الحلقة الثانية والعشرون والثالثة والعشرون
بقلم شيمو الخطيب
الحلقه ٢٢
من (غمرتني عشق)
اللهم صل علي محمد ..
صلاه ينفرج بها الگرب ..
وتنحل بها العقد ..❤✨
بسم الله نبدأ
في فيلا العزيزي
قاسم واقف قدام حازم بكل قوه وبيطلب منه انه اوضته تتنقل مكان عشق، وطبعا حازم رفض لكن هدى وافقته عشان يرجع
قاسم : وعندي شرط كمان،، ولازم توافقوا عليه
حازم بنفاذ صبر: خيييير،،،، ايه،، تحب نسيبلك الفيلا ونمشي عشان ترتاح
قاسم ببرود: لا وجودكوا من عدم وجودكوا ميفرقش معايا، انا كده كده معتبركوا بره حياتي،
هدي بصتله بدموع، وحزن، ورنا مذهوله من ردود أفعال اخوها وكلامه وواقفه ساكته مش عارفه تقول ايه،، وحازم بص بخنقه وقال: أنجز، شرط ايه ده
قاسم : انا عايز الشركه تتكتب باسمي، و(لسه حازم هيثور ويتكلم) قاسم وقف قدامه وقال: وقبل متتنرفز وتقول كلام مالوش لازمه، انا عمري مهشتغل معاك وانا واثق ومتأكد انك انت اللي طردت عشق وحرمتني من سعادتي، وواثق كمان انك اكيد هددتها عشان تمشي، حازم بيه، احب اقولك اني لو رجعت الشركه، هوقعها مش هنجحها، اظن فاهم كلامي كويس
حازم بنرفزه وعدم تصديق: انت ايه يابني،(وبصوت عالي) انت بتعمل كده ليه،،، يابني المال والشركه في الاخر بتاعك انت، مش انا
قاسم قاطعه : ايييييوه، انت قولت في الاخر، وانا معنديش استعداد استنى للآخر، يا تكتب الشركه باسمي، يا اما اعتبرني مت،
هدي جريت عليه: بعد الشر عليك ياقاسم، يابني حرام عليك اللي بتعمله فينا ده، انت ليه بتعمل كده
قاسم بعدها عنه واتكلم بوجع السنين كلها،،،، عايزه تعرفي انا بعمل كده ليه،؟ اقولك انا يا هدى هانم.،،
انا بعمل كده لاني عمري ماحسيت منكو بالحنيه، عمري ماحسيت انكو يهمكو سعادتي، انتو اللي خلتوني انسان جامد معنديش مشاعر، وللأسف، انتو اول ناس اشتكيتو من كده ، (بص لحازم) حازم بيه مثلا،، امتى حسيتي انه اب ليا، امتى قعد معايا وكلمني ونصحني، امتى فكر انه يسعدني ولو بكلمه.،، كل اللي يهمه شغله وبس،،،، وبصوت عالي ووجع كبير،،، روح يا قاسم، حاضر،،، تعالي ياقاسم حاضر،. اشتغل ياقاسم حاضر، اتجوز ياقاسم حاضر،، ويوم مفكرت اختار حياتي قولتوا،، لا،،، عشان مش على مزاجكوا ولا يليق بيكو،، ده حتى يوم ما كنت بنجح في دراستي مبلاقيش فرحه في عنيكو زي اللي بشوفها في عيون أهالي اصحابي، حتى لما أنجح في صفقه في الشركه واخدها من بُق الأسد ويبقى مفقود فيها الامل،حازم بيه كان بينسبها لنفسه ومن غير حتى ميقولي كلمه شكر ولو بيني وبينه، وانا كنت بسكت لان المشاعر ماتت جوايا، ويوم ما جت اللي تحييها من تاني، استكترتوها عليا وبعدتوها عني، وكل ده لييييييه، عشان مش قد المقام.،، عشان مش هتقدروا تواجهوا اصحابكو بيها، فكرتوا في نفسكوا وبس،،، واتكلم بانهيار،،، طب وانا فيييين، ابنكو فييين من حياتكو،، خلفتوتي ليه وانتو عارفين انكو مش هتفكروا غير في نفسكوا وبس،، ، ردوا عليا،،، قلولي عملتوا كده ليه، بعدتوا عشق عني ليه، كان اهون عليا تقولولي اتجوزها واعتبر ان مالكش حاجه عندنا،، انا كنت هوافق والله، كنت اتبروا مني لكن متبعدوهاش عني، كنتو اعملوا اي حاجه غير البعد، حرام عليكوا العذاب اللي انا فيه ده، كان عندي استعداد اخسر كل حاجه بس اكسبها هي، ليه تعملوا كده،، ليه يا حازم بيه تقضي على ابنك، لييه، ليييه
هدي واقفه وبتعيط وبس ومش عارفه ترد عليه، ورنا بتعيط بهستيريا لانه للأسف كلامه صح، اما حازم واقف قلبه بيتقطع لكن مبين عكس كده
حازم بخنقه: قاسم،، انت عايز تورثني بالحيا،، . مش هو ده طلبك يا بني
قاسم بضيق: انا مش ابنك، واوعى تفكر تقولها، انا عايز اشتغل في ملكي، مش في ملكك،، ولولا انه مينفعش اغير اسم الأب، كنت كتبت اي اسم ورا اسمي في البطاقه، لأني مش عايز يبقى ليا اي علاقه بيك من اي نوع
حازم بوجع : اممممم، وانت بقه كده بتقنعني اني اكتب لك الشركه، عشان تاخدها وتطردني منها صح ياقاسم بيه،، مش ده اللي انت عايزه
قاسم ضحك بتهكم : هه،، لا يا حازم بيه، انا اه مش عايزك في حياتي، لكن انت واقع ومينفعش الهروب منه،، وعشق اللي انتو بعدتوها عني دي، ادتني درس كبير قوي واتعلمت منها حاجات في المده اللي جت فيها هنا، لو عشت عمري كله معاكو مكنتش عرفتها، عشق علمتني الأصل، وأن الاب والام دول مكانتهم كبيره حتى لو اساءوا لينا، عشق علمتني ان مهما اتأذيت من حد، واخدت حقي منه محاولش ااذيه تاني، لأن كل واحد اخد حقه خلاص،
