رواية غمرتني عشق
الحلقة الثامنة عشر والتاسعة عشر
بقلم شيمو الخطيب
الحلقه ١٨
من (غمرتني عشق)
💕لا إله إلا الله العظيم الحليم، لا إله إلا الله رب العرش الكريم، لا إله إلا الله رب السماوات والأرض ورب العرش العظيم.💕
بسم الله نبدأ
عشق قاعده بتكلم ريكس وزينب قلبها بيتقطع عليها، وفجأه زينب سمعت صوت وراها
رنا استغربت لما شافت زينب واقفه كده: انتي بتعملي ايه عندك يازينب
زينب اتخضت وشهقت : هاااا، وحطت اديها على صدرها،،، حرام عليكي ياست رنا، انا قلبي وقع. خوفت لتكوني ست هدى،
رنا: متتخضيش قوي كده، وايه المشكله لما مامي تشوفك هنا،،،، وبصت جوه لقيت عشق قاعده جنب ريكس وبتعيط
رنا زعلت عليها قوي وقربت منها وشدتها تقوم تقف وعشق منهاره من العياط
رنا بزعل: عشق، انا حاسه بيكي قوي ، ومش عارفه اساعدك ازاي، بس انتي عارفه ان حبك لأبيه قاسم محكوم عليه بالإعدام، للأسف مجتمعنا بيهتم جدا بالفوارق الاجتماعيه، والمجتمع عموما عباره عن طبقات، والمشكله ان انتو بعاد قوي عن بعض، (وكملت باسف ) انا اسفه قوي ياعشق اني بقول كده، بس للاسف هي دي الحقيقه
عشق بصت بدموع: بتتاسفي ليه ياست رنا، انتي فعلا عندك حق، بس اسمحيلي اطلب منك طلب
رنا بحب: انتي تؤمري ياعشق،،،
عشق: خلي بالك من قاسم، خليكي انتي وحسام بيه جنبه على طول، حاولو تنسوه، بس متخليهوش يكرهني ياست رنا، ولا يشك في حبي ليه، انا عمري ما حبيت حد في حياتي قده، عمري ما حسيت بالأمان مع حد غيره. عمري ماقربت من حد زي ماقربت منه، وحياة حبيبك النبي ياست رنا متخليه يزعل مني، انا عارفه انه اكيد مش هيسامحني لانه طلب مني متخلاش عنه،،( وكملت بانهيار) بس انا والله ما اتخليت عنه عشان مش بحبه، لا، انا بعدت عشان هو يستاهل احسن مني، بعدت عشان معملش عداوه بينه وبين حازم بيه، بعدت عشان مخسّروش الدنيا كلها، شغله وعيلته وحياته، انا اخترت مصلحته هو، مش انا،،. أنا فكرت فيه هو ياست رنا مش فيا، بالله عليكي تفهميه كده،
رنا انهارت من العياط، وحضنت عشق، وزينب واقفه مش عارفه توقف دموعها، وقربت من عشق وحضنتها،
رنا خرجت عشق من حضنها : حاضر ياعشق، هقوله، بس انتي دلوقتي هتروحي فين،
عشق: هرجع بيتنا ياست رنا، وبعدين هنقل انا وامي عشان قاسم بيه ميقدرش يوصلي. (وعيطت جامد) بالله عليكو تدعولي ان ربنا يصبرني على بعده، (وبصت لرنا)، ست رنا، اخر طلب هطلبه منك،
رنا بعياط: اتفضلي ياعشق
عشق: انا عايزه صوره لقاسم، ممكن؟
رنا عيطت اكتر، وحضنتها وقالت: حاضر ياعشق، انا هطلع اجيبهالك واجي، ثواني بس،
عشق هزت راسها، واستنتها تجيبها، وزينب سلمت على عشق ودخلت بسرعه قبل ما حد يحس بغيابها
رنا طلعت وجابت الصوره، ونزلت ادتها لعشق، وسلمت عليها، وعشق سابتهم ومشيت، وريكس بيهوهو بصوت عالي كأنه زعلان هو كمان على فراقها
رنا قعدت جنب ريكس وعيطت بصوتها كله، لأن عشق وقاسم صعبانين عليها، وخايفه من رد فعل قاسم بعد ما يرجع
------------------ بقلم شيمو الخطيب
عند سحر
سحر قاعده مع فاديه وسرحانه،، فجأه تليفونها رن،
سحر بصت عليه واتخضت وقامت وقفت بسرعه
فاديه اتخضت منها: بت يا سحر خضتيتي، مالك يابنتي. عملتي ليه كده، ومين اللي بيرن عليكي
سحر بلبخه وخوف: ها، لا، لا يا خالتي، م، م، مممفيش،
فاديه بخوف: مالك ياسحر ياحبيبتي، فيه ايه، طمنيني، انتي خايفه ليه كده
سحر بدموع: ا، ابدا، يا يا خالتي مممفيش، ده دي واحده اكيد هتسالني عن امي وانا بس مش عايزه ازعلها
فاديه مستغربه لخبطة سحر: انتي بتقولي ايه، واحدة مين اللي هتسألك عن والدتك، دي والدتك مكانتش تعرف حد ولا بتخرج من الأساس،
سحر بتوتر : بصي ياخالتي، دي واحده معرفه، انا هخرج ارد عليها وارجعلك على طول، ومشيت من قدام فاديه بسرعه، وفاديه مستغربه منها وحاسه ان في حاجه مش طبيعيه
سحر خرجت وردت: الو،،، ايوه، انت عايز ايه
خالد ببرود: عايز ايه،، مش بدل متقولي كتر خيرك اني جيت وعزيت في امك،
سحر بزعيق: خلصني وقول عايز ايه، ولو عايز تسألني على عشق، فخلي عندك دم، انا امي توفت يعني مش فايقه اتكلم واسأل هي شغاله فين
خالد ضحك؛ :ههههههه، انتي بتضحكي عليا ولا بتضحكي على نفسك، يعني قاعده مع امها بقالك ٣ ايام.، ومعرفتيش عشق شغاله فين، امممممم، تمام قوي، انا لحد كده وعداني العيب، وصبرت عليكي كتير، اعملي حسابك الفيديو هينزل على الفيسبوك بالليل. ابقى افتحي واتفرجي براحتك، صدقيني، هيعجبك قوي، وفرصه كمان ان حبيب القلب موجود
