رواية بائعة الورد
الفصل السادس عشر والسابع عشر والثامن عشر
بقلم اسماء ابراهيم
#بائعه الورد..
الفصل السادس عشر....
يوسف بمكتبه في مديرية أمن القاهرة يتفقد بعض القضايا رن جرس الهاتف وألتقته فأردف قائلا ..تحت امرك يافندم ثواني واكون بمكتبك.
اغلق يوسف الهاتف وتحرك ليذهب الي مكتب اللواء بعد لحظات كان يوسف يطرق الباب وسمح له بالدخول
دخل يوسف وألقي التحيه العسكريه وقال..تمام يافندم.
اللواء: اتفضل اقعد يايوسف عندنا مهمه جديده بس مش عاديه وكمان لها أطراف كتير وما فيش غيرك اثق فيه وفي كافأته.
يوسف: وانا جاهز معاليك وشرف ليه ثقه حضرتك فيه.
اللواء: مش الاول تعرف المهمه ايه وفين ومع مين.
يوسف: مهما يكون يافندم احنا هنا عشان نحافظ علي بلدنا وولادنا واهالينا.
اللواء: طول عمرك ظابط شاطر وقوي بتفكرني بعمك سالم الله يرحمه كان رمز القوه وكان بيسبب الرعب لأي عدو .
يوسف: الله يرحمه انا علي أتم استعداد للمهمه دي .
اللواء: يوسف احنا هنكمل القضيه اللي كان سالم الله يرحمه ماسكها وبالنسبه مين هو زعيم العصابه اللي متخفي في بدله رجال الأعمال ومطلوب القبض عليه يبقي فؤاد الالفي طبعا تسمع عنه.
يوسف: طبعا فؤاد الالفي صاحب اكبر شركه مقاولات و اعلانات المنتجع السياحي خاربه الدنيا.
اللواء: فؤاد الالفي مش شخصيه سهله وكمان طبيعه شغله مش مظبوطه لأنه بيتعامل مع جنسيات مختلفه ومش واضحه.
يوسف: تمام حضرتك انا فهمت قصدك وخلال يومين هاكون جمعت كل المعلومات عنه .
اللواء: تمام وده ملف القضيه اللي كان مقدمه المرحوم سالم.
اخذ يوسف ملف القضيه من اللواء وانصرف الي مكتبه ووضع الملف أمامه وظل ينظر له مده طويله وبعدها أخذه وأخذ هاتفه المحمول ومفتاح سيارته وخرج.....
__________________________
بسوهاج بدأ المزاد وكان يحضره كثير من أصحاب الشركات الخاصه بالآلات الزراعيه وتجار الخرده وكل واحد ينادي بالسعر إلي أن زاد السعر علي المزاد وتم انتهائه والفوز لصالح الحج قاسم الشناوي..
طاهر: مبارك علينا يابوي واني هاروح اخلص الورق وادفع الفلوس.
الحج قاسم: مبارك ليكوا ياولدي واني هاروح البيت وشيعلك معتصم يقف وياك.
محمود: واني اتصلت بالواد محروس ياجي بالعربيات النقل عشان نحملوا البضاعه.
الحج قاسم: زين ماعملت ياولدي هاهملكم اني وعاود علي البيت.
ذهب الحج قاسم الي بيته وترك أولاده يقوم كل واحد منهم بعمله وطاهر ذهب ليدفع ثمن البضاعه وترك محمود يقف في انتظار السيارات التي تنقل البضاعه الي مخازن الشناوي.
وأثناء وقوف محمود جاء إليه شخص وقال له
الشخص: مبروك عليكوا يامحمود بس احب افكرك اني الكبير مش ناوي يسكت عليك اكتر من كده..
محمود: واني مش هاسكت لو اتكلم في الماضي ده ضيع روحين مش روح وقوله محمود ولد قاسم الشناوي مابيتهددش.
الشخص: براحتك بس صدقني الباشا بعد ما يخلص من مشروعه مش هايسكت إلا إذا انت رجعت الحاجه.
محمود: نورتنا.... قالها محمود وتركه وذهب ليستقبل السيارات ويتابع تحميل البضاعه.