وانت ياحازم بيه انا هاخد حقي منك الشركه، وانت هتفضل شغال فيها، لكن بتعليمات مني انا، واظن كده انا عملت باصلي معاك،، وبعدين انا كده كده اللي كنت بمشي الشركه، يبقى ايه الضرر من انها تبقى بتاعتي
حازم : يعني بعد ماكانت شركة حازم العزيزي هتبقى شركة قاسم العزيزي
قاسم: هي شركة العزيزي يا حازم بيه،،. والكل عارف انها شركة العزيزي، وهتفضل بالاسم ده على طول، انا لحد كده وكلامي خلص، فكر مع نفسك وبلغني قرارك، وانا في اوضة عشق،
وسابه ودخل الاوضه #شيمو الخطيب
حازم بص لرنا وهدى وقعد على الكرسي وقال: الولد ده انا مش عارف اعمل معاه ايه، انا تعبت منه ومن اسلوبه، ده عايز يورثني بالحيا
عايز يستولي على الشركه وانا لسه عايش، ده بيمسكني من ايدي اللي بتوجعني عشان عارف اني مش هقدر امشي الشركه لوحدي، ولا استغني عنه.،،، قاسم هو المتحكم في كل حاجه، انا كنت مجرد مراجع ليه مش اكتر، كان شايل الشغل كله،، انا بجد مش عارف اعمل ايه
هدي قربت منه وهي بتعيط: خلاص يا حازم، طالما قاسم المتحكم ليه لا، اكتب الشركه باسمه وسيبها له،،
حازم بنرفزه وصوت عالي، : انتي اتجننتي يا هدي، قاسم ابنك اول ما الشركه تبقى بتاعته هيرميني بره الشركه، انا عارفه كويس، انتي مش سامعه كلامه وكمية الكره اللي في قلبه لينا، انا ممكن اكون قصرت، بس كل ده عشانه هو واخته، عشان اعمله مستقبل واعيشه عيشه كويسه، وجاي بعد كل ده ويتهمني اني قصرت معاه
رنا بعياط : لا يا بابي،،، ، للأسف، كلام ابيه قاسم كله صح،،(انتبه حازم وهدي منها) انتو عمركو ما فكرتوا في سعادتنا، وبذات ابيه قاسم، عمركو ما حسستوه ان يهمكو سعادته، كل حاجه كنتوا بتفرضوها عليه، انا دلوقتي بس عرفت ليه ابيه قاسم كان جامد في مشاعره، ليه مكنش بيقبل الدلع والهزار، ده لانه متعودتش عليهم، مشافهمش اصلا، محسش بطعم السعاده الا مع عشق، وجيتو في الاخر بعدتوها عنه، عشان ايه، عشان اقل مننا، كان ممكن تحلوها بأسلوب تاني وتشتروا راحة ابنكوا، لكن انتو فضلتوا تكسروا قلبه، واعتمدتوا انه هينساها ويرجع لطبيعته ،احب اقولكوا ان عشق مش هتتنسي، قاسم مش هينساها لو قعد عمره كله، انا نفسي مش هنساها، عشق متتنسيش يابابي، انتو زرعتوا. وجه دلوقتي معاد لم المحصول، احصدوا اللي زرعتوه بقه يابابي
حازم مذهول من كلام رنا: انتي يا رنا اللي بتقولي كده!!! ، انتي!!!! ،،، ده انا مدلعتش حد قدك،
رنا بوجع: وانا مقولتش حاجه، انا عارفه ان حضرتك بتحبني، بس معاملتك لقاسم اخويا كانت مش عادله يابابي، انا اسفه اني بقول كده،، بس ده رأيي، واتمنى متزعلوش مني،، بعد اذنكو انا هطلع ارتاح
هدي وحازم واقفين وعلامات الصدمه باينه عليهم، ومش قادرين ينطقوا، حازم اخد شنطته ومشي، وهدي قعدت على الكنبه، وبتعيط ومش مصدقه ان دول ولادها #شيمو الخطيب
قاسم اول ما دخل أوضة عشق، قلبه دق بسرعه جدا، وبص على كل ركن فيها وعنيه مليانه دموع، ولمح المصحف بتاعها اللي كانت بتقرأ فيه، جري عليه وفتحه، وعينه جت على الايه {وَإِنْ تَصْبِرُوا وَتَتَّقُوا لَا يَضُرُّكُمْ كَيْدُهُمْ شَيْئًا} ﴿١٢٠ آل عمران﴾. ورجع قرأ شويه ولقى الايه دي
{بَلَىٰ إِنْ تَصْبِرُوا وَتَتَّقُوا وَيَأْتُوكُمْ مِنْ فَوْرِهِمْ هَٰذَا يُمْدِدْكُمْ رَبُّكُمْ بِخَمْسَةِ آلَافٍ مِنَ الْمَلَائِكَةِ} ﴿١٢٥ آل عمران﴾. وحس ان ربنا بيقولو اصبر وفرجه قريب ان شاء الله
ضم قاسم المصحف لحضنه، وحس براحه كبيره، وفتح درج الكومود اللي عليه المصحف، ولقى ورقه مطبقه، اخدها وفتحها ولقى فيها،
مهما توارى الحلم في عيني
وأرقني الأجل
مازلت ألمح في رماد العمر
شيئا من أمـَل ..
فغدا ستنبت في جبين الأفق
نجمات جديدة
وغدا ستورق في ليالي الحزن
أيام سعيدة
وغدا أراك على المدى
شمسا تضئ ظلام أيامي
و إن كانت بعيدة
ما كان خوفي من وداع قد مضى
بل كان خوفي من فراق آت
لم يبق شيء منذ كان وداعنا
غير الجراح تئن في كلماتي
***
ما زلت أذكر عندما جاء الرحيل
وصاح في عيني الأرق
وتعثرت أنفاسنا بين الضلوع
وعاد يشطرنا القلق
ورأيت عمري في يديك
رياح صيف عابث
ورماد أحلام و شيئا من ورق
هذا أنا..
عمري ورق..
حلمي ورق..
طفلة صغيرة في جحيم الموت
حاصره الغرق
ضوء شريد في عيون الأفق
يطويه الشفق
نجم أضاء الكون يوما و احترق
- - - - - - - - - - - - - - - - -
إذا تكلم قلبي فلن يَنطق سوا اسمك..وإذا دَق قلبي فلن يَنبض إلّا لأجلك..فكم أنا من العشق أحببتك!! وكم أتمنى أن تكون أنت قدري وأن أكون أنا قدرك.