سحر بعياط وبتبص حواليها خايفه حد يسمعها: يا اخي حرام عليك، انت ايه، مش بني آدم، ربنا ياخدك يا شيخ،
خالد ببرود: ادعي براحتك بعدين، انجزي وقولي، عشق شغاله فين بالظبط
سحر بعياط ووجع في قلبها قالت العنوان لان للأسف مفيش قدامها غير كده والا سمعتها هتبقى في الأرض
خالد بفرحه: ايوه كده، ما كان من الاول، لازم تذليني يعني، بس اعملي حسابك، لو طلع غلط هوديكي ورا الشمس،
سحر بتعيط ، طب ممكن اعرف انا هضمن منين انك مش هتنزل اللي
صورته
خالد: انا قد كلمتي، وطول مانتي حلوه معايا وبتسمعي الكلام، اعتبري ان مفيش فديوهات، اما بقه لو عاندتي معايا، يبقى قولي على نفسك يا رحمن يا رحيم،
سحر بخنقه: حسبي الله ونعم الوكيل فيك ربنا ينتقم منك ويوريني فيك يوم، يارب،، وقفلت في وشه
خالد قفل معاها واتفق مع شوية رجاله، ان هما يروحوا قدام فيلا العزيزي. ويجيبو عشق باي طريقه
.....: طيب ياسعاة الباشا احنا هنعرفها ازاي
خالد: طلع صوره من على موبايله كان مصورها وهي في الأرض،،،، بص هي دي صورتها، اظن بقه كده بقت سهله، وبعدين دي شغاله خدامه، اكيد هتبقى خارجه بره الفيلا على رجليها مش بعربيه يعني، يلا روح انت وهو، ومترجعوش الا وهي معاكو،
ومشيوا الأتنين، وقعد خالد علي امل يرجعوا بعشق،
------------- بقلم شيمو الخطيب
عند قاسم
قاسم ماشي في الطريق، وجنبه ايمن، وكل شويه قاسم يمسك تليفونه ويتصل على عشق، وطبعا مفيش رد، وبعد كده اتقفل
رمي قاسم الفون ونفخ بضيق شديد
ايمن استغرب: مالك يامستر قاسم، انا حاسس انك قلقان على حد او من حاجه،
قاسم بضيق حقيقي: مفيش يا ايمن، انا بس بتصل بحسام، وتليفونه اتقفل،
ايمن: ان شاء الله خير يا مستر قاسم اكيد هو نايم متقلقش حضرتك
قاسم بصله وسرح ومردش عليه،
وصل قاسم وأيمن،، وانشغل قاسم في استلام الشحنه، وامضة الأوراق والحسابات، بس كان كل مايفضي يرن على عشق، وبرده الفون مقفول،
ظبط قاسم كل حاجه في المينا، واستلم كل حاجه، وطلع بيها على المخازن، وظبطها هناك، وظبط حساباتها، ورجع هو وأيمن بعد يوم طويل مليان تعب، وقلق،
بعد قاسم عن ايمن وكلم رنا:
رنا قاعده في اوضتها وتليفونها رن، جريت عليه، وفكرت انه حسام، لكن اتصدمت انه قاسم
رنا لنفسها: طب انا اعمل ايه دلوقتي، اقوله، ايه، اقوله عشق مشيت، لا لا مقدرش، مقدرش أوجع قلبه، ده انا قلبي موجوع، (وعيطت) ياربي اعمل ايه،،،، اه، هو احسن حاجه اني مردش. ولما يرجع تبقى مامي او بابي هما اللي يتصرفوا
وفعلا مردتش عليه
قاسم اتخنق ورمي التليفون على كرسي العربيه بخنقه وسرح،
فاق قاسم من سرحانه وشك ان اكيد حازم او هدى ممكن يكونو ضغطوا علي عشق انها تمشي،، لكن طرد الفكره من دماغه بسرعه، وقرر ما يتصلش على حد ولما يوصل يبقى يشوف ايه اللي حصل بالظبط
------------------بقلم شيمو الخطيب
في فيلا العزيزي
هدى قاعده ومرعوبه من رجوع قاسم
هدي بقلق وخوف: حازم،،،
حازم............ و بيقرأ في مجله
هدى بخنقه: حااازم، مترد عليا وكلمني زي ما بكلمك
حازم رفع راسه ليها وقلع نضارته وقال: اممممم، عايزه ايه ياهدي
هدى بخوف؛ هنعمل ايه مع قاسم لما يرجع. تقدر تقولي هنواجهه ازاي،
حازم: انا ميهمنيش اي حاجه تحصل، المهم اننا خلصنا من البنت دي وخلاص، كله بعد كده يهون ياهدي
هدى بزعيق وغيظ منه: ازاي يهون يعني ياحازم، بقه ابنك يهون، (وقامت وقفت وفضلت رايحه جايه بقلق) انا بجد مش عارفه لما يوصل ويعرف انها مشيت هيعمل فينا ايه، ده ممكن يتجنن علينا، ده ممكن يدمر كل حاجه، ده ابني وانا عارفاه، ميكرهش في حياته قد لوي الدراع
حازم ببرود: افضلي انتي رايحه جايه كده ووتريني اكتر، (وبصوت عالي) متهدي بقه ياهدي وتقعدي، يعني هو آخره ايه، هيزعق هيثور، هيزعل كام يوم، بس في الاخر ايه، هيرضي بالأمر الواقع، وهيسكت
هدى بتريقه : هيرضي،، ده انت بتحلم يا حازم، هو مين ده اللي هيرضي،، انت محسسني انك متعرفش ابنك ولا طباعه، قاسم هيهد الدنيا على دماغنا ياحازم. انت لازم تكون واثق من كده
حازم بنرفزه : بقولك ايه، انتي هتقرفيني انتي وابنك ليه، هنقوله هي اللي مشيت بمزاجها،، وخلصنا بقه من الموضوع ده
هدي: هههه، اه وقاسم عبيط عشان يصدق، يا حازم ده......