في جنينه بيت الحج قاسم كان معتصم يجلس مع نغم
معتصم: هااا يانغم تحبي ننزل نختار الفرش امتي انا اتفقت مع يوسف اننا نسافر القاهره وتختاري اللي يعجبك.
نغم: القاهره ليه يامعتصم مانشوف المحلات هنا ولا حتي نكلم نجار كبير ويجيبلنا من دمياط.
معتصم: حبيبه قلبي هنا ايه بس ولا دمياط لأ ياقلبي احنا هانجيب الفرش من أكبر معرض موبيليات في القاهره واهوو نتفسح يومين وتقعدي مع ياسو وبالمره تتعرفي علي البنت اللي جننت اخوكي.
نغم: تصدق فكره بس سالم شكله كده وقع ولا حد سمي عليه وكمان نفسي اشوف محل الورد بتاع ياسو.
معتصم: خلاص اتفقنا يبقي نستأذن جدي وعمي وبابا ونسافر في اقرب وقت.
نغم: ماشي بس ليه طلب واحد عندك.
معتصم: حبيبتي تأمر وانا أنفذ مش تطلب لأ الف امر وانا عيوني ليها.
نغم بكسوف: الله بقي يامعتصم المهم طلبي نستني لما سالم يرجع من السفر ونبقي نسافر كلنا تاني.
معتصم: ليه يانغم انتي خايفه تسافري معايا لوحدك مش واثقه فيه..
نغم: والله ابدا بس كل خوفي أن بابا ميوافقش وبعدين طول ما انا جنبك ومعاك بحس بالأمان والاستقرار.
معتصم: بحبك وانا موافق عشان عمي ما يزعلش
____&&&&&&&&&&&&&&&-
بالقاهره في محل الورد كان سالم يساعد كلا من ياسمين وروضه وشدوي في تجهيز بوكيهات الورد ومن حين الي آخر كان يشاكس روضه وهي ترد عليه برخامه..
وبعد فتره من الوقت تم الانتهاء من تجهيز البوكيهات وتسليمها الدليفيري ليوصلها...
شدوي: اخيرا خلصنا انا تعبت اوي وفصلت انا هطلب نسكافيه من عايز .
ياسمين: يااااريت انا كمان عايزه افوق شويه هااا ياروضه هاتشربي حاجه.
روضه؛ لا انا عايزه انااااااام.
سالم: هاتي اتنين كابتشينو بندق معاكي ياسو وغمز لها.
ياسمين: اوك خليكوا هنا وانا وشدوي هانروح نجيب الحاجه.
روضه: ايه ده لا استني انتي وانا هاروح مع شدوي وبعدين اتنين كابتشينو لمين هو انت للدرجه دي مفجوع.
سالم وهو ينظر لها بعين مغلقه والاخري مفتوحه انا مفجوع شكرا لذوقك علي فكره انا طلبت اتنين انا وانتي .
روضه: وانت مالك تطلبلي اصلا يابارد انت وانا مش عايزه اتزفت عايزه انااااااام ولا البعيد مابيفعمش.
سالم: يابنتي اتلمي شويه انا غلطان اني عبرتك وبعدين انتي مش شايفه أن لسانك اطول منك
ياسمين: يالا ياشوشو سيبك منهم وتعالي معايا نجيب الحاجه وهما هايفصلوا لوحدهم.
روضه: والله انا شايفه أن في واحد بارد بيدخل في الكلام وعايز اللي يلمه.
سالم: استغفر الله العظيم منك بت تعرفي اول مره اشوف واحده شكلها حلو بس بعيد عنك لما تتكلم بتقلب محروس .
روضه: ممكن تخليك في حالك لحد ما بنت عمك تيجي وتجيبلك اللي هاتشربه.
سالم: طيب ما انتي حالي ولا ايه رايك...
روضه فرغ فاهها من كلمته واسرعت بالخروج.
__&____________________________
بالمستشفي في غرفه تامر كان والده يجلس بجانبه ومعه والدته وكان تامر قد طلب من والده شئ...
فلاش باك.....
تامر: بابا انا غلط وعايز اصلح غلطتي دي ارجوك يابابا تساعدني وقص عليه ما فعله مع دكتور فادي
منير: حبيبي ارتاح دلوقتي وانا هانفذلك كل اللي تطلبه.