سأكون لك قلب يُحبك بشكل لا يوصف..سأكون لك روح أوجاعها من أوجاعك..ساأكون لك كل شيء فوق ما تتمناه..سأكون مَعك فًي جميع حالاتك، حزنك، فَرحك..ولن أتَركك مَهما حصل لأنني حقاً أحببتك.،،،، بحبك ياقاسم
قاسم ضم الورقه بوجع، وقال: ليه ياعشق تسيبيني، ليه تبعدي عني وانتي عارفه انك قلبي اللي عايش بيه، ليه تسمعي كلامهم وتتخلي عني، انا كنت قادر احميكي منهم، كنت قادر ابعدك عن أي حاجه تاذيكي ، ليه تبعدي، نفسي اعرف انتي فين، نفسي اطمن عليكي، نفسي احضنك ياعشق، حتى لو هموت بعدها، ليه بعدتي عني ياعشق ليه ليه
ونام مكانها على السرير وهو حاسس ان ريحتها في كل ركن في الاوضه، وحضن المصحف وراح في النوم،
--------------- بقلم شيمو الخطيب
في المستشفى
عشق قايمه مع مامتها عشان تصلي، ودخل عليهم
حسام : السلام عليكم، حمدلله على سلامتك ياعشق
عشق بصت لفاديه، و اتصدموا الاتنين ،
عشق لفت وشها بعيد : الله يسلمك ياحسام بيه،
فاديه : تعالي يابني اتفضل، ادخل يا حسام بيه
حسام دخل واتصدم من شكل عشق، قعد قدامها وقال ،،، ليه ياعشق، ليه تبعدي،
عشق بصتله بدموع وسكتت،
حسام : المهم الأول، طمنيني، ايه اللي حصل، وايه اللي عمل فيكي كده،
عشق بخنقه: حسام بيه، انت عرفت ازاي ان انا هنا
حسام بضحك :ههههه انتي ناسيه اني ظابط ولا ايه ياعشق
عشق متضايقه من وجوده: طب هو قاسم بيه عارف اني هنا،،
حسام مستغرب اسلوبها : قاسم بيه!!! لا ياستي قاسم بس، ما يعرفش انك هنا،
عشق بدموع : لا ياباشا، احنا لازم نحفظ الالقاب، مينفعش خدامه تقول الاسم كده لوحده
حسام باستغراب: مالك ياعشق، وايه اللي غيرك كده، احكيلي ايه اللي حصل، وليه بعدتي، ياعشق،
عشق اتنهدت بوجع، وفاديه قامت استأذنت ودخلت تتوضي وتصلي،
وحسام قعد، وعشق حكتله على كل اللي حصل من حازم ،
عشق بترجي: حسام بيه،، الله يخليك قاسم ميعرفش ان انا هنا، حازم بيه مش هيسيبني، بلاش قاسم يعرف الله يباركلك،
حسام بصلها بوجع: انتي ليه قاسيه كده ياعشق، هو انتي مش بتحبي قاسم ولا ايه،
عشق بلهفه: انت بتقول ايه ياحسام بيه، قاسم ده كل حياتي، انا مش متخيله حياتي من غيره، بس هو يستاهل احسن مني، يستاهل واحده من عيله كبيره تشرفه، انا لو اتجوزت قاسم ياحسام بيه، مش هنخلص من المشاكل، مفيش حد هيسيبنا في حالنا، الحب موجود اه،،، بس مع الوقت هيقل من كتر المشاكل والضغوط، الحب ساعتها هيتقلب لضيقه وخنقه،،،، وانا مش عايزه اوصل مع قاسم لكده، انا اهم حاجه عندي كرامتي وسمعتي، لأن دول اللي انا بملكهم يا حسام بيه، ولو خسرتهم صدقني مش هبقي على حد،
وانا لو اتجوزت قاسم للاسف هخسرهم، وساعتها قاسم كمان هيخسر كل حاجه،، عشان خاطري انا بلاش قاسم يعرف، قوله انك موصلتليش، قوله اني سافرت، قوله اي حاجه، بس بلاش يعرف مكاني، وصدقني يابيه، انا لو ليا نصيب مع قاسم، مهما بعدت والسنين فرقتنا، هنرجع لبعض، لأن ربنا كاتبنا لبعض، فسيب الايام هي اللي تحكم يا حسام بيه، وسيب القدر هو اللي يقول كلمته،،
حسام باقتناع وانبهار من كلامها،، انا مش عارف اقولك ايه ياعشق، بس انا اللي تاعبني هي حالة قاسم، قاسم هيتجنن عليكي ياعشق، انتي متخيله، انا دخلت عليه وكان ساجد في الأرض وبيعيط،، متخيله يعني ايه قاسم العزيزي يعيط، دي عمرها ماحصلت، ولا حد يتوقع انها تحصل، حالة قاسم وحشه قوي ياعشق، وصعب اني اشوفه كده واسكت، وعلى فكره، انا عايز اقولك حاجه انتي اول واحده تعرفيها
عشق بخوف : خير ياحسام بيه
حسام: حازم كلمني ونبه عليا اني مدورش عليكي، ولا اساعد قاسم في انه يلاقيكي، ووجود قاسم معايا كان مخليني مش عارف اتصرف، اقوله ولا اسكت، بس انا لو قولتله قاسم مش هيسكت، وهيقلب الدنيا، وهيخسر كل حاجه، ولو سكت، قاسم ممكن يحس اني مقصر معاه، وده فعلا اللي حصل، وقاسم قالي كده، لكن انا فضلت اني مقولوش على والده كده، لأنه في الاخر مهما كان والده
عشق: وهو ده اللي انا عملته يا حسام بيه، انا اخترت اتعذب انا، ومخسّرش قاسم عيلته، ومع الوقت هينسي، وربنا هو اللي عالم ايه اللي مكتوب لينا
فاديه خلصت صلاه، وبصت لحسام وعشق ودعتلهم : ربنا يكتبلكو الخير يا حبايبي، ويسعد قلوبكوا، ويفرحكوا قادر يا كريم، ويفك ضيقتك ويفرح قلبك ويهديك للصح ياقاسم يابني يارب
حسام بفرحه : يااااااااااه يا أمي ، احلى دعوه منك والله، ربنا يباركلنا فيكي يا امي، وقام من على الكرسي ، وساعدها تقوم.،،وباس اديها، وراسها،،، تسمحيلي اني اعتبرك ام ليا، انا امي توفت من زمان، وبصراحه...
فاديه قاطعته: اسمحلك!!!! انت فعلا ابني ياحبيبي، ربنا يبارك فيك ويكفيك شر المستخبي يا رب يا حسام بيه
حسام بحب : طب هو فيه ام تقول لابنها يا بيه، (وبص لعشق) وفي اخت تقول لاخوها يا بيه
فاديه ضحكت : هههه في دي عندك حق، خلاص ياواد يا حسام، مش هقولك بيه تاني،
حسام ضحك قوي وعشق كمان
حسام: ههههههه، والله طالعه من بقك زي العسل، ربنا يخليكي ليا يا امي يارب،
عشق: طب ممكن بقه يا ماما تساعديني اقوم اتوضي عشان اصلي،
حسام بضحك: تحبي اساعدك انا،،، هههه
عشق ابتسمت بكسوف: لا شكرا ليك يا حسام ب،،، حسام بس،، هههه
حسام :ايوه كده؛؛
