الحلقة الثامنة والعشرون والتاسعة والعشرون
بقلم شيمو الخطيب
الحلقه ٢٨
من (غمرتني عشق)
💕اللَّهُمَّ أنَْتَ رَبيِّ لَا إلِهََ إلَِّا أنَتَ، خَلَقْتنَيِ وَأنََا عَبدُْكَ، وَأنََا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ. 💕
بسم الله نبدأ
قاسم نايم على السرير وبيفكر في كل مواقف حازم معاه، ولعن نفسه انه حن ليه، وفجأه تليفونه رن وبص لقاه المقدم نادر
قاسم قام بسرعه ومسك التلفون ورد
قاسم: الو،،، ايوه يا نادر بيه،،، وصلت لحاجه
نادر اتنهد : قاسم، تقدر تقابلني دلوقتي
قاسم نزل الفون من على ودنه وبص فيه،،، ولقى ان الوقت متأخر لكن وافق : ايوه طبعا يا نادر بيه،، بس طمني الله يخليك، وصلت لحاجه
نادر : لما تيجي يا قاسم هفهمك،، قابلني في كافيه..... اللي في شارع.....
قاسم بحماس : نص ساعه بالكتير واكون عندك، مع السلامه ياباشا
قفل قاسم المكالمه، وعنيه دمعت من الفرحه، لكن جواه احساس مخوفه، مش عارف ليه الاحساس ده مسيطر عليه، يمكن لان طريقة نادر مقلقه شويه، لكن طرد الفكره دي من دماغه، وركز انه خلاص قرب من حبيبته،
قاسم قام بسرعه، غسل وشه، ولبس واخد مفاتيحه، وركب العربيه ومشي
حسام قاعد في البلكونه هو ورنا، وبيهزروا وسمعوا صوت عربية قاسم واستغربوا،،
حسام باستغراب : ايه ده!!!! ،، ده قاسم خرج يارنا
رنا: غريبه دي،!!! تفتكر يكون راح فين
حسام بقلق : مش عارف والله، انا هكلمه، واشوف،،، واتصل عليه
قاسم شاف الفون بتاعه بيرن وشاف اسم حسام لكن مردش، مش عايز حد يعرف هو فين، ولا بيعمل ايه، حابب يفاجئ الكل
حسام بأسف: للأسف مردش،، مش عارف ليه
رنا باستغراب : دي حاجه مقلقه قوي يا حسام، طب حاول تاني بليز
حسام : لا يا رنا، قاسم طالما مردش من اول مره، يبقى مش عايز يرد،وقرب من رنا وحضنها ،،،، بصي متقلقيش ياحبيبتي، هو يمكن مخنوق ولا حاجه، وحابب يقعد مع نفسه شويه
رنا بعدم تصديق: يمكن يا حسام، ربنا يفرح قلبه يا رب. ابيه قاسم من أطيب الناس اللي ممكن تقابلهم، وبصراحه صعبان عليا حاله قوي
حسام اتخنق من نفسه، ونفسه يظهر الحقيقه، لكن هيقول ايه، ولو فعلا قال مكان عشق، يبقى هيقوم النار من التاني، بعد مخلاص قربت تنطفي، ونفخ بضيق، ورنا حست بده،
رنا : ايه يا حسام، مالك سرحت في ايه
حسام بخنقه : مفيش يارنا،، تعالي ندخل ننام، عشان عندي شغل مهم الصبح
رنا استغربت رد فعله، لكن دخلت معاه وحاولت تخرجه من المود، وهو تجاوب معاها جدا، لأنها بتسحره بكل كلمه بتقولها،
----------- بقلم شيمو الخطيب
قاسم وصل الكافيه، وركن العربيه، ونازل منها بسرعه جدا، ودخل ودور على نادر لحد ملقاه
قاسم داخل بلهفه : نادر بيه، انا اسف لو كنت اتاخرت عليك،، بس يادوب والله مسافة الطريق
نادر قام وسلم عليه : ولا يهمك انا لسه واصل حالا، المهم اقعد بس واهدي كده، مالك بتنهج كده ليه
قاسم قعد قدامه : ها يا نادر بيه، قولي انك لقيتها،،طمن قلبي الله يخليك
نادر : مبدأيا كده بلاش كل شويه بيه، دي، خليها نادر بس، وبعدين انا فعلا لقيتها، بس عايزك تهدي، ونشوف هتقابلها ازاي
قاسم حط اديه ورا راسه، وضحك بوجع وفرحه، وعنيه اتملت بالدموع، وبقي مش عارف يسيطر على عواطفه، ونادر حس بيه، واتوجع قوي عليه، وبعد مكان مقرر انه هيقوله انها مخطوبه، رجع في قراره تاني، لأنه مش هيقدر يشوف كسرته، لأنه شايف حب حقيقي في عيون قاسم، مشافوش قبل كده
نادر: ايه يابطل، انت أعصابك هتتعب من اولها كده،، لااا، اجمد كده عشان تعرف تفكر صح
قاسم بفرحه: انا مش مصدق نفسي بجد، ومش عارف انا ممكن اقابلها ازاي، انا مجرد اني عرفت انك وصلتلها، ومش قادر اتلم على اعصابي، حاسس ان رجلي مش شايلاني. طب لما اشوفها قدامي هعمل ايه، انا حاسس ساعتها اني ممكن.....
انا بجد مش لاقي وصف لاحساسي ساعتها، زي بالظبط منا مش لاقي مسمى لحبي ليها، وهز راسه بعدم تصديق،،، نادر انت بجد مش عارف انا بحبها ازاي، عشق غمرتني بكل مشاعر الحب والعشق،،،، وضحك بدموع،،، كنا بنفكر مع بعض لمسمي لحبنا لكن للأسف ملحقناش ، بس خلاص، اكيد هنعوض كل اللي فات من عمرنا واحنا بعيد، المهم قولي يانادر، قولي مكانها فين،،،
نادر اتنهد ومش عارف يقول ايه،،، بص ياقاسم، انا طبعا هقولك مكانها فين، بس عايز افكرك انك متجوز، يعني لازم تفكر صح قبل متاخد اي قرار، اوعي تمشي ورا عواطفك وبس، عشان متهدش كل اللي انت حاولت تبنيه الفتره اللي فاتت، ومتخسرش حد، حاول بذكاء انك تكسب كل حاجه، ولو خسرت يبقى متخسرش كتير،، فهمتني يا قاسم
قاسم: فاهمك يانادر،، بس يلا قول، لقيتها فين،
نادر : بص يا قاسم، عشق موجوده في مستشفى الأمل.