تامر: انا عايزك تكلم دكتور فادي وتعتذر له عن اللي عملته وياريت لو يقبل يقابلني هنا.
منير: ماتقلقش ياتامر هاكلمه بس ارتاح انت...
باك....
تامر: بابا ياريت تتصل علي الرقم ده وتقول لناني تيجي تزورني دوري.
منير: حاضر حبيبي.
سماح: طيب المهم تأكل حاجه ياتامر عشان تاخد علاجك.
تامر: ماما مش قادر حقيقي لو امكن ممكن عصير برتقال فريش.
أثناء حديثهم طرق الباب عده طرقات وسمح السيد منير للطارق بالدخول وكان المفاجأة لهم..
حمدالله علي سلامتك يا بطل....
#بائعه الورد..
الفصل السابع عشر...
حمدالله علي سلامتك يا بطل......
كان صاحب الجمله مفاجأه للجميع فهو بشخصه وذاته دكتور فادي المرشدي أيعقل أنه يلبي طلب تامر ويذهب لزيارته بعد أن كان يريد تامر أذيته...
فادي: امشي ولا هاتقولي اتفضل انا ممكن اتفضل علي فكره بس احب اسمعها منك ياتامر.
تامر: طبعا اتفضل يادكتور وانا اسفه لحضرتك وارجوك تسامحني علي كل حاجه عملتها مع حضرتك.
فادي: انا مسامحك ياتامر لكن بشرط .
نظر تامر لوالده وبعدها لدكتور فادي وقال: وانا موافق علي اي حاجه تطلبها يادكتور.
منير: اهلا وسهلا بك يادكتور شرفتنا والله وتامر ندمان علي اللي عمله واتمني منك تسامحه واعتبره اخوك الصغير وغلط.
فادي: اهلا بيك يامنير بيه وانا مسامحه وشرطي أنه يبدأ يذاكر وانا هكون معاه خطوه بخطوه وماتقلقش العملي كله هيكون معايا بس اهم حاجه دلوقتي تركز علي الجزء النظري.
منير وسماح بصوت واحد ربنا يوفقك ويسعدك يااارب.
تامر: متشكر جدا لحضرتك وبجد انا مش عارف اعمل ايه قصاد مساعدتك ليه.
فادي: الحاجه الوحيده اللي عايزها نجاحك وتخرجك السنه دي من الجامعه واستأذن انا دلوقتي وهاجي ازورك تاني وهاجيبلك معايا المحاضرات اللي فاتت .
تامر: دكتور فادي ممكن كلمتين علي انفراد بعد اذنك يابابا
منير: طبعا ياحبيبي خدوا راحتكم تعالي معايا يا سماح نجيب عصير من الكافيتريا.
خرج منير ومعه زوجته واقترب فادي بكرسيه جانب تامر.
فادي: خير ياتامر طلبت نتكلم علي انفراد ليه لو في حاجه مش عايز والدك يعرفها انا معاك .
تامر: خير يادكتور كل الحكايه أن في بنت زميلتي هي ساعدتني علي اللي عملته مع حضرتك هي مالهاش ذنب في حاجه الذنب الوحيد أنها بتحب حضرتك وكانت عايزه تلفت النظر ليها لكن صدقني يادكتور لو حد احتواها وطمنها هتكون حد جميل اوي .
فادي: اطمن ياتامر انا عمري ما أذي حد بسبب حاجه لأننا بشر وكلنا بنغلط ومافيش حد معصوم من الخطأ بس تعالي هنا مين دي اللي بتحبني هو انا اتحب اصلا ده كل الطلبه بيدعوا عليه واولهم شدوي ولا ايه.
ضحك تامر وقال: ده حقيقي لدرجه بقينا نخاف نحضر محاضره ليك وعلي العموم البنت دي فعلا جواها جميل لكن عايز توجيه اديها فرصه يادكتور تقرب منك .
فادي: ماشي بس ياتري مين بقي.....
تامر: ناني الحلواني يادكتور وهي صاحبه ياسمين وروضه اصدقاء شدوي اخت حضرتك.
فادي بتفكير في الاسم : اممممم تقريبا اسمها مش غريب تمام يابطل خليها علي الله سلام ولينا لقاء تاني بس مع المذاكره.
تامر: تمام يادكتور....
