الحلقة الرابعة والعشرون والخامسة والعشرون
بقلم شيمو الخطيب
الحلقه ٢٤
من (غمرتني عشق)
♥️اللهم اني لا أسألك رد القضاء ولكن أسألك اللطف فيه،، فالطف بنا فانك انت اللطيف الخبير❤️
بسم الله نبدأ
امجد وصل لفرح قاسم ودخل وسلم على حازم ومحسن،، وبص على قاسم ولقاه قاعد حزين بالمقارنة بحسام، وفجأه قاسم قام وساب الفرح كله
امجد باستغراب: ايه ده يا حازم بيه، هو قاسم راح فين،، هو في مشكله ولا ايه
حازم بلبخه: لا، لا ابدا، ده يمكن تعب شويه ولا حاجه، متقلقش يا أمجد بيه،، انا هروح اشوف ماله وهرجع على طول
امجد بص على محسن، وكان موجود أدهم السلاموني صاحب شركه كبيره برده،،،
محسن استأذن ومشي قبل ما حد يفكر يكلمه
أدهم : انا بجد مش فاهم في ايه يا أمجد بيه، من ساعة ما الفرح بدأ وتحس ان قاسم العزيزي مغصوب على الجواز،ولولااني عارف شخصية قاسم كويس، كنت صدقت فعلا انه مغصوب،
امجد: ليه يا أدهم بيه هو ايه اللي حصل
ادهم: لا بس دايما قاعد مكشر، ومقامش من على الكرسي ولا فكر يرقص مع عروسته ، مع ان عروسته جميله، وتستاهل الصراحه انه يفرح بيها
امجد: مش بالشكل يا أدهم بيه، الجمال مبيتقسش كده، الجمال جمال الروح والأخلاق، انا طبعا مش بعيب في بنت محسن بيه، لا ابدا، بس انا حبيت اقولك ان الأخلاق اهم من اي حاجه، وربنا يسعد الجميع
أدهم : عندك حق يا أمجد بيه، ربنا يسعدهم ويفرحنا باولادنا،،، بس صحيح، هو ابنك مش ناوي يرجع ولا ايه،
امجد بزعل؛ ابني هاجر يا أدهم بيه، يعني خلاص، مبيفكرش يرجع، ولا يهمه اي حاجه هنا حتى انا مبقتش أهمه
ادهم: لا حول ولا قوة الا بالله،، طب والمشروعات اللي انت عاملها، هتبقى لمين في الاخر، ما اكيد ليه
امجد؛ وهو ميهمهوش حاجه زي دي، ابني الحمد لله ميسور الحال جدا، واتجوز وعاش حياته في أمريكا خلاص، ومبقاش محتاج مني حاجه، لكن بيتصل بيا كل فتره يطمن ويقفل، زي ما تقول كده، بيعمل واجب وخلاص، يلا، ربنا يصلح حاله،
أدهم : متزعلش نفسك يا أمجد، بصراحه انت لو جدع، اتجوز، اهو تلاقي حد يونسك، وياخد بحسك
امجد وقف ساكت وبيفكر، ومردش عليه
----------------- بقلم شيمو الخطيب
قاسم سأل حسام على اسم المهندس،
حسام: ده يا سيدي اسمه المهندس مؤمن المرشدي
قاسم : وانت عرفته منين،، وعرفت ازاي انه احسن مهندس في مصر
حسام: يابني ده مفيش مهمه بيطلعها المقدم نادر الا ومؤمن معاه
قاسم بعدم فهم، المقدم نادر!!! تمام تمام، احنا نطلع نخلص من القرف اللي بره ده، وبعدين نشوف حل
حسام : لاااا.،، ده قرف عندك انت، انما عندي انا، نوتيلا بالقشطه
قاسم ضحك : اااه ماشيه معاك،
حسام بغيظ؛ قر عليا بقه،،، وحط ايده على كتفه،،،، ربنا يسعدك ياصاحبي
قاسم ابتسم بوجع وخرجوا الاتنين مع بعض، وقعد قاسم بدون اي كلام. وخلص الفرح والمعازيم بيسلموا على العروسين
امجد بيسلم على قاسم وحضنه جامد، لدرجة ان قاسم استغرب حنيته
قاسم: انا بجد مبسوط قوي من وجود حضرتك يا أمجد بيه
امجد بحزن : ربنا يسعدك ياقاسم يابني يارب،
قاسم بص ليه وقلبه دق ومش عارف هو ليه حاسس انه يعرف حاجه، أو ليه حاسس ان امجد حاسس بوجعه والمه،،
قاسم: امجد بيه، هو فيه حاجه حضرتك عايز تقولها ومحرج
امجد بصله وضحك بوجع: لا يابني، انا بس حاسس انك انت اللي عايز تقول ومش قادر
قاسم اتنهد بوجع ورفع راسه بص للسما وقال: ااااااااه،، انا فعلا جوايا كتير لكن للأسف مش قادر اتكلم،،. ونزل راسه وبص لامجد
لكن خير ، اكيد ربنا كاتبلي الأحسن، واكيد القدر هيقول كلمته في النهايه وانا واثق في عدل ربنا،
امجد ابتسم لما سمع كلامه ، وحس انه هو وعشق بيفكروا نفس التفكير، وسلم عليه تاني واستأذن ومشي،
حسام اخد رنا وطلعوا على شقته، اما قاسم دخل الفيلا وطلع على اوضته القديمه وكانو طبعا فاتحين عليها اوضه تانيه جنبها، وعاملين جناح خاص لقاسم وجيجي
جيجي واقفه تحت مع فريده وحازم ومحسن وهدى
محسن بنرفزه: لا يا حازم،، كده كتير، ابنك ده مبقاش يعمل اعتبار لحد، واللي عمله انهارده ده مايصحش ابدا،،
حازم: قاسم محتاج مننا الصبر يا محسن،، واكيد جيجي هتتعب معاه في الأول، لكن لازم تصبر، صدقني قاسم مع الوقت هيتغير
فريده بصت لجيجي: بصي يا حبيبتي، انا عايزاكي تتحملي اي كلمه في الأول،وتحاولي بقدر الإمكان انك تمتصي غضبه، وتقربي منه بحب،، واوعى تنرفزيه او تكسري كلمته، وواحده واحده لما يحس بحبك، هتلاقيه قرب، منك، بس متستعجليش، على اي حاجه يا جيجي
هدي: وهو ده عين العقل يا حبيبتي، اطلعي بقه ، وحاولي انك تقربي منه بس بالعقل
جيجي واقفه وخايفه تطلع، وحاسه انها بترمي نفسها في جحيم، لكن سمعت كلامهم وطلعت ليه
جيجي فتحت الباب، وكان قاسم في الحمام بياخد شاور
