الفصل الاول والثاني
بقلم روني محمد
-: مبحبهوش مش عاوزه اتجوزه
بابا رفع ايده وضربني بالالم حطيت ايدي على وشي من الألم وفضلت اعيط ...
-: اياكي اسمعك بتقولي كده تاني ، انا غلطت لما سبت امك هي الي تربيكي وتطلعك
زيها ، كانت غلطة عمري اني اتجوزتها من البدايه واهي الغلطه كملت لما طلعتك نسخه
منها واقفه قصادي وبتبجحي فيه ...
الكلام كان أقسى عليه من القلم الي اخدته ...
(انا ساره عمري 18 سنه بابا وماما منفصلين من وانا صغيره مكنتش اعرف الاسباب
انا كبرت لقيتني عايشه مع ماما وبشوف بابا كل سنه او اتنين مره ، ديما كان بيشتم على
ماما وبيسئ ليها رغم انها عمرها ما طلعته بصوره وحشه قدامي كانت ديما بتحببني
فيه وكانت بتخليني أسأل عليه حتى لو هو مش بيسأل ، ماما كانت كل حياتي لغايه لما فرقتنا
الحياه وماما سبقتني للجنه، جيت اعيش مع بابا الي عاوز يجوزني لابن عمي الي
مشوفتوش ولا مره ، لا وكمان مش هيخليني ادخل الكليه وأكمل حلم ماما واكون صحفيه زيها)
كنت وقفه مكاني بعيط وانا حاسه اني مكسوره ، مبقاش ليه سند فالدنيا امي كانت سندي وقوتي ودلوقتي السند ده راح.....
-: انتي هتفضلي واقفه مكانك كده خشي اختفي من وشي الساعه دي عشان انا عفاريت
الدنيا بتتنطت في وشي ، واعملي حسابك رامي جي النهارده هو وامه عشان ياخدوكي تشتري
الشبكه ، وعالله تبوزي في
وشهم ولا تقوللهم اي كلام من التافه الي قولتيه من شويه...
دخلت سجني قصدي اوضتي الي مبخرجش منها من ساعه ما سبت شقه ماما وجيت هنا ،
بابا كان متجوز وعنده ولد وبنت المفروض انهم اخواتي ،
بس بعاد عني اوي حتى مش بيجو يسلمو عليه رغم اني اعده معاهم في نفس الشقه ، ولو
خرجت من اوضتي بابا يزعقلي ، مرات بابا مضايقه من وجودي عشان كده بابا قرر ان
يتخلص مني ويجوزني لواحد مبحبهوش ، انا حتى معرفش شكله ....
بعد ساعتين لقيت بابا بيخبط عليه وبيقولي اجهز عشان رامي جه هو ووالدته واني
هنزل معاهم ، مقدرتش اعترض قلتله حاضر من جوايا كنت بطاوعه عشان ميضربنيش
تاني و أهي فرصه اخرج شويه واشوف ناس بدل السجن الي كنت عايشه فيه....
طلعت واتفاجأت ان مامت رامي تبقى طنط نيره صاحبه ماما ، حضنتها وفرحت اوي
طول عمرها كانت بتحبني ، كنت عارفه انها عندها ولاد بس عمري ما شوفتهم ، حسيت
بالامان في حضنها الي اتحرمت منه لما ماما ماتت.....
اما رامي انا حتى مبصتش في وشه فضلت حاضنه طنط واعيط لغايه لما هي بعدتني
عنها ومسحت دموعي وقالتلي يلا بينا عشان منتأخرش...
نزلنا ورحنا اعدنا الاول في مطعم عشان هنطلب الغدا ، لقيتني بقول لطنط نيره
-: ارجوكي يا طنط متسبنيش ارجع تاني لبابا انا مش عاوزه اعيش معاه
-: ما هو يا بنتي انا جايه عشان اخلصك منه ومن ازا مرات ابوكي...
-: بجد يا طنط يعني مش هرجع البيت ده تاني
_: مش دلوقتي يا ساره ، لازم لما تتجوزي رامي الاول...
بصيت لرامي الي كان اعد وساكت طول الوقت ، وبعدين بصيتلها وقلت
-: انا مستحيل اتجوزه انا مبحبهوش ولو وصلت اني اموت نفسي هموت بس مش هتجوز انا عاوزه ماما عااااااااااااا
اسكريبت ..... قسوة أب
الفصل الثانى
روني محمد
أنا رامي عندي 25 سنة يادوب لسه مخلص جيش وبدور على شغل حاليا نسيت أقولكم
اصل انا بكالريوس تجاره
المهم مطولش عليكم ، فيوم كنت نايم لقيت ست الحبايب جايه تصحيني
الام : رامي.... واد يا رامي يلا قوم..
رامي : ساعه واحده بس واقوملك هوا ، هخطفلي حلم عالسريع....
الام : قوم يا رامي افرح يا ولا هجوزك...
رامي : ماشي يا ماما روحي قبلي المعازيم عقبال ما اصحا...
-: انت فاكرني بهزر ، قوم بقى خليني افهمك هتعمل ايه...
قمت اعدت وانا عارف
اني لسه بحلم ، اصل مش معقول هيصحوني من النوم ويجوزوني وش كده...