حازم قاطعها وقام وقف من مكانه واتكلم بصوت جهوري: هددددي، مقولت خلاص بقه، ولو كان عندك حل تاني مقولتيهوش ليه من الاول، مانتي وافقتي على تهديدي لعشق، بقولك ايه خلص الكلام في الموضوع ده، وانا مش هسمح لقاسم انه يدمر اسمي وسمعتي، انتي فاهمه ولا لا
هدى بصت ليه بعياط وسكتت خالص، ودعت ربنا يعديها على خير،
---------------- بقلم شيمو الخطيب
قاسم رجع وركن العربيه بسرعه، ونزل جري منها دخل الفيلا وبينادي ،
قاسم بلهفه: عشق،،،، ياعشق،.
هدى في اوضتها سمعت صوت قاسم قلبها اتقبض، وحازم قام بسرعه من على السرير، ورنا حطت اديها على قلبها وقالت، ربنا يستر وتعدي على خير
هدي بخوف وقلق: هتعمل ايه حازم؛ ابنك رجع وهيقلب الدنيا عليها
حازم بتوتر: اهدي بس، لما نشوف اخرتها
قاسم تحت رايح جاي في الفيلا بينادي، وفتح أوضة عشق وملقهاش راح ناحية أوضة زينب وخبط على الباب وخرجت زينب بعياط
قاسم بص في وشها واتصدم من عياطها، وبصوت بيرتعش: عشق فين يازينب
زينب بتعيط وبس:
قاسم بخوف وصوت عالي: عشق فين يازينب ردي عليا
زينب: والله يا قاسم بيه، انا معرفش هي فين، انا دخلت اطمن عليها بعد انت مامشيت لقيت الاوضه فاضيه، حتى هدومها مش موجوده،،، (وده طبعا كان اتفاق بينها وبين حازم والا هيتقطع عيشها عندهم)
قاسم مصدوم ومش قادر يستوعب الكلام، وعقله وقلبه رافضين فكرة بُعد عشق عنه
قاسم بنرفز وعدم تصديق : انتي كدابه يا زينب، عشق لا يمكن تتخلى عني بالسهوله دي، عشق اكيد حد ضغط عليها تمشي، وانا مش هسكت،
وخرج للريسيبشن وبينادي بصوته كله،،
قاسم: حازم بيييه، ياحازم بيه، انزل كلمني، عملت اللي في دماغك وارتحت.،، اوعي تفكر انك بكده بتلوي دراعي، عشق انا هرجعها،،، ومفيش قوه في الأرض هتبعدني عنها، قاسم بتاع زمان خلاص، ماااات. قاسم بتاع دلوقتي هو اللي هيرفض اي حاجه ضد سعادته، انتو كلكو انانيين، كل واحد فيكو بيفكر في نفسه وبس، واكبر دليل على انك اللي ضغطت عليها تبعد انك مش قادر تنزل وتواجهني، انزل ياحازم بيه وريني نفسك، انزل قولي عملت كده ليه،(وبصوت بيرتعش) انزل قولي ان شغلك اهم من ابنك، ان سمعتك ومركزك، اهم من سعادة ابنك انزل قولي اني مش ابنك وريحني، يمكن ساعتها الاقي مبرر واحد لتصرفاتك معايا
هدي واقفه في اوضتها تعيط ورنا بتعيط بهستيريا علي كلام اخوها وحازم قرر ينزله
هدى بلهفه: جريت على حازم ومسكته،،،، رايح فين ياحازم، لا اوعي تنزل، انا معنديش استعداد للمواجهه اللي هتحصل،، انا عايزه ابني ياحازم،، (وبعياط) عايزه ابني ياحازم، مش عايزاه يضيع مني
حازم زق هدي: اسكتي ياهدي واهدي، انا لازم انزله عشان ميفكرش اننا ورا الموضوع
هدي: وهو نزولك هيأكد لقاسم كده، انت متعرفش ابنك ولا ايه، قاسم اذكي ما يكون، وعمر الموضوع مهيعدي عليه كده
حازم : ابعدي عن طريقي وسيبني انزل ياهدي،،، اوعي كده، وزقها ونزل
قاسم قاعد مش مصدق ان عشق مشيت. وفاق من سرحانه على صوت حازم
حازم: ايه ياقاسم، انت عامل هيصه على ايه، خدامه ومشيت من نفسها، هنمسك فيها ونقولها لا والنبي اقعدي اصل ابني هيموت عليكي
قاسم قاعد بيبص لحازم وبيصك على سنانه : انا عارف ومتأكد انك انت اللي خططت لكل ده، قصدت تطلعني اسكندريه عشان تنفرد بيها وتهينها وتمشيها،، لكن اقسم بالله ياحازم بيه، لهرجعها ويوم مترجع هتبقى مراتي رسمي، وساعتها مش هتشوف وشي ولا وشها،
حازم بتمثيل: يابني يا حبيبي، انا....