وقامت فاديه تساعد عشق ودخلتها الحمام، وحسام قاعد في الاوضه وبيفكر في كل كلام عشق، وازاي عندها كل اليقين والصبر والثقه بالله دي، واعجب بيها جدا، وفي الوقت ده تليفونه رن. وكانت رنا
حسام: الو،،،،، ايوه يارنا ، عامله ايه ياحبيبتي
رنا بعياط: ايوه ياحسام، انت فين
حسام بخوف وقلق: مالك يارنا في ايه، بتعيطي ليه كده
رنا : ابيه قاسم تحت، وصعبان عليا قوي يا حسام، انا بجد مش قادره اشوفه كده
حسام بوجع : ماله قاسم يارنا ايه اللي حصل
عشق كانت خارجه من الحمام وسمعت حسام بيقول ماله قاسم، سابت ايد مامتها وجريت على حسام بصعوبه ووجع. وشاورت ليه يطمنها، وحسام شاور انها تسكت على ما يخلص
رنا حكت لحسام كل حاجه، وهو قالها مسافة الطريق ويكون عندها وقفل معاها
عشق بلهفه وقلق: ايه يا حسام، ايه اللي حصل، قاسم ماله
حسام: متقلقيش ياعشق،، قاسم راح الفيلا لانه من اول ما انتي مشيتي وهو قاعد معايا في الشقه،
عشق بقلق: وبعدين ايه اللي حصل،،
حسام: للأسف، طلب من حازم بيه يكتب الشركه باسمه، غير انه نقل اوضته مكان اوضتك تحت
عشق بدموع : ليه يعمل في نفسه كده، ليه،
حسام: عشق، انا فاهم قاسم كويس ، قاسم جواه بركان، ومش هيهدي الا لما ينفجر في وش كل واحد اذاه، وأولهم حازم بيه، قاسم راجع ينتقم ياعشق وللأسف، محدش يقدر يغير رأي قاسم ولا قراره، لأنه عنيد لدرجه كبيره،
على العموم انا هروح ليه دلوقتي وهشوف ايه اللي هيحصل، وهبقي اجي اطمن عليكي،
عشق بدموع. :اه يا ريت يا حسام بيه، لازم تيجي تطمني
حسام : حاضر حاضر، وهو بيجري،،، بس بلاش بيه دي،،، سلام ياعشق،
عشق ابتسمت بزعل لأنها افتكرت قاسم وهو بيقولها بلاش بيه،، وقالت: سلام ياحسام، سلااام
فاديه : والله انا صعبان عليا حالكوا، لكن نعمل ايه، ربنا يدبرها من عنده يارب ويكتب لينا الخير،
عشق: يارب يا امي يارب، المهم ياماما، كلمي خالتي ام طارق من التليفون اللي جنبك ده. عشان تطمنيها علينا وخليها تطمن سحر، بس متقوليش احنا فين
فاديه : طب تعالي يابنتي افتحيه، انا معرفش حاجه في التليفونات دي، وبعدين اطلبيلي النمرة
عشق قامت بتعب: حاضر ياست الكل، من عنيا،، واخدت الفون واتصلت وادته لفاديه
وفاديه كلمت ام طارق وطمنتها وقالتلها تطمن سحر، وأنهم قاعدين عند واحده صاحبة عشق لان عشق تعبانه شويه، ومقالتش اي معلومات تانيه،
وعشق صلت العشا وقامت بتعب قعدت على السرير، وصورة قاسم في دماغها بكل تصرفاته
-------------- بقلم شيمو الخطيب
في فيلا القناوي
جيجي قاعده وسرحانه في قاسم ورد فعله ناحيتها اول ما شافها، وقُربها منه واتنهدت بوجع انه حتى مش قادر يستحمل قربها، ومش عارفه تعمل ايه، هو مش سامحلها انها تقرب منه، طب ازاي هتقدر ترجعه ليها تاني، (وكلمت نفسها)
بس هو مكانش معاكي من الاول يا جيجي
.. مين قال كده، لا هو ملكي انا من الاول
. انتي هتضحكي على نفسك ولا ايه، انتي عارفه انه عمره ما حبك
.. لا بس انا هقدر اخليه يحبني بس هو يديني الفرصه
. لكن هو بيحب،،، ازاي هتخليه يحبك
.. اكيد انا هكسب، الخدامه دي اكيد نزوه، وعمره مهيفكر يتجوزها
وفاقت من أفكارها على صوت محسن وهو بيقول
محسن: مش ممكن، بقه قاسم طلب منك كده،
حازم: انا مش عارف اعمل ايه، الشركه كلها ماشيه بتعاملات قاسم، يعني قاسم هو اللي منجح الشركه، ولو رفضت قاسم هيسيب كل حاجه وهتتهد على دماغي
محسن بعدم تصديق: انت عايز تفهمني يا حازم انك مش هتقدر تديرها، انا معاك وهنديرها ان شاء الله
حازم : في ناس كتير وعُملاء كتير انا مكنتش بتعامل معاهم تعامل مباشر يا محسن، وده لاني مش بحب التعامل معاهم، فكان قاسم هو اللي بيقوم بالموضوع ده، ده غير انه ذكي والشغل هيخسر بصراحه لو قاسم سابه
محسن بخنقه من موقف حازم : اهو ضعفك ده، هو اللي مخلي قاسم يقوي عليك، فهمه انك مش موافق، وهو لما ميلاقيش شغل هيرجعلك راكع
حازم: انت بتقول ايه يامحسن، كأنك متعرفش قاسم ابني، قاسم لو مش هياكل ولا يشرب مش هيذل نفسه ليا، وبعدين مين ده اللي مش هيلاقي شغل، ده الف شركه تتمنى قاسم العزيزي انت نفسك تتمناه ولا تقدر تنكر
محسن: بصراحه ابنك اسطوره في مجاله، ومقدرش انكر انه السبب في نجاح الشركتين القناوي والعزيزي بس الحل ايه،،
محسن :مش عارف يا حازم والله،
فريده وجيجي متابعين المكالمه من الاول، وفريده قربت من محسن وقالت، انا عندي الحل
محسن بلهفه :الحقينا بيه يافريده
فريده بثقه: خلي حازم بيه، يشترط على قاسم، أنه يتجوز جيجي في مقابل الشركه، وكده تبقو ضمنتو ان الشركه دي هتبقى من نصيبنا، وعمره مهيقدر يخسر اي صفقه، لأن كل ده لأولاده، اللي هما احفادك يا محسن، وطبعا جيجي بنتي هتقدر بطريقتها انها تلين دماغ قاسم وتحنن قلبه على حازم بيه، لأنها روحها في حازم بيه،، ها ايه رايكو
حازم سمعها وقال : بس ايه مكسبي من الموضوع، برده قاسم هينفرد بالشركه
فريده سمعت من الاسبيكر: ياحازم بيه، لما تجوز قاسم لجيجي طبعا جيجي زي بنتك، وعمرها مهما حصل منك مهتبعد قاسم عنك، لأنها عارفاك كويس، فهتبقي هي حلقة الوصل بينك وبين قاسم، وده هيخليه مع الوقت يلين، واكيد لرنا وهدى دور فى كده، وبعدين انتو لازم متخسروش كل حاجه، يعني متخسروش قاسم برفضكوا لرغبته، ومتخسروش شركتكوا لو برده رفضتوا رغبته لانه ساعتها هيشتغل في اي شركه مضاده ليكوا وهيوقعكوا، فلازم تتعاملوا بذكاء،، يتجوز جيجي، في المقابل توافقوا على شرطه، ولاحظ يا حازم بيه، ان بعد عمر طويل، كده كده الشركه لقاسم، فليه بقه تعاديه من دلوقتي،، المهم ان علاقتكو تقوا ويبقى صعب على قاسم انه يقهرها، وده مش هيحصل الا لما يتجوز ويخلف على طول، وتكون جيجي بنتي