قعدت على السرير ومتوتره وبتفرك في صوابع اديها. وفجأه باب الحمام اتفتح وكان قاسم خارج لافف فوطه علي وسطه وبينشف شعره
جيجي قلبها دق بخوف، ووقف
قاسم بص عليها، وكمل تنشيف، وبيدندن بأغنية زي ما انتي، وكأنها مش موجوده
جيجي؛ احم،،، هو، هو، انت،،
قاسم بص عليها وهو بيلبس،، مالك، بتقطعي في الكلام ليه كده،، ايه مكسوفه ولا ايه
جيجي: لا ابدا مفيش، بس انا عايزاك تساعدني في فك الفستان والطرحه، ممكن ولا لأ
قاسم : اممممم، ممكن طبعا،. البس هدومي واجي اساعدك
جيجي ابتسمت انه وافق، وبدأت اعصابها تهدي، ووقفت تبص ليه وهو بيسرح شعره بحب واعجاب شديد
قاسم قرب منها : ها اعمل ايه لاني مش عارف بصراحه
جيجي: لفت ضهرها،، افتح بس السوسته، وفكلي دبابيس الطرحه من شعري
قاسم: اممم وقعد فك دبابيس طرحتها وكانت كتير، وقال: ايه ده، هما خايفين الطرحه تهرب من شعرك ولا ايه
جيجي بضحك: لا يا حبيبي، هو لازم كده عشان تبقى ثابته وتتحمل الرقص والتنطيط ، بس انهارده بقه مكنش فيه حاجه من دي خالص
قاسم وهو بيكمل فك : امممم، وهو حد منعك ترقصي، مقومتيش ليه
جيجي بلوم: انت مشجعتنيش بصراحه ياقاسم، ولفت وشها ليه،،، انت كنت قاعد كأنك مجبر على جوازك مني والكل لاحظ ده
قاسم بعد عنها شويه : بصي يا جيلان، عشان بس تبقى عارفه مين هو قاسم العزيزي، انا محدش في الكون كله يقدر يجبرني على حاجه انا مش عايزها، انا اتجوزت بارادتي، لكن فرحان بقه او لا، فدى حاجه خاصه بيا انا وبس، لأنها مشاعري انا، ملكي انا، مش ملك حد تاني، فوفري النغمه دي، لأني مبحبهاش
جيجي بزعل : يعني افهم من كده انك مش فرحان بجوازك مني،
قاسم: قولتلك ان دي حاجه خاصه بيا، وانا مبحبش اعيد كلامي مرتين، واحب اللي يكلمني يبقى عنده سرعه بديهه، يعني مش غبي يا جيلان
جيجي: سكتت، وادته ضهرها وهو خلص فك الطرحه
قاسم اتنهد بزهق: خلصت الحمد لله،
جيجي انتهزت الفرصه : طيب فكلي الفستان
قاسم بص بقرف، وشد سوستة الفستان وبعد
جيجي: ايه يقاسم بعدت ليه
قاسم: لا ابدا، انا خلصت مهمتي، ايه،،،؟ هو لسه فيه حاجه تانيه؟
جيجي بزعل : لا مفيش انا هدخل اخد شاور،،
قاسم : تمام، وانا هنزل تحت شويه وراجع
جيجي؛ بلهفه،،، طب ليه،،، هتنزل ليه وتسيبني
قاسم بمكر: لا متقلقيش، انا مش هسيبك دلوقتي، وابتسم ، ونزل
جيجي دخلت اخدت شاور بحزن كبير وقاسم نزل ودخل أوضة عشق وجرى على الكومود وفتح الدرج وطلع الورقه، وقراها تاني ، وضمها بوجع وقال: وحشتيني يا عشق، وحشتني كل ملامحك، نفسي اشوفك،، بس انا عايزك تتأكدي اني منستش اي كلمه ما بينا،، اي موقف حصل محفور في دماغي، ملامحك كلها لما بغمض بشوفها، انا عمري مهنساكي ياعشق، وهلاقيكي،، انا عارف اني هلاقيكي ، بس لما ربنا يأمر بكده، انا واثق انك قريبه مني، حاسس انك جنبي، بس مش عارف فين، لكن حاسس بيكي والله، حاسس بنفَسك في المكان، عشق، انتي غمرتيني عشق ياعشق، ودموعه نزلت، وباس الورقه والمصحف، ودخل غسل وشه وطلع
------------------- بقلم شيمو الخطيب
حسام ورنا
وصلوا الشقه، ورنا نزلت من العربيه بكسوف
حسام بعيون بتلمع بفرحه : اميرتي،، وحبي انا،، منوره دنيتي يا رنا،،
رنا نزلت وشها في الأرض : وانت منور حياتي كلها ياحسام
حسام؛ اموت انا في الكسوف ده،، طب يلا بقه نطلع على عشنا، الشقه وحشتني بصراحه
رنا: بقه الشقه وحشتك، ماشي ياحسام
حسام ضحك: يابت،،، الشقه دي هي اللي هتشهد على اكبر حدث تاريخي في تاريخ حسام المغازي
رنا بكسوف ؛ حسااااام
حسام: قرب منها،،، عيون وقلب وعقل حسام
رنا ضحكت ودوبت حسام اكتر
حسام: ااااه،، مش قادر، يلا بقه نطلع قبل منتفضح
حسام شال رنا وطلعها الشقه ونزلها قدام الباب وفتح الباب ودخلوا
رنا وقفت جنب السفره مكسوفه، وهو قرب منها وعنيه كلها حب وبعد خصلة شعر نازله علي وشها وقال بهمس: بحبك،، بحبك قوي يارنا ،،
رنا بفرحه :وانا كمان يا حسام، بحبك قوي
حسام قرب منها وباسها بكل حب واشتياق وهي بادلته الاحساس، وتاهو في بحر حبهم وبعدها حسام بعد
حسام: بقولك ايه، احنا ندخل ناخد شاور، ونتوضي ونطلع نصلي، عشان ربنا يباركلنا في حياتنا
رنا بتجمع في اعصابها وقالت بصوت مبحوح : حاضر ياحسام
حسام؛ قلب حسام والله،
وفعلا اخدوا شاور وصلوا وعاشو أجمل ليلة حب وبقت رنا اخيرا ملك لحسام المغازي وبس، ونقولهم الف مبرووووك
------------- بقلم شيمو الخطيب
قاسم قاعد في اوضته في البلكونه وخرجت جيجي، لابسه قميص لا تعليق عليه، وبتسرح شعرها قدام المرايه
دخل قاسم الاوضه واتفاجئ بمنظرها ووقف وبص ليها وهي بتسرح بدلع وبتحاول تغريه بكل الطرق،
قاسم قعد علي السرير، واتصل بايمن