قاسم قاطعه بزعيق: انا مش ابن حد،،، انت عمرك ما كنت اب ليا،، انت كل اللي يهمك مركزك وبس، شكلك وسمعتك ومنصبك وبس، عندك استعداد تخسر الكل لكن متفرطش فيهم، اوعي تفكر ياحازم بيه، ان مهما قولت واقنعتني انك بعيد عن الموضوع انا هصدق، انت عمرك ما كنت صادق في حاجه، كل حياتك كدب وتجميل، عمرك ما ظهرت على حقيقتك غير معايا انا وبس،
حازم اتنرفز من كلام قاسم وقرب منه وضربه بالقلم وقال: أخرس، واوعى تنسى انك بتكلم ابوك
هدي ورنا على السلم بيتابعوا اللي بيحصل، وشهقوا من شده القلم، وعيطوا اكتر في صمت،
قاسم حط اديه على وشه وقال بوجع : مش مستغربه منك ياحازم، دي حاجه متوقعها من واحد زيك، مشاعره مش موجوده، لكن انا بقولك، (وبص لفوق لرنا وهدى) وبقولكوا انتو كمان، انا مش هتنازل عن عشق، مش هبعد عنها، ولا هسمح ليكو تبعدوها عني، فاهمين ولا لا
وسابهم وخرج جري بره الفيلا
حازم بص لرنا وهدي،، ورنا سابتهم وجريت على اوضتها، وهدى وقفت تبص على حازم ونظراتها كلها لوم وعتاب، اما حازم نفخ بضيق وسابهم ودخل مكتبه، وزينب بتابع في صمت ودموعها نازله زي المطره
قاسم خرج وركب عربيته وطلع على حسام،، رن الجرس كتير وحسام قام من نومه مفزوع
حسام قرب من باب الشقه وقال :،،، مين
قاسم بوجع : افتح يا حسام انا قاسم
حسام فتح بسرعه واتفاجئ بشكل قاسم
اللي كان ساند علي الحيطه قدام باب الشقه
حسام قرب منه وشده دخله جوه : ايه ياقاسم، مالك ياحبيبي طمني عليك
قاسم ولأول مره دموعه تخونه وتنزل على حد، بص لحسام ولف وشه الناحيه التانيه، ومسح دموعه بسرعه، وقعد على الكرسى
حسام اتصدم من شكل صاحبه. واتوجع من دموعه اللي اول مره يشوفها من يوم ما عرفه، ولف وشه ليه وقال: مالك ياقاسم، فيه ايه
قاسم وقف: حسام انا عايزك تيجي معايا لعشق حالا ، انا لازم اعرف الحقيقه. مع اني واثق بس لازم الاقيها. حسام انا مش متخيل حياتي من غير عشق. (وبصوت عالي) احنا لازم نمشي حالا. مش قادر اقعد وانا معرفش هي مشيت ليه، أو هي فين. مش قادر اقعد وانا مش مطمن عليها
حسام باستغراب: انا مش فاهم حاجه، هي عشق مش.....
ومكملش لان كده شكوكه كلها اتأكدت أن عشق مشيت برغبه من حازم بيه
حسام باسف: قاسم،،، ممكن تحكيلي اللي حصل بالظبط
قاسم حكي كل حاجه لحسام، وبكده حسام اتأكد،، وقرر انه يروح مع قاسم بس الصبح مش دلوقتي لان مينفعش يزورو الناس في وقت زي ده
قاسم سكت واستني طلوع الصبح بفارغ الصبر عشان يروح لعشق بيتها ويفهم منها ايه اللي حصل
------------------ بقلم شيمو الخطيب
عدي اليوم وكل واحد من أبطالنا النوم جفاه، ومش عارف يرتاح
قاسم مستني هو وحسام الشمس تطلع عشان ينزلوا لعشق، وطبعا محدش فيهم نام خالص
هدى وحازم ورنا نفس الوضع، محدش فيهم نام نهائي، رنا في اوضتها بتعيط. وخايفه تتصل على حسام لأنها واثقه ان قاسم اكيد عنده بس هي نفسها تطمن عليه، هدى فعلا اتصلت علي حسام وقاسم رفض ان حسام يرد عليها أو يطمنها، وحسام اضطر لكده لان حالة قاسم لا تستدعي النقاش او الرفض
خالد الرجاله بتوعه بلغوه ان محدش خرج من الفيلا، وخالد قالهم يرجعوا وبكره يوقفوا نفس الوقفه لحد ما عشق تطلع
فاديه نايمه وقلبها مقبوض ومش عارفه سبب الاحساس ده، وسحر نايمه ودموعها على خدها وخايفه على عشق، وبتدعي ربنا يسترها عليها، وينجيها من خالد واللي زيه
---------------- بقلم شيمو الخطيب
الشمس طلعت وقاسم وحسام نزلوا ووصلو بيت عشق
قاسم خبط وقلبه بيدق بسرعه، وسحر فتحت
قاسم: صباح الخير، انا اسف اني جيت بدري كده، بس ممكن تناديلي عشق
فاديه : مين ياسحر يابنتي
سحر: ده واحد بيسأل على عشق ياخالتي،
فاديه قامت جري؛ عشق، مين ده، وبصت لقته قاسم اتصدمت اول ماشافته،، لأن شكله مبهدل والحزن مالي عنيه، غير طبعا انها قلقت جدا على عشق
قاسم: ازيك يا خالتي، هي عشق موجوده
فاديه بصدمه وخوف ورعب: موجوده فين يابني، هي عشق مش عندكو
قاسم وحسام اتصدموا : عندنا فين يا خالتي، هي ما جتش،،
فاديه رجلها مشالتهاش. وقاسم لحقها ودخلها جوه، وقلبه بيدق بسرعه ونفسه اتخنق، ومبقاش عارف يعمل ايه
حسام قرب منها بلهفه وقلق:خالتي انتي كويسه دلوقتي ولا تحبي ننقلك. مستشفى،
سحر بخوف ورعب،،، خالتي ردي عليا انتي كويسه
فاديه اتعلقت عنيها بقاسم اللي بعد عنها وقعد بعيد مش عارف ولا فاهم حاجه، ومرعوب على عشق.
فاديه: بنتي فين، بنتي فين هي مش عندكو يا قاسم بيه
قاسم نزل وشه في الأرض وسكت وفاديه عيطت بصوتها كله :انا قلبي حاسس، انا حلمت بيها بتعيط (وبصت لسحر) اه،، مش انا قلتلك ياسحر، انا قولتلك ان عشق بنتي فيها حاجه، ياترى انتي فين يابنتي، ومسكت في ايد حسام،،،
مش انت ظابط يابني، بالله عليك ترجعلي بنتي، انا عايزه بنتي، عشق غلبانه وملهاش حد غيري،
حسام باسف: حاضر ياخالتي اهدي انتي بس، وانا مش هنام انهارده الا وعشق في بيتها (وبص لقاسم)، يلا بينا يا قاسم.