جيجي واقفه وفرحانه، هيا كل اللي يهمها انها تبقى في حضن قاسم وخلاص
حازم ومحسن اقتنعوا نوعا ما، لأن للأسف مفيش قدامهم غير كده
---------------- بقلم شيمو الخطيب
حسام وصل لقاسم ودخل الفيلا وسأل عليه ، وزينب وصلته لاوضة عشق
دخل حسام الاوضه عنده
لقاه حاضن المصحف
و قرب من قاسم وصحاه. : قاسم، ياقاسم
قاسم قام مخضوض، : ايه، ايه، ايييه ياحسام، فيه ايه
حسام: ايه ياعم، كل ده نوم، العشا اذنت مش هتقوم تصلي
قاسم بتعب : فعلا انا لازم اقوم، انا نمت ومحستش باي حاجه خالص، حسيت براحه كبيره قوي ياحسام لما نمت هنا، لدرجة اني نمت وقت طويل قوي، واتنهد،، ياترى انتي فين ياعشق،(وبص لحسام) ها ياحسام موصلتش لحاجه
حسام اتنهد بوجع : انا بدور في كل حته، وصدقني اكيد هلاقيها، حتى اتصلت بسحر وقالت إن فاديه مرجعتش وملهاش أثر في البلد، وده معناه انها وصلت لعشق، يعني عشق بخير، سيبها لله وان شاء الله هلاقيها
قاسم :يارب يا حسام، يارب،، وقام يدخل الحمام لكن وقف مره واحده وقال: صحيح ياحسام، انا سمعت كلمه كده وانت بتضرب خالد الرافعي، كنت بتقول، ازاي تتجرأ على حاجه تخص حسام المغازي، وكمل بمكر،،، هي رنا تخصك يا حسام وانا معرفش ولا ايه
حسام بلبخه : احم،، اه،، احم،، ده،، وبص بشرز،،، انت عايز ايه ياعزيزي
قاسم ابتسم؛ لا انا بسأل بس،
حسام ابتسم: هو يدايقك لو كانت تخصني ياقاسم، انا كنت هكلمك والله، بس الظروف هي اللي منعتني
قاسم ابتسم: انت بتبرر ايه يا حسام، انت بتحب، وانا شوفت وحسيت الحب ده في عنيك والحب من الحاجات اللي تتحس اكتر من اللي بتتشاف، ويشرفني انك تبقى زوج اختي
حسام فرح جدا وقام حضن قاسم، وحس بوجعه وتنهيدت قاسم اخترقت قلب حسام،، وفجأه دخل حازم عليهم
حازم سلم على حسام، وقاسم بص بعيد،
حازم: قاسم انا فكرت في كلامك وموافق على طلبك
حسام اتصدم وقاسم مكنش متوقع موافقته لكن قال
قاسم ببرود :تمام، من بكره نطلع على المحامي ونكتب العقد،
حازم :بس انا عندي شرط ولازم توافق عليه
قاسم باستغراب : شرط ايه ده!!؟
حازم : تتجوز جيجي.......
الحلقه ٢٣
من (غمرتني عشق)
❤️ربي ارضني بقضائك حتى لا أحب تعجيل ما أخرت ولا تأخير ما عجلت، اللهم اعطني ما تراه خيرا لي، اللهم إن توفيقي وسعادتي بيديك استودعتك جُل مافي قلبي فبشرني بما يسُرني و كُف عني ما يضُرني، ربي أحتاجك معي بكل لحظه امر بها، يارب مدني بصبر ليس له آخر و من بعد صبري فرحه تسكن أعماقي❤️
بسم الله نبدأ
سحر قاعده وقلقانه، ومش عارفه ممكن فاديه تكون راحت فين لحد دلوقتي، ده الليل دخل ومفيش أثر ليها، ولا حتى حسام وصل لحاجه
سمعت الباب بيخبط قامت بسرعه وعندها امل
سحر لبست طرحتها و فتحت : خالتي ام طارق، اتفضلي، ياخالتي
ام طارق: ازيك ياحبيبتي،
سحر: بخير يا خالتي الحمد لله،،، فيه جديد يا خالتي ولا حاجه
ام طارق ضحكت: اه ياستي فيه جديد، وخالتك فاديه كلمتني وطمنتني عليها هي وعشق كمان
سحر بفرحه : انتي بتتكلمي جد،، يعني هما بخير،،، الف حمد وشكر ليك يارب،،، يا ما انت كريم يارب، طب هما فين ياخالتي،،، مكانهم فين
ام طارق: والله يابنتي ماقالت، فاديه كلمتني من تليفون غريب، وقالت إنها مع عشق عند واحده صاحبتها، لأنها تعبانه شويه، وكام يوم ويرجعوا ان شاء الله
سحر بفرحه : مش مهم اي حاجه، المهم انهم بخير، وده عندي بالدنيا كلها،، الف حمد وشكر ليك يارب،
دخل طارق وكان راجع من بره بيجيب العشا لاخواته،، خير ياماما انتو واقفين كده ليه
سحر بفرحه: عشق وخالتي بخير يا طارق الحمد لله، بس هما عند واحده صاحبة عشق، لأنها تعبانه شويه، وكلها يومين ويرجعوا،
طارق فرح جدا:الحمد لله يا سحر،، اهم حاجه اننا اطمنا عليهم، يلا بقه ياستي تعالي اتعشى معانا، مهو مينفعش تتعشى لوحدك كده
سحر باحراج: لا تسلم ياطارق ،انا هاكل حاجه خفيفه وهنام، عشان اقوم الصبح لشغلي، قعدتي دي متنفعش طبعا
ام طارق: يابنتي عيب كده، ده انتي والدتك كانت اخت ليا والله، ومينفعش تبقى لوحدك كده تعالي كلي معانا لقمه، وبعدين ارجعي نامي،،،
طارق: يلا بقه، انتي هتكسري كلام ام طارق ولا ايه
سحر ابتسمت: لا طبعا، ده كلام خالتي على دماغي، هدخل بس البس اسدالي وهحصلكوا حالا
ام طارق : خلاص ياحبيبتي، براحتك انا هسبق انا احضر العشا وتعالي، (وبصت على طارق) ها ياطارق،، يلا يا حبيبي،
طارق سرحان: ها،، ااه، يلا،،، ، متتاخريش يا سحر
سحر ابتسمت بكسوف من نظرته ليها: حاضر ان شاء الله
وفعلا دخلت لبست اسدالها وراحت اتعشت معاهم. وقعدت شويه، ورجعت البيت، ونامت وهي بتفكر في طارق وحبها الصامت،
------------------ بقلم شيمو الخطيب
في فيلا العزيزي
قاسم واقف مصدوم من شرط والده
قاسم: انت بتقول ايه،،، اصلي بصراحه مش قادر استوعب طلبك
حازم باصرار: انا بقولك، لو عايز الشركه تتكتب باسمك، تتجوز جيجي،
قاسم بص لحسام بعدم تصديق، وحسام واقف مش عارف يقول ايه ومستغبي حازم لانه بكده بيبعد ابنه عنه اكتر واكتر