قاسم بصدمه : عند امجد بيه،،
نادر : ايوه يا قاسم،،
------------- بقلم شيمو الخطيب
عند عشق
عشق قفلت مع محمد وطلعت صورة قاسم وعيطت بدموع، وقعدت تفتكر كل موقف حصل معاه، دفاعه عنها قدام جيجي، ضمته ليها، واحساسها معاه بالأمان وان هو السند، حبها اللي ادفن قبل ما يعيش،، حياتها وقلبها اللي وقف على حبه وبس، ومش عارفه هي بكده اكيد بتظلم محمد، لكن هي مضحكتش عليه، هيا صارحته بكل حاجه، وهو اللي حابب يكمل معاها، لكن للأسف، هي كل يوم حب قاسم بيزيد جواها، وخايفه من بكره، ومش عارفه هتعمل ايه، هل هتكمل مع محمد ولا خلاص تقوله انها مش قادره،،، فكرت كتير، وقررت كالعاده انها تسيب كل حاجه على ربنا، واللي ربنا عايزه هيكون، وقامت تتوضي، وتقرا قرأن، وتستني الفجر يأذن
فاديه خارجه من اوضتها بتستغفر، ولقت باب أوضة عشق مفتوح،، قربت من الاوضه وبصت لقيت عشق فارشه السجاده ولابسه الاسدال وبتقرا قرأن على مالفجر يأذن
فاديه: عشق حبيبتي،، انتي منمتيش ولا ايه؟
عشق بتعب: اتاخرت في النوم يا أمي، فقولت استني الفجر اصليه وبعدين انام
فاديه قربت منها وشافت الحزن في عنيها مسحت على رأسها وقالت : طب ممكن افهم حبيبتي عنيها دبلانه وحزينه ليه كده
عشق كان نفسها تعيط وتصرخ من كتر الوجع اللي جواها وكتماه، لكن للأسف محدش حاسس بيها ولا هيقدر يفهمها:
عشق: لا يا ماما، يمكن بس عشان اتاخرت في النوم،، لكن انا تمام الحمد لله
فاديه؛ هو انتي متخانقه مع محمد ولا ايه
عشق: لا ياماما، احنا تمام والله ، انتي ليه مش مصدقه ان انا كويسه
فاديه بخنقه : لاني امك يا عشق، انا فهماكي وعارفاكي كويس يابنتي، عارفه انك مش فرحانه، لكن مش قادره اتكلم معاكي. لاني عارفه سبب حزنك ايه، بس خلاص ياعشق، مبقاش ينفع، ولا بقى من حقك، يابنتي لازم تفكري في اللي شاريكي، لازم تفكري في مصلحتك، ليه عايشه في الماضي، والحاضر قدامك فاتحلك اديه وبيقولك انا قادر اسعدك
ليه عايزه توجعي قلبك وقلبي معاكي يابنتي، عيشي ياعشق، افرحي واضحكي واتبسطي ، متخليش الحزن يتملك منك يا حبيبتي، محمد محترم وشاريكي وعايزك، والأهم من كده انه فعلا بيحبك، اوعي تخسريه ياعشق عشان شويه اوهام في دماغك
عشق مقدرتش تسيطر على دموعها، وعيطت بهستريا: قاسم عمره ما كان وهم يا ماما، قاسم اكبر حقيقه في حياتي، مش قادره اشوف غيره،، مش عارفه اتخيل حياتي مع حد تاني ياماما، اه محمد كويس واي بنت تتمناه، بس إلا أنا، انا متمنتش الا قاسم وبس، ماما انا بجد.....
فاديه قاطعها بنرفزه : عشق، بقولك ايه، انا سمعت منك كتير، وإذا كنتي انتي مش عارفه مصلحتك ولا عارفه تفكري لنفسك وتمشيها صح، يبقى انا اللي هعرف امشيكي، ومش هسمحلك تخسري محمد عشان وهم اسمه قاسم ،
وايوه ياعشق قاسم وهم ولازم تنسيه، فوقي بقه قبل متضيعي كل حاجه من ايدك، وترجعي تندمي، (وبصت على السرير،، وقربت منه، واخدت صورة قاسم،،،) وصورة قاسم دي خلاص مبقاش ليها لازمه معاكي، قاسم مش من حقك ولا انتي من حقه،
عشق جريت عليها ومسكت اديها بعياط : بالله عليكي ياماما الا دي، دي الحاجه الوحيده اللي مصبراني على الدنيا،، عشان خاطري ياماما، انتي كده بتاخدي روحي، بالله عليكي الا دي، الا دي يا ماما
فاديه جمدت قلبها وزقت عشق واخدت الصوره وطلعت من اوضتها، وهي قلبها بيتقطع، بس خايفه على بنتها وعايزه تفوقها
عشق وقعت على الأرض وبتعيط بصوتها كله، وقامت بسرعه قفلت الباب عليها وجريت على السجاده، واترمت عليها تعيط بهستيريا
امجد سمع كل حاجه وقف قصاد فاديه :ليه يافاديه، ليه تجرحي قلبها كده، مكنش المفروض تعملي كده، كنا حاولنا نكلمها بالعقل، لكن كده انتي بتقضي عليها
فاديه بعياط؛ يعني هو انا يا أمجد مكلمتهاش.، ده انا تعبت كلام معاها، وزهقت من كتر نصايحي ليها، وهي مش شايفه ولا سامعه غير قاسم وبس، بس خلاص يا أمجد مبقاش ينفع، هو متجوز وهي مخطوبه، يبقى ليه تفكر فيه، وانا لو سيبت الصوره معاها عمرها مهتنساه
امجد: وانتي فاكره ان الصوره بس هي اللي مش هتنسي عشق، لا يا فاديه، قاسم محفور في قلب عشق، وعمرها مهتنساه مهما عملنا، لكن خلاص، هيفيد بايه الكلام، اللي حصل حصل
فاديه بخنقه: اديك قولت يا أمجد اللي حصل حصل،، وانا بصراحه مش عايزه بنتي تخسر محمد، لأنه بيحبها بجد، وخساره انها تبعد عنه
امجد بص، لفاديه بخنقه، وقال لنفسه، المشكله ان كلامها صح، لكن عشق صعبانه عليه،. وسابها وخرج يتوضي، وفاديه عيطت بدموع، وزعلانه انها كسرت قلب بنتها لكن هو ده الصح، من وجهة نظرها
؛-------------- بقلم شيمو الخطيب
نرجع لقاسم
قاسم بصدمه : امجد بيه،،، يعني عشق عند امجد،، طب ازاي، وافتكر سلامه ليه في فرحه، واتصدم اكتر،،،، يعني ممكن يكون عارف،، لا ده اكيد عارف،، (وبص لنادر) نادر،، انا مش فاهم حاجه، عشق بتعمل ايه في المستشفى،