قاسم قام معاه من غير اي كلام، وركب العربيه
حسام بص على قاسم وشاف في عينه خوف وقلق وغيظ وقهر : قاسم متقلقش ان شاء الله خير وهنلاقيها
قاسم ساكت ومبيردش، خالص
حسام:قاسم رد عليا، طمني عليك طيب انت كويس،؟
قاسم بصله وسكت ومردش،
حسام بص قدامه وساق العربيه في صمت وطلعوا على القسم
--------------- بقلم شيمو الخطيب
في مكان تاني،
..... : ها يادكتور، فاقت ولا لسه
الدكتور: طلع بره الاوضه،،، للأسف يافندم مفيش اي استجابه، والحاله مطمنش خالص،
وفجأه سمعوا صوت الممرضه بتصرخ
الحق يا دكتور القلب وقف ياااا دكتوووور
الحلقه ١٩
من (غمرتني عشق)
💕قال رسول الله صلى الله عليه وسلم: (نضَّرَ اللَّهُ امرأً سمِعَ منَّا حديثًا فحفِظَهُ حتَّى يبلِّغَهُ غيرَهُ، فرُبَّ حاملِ فقهٍ ليسَ بفَقيهٍ، ورُبَّ حاملِ فقهٍ إلى من هوَ أفقَهُ منهُ).💕
بسم الله نبدأ
فلاش باك
عشق خرجت من الفيلا وقلبها بيتقطع وتايهه ومش عارفه تروح فين،وبتسأل نفسها،، هترجع البلد تتبهدل في الأراضي تاني وده لو خالد سمحلها تشتغل اصلا، ولو رجعت ممكن قاسم يوصل ليها بسهوله،، وازاي هتقدر تبعد عن قاسم، ومتشوفوش تاني، وازاي هتقنع والدتها انهم يسيبو بيتهم وتنقل مكان تاني، وميت سؤال وسؤال بيطاردها ومش عارفه إجابتهم،، وعيطت بصوتها كله، ومشيت في الشوارع بدون تركيز، تطلع من شارع وتدخل في التاني
لحد موصلت لشارع رئيسي، وهي ماشيه تايهه وبتعدي الطريق، وفجأه جت عربيه بأقصى سرعه خبطت عشق و رمتها في نص الطريق،، ومش باين منها حاجه من كتر الدم اللي عليها
الناس اتلمت على عشق، والكل بيقول لا حول ولا قوة الا بالله، وصاحب العربيه نزل جري،
أمجد بخوف: بسرعه ياشباب، حد يشيلها معايا، وانا هنقلها المستشفى حالا، بسرعه مفيش وقت
شاب: بس حضرتك غلطان ياباشا،، ازاي، متخدش.....
امجد بنرفزه:انت لسه هتقعد تتكلم، البنت دمها بيتصفي،
شاب تاني: دي شكلها ماتت يابيه، ،، انا لله وانا اليه راجعون
أمجد اتخنق منهم: شيلوا معايا وبطلوا فتى شويه، وبصوت عالي،،، بسرعه هتفضلوا واقفين كده
وفعلا شالوها ودخلوها عربية أمجد، وطلع بيها على مستشفى الأمل
امجد دخل المستشفى بسرعه وطلب من الأمن انهم ينقلوا عشق من عربيته
وفعلا خرجوا مع الممرضات ونقلوها،
وهو اتصل على محمد ونزله بسرعه،،
محمد بصوت عالي وتوتر من شكل الحاله : بسرعه دخلوها أوضة الكشف، ودخل بسرعه الاوضه وكشف عليها،
محمد خرج وكلم أمجد باسف: للأسف يا أمجد بيه، فيه جروح وكدمات كتيره، وغايبه عن الوعي تماما، ولازم نعملها اشعه حالا، نعرف اذا كان في نزيف داخلي او لا،، بس انا عايز اعرف ايه اللي حصل، وايه اللي عمل فيها كده
أمجد بقلق وحزن عليها: حكي لمحمد كل اللي حصل
محمد بزعل: لا حول ولا قوة الا بالله،،، ان شاء الله ياامجد بيه هتقوم بالسلامه،
أمجد : اعمل اي حاجه يا محمد، المهم البنت دي ميحصلش ليها اي ضرر، انا عارف اني مش غلطان وهي اللي طلعت قدام العربيه فجأه. لكن مش هسامح نفسي ابدا لو جرالها حاجه،، وربنا يقومها بالسلامه يارب
محمد متفهم موقف أمجد ومقدره جدا :حاضر حاضر،، يا أمجد بيه، متقلقش حضرتك
وفعلا عملوا التحاليل اللازمه، واكتشفوا أن مفيش اي نزيف داخلي، ، وكانو حطينها على جهاز رسم قلب، واكتشفوا فجأه ان القلب توقف،
----------- بقلم شيمو الخطيب
نرجع للوقت الحالي
محمد واقف مع أمجد بيه، وفجأه سمعوا الممرضه بتصرخ
بسمه: الحقني يادكتووور بسرعه، القلب توقف، يا دكتوووور محمد
محمد جرى ودخل الاوضه بسرعه: هاتي جهاز الصدمات بسرعه يابسمه، وفعلا بسمه ادته الجهاز والكل متوتر وامجد واقف حاسس ان قلبه هيوقف و خايف عليها جدا
وحاول محمد انعاشها بالصدمات الكهربيه، لحد فعلا مقدر بعد ثواني من التوقف من انعاش القلب وبدأ القلب يشتغل تاني،،،،، واول ما جهاز رسم القلب انتظم تاني
بسمه حمدت ربنا، ومحمد مسح عرقه وهدى اعصابه لانه كان مشدود من الموقف جدا
وأمجد الأمل انتعش جواه تاني و قرب من محمد بخوف وقلق: ها يا محمد طمني،
محمد بينهج من المجهود والتوتر اللي كان فيه : البنت دي غريبه، كأنها رافضه الحياه، رافضه انها تعيش، حتى وهي فاقده الوعي بالشكل ده عنيها بتنزل دموع وكأنها بتعيط،، للأسف يا أمجد بيه، القلب توقف،، وتوقفه ده ممكن يأثر على المخ، واحنا مضطرين نستنى لما تفوق، ونعرف هل هو أثر تأثير سلبي على المخ ولا لا، وده هيبان طبعا بعد متفوق
أمجد بصدمه: يعني ايه يا محمد، يعني حالتها خطر