وجيجي مستغرباه جدا
قاسم؛ ها يا ايمن، وصلت لايه
ايمن بحرج: انا مش عارف اقولك ايه يامستر قاسم
قاسم بخنقه؛ خلاص يا ايمن، روح انت دلوقتي عشان تلحق تنام، وانا أن شاء الله بكره هاجي واحل المشكله دي، بس اهم حاجه متتاخرش بكره ان شاء الله
ايمن: تحت امرك يا قاسم بيه
وقفل قاسم وبص لجيجي وقال: مالك بتبصيلي كده ليه
جيجي: هو انت نازل شغل بكره ياقاسم
قاسم ببرود: اكيد،،، في مشكله في الشركه ولازم اصلحها
جيجي: طيب اونكل حازم يصلحها لكن انت لسه عريس. ازاي هتنزل يوم الصباحيه
قاسم نام على السرير وشد الغطا عليه: جيجي،، انا مصدع ومحتاج انام عشان الحق شغلي، وبعدين انا قولتلك ان فيه مشكله ولازم انا اصلحها ، فبلاش اعيد كلامي مرتين
جيجي بخنقه: لا بقه مهي دي مش عيشه
قاسم ببرود وهو نايم: هي دي عيشتي لو عجباكي يبقى تمام، اما بقه لو لا، عندك والدك وحازم بيه تقدري توصلي معاهم لحل وتبلغيني بيه
جيجي رجعت في كلامها : خلاص ياقاسم انا اسفه، بس ممكن تقعد معايا شويه أنا مش جايلي نوم
قاسم نام على السرير: بصراحه انا تعبان، ومش قادر اقعد،
جيجي : ماشي ياقاسم انت حر،، وقعدت على السرير جنبه تبص عليه، وبعدين قربت منه وحضنته من ضهره،،
قاسم قام بسرعه من مكانه، كأن عقربه قرصته، واتنرفز ووشه طلع نار،،
انتي اتجننتي ولا ايه، اوعي تفكري ان بعمايلك الرخيصه دي هتهزي شعره مني، انسى يا جيلان، لا انتي ولا ميه من عينتك، انتي مش النوع اللي يشدني يا جيلان، انتي ولا حاجه،، وعايزك تعرفي ان انا قلبي اتقفل على واحده وبس، ولا يمكن هقرب من حد غيرها، واخد غطا وخارج من الاوضه
جيجي بعياط وصدمه : طب استني انت رايح فين
قاسم : وقتك معايا خلص، انا نازل انام تحت، ورزع الباب ونزل
وقعدت جيجي تعيط لحد ما الشمس طلعت
--------------- بقلم شيمو الخطيب
عشق قعده في اوضتها في استراحة المستشفى، وبتعيط وفاديه دخلت عليها
فاديه: ايه ياعشق يابنتي، مش ناويه تريحي عينك شويه، يابنتي ما انا ياما قولتلك عرفيه مكانك وانتي رفضتي
عشق بعياط : مكنش ينفع يا ماما، حازم مكنش هيسيبنا في حالنا،
فاديه: بس قاسم كان قادر يحميكي يا عشق
عشق: انا عارفه ده كويس يا ماما، بس للاسف كان هيخسر عيلته كلها، وهكون انا السبب في ده، يبقى ليه، بالعقل كده احنا مينفعش نتجوز، حياتنا كلها كانت هتبقى مشاكل،، حبنا كان هيتوه وسط المشاكل دي يا ماما
فاديه بقلة حيله :لا حول ولا قوة الا بالله،،عندك حق يا بنتي،،، ربنا يكتبلك الخير يا حبيبتي يارب،،
عشق بدموع: يارب يا امي،،، صحيح، انا ان شاء الله هكمل تعليمي
فاديه بفرحه: انتي بتتكلمي جد،، طب ازاي ياعشق،
الباب خبط وكان امجد،، عشق فتحت: امجد بيه ، اتفضل
فاديه : اهلا يا أمجد بيه، اتفضل، نورت استراحتنا المتواضعه
امجد بحب: تسلمي يا حاجه فاديه يارب، دي منوره بيكو والله وبص لعشق
ايه ياعشق، وشك عامل ليه كده، ومش ناويه تطلعي للمرضى ولا ايه،
عشق: اكيد هطلع، انا حياتي متعلقه بيهم هما يا أمجد بيه
امجد: خلاص ياستي، وانا عندي ليكي خبر هيفرحك جدا
عشق وفاديه انتبهوا ليه، وعشق قالت،،، خير يا أمجد بيه
امجد: انا هروح دلوقتي، هقدملك في كلية الطب، انا سالت وعرفت انك ينفع تدخلي الكليه بتنسيقك بس طبعا الاولويه للدفعه الجديده، لكن لو فيه مكان ليكي اكيد هتدخلي خصوصا انك كنتي متفوقه،، ، انا بجد نفسي اشوفك اكبر دكتوره في مصر، وساعتها هعينك عندي، وتعملي صيت عالي قوي في المستشفى
فاديه فرحت قوى وقعدت تدعي لامجد بيه، وعشق كان نفسها تترمي في حضنه لكن حيائها منعها،: انا مش عارفه اشكر حضرتك ازاي،، والله بعتبر حضرتك زي والدي واكتر
امجد انتهز الفرصه وقال: احم، بصراحه بقه، انا كنت عايز اطلب طلب، وخايف تكسفوني
فاديه : ياخبر يا أمجد بيه، ده انت لو طلبت عنينا هنقدمهالك من غير تفكير والله،
امجد؛ حيث كده بقه اتشجع، وبص لعشق،، انا،،، انا، انا عايز اطلب ايد والدتك ياعشق،(وكمل بسرعه) واتمنى تفكروا قبل أي قرار، انا حابب اني ابقى مسؤول عنكو في كل حاجه، عايز لما احب اخفف عنك واضمك لحضني يبقى من حقي يابنتي، عايز يبقى ليا عيله يخافو عليا واخاف عليهم، ابني مهاجر ومش راجع، وانا بصراحه خايف اموت ومحدش يعرف عني حاجه
عشق جريت عليه : بعد الشر عنك يا أمجد بيه، اوعي تقول كده، انا مقدرش اتخيل حياتي من غيرك
امجد بفرحه: افهم من كده انك موافقه
عشق بصت لوالدتها وضحكت : انا عن نفسي معنديش مانع، اهم حاجه بقه، فوفه، لازم ناخد رأيها
فاديه واقفه وشها احمر زي الطماطم ومش عارفه ترد، وقالت، احم،،، اللي تشوفوه
امجد فرح جدا انهم وافقوا ومن غير تفكير، وده شجعه انه يعجل بكتب الكتاب.