خرج فادي من غرفه تامر ومن المستشفي وصعد سيارته وأثناء سيره كان يفكر في كلام تامر ويحاول يتذكر صاحبه الاسم الذي تحبه وتحاول في لفت نظره...
__________________________
في بيت الحجه وداد كانت تجلس والده روضه واخواتها
الحجه وداد: يارحمه لازم روضه تعرف الحقيقه واني عمتها مش مجرد صاحبه السكن اللي قاعده فيه لحد امتي هانستني.
رحمه: ياحجه وداد لو روضه عرفت هاقولها ايه السبب اللي خلاني اخبي عليها وكمان هانضطر نفتح في القديم وانا مش عايزه ازود الهموم عليها كفايه أنها بتشتغل عشان تساعد نفسها.
الحجه وداد: وانا نفسي تعرف عشان لما اقابل ربنا اكون وفيت بوعدي لعبدالله الله يرحمه وكمان العماره دي هتكون ليها ولاخواتها لو ماعرفتش هيكون ايه رد فعلها لما تعرف اني كتبت كل حاجه ملكي ليها ولاخواتها.
رحمه: خليها علي الله ونبقي نشوف هانعمل ايه بس تخلص السنه دي وتتخرج من الكليه وعلي العموم محمود صاحب عبدلله الله يرحمه كلمني من فتره وقالي أنه خلص كل حاجه خاصه بعقد البيت اللي اشتراه عبدلله قبل ما يموت..
الحجه وداد: ربنا يسترها انتي تعرفي أن محمود ده يبقي عم ياسمين صاحبه روضه .
رحمه: عارفه طبعا ربنا يعديها علي خير.
دخلت روضه وألقت التحيه عليهم وقالت ..ايه ياست ماما عامله غدا ايه النهارده لاني ميته من الجوع
رحمه: حبيبتي هاحضرلك الغدا حالا وماتقلقيش عامله صينيه البطاطس باللحمه ورز وسلطه يستاهلوا تأكلي صوابعك وراها.
الحجه وداد: انتي جايه لوحدك اومال فين ياسمين عشان تتغدوا مع بعض.
روضه: ياسمين هاتتغدا مع ولاد عمها في المحل ويوسف هايوصلها.
الحجه وداد: طيب ياحبيبتي اطلعي غيري هدومك عقبال ما والدتك تجهزلك الغدا وبالمره نزلي معاكي ناني مش عارفه مالها بقالها يومين تعبانه ومش بتخرج.
روضه: غريبه دي ليه مع انها كانت معايا في الجامعه امبارح حتي جات وسلمت علي أصحابي هاشوفها وهحاول انزلها.
صعدت الدرج روضه ودخلت الشقه ورأت ناني تجلس في البلكونه وعلي ملامحها الحزن ربتت علي كتفها وقالت....مالك ياناني قاعده كده ليه وشكلك حزين ليه.
ناني: مافيش ياروضه انا كويسه بس ناس صحابي حصلهم حادثه وزعلانه عليهم.
روضه: طيب قومي اغسلي وشك وتعالي معايا ننزل نتغدا مع بعض من ايد ماما دي عليها صينيه بطاطس باللحمه أنما ايه حكايه.
ناني: معلش مش هقدر وماليش نفس حقيقي.
روضه: مافيش الكلام ده وبعدين عندي ليكي مفاجأة ومش هقولك عليها غير لما تنزلي معايا قولتي ايه.
ناني: ماشي هانزل معاكي بس مش عشان اعرف المفاجأة لأ عشان صينيه البطاطس اخيرا هاكل طبيخ معدتي نشفت من أكل التيكاوي
بعد دقائق كانت البنات نزلت الي شقه الحجه وداد لتناول الغداء وأثناء جلوسهم علي السفره قالت روضه....هااا ايه رأيك في الاكل مش قولتلك حاجه اخر تمام.
ناني: فعلا الاكل تحفه تسلم ايدك ياطنط .
رحمه: بالف هنا وشفا علي قلوبكم ياحبيبتي.
روضه: بصي بقي ياناني انتي عارفه طبعا اني بشتغل حاليا في شركه المرشدي بتاعت بابا شدوي وانا في الشركه سمعت انهم عايزين مهندسين ديكور عشان الشركه داخله مشروع كبير في مرسي مطروح فأنا اقترحت علي شدوي انك تكوني معانا وهي كلمت بابها وهو وافق ومن بكره هاتستلمي شغلك بعد مواعيد الجامعه ايه رأيك في المفاجاه دي.