نادر : ممكن تهدي بس وانا هحكيلك على كل حاجه
قاسم بص لنادر وسكت وبدأ نادر في الكلام وحكاله كل حاجه عرفها من على إلا موضوع الخطوبه، مقدرش يقوله عنه حاجه
قاسم فتح عينه بصدمه : بس انا سالت في مستشفى الأمل وملقتش حاجه ولا لقيت عنها أي معلومات
نادر: يمكن ساعتها فعلا مكانوش يعرفوا هي مين، ومتسجلتش الا لما فاقت،
قاسم : طيب بذكاء حسام، ازاي مقدرش يوصل لعشق، ده لو كان وصي اي عسكري عنده انه يدور عليها، كان زمانه وصل ليها، ازاي معرفش مكانها، وليه امجد بيه مقاليش، انا واثق انه كان عارف، ليه مكلمنيش ،
نادر : انت ليه بتفكر في اللي بيوجعك بس، ماتحاول يا قاسم تبص لنص الكوبايه المليان، عشق والحمد لله عرفت مكانها، وبقت في كليه طب، وبتكمل تعليمها وان شاء الله هتحقق حلمها، ليه بقه زعلان المفروض تفرح
قاسم بحيره : انا جوايا مشاعر ملخبطه يا نادر، انا مش عارف ولا فاهم، ليه كل ده حصل، انا كنت حاسس انها قريبه مني. لا كنت واثق. وكنت دايما بقول اكيد حسام هيفرحني ويوصل ليها، ولما حسيت ان مفيش امل، أو شكيت في حسام...... وسكت
نادر؛ انت ليه شكيت في حسام يا قاسم
قاسم؛ مش عارف يا نادر، بس حسيت للحظه انه مش عايز يدور عليها. مش عايز يعرفني مكانها ولا يريحني، بس ليه مش عارف،، لكن انا هسالك سؤال واتمنى تجاوبني عليه
نادر: اتفضل يا قاسم،.
قاسم: هو حسام، كان عارف مكان عشق،
نادر سكت ومردش
قاسم : انا حلفتك بالله يانادر،، اوعي تكدب عليا
نادر: والله يا قاسم مش.....
قاسم قاطعه : خلاص يانادر، من غير متحلف، انا كنت عارف، بس حبيت اتأكد، (وبص بعيد وسكت)
نادر قام وقعد جنبه : قاسم، اكيد حسام مش وحش، واكيد كان في عذر قهري منعه من انه يقولك، متظلموش وتحكم عليه في لحظة غضب،. اوعي تخسره يا قاسم ( وطبعا نادر واثق ان حسام كويس وحب انه هو اللي يعرف قاسم عشان يقدر يمتص غضبه)
قاسم بزعيق: اوعي اخسره،، انت فعلا بتوصيني انا عليه يانادر، طب هو فين،، انا فين بالنسباله، ده كان اكتر حد قريب مني،، اكتر حد كنت بعرف اتكلم معاه واحكي اللي جوايا كأني بتكلم مع نفسي،، اكتر حد كان بيخفف عني، لكن الحقيقه انه اكتر حد وجعني،،، ومسك راسه بين اديه وقال بوجع،،،، حسام وجعني اكتر من ابويا يا نادر،،، صدمتي فيه كانت أكبر صدمه حصلت ليا،، ليه،، ليه يعمل فيا كده،، ليه يسيبني بتعذب وبموت قدامه بدل المره الف وهو معاه العلاج وواقف ساكت،، ليه يبعني وعشان ايه يا نادر،،، ده يوم مقالي عايز اتجوز اختك مستنتش، ووافقت من غير مفكر، لاني واثق انه راجل بجد و هيصونها، ويحافظ عليها،، ده طلع ولا حاجه يانادر، ولا حاجه،
نادر مش عارف يعمل ايه، ولأول مره يحس انه مش قادر يتكلم ولا عنده حل ،
قاسم بص لنادر بدموع وبيحاول يداريها: انا اسف اني قلقتك يانادر،، وبشكرك بجد على موقفك معايا، وبجد انا بكل اللي مريت بيه ده،لكن احسن حاجه حصلت اني طلعت بصداقتك انت ومؤمن،، انا بجد مديون ليك بكتير قوي يانادر
نادر اتنهد بوجع وخايف عليه من انه يعرف خطوبة عشق، لكن مش قادر يتكلم ومخنوق، هز راسه لقاسم وسكت
وقاسم بصله وساكت خالص، وفاقو الاتنين على تليفون نادر، وكانت ولاء مراته بتطمن عليه، ونادر رد وطمنها وقفل على طول
قاسم وقف؛ انا اسف اني اخرتك يانادر، تقدر انت ترجع البيت، وانا هقعد هنا شويه وبعدين امشى
نادر وقف وسلم عليه : قاسم، انت قوي، وعمرك ما كنت ضعيف، وده ظهر ليا من اول مره قابلتك، اوعي تخلي الدنيا تكسرك يا قاسم خليك دايما اقوي منها، واعرف انه مهما عملت، كل حاجه ربنا هو اللي بيدبرها، يعني ربنا كاتب ان حسام يعرف وميقولكش، وده لحكمه معينه ربنا وحده اللي يعلمها، وانا سمعت حكمه قبل كده بتقول،..... لعل الخير يكمن في الشر،....... يعني كل حاجه شر بتحصلنا ، صدقني بيبقى المقصود بيها خير لينا ربنا واحده اللي عالم بيه، وزي ما بنقول، لو علمتم الغيب لاخترتم الواقع،، واجه مشاكلك بقلب جامد، وانا من معرفتي وخبرتي في الناس، احب اقولك ان حسام مش هتلاقي ارجل منه،، ولا هتلاقي حد بيحبك قده، حاول تقعد معاه بهدوء وتفهم منه هو ليه عمل كده،، قاسم،، انا مش عايز امشي وانا قلقان عليك، ودايما حط في دماغك الآيه دي
..... يُؤْتِكُم خَيْراً مِما أُخِذَ مِنكم... اظن فاهمها،،،
قاسم هِدى نوعا ما و ابتسم بحب: انا بجد مش عارف اقولك ايه يانادر، انت فعلا احسن حاجه حصلتلي الفتره دي، أو في حياتي،، وده بعد عشق طبعا،، وضحك،، ههههه
نادر ضحك: هههههه وانا راضي ياسيدي، اهم حاجه اني شوفت ضحكتك قبل ما ممشى ، ربنا يسعدك ياصاحبي
قاسم قام وحضنه جامد وسلم عليه،،: بجد الف شكر ليك يانادر، واسف بجد لو....