عشق قربت من والدتها وحضنتها وعيطوا الاتنين في حضن بعض، ان اخيرا ربنا عوضهم وبقي ليهم ضهر وسند وبدأت الحياه تضحك ليهم من تاني،
امجد خرج من عندهم في قمة سعادته، وعشق سألت فاديه : ايه يافوفه. ده انتي كنتي واقعه بقه ههههه
فاديه ضحكت: يوه، جتك ايه ياعشق، يابت انا عايزه حد يبقى في ضهرنا، حد يحمينا، يبقى سند لينا، وبصراحه الراجل من يوم ماشوفناه وهو عمل معانا الخير كله، يبقى ليه لا، حتى تبقى دخلته علينا مشروعه،
عشق بابتسامه،،،، حبيبتي يا أمي، الف مبروك، وانا اتمنالك كل الخير والسعاده لأنك عانيتي معايا كتير،
فاديه بدموع : انا برده اللي عانيت، ده كفايه شقاكي وتعبك، وبهدلتك عند اللي يسوي واللي مايسواش عشان بس توفري علاجي، روحي يا عشق يابنتي، إلهي وانت جاهي يفرح قلبك، ويجمعك مع قاسم ابن هدى في بيت واحد، ويلم شملكو ويجعله من نصيبك قادر يا كريم، واشوفك اكبر دكتوره في العالم كله
عشق بتضحك بدموع : في العالم، طب خليها في مصر الأول
فاديه بدموع : لا انا عايزه العالم كله يتكلم عنك ياحبيبتي
عشق حضنتها : ان شاء الله يا ماما. ربنا ما يحرمني منك ابدا يا حبيبتي
--------------- بقلم شيمو الخطيب
قاسم قام الصبح بدري ولبس ونزل ومحدش حس بيه، وراح على الشركه
دخل ومكنش اغلب الموظفين وصلوا،
واتصل على حسام اللي كان نايم وواخد رنا في حضنه. وبص على تليفونه ولقى قاسم، نفخ بضيق وقال: هو عيل مقلق طول عمره، وباس رنا وعدلها على المخده، وخرج بره يرد عشان ميزعجهاش
حسام بضيق: نعم، خير،،
قاسم بضحك: صباحيه مباركه ياعريس،
ايه شرفتنا ولا فضحتنا، هههههه
حسام بنرفزه: يعني انت متصل بيا دلوقتي عشان تقولي كده، تصدق انت عيل مستفز،، على العموم يا اخويا شوف انت عملت ايه هتلاقيني عملت زيك بالظبط
قاسم ضحك قوي : يبقى فضحتنا،، هههههههههههه
حسام ضحك: يعني انت مفضوح هههه
قاسم:هههههههه طبعا وليا الشرف كمان،.
حسام ضحك وفهم ان صاحبه ذل مراته في أول يوم،،، المهم انت عايز مني ايه دلوقتي
قاسم؛ عايزك تيجي الشركه عشان تتصل بالمهندس يجي يحل المشكله
حسام اتنرفز : انت هتهزر يا قاسم،، هنزل يوم صباحيتي يا جدع، متخلي عندك دم
قاسم؛ طب ما انا نزلت يوم صباحيتي، وبعدين هما ساعتين، وارجع على طول، مش هاخرك والله
حسام بخنقه: استغفر الله العظيم،، كان يوم اسود يوم معرفتك
قاسم بغيظ : مهو لو مكنتش عرفتني مكنش زمانك متجوز اختي يافقيق
حسام: صح، في دي عندك حق، كان يوم عسل يوم معرفتك، ها كده حلو
قاسم: ههههه، حلو يا خفيف،. يلا أنجز ومتتاخرش
حسام وبيصك على سنانه: حاضر، حاضر
حسام ساب رنا نايمه ومحبش يقلقها ولبس هدومه بسرعه ونزل الشركه لقاسم
وصل حسام ودخل المكتب: قعد قدام قاسم بتعب:،،، ها يا متعب، عايز ايه
قاسم: حمدلله على السلامه،،
حسام: أنجز يا عم،،، هو انا جاي من سفر
قاسم ضحك: يابني اتكلم كويس مينفعش كده،،
حسام برخامه: ها عايز ايه يا مستر قاسم
قاسم : هههههه والله مجنون،، المهم انا عايزك تكلم المهندس مؤمن يجيلي انهارده ضروري
حسام: والله انت محسسني انه صاحبي، يا بني انا والله ما اعرفه، انا اعرف المقدم نادر فأنا هكلمه، ويارب يكون صاحي عشان ميكلبشنيش
قاسم؛ كلم اللي تكلمه،، المهم ان المشكله دي تخلص انهارده
حسام بص ليه بنفاذ صبر واتصل على نادر
نادر رد؛ الو سلام عليكم
حسام: وعليكم السلام،، اخبار حضرتك ايه ياسيادة المقدم
نادر: انا بخير الحمد لله،، مين معايا
حسام: انا الظابط حسام المغازي، كنت قابلت حضرتك قبل كده في فرح الظابط هشام، واتكلمنا كتير
نادر: ايوه ايوه، عرفتك، وبعدين انا سامع عنك حاجات كويسه جدا، فرصه سعيده بجد يا حسام
حسام: تسلم ياباشا احنا بنتعلم من حضرتك
نادر؛ ربنا يكرمك يارب،،،
حسام بحرج: هو،، هو، انا كنت عايز من حضرتك طلب
نادر: اوؤمر ياحسام، خير طلب ايه
حسام: كنت عايز اسأل حضرتك عن المهندس مؤمن المرشدي، بصراحه في مشكله في شركة العزيزي ومحتاجينه فيها، ده لو أمكن يعني
نادر : اممممم، والله مش انا اللي اقدر اقولك ممكن أو لا، انا هكلمه وارد عليك، اديني دقيقتين بس
حسام : براحتك يافندم انا في انتظارك
وقفل حسام معاه، وقعدوا استنوا اتصاله، وفعلا نادر اتصل وقال انهم هييجوا بعد ساعه ان شاء الله
وعدت الساعه ودخلت امل تبلغ قاسم
أمل : قاسم بيه، في اتنين بره وعايزين يقابلوا حضرتك
حسام بلهفه مين يا امل
أمل؛ المقدم...
حسام قاطعها: وسايباهم بره، وخرج بسرعه ورحب بيهم جدا ودخلهم، وقاسم قام ليهم وسلم عليهم
قاسم: والله انا ليا الشرف ان حضراتكو شرفتوني انهارده
نادر؛ الشرف لينا ياقاسم بيه، شركة العزيزي شركه كبيره وليها قيمتها وبصراحه انت سمعتك سابقاك
قاسم؛ شكرا لذوق حضرتك يافندم، تحبو تشربوا ايه
مؤمن: لا ياقاسم بيه تسلم،، حضرتك بس عرفني فين المشكله وان شاء الله هنحلها
قاسم؛ لا يا بشمهندس لازم نرحب بيكو الأول وبعدين نشوف فين المشكله. بس على الاقل نعرف بعض اكتر
مؤمن؛ لا لو على المعرفه، فأنا عن نفسي باخد على الناس بسرعه جدا وخصوصا لو محترمين وولاد ناس زي حضرتك،، فاعتبرني اخ ليك،،، وكمان هظبطلك العطل ده كادووو مني ليك، يلا ابسط بقه ياعم
نادر بتريقه: كادووو، لا وبتتكلم كأنك واثق انك هتحله، متستني شوف هتعرف ولا لا
مؤمن بص لنادر ورفع حاجبه : انا من الاول، وبقول انت مش اخويا،، يابني سيبني اشوف شغلي عشان اسيبك تروح لابنك اللي دقيقتين ويكلمك دلوقتي
قاسم ضحك :من الواضح كده ان علاقتكوا قويه جدا ببعض
نادر حط ايده على كتف مؤمن وقال: مؤمن ده اكتر من أخ، وبجد من اجدع الناس اللي هتتعامل معاهم.
