخويا يجيلك قبل ما يحسوا انك مش موجوده في البيت. 

- جنى انا اتصلت بيكي علشان تساعديني مش علشان ترجعيني ليهم... انا مش هقدر استحمل اكتر من كده.

ردت عليا بهدوء شويه. 

= طب انتي دلوقتي هتعملي ايه. 

- بصي انا بعت تليفوني وجبت فلوس من البيت انا كنت مجمعاها ودلوقتي معايا 1650 جنيه تقريباً... هشوف بيت للإيجار. 

= طيب يا سما خلي بالك من نفسك وياريت لو احتاجتي حاجه تتصلي بيا وانا ابعتلك اخويا. 

- تسلميلي يا قلبي. 

لما قفلت معاها قعدت ادور على بيت جنب المدرسه للإيجار علشان ابقى قريبه من المدرسه...

 دورت كتير لغايه ما لقيت واحد... اتصلت بالرقم اللى مكتوب ورد عليا راجل. 

= الو مين معايا. 

- مش حضرتك معلق اعلان لإيجار بيت. 

رد عليا وباين من نبرة صوته انه مستغرب. 

= ايوه... بس انتي صوتك صغير اوى. 

- الإيجار كام في الشهر. 

= انتى عندك كام سنه. 

- 14... الإيجار كام بقى. 

رد عليا بصدمه. 

= 14 بس انتي صغيره اوى. 

- يعني حضرتك مش موافق... طيب. 

= استني بس. 

رديت عليه وانا بعيط. 

- نعم. 

= الإيجار 1500 معاكي حقه. 

- ايوه... بس كده هيتبقى معايا 150 جنيه بس... لا خلاص شكراً. 

= استني هخليهولك ب 1250 تمام. 

رديت عليه بفرحه. 

- بجد. 

= ايوه... انتى فين اجي اقابلك. 

- انا قدام البيت. 

= طب بصي انا فيه هنزلك تمام. 

- ماشي. 

انا كنت مبسوطه اوى ان اول خطوه اني الاقي مكان اقعد فيه نجحت... شويه ولقيت حد بينادي عليا. 

= يا حلوه. 

- حضرتك صاحب البيت. 

= ايوه يا قمر... اسمك ايه. 

- عايز تعرف ليه. 

= عادي من غير سبب. 

- انا اسمي سما. 

= في سنه كام يا حلوه. 

- قولت اسمي سما مش حلوه... وانا في اولى اعدادي. 

ابتسم ليا وبعدين قالى. 

= حكايتك ايه. 

- يعني ايه. 

= ايه اللى مخليكي سايبه اهلك وبتدوري علي بيت. 

- تجربه عادي. 

= واهلك عارفين. 

- لا. 

رد عليا بإستغراب

= بس انتي صغيره ازاى تعملي حاجه زي كده من غير ما اهلك يعرفوا. 

- ممكن حضرتك تقفل الموضوع وتقولي هستلم مفتاح البيت امتى. 

= انتى في بيت تقعدي فيه الليله دي. 

- الصراحه لا. 

= يبقى خلاص هسلمك المفتاح دلوقتي. 

- شكراً. 

خدت منه المفتاح واديتله الفلوس ودخلت اشوف البيت لقيته مش متروق... فيه كنبه صغيره وسرير في الأوضه.

- ماشي يا استاذ بيت... مع اني صايمه بس هروقك واتعب فيك علشان تبقى نظيف كده واعرف اقعد. 

بعد ساعات كنت خلصت ترويق تقريباً وقعدت على الكنبه. 

- هووف بيت متعب... بس يلا كله يهون علشان النظافه... لما اتصل بالبت جنى. 

اتصلت بجنى وحكيتلها على اللى حصل. 

= طب كويس لقيتي مكان تقعدي فيه.

- اول خطوه نجحت... وانا دلوقتي جعانه. 

= طب مامتك اتصلت بيا. 

- ماشي. 

= مش عايزه تعرفي قالتلي ايه. 

- مش مهم. 

= طب هتاكلي ايه. 

- هنزل اشتري سندوتشات فول مع اني مش بحب الفول بس فاضل ربع ساعه على المغرب ومفيش حاجه في البيت ده. 

= طب بقولك ايه. 

- ايه. 

= ما تيجي تاكلي معانا انهارده. 

- لا يابنتي اتكسف... وبعدين ده انا عمري ما روحت بيتك. 

= تعالي بس وانا هقول لماما. 

- ماشي ابعتيلي العنوان على الواتس. 

وفعلاً بعتتلي العنوان على الواتس وروحتلها فطرت معاها هي وعيلتها... وبعد الفطار نزلت انا وجنى نقعد في جنينة العماره. 

= روان سألتني عليكي. 

- تصدقي نسيت اتصل بيها اقولها. 

= طب اتصلي بيها دلوقتي. 

- ماشي. 

اتصلت بروان بنت خالتي وصاحبتي واختي. 

= الو ياجزمه... انتى فين يا حيوانه... امك وابوكي قالبين عليكي الدنيا. 

- انا هربت. 

ردت عليا بعصبيه

= هربتي ليه ان شاء الله. 

حكيت ليها كل حاجه حصلت معايا. 

= انتي يا بت هتجنيني... بسبب مشكله زي دي تهربي. 

- بصي انتي مهما قولتيلي انا مش هرجع... انا هرجع لما ابني نفسي ويبقى ليا اسم كبير في البلد. 

= طب انتي دلوقتي فين. 

- روان... متقوليش لحد حاجه... اكني مكلمتكيش... هما اتصلوا بيا كتير بس انا عملتلهم بلوك. 

= مش هقولهم يا سما حاضر... بس خلي بالك من نفسك يا هبله.

- ماشي.

= خطوبتي اتحددت يا زفته. 

- ايه ده بجد... مبروك. 

= مش هتيجي طبعاً. 

رديت عليها وانا بفكر. 

- لا طبعاً هاجي... ده انا مستنيه اليوم ده بقالى كتير. 

= لما نشوف ي ختي هتيجي ازاى... مقولتيليش بردو انتي فين. 

- انا عند جنى... قاعدين في جنينة العماره بتاعتهم. 

= ماشي ي ختي متتأخريش وروحي بسرعه لبيتك الجديد. 

- ماشي. 

عدت شهور الراجل اللى انا كلمته علشان الشقه جابلي شغل في مكتبه جنب المدرسه

 وكنت كل يوم بشوف اخويا من بعيد وهو رايح المدسه...

 نفسي أحضنه اوى بس لازم ميلمحنيش حتى... فضلت كده وعرفت اعيش حياتي عادي و وقفت بيت دراستي وبين الشغل وباكل كويس...

 اه نسيت اقولكم ان نتيجة إمتحانات اولى اعدادي طلعت وانا طلعت التالته على المدرسه... والأوائل نزلت على

 صفحة المدرسه... شوفت بابا وماما كتير اوى في المدرسه بيدوروا عليا... بس انا كنت بتهرب منهم... لغاية ما في يوم قررت اني ابعتلهم رساله... انا كنت واخده مفاتيح البيت معايا... كتبتلهم رساله ولما اتأكدت ان مفيش حد في البيت

 سيبت لكل واحد رساله في المكان اللى بيقعد فيه... رسالة اخويا كانت على سريره... رسالة ماما كانت في المطبخ... رساله بابا كانت على مكتبه. 

رسالة اخويا........

                الفصل الثالث من هنا

لقراءة باقي الفصول من هنا