نادر: مبلاش بقه رسميات،، مؤمن كرهني فيها،،، وبصراحه انا حبيت كده، الرسميات دي بتبعد الناس عن بعضها. لكن انا و مؤمن بنحب نتكلم باريحيه، وده طبعا مش لأي حد، ده لناس معينه وبتبقي قريبه لقلوبنا،، زيك بالظبط يا قاسم،
قاسم: تسلم يانادر يارب، وأمانه عليك تسلملي على مؤمن كتير
نادر : يوصل ياكبير، هههه يلا سلام
وسلم عليه ومشي
قاسم قعد لوحده يفكر كتير، لحد ما الفجر اذن، وخرج راح المسجد اتوضي وصلي ورجع قعد في الكافيه لحد الصبح
------------- بقلم شيمو الخطيب
عشق قامت بعد ما صلت، واترمت على سريرها بوجع وتعب، وفضلت صاحيه لحد ما الصبح طلع، وقامت صلت الضحي، ولبست هدومها وخرجت
فاديه بتجهز الفطار واتصدمت من شكل عشق لكن مبينتش: صباح الخير يا عشق تعالي افطري ياحبيبتي قبل ما تطلعي
عشق بخنقه: لا شكرا ماليش نفس،،
فاديه بضيق: هو ايه اللي ماليش نفس، مينفعش تخرجي من غير فطار
عشق بخنقه : ماما عشان خاطري سيبيني براحتي بقه، انا هطلع لان في ادويه لازم المرضى ياخدوها، ومينفعش تتأخر، هخلص واجي افطر، يلا سلام وسابتها ومشيت، وفاديه قلبها بيتقطع على منظر بنتها
---------- بقلم شيمو الخطيب
عند حسام
رنا نامت بعد ما حسام طمنها على قاسم وقالها انه ان شاء الله مش هيتأخر ، بس هو اكيد مخنوق وهيلف شويه وهيرجع اما حسام منامش وقلقان على قاسم واتصل بيه كتير لكن قاسم مردش، واتصل من تليفون رنا عشان قاسم يرد لكن للأسف برده مردش
حسام ماسك التليفون وبيفكر ياترى راح فين، وليه مبيردش، لقى فيه رسايل اتبعتت لرنا على الواتساب وكان نصها
رنا حبيبتي،،، ها، جوزك نزل ولا لسه،
انتي وحشتيني قوي،
انا مش قادر اصبر اكتر من كده،
بقالي يوم كامل مسمعتش صوتك
رنااا، بجد وحشتيني
متنسيش تبقى تمسحي كل رسايلنا زي كل مره، عشان جوزك ميقفشناش، واوعى تنسى تلبسي البيجامه البينك، بموت فيها عليكي
هستني مكالمتك ياروحي
حسام اتصدم، واتصل على الرقم في ساعتها لكن كان اتقفل،، واقف مخنوق ومش مصدق ولا عارف هو ممكن رنا تكون بتخونه،، طب ازاي، وافتكر سلبيتها ، وشيطانه سيطر عليه، وافتكر لما جابها من القسم وكانت في شقه مشبوهه، وكل الأفكار السودا طاردته وبص ليها بغل، وشد الغطا من عليها وقال........
------------- بقلم شيمو الخطيب
في الكافيه
قاسم اتحرك من الكافيه ونفسه يشوف عشق، وقلبه فرحان انه خلاص وصلها، وركب العربيه، وطلع على المستشفى،
قاسم وصل وقعد في العربيه مش عارف ينزل ومش قادر يتلم على اعصابه،، اخيرا هيشوف حلم حياته. اخيرا هيرجع سعادته من تاني،
ولسه بيفتح باب العربيه اتصدم من اللي شافه...........
الحلقه ٢٩
من (غمرتني عشق)
💕اللهم إني اسألك يا الله، الأحد الصمد، الذي لم يلِدْ ولم يولد، ولم يكن له كُفُوًا أحد، أن تغفر ليَ ذنوبي إنك أنت الغفور الرحيم.💕
بسم الله نبدأ
عشق طلعت المستشفى، وبتمر على المرضى ودخلت أوضة مريضه
عشق بابتسامه : ماشاء الله على القمر، انهارده انتي احسن بكتير، ربنا يعافيكي دايما كده يا حاجه انتصار
انتصار: ربنا يراضيكي يابنتي ويجازيكي كل خير، دي كفاية دخلتك عليا، واني اشوف وشك الحلو ده كل يوم، بس انهارده شكلك انتي اللي تعبان مش انا، مالك يابنتي
عشق اتنهدت: لا يا حبيبتي ولا تعبانه ولا حاجه، انا بس مرهقه شويه، وكنت سهرانه امبارح ومعرفتش انام
انتصار بضحك؛ اااه اكيد بتفكري في د محمد،، الصراحه هو ابن حلال ويستاهل،
عشق اتوجعت قوي: تسلمي يا حاجه يارب، المهم بقه،، يلا بلاش دلع، معاد الحقنه،،
انتصار ابتسمت ليها ومدت اديها، وعشق ادتها الحقنه في الكانيولا
عشق: بالشفا يارب ان شاء الله،
انتصار: الله يباركلك يابنتي ويصلح حالك، ويسعد قلبك يارب
عشق؛ يااارب، تسلمي يارب يا حاجه انتصار، عن اذنك، ولو احتاجتي حاجه، رني الجرس اللي جنبك ده، وبسمه هتجيلك على طول، انا هوصيها عليكي
انتصار: تسلمي من كل شر يابنتي
عشق ابتسمت ليها ولسه هتخرح من الباب كان د محمد داخل وخبطوا في بعض وعشق كانت هتقع ومحمد لحقها وحاوطها باديه الاتنين
محمد عنيه اتعلقت بعشق، وبصلها ونسي الدنيا كلها، وعشق بصت ليه واتعدلت وزقت اديه بسرعه
عشق بكسوف : احم،، انا اسفه،، بس ما خدتش بالي والله.