حسام: بقولكوا ايه متخلعوني انا من الحوار ده انا لسه عريس جديد ودخلتي كانت امبارح، بالله عليكو تعتقوني لوجه الله
كلهم ضحكوا ومؤمن قال: ياعيني يابني وايه اللي جابك دلوقتي، شكل العروسه طردتك،،
حسام بضحك: ههههه لا والله، ده حكم القوي (وبص لقاسم)،، اخو العروسه
مؤمن بص لقاسم : امممم، لا طالما ابو نسب، يبقى تسكت خالص، وضحكوا كلهم،
قاسم ضحك : اتفضل يا بشمهندس على أوضة التحكم في الشركه،،
مؤمن : مبلاش بشمهندس دي، خلينا كده من غير القاب بصراحه الالقاب دي رسمي قوي وبتخنقني،
قاسم : وانا ليه الشرف يا بشمهن... قصدي يا مؤمن،، ههههه
مؤمن ايوه كده تمام قوي،، ومشيوا وقاسم ساب مؤمن براحته ورجع اتكلم مع نادر وحسام.. وبعدين رنا كلمت حسام وخرج يرد عليها،
قاسم اتكلم مع نادر، وانتهز الفرصه وحكاله حكايته مع عشق باختصار قبل حسام ما يرجع، وكان لأول مره يتكلم مع حد غريب عن عشق، وزعل نادر جدا عليه،
وقاله انه هيحاول يلاقيها وهيكلم ناس كتير جدا في الموضوع
دخل مؤمن بعد فتره وقعد على الكرسي بتعب : اااااه، ايه ياعم ده، ده الدنيا كانت بايظه خالص، والبرامج اللي انتو شغالين بيها دي قديمه،
قاسم بصدمه : يعني ايه، حضرتك موصلتش لحاجه
مؤمن رفع حاجبه وبص لنادر: رد انت يا نادر عشان متغباش عليه،، بيقولك انا موصلتش لحاجه
قاسم ضحك؛ ههههه انا اسف جدا، انت بس قلقتني
مؤمن بضحك: خلاص هتنزل المره دي، هههه، (وبدأ يشرح لقاسم) بص ياسيدي، انا ظبطتلك كل السيستم بتاع الشركه، وشغلتكوا على برامج حديثه، و فهمت مهندس الكمبيوتر اللي عندكو وعرفته لو المشكله دي قابلته تاني يتصرف فيها ازاي، وعلى العموم انا موجود معاك برده، ولو احتاجت اي حاجه، اخوك في الخدمه
قاسم سلم عليه وحضنه، : انا بجد مش عارف اشكر حضرتك ازاي
مؤمن بضحك: تشكرني من غير حضرتك، انا بصراحه ارتحت ليك يا قاسم، وحتى حسام اللي هيعيط وهو واقف معانا، حاسس انكو قريبين مني، وده قليل لما يحصل، بس بجد بدون مجامله، انت لو احتاجت اي حاجه كلمني على طول، وده الكارت بتاعي فيه كل أرقامي وعلى فكره،، انا شغلي في شركة المتحده، يعني لو احتاجت اي حاجه تقدر تجيلي هناك
قاسم؛، انا عارف الشركة طبعا حتى مديرها مستر أحمد المرشدي،، وسكت شويه،،، وكمل باستغراب،،،، هو اخوك ولا ايه؟
مؤمن بضحك: شوفت الصدف، هههه، ده اخويا الكبير ياسيدي، بس صاحب الشركه الأساسي، مصط....
قاسم قاطعه : ايوه مصطفى بيه، انا عارفه، ربنا يديله الصحه بصراحه راجل محترم
مؤمن،،، يااارب،،،، المهم يابطل انا همشي، ولو صادفك اي حاجه كلمني، وأن شاء الله ربنا مش هيجيب اعطال
قاسم،،، انا مش عارف اقول ايه لحضرتك والله، الف شكر ليك، وأن شاء الله على وعد بمقابله تانيه في ظروف احسن من كده، واسف على تعبك بجد
مؤمن بمرح: يابني انت رسمي قوي ليه كده، لا فك معايا شويه، بلاش الجو ده
حسام : قوله يا بشمهندس، ده حتى هو عريس جديد ونازل شغله يوم صباحيته، بذمتك ده يرضى ربنا
قاسم بص لحسام بضيق، ونادر ضغط على ايد مؤمن، ومؤمن فهم ومعلقش على كلام حسام
وقاسم كمل وسلم على مؤمن :انا ليا الشرف اني اكون قريب منك، الف شكر ليك يا مؤمن للمره التانيه
مؤمن بضحك : قصدك للمره المليون،، ههههه وكلهم ضحكوا
نادر : طيب نستأذن احنا بقه. وحط ايده على كتف حسام،،، انا هاخد الظابط حسام عشان اضمن انه يرجع لعروسته، لاني لو سيبته انا واثق انك هتذله
قاسم وحسام ضحكوا وحسام قال؛ هههه، اه ياباشا ده مفتري
مؤمن بتريقه : مش عيب عليك متبقاش مسيطر
نادر رد لمؤمن التريقه : ده على اعتبار انك ابو السيطره، ههههه
مؤمن : هو انت ليه يانادر يا اخويا مبتسترش عليا ابدا في اي مكان
كلهم ضحكوا قوي ونادر ومؤمن وحسام مشيوا لكن قاسم نده
قاسم : نادر بيه،، نادر وقف وبصله ورجع ليه خطوتين بعيد عن حسام ومؤمن،، و قاسم قرب منه وقال
اوعدني انك تلاقي عشق
الحلقه ٢٥
من(غمرتني عشق)
💕اللَّهُمَّ إِنِّي ظَلَمْتُ نَفْسِي ظُلْمًا كَثِيرًا، وَلَا يَغْفِرُ الذُّنُوبَ إِلَّا أَنْتَ، فَاغْفِرْ لِي مَغْفِرَةً مِنْ عِنْدِكَ وَارْحَمْنِي إِنَّك أَنْتَ الْغَفُورُ الرَّحِيمُ.💕
بسم الله نبدأ
هدي قامت من نومها، ودخلت الحمام، واتوضت وصلت، ودعت من قلبها ان ربنا يهدي قاسم ويفرح قلبه، وخرجت تتطمن على قاسم،،
نزلت هدى، وقالت لزينب تحضر الفطار وطلعت تخبط على العرسان
هدي بتخبط، ومحدش بيرد ، فقالت لنفسها اكيد نايمين
دخلت اوضتها تصحى حازم عشان يلحق يروح الشركه ،
هدي بحب: حازم،،، ياحبيبي،
حازم بنوم: اممم، ايه ياهدي
هدي:مش هتروح الشركه ولا ايه،
حازم: اه يا حبيبتي هروح ان شاء الله،، هي الساعه كام دلوقتي
هدي: الساعه ٩ الا ربع يا حازم
حازم قام بخضه: يااااخبر، ده انا اتاخرت قوي،،، بس صحيح ياهدي اطمنتي علي قاسم
هدي: انا خبطت خبطتين كده، ومحدش رد، فبصراحه اتحرجت اخبط تاني، قولت يمكن نايمين متأخر ولا حاجه