محمد مش عارف يطمنه لانه هو نفسه قلقان: هو مش بالظبط، بس احنا هنعمل اللي علينا والباقي على ربنا، اطمن يا أمجد بيه ،بس الغريبه ان انا حاسس اني شوفت البنت دي قبل كده، لكن فين معرفش، ملامحها مش غريبه عليا، لكن للأسف مش قادر اتحقق منها، وده لان وشها كله كدمات بس متقلقش ان شاء الله خير
أمجد سند على الحيطه وراح قعد على الكرسي ببطئ وحزين جدا على عشق خصوصا بعد كلام محمد وانها رافضه الحياه، بالرغم انه ميعرفهاش، لكن صعبانه عليه جدا
------------- بقلم شيمو الخطيب
عند حسام في القسم
قاسم قاعد وساند راسه مستني حسام يخلص ويتحرك معاه يدورو على عشق
وفجأه قاسم وقف وبينهج بسرعه وحاسس ان حاجه خنقاه وصورة عشق مفارقتوش،
حسام اتخض جدا: مالك ياقاسم، فيه ايه، وقفت ليه بالطريقه دي
قاسم حاطط ايده على قلبه، وبينهج وقال: مش عارف، بس انا مخنوق، (وسكت شويه)، حسام، عشق مش بخير ياحسام، انا واثق، انا حاسس انها مش بخير، انا لازم امشي حالا
حسام لحق قاسم ومسكه : طب فهمني بس، انت حاسس بايه، وبعدين هتروح فين دلوقتي، استناني بس ١٠ دقايق وهاجي معاك
قاسم زق حسام وزعق: بقولك عشق مش بخير تقولي استنى، انا لازم ادور في كل المستشفيات، مش هرجع الا وهي معايا، وسابه ومشي
حسام احتار يعمل ايه واتردد وفي الاخر لحق قاسم وركب جنبه العربيه على اخر لحظه
قاسم ماشي وسأل في مستشفى المدينه، وطبعا موصلش لحاجه، وبعدها سأل في كذا مستشفى وبرده موصلش لحاجه، لحد موصل لمستشفى الأمل ونزل وحسام نزل وراه
قاسم دخل الاستقبال: السلام عليكم
... : وعليكم السلام يافندم، اؤمر
قاسم: كنت عايز اسأل عن أي حد دخل هنا امبارح باسم عشق احمد الالفي
البنت: ثواني يافندم هدور لحضرتك
ودورت في الاوراق
البنت: للأسف يافندم، مفيش حد بالاسم ده هنا،
قاسم بوجع: دوري تاني بالله عليكي. يمكن تكوني ما خدتيش بالك
البنت صعب عليها منظره : حاضر يافندم، بس انا متأكده ان مفيش والله
ودورت تاني وكانت نفس الاجابه
قاسم قعد على كرسي في الاستقبال وحاسس انه تايه، هو واثق انها مش بخير لكن مش قادر يوصلها وده محسسه بالعجز،
حسام طبطب على كتف قاسم : متقلقش ياقاسم، سيبلي وقتي وانا ان شاء الله هرجعلك عشق، قوم تعالي نرتاح شويه، وبعدين نشوف هنعمل ايه
قاسم بصله وسكت وقام معاه،، ركب العربيه وحسام اللي ساق
حسام : اوصلك فين يا قاسم، هترجع الفيلا؟ ، دي العيله كلها كلمتني وانا مردتش على حد
قاسم بجمود: اطلع عندك الشقه ياحسام،، انا مش عايز اسمع سيرة حد فيهم
حسام: حاضر ياقاسم،، وفعلا وصلوا وطلعوا على الشقه
قاسم دخل وبيفكر في اللي حصل، وفجأه افتكر فاديه
قاسم: حسام انت متعرفش اي رقم تليفون قريب من والدة عشق او اي حاجه نكلمها عليها
حسام خبط راسه :اوبااا، فاتتني دي والله ياقاسم، كان ممكن ناخد رقم البنت اللي معاها لكن للأسف نسيت خالص،
قاسم بضيق حقيقي: طب والعمل.،هنسيبها من غير منطمن عليها
حسام قعد على الكرسي بتعب : نرتاح بس ساعه ياقاسم وننزل يمكن تكون عشق وصلت هناك. او حد وصل لحاجه،
قاسم بزعيق: نرتاح!!! ، انا مش هرتاح الا لما اوصل لعشق يا حسام، انت عارف يعني ايه مش لاقي عشق، يعني عايش من غير قلب، يعني مش عايش من الأساس، حسام،، انا لا زم اوصل لعشق، والمفروض انك تساعدني، الا لو تفكيرك زيهم، وساعتها قولي، عشان اتحرك لوحدي ومعتمدش عليك
حسام قرب من قاسم بسرعه: انت بتقول ايه ياقاسم، انا عمري متخلي عنك، ولا أقف ضدك ابدا، ده اختيارك ، ولو اخدت رأيي هقولك ان عشق تتاقل بالدهب، وانا متمناش ليك احسن منها، بس للاسف ياقاسم، عيلتك عمرها مهتوافق،وهتقوم عليك حرب كبيره، وصدقني هتطلع خسران في الاخر
قاسم ضحك بوجع: هههههه، هو انت تفتكر ياحسام انا لو اختارت عشق وخسرتهم، ابقى خسران، لا، لا، لا. بالعكس ياصاحبي، انا هبقي كسبت كل حاجه، ومخسرتش حاجه خالص، حسام، انت مش فاهم عشق دي ايه بالنسبالي،
(وقعد على الكرسي وسند ضهره لورا واتنهد) عشق دي كل حياتي، عشق دي طريقي الصح اللي المفروض امشي فيه، لكن للأسف هما مانعني يا حسام، دايما بيجبروني للغلط،، انا معرفتش يعني ايه بنت تصون نفسها، يعني ايه تبقى بتاعتي وبس، عشق انا لمستها وهي مش في وعيها ، حضنتها واحنا الاتنين مغيبين، وفي اللحظه دي، حسيت انها ملكي وبس، وانا لايمكن اتخلى عنها، عشق لو كانت في وعيها، عمرها مكانت توافق بكده، (وكمل بوجع) دي يوم ما سفرنا اسكندريه مدتنيش فرصه امسك اديها حتى، انا واثق انها وافقت على السفر لأنها كانت اخر فرصه هتكون موجوده معايا فيها ، انا كنت حاسس ان في حاجه مش طبيعيه ، لكن عمري ما كنت أتصور انها توصل لكده، انا واثق ان حازم ورا كل ده، واللي مخوفني، أنه اكيد ورا اختفاءها (وسكت مره واحده وقال)،