محمد بيبصلها وفي دنيا تانيه خالص،
عشق اتكسفت؛ احم، محمد،،
محمد : ها،،، اه، انا معاكي، بس بصراحه كان نفسي اللحظه دي تطول
عشق بخنقه : نعم،، ايه يا دكتور،، بلاش كده
محمد : انا اسف والله، بس دي مشاعر مسيطره عليا وحبيت اقولهالك، على العموم انا اسف للمره التانيه
عشق: لا ولا يهمك خلاص، بعد اذنك
محمد مسك دراعها وعشق بصتله واستغربت جرأته
محمد: ايه ياعشق، انتي رايحه فين
عشق بضيق : انا هنزل افطر عشان الحق اروح الجامعه، اصلي بصراحه طلعت من غير فطار
محمد: طب بقولك ايه، ممكن متكسفنيش وتيجي معايا نفطر في المطعم اللي قدام المستشفى، بجد هكون سعيد قوي ياعشق،
عشق سكتت وبصت بخنقه بعيد
محمد: عشان خاطري ياعشق، لازم تساعديني،
عشق: حاضر يا محمد، مفيش مشكله
محمد بفرحه : تمام قوي انا هقلع البالطو واجي معاكي،
وفعلا قلع البالطو ونزلوا مع بعض،
-------------- بقلم شيمو الخطيب
قاسم قاعد في العربيه وبيحاول يهدي اعصابه،، وفتح باب العربيه ونزل، ولسه بيلف لقى عشق في وشه هي ومحمد
محمد اول ما نزل من المستشفى قرب من عشق ومسك اديها، وهي مخنوقه وشدت اديها من ايده ووقفت وقالت محمد عشان خاطري اديني فرصتي انا كمان، وسكتت مره واحده اول ماعنيها جت على قاسم
قاسم شاف الموقف من الاول، وطبعا معرفش عشق قالت ايه لكن شاف محمد وهو ماسك ايد عشق، ووقف مصدوم وحاسس ان تفكيره اتشل ومبقاش قادر يتحرك
عشق بصت على قاسم وعنيها نزلت دموع كتير من غير صوت، وكأن جواها بركان وهي كاتماه عشان ميدمرش كل حاجه
محمد استغرب من رد فعل عشق، وبص ناحية نظرها ولقى شاب واقف يبص عليهم وحالته نفس عشق بالظبط،،
قاسم قرب منهم بوجع وخنقه، وقرب من عشق وبص في عنيها وهي عنيها اتعلقت بيه،، ودموعهم الاتنين نزلت، ومحمد واقف وتقريبا استوعب الموقف
قاسم بصوت مبحوح :،، مين ده ياعشق
عشق بتبص ليه بس ودموعها نازله ومتكلمتش
قاسم مسك اديها : بلاش دموعك ياعشق،، ردي عليا، مين ده،،،،،،،، عشق ضغطت على ايد قاسم وكانها بتحضنه
محمد اتخنق من قربه ليها وزق ايده بعنف وضيقه: خير يا استاذ،، مش تراعي انها واقفه مع راجل،، ولا حضرتك مش شايفني
قاسم بصله بوجع، ونظرته وجعت قلب عشق، وقال : انت مين، وواقف معاها ليه؟
محمد ضحك: ههههه، بجد،، هو انت اللي المفروض تسأل ولا انا،، انت اللي مين وبأي حق تتكلم معانا كده
عشق واقفه وبتبص لقاسم بس وكأنها بتشبع منه لانه كان وحشها جدا
قاسم بنرفزه: لا،، لو على الحق، فأنا عشق دي حقي انا، انت بقه، باي حق تكلمني انا كده
محمد مستغرب من جرأته وثقته ان عشق فعلا ملكه واتغاظ اكتر : انت مجنون يا حضرة، عشق دي خطيبتي، يعني ملكي انا مش انت، فوق يا حضرة واعرف انت بتكلم مين
قاسم اتصدم وبص لعشق، وعشق نزلت وشها في الأرض
قاسم بصوت موجوع: عشق، هو الكلام اللي هو بيقوله ده صح،، انتي خطيبته ياعشق
عشق...... .........