حازم : ربنا يهديه ياهدي، انا بجد مش عارف اعمل معاه ايه، ولا عارف مين فينا اللي غلطان، انا ولا هو.،، وليه كمية الكره اللي في قلبه لينا دي
هدي بزعل: ادعيله يا حازم ان ربنا يهديه ، واكيد ربنا هيتقبل دعانا
حازم قام من على السرير : يارب، يا هدى يارب،،
هدي : على متاخد شاور اكون انا كلمت رنا واطمنت عليها،
حازم ابتسم : ابقى سلميلي عليها، وحشتني بنت الايه
هدي،، عنيا حاضر،،، واتصلت على رنا ، ورنا ردت علي
طول
هدي بفرحه: صباح الخير يا قلب مامي، عامله ايه يا حبيبتي، ده انا بتصل وخايفه تكونوا نايمين
رنا: صباح الفل يا مامي، نايمين ايه بس. ده ابيه قاسم منزل حسام الشركه من الساعه ٧، ولحد دلوقتي لسه موصلش
هدي بصدمه : قاسم!!!! ، هو قاسم في الشركه؟
رنا باستغراب: ايوه يا مامي،، هو انتي متعرفيش ولا ايه
هدي: لا والله يا بنتي، ده انا خبطت عليه من شويه، ومحدش رد، قولت اكيد نايمين
رنا بضحك: لا ياستي، تلاقي جيجي نايمه ومسمعتش، لكن ابيه في الشركه من الصبح،
هدي: طب وحسام نزل ليه
رنا: والله يا مامي مش عارفه، حسام قالي ان فيه مشكله في الشركه وبيحلوها، وشويه ويرجعوا،، المهم بابي عامل ايه، ونزل شغله ولا لسه
هدي بسرحان: ها،، اه ياحبيبتي نازل اهو،، المهم انتي كويسه
رنا اتنهدت بسعاده: الحمد لله يا مامي، كويسه قوي،
هدي : يارب دايما ياحبيبتي، لما حازم يرجع من الشغل، هاجي اطمن عليكي ياقلب مامي
رنا بفرحه: تنوريني ياست الكل،،. وقفلوا مع بعض وهدي بتفكر ليه قاسم نزل بدري كده وياتري ايه اللي حصل
حازم خرج من الحمام، واستغرب سرحان هدى
حازم: مالك يا هدى، قاعده كده ليه
هدي،؛ قاسم في الشركه من الصبح يا حازم،
حازم بصدمه : مين اللي قالك، هو كلمك ولا ايه
هدي: دي رنا، بتقول انه كلم حسام ونزله الساعه ٧ الصبح
حازم بضيق: انا مش عارف البني آدم ده بيفكر ازاي، يعني مش قادر يصبر لما انا اروح
هدي بقلق: هو فيه ايه يا حازم في الشركه
حازم بخنقه : دي مشكله في سيستم الشركه بقالها يومين.،، لما اروح اشوف وصل لايه قاسم بيه،
هدي بضيق؛ بقولك ايه، اهدي عليه شويه، هو حر، انا زهقت بجد من العيشه دي، لما اروح اشوف زينب عملت ايه
حازم نفخ بضيق: ماشي ياقاسم، براحتك على الآخر
حازم نزل ورفض يفطر يادوب شرب قهوته ومشي على طول
------------------- بقلم شيمو الخطيب
في الشركه،
نادر ومؤمن وحسام نزلوا من عند قاسم،
مؤمن: الا قولي يا حسام صحيح، هو قاسم فعلا كان فرحه امبارح
حسام بزعل: للأسف اه، بس جواز بدون حب، مصالح من الاخر يا بشمهندس
مؤمن: بس قاسم باين عليه شخصيه قويه، ليه يوافق على كده
حسام: قاسم فعلا شخصيه قويه جدا، وللأسف حب واحده لكن النصيب بعدهم عن بعض،، ومن يومها وهو كل البنات عنده واحد، مش فارق معاه حلوه من وحشه،
نادر واقف سرحان واستغرب ان حسام ازاي ظابط شاطر ومعرفش يوصل لعشق
نادر : حسام، هو انت تعرف البنت اللي كان بيحبها قاسم
حسام: طبعا يا باشا، بس ليه حضرتك بتسأل
نادر: هي كانت بنت ناس ولا بنت عاديه غلبانه
حسام: بص يا نادر باشا، عشق كانت بنت محترمه جدا، ولكن للأسف كانت فقيره، وده اللي خلاها تبعد عن قاسم،
مؤمن: بس الفقر مش عيب يا حسام، وبصراحه ده مش سبب كافي للبعد، بالعكس، هي لو بنت كويسه وبتحبه كانت اتمسكت بيه،
نادر: وانت محاولتش تلاقيها يا حسام
حسام سكت شويه وقال: اكيد هوصلها ياباشا، بس لحد دلوقتي مفيش ليها أثر،
ولعن نفسه مليون مره على كدبه، هو نفسه يتكلم لكن مش قادر، ونادر حس ان حسام مجبر، وسكت هو كمان ومشيو كلهم
حازم دخل الشركه وطلع على مكتب قاسم
حازم داخل بنرفزه: ممكن افهم انت هنا بتعمل ايه يا قاسم
قاسم كان بيراجع أوراق وملفات، رفع راسه ببطئ وبصله ببرود ومردش عليه
ورجع كمل مراجعه
حازم بضيق اكبر خبط بايده على المكتب : انت يابني أدم،، انا مش بكلمك.، رد عليا زي ما بكلمك
قاسم قام وقف بكل جمود، وقال: اظن دي شركتي يا حازم بيه، ومش من حق أي حد ايا كان يقولي جاي ليه او بتعمل ايه، (وخبط بايده على المكتب) انا هنا صاحب الشركه، يعني انا اللي اسأل مش انت، وياريت بعد كده ياحازم بيه تلزم حدودك كويس وتعرف انت بتتكلم مع مين
حازم واقف مصدوم ومش قادر يصدق الكلام اللي بيسمعه
حازم فتح عنيه على الآخر : انت بتقولي انا كده يا قاسم،، ده انا ابوك، عارف يعني ايه ابوك،
قاسم بجبروت: علي الورق بس، وقرب منه،،،،، انت ابويا على الورق بس، لكن في الحقيقه، فأنا ابويا مات من زمان، مات من يوم ماختار شغله ونسي ابنه، مات من يوم مموت سعادتي جوايا، ودفن مشاعري، انت ميت بالنسبالي من زمان يا حازم بيه،. واظن انت كنت عارف وواثق من كده كويس قوي،،
حازم بذهول: انا مش قادر أتصور ان اللي واقف قدامي ده قاسم العزيزي،،، ابني
قاسم بتهكم: هههههه، لا صدق،، عشان هو قاسم العزيزي،، ايوه قاسم اللي انت حولته من إنسان حساس لانسان جامد بدون مشاعر، وده من زمان على فكره مش من قريب،،،