قاسم: ههههههه، انت اكيد بتهزر، مهو بصراحه ده مش طلب حد عاقل،(وكشر فجأه) انت بتلوي دراعي يا حازم بيه، مش كده، عارف اني مش هوافق، عشان كده عرضت عليا العرض ده،،
حازم : والله افهمها براحتك، المهم انك تقولي، موافق ولا لا
هدي جت ، وسألت فيه ايه
قاسم بتريقه: ايه، هو انتي متعرفيش تخطيط جوزك ولا ايه يا هدى هانم،، جوزك جاي يساومني، اني اتجوز جيجي وفي المقابل يكتب الشركه باسمي، ههههه، شوفتي وجع اكتر من كده
هدي اتصدمت وبصت لحازم) : انت بتقول ايه،،، حازم، انت بجد عايز كده
حازم واقف ساكت ومردش
هدي بنرفزه : رد عليا يا حازم،، انت عارف ان ابنك مش عايز جيجي وبعدين مش وقت كلام في الموضوع ده، واحنا في الظروف دي، انت كده بتعقد مش بتحل يا حازم،
قاسم بهدوء : حازم بيه،، اظن من حقي انك تسيبني افكر، وبعدين هبقي ارد عليك،
هدي وحسام بصو لقاسم بصدمه واستغربوا هدوءه
حسام قرب منه: قاسم، انت ناوي على ايه
قاسم بتحدي وبيلف حوالين حازم: ناوي افكر في العرض المغري ده،، معنى العرض ده يا حسام بيه اني هبقي مسيطر على شركة القناوي والعزيزي كمان، وده بصراحه عرض محتاج تفكير، (وبص لحازم ووقف قدامه )، مش كده ياحازم بيه ،،،،
حازم بحماس: طبعا، وتبقى غبي لو رفضته،،
قاسم ابتسم بتهكم: هه، فعلا هبقي غبي لو رفضته
حسام بص لقاسم بصدمه ومش فاهمه
وحازم قال: خلاص انا هسيبك انهارده طول الليل، تفكر وتبلغني قرارك بكره
وسابه ومشي
هدي بصت لقاسم: انت هتوافق ياقاسم،
قاسم بتفكير: مش عارف لسه، بس معنى كده فعلا ان الشركتين هيبقوا تحت سيطرتي، وساعتها هبقي انا المتحكم،
حسام: وانت من امتى وانت بتفكر في المصالح يا قاسم
قاسم بزعيق: من دلوقتي ياحسام، انا لازم اطلع كسبان من كل حاجه.،
حسام: طب وسعادتك،، انت مبتحبش جيجي،، يبقى ازاي هتتجوزها
قاسم بوجع: وهي هتفرق ايه جيجي عن غيرها،، كلهم بالنسبالي واحد، على العموم انا هفكر وابقى ارد عليه بكره
هدي بصت لقاسم بقلة حيله وسابته َخرجت
اما حسام فقام قعد جنبه وقال: ممكن تفهمني انت ناوي على ايه بالظبط، انا مش قادر اقتنع ان ده تفكيرك ياقاسم
قاسم ابتسم: اقولك ياحسام انا ناوي على ايه،،، وقام وقف قدامه واتكلم بغضب: انا ناوي اخد حق عشق منهم كلهم، عشان يوم مقابلها، اقولها ان حقك رجع، وعمري مهسمح ان حد يهينك، فهمتني ياحضرة الظابط
حسام فتح عنيه على الآخر من الصدمه : انت هتنتقم ياقاسم،،
قاسم اتحرك من قدامه واداله ضهره: ايوه ياحسام، عشان اعرفهم مين هو قاسم العزيزي، انا واثق ان حازم راح وكلم محسن وحكاله اللي حصل، ومحسن هو اللي اقترح ده، وده كله عشان يبقى ضامن ان شركة العزيزي تفضل تحت رحمته، لأنه للأسف هو اللي بيمشي حازم، وانا كنت بالنسباله عقبه كبيره، وبجوازي من بنته، ضمن الشركه، لأنها بعد عمر طويل هتبقى ملك لاحفاده، ولبنته، فهمتني يا حسام
حسام مش قادر يستوعب: ايوه فهمتك بس انت ناوي تعمل ايه،
قاسم : لاااا،، انا ناوي على كتير، وده مش هينفع يتقال ياحسام، بس اهم حاجه، اني اخد حق عشق، والقلم اللي جيجي ضربته ليها، هيترد بس مش قلم يا حسام، هيترد حاجات كتير قوي.، بس انا عايز منك طلب
حسام: خير ياقاسم
قاسم: عايزك تدور على عشق، توصلها في أقرب وقت، انا عايز عشق يا حسام، ولو قابلتها وهي عرفت اني اتجوزت جيجي، فهمها اني عملت كده عشان اخد حقها، واندمهم كلهم، حسام،، انا بحب عشق ويستحيل اتخلى عنها ابدا
حسام اتنهد بوجع : حاضر ياقاسم،، حاضر،، بقولك بقه ياعزيزي، انا مضطر امشي دلوقتي، وهقابلك بكره ان شاء الله،، وياريت تفكر ياقاسم، بلاش تيجي على نفسك وتظلم نفسك اكتر من كده، أرفض ياقاسم وصدقني حازم مش هيقدر يستغنى عنك في الشركه وهينقلها باسمك، بلاش جواز يا عزيزي
قاسم هز راسه وسكت. وحسام مشي وهو بيفكر ياترى آخرة اللي قاسم ناوي عليه ده ايه،
وقابل رنا في الجنينه وكانت قاعده على مرجيحه
حسام جري عليها ومن وراها قال : الجميل قاعد لوحده ليه كده
رنا بصت ليه وابتسمت: كنت مستنياك ياحسام
حسام: يااااه، ده انا محظوظ بقه ان الجمال ده مستنيني
رنا ضحكت بكسوف: وحشني كلامك قوي ياحسام
حسام : وانتي وحشتيني اكتر.، صحيح عرفتي اللي حصل بين حازم بيه وقاسم
رنا بالم: للأسف اه، كان بيتكلم مع مامي، وانا سمعتهم، بس محبتش أتدخل، لكن الغريبه انهم قالوا انه ممكن ابيه قاسم يوافق،،
حسام: والله انا مبقتش فاهم قاسم عايز ايه بالظبط،، ربنا يهديه، المهم،، عندي ليكي خبر حلو
رنا بلهفه: ياريت،، انا مشتاقه لأي اخبار حلوه
حسام قرب منها : وانا مشتاق ليكي قوي
رنا بعدت واتكسفت ونزلت وشها في الأرض
حسام : يااااااربنا ، اموت انا في الجمال ده،، المهم بقه متنسيش كنت هقول ايه
رنا بابتسامه: متقول بقه، انا تعبت
حسام بضحك : تعبتي من ايه ياقمر انتي
رنا بكسوف: حسام، والله اطلع واسيبك، قول بقه
حسام ابتسم: خلاص خلاص،، متبقيش عنيفه كده،، هقولك ياستي،، مستعده، ههههه
رنا ضربت برجلها في الأرض ونفخت ولسه هتمشي، حسام مسكها وقربها منه وضحك،،، خلاص متعمليش زي الاطفال كده هقولك والله
رنا بخنقه : قول بقه زهقتني
حسام: انا كلمت قاسم علي موضوعنا وهو وافق، ها ايه رايك بقه