قاسم بصوت عالي هز الكل : ردي عليا، ورفع وشها، كلميني زي ما بكلمك.، انتي وافقتي تبقى لحد تاني غيري ياعشق،
ساكته ليه، ردي عليااااا
عشق انهارت واتكلمت بعياط : ايوه وافقت يا قاسم،، وافقت زي ما انت وافقت تكمل حياتك مع واحده غيري،، انت اللي بدأت، انت اللي اتجوزت وصبرت نفسك انك بتنتقم، ازاي قبلت انك تبقى مع واحده تانيه غيري، ازاي قبلت تكمل حياتك معاها، ازاي قدرت تقعد جنبها يوم فرحكو، ازاي قدرت تعيش معاها كزوج وزوجه،عملت كل ده، وجاي دلوقتي تلومني اني اتخطبت، كسرت قلبي ودمرتني وجاي دلوقتي تقولي ازاي وافقتي،
قاسم بصدمه ومش مصدق اللي بيسمعه: انتي ازاي شايفه اني ممكن اكون قدرت اعمل كل ده،، ازاي شايفه اني قبلت واحده تانيه غيرك،، انتي اكتر واحده عارفاني، اكتر واحده فهماني، ليه دلوقتي بتحسسيني اني اول مره اعرفك،، هو انا اللي قولتلك اتخلى عني وامشي ياعشق، انا اللي قولتلك اسمعي كلامهم وبيعيني، انا كل كلامي ليكي كان، انك متسيبينيش ولا تتخلى عني،، وانتي اللي اختارتي البعد،، افتكري ان انا في يوم وعدتك وقولتك ان القلم اللي اخذتيه هيترد مليون قلم، وهو ده اللي انا عملته، حقك وجبتهولك ، واكبر دليل على كده انك لو سألتي اي حد وده سهل عليكي (يقصد حسام) كنتي هتعرفي علاقتي بجيجي كويس، واكيد حسام نقلك الصوره كويس
عشق اتصدمت وسكتت وبصت في الأرض
محمد بخنقه،، اظن كده كتير قوي، وكلامكو ووقفتكوا دي متنفعش، وبص لقاسم،،، استاذ قاسم، عشق مبقتش من حقك، وانت شكلك انسان محترم، وراجل وعارف يعني ايه واحد يبص لمراتك، فبلاش تتعرض لعشق مره تانيه، لأنها ان شاء الله هتبقى مراتي، وصدقني لو حصل واتعرضتلها، انا هتصرف معاك تصرف تانى مش هيعجبك،، وبص لعشق ومسك اديها وشدها
قاسم واقف موجوع من كلمة مراتي وغمض عنيه واتنهد بوجع كبيييير وبص لعشق اللي عنيها متعلقه بيه وبتعيط ومحمد شدها ومشيو وفضل قاسم واقف مكانه متحركش ولا بص عليهم، لكن عشق لفت وشها ورا وبتبص عليه ومش قادره تسيبه
قاسم واقف جامد مش قادر يستوعب اللي حصل، ورجع ركب عربيته ومشي، ومش عارف يعمل ايه
طلع على فيلا العزيزي ودخل بسرعه أوضة عشق، وثار وكسر كل حاجه فيها، ودموعه نزلت ونفسه يهد الدنيا كلها ، ومش قادر يصدق ان خلاص عشق من حقه،
زينب سمعته، وخافت تدخل عليه، طلعت بسرعه وخبطت على هدى، وهدي وقامت مخضوضه
هدي :ايه،،، ايه يازينب في ايه
زينب بخوف: الحقي ياست هدى، قاسم بيه بيكسر في الاوضه ومتنرفز على الآخر، ومش عارفه ايه اللي حصل
هدي لبست الروب بتاعها ونزلت بسرعه، وقالت: هو صحي امتى يازينب
زينب نازله وراها بسرعه؛ ده شكله منامش ياست هانم،، ده لسه جاي من بره
هدي: استر يارب،. استر يارب
فتحت باب الاوضه وكان قاسم واقف عند الشباك بينهج، والاوضه متبهدله ومكسر كل حاجه فيها،،
هدي قربت منه : قاسم ياحبيبي مالك يابني فيه ايه
قاسم زقها بعيد وبصوت عالي : ابعدي عني، محدش يتكلم معايا في حاجه، مش عايز اشوف حد،. اطلعوا كلكو بره،
هدي بعياط: طب فهمني يابني ايه اللي حصل، وايه اللي عمل فيك كده
قاسم بنرفزه اكتر: اطلعي برررررره، ابعدوا كلكو عني، مش عااااايز اشوف حد،، برررره
وزقها وقفل الباب
-------------- بقلم شيمو الخطيب
في اوضة رنا
حسام قرأ الرسايل وشيطانه صورله كل حاجه وحشه وسيطر على تفكيره،
وقام بغضب شد الغطا من على رنا وصحاها من النوم
حسام : رناااا، رناااا قومي
رنا قامت بسرعه : ايه ياحسام،، فيه ايه. ابيه قاسم جراله حاجه،. وقامت من على السرير
حسام بغضب: لا يا مدام رنا يا محترمه،، قاسم مجرالوش حاجه، (ومسكها من شعرها) ده انتي اللي هيجرالك لو مفهمتنيش ده ايييييه
رنا بدموع : حسااام، في ايه، انا مش فاهمه حاجه،آآآآآآه،، سيب شعري ياحسام
حسام زقها على السرير ورمى التليفون جنبها وبصوت عالي: تقدري تفهميني ايه ده،. ميييييين ده، وعرفتيه امتى
رنا مصدومه ومش قادره تستوعب هو بيتكلم عن ايه،، واخدت التليفون برعشه وفتحته، وفتحت عنيها على الآخر اول مقرت الرسايل
حسام بصوت عالى : فهميني ميييين ده،، واوعى تكدبي عليا، لاني هعرف الحقيقه بطريقتي
رنا مصدومه من الرسايل لكن اللي صدمها اكتر كان شك حسام فيها
رنا بعياط: حسام والله انا معرفش عنه حاجه،، انا اول مره حد يبعتلي الرسايل دي، وعمري مجتلي رساله ومسحتها،، حسام، اوعي تضيع حبنا في لحظة غضب عشان خاطري
حسام بصوت عالي: حبنا،،، حب ايه اللي بتتكلمي عنه،. انتي مستنيه مني اني اصدقك بعد اللي قريته،، ده عارف معاد نزولي ياهانم،، ومتعود منك على الكلام بعد منزل،، ده عارف الوان بيجاماتك يا مدام، ايه مستنيه مني اصدقك انك متعرفيهوش وقام ضربها بالقلم،،،، كان لازم اعرف انك عمرك مهتبقي انسانه سويه ابدا
رنا مصدومه وحطت اديها على خدها وقالت بعياط و بانكسار وحزن،، انت قولت ياحسام انك تقدر تعرف الحقيقه بطريقتك،، اتمنى انك تعرفها، لكن قبل متعرفها، انت لازم تطلقني ياحسام،.