دخل محسن عليهم : ايه ده،، انا مصدقتش لما قالولي تحت ان قاسم هنا،، انت سايب عروستك وجاي الشركه ليه ياقاسم
قاسم ضحك : ههههه، اهلا يا حمايا العزيز،، انا بس عايز أوضح نقطه صغيره ليك عشان تعرف تتعامل معايا صح،،
محسن واقف مذهول من طريقته،،
قاسم: ههه انت مستغرب ليه يا محسن بيه، ده انا عايز اقولك، ياريت بعد كده متسألنيش جيت ليه او مجتش ليه،، (واتكلم بصوت عالي)، لأن مش انت اللي هتعرفني اعمل ايه، انت فاهم ولا لا
محسن بصدمه؛ انت اتجننت يا ولد انت ولا ايه،، انت ناسي نفسك،، ناسي بتكلم مين
قاسم بتريقه: ههههه، لا والله مش ناسي، عارف كويس قوي، انك محسن باشا القناوي، صاحب شركه من أكبر شركات الاستيراد والتصدير في مصر،، وتعتبر جزء كبير من شركة العزيزي،، بس انا احب اقولك انه خلاص(وسقف باديه الاتنين) ،،، بح،،، مبقاش ينفع نشتغل مع بعض، انا هفض الشراكه، دي وكل واحد يروح لحاله
محسن وحازم اتصدموا
حازم بصوت عالي: انت بتقول ايه ياقاسم، انت عارف ده معناه ايه، معناه ان فيه شرط جزائي هيدفع وكبير كمان،، وفيه خساره هتقع على الشركه محدش هيقدر يتحملها
محسن بثقه: انت عارف انك بكده هتهد اللي بناه ابوك كله
قاسم ضحك جامد: اللي بناه ابويا،،، ههههه، امممم، لا يا محسن بيه، الشركه دي لو كانت نجحت، فده كان بفضل ربنا وبعدين انا( وبيلف حواليهم وهما واقفين) ، انا اللي وقفتها على رجلها من تاني، انا اللي اقترحت من الاول اننا نضم الشركتين، انا اللي وقفت الشركتين دول وانتو طلعتوا على كتافي، ولو حضرتك خايف على الشرط الجزائي يا حازم بيه،، فمش قاسم العزيزي اللي تعديه حته زي دي،، ابقوا راجعوا العقود اللي مضيتوها ، فيها بند بيقول يمكن فسخ العقد من احد الأطراف اذا احس بغدر من الطرف الآخر مع وجود الدليل
وبصراحه انا زودت البند ده مخصوص ومقولتش لحد فيكو، عشان كل واحد يشتغل براحته، وتبقوا بتلعبوا في ملعبي، وانا كنت متابع كل واحد فيكو كويس قوي
العقد كان بينص على أن شغلكوا يبقى واحد، ومحدش فيكو يشتغل لحسابه الخاص
بس اللي حصل غير كده خالص، حضراتكو كل واحد كان بيلعب لحسابه من ورا التاني، وطبعا انا مش هظهر ورق لعب حازم بيه، لأن ده دليل ضدنا، اما ورق لعب محسن بيه، فموجود معايا كله، ودليل قاطع على عدم التزامه ببنود العقد، وده طبعا يدينا الحق في فسخ العقد وفض الشراكه،،، ها ايه رايكو، مش أنفع بذمتكوا (ووقف يبص بشماته على ردود أفعالهم،
-------------------- بقلم شيمو الخطيب
عند امجد
امجد راح الكليه وفعلا قدم أوراق عشق واتوسط ليها عند عميد الكليه، وفعلا قبلوها، وراجع وهو فرحان جدا وحاسس انه ممكن يكون السبب في دخول الفرحه قلب عشق
عشق واقفه في ممر المستشفى وبتكلم مع بسمه، وبيتابعوا حالة مريض وبيتناقشوا فيها
محمد قرب منهم بحرج:؛ احم،،، عشق، ممكن اتكلم معاكي شويه
. بسمه بصت ليهم،،،، ؛ احم،، طب هستأذن انا وارجعلك تاني ياعشق
عشق: طيب متتاخريش، ومتنسيش علاج الحاجه انتصار اوضه ٥٠٤
بسمه : حاضر متقلقيش
عشق بصت لمحمد؛ خير يا دكتور محمد،، اتفضل
محمد بحرج: احم،،، والله انا مش عارف ابتدي ازاي، احم،، بس بصراحه كده ومن غير مقدمات، انا معجب، بيكي واتمنى اكمل معاكي بقية حياتي
عشق اتصدمت وعنيها دمعت، وقلبها حاسه انه هيقف: احم،، ايه،، انا،،،
محمد: انا مش عايز اسمع منك حاجه دلوقتي، انا كل اللي انا عايزه منك، انك تفكري،،
عشق بدموع : اصل انت مش فاهم، انا،،
محمد قاطعها: انا عارف انك كنتي مرتبطه بشخص قبلي، بس ده مش عيب ابدا، لاني عارف أخلاقك كويس قوي، والحب في الأول والآخر حقيقه والكل بيقع فيها، بس اللي اعرفه دلوقتي انه اتجوز وعاش حياته. ليه انتي قافله على نفسك، ليه ساجنه نفسك في ماضي ومش عايزه تخرجي منه، فكري ياعشق، ولتاني مره بقولك انا مش مستعجل على الرد،
وسابها ومشي، وهي جريت و دخلت أوضة الممرضات، واترمت على السرير، وبتعيط بصوتها كله، وطلعت صورة قاسم اللي مبتفارقش جيبها ابدا، وحضنتها وعيطت وكلمت الصوره وقالت
وحشتني قوي ياقاسم،، كنت فاكره اني هقدر أواجه الناس والحياه من غيرك، لكن مش قادره، مش قادره اتحمل اكتر من كده،، حبي ليك كل يوم بيكبر ياقاسم،، نفسي اشوفك، نفسي ابص في عنيك، اشتاقت لكل ملامحك، اشتقت لضحكت،، لكلامك،، لهمسك،، لسكوتك،، لقوتك، لكل حاجه فيك،، تعبت من غيرك قوي، عايشه ومش عايشه، وفي الاخر المفروض اني اوفق ابقى ملك لحد تاني غيرك،، طب قولي انت ازاي، (وعيطت اكتر)، ازاي اقدر استحمل اني ابقى في حضن غير حضنك،، ازاي اقدر اعيش مع حد غيرك،، ازاي اكون ملك لحد تاني،، اللي مزعلني انك قدرت ياقاسم، قدرت تبقى ملك لواحده تانيه غيري، قدرت واتجوزت وعيشت حياتك فعلا.، يعني لو كنت بفكر أقرب منك خطوه،، فأنت بعدتني مليون خطوه،، (وقامت وقفت ومسحت دموعها وخرجت من الاوضه)
عشق لقت في وشها بسمه: انتي هنا من امتى يا بسمه
بسمه بزعل: لسه جايه دلوقتي ياعشق.