ناني: مفاجأة تحفه طبعا شركه المرشدي من أكبر شركات الديكور والمعمار في مصر حبيبتي ياروضه متشكره اوي.
روضه: لا لا انا مش واخده منك علي الادب والتواضع ده فين ناني المغروره اللي بتكلمنا من فوق.
ناني: يانهار اسود هو انتوا بتقولوا عليه كده .
روضه: يوووووو ده الجامعه كلها بس مش مشكله عادي .
ناني: ياااااه الناس شايفاني كده وانا اللي كنت مفكره أنهم بيحبوني بس تعرفي انا مش وحشه ممكن اكون غلطت بس عمري ما كنت وحشه مع حد عمري ما كسرت خاطر حد ، عمري ما حد احتاجني و ما لاقنيش ، اه بتضايق من اقل حاجه و متقلبة المزاج ممكن اقلب ع حد بسبب كلمه قالها ضايقتني بس من جوايا نضيف و عمري ما بعدت عن حد و لما ببعد عن حد بيبقي هو السبب في البعد ده...
روضه: واحنا مش هانبعد عنك انتي فعلا حد كويس ياناني بس محتاجه حد يكون جنبك يكون مرايتك اللي توجهك للصح وتلومك وتعاتبك في الغلط وبعدين احنا هانقلبها درامه ليه يالا بينا بقي نشرب كوبايتين نسكافيه ولا اقولك كابتشينو بندق .
::؛؛؛::::::::::::::::::::::::::::::::::::::::::::::'''
ياسمين وشدوي بعد ما رجعوا من الكافيه وجدوا سالم يجلس بمفرده فقالت ياسمين: سالم فين روضه اوعي تكون عملت فيها حاجه ولا تكون زعلتها .
سالم: والله ابدا كل الحكايه أنها فضلت تتخانق معايا وتقولي خليك في حالك رديت عليها وقولتلها انتي حالي اخدت الكلمتين وجريت.
شدوي بضحك: الحمدلله انها جريت ما عملتش فيك حاجه ولا خبطتك بزهريه في دماغك .
ياسمين: مجنون واتلم علي اللي اجن منه ماهو مش معقول وانتوا بتتخانقوا تقولها كده كنت استني لما تهدوا علي العموم ما تخافش انا هاتصرف لما اروح السكن.
شدوي: وانا هامشي بقي ياسو هعمل كام مشوار كده وهاروح باااي
ياسمين: باااي ياقلبي وانا هكلمك لما اروح وكمان عشان نشوف هنعمل مع روضه والبيه ايه.
يوسف: ماله البيه قالها وهو يدخل من باب المحل.
شدوي: ازيك يوسف اخبارك مالوش ادخل وياسو تفهمك باااي.
ياسمين: ده حكايته حكايه والحمدلله احب اطمنك أن العيله هاتزيد واحد مجنون .
سالم: ايه ياسو خليكي محضر خير ولا عايزه حضره الظابط يعلقني.
يوسف: عملت ايه لو مش عايز تتعلق اعترف بنفسك احسنلك.
سالم: ياعم ماعملتش حاجه كل الحكايه اني وقص عليه ما حدث بينه وبين روضه.
يوسف بضحك شديد الله يخربيتك علي الجنان بس تعرف عجبتني .
سالم: اي خدمه ابن عمك كفاءه بردو.
رن جرس الهاتف الخاص بيوسف وتحدث له شخص وبعدها يوسف تغيرت ملامحه للجديه وقال... انت متأكد من المعلومات دي .
الشخص:.......................
يوسف: خليك عندك انا ربع ساعه وأكون في مكتبي.
الشخص:....................
يوسف: تمام خلي الملف معاك وانا مش هاتأخر عليك سلام.
ياسمين: في حاجه ياجو شكلك اتغير اوي من المكالمه دي.
سالم: كلامك صح ياسو في ايه يايوسف حد في البلد فيه حاجه.