رامي : نعم يا ماما انا اعدت اهوه...
الام : فاكر يا رامي طنطك امال صاحبتي الي كانت متجوزه عمك رأفت...
-: الله يرحمها ، ايه صحيت تاني...
-: الله يرحمك يا امال يا حبيبتي ويبشبش الطوبه الي تحت راسك...
-: اخلصي يا ماما انا عاوز انام..
-: استني بس ، طنطك امال دي كان عندها بنت زي القمر والي هي تبقى بنت عمك ،
فانا كلمت ابوك وابوك كلم عمك اننا نروح نخطبها ...
رامي : طب مبروك ، يلا سبيني بقي انام
الام : شوف الولا وانا الي كنت فكراه هيفرح...
شدت الغطا من عليه وقالت
-: ولله العظيم تلاته لو مقمتش دلوقتي غسلت وشك وجيت معايا نروح نجيب الشبكه
، لانت ابني ولا اعرفك و هطفش واسبلكم البيت ومحدش هيعرفلي طريق...
-: انا عارف.. اخره الاسطوانه دي ايه ، انا هقوم وبلاها نوم..
بعد وقت
رامي : يعني ايه الكلام ده يا بابا ، هو ده كلام يتعقل ازاي بس... اتجوز واحده خبط
لزق كده ولا عمرها شافتني ولا انا شفتها ، طب هصرف عليها منين...
الاب : يابني ده جواز صوري كده عشان تخلص بنت عمك من ظلم ابوها
رامي : طب هو ابوها انا مالي...
الاب : يا بني عمك متعقد من ساعه ما امها الله يرحمها رفعت عليه قضيه وخلعته لما
رفض يطلقها وكل ده عشان فضلت شغلها عليه وهو مبقاش
بيحب ساره ولا عاوز يشوفها قدامه وهينتقم منها على الي عملته امها زمان...
رامي : طب انا مالي بردو...
الأب : بس يا رامي هو في حد في حياتك بتحب يعني قول ما تخبيش انا ابوك
رامي: ولله بابا انا كنت ب
الاب : اه يا بن ******يا ****** ، بكل بجاحه جي تقولي في وشي انك بتحب
رامي : يا حج انت فاهمني غلط
الاب : اخرس انا صحيح معرفتش اربي ، اه يا ضهرك الي اتقطم على عيالك وفالاخر ابنك
الكبير يطلع صايع وبتاع بنات
رامي : بنات ايه بس يا بابا ، انا عاوز اقولك اننا مش معايا حتي اكل نفسي هتجوز ازاي بس يا ناس...
الام : تجوز معانا هنا يا حبيبي...
رامي : هي الشقه ناقصة دي وخداني انا واخواتي بالعافية...
الاب : احنا حلناها....
رامي : ازاي يا بابا... وقولي هتاخد اوضه من عند الجيران ولا هتقفل البلكونه وتقعدها فيها...
الاب : لا يا حدق انت واخوك تامر تناموا في اوضه واحده وهي تاخد الاوضه الي جنب اختك علا..
رامي : نعم!!!! ودي انا هتجوزها بالاسلكي..
الاب : اه يا قليل الادب يالي مش متربي انت مفكر اني هسيبك كده تستفرد بيها...
رامي : لا اله الا الله ، انا بس عاوز افهم انا هتجوز ولا مش هتجوز وازاي عاوزني
اتجوز وهي هتعد في اوضه وانا في اوضه..
الام : يا بني انا هفهمك ، انت اه هتتجوز بس صوري بس عشان عمك يرضى يخليها
تيجي تعيش معانا ، انما انت هتعاملها زي علا اختك..
رامي : اختي طيب وانتم متخيلين اني هوافق عالكلام ده ، ده كلام ميتعقلش ابدا...
الاب : اه منا لو كنت خلفت راجل كلن زمانه وقف في ضهري مش دكر البط الي نايملي
فالبيت طول النهار ، يلا قوم من وشي شوفلك شغلانه تشتغلها
بدل مانت أعدلي فالبيت زي القرد قطع كده...
رامي : بابا انا موافق ها تحب نكتب الكتاب امتى
الاب : ربنا يبارك فيك يا بني انا كنت عارف انك مش هتقصر رقبتي....
رامي بهمس : انا كنت عارف انك عندك انفصام فالشخصيه يلا خليني اطوعك مش هنخسر حاجه...
تاني يوم رحنا انا ووالدتي بيت عم سط واخدنا الي مفروض تكون العروسه على
اساس اننا هنشتري الشبكه وماما طلبت اننا نتغدا مع بعض
الاول عشان تعرفها عليه ، لقيت بقى السنيوره قصدي العروسة
بتقول انها مش عاوزاني وعندها استعداد تموت نفسها بس متتجوزنيش ، طبعا انا العرق الصعيدي نقح عليه ورحت
قايم وسايبهم وطلعت على عمي وعرفته ان الجوازه دي متنفعش وانا مش هقبل اتجوز واحده مش عاوزاني....
نفس اليوم بالليل لقيت التليفون الارضي بيرن رديت ولقيت عمي الي كان بيتصل وقال ان ساره انتحرت.........