حازم يا حسام،، هو حازم اللي اكيد عارف عشق فين،
واخد مفاتيحه ونزل جري،
حسام جري وراه : استنى ياقاسم انا جاي معاك وقفل باب الشقه ونزل وراه بسرعه
------------- بقلم شيمو الخطيب
عند فاديه
سحر وأم طارق وطارق قاعدين جنبها، وقلقانين عليها جدا، وهي في دنيا تانيه، وتايهه وكل تفكيرها في عشق
سحر بدموع: خالتي، ان شاء الله عشق بخير، متقلقيش وخلي املك في ربنا كبير، (وقلبها هيوقف من الخنقه، لأنها مش قادره تقول انها عند خالد لأنها شاكه انه اكيد هو اللي ورا اختقائها)
فاديه بتوهان: ربنا يستر طريقك ياعشق ويوقفلك ولاد الحلال،، اللهم اني استودعتك بنتي فاحفظها فأنت الذي لاتضيع عنده الودائع، يارب احفظها واحميها يارب
ام طارق: اهدي يافاديه يا ختي، وأن شاء الله ربنا هيجبر بخاطرك ويرجعها بالسلامه
سحر بتعيط بخنقه ومش عارفه تعمل ايه، فاديه بصتلها بدموع : ربنا يسترك ياسحر يابنتي انتي كمان ادعي لاختك ياسحر، ادعيلها ترجعلنا يابنتي، (وعيطت بصوتها كله) ادعو كلكو، عشق غلبانه. وانا ماليش غيرها، ادعولها ربنا ينجيها وترجعلي بالسلامه
ام طارق حضنت فاديه، وسحر جريت على الحمام، وبصت لنفسها في المرايه، وأتخنقت في العياط. وفجأه قررت انها لازم تقول الحقيقه بس لحسام بيه،،،
اما طارق واقف حاسس انه متكتف مش عارف يعمل ايه، خصوصا انه ميعرفش اي رقم لقاسم او حسام، وقرر انه يطلع على القسم يطمن بنفسه هناك
----------------- بقلم شيمو الخطيب
في فيلا العزيزي
حازم مراحش الشركه و قاعد في مكتبه مبيكلمش حد،، وهدى حابسه نفسها في اوضتها وكل شويه تتصل على قاسم لكن مبيردش، وهي هتموت عليه،، ورنا قاعده في اوضتها وبتتصل على حسام وكل شويه يكنسل عليها لانه مع قاسم طول الوقت، ومش عارف يرد، وفي الاخر بعتلها رسالة واتساب، يطمنها، ووقت ما يفضي هيكلمها، وهي اطمنت شويه، رنا واقفه في بلكونتها، وفجأه شافت ريكس، بيجري بره الفيلا. وللأسف ناجي مش واقف على البوابه وكانت مش مقفوله كلها. وخرج ريكس من الفيلا،
نزلت رنا جري، وعايزه تعرف هو راح فين، لأن قاسم متعلق بيه، وكفايه عليه خسارة عشق،
خرجت من البوابه، وبتنادي،:، ريكس، يا ريكس، وبتبص يمين وشمال، وفجأه هجم عليها راجلين وخدروها وخدوها في العربيه ومشيو
.... : تفتكر هي دي،، انا حاسس ان البت دي بنت ناس. ومش لايق عليها خدامه خالص
.... : وهي لو بنت ناس هتخرج على رجليها من الفيلا وتتمشى،، اكيد هتخرج بعربيتها يا ذكي، لكن دي كانت ماشيه على رجليها
... :هو انت مش شوفت صورتها؟ ، متتأكد هي دي ولا لا.
... : ياعم انا فاكر حاجه، ده انا ناسي شكلي انا شخصيا هههه، تقولي اتأكد،، سيبك وهات نفس من اللي في ايدك ده، خلينا نظبط النفوخ
... : ههههه، على رأيك، خد،خد،، محدش واخد منها حاجه، ههههه، وضحكوا الاتنين،
؛ - - - - - - - - - بقلم شيمو الخطيب
قاسم وصل الفيلا، ودخل بسرعه ووراه حسام،، وبصوت عالي : حازم بيه،،، يا حازم بيييه، انت فين،
حازم في مكتبه، قلق لما سمع صوت قاسم وخاف انه ممكن يكون وصل لعشق، وهدى في اوضتها نزلت بسرعه اول ماسمعت صوته وفرحت انه رجع
حازم خرج من المكتب واتكلم ببرود: حمدلله على السلامه يا قاسم،
قاسم قرب منه وبقمة الغضب: فين عشق ياحازم ، وديت عشق فين، وعملت فيها ايه،
حازم اطمن انه موصلهاش وابتسم غصب عنه : امممم، يعني انت جاي تسألني انا عليها!! ، ماشي!!! ،، احب اقولك ياقاسم، اني معرفش عنها حاجه، وكمان احب اقولك، اني لو اعرف مكانها اكيد مش هعرفك، انت لازم تفهم انها خلاص، مشيت، ومبقاش ليها وجود معانا، سيبها تشوف حياتها بعيد عننا، وفكر انت في مستقبلك وحياتك،، عشق عمرها مكانت ليك
قاسم بكسره وصوت بيرتعش: انت ايه يا اخي، ازاي انت اب، ازاي عندك مشاعر وبتحس، (وبصوت عالي) انت بتعمل فيا كده ليه، انا عملتلك ايه، ده انا ابنك.، ابنك اللي المفروض تتمني سعادته،، ليه بتنهي حياتي بايدك، ليه، ليييييييه
هدي جريت عليه: قاسم ياحبيبي، اهدي،، احنا كل اللي يهمنا سعادتك
قاسم زقها بقوه : ابعدي عني انتي كمان، ووقعت فعلا على الأرض، وحسام جري عليها قومها وهي بتعيط بصوتها كله،، وحازم وقف ومتغاظ من قاسم وعمايله
وَكمل واتكلم بخنقه: اوعي تفكري ان بدموعك دي هتصعبي عليا وهصدق انك بتحبيني، انتو كلكو معندكوش قلب ولا بتحسو، ومن هنا ورايح تنسو ان ليكو ابن اسمه قاسم، لاني من دلوقتي ماليش اهل.، وبصلهم كلهم بغيظ وحزن في نفس الوقت وسابهم وخرج