------------ بقلم شيمو الخطيب
جيجي واقفه قدام أوضة رنا
وسمعت كل كلامهم وفرحت جدا اول ما رنا قالت كده،، وغير كمان سمعت نرفزة قاسم، وخافت منه لكن هي واثقه انه مش هيطلع، وحلفت جواها انها هتدمر كل اللي في البيت، بس بطريقتها
دخلت اوضتها واتصلت على علاء
جيجي؛ الو ايوه يا واد ياعلاء
علاء بنوم : اممممم، ايوه يا جيجي، انا لسه نايم من نص ساعه بس، كان لازم يعني تتصلي دلوقتي
جيجي بفرحه: قوم كده وفوق معايا،، خطتنا نجحت ورنا طلبت الطلاق من حسام
علاء قام بسرعه قعد على السرير: انتي بتتكلمي جد يا جيجي، يعني دخلت عليه
جيجي: يابني طبعا، انا مقولش حاجه وتفشل ابدا
فلاش باك
جيجي سمعت صوت عربية قاسم، وقامت وقفت في البلكونه، وسمعت كلام حسام ورنا وعلاقة حسام ومعاملته ليها، دايقت جيجي جدا،
دخلت وكلمت علاء انه لازم ينفذ انهارده
لكن هي هتقوله امتى بالظبط،
جيجي راقبت حسام وعرفت ان رنا نامت وحسام واقف في البلكونه بيكلم قاسم لكن قاسم مبيردش
دخلت بسرعه وكلمت علاء
جيجي : ايوه يا علاء، نفذ دلوقتي حالا
علاء: انتي متأكده يا جيجي،، انا خايف حسام ده يوصلي وده ظابط مش هيرحمني
جيجي : انت جبان كده ليه يابني، انت بعد متبعت الرسايل، تقفل الفون وتكسر الشريحه في وقتها،، وصدقني عمره مهيقدر يوصلك
علاء : طيب اكتب ايه
جيجي؛ عرفته يكتب ايه، و رجعت هي اللي بعتت الرسايل ليه، وهو اخدها نسخ وبعتها، وكانت طبعا عارفه ايه اللي يدايق حسام،
نرجع للوقت الحالي
حسام سمع كلام رنا، وسابها ولبس ونزل،
سمع قاسم وزعيقه، وطرده لأمه، كان هيمشي لكن هدى لحقته
هدي: حسام الله يخليك يابني ادخل لقاسم شوف ماله،، ده مبهدل الدنيا جوه وشكله مش مريحني، ادخله ياحسام بالله عليك
حسام مخنوق ومش قادر يتكلم حاليا، لكن دخل لقاسم
قاسم ضهره للباب: قولتلكوا مش عايز اشوف حد،، ولف وشه لقى حسام
حسام بخنقه : ممكن تفهمني مالك ياقاسم وكنت فين من امبارح
قاسم قرب منه ومسكه من هدومه : انت ياحسام،، انت تعمل معايا انا كده،، طب ليه،، عملت معاك ايه وحش عشان تعمل معايا كده،، اذيتك في ايه عشان تأذيني كده،، (وبصوت عالي) ليه يا حسام،، لييييه
حسام قلبه دق بسرعه، واتأكد ان قاسم وصل لعشق؛،،،، قاسم، انا كنت عايز اقولك،، ومليون مره فكرت اقولك لكن صدقني كان صعب،
قاسم قرب منه : صعب،،، هو ايه اللي صعب،، صعب انك تريحني،، ولا صعب انك تقولي الحقيقه،، ايه اللي صعب بالظبط ياحضرة الظابط،،. يعني عذابي قدامك مكنش صعب،، انا كنت تايه،، كنت غريق، ومتعلق بيك عشان تنجدني، تقوم تغرقني اكتر يا حسام،، عايز تموتني بايدك،، كان احساسك ايه وانت شايفني بتعذب وانت معاك الحل ومش راضي تنطق،،. كان احساسك ايه وانا مبنامش وبلف طول الليل والنهار في الشوارع بدور وانت برده معاك الحل ومش راضي تنطق،،. ليه يا حسااام لييييه
حسام اتخنق من كلام قاسم وقرب من قاسم: اقسم بالله حاولت كتير،، قابلت عشق وهي اللي حلفتني مقولش ، انا وافقت عشانك ياقاسم،، ممكن تقول عليا خاين، وتقول عليا مينفعش ابقى صاحبك،، لكن والله ابدا، انا محبتش حد في حياتي قدك،،. أنا لو كنت قولتلك على مكان عشق، كنت هفتح النار عليك،، كنت هخسرك شغلك وعيلتك وأولهم ابوك،، انا عارف انك بتحبها، لكن للأسف ساعتها مكنش ينفع ترتبطوا،، لأن مفيش اي توافق بينكو،، طبعا هتقولي انت بتفكر زيهم، هقولك لا، انا عمري مافكرت زيهم،. كل الموضوع اني قعدت مع عشق وفكرنا بالعقل، انت لو كنت اتجوزت عشق كان كل اللي حواليك مش هيسبوكو في حالكو،، كنت هتلاقي اهانه وقلة قيمه من كل الناس،، وكانت هتبقى موجهه لعشق مش ليك، الكل كان هيقلل منها، وبدل مكانت تتمنى قربك، ساعتها هتتمني تبعد، والحب اللي كان في قلبها وقلبك، مع الوقت و المشاكل والضغوط هتأثر عليه،، الجواز لازم يبقى فيه توافق ياقاسم،،. الحب مش هيعيشك بعد كده،، ولا هيخليك تستحمل ان واحد يقابلك ويقولك انت متجوز خدامه،، الكلام ده في الأفلام بس يا عزيزي، صدقني مع الوقت، حبكو كان هيبقى سبب خنقتكوا
عشق قالتلي الكلام ده وانا اقتنعت بيه، وقالتلي سيبني اثبت نفسي، ويوم معرفت انها هتكمل تعليمها قررت اقولك، لأن الظروف ساعتها هتختلف، خصوصا لما امجد بيه هيتجوز والدتها،، ساعتها ممكن نقول ينفع، لكن للأسف رحت وكانت عشق بتتخطب، وقتها اتصدمت صدمة عمري، وندمت اني مقولتلكش، لكن رجعت افتكرت كلمة عشق لما قالت
لو ربنا كاتبنا لبعض، مهما عملنا برده هنبقى من نصيب بعض، قولت لنفسي، اسيب كل حاجه لربنا وهو اللي هيدبرها
لأنك أنت كمان اتجوزت، عارف انه جواز على الورق، لكن قدام الناس جواز،، قاسم،، انا ممكن اكون غلطت،. لكن في فرق، بين غلط مقصود بيه اساءه وغلط تاني مقصود بيه إصلاح،، انا اسف لو كنت هزيت ثقتك فيا، لكن اقسم بالله ياقاسم انا محبيت حد قدك، ولا قصدت اني ابعد عنك حلمك،، كل الموضوع اني فكرت مخسركش كل حاجه،، وأن عشق لو من نصيبك، مهما الدنيا بعدتكو اكيد ربنا هيجمعكوا،، انا اسف ياصاحبي،.