يوسف: لا لا مافيش حاجه ده الشغل عندي قضيه جديده وجاتلي معلومات يالا سلام ياسمين حبيبي مضطر اسيبك سالم هايوصلك السكن واول ما ارجع هاطمنك ....
#بائعه الورد..
الفصل الثامن عشر....
صعدت ياسمين إلي السكن ودخلت ألقت السلام علي روضه وناني وقالت لروضه وحياتك يارورو شوفيلي كده التي شيرت بتاعي علي الحبل احسن رجعلي تعباني من الوقفه.
روضه: ايه الدلع ده ما تروحي انتي تشوفيه انا مش قادره أقف علي رجلي مش كفايه اللي عمله ابن عمك فيه.
ياسمين: يابنتي هو انتي سكتي ماهو انتي قومتي بالواجب وزياده .
روضه: ماشي ياسو عشان خاطرك انتي بس هاروح اشوفلك التي شيرت.
دخلت روضه البلكونه وكان سالم يقف بعيدا ونظره مسلط علي روضه ابتسم لرؤيتها واوقف تاكسي وذهب الي شقه يوسف.
يوسف بمكتبه كان يقرأ المعلومات التي طلبها عن القضيه التي كلف بها وقفلت من بعد وفاه عمه سالم...
فقال لنفسه ده انت حكايه كبيره يا ابن الألفي وبإذن الله نهايتك علي ايدي.
مصطفي: يوسف ايه ياكبير بتكلم نفسك ولا ايه .
يوسف: كويس جيت في وقتك يامصطفي عايزك معايا في المهمه دي بس الاول شوف المعلومات دي قولي رأيك..
مصطفي: معاك في اي حاجه طبعا بس فهمني الاول طبيعه المهمه.
يوسف: المهمه المره دي مش سهله وكمان ليها ماضي وكان عمي سالم الله يرحمه هو اللي مسئول عنها .
مصطفي وهو ينظر للملف ويقرأ ما به قال ده فؤاد الالفي طبعا اشهر من نار علي علم ده كمان بيعمل اكبر منتجع سياحي في مطروح وشريكه الجديد يبقي مراد المرشدي.
يوسف: حلو اوي يبقي مهمتك من دلوقتي تجيب كل المعلومات عن المشروع ده وايه اللي ورا الالفي مخليه خلال كام سنه يبقي من أكبر رجال الأعمال..
بمحل الورد كانت ياسمين انتهت من ترتيب الزهور والورد وأغلقت المحل هي وسالم جاءت سياره اوبر وصعدت بالخلف وبجوارها سالم ليصلها إلي السكن.
بعد دقائق كانت السياره وصلت أمام العماره وترجلت منها ياسمين ومعها سالم.
ياسمين: ايه يابني نزلت ليه كنت كملت وروحت عشان يوسف.
سالم: هوصلك ياسو عشان اطمن عليكي واطمن يوسف كمان.
ياسمين: اممممم طيب بقولك ايه بطل استهبال وروح ياسالم لان والدتها هنا ومش عايزين مشاكل وانا هتكلم مع روضه .
سالم: عايز اشوفها حتي لو من بعيد وحياه يوسف عندك خليني اشوفها .
ياسمين: امري لله في الجنان ده طيب اتفضل اقف بعيد وانا هحاول أخرجها البلكونه وتشوفها.
سالم؛ ربنا يخليكي ليا ياسو ياقمر.....
------------------------------------------------------
بالصعيد في مزرعه الشناوي كان محمود وطاهر يتابعون الملفات وتوزيع المحاصيل علي التجار وتسجيل كل شئ في الدفاتر.
طاهر: أني خلاص هلكت النهارده وعايزه اروح اتسبح وانااااام.
محمود: بخاطرك ياولد ابوي اني قربت اخلص اللي في يدي وهعاود طوالي علي البيت.
طاهر: ربنا يقويك يا اخوي أني هاشوف اي عربيه اعاود بيها وههملك العربيه انت تعاود بيها
محمود: ربنا يبارك فيك يا اخوي و شيعلي الواد محروس يعملي كوبايه شاي تقليه.
خرج طاهر من المزرعه وترك أخيه بمفرده وأثناء متابعه محمود الشغل رن هاتفه
محمود: السلام عليكم مين معايا.
الشخص: ايه ياابو سالم لحقت تنسي صوتي ده حتي لسه كنت معاك الصبح في المزاد.