حسام طبطب على كتف هدى، وحازم قاله : حسام، حاول تهديه وتعقله، أملنا كلنا فيك دلوقتي، قاسم لازم يرجع لحياته الطبيعيه في أقرب وقت ياحسام
حسام باسف: ان شاء الله ياحازم بيه ربنا يسهل،،، بعد اذنكوا، وخرج حسام وركب العربيه
قاسم قاعد مخنوق: اطلع على شقتك ياحسام،
حسام اتحرك بدون ما ينطق، ووصل عند شقته فعلا
قاسم قاعد مكانه ومنزلش من العربيه وحسام بصله واستغرب
حسام: ايه ياقاسم انت مستني حاجه ولا ايه
قاسم: مستنيك تنزل عشان اخد العربيه وامشي،
حسام باستغراب: طب ليه، وهتروح فين
قاسم بجمود: هروح لوالدة عشق، اطمن واشوف وصلوا لايه
حسام: طيب تمام انا جاي معاك
قاسم بصله: لا ياحسام، اطلع انت ارتاح شويه، انت منمتش من امبارح، وانا هروح وابلغك باللي وصلتله
حسام مردش على قاسم وشغل العربيه ومشي، وقاسم بصله وسكت، وكملو الطريق ساكتين وكل واحد بيفكر هيعمل ايه
قاسم وحسام وصلوا وقاسم خبط
ام طارق فتحت: خير ياباشا، مين حضرتك
فاديه اتكلمت بلهفه : عشق جت، طمني قلبي انها جت يا ام طارق
قاسم دخل: ده انا ياخالتي،
فاديه بقلق : طمني يابني وصلتوا لحاجه
قاسم باسف: للأسف لا، لكن اطمني اكيد هنلاقيها ان شاء الله،، اهم حاجه، انتي عامله ايه دلوقتي
فاديه اتكسرت وعيطت: اهم حاجه بنتي ياقاسم بيه، انا مش مهم، المهم سلامتها هي ،،، ياترى انتي فين يابنتي، ياترى، ايه اللي حصلك ياحبيبتي، يااارب، يااارب أقف معاها واحميها، يااارب،
قاسم دموعه نزلت وخرج وقف بره وكان حسام قاعد قدام البيت ومش قادر يدخل، وحاسس انه متكتف ومش عارف يساعد صاحبه
خرجت سحر وقربت بتوتر من حسام : حسام بيه،،، انا عارفه مكان عشق
قاسم سمعها وجرى عليها وحسام انتبه ليها جدا
قاسم مسكها من دراعها:متنطقي وساكته ليه كل ده
حسام بعد ايد قاسم عنها: استنى بس يا قاسم، قولي يا انسه، تعرفي ايه بالظبط
سحر: عشق، عند خالد يا حسام بيه،
قاسم اتصدم : ميين،، خالد،، تقصدي خالد صاحب الارض
سحر: ايوه يا بيه،، خالد الرافعي،
قاسم سابها وجرى على العربيه: يلا بينا يا حسام،،، يلااا ياحسام ،،
وحسام لسه هيتحرك
سحر مسكت دراع حسام: سايق عليك النبي ياباشا ماتجيب سيرتي، ده هيفضحني في البلد كلها،،
حسام مستعجل وعايز يلحق قاسم: حاضر حاضر،، المهم انا هروح دلوقتي وارجع افهم منك اللي حصل، وصدقيني هساعدك، وعمره مهيقدر ياذيكي، وسابها وجرى على العربيه
------------- بقلم شيمو الخطيب
في فيلا خالد
وصل الرجاله ورمو رنا قدامه
خالد قاعد على الكنبه، وبيشرب سيجارته: فوقها ياغبي منك ليه، انا عايز اشوف الخوف والرعب في عينيها
الرجاله فوقوها فعلا ورنا قامت دايخه وبتبص حواليها بعدم تركيز، وقالت، : انا فييين، وانتو مين
خالد انتبه ليها وبص عليها واتصدم انها مش هيا
خالد قام من مكانه بصدمه: الله يخربيتكو،، مين دي، وجبتوها منين
... : مهي دي اللي انت امرتنا نجيبها ياخالد بيه، ولا انت عايز تخلع بباقي العربون، لااا،، ده انا ارتكب جريمه ولا مؤاخذه
خالد مصدوم ومش عارف يعمل ايه في المصيبه دي :عربون ايه الله يخربيت...،، مش دي اللي انا اقصدها، ده انت هتودينا في داهيه، انت ياغبي انت انا مش معرفك صورتها، (وبزعيق) انت غبي يا بني آدم انت،
... : بقولك ايه ياخالد بيه، انت قلتلي أقف ولما تطلع من الفيلا هاتهالي، واهي، قدامك اهي، متوجعش دماغي عشان انا خرمان ومش ناقص
خالد بنفاذ صبر: يااارب صبرني على غبائك، انت مجنون، بقولك مش هيا، مش هيا، (وبص لرنا)، البنت دي لازم ترجع مكانها حالا، والا هنروح في داهيه كلنا، وبعدين ياغبي دي شكل خدامه، الله يخربيتك،، الله يخربيتك
رنا بخوف: انتو مين، وعايزين مني ايه بالظبط
خالد قرب منها ورنا بترجع لورا بخوف: متقلقيش، يا انسه، انتي هترجعي بيتك حالا، (وبص لرجالته)، رجعها ياغبي منك ليه، يلا اتحركوا
.... : لا، احنا متفقناش على كده، انا جبتها، ومعنديش استعداد أعرض نفسي للخطر عشان خاطرك، أهلها زمانهم اكتشفوا وقالبين عليها الدنيا، وهي عرفتنا وعرفت اشكالنا، احنا نخلص منها وبكده محدش هيوصلنا
خالد بتفكير،، ، مفيش قدامه غير كده فعلا، لأنها لو رجعت سهل قوي عيلتها توديه ورا الشمس، (بص للراجل)،، الله يخربيتك، بغبائك هتوصلنا للدم، وانا مش عايز اوصل لكده،
رنا قاعده على الارض مرعوبه وحاضنه رجليها وبتعيط في صمت، وحست ان خلاص نهايتها قربت
وفجأه سمعت صوت بيقول
ياخاااالد، يا خالد يا رافعي