رنا مش مصدقه اللي سمعته، واتنططت من الفرحه : لا بجد،، انت قولت لأبيه قاسم، طب قولت ايه،، طب هو رد قال ايه، طب انت بجد قولتله،، لا، انت بتهزر صح
حسام ضحك جامد وضحكته سمعت قاسم : ههههههه، يا مجنونه، اديني فرصه اتكلم،،
قاسم بص من الشباك ومتابع حسام ورنا
رنا هديت : طب فهمني ايه اللي حصل
حسام حكي اللي حصل لرنا وهي فرحت جدا بالخبر ده، ، وبعدهاحسام استأذن ومشي وهي طالعه اوضتها بفرحه
قاسم بيبص عليهم وابتسم لفرحة اخته،
واتمنى ان ربنا يفرحه نفس فرحتها دي
ودخل اتوضي وصلي، وقعد يقرأ في القرآن شويه وحس انه ارتاح بعدها وافتكر كل كلام عشق، وانه دايما كان بيشوفها تصلي، وافتكر عزة نفسها، وردها على جيجي في السخنه، وابتسم من الموقف، لأن عشق ردت بجراءه ومهمهاش حد، وافتكر حضنه لعشق ومسكتها فيه واحساسها بالامان معاه
وابتسم على الموقف واتمنى انه الموقف ده يرجع تاني، ونام على السرير وعاش مع أفكاره لحد مغلبه النوم ونام
-------------------بقلم شيمو الخطيب
وبعد مرور خمس شهور
ونقول نبذه مختصره عن اللي حصل
عشق تعافت والحمد لله، وامجد طلب منها انها تشتغل في المستشفى وهي فرحت جدا، وقعدت في استراحه جنب المستشفى،،، ومعاها فاديه طبعا(وكان مجهزها امجد مخصوص ليهم،،،،) وكانت دايما بتابع حالة والدتها، وبتطمن عليها، وتسيبها وتطلع عند المرضى اللي كانو بيحبوها جدا ، وبيتفاؤلوا بوجودها،
وطبعا عشق كانت كل فتره تتصل على سحر وتتطمن عليها، وتنبه عليها ان قاسم لو جه يسألها تقوله انها متعرفش عنها حاجه، وانها اتأقلمت على الوضع وعاشت حياتها، وسحر قالتلها انه كان بيجي يسأل لكن بقاله فتره مجاش
د محمد كان معجب جدا بعشق، ومتابع كل تحركاتها واهتمامها بالشغل، وحس انه مشاعره بتتحرك ناحيتها لكن لسه مصارحهاش
حسام أتقدم رسمي لرنا والكل رحب جدا بيه، ورنا كانت في قمة سعادتها وعملوا حفلة خطوبه كبيره،، وكان كل شويه قاسم يسأله عن عشق، وحسام كان يرد ويقول مالهاش أثر، ونفسه يعترف لصاحبه بالحقيقه، لكن عشق كانت رافضه،، ده غير أن حسام كان دايما يزور عشق ويطمن عليها واتعلق بفاديه جدا كأنها والدته
قاسم وافق على شروط حازم، وفعلا كتبو كتابه على جيجي، عشان يضمنوا انه ميرجعش في اتفاقه، وحازم كتب الشركه باسم قاسم، لكن من يوم كتب الكتاب، معاملة قاسم لجيجي عاديه، وده طمن جيجي انه هيبدأ يتجاوب معاها، واطمنت هدى وحازم عليه، وحسوا انه ممكن يلين
اما سحر فطارق اعترف ليها بحبه، وهي كمان اعترفت ليه، وطارق كلم والدته، وقالت في أقرب وقت نفرح بيكوا، بس لازم نفرحها ونعمل فرح كويس، دي بنت يتيمه وغلبانه وملهاش حد
أمجد بيه كان دايما يشجع عشق في الشغل ومهتم بيها جدا، وعرف ان حسام بيزور عشق واتكلم معاه كتير، لكن عشق اقنعتهم انهم ميقولوش لقاسم ويسيبوها لله وهو اللي هيدبرها
؛---------------- بقلم شيمو الخطيب
نرجع للوقت الحالي،
هدي طلعت لرنا : ايه يا حبيبتي، انتي اتاخرتي على البيوتي سنتر يارنا ، جيجي اتصلت عشرين مره تستعجلك
رنا: حاضر يا مامي، انا جاهزه اهو، بس مش عايزه انسى حاجه
هدي بابتسامه: متقلقيش ياحبيبتي، مش ناسيه حاجه، يلا بقه عشان منتأخرش، قاسم اخوكي مستني تحت
نزلت رنا وهدى
رنا بدلع: صباح الخير يا ابيه قاسم
قاسم : صباح الفل على احلى عروسه
رنا: حبيبي يا ابيه تسلم يارب
هدي: صباح الخير ياقاسم،
قاسم بجمود: صباح الخير، يلا اركبوا عشان منتأخرش
هدي ركبت جنب قاسم، ورنا ورا
رنا: ابيه هتعدي على جيجي
قاسم: ايوه طبعا، (وبص لهدي بضيق)، متنزليش من مكانك، عشان تركبيها، الحركه دي بتضايقني
هدي : حاضر ياحبيبي، مش هنزل
وصلوا لجيجي وفضلت واقفه شويه مستنيه هدى تنزل لكن رنا قالتلها: تعالي يا جيجي جنبي، ودخلت وهي متنرفزه
قاسم وصلهم، وسابهم وطلع على الشركه، وكان في مشكله هناك
قاسم قاعد متنرفز وبيتكلم مع ايمن: ازاي يا ايمن يعني السيستم فيه مشكله، هو مش فيه مهندسين للموضوع ده، ايه محدش فيهم عارف يحل المشكله
ايمن: والله ياقاسم بيه من امبارح بنحاول لكن للأسف مفيش فايده، لكن اطمن حضرتك اكيد هنوصل لحل
قاسم بضيق: امتى هتوصلو ا، كده مصالحنا كلها متعطله، وانا كمان هاخد اجازه يومين بسبب جوازي ازاي اسيب الدنيا بالشكل ده،
ايمن: اطمن حضرتك يامستر قاسم، وكل شيئ هيبقى تمام
قاسم بضيق : ماشي يا ايمن، لما نشوف اخرتها ايه
وسابه ونزل واخد عربيته ومشي مجنوق،، وطلع على حسام عند الحلاق
قاسم وحسام حلقوا، وطلعوا على شقة حسام واخدوا هدومه، وطلعوا بعدها علي فيلا العزيزي، وكانت مجهزه على أعلى مستوى، عشان فرح رنا وحسام وقاسم وجيجي
---------------- بقلم شيمو الخطيب
عند عشق
عشق بتمر على المرضى وبتهزر وبتضحك، لقيت أمجد واقف ومتردد، ومش عارف يقول ايه
عشق قربت منه بقلق : مالك يا أمجد بيه، خير، فيه حاجه ولا ايه
أمجد بتوتر : بصراحه يا عشق يابنتي، انا مش عارف اقولك ايه
عشق قلبها دق بسرعه وحست ان الموضوع يخص قاسم: خير فيه ايه، هو قاسم جراله حاجه
امجد بسرعه: لا ياحبيبتي متقلقيش، قاسم زي الفل، بس جاتلي دعوه من يومين على فرحه انهارده على جيجي القناوي
عشق اتصدمت وغمضت عنيها بوجع كأن خنجر واتغرس في قلبها، ودموعها نزلت ومتكلمتش
امجد بزعل من منظرها: عشق،، انتي كويسه يابنتي؟