قاسم واقف ومديله ضهره و سمع كل كلامه وسكت وفي الأخر. قال : ،،،، اطلع بره يا حسام،،،،
------------- بقلم شيمو الخطيب
عند عشق
محمد اخد عشق وقعدوا في المطعم، وهي عنيها على قاسم، وشافته وهو بيركب عربيته ومشي من قدام المستشفى، ونزلت راسها على الترابيزه وعيطت جامد، ومحمد قعد قدامها مخنوق ومش عارف يتصرف
محمد : عشق ممكن تقومي تتكلمي معايا، قولي كل اللي جواكي،. أنا هسمعك
عشق قامت بدموع؛ انا عايزه امشي يامحمد، عايزه أرجع البيت، وقامت وقفت
محمد: طب استني افطري ونمشي
عشق مسحت دموعها: اسفه ماليش نفس عن اذنك،، وسابته ومشيت وهي قلبها بيتقطع وجريت على الاستراحه فتحت الباب، وكانت فاديه وامجد قاعدين
عشق دخلت بسرعه وقفلت باب اوضتها عليها
فاديه وامجد قامو يخبطوا عليها لكن سامعين صوت عياطهاومردتش على حد
محمد خبط عليهم،. وامجد فتحله
امجد بقلق؛ تعالي يا محمد،، خير يابني عشق مالها
محمد باسف : للأسف يا أمجد بيه، قابلنا قاسم انهارده
فاديه شهقت، وقالت: قاسم،، فين وازاي
محمد: كان واقف قدام المستشفى، ووقفوا واتعاتبوا كتير، لكن هو عرف انها اتخطبت، واخد بعضه ومشي
امجد مسك محمد : لا تعالي بقه هنا وفهمني ايه اللي حصل بالضبط
محمد حكي كل حاجه، وفاديه قلبها وجعها على بنتها، ومش عارفه تعمل ايه وقالت لنفسها،، ، يعني ياربي بعد ما اخدت الصوره منها، يقوم يرجع بنفسه ليها،.، استغفرك ربي واتوب اليك،، لا حول ولا قوة الا بالله العلي العظيم
محمد: امجد بيه،، انا مش عارف اعمل ايه،، عشق حياتها كلها متعلقه بقاسم، وانا بصراحه صعب عليا اعيش في الوضع ده
فاديه بسرعه : لا يا محمد يابني، عشق مبقاش ينفع تتعلق بقاسم،، انت بتحبها، ولازم تدافع عن حبك ده وتفضل جنبها، قاسم متجوز، وأهله اهانوها كتير، وانا لايمكن اهين بنتي وارميها لناس مش عايزينها ابدا، حتى لو هخليها تدوس على قلبها،، محمد يابني، ساعدني نخرج عشق من الحاله دي، وانت يا أمجد، لازم تكلم قاسم يبعد عنها،، انا مش عايزه وجع قلب يا أمجد
امجد ومحمد سمعوا الكلام وسكتوا، ومحمد استأذن ومشي،
امجد راح ناحية اوضه عشق وخبط
امجد بزعل: عشق،، افتحي يا حبيبتي،، انا عايز اتكلم معاكي شويه
عشق بتعيط وبس،
امجد : عشق عشان خاطري افتحي
عشق قامت بتعب، وفتحت الباب، ودخل امجد ولسه فاديه هتدخل، وقفها باديه وشاور ليها تبعد ودخل هو وقفل الباب
امجد قرب منها ورفع وشها ومسح دموعها، ضمها لحضنه: ايه ياعشق، ليه عامله في نفسك كده،، مش انتي اللي اخترتي تبعدي وكنتي قويه ليه بتضعفي دلوقتي
عشق بدموع : مبقتش قادره يابابا خلاص،، تعبت،، حاسه اني كنت جبل وفجأه اتهد،،. تعبت والله العظيم تعبت
امجد مسح على حجابها: عشق، انتي كنتي دايما بتقولي كلمه،، ان اللي ربنا عايزه هيكون،، يعني سيبي كل حاجه على ربنا ياعشق، فين يقينك وثقتك بالله، ليه ضعفتي على طول كده،، احنا منعرفش القدر مخبيلنا ايه، تفائلي بالخير تجديه يابنتي،، قومي اغسلي وشك واتوضي وصلي وادعي وقولي
اللهم دبر لنا أمورنا فإنا لانُحسن التدبير،،،
وسيبيها على الله وهو اللي قادر يسعد قلبك يابنتي قومي يا حبيبتي
عشق بصتله بدموع وترمت في حضنه وعيطت، وهو ضمها جامد واتنهد بوجع على حالها، وبعدها عشق خرجت من حضنه، ومسحت دموعها ودخلت الحمام وامجد خرج من اوضتها و طلب من فاديه متتكلمش معاها في اي حاجه دلوقتي لحد ميفكروا هيعملوا ايه بالظبط
-------------- بقلم شيمو الخطيب
في فيلا العزيزي
حسام خرج من أوضة قاسم بسرعه، وركب عربيته مخنوق، وحس انه خسر كل حاجه في لحظه واحده وركن بعيد عن الفيلا، وسند راسه على الكرسي، وفكر في كل حاجه،، قلبه مش مصدق اللي حصل من رنا، لكن عقله مصدق،، وزعل على خسارته لقاسم ومبقاش عارف يعمل ايه، نفخ بضيق وشغل العربيه وطلع على الشغل
رنا شافت حسام مشي، نزلت بسرعه ودخلت على قاسم، وقالت،،
ابيه قاسم انا عايزه اطلق