محمود: هو انت تاني ياولد المحروق واني ماخابرش بتتكلم عن ايه وكبير علي نفسه مش علي محمود ولد قاسم الشناوي.
الشخص: ده تمامك يامحمود بس خليك فاكر أن ليك دخل في حادثه اخوك الله يرحمه سلام.
قفل الخط واسترجع محمود ظهره علي الكرسي وأغمض عينيه وتذكر .....
فلاش باك...
محمود: كيفيك ياسالم يا أخوي وكيف احوالك
سالم: الحمدلله يامحمود بخير طمني عليك انت وعلي شغلك.
محمود: الشغل عال العال ويدي في يد طاهر وكله تمام بس اني عايز اتكلم معاك شويه .
سالم: عينيا ليك يامحمود تعالي نعقد في المكتب ونتكلم خير .
محمود: يارب يكون خير وخابر زين انك الوحيد اللي هاترسيني علي بر.
سالم: قلقتني كده في ايه.
محمود: الموضوع اني دخلت في مشروع مع واحد صاحبي نبني مزرعه مواشي ومصنع لإنتاج اللحوم وبعدها عرفت ان الشركه اللي هاتبني المصنع ده ليها حق في نسبه 25٪ من الإنتاج مقابل المباني عشان نقدر نصدر بره مصر
سالم: طيب وايه المشكله في ده يامحمود وانت وصاحبك ليكم النسبه الأكبر.
محمود: ما أني قولت أسألك ياولد ابوي افهم منك ده صح ولا لأ وكمان الشركه دي كبيره قوي في مصر وصاحبها اسمه فؤاد الالفي.
سالم: فؤاد الالفي سمعت الاسم ده قبل كده وعلي العموم اديني يومين وانا اعرفلك كل حاجه عنها.
محمود: ربنا يبارك فيك يااخوي ويباركلك بس انت خابر ابوي ولا طاهر يعرفوا حاجه عنيه الموضوع دي.
سالم: ماتقلقش يامحمود سرك في بير واكيد انت حابب يكون ليك حاجه خاصه بيك ده مش عيب ولا حرام ربنا يوفقك.
باك....
ربنا يرحمك ياسالم وياريت اللي جري ما كان بس كله مقدر ومكتوب وربنا عالم باللي حصل واني ماليش يد في موتك....
$_$_$_$_$_$_$_$_$_$_$_$_$_$_
مر يومين بدون أحداث جديده وجاء اليوم فهو يوم الجمعه ميعاد زياره دكتور سراج ووالده في فيلا مراد المرشدي لخطبه شدوي وبالفعل تم الاتفاق وقرأه الفاتحه وتحديد موعد الخطوبه وجلس أهل العروسين مع بعضهما في جو فرح وسعاده وطلب سراج بالتحدث مع شدوي علي انفراد وسمح لهم السيد مراد وخرج سراج بصحبه شدوي الي الجنينه...
سراج بسعاده وابتسامه رائعه قال: الف مبروك ياشدوي وربنا يقدرني واسعدك طول العمر.
شدوي بكسوف : الله يبارك فيك يادكتور .
سراج: دكتور ايه بقي من دلوقتي سراج وبس وكمان عايزين نشوف ميعاد ننزل نشتري الشبكه والفيلا من بكره تحت امرك تقدري تشوفيها عشان تصميمي ديكوراتها علي ذوقك.
شدوي: الوقت اللي يريحك والفيلا انا حابه نكون مع بعض ونختار ونصمم كل حاجه فيها عشان تبقي حياتنا كلها مشاركه.
سراج وهو ينظر لها بإعجاب انتي بجد جميله اوي من جوه قبل من بره وانا محظوظ بيكي فعلا .
شدوي: انا اللي محظوظه بيك أكتر لانك انسان محترم وشخصيه رائعه .
سراج: شدوي ممكن أسألك سؤال وتجاوبيني عليه بكل صراحه ..انتي اللي بعتيلي بوكيه الورد يوم عيد ميلادي صح.
شدوي بكسوف اكتر وهي تفرك يدها ببعض قالت اه انا كنت عايزه اقدملك اي حاجه تسعدك في اليوم ده.
سراج: شدوي بحبك ....