عشق فتحت عنيها ببطئ، اه كويسه يا أمجد بيه،،، على العموم ربنا يسعده يارب
امجد: عشق، انا مش عايزك ضعيفه، انتي اللي اخترتي تبعدي، ولازم تبقى قد الاختيار،
عشق: أمجد بيه، انا عايزه اطلب من حضرتك طلب،
امجد: اطلبي يا حبيبتي انتي عارفه غلاوتك عندي
عشق بدموع: ممكن اكمل تعليمي،
--------------- بقلم شيمو الخطيب
قاسم وحسام خلصوا لبسهم،
وراحوا للبنات السنتر
حسام جري على رنا بلهفه، وقال: ايه القمر ده، انا بجد مش عارف، انا محظوظ ولا امي دعيالي ولا ايه بالظبط، بحبك قوي يارنا
رنا بحب : وانا بعشقك يا حسام،
حسام باس جبينها ومسك اديها بحب ووصلها للعربيه
قاسم نزل وبص لجيجي واتمنى ان تبقى مكانها عشق
جيجي بدلع: ايه ياقاسم مش هنركب ولا ايه
قاسم ببرود: ااه، اكيد هنركب، وسبقها وهي استغربت رد فعله، وفريده زقتها تمشي وراه، وهدى سكتت ومشيت
جيجي ركبت جنبه وهو اللي كان سايق، وطلع على الفيلا في صمت، اما حسام كان متجنن مع رنا بالعربيه، لأنه هو برده اللي كان سايق
جيجي نزلت بضيق من العربيه، وسلمت على كل اللي قابلها من المدعوين، واصحابها، ورنا برده، وقعدوا العرسان في الكوشه
حسام ملامحه كلها حب وبيضحك وبيهزر مع رنا اما قاسم فملامحه جامده، ومبيبصش لجيجي نهائي
اشتغلت اغاني كتيره، وحسام ورنا رقصوا وفرحوا كتير، اما قاسم محدش اتجرأ وفكر يقوله قوم ارقص، وكانو كلهم بيحاولوا يبعدوا عنه باي طريقه جيجي قاعده ودموعها مهدده بالنزول لكن بتحاول تبقى طبيعيه وكل اللي يسألها قاسم ماله، تقول تعبان شويه
في آخر الفرح اشتغلت اغنية زي ما انتي لعمرو دياب وقام حسام ورنا رقصوا عليها وكانت كلماتها
انتى لسه زي ما انتي قمر في عيني
احلى عُمر ده اللى كان بينك وبيني
واما تيجي في الكلام سيرتك بقول
دي حبيبتي الغالية دي بنت الأصول
(وهنا سرح قاسم في عشق، وافتكر كل المواقف اللي بينه وبينها)
مستحيل اقبل في حقك أي كلمة
انتي اعلى منهم فوق انتي نجمة
واللى يسألني عليكي بقول دي نعمة،،،
مستحيل اوصف جمالك مهما أقول
قاسم هنا عنيه دمعت وحس انه مخنوق ومش طايق حد وكل تفكيره في عشق لأنها فعلا بالنسباله نجمه،،، وكمل تاني مع الاغنيه
زي ما انتي انتي عندي زي ما انتي
الغلاوة هي هي والمشاعر مدارية،،،،،
(قاسم ابتسم بوجع)
ده انتي سايبه جوه قلبى ذكري حلوة
لسه صوتك بسمعه في وداني غنوة،،
الحقيقة ان الحياة بعدك ما تسوي
حبي ليكي كل يوم في البعد يقوي
سيبك انتي عاملة ايه وازيك انتي
قاسم اتنهد بوجع وغمض عنيه كأنه بيحاول يسمع صوت عشق وبس وحس انه نفسه بدأ يتخنق ،
دي الغلاوة هي هي والمشاعر مدارية
زي ما انتي انتي عندي زي ما انتي
الغلاوة هي هي والمشاعر مدارية
قاسم وصل لقمة خنقته ومبقاش قادر يبص في وش حد و ساب مكانه وقام بسرعه، والكل استغرب رايح فين، لكن هو دخل أوضة عشق، ورمى نفسه على السرير ودموعه نزلت، ومش قادر يتحمل اكتر من كده،
حسام ورنا شافو الموقف ورنا طلبت من حسام يروح ورا اخوها يشوف ماله وفعلا حسام جري وراه وحازم وهدى بيلطفوا الموقف، ورنا قلبها وجعها على اخوها، وجيجي وفريده متغاظين من اللي بيحصل،
حسام دخل على قاسم :و بينهج،،، ايه ياقاسم مالك
قاسم قام بخنقه : خلاص مبقتش قادر اتحمل، تعبت، كل كلمه بتوصف اللي جوايا، مش قادر على بعدها يا حسام، مش قادر بجد،
حسام كان نفسه يقوله على مكانها لكن سكت عشان ميولعش الدنيا، واخد قاسم في حضنه، وقال:انت اللي اخترت جوازك من جيجي ياقاسم، ولازم تتحمل وتكمل للآخر،
قاسم بزعيق : مبقتش قادر امثل اكتر من كده، تعبت، والله تعبت ، حس بيا يا اخي
حسام بزعل: انا حاسس بيك والله، بس لازم تكمل، لازم تبني نفسك وتقف على رجليك، قاسم، عشق لو ربنا كتبهالك اكيد هتلاقيها وهتتجوزها كمان، سيب القدر هو اللي يقول كلمته ياقاسم، (ودي كانت كلمات عشق)
قاسم مسك المصحف وضمه وسكت،
حسام: يلا ياقاسم، اطلع معايا مينفعش نسيب الدنيا بره كده
قاسم؛ ثواني هعمل مكالمه واطلع وراك
حسام لا انا معاك اهو، أنجز يلا
قاسم اتصل على ايمن : ايه يا ايمن مجتش ليه، لسه موصلتش لحل برده
ايمن : للأسف ياقاسم بيه لسه وده اللي خلاني مجيش، انا مرجعتش البيت من الصبح والله
قاسم بخنقه: طب وبعدين يا ايمن، دي الدنيا كده هتبوظ
ايمن : احنا بنحاول يا قاسم بيه وربنا يسهل
قاسم بخنقه : طيب لو وصلت لحاجه كلمني في اي وقت يا ايمن انت فاهم
ايمن: فاهم يافندم تحت امر حضرتك
قاسم قفل بضيق وقال: هي كده كملت، قرف في البيت وقرف في الشركه
حسام: فيه ايه بس، ايه المشكله
قاسم بضيق : سيستم الشركه واقف والدنيا بايظه والمهندسين مش عارفين يوصلوا لحل، وده تاني يوم على الحال ده
حسام بابتسامه: متقلقش ياكبير من بكره اجيبلك احسن مهندس كمبيوتر في مصر كلها،
قاسم : انت هتهزر يا حسام
هدي دخلت،، في ايه ياقاسم يا حبيبي قومت ليه كده
حسام رد: معلش ياهدي اخرجي بس وقولي ان قاسم حس بدوخه وهيخرج على طول
هدي بقلق : طب طمني، انت كويس يابني، ريح قلبي الله يخليك
قاسم من غير ما يبصلها: اه كويس الحمد لله،
هدي بصت لقاسم بوجع وسابته ومشيت
حسام: انا مش فاهم انت بتعامل والدتك ليه كده
قاسم بخنقه: مش موضوعنا، أنجز وقول، مين المهندس ده
حسام : ده ياسيدي اسمه، المهندس
مؤمن المرشدي
الحلقة الرابعة والعشرون من هنا