عشق حست ان بسمه سمعتها لكن متكلمتش ، وحبت تغير الموضوع
عشق: بسمه، انا عايزه انزل المول اللي قريب مننا ده، عايزه اشتري منه شويه حاجات وعايزاكي معايا
بسمه،، من عنيا ياعشق، يلا بينا
عشق: تمام هنزل اتوضي واصلي اغير هدومي، وانتي حصليني بسرعه
بسمه؛ فوريره، ثواني وتلاقيني قدامك
عشق ضحكت وسبتها ومشيت وبسمه قلبها هيتقطع عليها وعارفه انها بتمثل القوه لكن هي من جواها قمة الضعف
------------- بقلم شيمو الخطيب
عند سحر
طارق خبط عليها وسحر فتحت
سحر بكسوف: طارق،،، ازيك ياطارق
طارق: انا بخير طول ما انتي بخير ياسحر، وحشتيني
سحر نزلت وشها في الارض: وانت كمان يا طارق وحشتني
طارق:انا كلمت خالتي فاديه انهارده، وقالتلي ان امجد بيه هيكتب كتابه عليها بعد يومين، وانا بصراحه قررت اني اعمل كده، انا عايز اكتب كتابي عليكي يا سحر، وفرصه نبقى كلنا متجمعين، ايه رايك
. سحر بفرحه : انا اتمنى ربنا يجمعني بيك يا طارق في أقرب وقت، وفرحانه جدا لفرحة خالتي فاطمه وعشق، واخيرا الدنيا هتديهم وشها، وهتعوضهم خير
طارق بابتسامه : وعندي ليكي خبر حلو كمان
سحر :ياااه، ده الاخبار الحلوه بتيجي مع بعضها بقه
طارق ابتسم : ربنا كرمه كبير، المهم ياستي، خالتي قالتلي ان الشقه دي هدية فرحنا، يعني انا وانتي هنقعد فيها، وبصراحه انا الأول رفضت لكن هي صممت، وبصراحه كمان، هي اللي اقترحت نكتب الكتاب معاها، واتمنت ان عشق تفرح معانا، لكن اكيد ربنا شايلها الأحسن
سحر:ربنا ما يحرمني منهم ابدا، وينولك اللي في بالك يا عشق يا بنت فاديه، يارب،،،
طارق ضحك : افهم من كده انك موافقه
سحر بكسوف : طب منا قولتلك، رأيي من شويه
طارق ضحك : بس انا احب اسمعه تاني،
سحر بكسوف: طارق،، خلاص بقه
طارق : خلاص ياقلب طارق، ردك وصل يا جميل، اروح بقه أبلغ الست الوالده عشان تعمل حسابها
ومشي وسحر دخلت اتوضت وصلت، وحمدت ربنا على فضله وكرمه وستره ليها، وعيطت بدموع من كرم ربنا عليها، وانه عوضها خير عن صبرها
------------------ بقلم شيمو الخطيب
في شركة العزيزي
حازم واقف مصدوم من كلام قاسم، ومحسن مش عارف ينطق، وحس ان الدنيا بتلف بيه، وعرف واتأكد ان قاسم مش سهل، وفجأه حازم وقع من طوله ومحسن جري عليه
محسن بقلق: حازم،،، حازم،،،
حازم بتوهان : وصلني البيت يا محسن،، انا عايز ارجع البيت بسرعه
قاسم واقف ومش عارف يعمل ايه، لكن متحركش من مكانه، وحاسس ان فيه حاجه مكتفاه
محسن بص لقاسم، ياريت تبلغ البودي جارد ييجو يشيلوا حازم بيه ننقله البيت حالا
قاسم فعلا جري وكلم البودي جارد، وجم وشالوه ومحسن وصله للبيت ونزل معاه
قاسم قعد بتعب على الكرسي، وطلب قهوه من عم سيد، ومسك راسه بين اديه، ومش عارف هو كده صح ولا غلط، لكن لما بيفتكر عشق واللي عملوه فيها بيقوي اكتر وبيبقي عايز يدوس على الكل
----------------- بقلم شيمو الخطيب
حازم وصل وهدى جريت عليه واتخضت،
هدي: خير يا محسن بيه، حازم ماله، طمني
محسن بنرفزه : ابقى اسألي ابنك يا هدى هانم،، انا عايز اطمن على بنتي، بنتي فين
هدي مستغربه طريقته، لكن مهتمتش وطلعت مع ناجي وصبحي، وهنا بيطلعوا حازم لفوق، ونيموه على السرير ومشيو
هدي قربت من حازم: مالك يا حازم، فيك ايه،، وايه اللي حصل،
حازم بحزن شديد: سيبيني يا هدي دلوقتي، انا عاااايز انااام،، مش عايز اتكلم في اي حاجه
هدي تفهمت الموقف، وقلعته الجاكيت وعدلته على السرير، وطفت النور وخرجت
نزلت هدى وكانت زينب صحت جيجي ونزلت قعدت مع باباها
هدي: هو ايه اللي حصل يا محسن، بيه، وياريت متقوليش اسألي قاسم، لأنك عارف كويس قوي انه مش هيريحني ويقول
محسن حكي كل حاجه لهدي، وهدى مصدومه من تصرفات ابنها، حتى جيجي، وخافت واترعبت من قاسم اكتر، وقررت انها لازم تتجنبه الفتره الجايه
-------------- بقلم شيمو الخطيب
قاسم نزل من الشركه، وبيلف بالعربيه بخنقه، ووقف قدام مول كبير ونزل يشتري منه شوية حاجات
دخل قاسم، وبيلف في المول بزهق، ونسي هو عايز ايه، بس بيلف وخلاص، وفجأه لقى واحده بتنادي وتقول
بسمه: عشق،، بت ياعشق، استنيني
قاسم بص، وجري عليها................
الحلقة السادسة والعشرون من هنا